اسكتش نجمة الميلاد

اسكتش نجمة الميلاد

الشخصيات

كوكو (يتحدث بلهجة صعيدى)

- جوجو (يتحدث بلهجة بحرى )

- لولو

-رئيس الجيش

 -الملك

  

 يفتح الستار على منظر به قطع اخشاب مرصوصه ويحاول جوجو اشعال النار بها ولكنه لايستطيع بينما تجلس لولو تقرا  كتاب

 

كوكو :ايه يا زوزو ساعه مش عارف تولع النار

جوجو : لو سمحت انا والا اسمى جوجو ثانيا انا مكملتش ساعة لسة فاضلى تلات دقايق دا غيرالوقت البدل الضايع

كوكو: بدل الضايع بامانه شكلك انت اللى ضايع وهتضيعنا معاك

جوجو: انا اضيعكم لو ولعت النار ومعرفتش اطفيها لكن طول ماهى ما ولعتش اطمن احنا ف امان

لولو: (تترك الكتاب وتتجه لهم وهى ترتدى نظارة طبية كبيرة الحجم) ايه يا جماعه مالكم بتتخانقوا على ايه وصوتكم جايب اخر الدنيا

كوكو : تعالى شوفى يا لولو بقاله ساعه (جوجو ينظر له فيغير كوكو كلامه ) بقالة سبعه وخمسين دقيقة مش عارف يولع النار شكله هيولعها فالاكسترا تايم

جوجو : برضو تانى طب انا ....(يظهر نور النجم للحظات ويختفى فتقاطعه لولو)

لولو: بصوا يا ولاد ايه دا

جوجو وكوكو : (بطريقة كوميدية ) ايه دا

لولو : النجمه اللى ظهرت دى واختفت مرة واحده

كوكو : ما السما كلها نجوم وطول الليل   حاجات اظهر حاجات اختفى

لولو: لا دى غير كل النجوم دى

كوكو: انا مش شايف حاجه

(يظهر النجم مرة اخرى )

لولو: اهو شوفتوه  

كوكو اه شوفناه فعلا غريب

جوجو (وهوجالس) بس انا عرفته

كوكو عرفته منين يا ابو العوريف

جوجو زمان المستر بتاع مادة النجوم والكواكب قلنا عليه

كوكو  انت ولا فاكر حاجة دى كانت مس ...مس ابتسام ياما كلت سندوتشات مربي فى حصتها

جوجو لا كان مستر

كوكو لا

لولو (تتدخل مقاطعه) مستر ولا ميس مش مشكلة المهم قال ايه يا جوجو

جوجو (يبدا يقف وهو يتحدث وينطق بعض الكلمات بصوت هادى والاخرى بصوت عالى ويجلس ويقف عدة مرات وهو يتحدث متقمصا شخصية المستر ) قال  خدوا بالكم يا ولاد هيجى يوم يظهر نجمه احلى من كل النجوم (يفتح ذرعيه) وكمان اكبر من كل النجوم (يفتح ذراعيه مع كل كلمة نجوم ) واقربلنا من كل النجوم وشكلة مميز عن كل النجوم

كوكو يابنى روشتنا نقعد (يجلس) ولا نقوم (ينطقها بلهجة صعيدية ويقف فاتحا ذراعية مقلدا جوجو)

لولو ايوه بقا يا جوجو النجمة دى هتبقى  عاملة كدا ليه

جوجو عشان النجمة دى هتبقى العلامة اللى بتقول ان بابا يسوع اتولد طفل صغيور

كوكو الله عليك يا فنان ..شايفه الواد مذاكر ازاى مش انتى قاعدلنا طول اليوم بالكتاب زى ابلة الناظرة ومعرفاش حاجه

لولو (تنظر لكوكو معاتبه)بابا يسوع اتولد طفل صغيور...احنا لازم نروح نشوفه وناخدله هديه

كوكو (كمن يقول شئ حصري )لا احنا نروح نشوفه وكمان ناخدله هديه

جوجو كل واحد مننا ياخد هديه مختلفه لبابا يسوع

لولو ايوه يا جماعه بس فيه مشكلة هنعرف طريقة ازاى

جوجو المستر قال ان النجمة دى هتوصلنا

كوكو يبقى يلا بقا نجيب الهدايا

(يظهر عليهم انهم مشوا كثيرا)

لولو وبعدين احنا تعبنا من المشي والنجمة اختفت واحنا مش عارفين نمشى تانى  ازاى

جوجو انا عندى فكرة

لولو : ايه هى يا جوجو الحقنا بيها

جوجو: احنا نشوف اى حد من اهل البلد دى ونساله وهما اكيد عارفين بابا يسوع اتولد فين

كوكو (يتحدث ببط كالمسطول ) لا... انا عندى فكرة احسن... احنا نشوف حد من اهل البلد دى ..ونساله بابا يسوع اتولد فين

(يوجد شخص يمر بجوارهم رفيع وقصير ويلبس طاقيه وهو رئيس جيش الملك )

كوكو : انت يا عم انت

رئيس الجييش (برعب شديد) ايه انا معملتش حاجه انا برئ

كوكو ياعم هو حد كلمك مالك ياد متظبط كدا

رئيس  (برعب)انا مليش دعوة هما اللى قالوا ....

كوكو ولاه مالك يلا انت حرامى ولا ايه خايف كدا انت شغال ايه يلا(ويضع يده على راسه ويخلع الطاقيه)

رئيس(بثقة شديدة وبحزم) رئيس جيش الملك

كوكو (بادب شديد) يا نهار اسود انا اسف يا باشا اتفضل طاقيتك اهى (يلبسه الطاقيه فيرتعب الرئيس ) بس ممكن نستفسر منك عن حاجه

رئيس (برعب) انا تحت امرك يا باشا

كوكو (متعجبا) باشا انا ...ايه دا الراجل دا بيتحول فى ثانيه شكله السر فالطاقيه ...من غيرها رئيس جيش وبيها اسير حرب اسره الجيش (يمد يده ينزع الطاقه)

رئيس (بحزم شديد)ولد اقف ثابت واحترم نفسك

كوكو (يلبسه  الطاقيه فيعود الرئيس لحالة الرعب وتظهر على وضع جسمه يضع يديه امامه كمن يخاف من ضربه تاتى له) ولا يا جوجو بنت يا لولو تعالو شوفوا دا اكتشاف ( ينزعها عنه فينتصب الرئيس بثقه) تحوش الطاقيه يبقى رئيس جيش الملك تحط الطاقية (يضع الطاقية فيعود الرئيس لحالة الرعب ..ويكمل كوكو ببط )يبقى ناموسه عانس بتزن حوالين ودن غفير درك فى جيش الملك

لولو يا سلام طب مايشيل الطاقية  علطول ويبقى كويس

الرئيس مقدرش احطها ولا اشيلها لنفسي يا هايفه !!

جوجو طيب احنا هنشيلهالك علطول بس تقولنا فين اتولد بابا يسوع

رئيس انا معرفش بس ممكن اوديكم للملك و اللى يعرف

لولو يلا ودينا

رئيس  ياجلالة الملك الناس دول كانوا عايزين يسالوك على حاجه

الملك اتفضلوا

جوجو احنا شوفنا نجمه بتقول ان بابا يسوع اتولد ومشينا وراه بس للاسف النجمة اختفت ومش عارفين بابا يسوع اتولد فين فلو جلالتك تعرف قولنا عشان عايزين نسجدلة ونقدمله هديانا

الملك تسجدوله وتقدموله هدايا

لولو ايوه عشان بابا يسوع اعظم ملك فى الكووون دا كله

الملك (بخبث) انا معرفش فين بس انتو روحوا دوروا علية ولما تلاقوه وتتاكدوا  من مكانه تعالوا قولولى عشان اروح اسجدله انا كمان

يخرجون

جوجو ولا استفدنا بحاجه من الملك

كوكو مش هى شورتك يا فصيح

لولو خلاص يا جماعه بقا ....انا عندى فكرة

كوكو وجوجو ...ايه هي

لولو احنا نغنى للنجمة اغنية عشان تظهر وتدلنا علىمكان ميلاد بابا يسوع

كوكو وجوجو فكرة جميلة خالص يا لولو

يبدا الجميع يغنى وفى هذة الاثناء تظهر النجمة وتدلهم على مكان ميلاد يسوع فيسجدون ويقدمون الهدايا اثناء ترديد الاغنيه

الاغنية

-انتى يا نجمه انتى يا نجمة ...اظهرى بقا ايه الموضوع

ما تـ يلا بقا يانجمتنــــــا ..ورينا فين بابا يســــــــــــــوع

-انت يا بابا يسوع جيتلى ...علشان قلبى يكون فرحان

وانا جايبلــــــك قلبى هديه... جاى اقدمها بايمان

-انتى يا نجمه انتى يا نجمة ...اظهرى بقا ايه الموضوع

ما تـ يلا بقا يانجمتنــــــا ..ورينا فين بابا يســــــــــــــوع

 

word  لتنزيل الاسكتش للطباعة بصيغة ال 

 أضغط هنا