مسرحية فيلم المسيح

المشهد الأول

( يفتح المسرح على اوضة مكتب موجود فيها شخصين وحواليهم اشخاص يحاولوا اخذ التوقعات من واحد فيهم )

المنتج : يالا يا جماعة ... ها ده والله كتير ...... استاذنا بدو يرتاح .

يالا يا جماعة ... ها ده كفاية .

"ويخرجهم بره المسرح "

شفت يا استاذنا ..... شايف النجاح العظيم اللى احنا سوناه .

المخرج : شفت يا سيدى .... وانت اكيد اكتر واحد فرحان بكده .

المنتج : لك شو ..... كلنا فرحانين انت مو فرحان متلنا ؟

المخرج :ايوه طبعاً .... بس انت فرحان بالنجاح وكمان فرحان بالفلوس اللى كسبتها من ورا النجاح ده ..... ما انت المنتج بتاعنا .... اللى قولى ... انت كسبت قديه من الفيلم ده ؟

المنتج : لا .... لا والله ربحنا مو كان كتير ..... لكن فرصتنا بالاساس كانت بنجاح مخرجنا العظيم ..... ويشاور عليه .

المخرج : ( يبتسم ) ايوه طبعاً ما انا عارف .... بس عايز اعرف فى حدود كام كسبت ؟

المنتج : والله ربحنا كان فى حدود 10 مليون جنيه ( ويغمس فى ظهره ) بس ..... وكل واحد فى الفيلم واخد اجره وحقه بالزياده ...... صحيح .

المخرج : ( يضحك ) 10 مليون جنيه غير تمن بيعه للقنوات الفضائية يعنى كمان 10 مليون يبقوا عشرين مليون يعنى يادوب .

المنتج : ايش تقصد ؟

المخرج : ولا حاجه .... ما تخفشى انا مش هاطلب زيادة اجرى .... انا اخر جاجه افكر فيها هى الفلوس .... انا بافكر فى حاجة تانى

المنتج : ها انت والله عكسى تماماً انا اول حاجه راح بافكر فيها قبل اى فيلم هى المسارى ...يعنى الفلوس عندكم ... انما انت فى ايش تفكر ؟

المخرج : فى الفيلم الجديد بتاعى .

المنتج : فيلم ......... فيلم اه ؟

المخرج : الفيلم الجديد .

المنتج:ها انا والله سمعت لكن بدى اعرف فيلم ايش هو الفيلم ده وانا هاكون المنتج بتاعه ولا لا ؟

المخرج : والله انت براحتك .... عايز تبقى المنتج بتاعه ؟

المنتج : نعم .....نعم ابغى اكون المنتج .

المخرج : بس ده غير الفيلم القديم .

المنتج : غيره ازاى ..... وضح وضح .

المخرج : يعنى هيتكلف كتير .

المنتج : كتير ... قد ايه يعنى ؟

المخرج : كتير خالص ........ بس برضه مكسبه كتير خالص .

المنتج : مكسب كتير يعنى راح نربح اكتر فى الفيلم اللى فات ؟

المخرج : بكتير .

المنتج : خلاص يالا هلا نتصل بالمحامى وراح نسوى العقود .

المخرج : لا انسى انت مستعجل على ايه ..... اصبر .

المنتج : وليش الصبر ......... بما ان الحكايه بيها مسارى وفلوس وانا معك لكن قلى فى ايش .... عن ايش راح يكون فيلمنا

المخرج : خلاص قوام خليته فيلمنا .

المنتج : اى .... خلاص انا المنتج وانت راح تبقى المخرج .

المخرج : خلاص يا سيدى

المنتج : بس ايش راح يكون اسم الفيلم .

المخرج : ده هتعرفه بكره لما تجمعلنا كورس الممثلين بتوع الفيلم اللى فات هما دول نجومنا وهما اللى هيكونوا معانا على طول .

المنتج : بكره راح يكونوا موجودين

المخرج : وبكره هتعرفوا ......... فكرة فيلمنا الجديد

( تقفل الستار )

المشهد الثانى

( يفتح المسرح على صورة المكتب موجود فىه كلاً من اكرم ويوسف ومرقس وعماد وصلاح )

اكرم :شفتم يا جماعة .... شايفين النجاح اللى عامله الفيلم بتاعنا .

يوسف : انا سمعت انه كسر الدنيا .... وانه احسن فيلم نزل الموسم ده .

عماد : اه صحيح ده كان فيلم الموسم واكتر فيلم استمر عرضه انا مكنتش متوقع ان ده يحصل .

مرقس : بصراحة الفيلم ده رفعنا وخلانا نجوم فوق العالم .

صلاح : اه صحيح ده انا مش ملاحق على الصحافة والاعلام ، بصراحة احساس انك نجم ومشهور احساس حلو خالص .

اكرم : بس متنسوش يا جماعة دور الاستاذ هو برضه اللى عمل الفيلم ده وهو اللى كان الاستاذ فى كل حاجة .

عماد : اه صحيح هو اللى جابنا وهو اللى عملنا ومن غيرة مكناش وصلنا للمرحلة ديه .

يوسف : ايوة الواحد من ساعة ما اتعرف على الاستاذ وكل حاجة اتغيرت وهو اللى قدر يكتشف جوانا المواهب وهو كمان اللى عرف يمشينا فى السكة الصح هو فعلا استاذ .

مرقس :على فكره فيه حاجة فى الفيلم ده كانت صح مخرج فنان ومنتج عارف فلوسه رايحة فين وكمان الممثلين كانوا موهوبين .

صلاح : الممثل هو الممثل لازم الممثل يكون فنان وموهوب عشان الفيلم ينجح يعنى احنا يا جماعة اللى عملنا الفيلم اللى فات، يعنى احنا نجوم الفيلم .

يوسف : بس فيه حاجة يا جماعة احنا لازم نكلم فيها الاستاذ .

اكرم : ايه الحاجه ده .

يوسف : يا جماعة الفيلم نجح نجاح كبير صحيح .

صلاح : صح

يوسف : وبالتالى المنتج كسب منه مبالغ محترمة .

عماد : انا سمعت انه كسبان لحد دلوقت اكتر من 10 مليون .

يوسف : واحنا فين بقى من المكسب دة ؟

مرقس : تقصد ايه يعنى ؟

يوسف : يعنى زى ما قال صلاح احنا طرف اساسى فى نجاح الفيلم مع ذلك احنا اجرنا قليل قوى بالنسبة للمكسب اللى حققه الفيلم صح ! .

اكرم : صح .

يوسف : يبقى لازم نتكلم فى موضوع الفلوس ده يعنى لازم فلوسنا تزيد ولا لا .

المجموعة : مظبوط طبعاً .

المنتج : مساء الخير يا جماعة .

المجموعة : مساء الخير خى غسان اخبارك ايه؟

المنتج : انا بخير وبصراحة تمام التمام .

اكرم : ياترى ايه الخير اللى جمعتنا عشانه ؟

المنتج : انا والله ما اعرف ده استاذنا ادريس هو اللى عارف كل حاجه

يوسف : يعنى انت مش عارف ؟

المنتج : لا بس كان الموضوع كان فى حكايه فيلم جديد راح يعمله الاستاذ

عماد : فيلم جديد كويس خالص ياترى عن ايه

المنتج : ما بعرف خى عماد

يدخل المخرج : مساء الخير يا جماعة .

المجموعة : مساء الخير يا استاذ .

مرقس : ازيك يا استاذنا

المخرج : الحمد لله

مرقس : اله قولنا هو ايه اخر اخبار فيلمنا الجديد

المخرج : انتوا عرفتوا منين ( يبص للمنتج )

المنتج : انا والله ما خبرتهم بشى

المخرج : انا عارف على العموم هو فكرة هنحاول ننفذه

يوسف : يا جماعة لازم نخلص موضوع الفيلم القديم

المخرج : موضوع ايه

يوسف : لا ابداً هو مش مهم ولا حاجة بس انت عارف يا استاذ ان الفيلم نجح نجاح كبير خالص

المخرج : صح

صلاح : وكمان الفيلم حقق مكاسب كبيرة خالص

المخرج : يعنى كلامك مظبوط

المنتج : لا والله ده اشاعات مغرضة

يوسف : لا ده مش اشاعات

المخرج : هاتوا من الاخر عايزين تقولوا ايه

عماد : يعنى هو يوسف عايز يقول احنا اجرنا كان ضعيف مع ان الفيلم كسب كتير يعنى لو تسمح تعوض الاجر الضعيف ده

المخرج : مكافأة يعنى على نجاح الفيلم

المنتج : مكافأة ليش نحنا ما عندنا مكافأة ها ده الفيلم ما عمل حق التكلفة بتاعته او نحنا والله خسرنا ما ربحنا فيه الكتير

يوسف : لا الفيلم كسب كتير وكتير خالص كمان

المنتج : هادى والله اشاعات مو حقيقة

المخرج : خلاص يا جماعة يبقى انتم عاوزين مكافأة من نجاح الفيلم صح ؟!

المجموعة : صح

المخرج : والاخ غسان رافض صح ؟

المنتج : صحيح ها ده والله ما بخل لكن ..........

المخرج : خلاص انا فاهم كل حاجة خلاص يا جماعة احنا نقسم البلد نصين

اكرم : انا شخصياً انا واقف على الحياد فى الموضوع دة ، بس يا استاذ تقصد اية ؟

المخرج : اقصد يعنى ان الفيلم القديم راح لحالة بمكسبه وخسارتة وكل حاجة

المنتج : ها ده هو الكلام يا سلام عليك خى ادريس استاذ

المخرج : بس فى فيلمنا الجديد انا قررت ان اجركم يزيد عشان يعوض الفيلم القديم

المنتج : لا مش كده ما انت كنت ماشى كويس

المخرج : غسان الفيلم الجديد هتكسب منه اكتر بكتير من الفيلم القديم يعنى فرق الاجور مش هتحس بية لان مكسبك هيكون عالى قوى

المنتج : صحيح ها ده الكلام !

المخرج : اسمع خى غسان طول ما انت معايا دايماً كسبان خلاص خى غسان

المنتج : خلاص يا استاذ

المخرج : خلاص يا جماعة

المجموعة : خلاص يا استاذ

المخرج :بما اننا خلصنا من الموضوع الفاضى ده نبدأ نتكلم فى الكلام المهم فى فيلمنا الجديد انتوا مش عاوزين تعرفوا ايه هو الفيلم ده ؟

المجموعة : اكيد

المخرج : فيلمنا الجديد هيكون فيلم التاريخ والشهرة لينا كلنا الفيلم اللى هيحفر اسمنا فى تاريخ السينما فيلم هنبدأ بيه اول طريق وصولكم للعالمية والشهرة والمجد

المنتج : اه يا استاذ شوقتنا لهاده الفيلم خبرنا ايش يكون هاده الفيلم ؟

المخرج : هنعمل فيلم المسيح

المجموعة : اه

المخرج :مالكم بقول هنعمل فيلم المسيح

اكرم : فيلم المسيح بس ده موضوع صعب قوى يا استاذ

المخرج : صعب ليه هو احنا اول ناس تعمله

المنتج : وكمان راح يصرف مسارى كتير خى ادريس

المخرج :بس برضه راح يكسب فلوس اكتر

( يرن التليفون )

المخرج : ده تليفونى انا عن اذنكم الو ايوه

يوسف:فيلم المسيح ياسلام هو ده الكلام .

عماد:والله هى فكرة على قد ماهى صعبة بس بصراحة تستاهل المغامرة

مرقس:ايوه هو ده الفيلم اللى الواحد يتمناه من زمان تصوروا كده ياجماعة لما ينزل الفيلم ومكتوب فى الاعلان فيلم المسيح بطولة مرقص فى دور المسيح ياسلام هى دى الادوار.

صلاح:ياسلام اشمعنا انت بقى اللى تعمله وليه مايكونش انا اللى اعمله

عماد:اشمعنا انت ولا هو ليه ما يكونش انا مثلا

اكرم:يعني ايه كلكم تنفعوا وانا لا انا اللي هاعمل الدور ده

يوسف:كل واحد فيكم بيتكلم علي انه الممثل الوحيد اللى هناو ليه انا ماعملش الدور ده

صلاح:مفيش حد فيكم ينفع انا بس اللى اعرف اعمله لانى انا الوحيد المؤهل انى اعمل دور بطولة مطلقة

مرقس:والله انت مغرور وطالع فيها فوق كده على ايه

صلاح:انت بتشتمنى يامرقص اتكلم كويس احسن

مرقس:احسن ايه يعنى

( وتبدأ المشاجرة ويدخل المنتج )

المنتج:ياجماعه مالكوم انتوا والله اخوه كلكم وده عيب والله عيب نحنا عمرنا ماسمعنا ان الممثل راح يختار دوره امال الاستاذ شو بيعمل هو استاذنا كلنا وهو اللى راح يحدد مين راح يعمل الدور

المخرج:(يدخل ) ايه ياجماعة فيه ايه ؟

المنتج:والله ما فيه شئ يااستاذنا

المخرج:امال الزيطة دى كانت منين

المنتج:اصل شبابنا دول كانوا فرحانين شويه

مرقس:الا قلنا ياستاذ ادوار الفيلم هتكون ازاى ؟

صلاح : يعنى مين هيعمل دور المسيح انا مش كده !

مرقس : برضه هيقلنا هوه وليه مش انا يعنى ولا هيتقنعر على الفاضى

صلاح :انت هتلخبط تانى يا مرقس ما تحترم نفسك

مرقس : وان محترمتش نفسى هتعمل ايه يعنى؟

وتبدأ المشاجرة ويدخل المنتج

المنتج : اهدوا اهدوا هاده والله عيب احترموا كون استاذنا موجود

المخرج : ايه الى انتوا بتعملوه ده ؟ ده اسمه عدم احترام

المنتج : هيا يا شباب اعتذروا لاستاذانا عن ها ده الغلط اللى سوتوه هيا هيا

صلاح ومرقس : احنا اسفين يا استاذنا

المخرج : خلاص حصل خير

المنتج :انت والله يا استاذ انت صاحب قلب صافى وكبير وهالحين ايش الادوار وكيف راح توزعها ؟

المخرج : الادوار انتم عارفين ان الفيلم ده كبير والادوار فيه كتير وكل دور هيكون ليه وزنه فى الفيلم ده وحتى الكومبارس هيكونوا ظاهرين فيه

المنتج : كلام سليم خى ادريس

المخرج : بما ان احنا اشتغلنا مع بعض قبل كده انا شفت ان الادوار هتتوزع كالاتى :

انت يا اكرم هتعمل دور بيلاطس وانت خى غسان

المنتج : انا شو انا راح امثل

المخرج : ايوه انت راح تمثل

المنتج : لك شو ها الدور اللى راح امثله ؟

المخرج :هتعمل دور قيافة رئيس الكهنة

المنتج : رئيس كهنة ها ده والله كان بيربح فلوس كتير فى ايامه ها مظبوط ؟

المخرج : ايوة مظبوط

المنتج : خلاص راح امثل دور رئيس الكهنة قيا.......فا لك والله قلت شو اسمه خى ادريس ؟

المخرج : قيافة

المنتج : قيافة رئيس والله دور محترم وكبير

المخرج : اما انت يا يوسف هتعمل دور يهوذا اما مرقس هيعمل دور الجندى اللى صلب المسيح اما صلاح وعماد هيعملوا دور الجنود اللى جلدوا المسيح

صلاح : جلدوا المسيح امال مين اللى هيعمل دور المسيح

عماد : ايوة يا استاذ مين اللى هيعمله ؟

المخرج : لازم اللى هيعمل الدور ده وش جديد الناس مش عارفاه

مرقس : يعنى ايه يعنى معنى كده هييجى واحد غريب يعمل الدور ده ؟ طب ازاى ؟

يوسف : ايوة يا استاذ احنا ال staff بتاعك واحنا اللى نجحنا الفيلم اللى فات وعلى العموم لو خايف احسن حد فينا يزعل اختار اى واحد فينا وهنرضى بيه

اكرم : ايوة صح انا شخصياً هرضى باى واحد تختاره

عماد : وانا كمان

مرقس وصلاح : واحنا كمان

المخرج :خلاص خلصتوا الكلام بتاعكوا وجه دورى عشان اتكلم انتوا كلكوا متنفعوش لان كلكم وجوه محروقة ولازم يكون واحد جديد

مرقس : يعنى ايه ...... الكلام ده مينفعش احنا منتعبش على الفاضى

صلاح :ايوة صح ده اسمه كلام فاضى

اكرم : احنا لا يمكن نرضى بكده

يوسف : احنا اصحاب النجاح اللى فات ومن غيرنا مكنش ممكن توصل للى انت فيه

مرقس : ده اسمه استهبال

المخرج ): بعصبية) احترموا نفسكم ولازم تعرفوا انتوا بتكلموا مين نجاح ايه اللى انتوا حققتوه انتوا نسيتوا نفسكوا ولا ايه ده انا اللى عملت كل النجاح وانا اللى عملتكوا ومين غيرى مكنتوش وصلتوا للى انتوا فيه دلوقتى انا صاحب النجاح ده انا الاستاذ وانا اللى عملتكم انا جبتكم من الزبالة وعملتكم نجوم ودلوقتى جايين تتمنظروا علىّ فوقوا لنفسكم واعرفوا انا مين وانتوا كنتوا ايه

المنتج : اهدا يا استاذ اهدا مش كده

مرقس : احنا ما نقبلش الكلام ده

صلاح : ومش ممكن نسكت

المخرج : يعنى هتعملوا ايه ؟

يوسف :لا احنا ممكن نعمل حاجات كتير

المخرج : انتوا متقدروش تعملوا حاجه

صلاح:خلاص احنا مش هنمثل فى الفيلم ده غير بشروطنا

المخرج:شروط............. انتوا بتفرضوا علىّ شروط ( باستخفاف)

مرقص:خلاص احنا مش هنمثل معاك تانى ده اول واخر فيلم وكل واحد يروح لحاله

المخرج:متقدروش ياسادة يانجوم انتوا نسيتوا العقد اللى مضيتوه لما كنتم لسه جايين وبتحلموا انكم تكونوا ممثلين،نسيتوا وده عقد احتكار يا باشوات يعنى انتوا متقدروش تمثلوا مع حد تانى غيرى

المنتج:اهدوأ ياجماعة لا والله الامور ما تتسوى هيك اهدأ خى ادريس

المخرج:( بهدوء) شوفوا ياجماعة انا اول ماشفتكم انا حسيت ان جواكم موهبة حقيقية وده شئ انا مش ممكن انكره بس ماينفعش تكون موهوب ويدخل الغرور جواك انا مش فاهم من امتى الممثل بيختار يعمل ايه ومايعملش ايه وان كنتوا بتعملوا كده وانتوا لسه على اول الطريق امال بعد كده هتعملوا ايه

اكرم:خلاص خلاص ياستاذ انت معاك حق احنا غلطانين

المخرج:دلوقتى عايزكم تفكروا كويس وعليكم تختاروا بانكم تفضلوا نجوم ونجمكم يعلى على طول او انكم تخسروا كل حاجه انتم معايا اكيد هتكونوا كسبانين لكن لو اخترتم غير كده اكيد برضه انتوا اللى هتخسروا

المنتج:خى ادريس انت صاحب قلب كبير وانتم شباب ليش راح تختاروا الخسارة هاده والله استاذكم ليش راح تنسوا هيك

اكرم:خلاص ياشباب خلاص انتوا نسيتوا ده الاستاذ برضه

يوسف:خلاص يااستاذ ادريس احنا متأسفين على اللى حصل

مرقص:انا اسف دى كانت ساعة نرفزه

عماد:انا اسف يا استاذ

صلاح:وانا كمان بعتذر

المخرج :خلاص ياجماعة احنا اتفقنا نكون مجموعة واحدة وانا كمان بعتذر على اللى حصل منى بس كل المطلوب منكم انكم تسبونى انا اللى امشى حياتكم واوعدكم انى هاخليكم اشهر نجوم العالم كله

المنتج : خلاص يا شباب صافية لبن

المخرج : خلاص احنا خلصنا الموضوع ده

المنتج : لكن خى ادريس انت ما قلتلناش ايش راح تسوى فى موضوع دور المسيح مين راح يأديه

المخرج : انا قلت انه وش جديد اللى هيعمله

المنتج : هيك انت عارفه

المخرج: لا لسه شوفوا احنا هنعمل اعلان عن الدورين فى الجرايد واكيد فيه ناس هتيجى عشان تعمله

المنتج : ها دى والله فكرة سديدة خى ادريس لكن شو يكون الدورين ها ما دور واحد ؟

المخرج : لا دورين طبعاً دور المسيح وكمان دور العدرا لان اللى هيعملوا الدورين لازم يكونوا وجوة جديدة

المنتج : العدرا شو رأيك صواب

المخرج : يالا يا جماعة تروحوا دلوقت وانت تعالى معايا يا اخ غسان

المنتج : لك لوين رايحين

المخرج : عشان نلحق نكتب الاعلان ونبعته للصحافة

المنتج : لا مو فهمت

المخرج : طب يالا بسرعة

المنتج : حاضر حاضر سلام يا شباب

المجموعة : سلام

( تقفل ستار )

المشهد الثالث

( صورة للمكتب قاعد عليه المخرج وقدامه المنتج )

المنتج : خى ادريس

المخرج : نعم

المنتج : هيك ما انت شايف ان احنا اديلنا كتير منتظرين الممثل القدير اللى راح يسوى دور المسيح

المخرج : عارف يا سيدى انى احنا اديلنا اكتر من 3 شهور من ساعة الاعلان ما نزل

المنتج : لك شو راح نسوى الان ؟

المخرج :هانستنا

المنتج : لك لحد امتى شو راح ننتظر ؟

المخرج : لحد ما ييجى ، احنا ورانا حاجة زى ما قدرنا نلاقى اللى هتعمل دور العدرا برضة هنلاقى اللى هيعمل دور المسيح

المنتج : اه والله فكرتنى ها دى الاخت اللى راح تعمل دور العدرا رفضت تمضى العقود

المخرج : عارف انها رفضت تمضى العقد وانا كمان حاولت معاها وما رديتش خلاص مش عايزة تمثل تانى بعد الفيلم ده .

( يرن الجرس )

المنتج : راح اشوف مين يمكن يكون المسيح ( يخرج ثم يدخل )

المخرج : مين

المنتج : شاب بره راغب فى انه يشوفك

المخرج : دخله

المنتج : اتفضل خى اتفضل

( يدخل محب وماسك فى ايدة جرنان )

محب : سلام

المخرج : سلام ايوه اى خدمات سيادتك ؟

محب : انا جيت عشان اعلان الدور الموجود هنا

المخرج : دور المسيح !

محب : ايوه

المخرج : انت عايز تلعب الدور ده؟

محب : انا جاى عشان خاطر الدور ده

المخرج : خلاص انت هتعمل الدور ده .......... مبروك

المنتج : لك شو راح يعمله بدون اختبارات او اى شى ؟

المخرج : اسكت انا عارف انا بعمل ايه

المنتج : على راحتك سيدى

المخرج : يالا يا اخ غسان جهز العقود

المنتج : العقود جاهزة من زمن

( ويخرج العقود من المكتب )

المخرج : تمام برافو عليك ( ويعدل الورق على محب ) يالا يا استاذ محب امضى العقود

محب : هو لازم العقود

المخرج : طبعاُ لازم عشان تضمن حقك فى الفيلم

محب : انا مش جاى اعمل الدور ده عشان خاطر الفلوس

المخرج :انا عارف بس برضة على العموم امضى هنا وانا هاوعدك ان انت تكون بطل اعمالى اللى جايه

محب : انا مش همثل بعد الفيلم ده

المخرج :ازاى انت معايا هتوصل الى اعلى مراتب الشهرة والمجد وامضى وانت اكيد اللى كسبان

محب : لا انا اسف مش همضى

المخرج :على العموم زى ما تحب احنا مش عايزين غير راحتك ، يالا عشان تتعرف على باقى staff التمثيل ، روح يا اخ غسان انده عليهم

( يدخل المنتج وتتدخل معه المجموعة )

المخرج : تعالى اعرفك عليهم اكرم .. يوسف ... صلاح ...عماد .... مرقس ....وده يا سيدى منتج الفيلم الاخ غسان وهيكون ممثل معانا وانتم يا جماعة احب اعرفكم على بطل فيلمنا ده محب هو اللى هيعمل دور المسيح اما دى مريم اللى هتعمل دور العدرا ، يالا يا جماعة روحوا اجهزوا عشان هنبدأ تصوير من بكرة وهيبدأ العد التنازلى لاكبر فيلم فى تاريخ السينما ( فيلم المسيح ) اما بكره هنبدأ بمشهد المؤامرة يالا يا جماعة روحوا دلوقتى ونشوفكم بكرة .

مسرحية فيلم المسيح