مسرحية ( الحضيض )
عن النص الروسى ( الحضيض ) للكاتب الروسى مكسيم جوركى
سيظل واقعنا دائما هو العقاب وهو الدافع ..
سيظل هو الدرس وهو المكافأة وهو الخبرة ..
ليست المشكلة أن نكون دائما فى أفضل ظروف , ولكن فى ان نجيد التكيف مع الظروف التى نحن فيها .
هنا مجموعة عشوائية جمعتهم الظروف واحدة بخلفيات مختلفة ,
وحينما يكون الامتحان , تظهر النتائج ..
********************
( تفتح الستار على منظر بدروم ضعيف الاضاءة يفتقد التنسيق , حيث تتناثر الاغراض الشخصية لسكانة فى كل مكان وتختلط معا ولكنها لا تتجانس . منير هو ابن صاحب البيت , وماهر هو أحد السكان شابان فى بداية العشرينات يقفان سويا )
منير : قدمت فى الكلية ؟
ماهر : لسة
منير : طب ولسة لية ؟
ماهر : هاقدم ماتقلقش
منير : لا يا ماهر , انت مش زى الاول , فين حماسك لما كنت بتقولى انك مستعد تدخل تجارة تعليم مفتوح , ونسافر انا وانت ونشتغل فى اى حتة لغاية لما يبقى معانا فلوس نبدأ مشروعنا
ماهر : انا فعلا قلت كدة , بس انت لسة مستعد تعمل كدة ؟
منير : طبعا مستعد , جربنى وشوف
ماهر : صعب يا منير .. انت عندك حاجة تخليك تقعد هنا , اية اللى هايخليك تيجى معايا ؟
منير : علشان انا صاحبك
ماهر : وعلشان انا كمان صاحبك باقولك خليك هنا , اسمع كلامى .. انت مش هاتنفع معاك العيشة دى .
منير : مالكش دعوة انت , شوف انت بس مصلحتك وانا عارف مصلحتى كويس
ماهر : يعنى هاتكمل معايا ؟
منير : ما بقولك جربنى
ماهر : ماشى يا صاحبى
( يحتضنان , يخرج منير مسرعا بينما يتجة ماهر الى احد الاركان .. ثم تدخل دلال وخلفها صنارة )
صنارة : بت يا دلال ..
دلال : نعم ؟
صنارة : اية نعم دى ؟ ماتتعدلى يابت
دلال : طب استنى اقف على ودانى علشان اتعدل .. ما تتلم ياض
صنارة : فية واحدة تكلم جوزها كدة ؟
دلال : جوزها مين يا حرامى , بقى انا اتجوز حرامى ؟
صنارة : ما انا بقولك تعال نتجوز واعلمك السرقة اشرفلك من الشحاتة على المفارق وفى الاتوبيسات
دلال : لا يا شيخ .. وانت بقى بتسرق فين يا أمور ؟
صنارة : بس انا مش بامد ايدى واهين نفسى للناس
دلال : انا بمد ايدى علشان اخد الفلوس برضاهم , مش سرقة يا صنارة
صنارة : وهايدوكى كام برضاهم يا فالحة ؟
دلال : بص ياد يا صنارة ماتفتحش الموضوع دة تانى .. مش هاتجوزك يعنى مش هاتجوزك
صنارة : بنات وش فقر .
دلال : لا حوش انت العربيات والعمارات اللى هاتغرقنى بيها ,
صنارة : بتتريقى يا دلال .. ما اهو احنا لو اتجوزنا هنساعد بعض بدل الضنك اللى حنا فية دة
دلال : لا ياعم .. وانا ادخل لية السجن . ولا تدخل انت وتسيبنى لوحدى اربى العيال ؟
صنارة : الا قوليلى , هانسمى العيال اية ؟
دلال : دة بعينك
صنارة : هاتشوفى يا دلال , هاتروحى فين منى .. هاتخدى فريد السكرى ولا هاتتجوزى لمعى على مراتة , ولا تكونى بتحلمى تاخدى معتز ويرجع غنى زى زمان ؟
دلال : لا انا بحلم ابعد عن العالم الوبش دى كلها
صنارة : على رأيك . مصانعك اولى بيكى .. اهو دة اللى بيقولة المثل . شحات وطالب عيش فينو
دلال : اتريق براحتك , لما تدخل السجن هابقى اجى افكرك
صنارة : وابقى هاتيلى اولادنا معاكى علشان وحشونى قوى
دلال : جاك قطع لسانك
صنارة : ومالة . المهم ايدى شغالة
دلال : وانا اتعب نفسى معاك لية ؟ انا اروح اقضى مصالحى احسن
( تتركة مبتعدة بينما هو مازل يكلمها )
صنارة : بس برضة هاتوافقى يا دلال
( يدخل سليم صاحب البيت ويتجة نحو صنارة مباشرة )
سليم : وهو انت معاك فلوس تتجوز بيها ؟
صنارة : ما تخليك فى حالك ياعم سليم
سليم : هاخلينى فى حالك لما تدفع اللى عليك
صنارة : ما انا برضة ممكن اديهوملك , وارجع اسرقهم
سليم : ماهو بص , ماحدش هايدخلك السجن غيرى
صنارة : وماحدش هايدخلك الانعاش غيرى
سليم : هات م الاخر وادفع الايجار اللى عليك
صنارة : وهو انت ماعندكش غيرى , ماتشوف باقية الناس اللى قليمين نايمين سبهلكة
سليم : كلكم هاتدفعوا اللى عليكم , انا خلاص خلقى ضاق
صنارة : روح لترزى يوسعهولك , قلتلك اخر الشهر هادفع اللى عليا
سليم : اخر الشهر , لية .. مستنى المرتب , ولا لما ايجار العماير يجى
صنارة : ماهو طول ما الواحد وشة فى وشكم ما هايعمل حاجة , توب علينا يارب من القرف دة
سليم : طب قول ياتوب عليك من السرقة
صنارة : مش شغلك , انت ليك الايجار تاخدة
( لمعى الاسكافى داخلا من الخارج )
لمعى : مساء الخير
صنارة : مساء النور
سليم : خد هنا يا لمعى , فين باقى الايجار اللى عليك
لمعى : معلش يا استاذ , الفلوس اللى كنت هاديهالك جبت بيها علاج لصباح علشان تعبت قوى
سليم : وانا مالى ومال صباح , انا عايز فلوسى يا لمعى
( تأتى منال من الداخل )
منال : مابقولك مراتة عيانة , انت سايب الوبش اللى هنا وبتتشطر ع الغلابة
سليم : خليكى فى حالك يا منال , انا هاعملها اية مراتة
منال : ماتعملش , بس اصبر شوية ,, ماطارتش الفلوس
سليم : وانا هاصبر على مين ولا مين , الا ما فية واحد منكم دغع اللى علية فى معادة
منال : وهو احنا لو معانا كنا سكنا فى القبر دة ؟
سليم : وهو القبر دة ببلاش ؟
منال : ربنا يرحمنا منة ومن اصحابة
سليم : عن قريب انشاء الله , اهو برضة البيت ينضف
( ياتى ماهر )
ماهر : وبعدين ياعم سليم , انت لازم تسمم بدنا كدة كل يوم
سليم : انا ليا عندكوا اية غير الايجار , ادفعوا اللى عليكم وانا مش هاتكلم
ماهر : ماهو الرحمة مطلوبة برضة , الناس مش لاقية تاكل
سليم : عنها ماكلت , تدفع اللى عليها علشان تاكل حلال بضمير مستريح .. وبعدين انت خليك فى حالك , وابعد عنى وعن ابنى ..
ماهر : منير ؟
سليم : اة منير ؟ اللى طلعت بية من الدنيا .. عايزة بطلع زيكم ؟ بقى انا اربى ابنى علشان انت تطلعة زيك ؟
ماهر : هو اشتكالك ؟
سليم : وهو انا هاسيبة يشتكى . لو قاربت تانى من الواد هاطردك
منال : ياخويا سيبة , مش احسن مايطلع زيك
سليم : اخرسى يابت .. عاوزة ابنى انا يطلع سريح زيك ؟
منال : لا ربنا يستر علية , بس برضة مايطلعش زيك ولا زى امة
سليم : اخرسى يا منال , اخرسوا كلكم يا حوش .. مصيرى هأدبكم , وبعدين خدوا بالكم
فية ساكن جديد جاى معاكم , اياكم حد يتكلم معاه ؟
منال : تانى ؟
سليم : وتالت ورابع وعاشر , لغاية لما البدروم دة يجيبلى فلوس
ماهر : ودة هاينام فين ؟
سليم : وانا مالى .. اتحرقوا كلكم بجاز
( يخرج )
منال : الراجل دة مش هايموت موتة ربنا ابدا
ماهر : اهو اى موتة المهم نخلص
( تفرق المجموعة وتعود لاعمالها . يدخل فريد ومعتز )
معتز : حلو قوى المونولوج دا يا فريد
فريد : اة يا معتز بية , دة يومها الناس كلها صقفتلى وانا اندمجت قوى لدرجة انى كنت بادمع بجد
معتز : انت موهبتك عالية قوى , خسارة انك مكاملتش
فريد : الله يحرقها الخمرة , غيرتنى ,, انا ماكونتش كدة زمان يا معتز بية
معتز : عارف , انا ياما اتفرجت عليك وصقفتلك
فريد : بقيت حتى اضاءة المسرح مش طايقها , تصقيف الجمهور بيوترنى , مش عارف اكمل بروفة على بعضها .. تخيل يا فريد بية اقف على المسرح ومش عارف اقول اية ؟
معتز : انت لازم تبطل يا فريد علشان ترجع زى زمان
فريد : وحتى لو بطلت يا معتز بية , مش هارجع .. يعنى لو انت بطلت قمار ثاروتك هاترجعلك ؟
معتز : انا بطلت قمار علشان مش لاقى فلوس العب بيها . بس لو باطلت قمار هاغنى , ولو غنيت هاضيع ثروتى ع القمار من تانى
فريد ( يضحك ) : وانا لو رجعت ممثل تانى هافرح قوى واعزم اصحاب زمان كلهم على الخمرة
معتز ( يشاركة الضحك ) : علشان كدة ما هانرجع
( يدخل منصور العجوز بأمتعتة )
منصور : مساء الخير عليكم
( تتجمع المجموعة وتترقبة بأندهاش )
معتز ومنصور معا : مساء النور
ماهر : مين حضرتك ؟
منصور : انا عمك منصور , ساكن جديد معاكم
منال : ساكن جديد .؟ هو الدير ناقص رهبان ؟
ماهر : ياعم مافيش مكان . شوفلك حتة تانى تتسلبط عليها
لمعى ( متدخلا ) : اية قلة الادب دى ؟ اعتبرة ابوك يااخى
ماهر : أهى الكلمة دى اللى جايبانا ورا , أبويا الله يرحمة لو كان لسة عايش كنت موتة
صنارة : وهو جدو معاه فلوس ولا جاى ع الله زينا ؟
منصور : استريح الاول واجاوب على كل كلامكم .
دلال : دا جاى يستريح
فريد : اذا زعمت يا عزيزى انك سترتاح فى هذا العالم وانت لم تستيقظ بعد , هلم فافتح عينيك على اولئك المعذبون الذين فى هذا الركن من العالم . . أو هؤلاء الذين مازالوا يطعمون اوراق الشجر .. واذا كنت تعتقد انة لا قلب لك فلاحظ هؤلاء الصبية الذين بلا ...
منال ( تقاطعة ) : كفاية بقى , هى ناقصة قرف .. ربنا ياخدكم
معتز : هايل يا فريد , ودى من مسرحية اية بقى ؟
فريد : لا دا مونولوج كنت كاتبة انا بس عمرى ما مثلتة
منصور : هو انت ممثل ؟
فريد : اة يا جدى
منصور : هايل مجموعة هايلة
منال : مجموعة اية يا جدى ؟ , دا كان ممثل مغمور وقعد يشرب لغاية لما بطل فن ومابطلش خمرة , ودة بيقول انة كان غنى وقعد يلعب قمار لغاية لما خسر فلوسة كلها ومستنى يجيب اى فلوس علشان يلعب بيها , فاكر انة هايقدر يرجع فلوسة , والناس دى يا صايعة يا بتشحت يا بتتسلبط , هايلة منين بقى الله يسيئك ؟
دلال : اما الاخت اللى بتتكلم هى سيدة اعمال , عندها مشاريع متتعدش .. بس هى اللى سايباها وجاية تشجعنا
منال : انتوا اللى جايبنلى الفقر .. نفسى حتى افتح كشك صغير بدل م اللف والدوران فى الشوارع دة
معتز : وانا عليا اكلم اصدقائى فى البلدية يقفلهولك
منال : لا كلمهم انت بس يجبولك شغل
منصور : اية دة ؟ انتوا كل حياتكم كدة ؟ .. خليكم حلوين علشان الايام المرة دى تعدى
ماهر : هى ممكن الايام دى تعدى يا جدى ؟ يعنى ممكن فعلا الحال يتغير ؟
منصور : انت نفسك حالك يتغير ؟
ماهر : انا ؟ وانا هاعرف منين .. تفتكر انا لو بقيت غنى هاعرف اعيش .. مش عارف ؟ ما يمكن الغنى صعب برضة زى الفقير ؟ هاعرف منين ؟
صنارة : ياعم اغنى انت بس ولو مارتحتش هاسرقك انا وهارجعك شحات تانى
منال : شفت بقى يا جدى . الفقر المربع اللى احنا فية ..
منصور : انتوا بس مشكلتكم انكم اتعودتوا ع الواقع كدة
ماهر : ماهو بالعقل يا جدى , يعنى هانطلع وارثين حد مانعرفوش ؟ هايطلع لينا فلوس فى البنك كنا ناسيينها ؟
منصور : ولية ماتعملوش الفلوس دى انتوا الاول ؟
منال ( ضاحكة ) : الراجل دة طيب قوى
( يخرج لمعى مع صباح زوجتة المريضة ليمشيان قليلا )
لمعى : مساء الخير عليكم
معتز : ازيك يا لمعى , عاملة اية يا صباح ؟
صباح : عندى معاد مع ملاك الموت بس اتأخر عليا
لمعى : لية كدة بس يا صباح ؟
صباح : لية اية ؟ انتوا فاكرينى خايفة أموت ؟ ولا انتوا اللى خايفين عليا ؟ ع الاقل هاسيب القبر اللى محشورين فية دة واروح لقبر ليا لوحدى
فريد : مرة مثلت مسرحية عن واحد رايح القبر ومش لاقى حد يروح معاه , كل ما يطلب من حد من اصحابة ويعرف انة رايح القبر يرفض يروح معاه .. طلب من اعمالة تروح معاه لقيها هزيلة ومش شايلة نفسها .. لغاية ما لقى واحدة بس رضيت تروح معاه رغم انة مايستهلش .
معتز : مين دى يا فريد ؟
فريد : الرحمة .. الرحمة هى الوحيدة اللى رضيت تروح معاه
لمعى : الرحمة ! ياااااة حلوة قوى الكلمة دى
صباح : اة حلوة قوى .. بس بعيدة قوى
منصور : لية بس يا بنتى ؟
صباح : مش عارفة يا جدى .. انا دلوقتى شايفة ان الرحمة مش انى اخف , يمكن لو مت تكون الرحمة اكتر . أصل اللى بيموت مش بيعيا تانى
دلال : انتوا معقدين الدنيا لية كدة ؟ الدنيا حلوة قوى بس احنا اللى مش عارفين نتعامل معاها .. عارفين , الدنيا هى الوحيدة اللى ماعرفتش اشحت منها حاجة .. اصلها ماينفعش تديك غصب عنها . ممكن فى مرة تعدى تلاقيك قاعد كدة على جمب فتفتكر انها ناسياك من زمان . تحط ايدها فى جيبها وتديك اللى عاوزة تديهولك ... تبص انت فية تلاقية أقل من اللى ادتة للى جمبك .. تقوم تجرى وراها علشان تقولها اشمعنى انا ؟ بس هى خلاص شافت انك ماتستاهلش أكتر من كدة ولو جريت وراها هاتسقط فى نظرها وعمرها ماهتديك تانى ..
معتز : لا يا دلال انا بختلف معاكى
دلال : امال اية يا سعادة البية ؟
معتز : الدنيا مش شحاتة ابدا .. الدنيا دى بزنس كبير .. بزنس كبير قوى .. كل ما يبقى معاك اكتر كل ما تقدر تكسب أكتر
لمعى : طب واللى مش معاه خالص ؟
معتز : اهو دة بقى اللى بيغنى الباقيين .. تفتكر الباقيين كسبوا منين ؟ اكيد لان انت خسرت .. يبقى الدنيا دى مش بزنس .. انا عارفت الدنيا دى اية , الدنيا دى ترابيزة روليت كبيرة .. تفضل تلف علينا كلنا , ولو وقفت عندك هاتديك كل حاجة .. بس سا عتها هايبقى كل الباقيين حسروا .. بس انت مابيهمكش .. هاتدى اكتر علشان تكسب اكتر , بس هى هاتضحك عليك , هاتكسبك برضة .. لغاية لما تدفع كل اللى ف جيبك .. تروح مدياهم لواحد تانى وتبقى انت قاعد مش فاهم حاجة .. هو اللى بيحصل دة بجد , ولا هى كانت بتقرص ودنك علشان تقولك ما تعملش كدة تانى .. طب احنا ينفع نرجع اللعبة دى , ولا خلاص ؟
فريد: الغريبة بقى يامعتز بية زانك لو عديتها .. هاتعمل
نفس اللى عملتة
معتز
: مانا عارفز بس كنت باضحك على نفسى .. كويس انك خدت بالك
لمعى
: يعنى انت كنت بتكسب فلوس علشان تحطها على البارتيتة يابية واحنا مش لاقيين ناكل
؟
معتز
: وكلة محصل بعضة فى الاخر يالمعى .. المهم انها اديتك فرصتك وانت ضيعتها .
ماهر
: طب واللى لسة ماخدهاش ؟
منصور:
لازم هياخدها .. فرصتك عارفاك فين وهاتجيلك المهم تيجى تلاقيك فاضى
منال:
انا عن نفسى عارفة فرصتى فين ولما تيجينى هاتلاقينى واقفة على الباب
(
صنارة وصل توووووا)
صنارة
:انا عن نفسى فرصتى ممكن تكون فى جيب حد تانى
منصور
: عارفين . انا قعدت عمرة كلة مش عارف اية هى فرصتى اصلة سؤال صعب جدا : ازاى تعرف
ان دى فرصتك .. جربت كل حاجة وعملت كل حاجة .. كنت بخاف اسيب حاجة ماعملهاش هتكون
هى دى فرصتى وانا سبتها
لمعى
: وبعدين ياجدى ؟
منصور
: وبعدين يابنى اكتشفت ان اى حاجة بتعملها ممكن تكون دى فرصتك .فرصتك هى الللا
هاتكمل فيها
صنارة
:انا من زمان بقول كدة
معتز
: اة بس هو مش ع السرقة ياصنارةة
صنارة:
يعنى يابية اللى انت واللى زيك بتعملوة فينا دة مش سرقة ؟
دلال:
وانت هاتعرف تسرق زى الكبار ياعبيط ؟
منصور
: عارفين المشكلة اية ؟ اننا دايما شايفين اللى فى ايدينا مش كفاية
لمعى:
هو اية اللى فى ايدينا بقى ياجدى
منصور
: شوفوا احنا مع بعض ممكن نعمل اية ؟
صنارة
: ممكن نطلع ع صاحب البيت ونسرقة
فريد
: تصدق فكرة
ماهر
: لا انا عندى فكرة احسن .. احنا نموتة بالمرة . والبيت يبقى بتاعنا ومانضطرش ندفع
ايجار .
دلال
: ونطلع احنا فوق ونجيب سكان يقعدوا هنا يدفعولنا الايجار
منال
: ولو مادفعوش نطردهم ونجيب غيرهم
لمعى
: مابلاش السيرة دى
فريد
: لا لا . انا عجبتنى الحكاية دى .. تعالوا نكملها
منصور
: بس بقى كفاية
معتز
: لا لا مش كفاية . ماتيجى نمثلها يافريد
فريد
: فكرة يامعتز بية .. انا هاعمل سليم
دلال
: وانا هاعمل وفاء
(
يتخذان هيئة اصحاب البيت وهما داخلين )
دلال
: شوفلك حل فى السكان دول . انا خلاص تعبت منهم
\فريد
: لازم كل واحد يدفع الفلوس المتاخرة علية
دلال
: ما انت كل مرة بتقول كدة . وبرصة
مابتطلعش منهم حاجة
(
تصحك المجموعة )
فريد
: انت بتسخنينى عليهم . طب هاتشوفى .
دلال
: ورينى ياسبع البرمبة
فريد:
انتوا ياوبش . كل واحد فيكم يجيب الفلوس اللى علية يايلم عزالة دلوقتى
صنارة
(وقد اندمج فى اللعبة ): ماقلنا هاندفع اخر الشهر . هى طارت
دلال
: ما انتوا كل مرة بتقولوا اخر الشهر . ولما بيجى اخر الشهر بتدفعوا ملاليم
ماتساويش حاجة
( يندمج الحاضرون ويدخلون
اللعبة تباعا)
معتز
: خلاص ياسليم . اصبر عليهم وهايدفعوا
فريد
: انت تسكت خالص . ما انت زيك زيهم ... انت اخر مرة دفعت امتى ؟
معتز
: انا .. انا .. دفعت
فريد:
ماحدش فيكم مخلص اللى علية .. اتصرفوا وهاعدى عليكم اخر النهار
(
يجلسان بينما تضج المجموعة بالضحك )
منال
: اخر النهار اية اللى يخرب بيتك .. دة سليم الحقيقى مايقدرش يقولها
فريد:
انا عارف بقى .. اصلى اندمجت فى الدور
(
اثناء حديثهم معا . يدخل سليم وزوجتة فعلا )
سليم
: طبعا وهو انتوا وراكوا حاجة غير اللعب
(
المجموعة تقارن بين سليم وفريد فتنفجر فى الضحك )
وفاء
: بتضحكوا على اية ياغجر
(
المجموعة لاتتمالك نفسها )
سليم
: ماتضحكوش لية .. هو انتوا عندكم حاجة تعملوها جاتكم نيلة
فريد
: فية اية ياعم سليم . حتى الضحك هنا باذن
وفاء
: فية واحد جاى يشترى البيت
ماهر
: ياباشا اللة يخرب بيتك
سليم
: اتلموا انت وهو .. انا باتكلم جد .. فية واحد جاى يشترى البيت ع اول الشهر
الجديد .. وانا وافقت ابيعة
منصور
: ولما انتوا تبيعوا البيت .. احنا نقعد فين
وفاء
: وهو حد قالك انى دة ملجا .. دة بيت ايجار .. والحمد للة انكم مابتدفعوش الايجاء
يعنى ملكمش حقوق عندنا
منال
: اخيرا هانخلص من القرف دة
دلال
: ولما تخلصى من القرف دة هاتروحى فين ياختى
صباح:
طب انا عايزة حتة هادية اموت فيها
لمعى
: الف سلامة عليكى .. ماتقوليش كدة ياصباح
ماهر
: بس دة اخر الشهر قريب قوى
وفاء: ياخى ياريتة كان بكرة
دلال : طب احنا نروح فين يعنى
وفاء
: اى مصيبة تلمكم بعيد عن هنا
لمعى
: بس الكلام مايبقاش كدة ياسليم بية
سليم
: ما فيش كلام بينا اصلا .. انتوا مابتدفعوش الايجاء .. وانا هاطردكم .. دة حقى
بالقانون
وفاء
: ومش معنى اننا سكتنا عليكم كتير اننا منقدرش نمشيكم
معتز
: محدش قال كدة . بس بصى لحال الناس الغلابة دى يجيبوا منين كل الفلوس المتاخرة
عليهم قبل اخر الشهر
سليم
: معتز بية هو اللى بيقول كدة ؟
معتز
: وهو لو كنت انا لسة معتز زفت .. كان زمانى قاعد معاكم هنا
وفاء
: يعنى حضرتك مالكش معارف تدفعلك .. ما انت اكيد خيرك كان على ناس كتير
معتز
: اكيد خيرى عليهم .. وفضلوا فاكرينهولى لغاية مافقرت نسيوة
سليم
: انا ماليش دعوة بدة كلة .. انا عايز فلوسى كلها
دلال
: طيب حطوا نفسكوا مكانا
وفاء:
واحط نفسى مكانكم لية .. انا فوق وانتوا تحت
معتز
: علشان ممكن فى يوم تلاقى نفسك مكانهم غصب عنك
سليم
: وفاء. احنا مش هانقعد نحكى معاهم انا بلغتكم الرسالة وخلاص ,, هابعتلكم اخطار من
المحكمة علشان ابقى ماشى قانونى .. وقبل يوم واحد فى الشهر مش عايز اشوف وش حد
فيكم تانى
(
ياخد زوجتة ويخرجان)
لمعى
: هو سليم كان هنا فعلا ولا انا كان بيتهيالى .. انتوا شفتوة ياجماعة .. شفتة ياعم
منصور .. شفتة يامعتز بية يافريد ياماهر
.. شفتية يادلال يامنال ياصباح .. الراجل جة فعلا وقالنا امشوا ؟
ماهر
: ايوة . ماينفعش نبقى كلنا بيتهيالنا .. ماينفعش كلنا نشوفة وننكر
لمعى
: طب وبعدين .. اروح بالست العيانة دى فين
. هو احنا لو كان عندنا حل كنا قعدنا هنا
صباح
: سيبنى انت يالمعى وروح شوف حالك . على ما الشهر دة يخلص مش هاكون انا موجودة فى
الدنيا يالمعى
لمعى
: لا ياصباح ماتقوليش كدة .. انا عاوز اطلع من هنا علشانك انا هارمى جتتى فى اى
حتة هنام .. هو اللحم اللى بيوحشة الرصيف هايرتاح على السرير؟ هو الجوف اللى بتطعة
الزبالة يعرف انواع الاكل من بعضها ؟
علشان
خاطرى ياصباح اوعى تموتى دلوقتى .. استنى شوية .. استنينى لما اموت ياصباح .. موتى
وانا مش قاعد فى الدنيا اللة يخليكى
منصور
: وبعدين بقى يالمعى . اهدوا كدة خلونا نشوف هانعمل اية
ماهر
: هانعمل اية ازاى .. هو احنا نعرف نعمل حاجة
معتز
: ماهو احنا لازم نلاقى حل
(
الجميع مستغرق فى تفكير بينما تخيم حالة الاحباط على وجوههم)
صنارة:
مانقعد .هو يقدر يعملنا اية يعنى ؟
منال
: ماهى مش كل حاجة بلطجة ياصنارة .. الراجل عندة حق لو احنا بندفع الايجار مايقدرش
يطلعنا من البدروم لكن دلوقت يقدر يطلعنا فعلا
معتز
: خلاص يبقى احنا ندفع اللى علينا علشان يستنى علينا
صنارة
: البية جاب التايهه .. طيب ماهو احنا لو معانا فلوس ماكناش اتحطينا فى الموقف دة
دلال
: لا المرادى تفرق .. لازم نتصرف فى الفلوس . اصل لو طردنا هانروح فين ؟
ماهر
: هانروح ع الشارع
معتز
: لا الشارع لا . كلة الا الشارع .. انا قبلت بالمكان دة علشان محدش من اصحاب زمان
يشوفنى .. لكن اقعد ف الشارع والناس اللى كانت بتكلمنى بواسطة تقول شوفوا معتز بية
حالة وصل لاية وانا كنت ارمى نفسى فى النيل
منصور
: خلاص نشوف حل بدل الكلام دة
صنارة
: كل واحد فينا كان مدكن حاجة يطلعها
ونيهوملة على بعض
فريد
: وحتى لو مكفاش نقولة دة اللى معانا دلوقتى وهانشتغل ونديك الباقى اقرب وقت
لمعى
: بس اللى مايشتغلش لازم يشتغل
(
ينظرون لبعضهم البعض )
معتز
: حاضر . انا تقريبا الوحيد اللى ماشتغلتش فيكم
فريد
: وانا معاك
صنارة
: فاضل حاجة تانى . هانحوش عند مين
ماهر
: اكيد مش معاك انت
صنارة
: بتسخنونى ؟
ماهر
: يموت الحرامى وصوابعة بتسرق
دلال
: انا اللى هاشيل الفلوس
فريد
: لا
دلال
: لا لية ؟
منصور
: خلاص خلاص . ماشى
لمعى
: تضمنوها
(
المجموعة توافق )
دلال
: على بركة اللة
معتز
: ربنا يستر
دلال
: لية بقى , انا لا حرامية .. ولا هاروح اشرب بيهم .. ولا هالعب بيهم قمار يابهوات
(
المجموعة تسكت)
دلال
: هاتوا بقى اللى معاكم .. واوعوا حد فيكم يدكن حاجة احنا فى اسود ايام هانشوفها
منال
: اهى بقيت مامور ضرايب
دلال
: طب طلعى يا اختى
منال
:لما كلة يدفع انا هادفع
دلال:
وبعدين مش هانخلص .كلة يدفع ياجدعان
( يخرج كل منهم مامعة ويدفعة )
صنارة
: بت يادلال . معاكى كام دلوقتى ؟
دلال
: خليك فى حالك
صنارة
: مااشى
دلال
: كلة كدة دفع حد مدفعش . عم لمعى انت مدفعتش
لمعى
: طيب الفلوس مع صباح هاجيبهالك
(
يتجة لمعى الى صباح التى رقدت فى الركن مستندة للحائط
لمعى
: صباح معلش هاخد من فلوس العلاج بدل مانطرد وقبل ماتعوزية هارجعهولك
منصور
: ياعم سيبها نايمة هى الفلوس هاطير
لمعى
: لامعلش اخركم لية طالما كلكم دفعتوا
معتز : سيبها بس ولنا تقوم خدعم
لمعى
: لا انا عاوزها تقوم دلوقتى علشان اطمن عليها صباح قومى . مش انتى بخير قومى
دلال
:ياعم سيبها تريح ماحصلش حاجة
لمعى
:لا لازم تقوم دلوقتى .هى مش بترد عليا لية
فريد
:هاترد عليك بس تعالى
(ياخذونةلمقدمة
المسرح ويلتقون حولة .بينما البنتان اعلى المسرح لفحصاتها)
لمعى
:هى صباح ماتت كدة ياعم منصور
منصور:
.يا ابنى الف بغد الشر عليها هى يمكن تعبانة ولا حاجة لو مغمى علييها ممكن نوديها
المستشفى
لمعى
:لا هى مش هاتروح المستشفى ..هى مش هاتلحق تروح اى حتة
معتز
:لية كدة بس يالمعى .مراتك كويسة ؤبخير
(البنتان
تاتيان وتشيران لمنصور ان صباح ماتت )
لمعى
:مالها فيها اية
منصور
: لمعى اهدى
لمعى
:تبقى ماتت .صباح ماتت.. حتى لو هى نفسها جات قالت لسة مافوتش تبقى كدابة ..اصلها
ميتة من زمان .من قبل حتى ماهى تعرف انها ماتت
منال
:هى استريحت ياعم لمعى .اهى خلصت م اللاحنا فية
لمعى
:يعنى ماتت .انا كنت عارف انها هاتموت .ز وهى كانت عارفة .. صح ياصباح .مش انتى
كنتى عارفة ..كلهم كانوا عارفين ..ملاك الموت اول مرة يتاخر كدة على معادة
فريد
:هدى نفسك شوية
ماهر
: طب احنا مش هانروح ندفنها ولا حاجة
لمعى
: لا خلوها .. خلوا ريحتها تفكرنا اننا ميتين .. خلينا نفتكر ان دة قبرنا مش سكنا
معتز
:انا ف رايى ندغنها بالفلوس اللى جمعناها . ويحصل اللى يحصل
فريد
: انا موافق
ماهر
: وانا معاكم
منصور
: هاتى يادلال الفلوس وعديها
منال
: دلال مش هنا
منصور
: امال هى فين
منال
: معرفش . بعد ماشفت صباح جيت اقولك مشوفتهاش
معتز
: تلاقيها مستحملتش وخدت جنب وبتعيط
منصور
: مش وقت عياط قوليلها تيجى
منال
: حاضر
(
تتحرك للبحث عنها)
معتز
: شد حيلك بقى يالمعى
لمعى
: هو الواحد بيشوف الدنيا ازاى لما عينية بتطفى
منصور
: وبعدين بقى . خليك راجل
ماهر
: انت قدها وقدود ياعم لمعى
لمعى
: انا . طب لية انا . لية انا بالذات كل دة
فريد
: لية انت ؟ طب لية انا ؟ لية هو وهى ودول كلهم ؟ السؤال مش لية .. السؤال لغاية
متى ؟
(
تاتى منال لاهثة )
منال
: مش موجود خالص
منصور
: يعنى ايى مش موجودة
منال
: مالقتهاش فى اى حتة فى البيت
صنارة
: طب والفلوس فين ؟
(
ينظر الية الجميع الجميع كانهم فهموا مقصدة )
منال
: اكيد فى اى حتة هنا
صنارة
: طيب انا هتاكد
ماهر
: وانا معاك
(
يتحركان للبحث عن الفلوس )
صنارة
: يبقى دلال سرقتنا ؟ اللى كانت عاملة فيها شريفة تسرقنى انا ؟
ماهر
: ولية ماتكونوش متفقين مع بعض علينا ؟
صنارة
: اية ياماهر . انت بتقول اية ؟
ماهر
: عملتوا علينا التمثيلية دى علشان ترقونا وتهربوا انتوا الاتنين
صنارة
: وهو لو انا متفق معاها . هاقعد لية دلوقت
(
يتحول الحوار بينهم الى همس خافت . بينما يتجة لمعى الى صباح )
لمعى
: يعنى مافيش فلوس . ومافيش بيت . ومافيش صباح طيب هايفضل اية ؟ اخدها فى حضنى زى
زمان ةالف بيها الشوارع .. بس مش هاحس بنفسها . اشيلها من غير ما احس بقلبها بيدق
بين ايدى .. طيب اعيش انا لية وفين وعلشان مين ؟
معتز
: شد حيلك شوية يالمعى .. معلش البركة فيك
(
فى الناحية الاخرى شجار ماهر يزداد )
ماهر
: يعنى دلال فجاة كدة بقيت حرامية .. اكيد هو اللى وزها تسرقنا
منال
: مش محتاجة تكون حرامية .. يعنى لما تلاقى فلوسنا كلها وسط الضنك دة . اكيد هتعمل
كدة
فريد
: يعنى انتى لو كنتى مكانها كنتى سرقتنا ؟
منال
: وانت لو كنت مكانها كنت تسرقنا
ماهر
: يعنى كلكم فى الاخر حرامية ومالكمش امان
منال
: كلنا محتاجين ياماهر . ودى فلوس .. عارف يعنى اية فلوس
صنارة
: قولى كدة يبقى انتى اللى اتفقتى معاها
منال
: لم نفسك ياحرامى .. يبقى حرامى ويجى يتهمنا بالسرقة
صنارة
: انتى اللى كنتى معاها
منال
: انا كنت بشوف صباح وهى خدت الفلوس ومشيت
فى
ناحية اخرى منصور يلم عزالة )
منصور
: طالما كدة كدة ماشيين . نمشى بكرامتنا قبل مانتطردالشارع اللى جينا منة يلمنا
(
لمعى بجانب صباح )
لمعى
: طب انا امشى ازاى وهى هنا ؟
معتز
: انت لازم تدفنها الاول
لمعى
: واحط روحى فى القبر واهيل عليها التراب يرضيك اندفن يامعتز بية
معتز
: الحى ابقى من الميت يالمعى
لمعى
: الميت خد الحى معاة
(
شجار ماهر )
ماهر
: ماهو حد سرقنا ولازم نعرفة
منال
: اللى سرقتكم خلاص مشيت .. روحوا دوروا عليها بدل ما انتوا ماسكين فى بعض كدة
صنارة
: وهى هتستناكم .. دة اكيد زاغت بيهم .. هو احنا ناقصين ( يضحك بسخرية ) بقى انا
اتسرق . انا ؟ ومن مين ؟ م اللى كنت عاوز اعلمها السرقة ومش راضية كانت بتشتغلنى
دلال وهى عاوزة تسرقنى
منال
: خلاص بقى انتوا هاتعددوا زى الولايا .. ماهو ياتروحوا تدوروا عليها .. ياتشوفوا
هانعمل اية مع سليم
صنارة
: دة سليم دة حكاية تانى خالص
ماهر
: يعنى هانعملة اية احنا دلوقتى . حتى اللى كان معانا راح
لمعى
: راح ومش جاى .. راح وسابنى هنا لوحدى . كنتى تقولى ياصباح .. قولى انك عاوزة
تموتى . نتفق فى الاول مش كل حاجة عملناها سوا . اشمعنى دى تعمليها لوحدك كنتى
خدتى رايى
ماهر
: رايى اننا نقف كلنا ضد سليم .. يعنى تفتكروا اية اللى ممكن يحصل
(
منصور انهى جمع متاعة . يودع المجموعة ليخرج )
منصور
: يحصل اللى يحصل بقى .. انا هارجع زى ماجيت
صنارة
: لية بس ماتخليك . ما انت جيت وجبت الخير كلة معاك
منصور
: كتر خيرك يابنى
منال
: معلش مايقصدش .. بس انت هتروح فين ؟
منصور
: مش عارف .. بس يمكنن اروح دلوقتى بمزاجى .. بدل مايودينى سليم بعدين
ماهر
: سليم ميقدرش يعمل حاجة . وانا مش هاسكتلة
منال
: يعنى هاتعمل اية ؟
ماهر
: معرفش بس احنا ممكن نعمل اية يعنى . هانجيبلة فلوس منين ؟
منصور
: على الاقل انا لميت عزالى على مهلى . بدل ما يجى يقولى امشى دلوقتى
معتز
: ياعم منصور خلينا مع بعض ونشوف هانعمل اية
منصور
: يعنى لما تقعدوا مع بعض هاتعملوا اية . انتوا هتمشوا هاتمشوا
منال
: عندك حق
منصور
: حد منكم جاى معايا ؟
(
المجموعة تصمت فيخرج دون ان يودعهم)
منال
: يعنى دلال هربت .. ومنصور مشى . وصباح استريحت وانا اللى قعدت فى الفقر دة
صنارة
: استنى كدة .. ( مفكرا ) فية حاجة غلط
ماهر
: انت بتفكر فى اية ؟
صنارة
: فية حاجة ورا الراجل دة
منال
: عم منصور ؟
صنارة
: الراجل دة ماكملش حاجة معانا والفلوس اتلمت واختفت وهو اختفى وراها
ماهر
: انت هتقعد تشك فى كل واحد شوية . وانت محل شك اصلا
صنارة
: ماهر .. احترم نفسك !
ماهر
: انا مش مستريحلك اصلا
صنارة
: شاللة ماعنك ارتحت .. خليك فى حالك وسيبنى فى حالى . انا مش ناقص
ماهر
: وانا كمان مش ناقص كل اللى بيحصل دة
(
لمعى وحدة مع جثة صباح )
لمعى
: ممكن اخدك ونروح بعيد ونعيد الحكاية م الاول ؟
(
الشجار يزيد الناحية الاخرى )
منال
: الراجل دة غريب قوى
ماهر
: الواحد مبقيش عارف يصدق مين تفتكر ياصنارة مين ممكن يقول الحقيقة ؟
صنارة
: الوحيد اللى ممكن يقول الحقيقة دلوقتى هى صباح
ماهر
: عندك حق
منال
: يعنى ممكن يكون دلوقت هو رايح يقابل دلال ؟
ماهر
:انا هاروح وراة اتاكد
(
ينجة ماهر خارجا فيقابل منير داخلا )
ماهر
: منير ؟!
منير
: ماهر .. كويس انى لقيتك .. عايزك ضرورى
ماهر
: اتفضل
منير
: خد بالك ياماهر .. بابا مصمم راية ع انة يمشيكم . هو بيتكلم جد المرة دى . انا
جيت اقولك قبلها علشان تلحقوا تتصرفوا
ماهر
: بقى كدة . السيد الوال باعت ابنة يعمل فيها طيب وينصح قبل ماهو يطردنا بالقانون
منير
: اية اللى بتقولة دة .. انا جايلك من نفسى
ماهر
: ياسيدى كتر خيرك
منير
: طبعا انت مش هاتصدق
ماهر
: مش هاتفرق
منير
: علشان خاطرى ياماهر امشى .. روح اى حتة وانا هاحصلك
ماهر
: كل دة مش هايحصل يامنير .. لا انا هامشى . ولا لو مشيت انت هاتحصلنى
منير
: معلش ماتقفش فى وش بابا المرة دى
ماهر
: قول بقى ان دة اللى انت جاى علشانة
منير
: طيب افهمك ازاى .. الموضوع كلة غصب عنى . بس انت مش هاتقدر
ماهر
: برضوا مش هاتفرق
منير
: لا هاتفرق .. اسمعنى بعقلك مش بعواطفك .. ابويا عاوز يجوزنى بنت واحد غنى .. وهايبعلة
البيت دة . ابويا عاوز يكسب قرشين .. يبيع البيت وبرضة يفضل بتاعة لانى متجوز بنت
الراجل اللى هايشترىة بس صدقنى . وحياة صداقتنا انا ماليا اى راى فى الموضوع
ماهر
: ماتحلفش بحياة حاجة ميتة اصلا !
منير
: يعنى مش هانتفق
ماهر
: غلط اصلا اننا نحاول نتفق
منير
: طب انا بلغتك ياماهر
(
يدخل سليم ووفاء )
سليم
: منير بتعمل اية هنا ؟
ماهر
: جاى بوصل رسالتك ياسليم بية
سليم
: رسالتى ؟
منير
: انا اسف يابابا .. انا اسف ياماهر
وفاء
: اطلع فوق واياك اشوفك هنا تانى
سليم
: على العموم . على ماينزل هنا تانى هايكون البدروم فاضى
منير
: مع السلامة ياماهر
(
ينظر لة ماهر ولا يرد .. يخرج منير مسرعا )
وفاء
: انا قلتلك الناس دى ماتمدلهاش ايدك بدل ماتعضها
سليم
: انا اللى غلطت وهاصلح غلطتى
وفاء
: بعد اية . اهو الواد شبط فيهم
سليم
: ولا شبط ولا حاجة . هما هايمشوا دلوقت . يالا كل واحد فيكم يلم حاجتة .. مش
هاطلع من هنا غير لما يخرج اخر كلب فيكم
ماهر
: يبقى مش هاتطلع من هنا اصلا
سليم
: انت بتهددنى ياماهر ؟
ماهر
: ماحدش من هنا هايخرج غير لما يبقى عارف هايروح على فين
وفاء
: مايروح على اى مصيبة . البيت بتاعنا وصاحبة جاى يستلمة
صنارة
: يستلمة بجثثنا بقى
سليم
: ودة اية دى بقى ؟
صنارة
: احنا هنا ياقاتلين يامقتولين
وفاء
: احترموا نفسكم وامشوا من سكات بدل ما الشرطة هى اللى تمشيكم
(
يتقدم ماهر ويواجة سليم وجها لوجة )
ماهر
: ماهو بص ياسليم . انا ياما حشت نفسى عنك .. مرة علشان معملش مصيبة بسببك . ومرة تانى علشان ابنك اللى كان صاحبى . ومرة
علشان الغلابة دول
سليم:
انا بقى مش مضطر احوش نفسى عنك
ماهر
: انما انا بقولك اهو . مافيش حاجة من دول فاضلة واذا ماسبتش الناس دى لغاية
مايتصرفوا . مفيش حاجة هاتحوشنى عنك
سليم
: انت بتهددنى ياصايع ؟
ماهر
: انا اة صايع . اة مفلس . اة مكملتش تعليمى . اة اخلاقى وتربيتى شوارع .. لكن
راجل . باحس بالنس وعمرى ماطلعت ندل مع حد
سليم
: طب لما انت شهم كدة خد الناس وامشى بدل مايتسجنوا بسبب شهامتك
ماهر
: بقولك ماتقدرش تعمل حاجة مع حد
سليم
: دة تهديد ؟ طب شوف كدة
(
يتحرك ياخذ متاعهم ويرميه خارجا )
سليم
: يلاا برة . كلكم برة ياحوش .. انا سكت عليكم كتير كفاية كدة
ماهر
: سيب كل حاجة مكانها
(
سليم مستمر فى رمى متاعهم خارجا . حتى يصل متاع ماهر نفسة ويرمية )
ماهر
: بقولك سيب كل حاجة
سليم
: انت نفسك برة
(
سليم يدفع ماهر خارجا .. فيمسك ماهر بخناقة . ويتحول الى شجار بالايدى )
ماهر
: طب انا بقى اللى مش هاسيبك
(
ياخذ ماهر شيئا امامة . ويضربة بة على راسة فيسقط سليم على الارض فورا )
ماهر
: قلتلك مش هاسيبك
وفاء
: ( تصرخ ) سليم
(
تاتى منال صارخة )
منال
: انت عملت اية فى الراجل ؟
ماهر
: خد نصيبة بقلا
وفاء
: موت الراجل .. يامنير
(
لا يبدوا اى شغور بالخوف او الترقب على
ماهر )
ماهر
: كدة كدة كان لازم يموت
صنارة
: طيب نلحق نهرب احنا بقى
وفاء
: يامنير
ماهر
: نهرب فين . احنا عملنا كل دة علشان نهرب
منال
: خلاص . خليك انت .. مش انت اللى موتة .. اقعد استنى انا الاعدام لية ؟
معتز
: احنا لازم نقف جنب ماهر
ماهر
: روحوا انتوا وسيبونى .. مش لازم كلنا نضيع مرة واحدة جايز انتوا لسة عندكم سليم
تانى تضيعوا علشانة وفاء : يامنير
(
عندما لايستجيب تخرج مسرعة لتاتى بة )
منال
: مش وقت عواطف ورجولة فاضية دلوقتى . يلا نهرب دلوقتى وبعدين ابقى يحلها ربنا
ماهر
: وهى الرجولة لو ماجتش دلوقتى هاتيجى متى
منال
: يا اخى انشاللة ماعنها جت
ماهر
: اللى عاوز يمشى يمشى .. انا قاعد . هو انا خايف !!
معتز
: وانا مش هاسيبك ياماهر
فريد
: ولا انا . ادينا مع بعض واللى يحصل يحصل
ماهر
: طيب خلوا لمعى على الاقل يمشى . هو مش ناقص
صنارة
: طيب وصباح هايوديها فين .. خلية يمكن الشرطة تدفنهالة
منال
: يعنى كلكم موافقين على المشنقة ؟!
ماهر
: روحى انتى يامنال . انتى مش هتستحملى المرمطة دى
منال
: طيب اروح انا احسن الشارع وحشنى . عاوزين حاجة نتقابل فى ظروف احسن من كدة
(
تخرج مسرعة )
صنارة
: طب احنا هنعمل اية دلوقتى
ماهر
: فية حاجة لازم نعملها فى الاول
(
يتجة مسرعا الى لمعى )
ماهر
: عم لمعى .. عم لمعى
لمعى
: ( يرفع راسة بصعوبة) : مين .. ماهر . فية اية ياماهر ؟
ماهر
: ياريت تمشى دلوقت علشان الشرطة جاية
لمعى
: الشرطة لية صباح ماتت موتة ربنا
ماهر
: مش علشان صباح ياعم لمعى
لمعى
: امال جايين لية .. هو حد فينا عمل حاجة ؟
ماهر
: بعدين اقولك .. المهم امشى دلوقتى احسن
(
يدخل منير . بينما يتجة لمعى للكالوس الاخر
)
منير
: تمشوا تروحوا فين .. واضح انكم مشرفينا شوية
ماهر
: منير !
منير
: قلتلك امشى المرة دى
ماهر
: مش بمزاجنا صدقنى
منير
: شفت ياماهر لو كنت سمعت كلامى م الاول .. كان الموقف اتغير خالص
ماهر
: دة طريق اجبارى يامنير .. لازم كلنا نوصل لكدة طالما انا كدة وانت كدة وهو كدة
منير
: لية ؟ تقدر تقول لية ؟ لية كنت دايما يايف انها مش هاتتغير .. لية دايما شايف
انها غصب عننا ؟ لية حتى ماحولتش يا اخى ؟
ماهر
: لا الاتنين الوحيدين اللى حاولوا هما
دلال وصباح كنت عاوزنى ابقى زى مين فيهم
(
صنارة اتيا من الداخل )
صنارة
: ولمعى
ماهر
: مالة لمعى ؟
(
صنارة يشير للداخل دون ان ينطق )
ماهر
فية اية ياصنارة ؟
صنارة
: لمعى جوة
ماهر
: بيعمل اية جوة
صنارة
: مابيعملش مابيعملش اى حاجة . ولا هايعمل اى حاجة . لمعى انتحر جنب جثة صباح!
(
قبل ان يتحركون فى اتجاهة يسمعون صوت سارينة الشرطة )
لتنزيل المسرحية للطباعة بصيغة ال word
أضغط هنا
0 Comments