مسرحية الرحيل الأخير

مسرحية الرحيل الأخير 

عن رائعة آرثر ميللر ( وفاة بائع متجول )

الفصل الأول

(يفتح الستار ـ المسرح مظلم إلا من قدر كافى من الضوء بسمح للمشاهد برؤية شبحاً ضبابياً للمنظر من خلفه بقع الضوء من نافذة أو أكثر من عمارة من العمارات المسيطرة على الخلفية .. يدخل توفيق يحمل شنطة كبيرة ثقيلة جداً .. يتقدم ماشياً عبر الحديقة وما أن يبلغ المدخل المتخيل حتى يلقى بها فى إعياء .. ويخرج مفتاح يديره ليفتح الباب .. يحمل الحقيبة ويدخل الصالة )

 

توفيق   :        ياهوه           ( كريمة تتحرك من فراشها )

كريمة   :        مين ؟؟ توفيق ؟؟

توفيق   :        ميت كيلو ؟؟ .. ميت كيلو ؟؟؟

كريمة   :        توفيق ؟؟ مين اللى بره ؟؟

توفيق   :        ( يفيق من شروذه ) أنا .. أنا يا كريمة .

كريمة   :        ( تخرج إليه ) حمدا لله بالسلامة .. أتأخرت ليه ؟؟

توفيق   :                 ( يفك رباطة عنقه مختنقاً )

كريمة   :        مالك يا توفيق ؟؟

توفيق   :        ما .. مافيش يا كريمة .. ما فيش حاجة

كريمة   :        هى الساعة كام دلوقتى ؟

توفيق   :        الساعة؟؟ واقفة .. مش عارف جرالها أيه هى روخره .

كريمة   :        دى تطلع أتنين .. تلاته ..

توفيق   :        تطلع زى ما تطلع ..

كريمة   :        مالك يا توفيق ؟؟ حاسس بأيه ؟؟

توفيق   :        ( بعصبية ) قلت لك ما فيش .. ما فيش ما فبش حاجه ( يتماسك ) تعبان قوى

 .. ميت من التعب

كريمة   :       أنا مراتك يا توفيق ماخبيش علىُّ .. قولى أيه اللى حصل ؟

توفيق   :       مش عارف أيه اللى حصل ؟ .. دأنا كنت سايق العربية كويس . أربعين كيلو

                   بس .. فجأة

كريمة   :       عملت حادثه ؟

توفيق   :       الحو كان خريف .. المنظر حلو قوى .. الشمس بتجرى والهوا بيغربل العربية

                   من كل ناحيه .. والسرعة اربعين كيلو بالظبط .. اربعين كيلو..

كريمة   :       أوعى تكون موت حد يا توفيق ..

توفيق   :       وقفت العربية . فتحت السقف .. أيوه فتحت السقف بتاع العربية . ومشيت

 بيغسلنى والسرعة عادية .. اربعين كيلو مااعفش .. ما دريتش أيه اللى

 حصل؟ طلعت الرصيف أزاى ؟ مش عارف

كريمة   :       أستر يارب ...

توفيق   :       الظاهر أنى سرحت وأنا سايق ..

كريمة   :       وبعدين حصل أيه ؟؟

توفيق   :       ربنا ستر الرصيف كان فاضى .نزلت .. ومشيت خمس دقايق بس .....

 ( يفرك عينه )سرحت تانى .. كنت هدوس عبل صغير .. طفل

كريمة   :       أنا مش قلت لك ريح نفسك شويه ؟ أعمل معروف روح لفؤاد بيه

توفيق  :       فؤاد بيه ؟؟

كريمة  :       قول له أنت كبرت مش حمل السفر كل يوم ..

توفيق  :       وأيه يعنى؟ طظ .. اللى يهمه البيع الإيراد وبـس مين مات ؟ مين راح فى ســـتين

داهية ؟ ما يهموش أنا اللى بنيت الشركة على كتافى 36 سنة من بلد لبلد أنا اللى عملت الشركة .. أنا

كريمة  :       يريحوك بقى .. فيها أيه يعنى لما يشغلوك فى الإدارة وبأى ماهية ؟

توفيق  :       المبيعات هتقل والتسويق يبوظ .. حيلاقو مين غيرى خبرة 36 سنه قابلت

                   ناس ما حــدش قدر يقابلهم .. عمــلت اللى ما حــدش يقـــدر يعمــله .. ..

                   خليت إنتاج الشركة ياكل السوق ... كل الناس بيحبونى الشخصية أساس التاجر.

كريمة  :        يقومو يمرمطوك بعد ما كبرت .. عشان خاطر فؤاد بيه

توفيق  :        هو حاسس بحاجه .. بيسهر ويسكر وياكل ويشرب يهمه أيه ؟ أبوه كان راجل

                   إدارجى .. الله يرحمك يا حسنى بيه كان دايماً يقول لى أنت دراعى اليمين

                   يا توفيق .. أنا ياما شلته على حجرى وهو صغير ..

كريمة  :       مين حسنى بيه ؟

توفيق  :       لا فؤاد بيه أبنه ... أنا اللى سميته فؤاد يوم ما أتولد .. أنا

كريمة  :       خلاص .. والنبى أنا حاسه أنه أول ما حا يشوفك حيقولك خليك معانا فى الإدارة

                   روح له يا خويا..

توفيق  :       الصباح رباح يا كريمه .. ها روح له .

كريمة  :       يالا قوم أقلع هدومك عبال ما أحضر لك العشا ..

توفيق  :       الولاد رجعوا ..؟

كريمة  :       وبياكلوا رز مع الملايكه ..

توفيق  :       وسامى ما قالكيش حاجة ..؟

كريمة  :       واخد على خاطره منك حبتين ..

توفيق  :       وانا عملت له أيه ؟

كريمة  :       أحنا ما صدقنا أنه رجع تانى يا توفيق .. عشان خاطرى..

توفيق  :       أن اللى طفشته ؟ أنا اللى قلت له يسيب كلية الهندسة فى آخر سنه ويضيع

                   مستقبله عشان بنت ما تسواش نكله .. رقاصه فى كباريه .. آه .. .. .....

                   كانت غلطة أنا اللى بدفع تمنها ياكريمة .. ده عمرى ومستقبلى وأحلامى .. أنا

                   كنت بتعب وبشقى عليه ليه .. ده بيعاندنى .. ضيع مستقبله بالعند فيّه .

كريمة  :       وطى حسك يا توفيق

توفيق  :       راجع ليه ؟؟ عشان يفرسنى ؟

كريمة  :       توفيق

توفيق  :       راحع يفرحنى بخيبته ؟

كريمة  :       أبوس أيدك يا خويا

توفيق  :       طيب ياختى .. آدى آخرة دلعك فيه .. كان ولد هايل .. كله حياه كله أمل .. سامى

                   توفيق .. أسم كان فيه سحر .. تنهزله الدنيا .. كان بطل فى كل حاجة .. زعيم ..

                   فرع زان ما ينكسرش أبداً .. الألفة فى الفصل .. الكابتن فى الملعب .. كابتن

                   الجامعة .. كابتن مصر بحالها ,

كريمة  :       هاجهزلك العشا

توفيق  :       إفتحى الشباك

كريمة  :         الشباك .. ماهو مفتوح

توفيق  :       أمال فين الهوا نسمة هوا ياناس

كريمة  :       توفيق ريح نفسك يا خويا ريح نفسك

توفيق  :       سدوا علينا بيبان الرحمة حيطان عالية حيطان عالية .. لازم يطلعوا قانون اللى

                   يبنى أكتر من دورين يشنقوه

كريمة  :       والناس دى كلها يروحوا فين ؟

توفيق  :       يموتوا بقى . أيه ده زحمة فى كل حتة ؟ حتى الهوا ما بقاش مكفى أيه الزحمة

                   دى كلها .. زمان كان الهوا نضيف . براح ( يشرد ) هناك مكان العمارة دى كان

                   فبه شجرتين .. انا اللى زرعتهم بأيديه .. كبروا وفرعوا .. جم قطعوهم بنوا

                   مطرحهم عمارتين .. فاكره .. كنت بأربط بينهم حبل وآخد ولادى الأتنين على

                   حجرى وأمرجحهم .

كريمة  :       كان حولينا خلا .. قين وقين على ما تلاقى بيت

توفيق  :       لازم يشنقوا اللى قطع الشجرتين ..

كريمة  :       أزرع غيرهم ولا تزعلش نفسك

توفيق  :       أزرع غيرهم أزاى .. أنا تعبت .. تعبت ( بإنفعال عظيم )

كريمة  :       فيه أيه ( الضوء على غرفة الأولاد يحركان وينصتان )

سامى   :        فيه أيه يا ثروت  

ثروت   :        مش عارف يا سامى 

توفيق  :        مش عارف أيه اللى حصل جراله أيه ؟ هوه ده سامى توفيق ؟هوه ده يا كريمة

كريمة  :        خليك جنبه ده محتاج لك يا توفيق .. كلمه .. كلمه حلوه يمكن ربنا يكرمه

توفيق  :        أنا عمرى ضايقته فى حاجه ؟

كريمة  :        طول عمرك شقيان عليهم ما أرتحتش يوم واحد

توفيق  :        دول حياتى أنا بحبهم أكتر من روحى

كريمة  :        وهما كمان بيحبوك وأنت عارف فاكر لما كنت بتاخدنا معاك العربية ؟ أنا جنبك

                   والأولاد ورا ؟ ايه رأيك يوم تكوم فاضى تاخدنا القناطر  وأقعد جنبك  وهما ورانا

توفيق  :        ( بسعادة )أيوه أيوه يا كريمة

كريمة  :        وتفتح لنا سقف العربية عشان نشم هوا بصحيح .

توفيق  :        سقف العربية ما بينفتحش يا كريمة دكها العربية الأوستن السودة بتاعة زمان  

كريمة  :        يا راجل أنت هتجننى ؟؟ أنت مش قلت أنك فتحت سقف العربية النهارده

توفيق  :        أنا ..أنا قلت أنى فتحت سقف العربية .. أيوه أيوه .. بس أزاى فتحته ده ما

                   بينفتحش .. غريبة أنا متأكد أنى فتحته النهارده  . بس دى كانت العربية الأوستن

                   السودا ( يشرد)

كريمة  :        مالك يا توفيق ؟

توفيق  :        انا النهارده كنت سايق العربية الأوستن السودا .

كريمة  :        سايق العربية الأوستن السودا ؟ أنت باتعها من زمان

توفيق  :        يمكن أتهيألى ؟ يمكن سرحت ؟ بس أزاى العربية الأوستن كانت عربية تلاطم

                   الحديد .. تقف قدام البيت سامى وثروت يلمعوها تنضف وتلعلط ويبقى شكلها حلو

                   الراجل اللى أشتراها ما كانش مصدق عملت 170ألف كيلو أفتكر السبب أن

                   الكيلومترى بتاعها

كريمة  :        يالا يا توفيق عشان نتعشى وتنام

توفيق  :        نامى أنتى أنا هخرج أشم هوا ( يخرجان )

سامى  :         ماله ؟؟

ثروت  :         يظهر بابا عمل حادثة بالعربية النهار ده ( يسمع صوت توفيق )

توفيق  :        170 ألف كيلو متر والكيلو مترى مظبوط .. مظبوط تمام

سامى  :         حادثه ؟

ثروت  :         أكيد ده بيسوق بطريقة غريبة قوى

سامى  :         لازم نظره ضعف

ثروت  :         لا يا سامى بابا نظره سليم ميه فى الميه .. بس تظهر ما بيقدرش يركز ..

                   بيتهيألى بيسرح وهوه سايق .. بس ياترى بيسرح فى أيه ؟

سامى  :         لما يطلع النهار أبقى روح أسأله .

ثروت  :         أنت لسه زعلان منه ؟

سامى  :         مش مهم . ( يسمع صوت توفيق )

توفيق  :        لمع كويس يا سامى أتوصى بالكاوتش

ثروت  :         سامى أنت عارف انه بيحبك .

سامى  :         موت وعشان كده كل ما يشوفنى يتريق علىّ

ثروت  :         صعبان عليه من اللى عملته

سامى  :         ما ينسى بقى

ثروت  :         ما هى دى المصيبة أنه مش قادر ينسى .. من يوم أنت ما سفرت وهوه أتهد من

                   يومها ما شفتوش بيضحك مره .. ولا حتى ابتسامة . دايماً حاطط أيده على خده

                   والدموع نازله من عنيه .. حزين دايماً . عشر سنين أخيراً أكتشفت انه بيكلم

                   نفسه

سامى  :         بيكلم نفسه

ثروت  :         ودايماً يكلمك أنت .. أو يتكلم عنك

سامى  :         يبقى أتجنن

ثروت  :         أبونا مش مجنون

سامى  :         أمال بيكلم نفسه ليه ؟

ثروت  :         حاسس أن حياته أتهدت .. أنت اللى ممكن ترجع له ابتسامته آمال أنت عايش ليه

سامى  :         حاولت كتير .. لفيت على كل الوظايف .. ما فيش وظيفة قعدت فيها أكتر من تلات

                   شهر.. ما كنتش بحب الشغل .. تركب الأتونيس الساعة سبعة الصبح توصل

                   المكتب  الساعة تمانيه . تفضل تحرت لحد الساعة أتنين وترحع تتشعبط فى

                   الأتوبيس درجة تانية  كل ده بكام 150 جنيه مصرى  12 شهر شغل فى السنة

                   أجازة بوم واحد فى الأسبوع .. تمنم 150 جنيه سجن تفضل فيه حياتك .. واحد

                   أقل منك يتحكم فيك يؤمرك يهددك بالخصم من الماهية .. هو ده المستقبل .

ثروت  :         بابا عنده أمل فيك يا سامى .. حاول عشان خطره .

سامى  :         ولع لى سيجارة ( ثروت يشعل له السيجارة )

( الأضاءة على المطبخ ونرى توفيق شارداً)

توفيق  :        170 ألف كيلو وبتمشى زى الصاروخ .. شايفه السقف بيتفيح أزاى؟؟ ( يضحك)

                   رايحين فين يا أولاد ؟ عايزها تلمع زى القزاز ..

سامى  :         ( يشير إلى ثروت بالصمت )

توفيق  :        اغسلوا الكاوتش كويس .. يا سلام عليكم هايل زى ما تكون خارجه من الأجنس

سامى  :         مسكين

ثروت  :         لسه عنده أمل فيك ياسامى

سامى  :         ثروت ما أنت كويس ناجح

ثروت  :         أنت أبنه الكبير

سامى  :         ما أنت أبنه الصغير

ثروت  :         بكالوريوس تجارة بتقدير جيد جداً . موظف درجة تالتة باخرج الصبح الساعة

                   سبعة أوصل مكتبى تمانة أقضل أحرت للساعة أتنين . وبعدين أتشعبط فى

                   الأتوبيس على السلم كل ده بكام 150 جنيه أجازة يوم فى الأسبوع سجن أقل منى

                   بيحكمنى ويهدد بالخصم من الماهية .. والبنطلون ب 100 جنيه بس

سامى  :         أحنا ما أتخلقناش لكده أحنا لازم نؤمر والناس تنفذ

ثروت  :         لما نبقى أحنا اللى فوق

سامى  :         ما أحنا مخلوقين لفوق

ثروت  :         المسألة مسألة فلوس

سامى  :         والمصيبة ان أحنا ما أتعودناش نحوش

ثروت  :         الفلوس دايماً فى جيوب التيوس

سامى  :         والنوابغ ع الحديدة .. حكمة المفلس

ثروت  :         الفلوس .. راس المال

سامى  :         راس المال يعمل مشروع .. حلم دايماً بشوفة قدام عنيه وأمد أيدى يروح منى

ثروت  :         نط عليه هاته من السما

سامى  :         انا وأنت ممكطن نسند بعض نعمل مشروع بأسمنا

ثروت  :         الأخوان سامى وثروت توفيق ليمتد ...

سامى  :         يتكلف كام

ثروت  :         معاك فلوس

سامى  :         ربع جنيه

ثروت  :         ( ضحك ) يعمل مشروع ما فيش كده

سامى  :         بس مروان بيه ممكن يدينى المبلغ اللى أنا عايزه

ثروت  :         مروان بيه مين ؟؟

سامى  :         مدير الشركة اللى كنت بشتغل فيها ببيروت .. مليونير وبيحبنى جداً يوم ما

                   قدمت أستقالتى خدنى بالحضن وعيط ما كانش عايزنى أسيبه قال لى أنا زى أبوك

                   يا سامى لو أحتجت حاجه تعالى أنا تحت أمرك

ثروت  :         وده هنجيبه منين

سامى  :         هنا فى مصر .. شفته أمبارح فى سميراميس حاروح له بكره

ثروت  :         وإذا ما لقتوش فى سميراميس

سامى  :         جالاقيه فى فرع الشركة بعماد الدين .. تفتكر يلزمنا كام

ثروت  :         ممكن تقول له فى الأول 50 ألف

سامى  :         اللى حا قول له عليه هاخده على طول ... أنام بقى عشان أصبح فايق وأعرف

                   أقابله ( تخفت الأضاءة عليهم )

توفيق  :        انا خايف عليك يا سامى بلاش السهر .. مستقبلك مذكرتك أهم / هتتخرج وتبقى

                   باشمهندس .. كل البنات هتجرى وراك .. دى لاء ودى ما تنفعش .. ودى نص

                   نص هتختار اللى تعجبك لكن رقاصة لأ .. لأ ..( نرى أمرأة تضحك ) أبعدى ..

                   أبعدى ( يضرب الهواء  .. المرأة تضحك وتختفى

عادل   :         ( يظهر ) سامى هيضيع نفسه ما بيذاكرش

توفيق  :        سامى من غير ما يذاكر ممكن ينجح

عادل   :         لو سقط السنه دى هيترفد من الكلية

توفيق  :        مش هيسقط .. ومش هيترفد .. ده زعيم .. ده الكابتن

عادل   :         هما هيمتحنوه فى الكورة؟؟ ( يختفى )

توفيق  :        سامى ( يظهر سامى ) أنت الكابتن .. سنتر فرود الفرقة .. أوعى تخاف من

                   الماتش

سامى  :         عمرى ماخفت

توفيق  :        أنت املى فيهم

سامى  :         أول جون هجيبه النهارده .. هدية منى ليك

توفيق  :        والتانى ...

سامى  :         برضه ليك يا أعظم أب فى الدنيا

توفيق  :        تعملها ياابو رجل دهب

( سامى ختفى وتظهر المرأة تضحك بإثارة أكثر ـــــ تظهر كريمة فى الجهة الأخرى )

كريمة  :        هتغيب كتير قى أسكندرية يا توفيق ....

توفيق  :        أسبوع بالكتير .. لازم أمسح السوق أنا ملك التسويق من النهارده ما فيش

                   ماهية

كريمة  :        ما فيش ماهية أزاى ؟ ونعيش منين ؟

توفيق  :        حاشتغل بالعمولة واحد فى الميه

كريمة  :        ودى مضمونة يا توفيق ؟

توفيق  :        بالميت خالص 1000 جنه قى الشهر

كريمة  :        مش كانت الماهية مضمونة أكتر

توفيق  :        500 جنيه ما يعملوش حاجة النهارده يا كريمة

كريمة  :        اللى يعجبك يا خويا

توفيق  :        نفسى أعيشك أحسن عيشة .. نفسى أشوفك أحسن ست فى العالم عارفه لما

                   بسافر وأسيبك بابقى مش طايق عايز أرجع لك .. أقعد جنبك وأنسى الدنيا ..

                   ( المرأة تضحك  وتمد إليه يدها )

توفيق  :        سلوى

سلوى  :        نعمين يا روح قلبى

توفيق  :        ياه .. أنتى أتأخرتى قوى

سلوى  :        حتسافر بكره أمتى ؟

توفيق  :        الصبح

سلوى  :        وهترجع إسكندرية أمتى؟

توفيق  :        الخميس الجاى

سلوى  :        أحبك يا توفيق

توفيق  :        ( ثائرً ) كفاية  ( تختفى ... يسقط الضوء على كريمة ) معلهش .. غصب عنى

                   حقك علىّ .. نفسى أسعدك ..

كريمة  :        أنا سعيدة طول ما أنت جنبى يا توفيق ( تضحك المرأة )

توفيق  :        (فى هستريا ) إسكتى .. إسكتى .. ( فى حالة اضطراب ) ( تختفى كريمة )

عادل   :         ( يظهر ) سامى هيسقط

توفيق  :        لازم ينجح

عادل   :         لازم يذاكر

توفيق  :        غششه

عادل   :         ما أقدرش

سلوى  :        ( تضحك)

توفيق  :        ( منفعلاً ) أخرج .. أمشى بره بره بره

ثروت  :         عاش سى بابا .. عاش سى بابا

سلوى  :        ( تضحك)

سامى  :         عايزينك تقعد معانا يوم

توفيق  :        وأسيب شغلى ؟

سلوى  :        ( تضحك)

توفيق  :        على قد ما بتعب بكسب .. وكل ده عشانكو يا حبايبى .. أنا توفيق سالم الناس كلها

                   تعرفنى .. سفرا وزرا وأمرا كل الناس بيحبونى .. لما تكبروا وتتخرجوا من

                   الجامعة حتلاقوا السكة مفروشة قدامكوا ورد .. حتشتغلوا فى أحسن وظايف فى

                   أحسن شركات .. عارفين ليه ؟ عشان أنتوا ولاد توفيق سالم

سامى  :         عاش توفيق سالم .. عاش توفيق سالم

سلوى  :        ( تضحك)

عادل   :         ( يظهر ) لو سقط السنة دى هيرفدوه .. دى آخر سنة

توفيق  :        مش هيسقط هيبقى أحسن من 30 واحد زيك ( يختفى عادل ) مبن اللى يقدر

                   يرفده ده الزعيم كابتن الجامعة ... أنتو حتبقوا فوق .. فوق .. ولاد توفبق سالم

                   طينة تانية خالص كل الناسبيحبوكم وبيحترموكم.. طول بعرض .. شخصيات

سلوى  :        ( تتزداد فى الضحك )

توفيق  :        أمشى غورى من وشى كفاية .. كفاية

كامل    :        ( يظهر عند الباب ) توفيق فيه أيه

توفيق  :        مافيش يا ناس

كامل    :        أيه اللى مسهرك لحد دلوقتى ؟؟ أنت تعبان .. خضتنى يا أخى سمعتك بتزعق

                   أفتكرت فيه حاجة جيت جرى لقيت الباب مفتوح دخلت من غير ما أخبط

توفيق  :        أقعد يا كامل أقعد

كامل    :        تيجى نلعب عشرتين كوتشينة

توفيق  :        ما عنديش كوتشينة

كامل    :        آدى الكوتشينة خد فنط ورقك

توفيق  :        أقطع

كامل    :        آخرك ولد مين قدك يا عم

توفيق  :        ( بفزع ) قر بقى ما أنا عارف قرك دكر

كامل   :         ايك على الله ما تحرقوش زى كل مره

توفيق  :        ألعب وأنت ساكت ألعب

كامل    :        مش عايز تشتغل عندى با توفيق ليه ؟

توفيق  :        حد قال لك أنى عاطل

كامل    :        أنا قلبى عليك محدش هيعرف قيمتك غيرى

توفيق  :        هما كمان عارفين قيمتى كويس . ألعب وأنت ساكت

كامل    :        أنت سرحان

توفيق  :        أنا مش سرحان

كامل    :        سامى أخباره أيه

توفيق  :        كويس

كامل    :        هيقعد معانا على طول وألا هيسافر تانى؟؟

توفيق  :        يسافر تانى ليه مش كفاية سفر

كامل    :        مش جايز يكون طالع لعمه أمين غاوى سياحة

توفيق  :        أمين أخويا كان عارف هوه بيعمل أيه .. فاهم طريقه كويس

( يظهر أمين يحمل حقيبة سفر وعصا .. رجل قوى البنية واثق من نفسه  .. يشرد توفيق)

كامل    :        انت ما يتاكلش ليه؟؟

توفيق  :        ماليش نفس

كامل    :        يا راجل كل بصر

توفيق  :        قلت لك ما ليش نفس .. الله

كامل    :        أنت رميت أتنين وفيه فى الأرض أتنين 

توفيق  :        ( يهز رأسه ليفيق )

أمين    :        مالك يا توفيق

كامل    :        رايح فين ؟؟

توفيق  :        أنا تعبان .. تعبان قوى

أمين    :        مالك ؟

توفيق  :        تعبت قوى يا أمين با أخويا

كامل    :        أنا مش أين أنا كامل يا توفيق .. مالك يا توفيق ؟

توفيق  :        حاجة غريبة .. ايه اللى فكرنى يأخويا أمين دلوقتى

كامل    :        لازم وحشك

توفيق  :        الله يرحمه مات فى حادثة طيارة.. ما كنش بيبطل سفر كل يوم فى بلد

كامل    :        مات أمتى

توفيق  :        الشهر اللى فات مرلته بعتت تلغراف قالت أنه مات

كامل    :        كان غنى ؟

توفيق  :        مليونير

كامل    :        حتورث

توفيق  :        عنده سبع عيال

أمين    :        فرصتك مش هنا يا توفيق فرصتك هناك معايا

توفيق  :        عايزنى آجى معاك فين ؟

كامل    :        تيجى معايا فين ؟

أمين    :        مافيش وقت فاضل ساعة على ميعاد الطيارة حاى وألا لأ

توفيق  :        ما أقدرش

كامل    :        مش هتكمل العشرة ياتوفيق

أمين    :        أمى فبن عايز أشوفها قبل ما أسافر

توفيق  :        أمك تعيش أنت

كامل    :        يا أخى فال الله ولا فالك أمى عايشه ربنا يطول عمرها

أمين    :        ماتت أمتى ؟؟

توفيق  :        ماتت بقالها عشر سنين

كامل    :        هى مين دى اللى ماتت بقالها عشر سنين

توفيق  :        أمك ماتت من عشر سنين تقريباً

كامل    :        أيه التخرف ده يا تفبق أنت هتلعب وألا لأ

توفيق  :        ( يفيق ) لأ .. لأ مش عايز ألعب مش عايز حاجة

كامل    :        أنا هامشى بقى يا توفيق تصبح على خير

توفيق  :        أمين أتأخرت ليه ؟ أنا مستنيك من زمان . أنا مش طمعان فى فلوسك مش عايز

                   منك حاجة عايز أعرف بس أنت وصلت أزاى؟ نجحت أزاى؟

أمين    :        سافرت كندا حطيت رجلى على أول الطريق الصح دخلت الغاية وخرجت غنى

توفيق  :        من لا شئ

أمين    :        ولا مليم

توفيق  :        أزاى

أمين    :        الحياة فرصة إمسكها هتوصل فلتت من أيدك ما فيش غيرها الدنيا زى المحارة

                   لازم تغطس وتجيبها وبعدين تفتحها وتطلع اللى فيها

توفيق  :        أنا محارتى فاضية

أمين    :        دور على غيرها .. تعالى معايا

توفيق  :        لأ

أمين    :        أنا ماشى فاضل نص ساعة على الطيارة

توفيق  :        ( يسحبه بعيداً عن كريمة ) خمس دقايق بس عشان خاطرى .. الولاد فين ؟؟

                   ( يدخل سامى وثروت ) أمين قولهم عملت أيه أنا عايزهم يبقوا زيك

أمين    :        سافرت من هنا دخلت الغاية مشيت جريت ما خفتش عشر سنين .. بس

توفيق  :        شوفتوا أزاى ما فيش أسهل من كده مشى جرى ما خفش قلبه زى الحديد

                   فتح عينك منك له خدوا بالكم من كل حاجة .. خشوا الغابة يا ولاد أجروا ما

                   تخافوش عشر سنين بس عشر سنين( تظهر سلوى تضحك )

سلوى  :        مالك يا توفيق

توفيق  :        مش عارف خايف

سلوى  :        خايف من أيه ؟

توفيق  :        أبنى سامى

سلوى  :        النتيجة مش هتطلع النهار ده ؟

توفيق  :        خايف ليسقط

سلوى  :        فرفش .. وأضحك ( تضحك )

توفيق  :        أسكتى

سلوى  :        مش هتنام ؟

توفيق  :        لأ .. مش عايز ( تختفى ضاحكة ) .. ليه .. ليه ؟ بيعملوا فيه كده ليه ؟ أيه

                   العيب اللى فيّه ؟؟ ( ثروت نزل الدرجات توفيق يدرك وجود ثروت )

ثروت  :         بابا أيه بس اللى بيحصل ؟

توفيق  :        كنت هدوس عيل صغير ..

ثروت  :         بابا لازم نتكلم بصراحة .. أنت كبرت .. صحتك ما بقتش تستحمل

توفيق  :        عايزنى أسيب شغلى ؟

ثروت  :         أنت عندك ستين سنه

توفيق  :        واسيبك تصرف علىّ ؟ من الملاليم اللى بتقبضها .. دول يا دوبك بيكفوك سهر

                   وبنات وقمار لوش الصبح.. ( بسخرية ) لأ يا بنى أنت مسئولياتك كبيرة

ثروت  :         بابا أسمعنى

توفيق  :        روح نام مش عايز أسمع حاجة .. أجرى ألعب آل أسيب شغلى آل .. عشان أموت

                   من الجوع .. (ثروت ينسحب حزيناً ) شغلى ؟؟ 36 سنه ؟؟ .. شجرتين زرعتهم

                   كانوا هناك قطعوهم .. ليه ؟ ليه؟ ليه كل ماأزرع يقطعوها ليه ؟( يظهر كامل )

كامل    :        لو أشتغلت عندى .. أنا اللى هأعرف قيمتك

توفيق  :        ( ثائراً فى الشبح ) أمشى .. أمشى .. كلب . كلب

كريمة  :        ( بملابس النوم ) ايه يا توفيق ؟ مالك يا خويا ؟

توفيق  :        ( ينهار ) كلب .. كلب

كريمة  :        حد زعلك ؟؟

توفيق  :        لأ .. لأ يا كريمة

كريمة  :        قوم نام النهار قرب يشأشأ

توفيق  :        أتنى شايله بوليصة التأمين فين با كريمة ؟

كريمة  :        وأيه اللى فكرك بيها دلوقتى ؟

توفيق  :        علينا تلات أقساط ما أندفعوش لازم أدفعهم بكره .. لازم بكره تلاتين ألف جنيه

                   مبلغ كويس قوى

كريمة  :        ربنا يطول عمرك ويجعل يومى قبل يومك.. قوم . قوم يا خويا ريح جتتك ( يقوم )

توفيق  :        زمان لما كنت أبقى قاعد هنا .. ألاقى النجوم فى السما مرشوشة رش .. كنت

                   بحس أن كل النجوم بتاعتى أنا . بتبص علىّ .. هى فين النجوم راحت فين ؟

كريمة  :        يا لا عشان تصبح فايق

توفيق  :        الساعة الدهب اللى أداهالى أمتن أخويا كان على ضهرها نجمة .. عمرها ما قدمت

                   ولا أخرت .. هيه فين ؟ شايلاها فين يا كريمة

كريمة  :        ما أحنا بعناها من زمان

توفيق  :        بعناها .. يا خسارة .. ( يخرج )

كريمة  :        توفيق  .. أستر يا رب

 

سامى  :         فيه أيه يا ماما ؟

كريمة  :        ما فيش يا بنى

سامى  :         هوه بيعمل كده ليه ؟

كريمة  :        بيعمل أيه ؟

سامى  :         بيكلم نفسه

كريمة  :        ( منهارة ) مش عارفه . مش عارفة

سامى  :         من أمتى ؟

كريمة  :        من بعد أنت ما سافرت

سامى  :         وساكتين عليه ليه ؟ عاجبكم كده ؟ بتتفرجوا عليه ومبسوطين ..

كريمة  :        ما بيقولش حاجة لحد .. كاتم فى نفسه ما بيفضفضش لحد

( ينزل ثروت )

سامى  :         يا رتنى ما سافرت

كريمة  :        من يوم أنت ما رجعت وهوه على الحال ده

سامى  :         يا رتنى ما رجعت.. ده بيكرهنى .. أنا عارف أنه مش طايق يشوف خلقتى

ثروت  :         لأ يا سامى يايا بيحبنا أكتر من نفسه

كريمة  :        ده ساعة ما أستلم جوابك وغرف انك جاى الدنيا ما بقتش سايعاه من الفرحة

سامى  :         ( يقاطع ) كان فاهم أنى هرجع وفى أيدى نجمة من السما ..  كان فاهم أنى دخلت

                   الغابة وجريت وخرجت مليونير مش كده ؟ أيه اللى أقدر أعمله وما عملتوش ؟

كريمة  :        كلمه يا سامى أنت أبنه الكبير .. خليه يفتح لك قلبه ..

سامى  :         هوه اللى تاعب نفسه بنفسه .. طول عمره بيبص للنجوم / يا ما شاور لى على

                   السما وقال لى مكانك هناك .. فوق .. أزاى ؟؟ أحلام لا يمكن تحقيقها ..

كريمة  :        ( تتحسس شعره ) أبوك محتاج لك يا سامى

سامى  :         يا رتنى ما رجعت .. مين عارف مش جايز كنت هقدر أحط رجلى صح .. كنت

                   رجعت له والنجمة فى أيدى

كريمة  :        كنت هترجع تلاقى فقى وصوان وميتم يا بنى

سامى  :         لا .. أرجوكى .. أسكتى ( صوت توفيق )

توفيق  :        رقاصة يا سامى ؟ أنت مقامك رقاصة ؟

سامى  :         ( بعصبية مكتومة ) أسكت

توفيق  :        مستقبلك مفتوح قدامك

سامى  :         لا

توفيق  :        الغابة كنز

سامى  :         ( ثائراً ) كفاية مش قادر أستحمل كده ( يقوم فى إتجاه الصوت )

كريمة  :        سيبه فى حاله

سامى  :         ده أتجنن

كريمة  :        ( منهارة ) أتجنن بعد الشر عليه ده حنين ووحدانى . ألف بعد الشر عليه . طول

                   عمره بيكافح ويلف ويجرى ويقتل نفسه عشانكو .. تقتلوه ؟؟ ده حتى يبقى حرام

                   ساعدوه مدوا له أيديكم .. الحمل تقل عليه .. ما بقاش يكسب زى زمان .. ..

                   العمولة بتاعته يا دوب بتكفى بالعافية .. قرشين هنا و قرشين هنا خلصت الماهية

                   وياما قلت له يروح لفؤاد بيه يستريح فى الإدارة ويعملوا له ماهية .. لكن يظهر

                   فؤاد بيه ما وافقش

سامى  :         كلب ياكله لحم ويرميه عضم

ص توفيق:     شايف النجمة اللى فوق يا سامى ؟؟ هناك مكانك هناك .. ضيع مستقبله ضيعه

                   بأيديه . ما كان هيبقى مهندس .. ما دخلش الأمتحان ليه ؟ الرقاصة ضيعت

                   مستقبله .. ( يرى عادل  ) عادل ده مش كان زميلك شايف بقى أيه ؟

عادل   :         بكالوريوس هندسة يأمتياز

توفيق  :        نجح

عادل   :         مرتبة الشرف الأولى

توفيق  :        المصيبة أنه أبن كامل

كامل    :        ( يظهر ) مش عايز تشتغل عندى ليه ؟

توفيق  :        بره .. بره أخرج بره

كريمة  :        توفيق .. أسكت

توفيق  :        أنت عايز منى أيه ؟ ..

سامى  :         أنت السبب أنت اللى ضيعت مستقبلى

توفيق  :        ليه يا بنى أنا ضيعت عمرى وشبابى عشان أخليكوا رجالة أرفع راسى بيكم ..

                   حرمت نفسى من ذاد الدنيا أنا السبب .. ( تظهر المرأة تضحك ) لا . لا . كدب

                   .. مش هى دى الحقيقة .. أنا مش كده   غورى من وشى

كريمة  :        انا يا توفيق

توفيق  :        ( تختفى المرأة ) نعم ؟ لأ .. لأ يا كريمة ( خارجاً ) لأ .. لأ

كريمة  :        أيه اللى أنت قلته ده ؟؟

سامى  :         غصب عنى ما كنتش أقصد

كريمة  :        هوه السبب فى أيه ؟ خيبتك

سامى  :         أنا طالع أنام والصبح مش حاوريكم وشى

كريمة  :        ( فى قمة إنفعالها ) أبوك حيموت نفسه .. أبوك هينتحر

ثروت  :         ماما

سامى  :         ينتحر

كريمة  :        أيوه هينتحر الأسبوع اللى فات دخل الحمام وقفل على نفسه .. بعدها شميت

                   ريحة غاز بصيت عليه من الشرخ اللى بين القزاز لقيته بهدومه زى ما يكون

بيتخنق خبطت عليه أترعب وراح فاكك الخرطوم من السخان ومركب خرطوم

                   تانى .. مخبيه فوق السيفون . مقطوع من الجنب بسكينة علشان الغاز يموته

ثروت  :         ولسه الخرطوم فوق السيفون

كريمة  :        مطرحه زى ما هوه .. خايفه أشيله يحس أنى عرفت يتضايق أكتر ..

سامى  :         سايباهوله عشان يقتل نفسه

كريمة  :        ما أقدرش أشيله أنا غلبت . تعبت . كل ما ألاقيه داخل الحمام بافضل مراقباه

                   من يوم ما عرفت ما بيجنيش نوم طول الليل

ثروت  :         والعمل أيه دلوقت

سامى  :         كلمه يا سامى فرحه بأى حاجة قول له أنك لقيت شغل

ثروت  :         المشروع يا سامى

كريمة  :        مشروع ؟

ثروت  :         سامى هيعمل مشروع هايل

كريمة  :        صحيح يا سامى

سامى  :         أيوه يا ماما

كريمة  :        ( بسعادة ) هو ده اللى هيفرحه .. توفيق .. تعالى أسمع أحسن خبر.. قول له

                   ياسامى ...

ثروت  :         بابا سامى حط رجله على الطريق الصح .. من بكرة هيدخل الغابة ويخرج مليونير

                   بكره هيقابل واحد صاحبه كبير قوى

توفيق  :         على القهوة ؟؟

ثروت  :         لأ فى سميراميس

توفيق  :         وصاحبه ده صايع زيه كده ؟

سامى  :         ( متماسكاً ) لأ يا بابا .. ده غنى مليونير عنده فلوس

توفيق  :         هتقتله وتسرق فلوسه ؟

سامى  :         أقتله أيه بس ؟ أنت ليه ما بتدنيش فرصة ؟؟

توفيق  :         أوعى تقل أدبك فى بيتى

ثروت  :         بابا .. بكره هيروح يقابل الراجل ده وياخد منه فلوس يبتدى بيها مشروع

توفيق  :         مشروع أيه أبو رقاصة ده ؟ هيفتح كبارية .

سامى  :         شاهدين ؟؟

ثروت  :         هنعمل المشروع اللى طول عمرك بتحلم بيه شركة توفيق سالم وأولاده من بكرة

                   مش هتتعب لغيرك تعبنا هيكون لينا يا بابا

توفيق  :         سامعة يا كريمة قرب يطول النجمة بأيديه . طول عمرى حاسس أنه هيوصل

                   ويضرب ضربته هى دى الضربة وألا بلاش .. مواعدك فى سميراميس يا ولد

سامى  :         أيوه يا بابا

توفيق  :         أوعى تروح له قبل الميعاد .. روح فى معادك بالظبط علشان يحس أنك مظبوط

سامى  :         حاضر

توفيق  :         تلبس أشيك لبس .. لازم يحس أنك محترم .. المظهر أهم شئ فى الصفات

                   التجارية .. أتكلم بحساب .. أضحك بحساب .. أسكت بحساب

سامى  :         أيوه يا بابا فاهم

توفيق  :         أدخل عليه تقيل .. وأنت بتكلمه لازم صوتك يبقى هادى .. أوعى تهزر اللى بيهزر

                   يبقى هايف .. الناس ما تأمنلوش على فلوسها

سامى  :         حاضر

توفيق  :         معادك الساعة كام فى سميراميس

سامى  :         ده

توفيق  :         ده .. ده أيه ؟

سامى  :         حاروح بكرة أسأل عليه

توفيق  :         مش بتقول مواعدك

سامى  :         لأ

توفيق  :         يعنى أحلام خيبانة زيك

سامى  :         ( صارخاً ) أسمعنى بقى الله

توفيق  :         ( ثائراً ) اللى يقعد فى بيتى ما يزعقش فى وشى

سامى  :         وأنا مش عايز أقعد فى بيتك أنا زهقت .. عاوز أموت .. عاوز أموت

توفيق  :         لا.. لا يا بنى ( يسرع إليه بحنو غريب ) لازم تعيش .. دانت حياتى .. حياتى

سامى  :         بابا ( يحتضنه ويقبل كل منهما الآخر )

توفيق  :         روح له يابنى روح له بكرة .. أخلقه من تحت الأرض دى فرصة عمرك أوعى

                   تضيع فرصة عمرك .. حتروح له بكرة ؟؟

سامى  :         أيوه .. أيوه يا بابا

توفيق  :         أكيد بيحبك قوى

سامى  :         زى أبنه بالظبط

توفيق  :         سامعة يا كريمة ؟

كريمة  :        مش قلت لك ربنا هيكرمه

توفيق  :         حتطلب منه كام ؟؟

سامى  :         50 ألف جنيه

توفيق  :         100 ألف جنيه أحسن أطلب 100 ألف جنيه .. أوعى تبيع نفسك رخيص .. خليه

                   يحس أنك مهم .. أوعى يبان هايف

كريمة  :        سامى مش هايف أبداً

توفيق  :         أنا لما أتكلم ما حدش يتكلم

سامى  :         ده سجن

توفيق  :         اللى مش عاجبه الباب يفوت جمل

سامى  :         ما كفاية بقى الموشح اللى ما بيخلص ده كفاية

توفيق  :         ( مهدوداً ) حاضر يابنى حاسكت قبل ما تاخدنى قلمين ( منفعلاً ) والله وكبرت

                   وبقيت راجل وبتعلى صوتك علىّ ( يخرج )

كريمة  :        يارب خدنى وريحنى ( تنفجر باكية )

سامى  :         ده بيكرهنى .. بيكرهنى

ثروت  :         أبداص يا سامى .. ده بيحبك

كريمة  :        كلن طاير من الفرحة وأنت بتقول له على مشروعك

سامى  :         مش هوه اللى أتنرفز

كريمة  :        معلهش أستحمل

سامى  :         وأنا زعلته فى أيه يس ؟

كريمة  :        ما زعلتوش يا بنى .. أنت مش حاسس باللى فيه عشان خاطرى .. صالحه

ثروت  :         لو ما كانش أنت اللى تستحمل مين اللى يستحمله ؟

كريمة  :        يالا يابنى . تعالى .. قوله تصبح على خير يا بابا .. خليه ينام مرتاح

ثروت  :         ده قلبه طيب يا سامى

كريمة  :        وأقل حاجة بتفرحه يابنى .. حاروح أهديه .. وتيجى ورايا

سامى  :         حاضر يا ماما

ثروت  :         أفرد خلقتك وألا هتروح تقابل الراجل بكرة بالتكشيرة المحشة دى ؟

سامى  :         أقابله .. أقابله أزاى ما عنديش حاجة عدله ألبسها

ثروت  :         بدلتى الجدبدة هتيجى على مقاسك بالظبط .. وعندى كرافتة أيه بتقول لوحدها

سامى  :         وتفتكر هيرضى يدينى 100 ألف جنيه

ثروت  :         مش بتقول بيحبك

سامى  :         زى ولاده بالظبط

ثروت  :         يبقى هيديك اللى أنت عاوزه بالظبط

سامى  :         100 ألف جنيه مفتاح السعاده فعلاً

ثروت  :         أيوه كده خلينى أحس أنك سامى بتاع زمان ( يخرجان )

(كريمة تعلق ملابس توفيق  )

كريمة  :        هما ليهم مين غيرك .. أنت عارف أنهم بيحبوك با توفيق

توفيق  :         وأنا بحبهم أكتر وأكتر .. دول حياتى أنا مش عارف أيه اللى جرالى زعلته ليه ؟

سامى  :         بابا تصبح على خير

توفيق  :         ما تزعلش يا بنى حقك علىّ يا سامى

سامى  :         بابا

توفيق  :         أنا بحبك قوى يا بنى بحبك قوى

سامى  :         وأنا كمان بحبك يا بابا .. تصبح على خير

توفيق  :         سامى 

سامى  :         أفندم يا بابا

توفيق  :         أوعى ما ترحش بكرة

سامى  :         ما تخافش يا بابا

توفيق  :         وانت معاه بكرة .. إذا وقع حاجة من على مكتبه .. أوعى توطى تجيبها ده شغل

                   الفراشين مش شغل الناس المهمين

سامى  :         أمرك يا بابا

توفيق  :         أوعى يعرف أنك خالى شغل . خليه يحس أنك أنت حتساعده

سامى  :         حاضر تصبح على خير

ثروت  :         تصبح على خير يا بابا

توفيق  :         وإنتوا من أهله ياولادى

كريمة  :        عرفت سامى بيحبك قد أيه

توفيق  :         ( شارداً)كان أطول واحد فى الفصل .. كان اسرع واحد فى الملعب .. أبو رجل

                   دهب طول عمر يشوط الشوطة اللى تخلى قلوب الناس تزغرط .. كان عارف

                   السكة كويس الجون كان دايماً مفتوح له .. كان أول ما يرفع أيديه الفرحة

                   بتملانى كنت أحس ان الجون اللى جاى علشانى هدية .. داسماً كنت بشوفه زعيم

                   كان نجم فى الملعب .. الناس بتزعق .. تهتف له سامى توفيق سامى توفبق

كريمة  :        وهيرجع ناتى سامى توفيق

توفيق  :         يا سلام لو خد فرصة عمره

كريمة  :        بكرة تروح تقابل فؤاد بيه

توفيق  :         بكرة يا كريمة بكرة

كريمة  :        بإذن الله حينخلق لك مكان فى الإدارة

توفيق  :         بكرة بإذن الله .. إتشاء الله بكرة

كريمة  :        اطفى النور

توفيق  :         أيوه يا كريمة أيوه

سامى  :         ( يدخل من ناحية المطبخ بيده خرطوم الغاز ) عيز يقتل نفسه

توفيق  :         ( ينظر من نافذة ) يا سلام القمر النهار ده حلو قوى والنجوم مالية السما

                   ومزهزهة .. بكرة .. هيطلع حلو قوى الصباح رباح يا كريمة

 

ستــــــــــــــــــــــــار

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

( الفصل الثانى )

[ نفس الديكور السابق _ كريمة جالسة وتوفيق ينتهى من شرب القهوة ]

توفيق  :           أول مره فى حياتى أنام زى القتيل

كريمة  :        واول مره فى حياتك تصحى الساعة أتناشر الضهر .. يالا با أخويا علشان تلحق

                        فؤاد بيه فى الشركة قبل ما يمشى .

توفيق  :         فؤاد بيه ناموسيته كحلى  .. ما بيقمش من النوم قبل الساعة واحدة الضهر

كريمة  :        إياك على الله ربنا يجعل فى وشك القبول

توفيق  :           باقول أيه ياكريمة  .. يعنى لو سألنى .. ما هو لازم يسألنى .. حايقول لى ياعم

                   توفيق  يكفيك ماهية قد أيه فى الشهر .. أقول له كام ؟

كريمة  :        ما تدقش يا توفيق

توفيق  :         ما دقش دانا بقالى فى الشركة 36 سنة .. زملائى النهاردة درجة أولى دانا كنت

                   من غير ما أتحك بالتليفون .. بأطلع عمولة 100 أو 1500 جنبه فى الشهر

كريمة  :        وأنت عاوزه يديك 1500 فى الشهر

توفيق  :         على الأقل ألف

كريمة  :        ياخويا بس هما يدوك 500 جنيه

توفيق  :         ما تفوليش فى وشى آل 500 ودى تبقى ماهية

كريمة  :        أحنا عايزين نعيش ونسدد الأقساط اللى علينا بس

توفيق  :         وهما يكفوا لما نسدد قسط التلاجة وقسط بوليصة التأمين يبقى فاضل أيه ؟

كريمة  :        طيب بس قوم أتكل على الله قبل الراجل ما يمشى

توفيق  :         يا دوب كده أروح ألاقيه .. سلام عليكم

كريمة  :        خش عليه برجلك اليمين وانت إنشاء الله حترجع مجبور الخاطر

توفيق  :         حاضر ياستى

كريمة  :        يوه كنت هانسى .. الولاد عازمينك النهارده على العشا

توفيق  :         عازمنى على العشا !! فين .. هنا

كريمة  :        لأ .. العنوان أهوه

توفيق  :         ودى فكرة مين

كريمة  :        ماعرفش .. حا يستنوك الساعة تمانية بالظبط . أوعى ما ترحش ليزعلوا

توفيق  :         ياسلام لو ربنا خد بيده النهارده .. تبقى فرجت من أوسع الأبواب

كريمة  :        والنبى بادعيله من قلبى وبدعيلك أنت كمان ربنا يطول عمرك وتجوز ولاد ولادهم

توفيق  :         ( يضحك ) ولاد ولادهم ياختى قولى بس لحد ما أجوزهم .

كريمة  :        والنبى تسكت يا توفيق

توفيق  :         حاضر يا كريمة ( يخرج ) مش عايزه حاجة

كريمة  :        سلامتك .. أوعى تنسى الميعاد

توفيق  :         وده برضه ميعاد يتنسى

كريمة  :        مع السلامة يا توفيق

( تقف شارده تنظهر فى الإتجاه الذى خرج منه .. يدق جرس التليفون )

كريمة  :        ألو ..ثروت ... أيوه ياحبيبى .. لسه خاج حالاً .. أيوه قلت له .. الساعة تمانية ..

                   ما عندكش فكرة فرح قد أيه .. رايح يقابل فؤاد بيه .. أول مره أشوفه خارج

                   مظأطط كده .. على فكرة ده شال الخرطوم من فوق السيفون .. رحت أشيله

                   الصبح ما لقتوش .. أيه .. سامى اللى شاله .. طيب . طيب مع السلامة ( تضع

                   السماعة  ) يا خسارة كنت فاكره أن هوه اللى شاله

( تتغير الإضاءة على الشركة )

فؤاد    :         أتفضل

توفيق  :         لا مؤاحذة يا بيه الأنسة السكرتيرة قالت لى أن حضرتك مشغول

فؤاد    :         معلهش أتفضل

توفيق  :         مش هاخد من وقت سعادتك أكتر من خمس دقايق

فؤاد    :         لحظة واحدة

توفيق  :         على راحتك يا بيه أنا مش مستعجل

فؤاد    :         حا فصى لك دلوقتى ( يضغط زر الجهاز ينطلق صوت طفلة )

الصوت :        أنا هلهوله طالعة الأولى أنا أشطر بنت فى سنة أولى

فؤاد    :         ( يضحك ) يا سلام

توفيق  :         ( يضحك ) ظريفة قوى

فؤاد    :         دى بنتى هاله

توفيق  :         ربنا يخليها لك يا بيه

فؤاد    :         عندها سبع سنين تصور هى اللى مألفة الغنوة الظريفة دى وملحناها وبتغنيها

توفيق  :         من شابه أباه ما ظلم .. كنت عاوز أقول لحضرتك ..

فؤاد    :         لحظة واحدة .. ( بنطلق صوت )

الصوت :        عاصمة سوريا دمشق . عاصمة لبنان بيروت .. عاصمة الأردن عمان

فؤاد    :         ( يضحك ) هايل

توفيق  :         ( يضحك ) ده أبن حضرتك

فؤاد    :         أيوه حسام عنده خمس سنين بس

توفيق  :         خمس سنين ما شاء الله

فؤاد    :         وأنت لسه سمعت أيه دا حافظ كل العواصم

توفيق  :         وصوته زى الكروان

فؤاد    :         ما هو راخر عايز يبقى مذيع

توفيق  :         أحسن شغله فعلاً

فؤاد    :         أنا عايزه يبقى دكتور

توفيق  :         يبقى أحسن طبعاً ربنا يبارك لك فيهم

فؤاد    :         متشكر

توفيق  :         الله يرحم والدك

فؤاد    :         لحظة واحدة .. ( صوت الطفل مستمر )

الصوت :        عاصمة السودان الخرطوم .. عاصمة ليبيا بتى غازى

فؤاد    :         ( يضحك ) كل البلاد عارف عواصمها ولد عظيم

توفيق  :         طبعاً يا بيه أبن الوز عوام

فؤاد    :         أتفضل أقعد أرتاح

توفيق  :         ده أنا بس كنت جاى لسعادتك فى كلمتين

فؤاد    :         ( يضغط الزر وينظر إليه بتحفز ) أفندم

توفيق  :         فى الحقيقة مش عارف أبتدى أزاى

فؤاد    :         آمال جاى ليه .. فيه أيه .. ما سافرتش طنطا ليه ؟

توفيق  :         ما أنا جاى لحضرتك عشان كده

فؤاد    :         حصل أيه رفضوا العينات

توفيق  :         لا يرفضوها أزاى

فؤاد    :         أسعارنا ما عجتهومش

توفيق  :         ما تعجبهمش أزاى .. هما أول مره بياخدوا بالأسعار دى . أحنا أسعارنا أحسن

                   أسعار فى السوق

فؤاد    :         آمال فيه أيه ؟

توفيق  :         حضرتك عارف أن أنا تعبت وكبرت والسوق النهارده مش زى زمان والشغل

                   بالعموله ما بقاش يوفى إلتزامات البيت والحاجة النهارده مولعة

فؤاد    :         خش فى الموضوع من غير مقدمات

توفيق  :         مش حضرتكواعدتنى أنك هتشوف لى شغلانة فى الإدارة

فؤاد    :         هنا

توفيق  :         حضرتك عارف أنا عندى ستين سنة .. خدمت الشركة 36 سنة

فؤاد    :         أنت عارف أن الإدارة مفيهاش مكان فاضى

توفيق  :         الماهية اللى حضرتك تحددها لى هابوس أيدى وش وضهر(فؤاد يخرج سيحارة

                   ويبحث عن ولاعة  .. توفيق بشعل له السيجارة ) أعمل معروف يا فؤاد بيه

فؤاد    :         بس أنت مش موظف فى الشركة أنت بتشتغل معانا بالعمولة

توفيق  :         ما أنا كنت موظف والدك الله يرحمه هو اللى حب يكرمنى الله يكرمه قال لى سيبك

                   من الماهية وأشتغل بالعمولة أحسن لك

فؤاد    :         بابا عايز يوفر موظفين ويرتاح من دفع الماهيات من غير شغل كانت فكرة

توفيق  :         أيوه بس البركة فى حضرتك يا فؤاد بيه

فؤاد    :         أسمع يا توفيق دى شركة مش وسيه تشتغل تاخد عمولة ما تشتغلش ما تاخدش

توفيق  :         غارف يا فؤاد بيه بس ده كان ينفع زمان النهارده السوق نايم

فؤاد    :         أقوم أحمل الشركة أكتر

توفيق  :         ( بإستعطاف ) إسمعنى أرجوك دى مسألة حياة أو موتزمان أنا كنت موظف هنا

                   بماهية

فؤاد    :         وحد كان ضربك على أيدك مش أنت اللى وافقت تشتغل بالعمولة . أنا مش فاضى

توفيق  :         أنا مش طالب أكتر من 100 جنيه ماهية

فؤاد    :         ( بسخرية ) 100 جنيه أنت فاكرها عزبة

توفيق  :         أنا بادفع أقساط

فؤاد    :         وانا مالى ومال الأقساط اللى بتدفعها ( يرفع سماعة التليفون )

توفيق  :         خليهم تمانين أهو يادوبك

فؤاد    :         تحية خليهم يستنون فى أوضة الأجتماعات أنا جاى حالا

توفيق  :         طب حدد الماهية اللى تعجب سيادتك

فؤاد    :         فرصة سعيدة جداً .. أشوفك وقت تانى

توفيق  :         خمسين جنيه أنا مش طمعان فى أكتر من كده

فؤاد    :         ( منفعلاً ) أنا مش فاضيلك

توفيق  :         ( منفعلاً ) أنا مش باشحت منك.. دول 36 سنة من عمرى هنا ده بيتى أنا ومكتبى

                   أنا شبابى حياتى سنة سنة يوم يوم لفيت مصر حته حته وبلد لبلد أنا اللى عملتها

                   شركة بغرقى وتعبى .. أعمل معروف أنا يا ما شيلتك على حجرى

فؤاد    :         أنا مش فاضى لوجع الدماغ ده ( يخرج )

 توفيق  :        ( ينهار ) دانا اللى سميتك أنا اللى شيلتك .. فينك يا حسنى بيه تشوف اللى بيعمله

                   فيه أبنك .. بيذلنى .. عاجبك كده يا حسنى بيه خاتنى أشنغل بالعمولة ليه ..

                   ( ثائراً ) ما ترد عليه . عملتها ومت وسبتنى لكلب من صلبك يتحكم فيه ليه رد

                   عليه .. رد عليه رد ( يضرب المكتب بهستيريا فينطلق صوت المسجل )

الصوت :        عاصمة سوريا دمشق . عاصمة لبنان بيروت .. عاصمة الأردن عمان

توفيق  :         كفايه كفايه

فؤاد    :         ( يدخل ) أيه الدوشة اللى أنت عاملها دى

توفيق  :         سكته ( مشيراً إلى المسجل )

فؤاد    :         ( يضغط الزر ) اسمع يا توفيق

توفيق  :         ما تقولش حاجة يا سعادة البيه أنا هاسفر طنطا بكره

فؤاد    :         ( ثائراً ) أسمع ما فيش طنطا . بكره نسلم العينات والعهدة اللى عندك وترتاح فى

                   بيتكم أنا ما عنديش شغل لك

توفيق  :         وأعيش أزاى أسرق أقتل حرام عليكم دأنا أنسان .. بنى آدم أنا أنسان ( ينهار ..

                   يظهر أمين )

أمين    :         الحصان لما بيعجز .. بيضربوه بالرصاص .. فاهم يل توفيق

توفيق  :         ( بثورة ) ليه .. ليه

أمين    :         عشان يريحوه ويرتاحوا منه

توفيق  :         ليه ذنبه أيه

أمين    :         ما بقاش ينفع

توفيق  :         أنا مش حصان أنا أنسان ..أنسان

أمين    :         أنت حر

توفيق  :         رايح فبن .. ما تسبنيش لوحدى أنا محتاج لك يا أمين

أمين    :         يا ما قلت لك تعالى معايا .. مستنى أبه

توفيق  :         صعب قوى ياأمين .. الفراق صعب

أمين    :         الجوع أصعب هتاكل منين الشهر اللى جاى واللى بعده واللى بعده

توفيق  :         أبيع البيت وأعمل مشروع

أمين    :         ولما المشروع يخسر وما تلاقيش أجرة الشقة اللى هتسكن فيها كريمة تترمى فى

                   الشارع

توفيق  :         لا .. لا .. يا أمين

أمين    :         تعالى معايا

توفيق  :         ادينى فرصة أفكر

أمين    :         أنا مش فاضى لك

توفيق  :         طب استنى هاجيب كريمة واولاد ونسافر على طول ( تظهر كريمة )

أمين    :         لا يا توفيق أنت بس

توفيق  :         وهما أسيبهم لمين

أمين    :         الوقت بيسرقنا .. مستنى أيه

توفيق  :         أودعهم .. ممكن

أمين    :         بس بسرعة ( موسيقى جنائزئة )

توفيق  :         أشوف وشك بخير يا كريمة

كريمة  :        واهون عليك يا توفيق

توفيق  :         غصب عتى يا كريمة

ثروت   :        طول عمرك نفسك تعمل مشروع .. حتسيب سامى لوحده يا بابا

سامى   :        100 ألف جنيه فى أيديه أنت نسيت يا بابا

أمين    :         توفيق

توفيق  :         أمين أشوف وشك بخير ( يختفى الجميع )

توفيق  :         شركة توفيق سالم وأولاده .. ( يتحرك ليخرج .. إظلام وإضاءة على جزء آخر –

                   مكتب كامل _ عادل يلبس ملابس أنيقة ومعه شنطة سفر

توفيق  :         ( من الخارج  )  يا أستاذ أنا توفيق سالم .. إذا كان هوه مهم قيراط أنا مهم

                   مليون قيراط خش قول له توفيق سالم

السكرتير:       حاضر .. حاضر

عادل    :        فيه أيه يا أستاذ محمود

السكرتير:       الأستاذ توفيق سالم

عادل    :        خليه يتفضل

السكرتير:       ده عايز والدك مصمم يقابله .. قلت له البيه المدير فى إجتماع طلع فيه كده

عادل    :        معلهش خليه يتفضل

السكرتير:       أمرك يا عادل بيه

توفيق  :         ( يدخل ) أيه يا عادل يا بنى مش تخلى أبوك ينقى سكرتير غير ده .. سكرتير

                   يعرف يقابل الناس كويس

عادل    :        حاابلغه .. أتفضل

توفيق  :         أزيك يا عادل .. وأنت كمان مستنى أبوك

عادل    :        أيوه جاى أسلم عليه قبل ما أسافر

توفيق  :         على فين العزم إنشاء الله

عادل    :        لندن

توفيق  :         لندن حته واحدة

عادل    :        ايوه

توفيق  :         ليه كفى الله الشر .. هتقعد كتير

عادل    :        ( يضحك ) أربع سنين تقريباً .. هو بابا ماقلش لحضرتك

توفيق  :         هوه أنا باشوفه

عادل    :        حضرتك واحشنى قوى

توفيق  :         يعنى بتسأل وألا حد بيشوفك .. من يوم ما أتجوزت وأنت بقيت زى اللى خلفك

                   عاملى فيها مشغول على طول

عادل    :        والله مشغول

توفيق  :         خلفت وألا لسه

عادل    :        توأم .. محى ونهى

توفيق  :         أتنين بالجوز

عادل    :        كل ما أجيب لهم داده تروح ما ترجعش والمصيبة أن المدام مهندسة مشكلة

توفيق  :         ( لنفسه ) أتنين بالجوز

عادل    :        بابا قال لى أن سامى رجع من بيروت .ز أتجوز وألا لسه

توفيق  :         لسه ( متداركا ) لسه خاطب بنت واحد مليونير لبنانى أنما أيه . زى القمر

                   عنيها زرقة لون القزاز .. هيه كمان مهندسة زى مراتك ويمكن خلف أتنين زيك

عادل    :        حيرجع تانى بيروت

توفيق  :         لا ما خلاص عمل قرشين .. ( متداركاً ) 100 ألف جنيه وهيفتح شركة

عادل    :        أنت لسه بتشتغل فى نفس الشركة

توفيق  :         ( صمت ) .. أنت لسه بتدور على داده ( تظهر كريمة )

عادل    :        مش معقول آخد داده من هنا هتكلفنى سفر الشىء الفلانى

توفيق  :         ( تختفى كريمة ) ياخسارة حظوظ بقى

عادل    :        مالك يا عم توفيق ؟

توفيق  :         ليه سامى مبقاش زيك .. ليه حظه مش زى حظك

عادل    :        مش فاهم

توفيق  :         عادل أنت كنت صاحبه وزميله  .. أيه اللى خلاه يسيب الكلية فى آخر سنه

                   مادخلش  الامتحان ليه ؟

عادل    :        هوه ده نفس السؤال اللى محيرنى

توفيق  :         ضيع مستقبله

عادل    :        كان عنده فرصة .. ينجح فى الدور التانى

توفيق  :         مادخلش  الامتحان ليه ؟

عادل    :        يوم ما طلعت النتيجة  حضرتك كنت فى إسكندرية فاكر

توفيق  :         أيوه .. أيوه .. انا كنت فى إسكندرية

عادل    :        طنط كريمة قالت له روح ريح أعصابك فى إسكندرية مع أبوك وإرجع معاه ..

                   حضرتك كنت هترجع بعد أسبوع .. مش كده ؟

توفيق  :         أيوه ( تظهر المرأة تضحك )

عادل    :        سافر لك ورجع معاك تانى يوم .. أيه اللى حصل فى أسكندرية ؟

توفيق  :         أيه اللى حصل فى أسكندرية ؟

عادل    :        من يومها أبتدى يكره كل حاجة حتى نفسه ... يوم ما رجع ولع فى الكتب وفى

                   لبس الكورة حاولت أمنعه ضربنى

توفيق  :         أيه اللى خلاه يعمل كده

عادل    :        بيتهيألى حضرتك عارف كويس

توفيق  :         قصدك ..

عادل    :        أيه اللى حصل فى أسكندرية ؟ ( المرأة تضحك )

توفيق  :         ( منفعلاً ) ما أعرفش .. هوه قال لك أنا السبب ؟

كامل    :        ( من الخارج ) دى فوضى خلى المحامى يبعت لهم إنذار .. ( يدخل ) أهلاً

يا توفيق أزيك . أقعد .. هيه يا عادل نويت خلاص

عادل    :       يا دوب أوصل المطار يا بابا .. أنا قلت أشوفك قبل ما أسافر أشوف وشك بخير يا

                   عم توفيق .

توفيق  :        مع السلامة يا عادل ... حتلاقى دادة فى لندن بإذن الله .

كامل    :        ولد تمام .. رايح لندن ياخد الدكتوراه   

توفيق  :         الدكتوراه .. ما شاء الله .. دكتوراه و من لندن

كامل    :        الكتكوت الفصيح من البيضة بيصيح .. طول عمره شغال .. مكنش محتاج لحد

                   يقول له ذاكر.

توفيق  :         فعلاً

كامل    :        توفيق أنا مرتبط بمواعيد الفلوس أهيه .

توفيق  :         كامل .. أنا عليه أقساط كتير قوى الشهر ده .

كامل    :        دول 300 جنية عدهم

توفيق  :         عارف .. أنا عليه 3 أقساط تأمين متأخرين لازم أدفعهم ... أنا عندى فلوس فى

                   البنك بس مش عايز أسحب منهم لحسن كريمة تعرف .

كامل    :        توفيق .. أنت ماعندكش فلوس فى البنك .

توفيق  :         لاء عندى .. أنا مش كداب

كامل    :        لو كان عندك ما كنتش جيت .. أنا حافضك كويس مناخيرك فى السما

توفيق  :         أنا مقيد كل مليم خدته منك

كامل    :        مش مهم .. توفيق  انت بتعمل فى نفسك كده ليه ؟

توفيق  :         أنت هاتفتح لى محضر .. حتدينى الفلوس ولا أمشى

كامل    :        انا عندى وظيفة فاضية يا توفيق

توفيق  :         وأنا مش خالى شغل .

كامل    :        أنا زى أخوك .. بادور على مصلحتك .. بقالك عشر شهور بتستلف أول كل شهر

توفيق  :         باستلف مش بشحت

كامل    :        أنا عندى وظيفة مرتبها كويس

توفيق  :         وأنا مأدرش أسيب شغلى

كامل    :        أنت ليه مش عايز تشتغل عندى

توفيق  :         أنت فاهم أنك ممكن تذلنى عشان بستلف منك قرشين .. مش عايز منك حاجة

                   ومش ها وريك وشى بعد كده

كامل    :        أنت بتخبط دماغك فى الصخر .. أنا عارف أنهم رفدوك

توفيق  :         كدب .. لا .. أنا

كامل    :        انت بتكدب على نفسك

توفيق  :         أنت مش وصى على .. مش ولى أمرى أنت مين أنت ؟

كامل    :        آسف يا توفبق .. مش قصدى أضايقك .. المحفظة أهيه خد منها اللى أنت عاوزه

توفيق  :         مش عايز حاجة مش عايز

كامل    :        فيه أيه يا توفيق ؟

توفيق  :         الزمن بيلعب بيه ياكامل .. مش عارف أعمل إيه ؟ أنا بقيت حصان حصان يا كامل

                   والنهارده بيضربونى بالرصاص .. ضيعت عمرى كله فى الشركة .. وأخرتها كامل    :   أرجوك يا توفيق ..  أسمع كلامى وإشتغل معايا

توفيق  :         مقدرش أشتغل عندك

كامل    :        ليه ؟ عشان كنت المساعد بتاعك .. أنا هديك المرتب اللى يناسب خبرتك

توفيق  :         مش عايز أشتغل عندك

كامل    :        أنت فعلاً حصان .. خد .. خد اللى أنت عايزه .. يكفيك كام

توفيق  :         150 جنيه .. أدفع أقساط بوليصة التأمين

كامل    :        تأمين على أيه ؟

توفيق  :         حياتي .. حياتي اللى ماهدتش تسوى عارف لما أموت هتسوى كام 30 ألف جنبه

                   شركة التأمين هتدفعهم للورثة بمنتهى السهولة

كامل    :        فكر يا توفيق .. الوظيفة تحت أمرك

توفيق  :         أغرب شىء فى الدنيا أنك أنت النهاردة صديقى الوحيد !

( بلاك)

( الكازينو )

ثروت  :         هنا ظريف قوى يا عثمان بعيد عن الدوشة

عثمان  :         تحت أمرك يابيه .. هتشرب حاجة

ثروت  :         لما يجى بابا وأخويا سامى

عثمان  :         كابتن مصر .. أهو وصل .. أهلا يا كابتن

سامى   :        بابا ما جاش ؟

ثروت  :         زمانه جاى . أقعد بقى وأحكى لى بالتفصيل أيه اللى حصل .. قابلته أزاى؟

سامى   :        بعدين

ثروت  :         تلاقيه واخد نص سميراميس لحسابه

سامى   :        يوه يا ثروت 

ثروت  :         دخلت على السكرتيرة .. طلبت المقابلة خرجلك يجرى وخدك بالأحضان

سامى   :        أسكت أرجوك أنا مش فايق لك

ثروت  :         طبعاً ياعم .. مين قدك

سامى   :        ثروت أرجوك

ثروت  :         تحت أمرك سكرتير أعمالك ومديرك المالى فى الخدمة

سامى   :        ثروت 

ثروت  :         ياه ده أنت عصبى قوى فيه إيه ؟

سامى   :        مش عارف اقول لبابا ايه ؟

ثروت  :         أيه ما وافقش على المبلغ ؟

سامى   :        فضلت قاعد مستنيه 6 ساعات .. وهو مشغول

ثروت  :         يمكن ما يعرفش أنك بره

سامى   :        السكرتيرة قالت له

ثروت  :         وبعدين

سامى   :        الساعة 5 تقريباً خرج عدى عليه وما عرفنيش

ثروت  :         ما عرفكش أزاى ؟ مش بتقول.....

سامى   :        كدب كدبة أخترعتها وصدقنها

ثروت  :         يعنى أنت ما تعرفوش خالص ؟

سامى   :        كنت شغال عنده فى بيروت باليومية

ثروت  :         أنت مش قلت ..

سامى   :        كان لازم أقول أى حاجة تخلينى مهم قدام بابا .. لما عدى عليه وما عرفنيش كل

                   شىء أنهد قدام عنيه ما حسيتش أنا عملت أيه .. لقيت نفسى فى مكتبه وفى أيدى

                   القلم الباركر بتاعه سرقته أزاى ما أعرفش ؟

ثروت  :         أوعى تقول لبابا ؟

سامى   :        لازم يعرف .. لاوم يفهم أنى ماليش مستقبل ؟

ثروت  :         دا يموت فيها .. أقوله أن مروان بيه عازمك على العشا بكره

سامى   :        ولما يفوت بكره أقوله أيه بعد بكره وبعد بعده

ثروت  :         مش هنغلب نفهمه أن الراجل بيفكر فى المشروع واللجان بتدرسه أسبوعين

                   وينسى

سامى   :        وإن ما نسيش

ثروت  :         هينسى بأذن الله هينسى

عثمان :          أتفضل يا بيه

ثروت  :         بابا أتفضل أهلا وسهلا

توفيق  :         8 بالدقيقة

 ثروت  :        تأمر بعشا أيه يا بابا ؟

توفيق  :         عشا أيه عاوز أسمع الأخبار يأبو السام

سامى   :        بابا

ثروت  :         أيه رأيك فى الركن الهادى ده يا بابا

توفيق  :         قول يا سامى عملت أيه ؟

ثروت  :         بابا الموضوع

توفيق  :         ما تقاطعنيش يا ولد .. الراجل قابلك أزاى ؟

سامى   :        فى الحقيقة يا بابا

توفيق  :         طبعاً كان إستقبال هايل مش كده ؟

ثروت  :         طبعاً يا بابا

توفيق  :         قابلته الساعة كام ؟

سامى   :        الساعة 5

توفيق  :         مش قلت لك روح له بدرى

سامى   :          رحت الساعة 12

توفيق  :           6 ساعات عشان تقابله دا أنت كنت دراعه اليمين كنت

سامى   :        كدب كل اللى قلتهولك قبل كده كدب أنا

توفيق  :         أنت أيه ؟ أوعى تكون ما رحتش ؟

سامى   :        خلينى أكمل كلامى أرجوك

توفيق  :         المركب بتغرق وكل شىء بينهد فوق دماغى .. أنا أترفدت من الشركة النهارده

 ثروت  :        أترفدت

توفيق  :           عايز أقول لأمكم خبر يفرحها كريمة صبرت كتير أنا فى عرضك يا بنى

سامى   :        رفدوك ليه ؟ الكلاب

توفيق  :         قول أنت الأول الراجل وافق على المشروع .. طلبت منه كام وأداك كام ؟

سامى   :          ماأدنيش حاجة ومش هيدينى حاجة أدينى فرصة أتكلم

توفيق  :           أوعى تكون ما شفتوش

سامى   :          شفته ... شفته

توفيق  :         خاى عندك رحمة يا بنى وأنطق أيه اللى حصل

سامى   :        ما عرفنيش خالص أستريحت ؟

توفيق  :         ليه ؟ كل طريق بنمشى فيه بيتوه من تحت رجلينا ( تنحصر الإضاءة)

ثروت  :         سامى

سامى   :        مش عايز يسمعنى ليه ؟

توفيق  :         عجل العربية بيحك فى الرصيف .. السرعة ميت كيلو .. الشوارع زحمة .. البيوت

                   زحمة .. الهوا مبقاش نضيف

سامى   :        أسمعنى يا بابا أنا فضلت مستنيه وبعدين .. ( لا نسمع صوته)

كريمة  :         كلم فؤاد بيه يا توفيق .. أحنا عايزين نعيش و نسدد الأقساط بس

فؤاد    :         أنت عجزت ما بقتش تنفع .. سلم العينات والعهدة وأرتاح فى بيتكم

صوت  :         عاصمة سوريا ......... الخ

أمين    :        الحصان لما بيعجز بيضربوه بالرصاص

عادل    :        أنا بكرة مسافر لندن

كامل    :        ولد تمام .. حيرجع لنا بالدكتوراه

عادل   :         ايه اللى حصل فى أسكندرية

سلوى  :         ( تضحك ) 

عادل   :         يوم ما رجع ولع فى الكتب ليه ؟

توفيق  :         لو كان دخل الامتحان

عادل   :         يوم ما رجع من أسكندرية حرق حياته ليه ؟

توفيق  :         ما أعرفش

عادل   :         أيه اللى حصل فى أسكندريه ؟ ( تتداخل أصوات مردده أيه اللى حصل فى أسكندريه ؟

سلوى   :        ( تضحك )

توفيق  :         ( يدور حول نفسه ) أسكتى مش عاوز أفتكر اليوم ده

صوت  :         أوضة سبعين الأستاذ توفيق سالم

توفيق  :         مش عاوز أفتكر

الصوت :        ألو أستاذ توفيق

توفيق  :         أيوه

الصوت :        فيه واحد فى الرسبشن عاوز حضرتك

سلوى  :         ( تضحك )

( خبط على الباب )

الصوت :        أنا متأكد أنه فى الأوضة ما خرجش

سامى   :        أفتح يا بابا أنا سامى

سلوى  :         خايف تفتح الباب ليه ؟

توفيق  :         مين اللى هايجى فى وقت زى ده ؟

سلوى  :         ده هيصحى الأوتيل .. ويمكن يكسر الباب

توفيق  :         يكسروه مش هافتح

سلوى  :         مش يمكن حريقة

توفيق  :         حريقة ؟

سلوى  :         أمال بيخبطوا قوى ليه ؟

توفيق  :         وبعدين أسمعى أدخلى أنتى الحمام وأنا حشوف مين

سلوى  :         بسرعة ( تدخل الحمام )

سامى   :        بقالى ساعة بخبط حضرتك ما سمعتنيش

توفيق  :         سامى ؟ أيه ؟ أيه اللى جابك ؟

سامى   :        أديه وجعتنى من الخبط .. ما فتحتش على طول ليه ؟

توفيق  :         ما سمعتش .. كنت فى الحمام

سامى   :        مين هنا

توفيق  :         هنا .. هنا فين ؟؟ ما حدش هنا

سامى   :        مكتوب أسمك تحت توفيق سالم وحرمة معناته أيه الكلام ده ؟

توفيق  :         ولد انت بتزعق فى وشى ؟

سامى   :        أنت متجوز واحدة تانيه ؟

توفيق  :         متجوز أيه يأهبل ؟ أنا أتجوز غير أمك .. دى مفاجأة هاجيبها تقضى أسبوع هنا ..

                   فهمت ؟

سامى   :        أنا برضة ما صدقتش

توفيق  :         هيه أيه أخبار النتيجة ؟ نجحت ؟

سامى   :        بابا

توفيق  :         ما ظهرتش ؟

سامى   :        ظهرت يا بابا .. ظهرت

توفيق  :         أيه ؟ سقطت ؟

سامى   :        ايوه يا بابا

توفيق  :         ليه ما ذاكرتش كويس

سامى   :        ومجاوب كويس

توفيق  :         فيه دور تانى ؟

سامى   :        فيه يا بابا

توفيق  :         كويس حندخل الدور التانى .. مش كده ؟

سامى   :        أيوه يا بابا .. دى آخر سنة

توفيق  :         يبقى لازم تسافر عشان تذاكر

سامى   :        أنا جايب الكتب معايا وحا ذاكر هنا

توفيق  :         تذاكر هنا ؟؟

سامى   :        أسوه تغيير الجو حيخلينى أعرف أذاكر ..

توفيق  :         طيب .. سامى أنزل دلوقتى أقول لهم يجهزوا لنا العشا يا لا باحبيبى

سامى   :        حاضر يا بابا

توفيق  :         سامى خد هات معاك علبة سجاير

 سلوى  :        ( من الداخل ) ألحقنى يا توفيق

سامى   :        بابا مين جوه

توفيق  :         جوه .. جوه فين ؟

سامى   :        هنا .. سمعت واحدة بتصرخ .. وبتقول

توفيق  :         دى .. دى فى الأوضة التانيه .. أجرى يا سامى

سامى   :        دى بتقول ..

سلوى  :         ألحقنى يا توفيق .. فيه برص فى الحمام

سامى   :        دى فى الأوضة التانية

توفيق  :         الحمام فى أوضتها مسدود.. و ..

سلوى  :         اتحايلت عليه استحمى فى الحمام بتاعه

توفيق  :         مش خلاص أستحميتى مستنيه أيه

سلوى  :         ألبس هدومى .. وألا عاوزنى أخرج كده

توفيق  :         هدومك تلبسيها فى أوضتك

سلوى  :         تصبحوا على خير

توفيق  :         أقعد يا سامى .. أيه المفاجأة اللطيفة دى ؟ أوعى تكون زعلان .. حاتنجح

                   ماتخافش

سامى   :        مين دى ؟

توفيق  :         دى واحدة .. و

سامى   :        ليه كده يا بابا ؟

توفيق  :         لاء ..أ .. سامى تعالى نحضر الشنط .. حنساقر حالاً .. أيه ؟ كبرت وما بقتش

                   تسمع كلامى ؟ بتعيط ليه ؟ أنا كنت قاعد لوحدى هى خبطت دخلتها

سامى   :        كدب .. كدب

توفيق  :         سامى .. ولد .. تعالى هنا تعالى هنا بقولك

عثمان  :         أجيب العشا يا بيه ؟

توفيق  :         هما فين ؟

عثمان  :         أفتكروا حضرتك مشيت .. تحب أجيب أيه يا فندم

توفيق  :         لاء .. كتر خيرك

( إظلام ـ يظهر المطبخ )

سامى   :        ماما أنتى لسه صاحيه ؟

كريمة   :        أنا مش أمك ولا أعرفك .. أخرج بره

سامى   :        فين بابا ؟

كريمة   :        عاوز منه أيه كفاية اللى عملتوه فيه

سامى   :        ماما أفهمينى

كريمة   :        أفهم أيه ؟ عزمتوه على العشا .. وفضل يعد الساعات .. ده لو غريب ما تعملوش

                   معاه كده

سامى   :        هو اللى سابنا ومشى

كريمة   :        دى آخرة تربيته .. تسيبوه فى المطعم وتمشوا

ثروت   :        هو اللى قالك كده ؟

كريمة   :        ما قالش حاجه .. كان باين عليه اللى حصل

ثروت   :        هو أيه اللى حصل؟

سامى   :        لازم أقابله .. لازم يعرف الحقيقة

كريمة   :        عايزين تعملوا فيه أيه اكتر من كده ؟

سامى   :        هو بيعمل أيه ؟

كريمة   :        بيزع ورد فى الجنينة

سامى   :        أنتى عارفة الساعة كام ؟

كريمة   :        فى عرضك يا بنى .

توفيق  :         هنا ورد أحمر وهنا ورد أصفر وهنا ورد أبيض

أمين   :          بكره الجنينة تتملى ورد

توفيق  :         كريمة تعبت .. وعاوز أسعدها . أيه رأيك .. تلاتين ألف جنيه ..

أمين   :          ماتبقاش منفعل يا توفيق

توفيق  :         أنا دفعت كل أقساط بوليصة التأمين المتأخرة النهارده

أمين   :          أنت متأكد أنهم هيدفعوا التلاتين ألف

توفيق  :         طبعاً مادام دافع كل الأقساط هيدفعوا المبلغ على داير مليم

أمين   :          توفيق .. أنت جبان

توفيق  :         والشجاعة أنى أخليهم يتبهدلوا من غير فلوس

أمين   :          ثلاثين ألف جنيه مبلغ مش بطال . وعنهم البيت مش هيدفعوا إيجار

توفيق  :         هى دى الفكرة المضمونة .. هستنى لحد أمتى .. ده بيعاندى يا أمين .. ضيع

                   مستقبله بالعند فيه مستقبله بالعند فيه .. فاكرنى خايب زيه .. حيشوف جنازة

                   آخر أبهه .. بكره اللى يعرفونى شكلهم أيه .. بكره يعرف أنا مين ؟

أمين   :          بس هيقول عليك جبان هربت من الحياة

توفيق  :         أمين 

أمين   :          ومغفل كمان

توفيق  :         دى تبقى مصيبة

أمين   :          وهيكرهك طول ما هو عايش

توفيق  :         آه يا أمين .. ليه الأيام الحلوة بتعدى بسرعه .. زمان كان بيحبنى .. ليه بكرهنى

أمين   :          المهم أن كريمه تعيش يا توفيق فاهم

توفيق  :         أيوه لازم تعيش

أمين   :          هستناك يا توفبق أوعى تتأخر

توفيق  :         مش هتأخر يا أمين جاى على طول ..( يختفى أمين ويقترب سامى )

توفيق  :         هنا ورد أحمر وهنا ورد أصفر وهنا ورد أبيض

سامى   :        بابا .. الساعة 3 صباحاً

توفيق  :         وأيه يعنى

سامى   :        الناس تقول علينا أيه ؟

توفيق  :         مش مهم

سامى   :        بابا أشوف وشك بخير أنا ماشى ومش راجع تانى

توفيق  :         أمشى غور من وشى مش عاوز أشوف وشك تانى

سامى   :        حاضر يا بابا

توفيق  :         أسمع يا بنى

سامى   :        أنت عاوز منى أيه ؟

توفيق  :         عاوزك تعرف أنك حيوان ضيعت مستقبلك بالعند فيه .. عشان تخلص تارك منى .

                   أنا ما عملتش حاجة غلط

سامى   :        محدش قال أنك عملت حاجة

توفيق  :         عنيك بتقول كده .. 15 سنه كل ما أبص لك أحس أن خنجر أترشق فى قلبى

سامى   :        أنت اللى عاوز ترشق خنجر فى قلبى ( يلقى خرطوم الغاز أمامه )

ثروت   :        سامى 

سامى   :        أنت اللى عاوز تموت نفسك بالعند فينا كلنا

كريمة   :        أخرس أسكت فى عرضك

سامى   :        أتكلم عاوز تقتل نفسك ليه ؟ عاوز تهرب من الدنيا ليه ؟

ثروت   :        كفاية بقى يا سامى

سامى   :        ليه ما حدش عنده الشجاعة يواجه نفسه ؟

ثروت   :        وإنت واجعت نفسك أمتى ؟ وإنت بتضبع مستقبلك ورا رقاصة ..

توفيق  :         ده بيعاندنى

سامى   :        أنت السبب .. أنت المسئول

توفيق  :         أنا ؟؟

سامى   :        ليه خلتنى كده ؟

توفيق  :         روح أشنق نفسك بالعند فيه ؟

سامى   :        مش هشنق نفسى .. أنا أبتديت أعرف نفسى أعرف حقيقتى أنا فالصوما أنفعش

                   فى أى حاجه دى الحقيقة

توفيق  :         ( بثورة ) مستقبلك قدامك فرصة عمرك فى أيدك

سامى   :        اللى زبى العشرة منهم بقرش .. مرميين على الرصيف بالألوف

توفيق  :         ( صارخاً ) أنت أبن توفيق سالم

سامى   :        مين توفيق سالم رئيس الوزرا ؟ وزير ؟ توفيق سالم موظف بالعمولة أبتدى من

                   الصفر وأنتهى للصفر وسامى توفيق خلاص

توفيق  :         كلب .. كلب

سامى   :        ايوه كلب مش بطل مش كابتن كفاية أحلام بقى كفاية

توفيق  :         سامى يا بنى كفايه

سامى   :        انا حامشى الصبح ومش راجع تانى

توفيق  :         لا .. خليك يابنى أوعى تمشى .. قولى له يا كريمة ما مشيش

كريمة   :        أطلع أوضتك ياسامى .. معاه يا ثروت

توفيق  :         كريمة أطلعى معاهم سامى محتاجلك قوى .. لازم تبقوا كلكم فوق

كريمة   :        ما أقدرش أسيبك يا توفيق

توفيق  :         روجى أمسحى دموع سامى يا كريمة .. عشان خاطرى أنت عمرك ما خالفتينى

( تصعد كريمة )

توفيق  :         ثلاثين ألف جنيه

أمين    :         حط رجلك على الطريق حاتوصل

توفيق  :         بيحبونى ؟ مش كده ؟

أمين    :         حيحبوك أكتر لما يلاقوك موت نفسك عشانهم

توفيق  :         تلاتين ألف جنيه

أمين    :         قولهم الوداع الا بينا

توفيق  :         الوداع يا كريمة .. الوداع يا أولاد

أمين    :         يالا يا توفيق الوقت بيجرى

توفيق  :         سامى أوعى تنسى معادك فى سميراميس .. خليه يحس أنك مهم . أمين أستنى

                   يا خويا أنا جاى معاك أهوه

كريمة  :         أرجع يا توفيق حرام عليك يا حبيبى

كريمة   :        هش أسكتى

عادل    :        لو ماذاكر هيضيع مستقبله

أمين    :         عشر سنين بس

فؤاد    :         لازم ترتاح فى البيت

عادل    :        أنا بكره مسافر لندن

كامل    :        ليه مشعايز تشتغل عند

كريمة   :        توفيق .. توفيق (  خفوت الإضاءة )( صوت محرك سيارة ينطلق بأقصى سرعة )

سامى   :        بابا

ثروت   :        لا يابابا

( إظلام تام )

كريمة   :        فين كل الناس اللى يعرفوه ؟ محدش مشى فى جنازته ليه ؟

ثروت   :        ليه عمل كده ؟أحنا كان ممكن نساعده

سامى   :        ما حدش ساعده ليه ؟

كريمة   :        توفيق مات وألا مسافر شغل وراجع تانى .. لازم يرجع .. لازم يرجع

( النهاية )

 لتنزيل المسرحية للطباعة بصيغة ال word

 أضغط هنا