مسرحية النونو نويل للاطفال

الهدف:

في عيد الميلاد نحن نحتفل بكل شيء ماعدا عيد ميلاد يسوع----- يسوع أعطانا نفسه في الميلاد وعلينا أن نعطي نحن مثله.

الشخصيات:

بابا نويل........ سانتاكلوز كبير وضخم الجثة يرتدي الملابس التقليدية لبابا نويل وشخصية كوميدية الي حد ما.

ماما نويلا....... زوجة بابا نويل وهي شخصية هادئة وعاقلة وجميلة وترتدي هي ايضا ملابس بابا نويل لكن بدون الدقن.

النونو نويل..... ابن بابا نويل وماما نويلا، وهو في المشهدين الأول والثالث بابا نويل صغير يلبس الملابس الحمراء لبابا نويل لكن يوجد فارق واضح في الحجم بينه وبين والده وله دقن صغيرة، وهو ذكي ولمض وتبدو عليه العفرتة، وفي المشهد الثاني شاب عادي يلبس كاجوال.

ملحوظة هامة جدا جدا: نظرا لكبر مساحة دور النونو نويل يُفضل تقسيم الدور علي اتنين ممثلين ويمكن استغلال الوضع بصورة كوميدية في المسرحية.

ش1 : تاجر مشغول بتجارته وعمله ومطحون في شغله.

تانت: سيدة مشغولة ببيتها وعيالها ولا تري غير طلباتهم واحتياجاتهم.

كريم : شاب روش وعايش حياته.

الديكور:

المشهدين الأول والثالث: حجرة معيشة في بيت بابا نويل، كل شيء فيها يوحي بالكريسماس فالكراسي حمراء وهناك زينة في كل مكان.

المشهد الثاني : شارع كبير وفاضي.

النص

المشهد الأول

* يفتح الستار علي حجرة المعيشة في بيت بابا نويل حيث كل شيء يوحي بالكريسماس ثم يدخل النونو نويل من الناحية اليمني ... يبدو شديد الغضب وشايط وقرفان وداخل بيخبط في كل حاجة في وشه وبيكلم نفسه بصوت عالي

النونو نويل : أنا خلاص اتخنقت..... مش ممكن اللي بيحصل ده...حرام بجد....(يلف ويدور في المسرح وهو ينفخ ثم يوجه كلامه للجمهور)... الموضوع كده زاد عن حده...يرضيكوا كده؟؟

* تدخل ماما نويلا من الناحية اليسري للمسرح وهي ترتدي مريلة فوق زي بابا نويل المعروف وبتنشف ايديها في الفوطة وتقول

مامانويلا: نونونويل؟؟ هو أنت؟؟ خضيتني يا نونو؟؟ أنا بقول مين اللي بيزعق ده؟؟

النونونويل: أنا اللي بزعق.....إيه حرام أزعق؟؟ من حقي أزعق زي باقي البشر؟؟ دي حاجة من حقوق الإنسان بتاعة الأمم المتحدة

ماما نويلا: ليه بس كده يابني؟؟ (ترمي الفوطة علي الترابيزة وتقترب منه) ... ايه اللي حصل؟؟ ليه سيبت المصنع دلوقتي؟؟

النونو: اللي حصل اني زهقت... اتخنقت من المصنع ومن اللعب والهدايا والهدوم الجديدة اللي بيعملها المصنع.

مامانويلا(تطبطب عليه): معلش ياحبيبي انا عارفة انك تعبت من كتر الشغل ... بس هنعمل ايه بقي ؟؟ الكريسماس قرب وده الموسم بتاع بابا نويل....... ولازم المصنع يشتغل24 .....

النونو(مقاطعاً): يا ماما أنا مش متضايق من الشغل ...أنا بحب مصنع الكريسماس

ماما(باستغراب تقاطعه): الله.... أُمال ايه اللي مضايقك يا نونو ؟؟ أنت مش لسه بتقول مخنوق ومش عارف ايه..... تكونش عندك مكنة عطلانة؟؟

النونو: لأ معنديش.... المكن كله سليم وحاجات الكريسماس طالعة زي الفل....

ماما نويلا(بلهجة رسمية): نونونويل..... أنا مش فاضية لك ...بابا نويل قرب يوصل ولازم أحضر الغدا.... هتقولي ايه اللي مضايقك ولا أمشي؟؟

النونو(بصوت غاضب): براحتك...امشي وسيبيني... يعني جت عليكي .... ماأنا محدش أصلا فاكرني ولا مهتم بيّ.

ماما نويلا: إزاي ياحبيبي محدش فاكرك؟؟ ازاي تقول كده وفي أيام الكريسماس بالذات؟؟(تتكلم بفخر) دا أنت النونو نويل ابن بابا نويل علي سن ورمح .... وكل الناس وخصوصا الأطفال مستنينكوا وبيحلموا بيكوا الأيام دي.

النونو (بسخرية): أيوه طبعا....مستنيين الهدايا والزينة والهدوم بتاعة كل سنة...... بس أنا محدش سائل فيّ ولا حد فكر يجيب لي هدية........

* يقاطع كلامه دخول بابا نويل وهو يحمل بؤجة الهدايا علي ظهره وبينهج ويجلس فورا علي أول كرسي يقابله ويقول

بابا نويل: مساء الخير يا مامانويلا....ازيك يا نونونويل يا حبيبي؟؟ عاملة لنا ايه النهاردة عالغدا يا نويلا يا حبيبتي؟؟ أنا واقع من الجوع.... تخيلي الأطفال اللي في القطب الجنوبي طلع عددهم أكتر من اللعب اللي معايا ..أنا يدوبك آكل لقمة وأحمّل العربية وأرجع علي هناك علي طول أحسن ياعيني العيال اللي هناك هيموتوا نفسهم من العياط ومستنيين الهدايا....

النونونويل (يخبط الأرض في غضب ويزعق): كده يابابا ....ماشي....يعني أطفال القطب الجنوبي أهم مني؟؟ ماشي...(يخرج مسرعاً وهو يتمتم ويهمهم).... ابقوا شوفوا لكوا حد غيري يشرف علي المصنع .... أنا مش داخله تاني.

بابا نويل (ينظر في دهشة شديدة): هو فيه ايه؟؟ هو أنا قلت حاجة غلط؟؟ هو أنا عملت له حاجة؟؟ماله النونو؟؟

مامانويلا: لأ ...اطمن....مش أنت اللي ضايقته...... هو من الصبح متضايق لوحده

بابانويل: وايه اللي مضايقه؟؟

ماما نويلا: متضايق إن محدش بيجيب له هدية في الكريسماس...

بابا نويل(يهرش في زعبوطه وهو متعجب): هدية للنونونويل !!!!!!...... ابن بابا نويل اللي بيوزع الهدايا عالعالم كله!!!!.... واللي بيشرف علي مصنع الكريسماس كله!! ...ابنك ده عليه شوية أفكار معرفش بيجيبها منين....

ماما نويلا(تمسك الفوطة وتبدو كأنها خارجة ): بص ... اتفاهم أنت معاه براحتك..انا رايحة أخلص الغدا.....(تخرج)

بابا نويل (يتعدل في قعدته ويعدل زعبوطه وينادي بصوت عالي): نونو...يا نونونويل ..... تعال ...أنا عاوز أتكلم معاك شوية...

* يدخل النونو نويل وهو خالع زعبوطه وماسكه في ايده ويجلس علي كرسي بجوار بابانويل ويقول

النونو نويل : نعم يا بابا

بابا نويل: أنا عاوز أتكلم معاك شوية يا نونو.... عاوزك تقول لي بصراحة عاللي مضايقك....فيه ايه؟؟

النونو: مادام عاوزني أتكلم بصراحة... يبقي لازم تعرف إني قرفان من حياتي كلها.

بابا نويل: وايه اللي مخليك قرفان كده؟؟ حصل حاجة ضايقتك؟؟

النونو: انا مش عارف أعيش زي باقي الناس اللي في سني......نفسي يبقي لي أصحاب يرنوا لي عالموبيل وأرن لهم...... أبعت لهم مسجات ويبعتوا لي هما كمان......

بابانويل: ما أنت يا نونو حبايبك كتير ...والموبيل بتاعك مبيبطلش رنات ومسجات طول اليوم.....

النونو: كلها مكالمات مصلحة يا بابا صدقني ....اللي يسألني : هتعملوا لنا ايه لعب السنة دي؟؟ واللي يقول لي: وصي باباك علينا وخليه يكتر اللعب شوية.... واللي هدوم العيد تطلع كبيرة علي ابنها تتصل تطلب مقاس أصغر.... واللي عاوز يعرف بابا نويل هيروح لهم امتي.... محدش عاوزني أنا ....كلهم عاوزين الهدايا والهدوم الجديدة وبس.

بابا نويل: معلش يا حبيبي هما ميقصدوش ..... بس هما أصلهم مشغولين شوية ...أنت عارف دي أيام أعياد و..............

النونو(يقاطعه): ما هو يا بابا بعد عيد الميلاد ما بيعدي محدش بيفتكرني ولا حتي بميسد كول .....وأهو أنت أهه بقالك سنين بتجيب للناس هدايا...حد افتكرك مرة ولو بهدية صغيرة؟؟ طب بلاش هدية.... حد بيفتكرك في عيد القيامة؟؟ حد بيتصل بينا هنا في البيت يعيد علينا ويقول لنا كل سنة وأنتوا طيبين؟؟

بابا نويل(يهرش في زعبوطه ويبدو عليه التفكير العميق): لأ ...بصراحة محدش بيجيب لي هدية ولا بيتصل في عيد القيامة......(يبدو عليه وكأنه اكتشف أمر جديد مرة واحدة فينتفض في مكانه) ... بس الناس برضه معذورة ..... هما أخدوا علي ان بابا نويل ده بتاع عيد الميلاد مش بتاع عيد القيامة.

النونو( يتكلم بانفعال وغضب): معذورة ؟؟ معذورة ازاي يا بابا؟؟ بعد كل اللي بنعمله عشانهم ده وفي الآخر ينسونا؟؟ دا كفايه إننا مبنغيرش هدومنا اللي بقالها خمسميت سنة دي عشانهم وعشان يعرفونا. يعني بذمتك يا بابا في حد في سنك يلبس زعبوط أحمر؟

بابا نويل (يهب واقفا وهو يضع يده علي زعبوطه): الزعبوط؟؟ وماله الزعبوط يا ولد؟؟ دا بيفرح كل الناس...

النونو (يقاطعه): ما احنا بقي لنا سنين بنفرحهم أخدنا ايه في الآخر؟؟ بنتعب وتطلع عنينا عشان نعمل لهم هدايا وهدوم ولعب العيد .... وبعدين نلف العالم كله في البرد والتلج عشان نوزعها عليهم... وبعدين ؟؟ استفدنا ايه احنا ؟؟

بابا نويل (يتنهد ويجلس ويضع يده علي ضهر النونو ويتكلم بهدوء وعقل): بص يا حبيبي...أنت لازم تفهم حاجة مهمة جدا ... أنا وأنت مش زي أي حد تاني في الدنيا...احنا مميزين.. موجودين هنا عشان مهمة محددة..... ولازم نعمل المهمة دي.

النونو: أنا مش عاوز اعمل المهمة دي يا بابا ...انا عاوز أعيش زي باقي الناس...مش عاوز أفضل أدي وأدي وأدي من غير ما أخد ولا حد يفتكرني ...

..... عاوز اخد اجازة من إني ابقي النونو نويل..... أنا كبرت كمان علي اسم نونو دا.

بابا نويل : ماشي يا نونو... أنا مش عاوز أجبرك علي حاجة أنت مش عاوزها.... أنت عاوز تجرب حياة الناس العاديين.... وأنا هديلك الفرصة دي....هكلفك بمهمة تعملها وسطهم...

النونو: وانا من غير ما اعرف المهمة موافق عليها ومستعد أعملها.

بابا نويل: احنا عاوزين السنة دي نجيب هدية لصاحب العيد..... يسوع..... هدية باسم كل البابانويلات اللي في العالم...... بس طبعا مش أي هدية.

النونو: مش أي هدية ازاي يعني؟؟ مش هتنفعه أي حاجة من المصنع؟؟

بابا: لأ ....احنا مش هنجيب له حاجة من المصنع....أنت مكلف أنك تدور له علي هدية مميزة جدا جدا جدا جدا....

النونو: مدام فيها نزول للأرض ...يبقي أوعدك إني هدور له علي أحسن هدية في الدنيا.

بابا: بس خلي بالك...انت لازم تكون هنا ليلة العيد...هه؟؟ وخلي بالك كمان.... أنت لازم تنزل الأرض بشكل مختلف تماما عن شكلك.... ومحدش يعرف أبدا أنت مين....

النونو: حاضر يا بابا....أوعدك انه حتي أنت وماما مش هتعرفوني....

بابا: خلاص ...يبقي تقدر تمشي وقت ما تحب.

النونو(يقفز فرحاً ويأخذ باباه بالحضن): يا حبيبي يا بابا نويل ....يا أحلي بابا نويل في الدنيا....

بابا: أي ..... علي مهلك يا ولد ...حاسب دقني ....(يزعق). يا ولد (يخرج النونو جري)

* يتنهد بابا نويل ويجلس ثم تدخل ماما نويلا فتجلس جنبه وهي صامته

بابا: سمعتي الحوار اللي كان بيننا؟؟

ماما(تهز رأسها بمعني نعم في حزن): أنت هتسيبه يروح لوحده كده؟؟

بابا: أنا قلقان عليه زيك برضه..... بس هو كبر ... ولازم يأخد القرار لوحده...

نهاية المشهد الأول

المشهد الثاني

* يظهر النونو نويل في مسرح خالي تماما وفي شكل مختلف تماما يلبس ملابس عادية لشاب صغير ويكلم نفسه

النونو: يا سلاااااااااااااااااااام..... مفيش أحلي من الحرية..... أنا أخلص بسرعة من موضوع الهدية دي عشان أعرف أروّق نفسي بعد كده..

الجزء التالي يُضاف إذا كان هناك شخصين هيقوموا بدور النونو نويل

* يرن جرس الموبيل فيرد النونو

النونو : أيوه يا ماما

ماما نويلا (صوت من خارج المسرح): آلو...مين معايا؟؟

النونو: أنا النونو يا ماما

ماما: أنت مين؟؟

النونو: بقولك أنا النونو يا ماما ...ابنك.

ماما: مش ممكن... ابني مكنش صوته مخنشر كده.

النونو: ما أنا غيرت صوتي وشكلي يا ماما لزوم الشغل.

ماما(بصوت باكي): طيب يا نونو يا حبيبي ....أنت كويس؟؟

النونو: أيوه يا ماما ..متقلقيش...

ماما : خلي بالك من نفسك..هه..متقلعش الزعبوط بتاعك عشان متأخدش برد.

النونو : زعبوط إيه بس يا ماما؟؟ بصي ..اطمني عليّ ....أنا كويس ..باي باي بقي.

ماما: باي باي يا حبيبي ....

* يغلق النونو الموبيل و يدخل شخص من الناحية اليمني وهو رجل كبير يمشي مسرعا يحمل في يده كراتين واكياس ويتوجه النونو اليه ليكلمه

النونو: لو سمحت

مجدي (يقف ويبدو عليه الاستعجال): أفندم؟

النونو: الحاجات اللي مع حضرتك دي هدايا الكريسماس؟؟

مجدي : أيوه يا باشا.

النونو: طب أنا كنت عاوز أسأل علي حاجة.

مجدي : اسأل بس بسرعة وحياتك ...أصل أنا مستعجل..

النونو: انا عاوز أجيب هدية ليسوع.....أجيب له إيه؟؟

مجدي : يسوع؟؟ يسوع مين؟؟

النونو: يسوع المسيح...اللي احنا بنحتفل بعيد ميلاده

مجدي : آآآآآآه...... يا راجل ..... ماتقول م الصبح(يضع الأكياس اللي معاه عالأرض)

النونو: أديني قلت......تعرف له هدية كويسة؟؟

مجدي : بص ...أنت تيجي معايا عالمحل بتاعي...أنا لسه جاية لي تشكيلة هدايا هتعجبك...اتفرج ونقي.

النونو: أيوه بس هدية يسوع لازم تكون هدية مش عادية

مجدي : التشكيلة اللي عندي مش عادية..... دا أنا عندي شوية بابانويلات صغيرة إنما ايه............ أحلي من بابا نويل ذات نفسه.

النونو(يضع يده في وسطه وينظر في غيظ): أحلي من بابا نويل ذات نفسه...... ماشي يا عم...

مجدي: تعال انت بس واتفرج... وأنا متأكد إنك هتتبسط.

النونو: حضرتك مش فاهمني... الهدية اللي نجيبها ليسوع لازم تكون مختلفة....يعني حضرتك مثلاً بتجيب له إيه هدية كل سنة؟؟

مجدي (في سخرية ): هدية؟؟ هدية إيه ياعم اللي أنت بتتكلم عليها دي؟ هو أنا لاقي آكل لما هأجيب هدايا كمان؟

النونو: بس دي هدية مش زي اللي بتجيبها لصحابك وحبايبك...دي هدية ليسوع..

مجدي(يبدو عليه الزهق): بقولك ايه يا باشا؟ الكلام اللي أنت بتقوله ده يمشي علي الناس المستريحة اللي معندهاش مشاكل ...أنا راجل غلبان بأجري علي رزق عيالي...

النونو: ايه ده؟؟ يعني أنت مبتحتفلش بعيد الميلاد؟؟

مجدي : لأ بحتفل طبعا بس بطريقتي..... دا موسم الشغل عندي في المحل.... يعني أنا بابيع الهدايا مش باشتريها ولا بأهادي بيها (يبدأ يلم الحاجات بتاعته)

النونو: معلش ..أنا مش قصدي أضايق حضرتك ولا حاجة...أنا بس متعود أجيب هدايا في العيد.

مجدي : ولا يهمك يابني ...احنا برضه كنا صغيرين زيك كده.... وكنا بنفكر في الهدايا ومش عارف ايه....بس دلوقتي..... خلااااص... مبقاش فيه وقت ولا مخ للحاجات دي.... احنا يدوبك بس نكفي عيالنا.....سلام ...(يخرج).

النونو (يكلم نفسه): أما راجل غريب بصحيح..ولا جايز أنا اللي غريب ...ما أنا جديد عالدنيا دي...(تدخل سيدة تمشي ببطء فينظر لها النونو ).... اما أروح أجرب مع الست دي جايز تفيدني .... متهيألي الستات بيفهموا في الحاجات دي أكتر من الرجالة.. (يتقدم اليها ويكلمها)......يا تانت ....لو سمحتي.... حضرتك مسيحية؟؟

تانت: أيوه ... ليه؟ فيه حاجة؟؟

النونو: لا ..أبداً ...أصل أنا عاوز أسأل بتجيبوا ايه هدية ليسوع في عيد ميلاده؟؟

تانت: بص يا حبيبي ...أنا مليش في الهدايا ....ولادي هما اللي علي طول بيشتروا هدايا لصحابهم...تأخد أرقام موبيلاتهم؟؟

النونو: يعني حضرتك برضه مبتجيبيش هدية ليسوع؟؟

تانت : ودا وقت هدايا ليسوع ؟؟ أنت يا بني مش واخد بالك إن دي أيام عيد؟؟

النونو: أيام عيد الميلاد.....عيد ميلاد يسوع...

تانت: بالظبط.... العيد.... يعني لازم أنضف البيت ...وأغسل السجاجيد... واجهز الأكل ..... دا موال يا حبيبي.

النونو: بس الحاجات دي كلها ملهاش دعوة بالعيد.

تانت: ملهاش دعوة بالعيد!!؟؟ إزاي ؟؟ دا هي دي العيد نفسه....

النونو: يعني مفيش حاجة تاني تهم حضرتك في العيد؟؟

تانت: لأ طبعاً فيه.... الهدوم بتاعة العيال....اللي لسه عاوز شرابات ..واللي بنطلونه طلع كبير وعاوز مقاس أصغر ...آه ...صحيح فكرتني.... أنا لازم أكلم بابا نويل عشان يشوف لي مقاس أصغر..

النونو(بصوت متنرفز): هو انتي اللي بتتصلي كل يوم ببابا نويل عشان البنطلون.؟؟

تانت(تنظر له في شك): أنت ايه اللي عرّفك الموضوع ده؟؟ أنت مين بالظبط...؟؟ (تبدأ في الإبتعاد عنه للخروج)

النونو: يا تانت ..استني حضرتك...اديني أرقام الموبيلات طيب

تخرج تانت ولا ترد عليه

* ينفخ النونو ويرجع تاني يكلم نفسه

النونو: ايه اللي بيحصل ده؟؟و أنا اللي كنت متضايق إن الناس مش فاكراني ومحدش بيعبرني بهدية....(يتنهد) ...طب وبعدين...موضوع الهدية طلع مش سهل...أنا مش عارف أسأل مين تاني ...(يلف شوية وهو بيفكر)..آه صحيح....أكيد طبعاً أحسن ناس هيعرفوا الهدية المناسبة ليسوع هلاقيهم في الكنايس...(ينظر حوله)... أهه كنيسة هناك أهه وأدي واحد خارج منها..هروح أكلمه(يدخل كريم وهو يلعب في الموبيل)

النونو: مساء الفل.

كريم: مساء الفل والورد.

النونو: أنت لسه خارج من الكنيسة .. هو الاجتماع خلص؟؟

كريم: أيوه خلص من زمان..أنت اتأخرت قوي.

النونو: يا خسارة...

كريم: متزعلش قوي كده ...مقالوش حاجة جديدة.... الكلام اللي بيتكرر كل سنة في الأيام دي...أنت اسمك ايه؟

النونو: النو...(يقطع كلامه بسرعة)....قصدي نور...اسمي نور

كريم(يضحك بصوت عالي): حلوة قوي دي يا مان..أنت نسيت اسمك ..أنت باين عليك مية مية .

النونو: أنا بصراحة قربت أنسي نفسي خالص ...أنت اسمك ايه؟

كريم: اسمي كريم.... بس اوعي تنساه.......إيه بقي اللي منسيك اسمك؟؟

النونو: بأدور علي هدية ليسوع بمناسبة عيد ميلاده.

كريم: يااااااه...بس دي حاجة صعبة قوي...هتجيبها منين دي؟؟

النونو: أحمدك يارب ..أخيراً لقيت حد حس بيّ وهيساعدني

كريم: أحس بيك آه.... أساعدك لااا...كان ممكن أساعدك لو هتجيب هدية روشة لبنت مثلاً...قلوب ... كروت.. دباديب...أو حتي نغمات موبيلات ورنات.أي حاجة مالحاجات دي...أنا خبرة فيها...

النونو: لأ ...دي أنا أعرف أجيبها لوحدي...أنا أصلي خبير هدايا

كريم: طب فهمني..أنت ليه عاوز تجيب هدية ليسوع؟؟

النونو: عشان عيد ميلاده.

كريم: ما هو بقاله 2008 سنة بيحتفل بعيد ميلاده ومحدش بيجيب له هدايا من بعد هدايا المجوس.... وبعدين يعني هو يسوع محتاج الهدايا بتاعتنا؟؟

النونو: لأ طبعا مش محتاجها...بس.......

كريم: مبسش بقي يا عم ...كبّر ..كبّر...

النونو: أكبر ازاي بس ...أنا كده في مشكلة ...أنا قلت بتوع الكنايس هما اللي هيساعدوني في الموضوع ده.

كريم: هيساعدوك ازاي يعني ؟؟ هيدولك وعظة تديها ليسوع ولا كتاب مقدس؟؟

النونو: ما هو أكيد الناس اللي عايشة مع يسوع هتبقي فاهمة إيه اللي مفروض نجيبهوله في عيد ميلاده.

كريم : لأ بيتهيألك ....وبعدين مش كل الناس اللي في الكنايس عايشة مع يسوع... فيه ناس بتقول كلام وبس مبتعملش حاجة..؟؟

النونو: بس أكيد برضه فيه ناس كويسة بتعمل حاجة

كريم: آه طبعا

النونو: طب ما تقول لي علي حد منهم أروح أكلمه.

كريم(يفكر): أقولك . أقولك.... علي واحد كويس جدا وعايش مع يسوع بجد مش بالكلام وكمان هيبقي عارف ايه أحسن هدية ليسوع ؟؟

النونو: قول ..مين ده؟؟

كريم: بابا نويل.

النونو(يصرخ): مين؟؟

كريم: باباااااااااااااااااااااا نويل..بتصرخ ليه؟؟

النون(مرتبك): لا ..أبداً...أصلي مش عارف أنت اخترت بابا نويل بالذات ليه يعني؟؟

كريم: يعني عشان هو مش بتاع كلام انما بتاع شغل ..... هو بيدي الكل من غير ما يستني حاجة من حد..

النونو(يبدو عليه التفكير): تخيل ..إني أول مرة آخد بالي

كريم: من ايه ؟؟ من بابا نويل؟؟

النونو: من بابا نويل ومن حاجات كتير تاني

كريم: حاجات زي ايه؟

النونو(ينظر في ساعته): مش مهم دلوقتي... أنا لازم أمشي

كريم: علي طول كده؟؟ أنت مقلتليش أنت منين أصلا؟؟

النونو: بعدين .. بعدين

كريم: طب والهدية؟؟

النونو(وهو خارج): ما أنا خلاص عرفت هجيب ايه...

كريم : طب قول لي هتجيب ايه؟؟

النونو(صوته من الداخل): هبقي أقول لك بعدين لما أجي لك وأجيب لك معايا هدية.

كريم(يوجه حديثه للناس): هيجيب لي معاه هدية..هو مين ده؟؟ وطلع لي منين؟؟ وهيجيب لي هدية فين وازاي ؟ ؟ ياللا..........

يخرج وهو مازال يلعب في الموبيل

نهاية المشهد الثاني

المشهد الثالث

* يفتح الستار علي بابا نويل قاعد في غرفة المعيشة في بيته ويدخل النونو نويل بزيه الأصلي فيقف بابا نويل ويأخده بالحضن

بابا: حمدالله عالسلامة يا حبيبي..وحشتني

النونو: الله يسلمك..وأنت كمان وحشتني(يجلسان)

بابا : هيه ...عملت ايه في الأرض يا نونو؟؟

النونو: اتكلمت مع الناس واكتشفت شوية حاجات كده...

بابا: حاجات زي ايه؟

النونو: الناس مش في دماغها خالص عيد الميلاد ...قصدي صاحب العيد...هما بيفكروا في كل حاجة وبيحتفلوا بكل حاجة ماعدا يسوع.

بابا: وايه كمان يا نونو؟؟

النونو: اكتشفت ليه حضرتك بعتني الأرض... حضرتك عارف إنه مينفعش نشتري ليسوع هدية..

بابا(يضحك): أمال ايه اللي ينفع يا نونو؟

النونو : متهيألي....متهيألي....

بابا: متهيألك ايه؟؟

النونو: متهيألي مدام احنا في الكريسماس بنحتفل بيسوع اللي إدانا نفسه .....يبقي الهدية اللي تنفع له..اننا نعمل زيه وندي اللي حوالينا واحنا مبسوطين...

بابا: أنت عاوز كل الناس توزع هدايا زينا يا نونو؟؟

النونو: لأ ..مش كل الناس هتدي هدايا ...فيه ناس هتدي وقتها وناس هتدي فلوس وناس هتدي علمها ومعرفتها... المهم ان كل واحد بيحتفل بيسوع يكون بيعمل زيه وبيدي...

بابا: وأنت قررت تدي ايه يا نونو؟؟

النونو: أنا قررت إني مبسوط إني النونو نويل ....وبعد كام سنة هأبقي بابا نويل اللي بيدي كل الناس.

بابا: حتي لو محدش افتكرك؟؟

النونو: حتي لو محدش افتكرني...أنا هأكون مبسوط جدا.

بابا: وأنا كمان مبسوط بيك جدا.

ماما نويلا (تدخل من الجنب): وأنا كمان مبسوطة جدا.

يقف الكل ويرنموا ترنيمة:

فكرت أروح المذود أزورك يا يسوع

دا أنت اتحملت بدالي تعب وبرد وجوع

(نفسي أقدم هدية بمجدك تليق)2

جمالك يملا عينيّ وحنانك حواليّ

لما أفكر في هدية يا يسوعي ما ألاقيش

ببساطة قلب صغير ومعاك الحب بيكبر

لما أشوفك بتغير والدنيا متساويش

نفسي أحط ابتسامة علي وجهك الجميل

لما بفتح لك قلبي وأعيش معاك علي طول

(أنا بقدم لك نفسي وكل حاجة فيّ)2

بحبك يا يسوع اقبل حبي هدية

مسرحية النونو نويل للاطفال