مسرحية هكذا احبك
1
الفصل الأول
(يفتح الستارة دون أن يدخل أحد ويسمع صوت من الكواليس وهو صوت فادي وهو شاب ضرير
يدرس بمعهد الموسيقي يعزف على آلة العود ".)
فــــــــــــادي :- أخيراً الجو خلي لنا الكل نزلوا وما فيش غيرنا أنا وأنت يا سلام أسعد لحظات حياتي
وإحنا لوحدنا وأنت في حضني أسمعك وتسمع ليّ بنسي الدنيا واللي فيها لما صوتك. بيرن في ودني تعالي يا حبيبي
[ ثم يخرج إلي المسرح وهو ممسك بعوده يمشي بحرص حتى يجد مكان يستريح فيه ]
أجمل حاجة في الدنيا إن الواحد يبقي ليه صديق وأنا ربنا رزقني ب 4 أقربهم لقلبي عودي الحبيب اللي ما بيفارقنيش لا في البيت ولا في المعهد . شكراً ليك يارب رزقتني بأصحاب حلوين و وفرتلنا سكن مريح مع إن السكن في مصر صعب جداً خصوصاً للطلبة ومش محسسنا بالغربة . عارفين سكان العمارة كلهم طيبين أكتر من الأهل وكلهم كوم وصاحبة العمارة كوم تاني خالص أدب ايه وكرم ايه داحنا بنديها الأيجار بالعافية ولا الهدوء اللي بتوفر هلنا علشان نذاكر أهو زى ما أنتوا شايفين هس هس يا سلام ربنا يخليكي يا ست حريصة . أذاكر بقي اللحن الجديد [يدق الباب بعنف شديد]
فـــــــــادي :- ميــــــــــــــــن .؟
حريصــــة :- افتح يا مأندل ( منيل ) على عينك منك ليه .
فـــــــــادي :- ست حريصة استرها معايا يارب... إن سرت في وادي ظل الموت فلا أخاف شراً... الرب يقاتل عنكم وانتم تصمتون [ ثم يفتح الباب وتدخل حريصة وهي ست عجوزة محبه للمال شرسة ]
حريصــــة :- جري أية يا منيل… سنه عقبال ما تفتح الباب .
فـــــــــادي :- معلش بقي يا ست حريصة العتب ع النظر .
حريصــــة :- أمال فين بقيت العصابة ؟.
فـــــــــادي :- مالوش لزوم الكلام ده يا ست حريصة .
حريصــــة :- ده ليه لزوم ونص فين يا واد أنت وهو إيجار الشقة . وأية ده اللي أنا شايفاه بعنيّا ده ؟
فـــــــــادي :- في أية يا ست حريصة ؟
حريصــــة :- إنتوا حد مصلطكوا علىّ… ناويين تخربوا بيتي .
فـــــــــادي :- في أية بس ؟
حريصـــــة :- يعني مش شايف ؟
فــــــــــادي :- هو أنا لو كنت بشوف كنت هأساللك ليه .
2
حريصـــــة :- منورين الشقة كلها يا ظلمَة . ما فيش في قلوبكم رحمة ما هو من حقكم تعملوا أكتر من كده هو إنتوا حاسين بحاجة ما أنا اللي بدفع الكهربة والميه .
فـــــــــادي :- معلش يا ست الكل أنا هطفيه أنا ما بتفرقش معايا إذا كان النور مطفي أو مولع أللتنين
بالنسبة ليّ ظلمة .
حريصـــــة :- أوعوا تكونوا مفكرين علشان منا كبيرة ووحدانية قوم هتضحكوا علىَ .
فـــــــــادي :- لا لا يا ست الكل ما تقوليش كدة .. دا أنت لسه في عز طفولتك .. أصدى في عز شبابك... طب دا أنا كل يوم بكتب فيكي قصايد شعر بمدح فيها جمالك وأخلاقك وطيبة قلبك .
حريصـــــة :- هئ هئ ... صحيح يا ولد يا فادي .
فــــــــــادي :- طبعاً .
حريصـــــة :- طب ما تسمعني يا واد حاجة من اللي أنت كاتبها دي.
فــــــــــادي :- خدي عندك ..... [موسيقي].
- حريصة يا عطر البستان * يا ورد وفل على ريحــــان .
الكون من سحرك محروم * وأنا من ريحتك مزكــــوم .
كريمة وأيدك مخرومــــة * والفقراء في بيتك معزومة .
بدعيلك من قلبي يا شيخة * روحي أشوفك معدومــــة .
حريصــــة :- قلت أية عيد الحته الاخرانيه دي كده .
فـــــــــادي :- بدعيلك من قلبي يا شيخة روحي أشوفك محمومة .
حريصـــة :- أيـــــــــــــــة؟؟؟ [ بصوت عالي ] .
فـــــــــادي :- مسمومــة .
حريصــــة :- دأنا هفتح رأسك بالشومة .
فــــــــــادي :- دا أنا بهذر معاك . [ يدخل الطلبة الثلاثة ] .
عــــــــــادل :- ست حريصة .
ســـامـــــي :- يا دي الليلة المشئومة .
حريصـــــة :- بتبرطم تقول أية يا واد يا سامي .
شريــــــف :- أبداً يا ست الكل ده بيقولك يا مرحبا يا مرحبا نورك غطا على الكهربا .
حريصـــــة :- الكهربا... أهو أنت جبت المفيد بص بقي يا خويا منك ليه أعملوا حسابكم من الشهر الجاي أنتوا اللي هتدفعوا فاتورة الكهربا و آلميه .
عـــــــــادل :- ليه بقي يا ست حريصة إحنا مش متفقين من الأول إن المتين جنيه اللي بتخديهم كل شهر يبقي من ضمنهم حساب النور و آلميه .
حريصـــــة :- الكلام ده كان في الأول قبل ما أعرف أنكم مفتريين و حاقدين علىّ ... اللي باخده منكم باليمين بدفعوا نور وميه بالشمال .
شريـــــــف :- يعني نعمل أية بس ما نفتحش النور . بلاش نذاكر ... وما نفتحش الحنفيات... بلاش نغسل هدومنا وبالمره بلاش نشرب . ( بسخرية ) .
حريصـــــة :- أنا ما قلتش كده يا سي شريف يا بتاع الطب هو أنا وليه ظالمة ولا وليه ظالمة ذاكروا طبعاً بس بدال ما كل واحد يذاكر لوحدة في حته وتولعوا نور الشقة كلها... أتلموا مع بعض وذاكروا في مكان واحد وولعوا لمبة واحدة .
3
عـــــــــــادل :- يا سلام ! يا سلام يا ست حريصة ده أنت ست اقتصادية ... من الدرجة الأولي أية الأفكار النيرة دي !!! الله ينور عليك يا شيخة ... طب دي مشكلة النور والميه بقي ...
أظن هتقولي ندخل الحمام إحنا الأربعةمع بعض في وقت واحد علشان نوفر آلميه … صح ؟!
حريصة :- لا مش صح يا عادل أفندي يا محترم .
عـــــــــادل :- أمال أية اللي صح بقي فهمينا كده واحدة واحدة .
حريصــــة :- بدل ما تستحموا كل شوية على الفاضية و المليانة كفاية مرة واحدة في الشهر .
ســـامــــي :- لا بقي إحنا علشان ما سكتنالك من الصبح ... ده إلا الحموم إحنا نستحما بمذاجنا أنا بقولك أهو أحسن أصور فيها قتيل السعادي . [ بصوت مرتفع ويحاول أصدقاءه جذبه للخلف ] .
شريـــــف :- بس يا سامي ما يصحش دي ست كبيرة برضه .
حريصــــة :- رعبتني ... لبشتني يا واد ... هتصور فيها أية يا منيل ؟ .
ســـامــــي :- هصور قتيل ..... بصوت مرتفع ] .
حريصــــة :- وأية اللي منعك ماتوريني شجاعتك .
ســـامــــي :- بس أنا ممعييش كاميرا أنا لو معايا هصور على طول .
عــــــــادل :- يا أخي أتنيل أنا قلت الواد هيخلصنا منها ... [ دون أن تسمع حريصة ] .
حريصــــة :- يعني أنت ساكت كده يا سي فادي ومش عايز تتكلم .
فـــــــــادي :- هتكلم أقول أية يا ست حريصة ... الصراحة كده إحنا مصاريفنا تقلت وخصوصاً بعد ما دخلنا التليفون على حسابنا وأنا شايف أن الميتين جنيه كفاية قوى .
حريصــــة :- شايف أية يا عنيّ كلكم متفقين علىّ .
ســـامــــي :- جري أية يا وليه هتسكتي ولا أخرطك زى الملوخية .
فـــــــــادي :- بس يا سامي ... إتفضلي أنت دلوقتي يا ست حريصة وأحنا هنتصرف .
حريصــــة :- ما هو شوف أنت وهو الفلوس لو ماجاتش خلال 3 تيام تجهزوا شنطكم ومع الفين سلام
ســـلام . [ وتخرج من المسرح ] .
ســـامـــي :- [يقلد حريصة ] ... ما هو شوف أنت وهو الفلوس لو ماجاتش خلال 3 تيام تجهزوا شنطكم ومع الفين سلام . ســلام .
شريـــــف :- سبحان الله الست دي رغم إنها كبيرة في السن لسه طمعانة في الدنيا .. المفروض تعمل لأبديتها .
ســـامـــــي :- دا أنت غلبان قوى يا شريف النوعية اللي زى حريصة دي ما تفكرش في الموت دا أنت لوسألتها تأكلي رز باللبن ولا أشفلك عريس . تقولك هو أنا ليّ أسنان يا أخويا للرز بلبن .
عـــــــادل :- طب يالو يا جماعة شوفلنا حاجة نأكلها أنا ميت من الجوع .
شريـــــف :- و مين سمعك يا عادل يا أخويا دأنا واقع .
ســـــــامي :- هه طبختلنا أية يا فادي النهاردة ؟؟؟
فـــــــــادي :- الصراحة يا جماعة أنا ملحقتش أطبخ .. هاتوا أي حاجة في الثلاجة وخلاص .
عــــــــادل :- ملحقتش أية بس يا فادي .. إنهاردة يومك في الجدول وأنت العامل الجدول ده بأيديك
شريـــــف :- خلاص يا عادل مش وقته .. نأكل وبعد كده نتكلم في حكاية الجدول .. يالا ندخل نغير هدومنا . ( يدخل عادل وسامي وشريف حجراتحم لتغيير ملابسهم )
4 [ يدق الباب مينا أبن الجيران ]
فــــــــــادي :- حاضر جاي أهو .... "يفتح ثم يدخل مينا " .
فــــــــــادي :- مين اللي دخل ؟؟؟
مينـــــــــــا :- سعيدة ... " مينا ألدغ في حرف الراء ".
فــــــــــادي :- سعيدة مين ؟ .
مينـــــــــــا :- سعيدة !! أنا بقولك سعيدة .
فـــــــــــادي :- وأنا بقولك سعيدة مين مش تعرفيني .
مينـــــــــــا :- يأخي قوللي سعيدة مبارك .
فــــــــــادي :- أيوة كده فهميني أنتي سعيدة مبارك .. أنتي أخت ذكي مبارك بتاع الفينو ؟؟؟
مينـــــــــــا :- يوه يأخي . أنا ولد مش بنت وأسمي مينا .
فـــــــــــادي :- طب منا عارف أنت مينا أبن الجيران اللي فوقينا بس أنا بهرج معاك .
مينـــــــــــا :- دا أنت هزارك رخم قوى .( ينطقها يخم لأنه الدغ )
فــــــــــادي :- أنا هزاري رخم الله يسامحك يا عم و عايز أية بقي يا عم مينا ؟؟؟
مينـــــــــــا :- عايز المخيطة .
فــــــــــادي :- أية المخيطة دي .
مينـــــــــــا :- اللي بنخيط بيها الملوخية .
فــــــــــادي :- آ آه اللي بنخيط بيها يبقي أنت عايز الإبرة هخش أجيبها لك .. " يشده مينا ويقول له ".
مينـــــــــــا :- يأخي أنا مش عايز الإبرة أنا عايز المخيطة اللي بنخيط بيها الملوخية الخضيا .
فــــــــــادي :- آه فهمتك مش تقول كده من الصبح هخش أجيبها لك دأنا حتى بأموت في الملوخية الخضرا ..
[ ويخرج من المسرح ] .
مينـــــــــــا :- يا ساتر ده مخة تخين بشكل .
فــــــــــادي :- خد يا مينا المخيطة .
مينـــــــــــا :- شكراً . سعيدة .
فـــــــــــادي :- سعيدة مين ؟ .
مينـــــــــــا :- يا عم روح .... [ويخرج ] .
عــــــــــادل :- الله هما لسه ما جابوش الأكل يلا يأبني أنت وهو .
[ يدخل سامي وشريف بالطعام وهو عدة سندوتشات قليلة ] .
عــــــــــادل :- أية ده هو ده ألغدا .
شريـــــــف :- يأخي لقمة هنية تكفي ميه .
ســـامــــي :- أتفضلوا معانا يا جماعة ... " للجمهور " .
عــــــــــادل :- أية هي العملية ناقصة ... " ويبدأوا في الأكل " .
فــــــــــادي :- بتعمل أية أنت وهو حطوا السندوتشات مكانها .
عــــــــــادل :- ليه بقي إنشاء الله مش هناكل .
ســـــــــامي :- هيقول نصلي أنا عارف .
5
فـــــــــــادي :- عليك نور .
ســــــــامي :- دأني علىّ نور وميه وحاجات كنير جوي بس أبوس أيدك بلاش تطول في الصلاة علشان إحنا جعانين جوي جوي( يشيرعادل بإشمئزاز لفادى بقبضةيده)
فــــــــــادي :- شكراً ليك يا رب يسوع على نعمك الكتير علينا شكراً ليك على الأكل والميه خلينا دايماً يارب فاكرين أنه ليس بالخبز وحده يحيا الإنسان بل بكل كلمة تخرج من فمك واجعلنا نعمل لا للطعام البائد بل للطعام الباقي للحياة الأبدية أمين اجعلنا مستحقين أن نقول بشكر ........ .
[أثناء ذلك يمسك عادل ساندو تش ليأكل فيعيدة سامي للطبق ويمسك سامي فيعيده عادل ثم يخطف عادل الطبق ويخرج ويجري وراءه شريف وسامي ثم يدخلون بعد نهاية الصلاة وهم يمضغون آخر لقمة ] .
فــــــــــادي :- (يحسس على الترابيزه فلم يجد طعام فيبتسم ثم يقول ) .... هه أين الطعام يا شباب ؟! .
ســـامـــــي :- أنه ليوم هباب .
فــــــــــادي :- ماذا حدث يا أخي ؟؟؟
شريــــــــف :- لقد جاء قط كبير ونحن مشغولين بالصلاة وسرق كل الطعام والمياه .
ســـامــــــي :- يا حسرتاه .
عـــــــــــادل :- لقد رأيته يقفز من البلكون .
ســـامــــــي :- ياله من قط ملعون .
فـــــــــــادي :- ويحك يا رجل وتركته يذهب .
عـــــــــــادل :- وماذا كنت أفعل ؟.. أقفز وراءه حتى تنكسر رقبتي .
ســـامــــــي :- ولما لا .
شريـــــــــف :- يا للجنان إنه ليس بسوبر مان .
فــــــــــــادي :- و ما العمل إذن .
ســـامـــــــي :- بتسألنا ما العمل و أنت السبب في كل هذه الكارثة ؟؟؟
فـــــــــــــادي :- ليه بقي إنشاء الله ؟؟؟
ســـامــــــــي :- أنت اللي لخمتنا في الصلاة . ما تعرفش إن فيه قطط صعرانه معانا .
فـــــــــــــادي :- يأخي بإلهنا والشفا .
عـــــــــــــادل :- تستاهلوا علشان ما تسمعوش كلامه مرة تانية لما يقولكم صلوا أية اللي إستفدتوه أديكم جعانين .
فـــــــــــــادي :- لا يا عادل الكلام ده ما فيهوش تهريج أزاي تقول كده الصلاة اللي أنت مستهتر بيها دي هي اللي يشوع وقف بيها الشمس وهي اللي شقت مية البحر وعبر موسي والشعب . الصلاة دي هي اللي نقلت جبل المقطم . إنتوا عارفين أنا بسمي الصلاة أية ( شريان الحياة ) علشان هي اللي بتربطنا بربنا والشريان ده لو أنقطع يبقي إحنا ميتين بالحيا .
شريـــــــــــف :- فعلا يا عادل ده تشبيه سليم زى شرايين الجسم اللي بتوصل الدم لكل حته فيه والدم ده هو الحياة .
عــــــــــــادل :- أنت عمال تقول الصلاة شقت البحر ونقلت الجبل حلو قوى الكلام طب ما تصلي يا حلو وأنت دلوقتي جعان يمكن السما تحدفلك برغيفين وحته لحمة .
فـــــــــــــادي :- ما تستبعدش عن ربنا أي شئ و زى الكتاب ما بيقول كل ما تطلبونه في الصلاة مؤمنين تنالونه .
6
[ يدق الباب ويدخل مينا ليعيد المخرطة ومعه طبق به ملوخية ولحمة ويقول لفادى ].
مينـــــــــــــــا :- خد يا عمو أنا لما قلت لماما إن أنت بتموت في الملوخية قالت ليّ لازم ندوقك منها . سعيدة بقي .
ســـامــــــــي :- ملوخية ولحمة .
شريــــــــــف :- يا ما أنت كريم يارب .
[ ويغلق الستار ]
الفصل الثاني
يفتح الستار فيدخل سامي حاملا طشت غسيل ويقول " ســـامــــــي:- تعال يابا العمدة شوف ولدك سامي واللي جراله. أخيه عليكي يا غربة . أبجا أني سامي أبن العمدة وأجي هنا أتبهدل البهدلة دي ".
يارتني كنت سمعت كلامك يا أمأي حاكم أني أمي تحبني جوي يا ما جالتلي كفاية عليك يا سامي
الثانوية العامية وأنا اللي ما سمعتش الكلام وأدي أخرتها [ بكاء ] ما بجتش راجل بجيت نساوين زى ما أنتوا شايفين .
[ يدخل عادل وحامل حلة كبيرة ومعلقة وبصل ومكرونه أسباكتي ثم يضع الحلة على الترابيزة ]. عـــــــــــادل :- الله الله الله جري أية يا سامي أنت بتكلم نفسك ؟؟؟
ســـامــــــي :- أيوة بكلم نفسي .. ( ببكاء ) .
عــــــــــادل :- أية أتجننت خلاص .
ســـامـــــي :- أسكت يا عادل مش أني بجيت نساويني .
عــــــــــادل :- يخرب عقلك أزاي ده ؟؟؟" يترك ما في يديه " .
ســـامـــــي :- أزاي كيف ما أنت التاني بجيت نساويني .
عــــــــــادل :- أنا كمان لا يا عم أنت هتشككني في نفسي ما انا راجل قدامك أهو .
ســـامـــــي :- هو في راجل بيعمل اللي إحنا بنعملوا ده نغسل ونمسح ونطبخ .
عـــــــــادل :- آه بقي هو ده اللي مذعلك . ده أنت غلبان قوى يأبني الحياة في مصر غير عندكم في البلد هنا الراجل لازم يساعد مرآته في كل الطلبات يكنس ويمسح وأوقات لو مرآته مشغولة هو اللي يرضع العيال .
ســـامـــــي :- يابوي دا أنت باين عليك سخنت خش خلي شريف يديلك نوفالجين بدل مانت عمال تخلبط في الكلام آل الراجل ..... دأني مكسوف أجلها .
عـــــــــادل :- أنت مستغرب ليه لو واحدة أخرت في الشغل وسايبة أبنها في البيت أبوه مايرضعوش يسيبه يموت من الجوع !!!
ســـامــــي :- شوف برضوا الواد اللي حصلوا جنان في عجلوا طب تيجي كيف أما هو راجل راجل !! عـــــــــادل :- طب ودي فيها أية ؟؟؟
ســـامــــي :- نجول طور يجولوا احلبوه يابني آدم افهم ده راجل . راجل يا ناس راجل ياهو يعني يعني بالمفتشر كده معندوش الإمكانية دي .
7
عـــــــــادل :- آه يخرب عقلك أنت مخك راح لبعيد . يابني هو مش فيه حاجة اسمها بزازة ولبن صناعي .
ســـامـــــي :- أيوه أيوه( يضحك )هئ هئ كنت هتخليني ألبسك الطشط أصل أحنا عندنا في البلد ما بيستخدموش الحاجات دي .
عـــــــــادل :- ليه طب نفرض أن الطفل أمه ماتت بتتصرفوا معاه أزاي ؟؟؟
ســـامــــي :- بيرضع مع البهايم من تحت الجاموسة على طول .
عــــــــادل :- ما هو علشان كده مخكم تخين .
شريــــــف :- يابني أنت وهو وطوا صوتكم مش عارف أذاكر يا أخونا ما تنسوش أني أنا في الطب .
ســـامـــي :- طب أنت من بؤك .
عــــــــادل :- أنا متغاظ من الواد شريف ده قوى فادي مريحوا في الجدول هو علشان ما في الطب يقضى الطلبات الخفيفة بس ؟؟؟
ســـامــــي :- أصل فادي ده جلبه طيب جوي ده بعد سواعي بيقضي بداله علشان يخليه يذاكر .
عـــــــــادل :- الكلام ده ما ينفعش أنا هكلم فادي في الموضوع ده ماحدش أحسن من حد .
ســـامــــي :- أية ده أنت نسيت المحفظة في البنطلون يا عادل ... يا بوي كل دي صور بنات .
عـــــــــادل :- آه دول أصحابي .
ســـامــــي :- [ يترك الطشط ويذهب بجوار عادل ]... يخرب عجلك دول زى لهطة الجشطة عمار يا مصر يعني أنت بتقدر تتكلم مع دول كده يعني عادي ؟؟؟
عــــــــادل :- أتكلم معاهم وأهزر معاهم ونخرج مع بعض نتفسح يعني عايشين حياتنا .
ســـامــــي :- يا بختك يا عادل ده أني على كده مش عايش يا ولاد بص بقي يا عادل أنا عايزك تعلمني ، عايز أبقي زيك كده واد حرك ومقطع السمكة وديلها .
عــــــــادل :- طب ولو أبونا فادي عرف هتعمل أية يا حلو ؟؟؟
ســــــامي :- لا ما يهمكش فادي ملوش دعوة بيّ أنت تفكر يعني لما بسمع نصايحة والواعظات اللي بيعد يديها لي دي يبجي خلاص بقي ولي أمري إحنا عايزين نعشلنا يومين الشهادة كده كده هنخدها .
عــــــــادل :- يا سلام أهو أنت كده فهمت الدنيا صح أخيراً هلاقي واحد يفهمني في البيت ده .
ســـامــــي :- أني تلميذك .
عـــــــــادل :- بس كل حاجة بتمنها .
ســـامـــــي :- أزاي يعني ؟؟؟
عـــــــــادل :- يعني زى ما هعلمك وأنجَرك وأخليك ولد مدرن لازم أنت كمان تخدمني . يعني مثلا تاخد أيامي اللي في الجدول .
ســـامـــــي :- [ يفكر] ... أنا جاتلي فكرة تخلصنا كلنا من القضيان والطلبات والهم التجيل ده .
عــــــــــادل :- أزاي ؟؟؟
ســـامـــــي :- دلوجتي هتعرف ...[ و يذهب للتليفون] .
العمــــــــدة :- الوه مين اللي بيتكلم ؟؟؟
ســـامـــــي :- أيوة يابا العمدة أني سامي .
العمــــــــدة :- سلامات يا سامي .. كيف الأخبار ؟؟؟
ســـامـــــي :- زى الأهرام .
8
العمـــــــدة :- يا واد سيبك من الهزار وجولي عملت أية في النتيجة بتاعت الترس الاولاني .
ســـامــــي :- أسمة الترم الاولاني آل ترس جال أنت كنت شايف أني سعاتي يابا العمدة ؟؟؟
العمـــــــدة :- يا واد بلاش غلبة وجولي المجادير بتعتك كد كيف ؟؟؟
ســـامـــي :- يابا مجادير أية بس أسمه التجدير أطمن يابا جبت تجدير جيد جداً .
العمــــــدة :- يا خبتك المتلتلة بطين .. بجا ولد عمك محروس يجيب مجبول وأنت تطاطي راسي وتجيب جيد جداً .
ســـامــــي :- يابا العمدة افهم بس جيد جداً دي أعلي من مجبول بكتير .
العمـــــــدة :- صحيح يا واد يا سامي أوعي تكون بتضحك علىَ يا واد احسن ربنا يعلجك من حبابي عنيك .
ســـامـــي :- إطمن يا بوى وأسمع بس اللي أني كنت عايز أجولك عليه .
العمـــــــدة :- جول يا سامي كل طلباتك أوامر مدام هترفع رأسي في البلد وتبجا أفوكاتوا جد الدنيا عايز أية ؟؟؟
ســـامــــي :- عايز سلامتك .
العمـــــــدة :- من بكرة هتكون عندك .
ســـامــــي :- يا بوي افهم .. بجا. اني كنت عايز نفر من الرجاله اللي عنديك ييجي يخدمنا ويشوف طلباتنا هنا في الشجة علشان أنتبه للمذاكرة .
العمــــــدة :- خلاص أني هتصرف خد أمك جات أهيه عايزة تكلمك .
أم سامــي:- إزيك يا سامي .. مبسوط يا ولدي؟ محتاج أي حاجة؟ جولي يا سامي .. نجحت ولا لسه .
ســـامـــي :- الصراحة يا ماي أنتي بذات ما جدرش أخبي عليك حاجة . الترم ده المواد كانت تجيلة جوي جطمت وسطي عشان كده شلت مادتين بس أوعي تجولي لـ أبوي .
أم سامـــي:- ما أنا جلتلك ما تشلش حاجة تجيلة لوحدك علشان ظهرك بيوجعك أم تشيل مادتين طب كنت تشيل مادة وترجع تاخد التانية هي الدنيا طارت يا ولدي أكيد كانوا تجال خالص يطلعوا جد شوال الدجيج كده يا سامي ولا جد كيف ؟؟؟ .
ســـامـــي :- أماي مع السلامة أصل أني وراي مذاكرة كتير بس أبقي جولي لبوي يبعت شوية فلوس .
أم سامــي :- مع السلامة يا سامي وخلي بالك من نفسيك يا ولدي .
ســـامـــي :-( لعادل ) وأدي يا عم المشكلة أتحلت .
عـــــــادل :- كده أنت تعجبني وبالمناسبة دي هأخدك أفسحك ونبتدي أول درس عملي .
ســــــامي :- طب والغسيل والطبيخ .
عـــــــادل :- نبقي نجيبلهم سندوتشات .
ســـــــامي :- وأني جاهز يا لابينا ..."( يخلعالمريلة ثم يخلع الجاكته ويظهر تحتها ملابس خروج ويخلع عادل
ويسكب سامي المياة على الجمهور وينزل). ( يدخل فادي الي المسرح ) .
فـــــــادي :- ياه الواحد أخر في النوم قوي أنتوا يا أخوانا يالي في الشقة .
[ يدخل شريف ومعه كتاب ].
شريـــــف :- أخيراً صحيت يا فادي .
فــــــــادي :- أهلا شريف أمال فين سامي وعادل .
شريـــــف :- يا ولاد الايه دول نزلوا وسابوا الغسيل .
فــــــــادي :- ما فيش مشكلة أنا هبقي أتسلي فيه .
شريـــــف :- طب أنا هادخل أجهز لك الفطار قبل ما أنزل .
9
فــــــــادي :- كفاية بسكويت وشاي . [يدق جرس الباب وتدخل الجارةام مينا ومعها أولادها ] .
أم مينـــا :- سعيدة يا فادي .
فــــــــادي :- أم مينا أهلا وسهلا .. إتفضلي أي خدمة .
أم مينــــا :- معلش يا خويا ممكن أسيب معاك العيال ؟؟ هوصل لحد السوق وأرجع على طول .
فـــــــــادي :- يا سلام دول يشرفوا .
أم مينـــا :- إوعوا تتشاقوا يا ولاد .
الأطفـــــال :- حاضر يا ماما .
أم مينـــا:- وأنت بذات أوعي تتسحب وتخش المطبخ خللي بالك منه يا مينا .. بعد إذنك يا فادي .
فــــــــادي :- مع ألف سلامة .. أتفضلوا يا ولاد اقعدوا . [ يدخل شريف و معه الشاي و البسكويت ].
شريـــــف :- إيه النور ده ازيكوا يا ولاد .. الشاي جنبك يا فادي .. أنا نازل بقى عايز حاجة .
فــــــــادي :- شكرا يا شريف مع السلامة .[ يأكل أبرام الشاي والبسكويت].
مينــــــــــا :- ازيك يا عمو .
فــــــــادي :- أهلا مينا .
أبـــــــــرام :- ازيك يا عمو .... " بصوت عالي و تخين " .
فـــــــــادي :- بأسم الصليب في أية يا ولاد حد جراله حاجة ؟؟؟
كريستـــين :- ما تخافش يا عمو ده أبرام .
فـــــــــادي :- وأنتي أكيد كريستين ؟؟؟
كريستيــــن :- صح يا عمو .
فــــــــــادي :- يا سلام عمو طالعة من بقق زى العسل .
أبـــــــــــرام :- عمو عمو عايز أكل عسل .
فـــــــــــادي :- لا يا أبرام صدقني ما عنديش عسل أجبلك بصل .( بضحك ) .
الأطفــــــــال :- يضحكوا .
فـــــــــــادي :- أمال فين مادونا ؟؟؟
مادونـــــــــا :- أنا جنبك يا عمو هو أنت مش شايفني ؟؟؟
فـــــــــــادي :- في حد يقدر ما يشفش السكر ده .
أبـــــــــــرام :- عمو عمو عايز سكر .
مينــــــــــــا :- يأخى أخرس بقى .
كريستيـــــن :- أنت همك على بطنك .
فـــــــــــادي :- مالكوش دعوه بيه يا ولاد خش المطبخ هات اللي أنت عايزة .
[ يدخل أبرام المطبخ و يبحث فادى عن الشاي فلا يجدة ].
فــــــــــادي :- أنا جاتلى فكره كويسه قوى ..أية رأيكم اعلمكوا ترنيمة على العود ؟؟؟
الأطفـــــــال :- هيه
[ يبدأ فادى في ترنيمة مره يسوع كان في الهيكل و بعد الانتهاء منها يدخل أبرام
حاملا لتر بيبسى فيجري علية الأولاد ثم يجلسوا و يتابعوا الترانيم ] .
فــــــــــادي :- حلوه الترنيمة يا ولاد ؟؟؟
10
الأطفـــــــال :- حلوه قوى يا عمو .
فــــــــــادي :- طب كل واحد يقول لي هو أتعلم منها إيه .. قوللى يا مينا .
مينــــــــــــا :- إن إحنا لازم ندي العطا من غير ما يشفنا حد . و أنتي يا كريستين ....
كريستيـــــن :- إن إحنا ندي كتير و ما نبخلش على ربنا . و أنت يا أبرام .........
أبـــــــــــرام :- إن إحنا لازم نأكل كتير و ما نبخلش على كرشنا . ( الأطفال يضحكو علي ابرام ) فـــــــــــادي : - و أنتي يا مادونا ؟؟؟
مادونـــــــــا :- إن إحنا نحب بابا يسوع .
فــــــــــــادي :- الله برافو عليكم يا ولاد أنا بحبكوا قوى .
الأطفــــــــال :- و إحنا كمان يا عمو . [يرن جرس الباب و تدخل أم مينا ] .
أم مينـــــــــا :- معلش يا فادي أخرت عليك ... أوعى يكون العيال تعبوك .
فـــــــــــادي :- لا أبدا دول حتى سلوني خالص .
أم مينـــــــــا :- أنا متشكرة قوى يا فادي ... يالوا يا ولاد .
فـــــــــــادي :- مع السلامة .
مينـــــــــــــا :- سعيدة .
فـــــــــــادي :- سعيدة مين . (مع ضحكة خفيفة ) . [ يدخل شريف ] .
شريـــــــــف :- ما بدري يا ولاد .
أم مينــــــــا :- بدري من عمرك يا شريف .. عامل أية في الكلية .
شريــــــــف :- الحمد لله صلاتك معايا يا أم مينا .
أم مينــــــــا :- صلوات القديسين ربنا يوفقكم ... بعد أذنكم يلا يا ولاد .
شريــــــــف :- مع السلامة ..( ثم يقول لفادي ) هو عادل لسة بره هو و سامي ؟؟؟
فــــــــــادي :- أه لسة مرجعوش من بره .
شريـــــــف :- طب كويس علشان أكلمك بخصوص عادل .
فــــــــــادي :- خير يا شريف ؟؟؟
شريــــــــف :- مش باين خير يا فادي .
فــــــــــادي :- إيه اللي حصل يا شريف ما تتكلم قلقتني .
شريـــــــف :- من نص ساعة كان معايا مجدي و سعيد اصحاب عادل في الكلية .. أنت عارفهم اللي بيخدموا في اجتماع المغتربين .
فــــــــــادي :- أه أه عارفهم .. مالهم ؟. قالولك حاجة على عادل ؟ .
شريـــــــف :- حاجات يا فادي .. عادل خلاص بقي أنسأن ضايع ملموم على شلة أخر فساد ده إذا مكانش هو اللي لممهم .. بيسيبوا الكلية و بيروحوا أماكن مش كويسة حتى سلوكهم داخل الكلية أخر
ألت أدب و في طلبة اشتكوا للعميد و هددهم بالفصل .. و اللي أنت ما تعرفوش أن عادل ما نجحش
زى ما ضحك علينا . عادل شال مواد الترم الأول كله علشان ما حضرش الامتحانات .
فــــــــــادي :- أنا كنت حاسس بكده . طب و العمل يا شريف ؟؟؟
شريـــــــف :- للأسف . عادل ما بيسمعش نصيحة من حد و يا ريت كان لية أب أو أم نشتكيلهم .
فـــــــــادي :- فعلا عادل أنسأن مسكين الظروف هي اللي جنت عليه .
شريــــــف :- لا يا فادي الظروف مش مبرر لسلوكنا الغلط طب ما أنت أهو مقطوع من شجرة و معاش والدك الله يرحمة بيكفيك بالعافية لكنك كافحت و اخدت الدبلوم و كمان متغرب و بتدرس في معهد الموسيقى علشان تخدم ربنا . دي خدمتك في البلد و كمان هنا في مصر ناس كتير بيشهدوا بيها
كفاية سيرتك الحلوة في المعهد اللي خلت الطلبة و حتى الدكاترة يحبوك و يحترموك مش عادل اللي بيجدف على
أسم المسيح بسببه .
11
فـــــــــادي :- معلش يا شريف . أحنا لازم نصلى و نخلى أسرة الاجتماع كلها تصلى و ربنا قادر يغيره و زى الكتاب ما بيقول الصلاة هي القوة التي تحرك ذراع الله ليعمل أرادته .
[يدق الباب بشدة ويسمع صوت من الخارج يأهل الله يااللي هنا] .
شريـــــــف :- الله ده مين اللي بيرزع ع الباب ده (ويذهب ويفتح الباب )
[ثم يدخل صابر راكب حماره و معه شمسية ] .
صابـــــــــر :- عوافي عليكم .
شريـــــــف :- الله الله الله أنت رايح فين يا مجنون هي زريبة من غير بواب ؟؟؟
صابـــــــــر :- أني جيت .... " مع مد في الصوت " .
فــــــــــادي :- أهلا وسهلا .
صابــــــــر :- أني جيت بالسوبر جيت .
شريـــــــف :- أنت هتحكي معانا شد حمارك واتكل على الله قال على رأي المثل سكتناله دخل بحمارة .
فــــــــــادي :- حمار! في بيتنا حمار ؟؟؟
صابـــــــــر:- أمشي أروح فين يا سيدي الأفندي وآني ماصدجت وصلت وولاد الحلال دلوني على العنوان .
شريـــــــف :- يأخينا أفهم أنت أكيد غلطان في العنوان يالا بقي مع السلامة .
صابـــــــــر:- ليه مش دي عمارة حريصة هانم شقة رقم 13 .
فـــــــــادي :- تمام العنوان مظبوط يا شريف .
صابـــــــــر :- يتم عمرك يا بيه شوف الناس اللي كلها نظر .
فــــــــــادي :- مابلاش مبالغة .
شريـــــــف :- غريبة دي أنت جاي هنا لمين بالظبط يا ........ .
صابـــــــــر :- آني صابر يابيه صابر الكلاف . كامل الأوصاف .
شريـــــــف :- حصل لنا الاستظراف .
صابـــــــــر :- أنا بعتني حضرة العمدة لسيدي سامي .. سامي أبن العمدة اللي هيبقي أفوكاتوا جد الدنيا .
شريـــــــف :- آآه مش تقول كده من الصبح يا أهلا وسهلا ." ويمد أيده ويسلم عليه " .
صابـــــــــر :- أهلا يا سيدنا الأستاذ .. " ثم يمد يده لفادى ويقول".. سلمات يا أفندي .. " فلا يمد فادي يده".
صابـــــــــر :- إيه ده وآني بجول عليك كلك نظر .
شريـــــــف :- لا مؤاخدة يا صابر أصل ............... مد أيدك سلم يا فادي .
فــــــــــادي :- آه أنا أسف .. " ويمد يدة نحو الحمار".. فيذهب صابر وراءة ويسلم علية .
صابـــــــــر :- يا عيب الشوم مدب أني في الكلام كده على طول . [ يدخل عادل وسامي ] .
ســـامــــي :- صابر الكلاف . ( بفرحـــة )
صابــــــــر :- سيدي سامي بالحضن يا سيدي وحشتني جوي .
سامـــــــي : - وانت كمان يا صابر وحشني جوي جوي . سلم علي عادل .
صابــــــــر :- أهلا ياسي عادل .. أهلا وسهلا .
12
( يدخل الجميع ويربط صابر الحمار خارج الشقة )
ســـامــــي :- جولي يا واد يا صابر إزي البلد على حسك ؟؟؟
صابــــــــر :- هو أنا ما جلتلكش مش بيفحتوا للمجاري .
ســـامــــي :- يعني المجاري دخلت ؟؟؟
صابــــــــر:- جربت خلاص كلها 20 سنه ويخلصوا حفر .
ســـامــــي :- لا بسيطة .. وإيه تاني يا واد أحكيلي الناس في البلد عاملين أية ؟؟؟
صابــــــــر :- أسكت يا سيدي مش السلعوة سابت في البلد .
ســـامــــي :- السلعوة ياوجعة مطينة بطين .
شريـــــــف :- تطلع أية السلعوة دي ؟ .
صابـــــــــر :- دي كلبة يا بيه .. كلبة صعرانة جوي وكبيرة .. تيجي طولك كده .
عـــــــــادل :- وشكلها أية الكلبة الصعرانة دي ؟؟؟
صابـــــــــر:- تشبهلك كده يا بيه .
عـــــــــادل :- دأنت باين عليك مجنون وقليل الأدب .
ســـامـــــي :- استني بس يا عادل .. وأية اللي حصل بالظبط يا واد ما تتكلم .
صابــــــــر :- أني سايب البلد مجلوبة ده مفيش بيت فيكي يا بلد إلا ما هجمت عليه السلعوة .. اللي كلت دراعة واللي جرجشت ودانه واللي جطعت رجلية .
ســـامــــــي :- يا ليلة سوخه يا ولاد .
صابــــــــــر:- أيوه يا سيدي دي السلعوه يعني مش حاجة هينة .
ســـامـــــي :- بس طبعاً يا واد يا صابراكيد ماجدرتش تهوب نواحي دوار أبويا العمدة ده كان الغفر طخوها بالنار .
صابـــــــــر :- يطخوا مين يا سيدي دي السلعوة السلعوة .
ســـامـــــي :- يعني أية اللي حصل يا واد .. "بخوف" .. ما تتكلم .
صابـــــــــر :- مش جادر أجول بلاش يا سيدي بلاش اللي راح راح التفت أنت لمذاكرتك ومستجبلك .
ســـامــــي :- ليه هو حصل أية " وتظهر عليه علامة الدوار والإغماء فيجري عليه شريف وعادل ليسندوه " .
شريـــــــف :- ما تتكلم يا صابر على طول لا اما تسكت يا اخي .. خش جوة دلوقتي يا سامي .
ســـامـــــي :- أنا لازم أعرف أبوي وأمي جرالهم أية احكي يا صابر بالتفصيل وما تخبيش حاجة .
صابـــــــــر :- آني هجولك يا سيدي وأمري لله .. السلعوة هجمت على دوار أبوك العمدة وعضت الغفر كلاتهم لما قطعتهم حتت وياريت على كده وسكتت دي جرجشت البندجيات اللي شايلينها تجلش بتمص جصب .
ســـامـــــي :- وأبوي العمدة وأمي عملت فيهم أية أتكلم .( بخوف وتوجس شديدين ) .
صابـــــــــر :- العمدة لما شاف اللي حصل حط ديل الجلبية في حنكو وفر علي السطوح .
ســـامـــــي :- طول عمرة جبان .
صابــــــــر :- ساب أمك تواجة السلعوة لوحدها فيس توفيس " بصوت هادئ " .
ســـامــــي :- يا حبيبتي يا أمأي عضت أمي ( ببكاء ) ؟؟؟
صابــــــــر :- عضتها أيش بس يا سيدي .
ســـامــــي :- أمال أية .. " مع اللطم على وشه في حزن " .
صابــــــــر :- أمك هي اللي عضت السلعوة .
13
ســـامـــي :- وبعدين .
صابــــــــر :- ماتت .
ســـامـــي :- أمي ماتت ( ببكاء شديد جداً ) .
صابـــــــر :- لا السلعوة هي اللي ماتت أصل العضة كانت مسممة . ( يهدأ سامي ويلتقط انفاسه ) .
ســـامـــي :- يا ســـلام عليك يا أماي عملت اللي العمدة والغفر ماجدروش يعملوه .
صابــــــــر :- طبعاً أمك دي بعشر رجالة خلصت البلد من شر السلعوة .
فــــــــادي :- نشكر ربنا كتير يا سامي . على فكرة يا جماعة المهلة اللي عطتهالنا ست حريصة هتخلص إنهاردة وأنا شايف إن إحنا لسه ما إتصرفناش في الأيجار .
شريـــــف :- أنا معايا الخمسين جنيه بتعتي خد أهيه يا فادي وكمان أل 20 جنيه دول عشان النور والميه .
فــــــــادي :- وأنا هدفع 60 جنيه علشان نكمل النور والميه وأنت يا عادل معاك كام .
عـــــــادل :- أنا قبل ما أنزل كان معايا 70 جنية .
شريـــــف :- المهم معاك كام دلوقتي .
عـــــــادل :- 20 جنية .
شريـــــف :- 20 جنية ! صرفت خمسين جنية في يوم واحد .
عـــــــادل :- الكلية بقي مانت عارف .
شريـــــف :- آه آه طبعاً الله يكون في عيونك .. " بسخرية " .. بس إحنا يعني هنتصرف أزاي دلوقتي ممكن تقولي .
فــــــــادي :- بالراحة يا شريف .
ســـامـــي :- يا جماعة المشكلة محلولة .
شريـــــف :- أزاي بقي لما بيقولك أنا مفلس معايا عشرين جنية يبقي هنكمل الإيجار أزاي ؟؟؟
ســـامـــي :- اهدوا اهدوا بس يا جماعة وأنا هحللكم كل مشاكلكم أمال أنا هنا بعمل أية .. جلى يا صابر أبويا العمدة بعت كام معاك .. " يتحدث بغرور "
صابـــــــر :- بعت فلوس كتير عشر ورجات كل ورقة بـ 10 جنية .
ســـامـــي :- يا سلام عليك يا أبا العمدة .
شريـــــف :- الحمد لله يدوبك على أد الفلوس اللي ناقصة .
ســـامـــي :- اطلع يا واد يا صابر بالورق البنك نوت .
صابــــــــر :- هو أنا ما جلتلكش مش وآني بعدي الطريق في ميدان التحرير وجفني واحد شويش من بتاع الجُمرُك. وحلف لدفع الجمرك لاما يأخذ كل الحاجات اللي معايا آني الصراحة خفت على الحاجات
ســـامــــي :- يعني دفعت .. يا وجعتك المطينة بطين .. وخاد منك كام يا جرطاس .
صابــــــــر :- هو الصراحة طلع أبن حلال جلب في شوية الحاجات اللي معايا وجالي عشان خاطرك يا بلدينا هات خمسين جنية رحت آني مطلع ال10 ورجات وأديتة 5 وخليت 5 أيوة هو آني عبيط ولا
عبيط دآني مفتح جوي جوي .
شريــــــف :- عارف بقي يا أخ مفتح اللي ضحك عليك واخد الـ50 جنية ده يبقي مين .
صابــــــــر :- مين ؟؟؟
شريـــــــف :- ده عسكري المرور يعني مالوش دعوة خالص بالجمارك علشان المنطقة دي مش الجُمرُك من أصلة .
صابــــــــر :- مش جُمرُك يا دي الداهية يا ولاد .
14
عـــــــــادل :- ثم إن الحاجات اللي أنت خايف عليها دي ما تسويش بصلة إدهاله يا أخي قالك هخدها إدهاله مدام أنت مخك تخين وصدقت أنه جُمرُك .
صابــــــــر :- طب هو أني كنت أعرف منين بس ماني ماحدش وهَدني .
فـــــــــادي :- يأخي كنت أسأل الحمار .
صابــــــــر :- أيوة صحيح فأتتني دي .. لكن أسال الحمار كيف ! أنت قصدك الحمار بيفهم أحسن مني ســـامــــي :- يا سيدي حقك علىّ أدي رأسك ابوسها. يمدصابر يده فيضربها سامي " .. أنت أديتلوا 50 يبقى معاك 50 صح .
صابــــــــر :- يبجي معايا 50 جنية !!! هو أني ما جلتلكش . " يصدر من الجميع انفعال مختلف " .
ســــــامي :- ما جلتش أية يا أبن الذكية .
صابـــــــر :- أصل آني بعد ما طلعت ال100 جنية وإديتة 50 جنية وشلت الباجي جعد يلف حوالين الحمار ويبحلج يلف ويبحلج ويلف ويبحلج ...
ســـامـــي :- وبعدين يا أبن الذكية بعد ما لف وبحلج في الحمار جالك أية ؟؟؟
صابـــــــر :- جالي أنت مخالف للجانون ولازم أخدك مخالفة .
شريـــــف :- ليه بقي إنشاء الله مالقاش نور في الحمار ؟ ( بسخرية ) .
صابـــــــر :- لا مش دي .
عــــــــادل :- يمكن كان مركب عدد زيادة "بسخرية " .
صابـــــــر :- ياريت كانت المخالفة بجت خفيفة .
فـــــــادي :- أكيد كنت سايق من غير رخصة .( مع ضحكة )
صابـــــــر :- اهيه هي سواجة الحمير ليها رخصة . أنت تفكرني عبيط ولا عبيط .( بغضب )
ســـامـــي :- آمال خدك مخالفة ليه .. " بصوت مرتفع " .
صابـــــــر :- ما كنتش لابس حزام الأمان . " يصدر من الجميع انفعال " .
شريـــــف :- وطبعاً لطش منك الـ50 جنية الثانية ؟؟؟
صابـــــــر :- أيوة طبعاً الراجل شايف شغلة بضمير العيب علىّ آني اللي ماكنش شادد حزام الأمان .
عــــــــادل :- وأنت بتدفع بسهولة كده مش قادر تقوله حاجة ؟
صابــــــــر :- ماني جلتله .. جلتله سيب الخمسين جنية دول وحياة أبوك علشان دي فلوس سامي ابن العمدة مش فلوسي . راح جالي لا تدفع بالزوج لناخد الحمار .
ســـامــــي :- فأنت طبعاً خفت على الحمار .. "بغيظ ".
صابــــــــر :- براوة عليك يابن الذكية .
شريــــــف :- ياخي كنت أرفض . أعترض .
صابــــــــر :- ماني أتعرَضت .
عــــــــادل :- أنت أية يا خويا ؟؟؟
صابــــــــر :- أتعرَضت .. ما هو بعد ما اخد الفلوس جالي أتنيل بجي وريني عرض أكتافك .. رحت أني
معرَض أكتافي وماشي على طول . " يذهب سامي لصابر ويخنقة " .
ســـامــــي :- يعني أعمل فيك أية أعمل فيك أية .
صابــــــــر :- حطلي أكل أحسن هموت من الجوع .
عـــــــــادل :- دأنت خسارة فيك اللؤمة .
فــــــــــادي :- عيب يا عادل خش المطبخ يا صابر كل اللي أنت عايزة .
15
" يدخل صابر المطبخ ثم يدق الباب فتدخل حريصة ومعها عبده البواب " .
ســـــــامي :- حريصة هانم .. انتباه .. " السلام الوطني " .( يقف الجميع ويغنو هذا النشيد علي وزن اغنية الحلوه دي قامت تعجن في الفجرية. ويعزف فادي اللحن علي العود ) .
حريصة دي ست عظيمة وست قوية .
وإحنا بندعي لها تملي في الفجريــــة .
يا ريت تهفك طيارة أو عربــــــــــية .
كنا نفرق على روحك لحمة وملوخية .
حريصــــة :- بس مسخرة منك ليه ما فيكمش غير لسان وبس جهزتوا الفلوس ولا أخلي عبده البواب يشوف شغلة.
شريــــــف :- فلوس هو إحنا بنا وبين بعض فلوس يا ست حريصة دا أحنا بنعتبرك زى أمنا بالظبط .
عــــــــادل :- أمنا الغولة .( دون ان تسمعه حريصة ) .
حريصــــة :- آه يبقي مش هتدفعوا . عبده أرميلهم حاجتهم من الشباك وزيحهم على بره ياله .
عبــــــــده :- جري أية يا تلميذ منك ليه عاملين فيها بلطجية عشان ماهي ست وحدانية يالا قب أنت وهو بالنقدية" ينظر لحريصة " .. شفتي الحركات الجهنمية .( متعجباً بصوته العالي ) .
فــــــــادي :- يا عم عبده بلاش عصبية .
عبــــــــده :- اسكت أنت يا بتاع الموسيقي العربية .( بسخرية ) .
ســـامــي :- ياعم عبده . يا عبده أفندي . يا عبده بيه .
عبــــــــده :- حلوة دي أنا مش أفندي ولا بيه أنا عبده . عبده البواب اللي هيخلي ليلتكم هباب .
عـــــــادل :- أنا همسح بيك التراب " يمسكه شريف وسامي" .
عبـــــــده :- بتقول أية يا شاطر تمسح بمين التراب طب أنا هـوريك .
"وتحدث مشاجرة بين الجميع " ويصاب فادي بضربه في عينه " .
فـــــــادي :- آه عنيا عنيا مش شايف .
ســـامـــي :- شفت يا عبده يا مفتري ضيعت مستجبل الواد .
شريـــــف :- فادي حبيبي مش شايفني . عمل فيك أية عبده المتوحش .( بأسلوب تمثيلي ) .
عبــــــــده :-أيوه أستعبطوا وكلفتونا هو من أمتي بيشوف على رأي المثل ضربوا الأعور علي عينه .
ســـامـــي :- اخرس ده فادي كان نظرة 6/6 لحد ما ضربته البنية المشئومة .
فــــــــادي :- الكذب حرام .
عــــــــادل :- أنا لازم أبلغ البوليس .
شريـــــف :- إستني بس يا عادل ده برضوا عم عبده حرام نبهدلوا في المحاكم والأقسام .
عبــــــــده :- جري أية يا هانم العيال هيلبسونا مصيبة وأنت واقفة ساكته .
حريصــــة :- حلوة قوي التمثيلية دي طب مانتوا عندكم مواهب جميلة أهي . وأنت خلاص خوفت منهم . فضي الشقة وأرملهم حاجتهم يا عبده " بعنف " .
عــــــــادل :- الطيب أحسن يا عبده " بدلع " وهو ممسك بسماعة التليفون .
عبــــــــده :- يا ست هانم أني بقول نستني عليهم دول برضو .... ( تقاطعه حريصة ) .
حريصـــة :- اسمع الكلام يا عبده " بعنف " .
عـــــــادل :- ما بلاش يا عبده .
عبـــــــده :- الله يقطع عبده وسنين عبده " ثم يدخل الحمار " .
16
أية ده !!! يا عيني يا عيني إنتوا عملتوا الشقة زريبه وده يطلع مين ده كمان زميلكم الخامس .
حريصـــة :- أية ده كمان ده أنا مش قادرة علة 4 تبقوا 5 مين اللي جاب الحمار ده هنا " بعنف" .
فـــــــادي :- يا ست حريصة إحنا هنفهمك بالهداوة . ده حمار صابر اللي جه من البلد . " ثم يدخل صابر ".
صابــــــر :- مين اللي بينده أني في الخدمة .
عبـــــــده :- يا حلاوة دول بقوا ستة يا هانم واللعب هيحلو .
ســـامــي :- يا راجل اهمد أنت عايز مصيبة وتشبع فيها لطم .
حريصــة :- وده يطلع مين بسلامته ؟؟
صابــــــر :- أني صابر الكلاف كنت نايم وشادد إللحاف وأنت مين ؟ الموناليزا ؟ .
حريصــة :- هئ هئ دمك خفيف يا مضروب وبتعمل أية هنا إنشاء الله .
صابــــــر:- أني بعتني حضرة العمدة أبو سامي علشان أجعد هنا معاهم وأشوف طلباتهم عشان يلتفتوا لمذاكرتهم .
عبــــــده :- أنا جاتلي فكرة حلوه قوي تحل المشكلة مدام بلدينا ده مش هيرجع البلد دلوقتي . أنا هاخد الحمار أبيعه وبتمنه تسددوا الإيجار اللي عليكوا مدام أنتو مفلسين كده .
عـــــادل :- فكرة معلمين .
صابـــــر :- دي فكرة بوابين . حمار أية ده اللي عايزني ابيعه الحمار ده بتاعي آني وآني مأجدرش أفارجوا أبداً . دي عشرة جديمة والعشرة ما تهونش إلا على أبن الحرام .
" يذهب الجميع لصابر ليقنعوه
"
شريـف:- علشان خاطرنا يا صابر أنت عايزنا ننطرد من الشقة .
ســـــامي :- يا صابر أنت مش عايزني أبجا أفوكاتوا قد الدنيا .
عــادل :- خلاص بقي يا أخي هما هيتذللوا عليك هو كان حمار جحا .
صابــــــر:- بس الفراج صعب يا ولاد .
عبــــــده :- خلاص بقي ما تحبكهاش . أنا يا عم هصورهولك صورة قبل ما ابيعه علشان تحتفظ بيها .
صابـــــر :- خلاص أني هضحي علشانكم يا ولاد أنا برده عندي جلب ومشاعر .
" تصدر فرحة من الجميع ويغلق الستار "
الفصل الثالث
" يفتح الستار على صابر وهو نائم في الصالة في وضع مضحك رجله على الاخري ويصدر شخير بصوته.ثم يرن جرس التليفون
صابــــر :- آه ده دا مين اللي بيرن الساعادي ! الوه مين اللي بيتكلم .. زيزي ؟ زيزي مين ؟ النمرة غلط " وينام ثانية ثم"يرن التليفون " يا دي الليلة اللي مش فايته يا نعم أنتي تاني .!! عايزة تعرفي أسمي ليه ؟ آني صابر يا ستي ممكن تجوليلي بقي أنتي عايزه مين بالظبط ؟ عدوله! إحنا
معندناش لا عدوله ولا كوكاكولا. مع السلامة (ويغلق السماعة ) إيه ده بنات أش دي اللي تتصل بشقة عذاب بعد نص الليل جلة حيا " ثم ينام ويرن التليفون " يادي الوجعة المطينة . الو. يا ستي ارحميني بقي أبوس أيدك عايز أنام . مانا جلتلك إحنا ما عندناش حد أسمة عدولة .عايزة
مين تاني يا ختي ؟ سمسم !
17
يا شيخة سم هاري لما يجطع مصارينك حطي في عينك حصوة ملح ونامي بجي . (ويغلق السماعة) .. أما أخش أنام في المطبخ وأمري لله مدام الناس ما بجاش عنديها دم
" ثم يدخل المطبخ ويخرج سامي للمسرح حاملاً مجلة ويمشي بحذر حتى التليفون "
سامـي :- " يرفع سماعة التليفون ويقول بصوت خافت "... ألو أيوه زيزي النيزي كوانيزي آني سامي . ده صابر ما تخديش في بالك أيوة هنتقابل بكرة في نفس المكان
هاجي آني وعادل وبقيت الشلة بس أبجي جهذوا جعدة حلوة ذي المرة اللي فاتت . بآي بآي
" ويضع السماعة " يا سلام عليك يا واد يا سمسم دآني بجيت مقطع السمكة وديلها
هي دي عيشة الحرية ولا بلاش ربنا يخليك ليا يا عادل أيوة الحج يتجال لولا الواد عادل ده آني كنت فضلت ذي القطة المغمضة . أما أجعد بجا أثقف نفسي شوية الثقافة شئ ضروري للحياة .
" يجلس سامي ويتصفح المجلة فيدخل صابر من وراءة وينظر في المجلة دون أن يشعر سامي وفجأة"
صابـــــر :- أية ده ؟ أية اللي آني شايفة بعيني ده صور جلت أدب بجا أنت يا سامي اللي بيضربوا بيك المثل في البلد تتفرج على الخلاعة والمسخرة دي . ( يفزع ويرتبك سامي من المفاجأة ) .
ســـامـي :- يا صابر وطي حسك دي مش مسخرة وجلت أدب دي اسمها ثقافة .
صابـــــر :- وكمان بتجدب علشان تبرر موقفك آني ملاحظ إن أنت أتغيرت اليومين دول جوي يا سامي دأنت كنت بتمشي في البلد وعينك في الأرض دا أنت اللي كنت بتجرالي في الإنجيل نسيت الايه اللي بتجول أذا كانت عينك بسيطة فجسدك كلة يكون نيراً وإن كانت عينك شريرة فجسدك كلة يكون مظلما
أهو أنت دلوقتي في ضلمة / ضلمة واعرة جوي ومش مخلياك عارف الصح من الغلط أديني المجلة
دي يا سامي وارجع لنفسك .
ســـامـي :- آني هديهالك بس أوعدني إنك ما هتجبش سيرة جدام أبويا العمدة .
صابـــــر :- بجا خايف من أبوك اللي في الأرض ومش خايف من أبوك اللي في السما .
" يدخل عادل"
عــادل :- صابر !!! أنت إيه اللي مصحيك لحد دلوقتي ؟؟؟
صابـــــر :- ربنا هو اللي صحاني يا سي عادل .
عــادل :- طب روح نام أنت وراك شغل كتير بكره . هتفضل تغسل لما يتقطع قلبك .
صابـــــر :- آني هنام بس عايز أجولك يا سامي أن المعاشرات الرديئة تفسد الأخلاق الجيدة .
عــادل :- أنت بتبرطم تقول إيه ؟ . ( بعنف ) .
صابـــــر :- ما بجولش حاجة يابني ربنا يهديكم ويصلح من حالكم .
عــادل :- طب خش يالا بلاش غلبة عايزين نذاكر . " يخرج صابر من المسرح " .
عــادل :- مالك يا سامي واقف متنح كده ليه ؟؟؟
ســـامـي :- لا أصل صابر جلى شوية كلام جلب دماغي خالص وخلي ضميري ( يقاطعه عادل ) .
عــادل :- ضمير أهو أنا كده ما احبكش إنسي الكلام ده. صابر وفادي وشريف عينة واحدة عالم متأخر مش فاهمين الدنيا صح . يابني إحنا لازم نعيش ونتمتع بكل حاجة في الدنيا واللي يقولك غير كدة
يبقي غلطان . أقعد أقعد أذا كان صابر قلبلك دماغك أنا بقي هعدلهالك .
" يجلس سامي وعادل ويخرج عادل من جيبه ورقه بها هروين ويستنشقه "
عــادل :- خد اعمل دماغ وروق وأنسي الدنيا باللي فيها .
ســـامـي :- لا يا عادل آني كذه مرة جلتلك آني ماليش في الشم والمخدرات دي لا يا عم .
18
عــادل :- " يضحك عادل بشدة " .
ســـــامي :- بتضحك على أية .
عــادل :- أصل أنت بتفكرني بتامر في الأول كان عامل زيك كده وأكثر وكان بينكسف من نفسه ويخاف يشرب السيجارة مش المخدرات كان لسه عيل يعني . شفت دلوقتي أنا عملت معاه أية ؟
خليته راجل شمام درجة أولي . ده كمان بقي خبرة عني بيقدر يفرَق بين الهروين المغشوش والسليم
سـامــــي :- أيوه يا عادل الواد ده حشاش بطريقة فظيعة بيتعاطي كميات كبيرة آني عارف بيجيب الفلوس دي منين ؟؟؟
عــادل :- دأنت غلبان قوى . تامر أبوه راجل أعمال كبير . ووحيد أبوه. يعني يطلب أي حاجة ياخدها وأحسن حاجة في أبوه أنه مشغول على طول يعني ما يعرفش عنه أي حاجة غير أنه بيثق في
أبنه جداً .
ســـــامي :- وأنت عرفت كل الكلام ده منين ؟؟؟
عـــادل :- يابني تامر ده تلميذي وذراعي اليمين في الكلية علشان بيسمع كل كلامي وتوجيهاتي أنا عايزك أنت كمان تسمع الكلام أمسك . " يمسك سامي الهروين بتردد " .
عـــادل :- أنت هتفضل تبص كتير. ده ما بيتبصلوش ده بيتشم على طول شم يلا علشان تفرفش خليك راجل" يدخل شريف أثناء الكلام ويجري على سامي ويضرب الورقة من يدة فتسقط ارضاً " .
عـــادل :- الله دي بينها هتقلب بغم .
شريــف :-( يمسك شريف في قميص عادل بشدة ويقول بعنف شديد) - أنت أزاي تسمح لنفسك تجيب الحجات دي هنا ؟؟؟
عـــادل :- بقولك أية نزل أيدك .
ســـامـــي :- ما يصحش كده يا جماعة .
شريــف :- ابعد أنت يا سامي " يدخل فادي علي الصوت المرتفع " .
فـــادي :- فيه أية يا جماعة صوتكم عالي ليه هو النهار طلع ؟؟؟
شريــف :- مش قلتلك يا فادي ديل الكلب عمره ما هينعدل .
عـــادل :- اللا اللا هنبتدي نغلط بقي .
فـــادي :- فيه أية بس يا جماعة ما تفهموني ؟؟؟
شريــف :- عادل يا سيدي جايب مخدرات هنا في الشقة والأفظع من كده كمان أنه بيعلم سامي .
فـــادي :- مخدرات ! أنت بتقول أية ؟ ( في دهشة ) .
عـــادل :- أيوه مخدرات أتخضيت ليه ؟ أنا حر اعمل اللي أنا عايزه وذي ما أنتوا ساكنين في الشقة أنا كمان ساكن يعني ماحدش يقدر يمشيني خليكوا أنتوا في حالكم مالكم ومالي .
فـــادي :- عادل أنت بتقول أية إحنا ما بنتكلمش دلوقتي على الشقة وحقك وحقنا . أنت دلوقتي ماشي في سكة خطر ومش عارف أنت بتعمل أية صدقني يا عادل إحنا خايفين عليك أذا كان شريف أتنرفز عليك فده علشان بيحبك وعايز مصلحتك أيوه يا عادل إحنا بنحبك .
عـــادل :- حب . الكلمة دي أنا معرفهاش . اللي أنا أعرفة أن كل واحد بيعمل لمصلحته لسعادتة . الحب ده نفاق . كلام بنضحك بيه على بعضنا علشان مصالحنا تنقضي ما فيش حاجة أبدا أسمها حب .
فـــادي :- عادل أنت بتتكلم أزاي ؟. إحنا كلنا بنحبك وفوق كل ده ربنا نفسة بيحبك مهما عملت علشان هو المحبة نفسها .
19
عـــادل :- ربنا بيحبني حلوة دي . ربنا اللي خد مني أبويا وأمي وأنا لسه طفل . طفل رضيع . ورماني لعمي الظالم ألحرامي اللي نهب كل الفلوس اللي أبويا سابها لي . حد يصدق إن فيه عم يسرق
أبن أخوة اللي من لحمه ودمه ويعاملني زى العبيد . ولما كبرت وطلبته بحقي ضربني وأهاني وهددني
بالقتل لو جبتله السيرة دي تاني . بعد كل ده لسه بتتكلم عن الحب . كان فين ربنا لما حصل كل ده
سابني ليه لو كان بيحبني ؟؟؟ ( بصوت مرتفع ) .
فـــادي :- عادل ما تكفرش بربنا . ربنا لو ماكانش بيحبك وسابك زى ما أنت بتقول ماكانش ستر عليك لحد دلوقتي . ارجع يا عادل. ارجع من الطريق اللي أنت ماشي فيه . ربنا لسه بيحبك . حوش الغشاوة
اللي حطها إبليس على عنيك وساعتها بس هتشوف المحبة هتشوف يسوع . يسوع اللي أتحمل
كل العذابات ومات علشاني وعلشانك لأنه بيحبنا .
عـــادل :- أنا مش عايز أسمع الكلام ده. مافيش حد بيموت عشان حد . أنا مش عايز نصايح منك أنا هعمل اللي أنا عايزه . أنا عشت من صغري محروم من السعادة ومش هسمح لأي حد أنه يحرمني منها وأنا كبير .( يقولها بعنف ) .
فـــادي :- أنت مخدوع يا عادل إذا كنت بتحس بسعادة ولذة في الخطية فدي لذة وقتية اصحي قبل ما يفوت الأوان أنت ما بقتش شايف الحقيقة من الوهم .( بصوت مرتفع ) .
عـــادل :- أنت بتقول كده علشان أنت ما تقدرش تبقي زيي أنا شايف الدنيا صح قوي أنت اللي ما بتشفش . أيوه هي دي الحقيقة أنت أعمي يا فادي اعمي .( بشدة ) .
شريــف :- أنت زودتها قوي ولازم تنضرب .( ويتهجم عليه فيوقفه فادي قائلاً ) .
فـــادي :- شريف أستني يا شريف عادل ما غلطش . أنا فعلا أعمي ما بشوفش بعنيا لكن صدقني يا عادل مش هو ده ألعمي الحقيقي . ألعمي الحقيقي أنك تبقي شايف الحقيقة وتغمض عينيك عنها تبقي
شايف الصح لكن بتعمل الغلط تبقي شايف طريق النور لكن بتحب تعيش في الضلمة أنا يمكن عيني
محرومة أنها تشوف النور . لكن عمري ما عشت في الضلمة أو حسيت بيها في حياتي عشان يسوع النور الحقيقي ساكن جوة قلبي ومنوره بحبه. يسوع يا عادل يسوع اللي أنت بتنكر حبه يسوع اللي بعته عشان شهوة العين ولذة الجسد الفانيه يسوع اللي بعته بثمن رخيص ليه يا عادل رد علىّ قولي ليه قولي ليه يا عادل . ( بصوت مرتفع جداً ) .
"يأتي صوت الترنيمة من الخارج وهي ترنيمة قولي ليه لماهر فايز ويستمر الجميع في الحديث دون سماع أصواتهم تمثيل صامت لمدة 3 دقائق هي زمن الترنيمة "
سامــي :- أنزل يا عادل أنزل دلوجتي أرجوك أقعد مع عم عبده البواب لحد ما تهده أهدو يا جماعة أرجوكم .
" يفتح عادل الباب وقبل أن يخرج يدخل رجلاً حاملاً مسدس وهو أبو تامر صديق عادل "
عـــادل :- الله أنت مين وعايز أية بالظبط ماسك المسدس ده ليه ؟؟؟( يقولها بخوف شديد ) .
فـــادي :- مسدس ! مين يا عادل؟ في حد غريب في الشقة ؟ " باضطراب " .
أبو تامـر :- أنت عادل ؟ ( لعادل ) .
20
عـــادل :- أيوه أنا عادل ممكن أعرف أنت مين وعايز أية ؟
شريــف :- نزل المسدس من فضلك وفهمنا فيه أية بالظبط "( بخوف )".
أبو تامـر :- أنا هقولكم أنا مين . أنا أبو تامر زميل عادل في الكلية . تامر أبني الوحيد اللي طلعت بيه من الدنيا . اللي عشانه كنت بشتغل ليل مع نهار عشان أكون له ثروة يعتمد عليها من بعدي وهو ده
اللي خلاني ما أنتبهلوش . تامر يا عادل اللي أنت خليتة مدمن مخدرات . ياما زمايله الطيبين كانوا
بيجوا يحذروني منك . لكن بغبائي كنت بقولهم أنا واثق في تامر وفي اختيارة لاصدقاءه . فعلاً أنا كنت
واثق فيه جداً لأنه كان زى الملاك الطاهر. ماكنتش أعرف أن فيه شياطين زيك ممكن تضيع حياته . تامر مات يا عادل .
عـــادل :- مات !" باندهاش " .
سامـــي :- تامر مات " بفزع شديد " .
أبو تامــر :- أيوة مات . اخد جرعة مخدرات زيادة قضت على حياتة وأنت السبب أنت اللي قتلته عشان كده لازم تموت أنت شيطان وتامر ضحية من ضحاياك . أنا لازم أخلص الدنيا كلها من شرورك
"( بعنف "ويطلق الرصاص )
( يشعر فادي بخطر فيشد عادل وراءة ويستقبل الرصاصة في قلبه فيهوي أرضاً ويخرج أبو تامر مسرعاً خارج المسرح ويدخل صابر فزعا لصوت الرصاصة ويسرع الجميع على فادي )
شريـف :- " يشير لسامي " اتصل بالإسعاف بسرعة " فيذهب سامي للتليفون " .
عــادل :-أنت ليه عملت كده ليه شدتني وراك الرصاصة دي المفروض تكون ليّ أنا اخدتها بدالي ليه؟
فـادي :- أنا بحبك يا عادل عشان كده متردتش لحظة أني أموت بدالك . شوفت بقي يا عادل أنا بشوف كويس قوى أنا شوفت الرصاصة وهي خارجة من المسدس ولحقتها قبل ما تيجي فيك وأخذتها جوه قلبي اللي بيحبك .( يتكلم بصوت متقطع ) .
عــادل :- سامحني يا فادي سامحني (ببكاء شديد) .
فــادي :- أنا مسامحك . بس أرجوك يا عادل عشان خاطري عشان خاطر الدم اللي سال عشانك ماترجعش للخطية تاني . أنت لو كنت مت دلوقت كنت هتموت بخطيتك لكن ربنا عطالك فرصة تانية أيوة يا عادل ربنا لسه بيحبك (يخلع فادي الصليب من عنقه ويعطيه لعادل قائلاً ) خد يا عادل الصليب ده عشان يفكرك ديماً بالحب . الحب الكبير .
"يفارق فادي الحياة ويصدر انفعال حزن وصراخ حاد من الجميع ويغلق ضوء المسرح ويأتي من الخارج صوت الآية التي تقول :-
(لأنه هكذا أحب الله العالم حتى بذل ابنه الوحيد لكي لا يهلك كل من يؤمن به بل تكون له الحياة الأبدية)
0 Comments