مسرحية عصافيير القفص

 

مسرحية عصافيير القفص

قصة حياة كل شخص بعيد عن الرب يسوع

الهدف: الجميع أخطأوا ولا يوجد طريق للنجاة غير صليب المسيح

الشخصيات:

1-    الطفل رامي: طفل عادي من أطفال مدارس الأحد لا يعرف معنى العيد ولا الهدف من الصلب والقيامة

2-    الطفلة نانسي: طفلة من أطفال مدارس الأحد تقابل رامي يوم العيد وتبدأ معه رحلة البحث عن معنى العيد

3-    الطفل حامل القفص: يرمز إلى الشيطان لذا يجب أن تكون ملامحه شرسة يظهر فيها القسوة

4-    الرجل العابر: يرمز إلى المسيح لذا يجب أن تكون ملامحه تظهر عليها الشفقة والرحمة

5-    الشيطان: شاب من شباب ثانوي أو جامعة

6-    أثنين من أطفال مدارس الأحد: يرمزوا لكل أنسان تحت سلطان أبليس

7-    أثنين من أطفال مدارس الأحد للقيام بدور الحراس أثناء جلد المسيح

ـــــــــــــــــــــــــــــــــــــــــــــــــــــــــــــــــــــــ

تفتح الستار على الطفل رامي وهو يحاول وضع بعض اصواريخ ويخبأها في الأرض علشان يعمل مقلب في أصحابه يوم العيد ..............

 

رامي:	أما أنا كنت مستني اللحظة دي من زمان. هو دا العيد بجد أنك تعرف تعمل أجدع مقلب في أخيب ناس
نانسي:	تدخل وتلاحظ ما يفعله رامي رامي ......؟! إيه اي أنت بتعمله ده؟ وريني كده عايز تخبي إيه في الأرض؟!
رامي:	مالكيش دعوة يا نانسي أنا أعمل اللي أنا عاوزه ومحدش ليه دعوة بيّ
نانسي:	إيه يا رامي مش إحنا أصحاب؟! يبقى لازم تقولي أنت بتعمل إيه؟
رامي:	مدام مصرة تعرفي .... طيب. (يكلم نفسه .....) مع أني عارفك هتعمليلي 7 رجاله في بعض أنا يا ستي بأعمل مقلب في الواد فلفل وأصحابه ... هأخليلهم هنا شوية صواريخ وأول ما يجوا يقربوا من هنا هأر وح موع في الخيط ده وهتتفرجي على أحلى عرض..... هيبقوا عملين زي الفران اللي بتتنطنط
نانسي:	إيه......؟!  اللي أنت بتقوله ده يا رامي؟!
رامي:	(يكلم الأطفال...)ما أنا قلت هتعملي فيها 7 رجاله
نانسي:	أنا بأكلمك يا رامي ..... اللي أنت بتعمله ده أكبر غلط . ممكن حد فيهم يتعور ... مافكرتش إيه اللي ممكن يحصل لو حد أتعور...؟! هتقول إيه ولا هتعمل إيه لما يعرفوا أنك أنت السبب؟!
رامي:	إيه يا ست نانسي ...... أحنا النهاردة عيد ولا أنت نسيتي عيد عيد يعني ضحك ولعب وشوية فرفشة واللي أنا بأعمله ده هو بعينه شوية الفرفشة اللي في العيد
نانسي:	بقى هو ده معنى العيد عندك يا رامي ؟!
رامي:	هو يعني العيد ليه معنى تاني غير أنه يوم بنفرح فيه وبنلبس جديد في جديد شورت وشوز وفانلة وكاب
نانسي:	لأ طبعاً ....... مش هو ده معنى العيد يا فالح
رامي:	هتبدأ توعظني وتديني محاضرة في الأخلاق (يكلم نفسه) أنا إيه اللي خلاني أقولها ؟! لساني ده الي عاوز قطعه
نانسي:	العيد ده ليه معنى عظيم جداً جداً يا رامي. تعالى لمل نشوف مع بعض قصة صغيرة هتساعدك إنك تفهم معنى الغيد ده. وأنتوا كمان يا أصحابي خلوا بالكم معنا علشان القصة دي هي قصة حياة كل واحد فينا ...............
	تسمع موسيقى تصويرية كأنه دخول شخص عظيم ويسمع من أخر القاعة صوت ضحكة طفل بصوت عالي يدخل الطفل حامل القفص وهو بيتنطنط وبيده القفص به عصفوران صغيران في هذة الأثناء يختفي رامي ونانسي من على المسرح
الطفل:	يا سلام أما أنا واد مافيش زيّ أبداً . (ينظر إلى العصفوران) كنتوا فاكرين نفسكم أنصح مني هاهاها (ويذهب إلى المسرح ويكلم الأطفال..............) مين أشطر مني ؟! حد فيكم يقدر يعمل اللي أنا عملته ؟! بحبة قمح صغيرين وحتة فخ صغير مع شوية نصاحة مني قدرت أخدع العصافيير التافهة دي وأمسكهم.
	في هذة الأثناء يظهر الرجل العابر في أخر القاعة وهو بينده على الطفل................
الرجل العابر:	لو سمحت ياللي بتقول على نفسك أنك أشطر واحد في الدنيا ...... تقدر تقولي ناوي تعمل إيه بالعصافيير الصغيرين دول؟!
الطفل:	هأعمل بيهم إيه ؟! السؤال ده ماسألتوش لنفسي قبل كده ...... لكنم تصدق أنا جت في باتلي حتة فكرة أنما إيه أخر شقاوة .............
الرجل العابر:	ياريت تقولي أنت شوقتني
الطفل:	(في حماس ونبرة فيها قسوة) في الأول هأنتف ريشهم  وبعد كده أربط رجليهم ويبقوا يوروني هيطيروا إزاي أو هيفلتوا من إيدي إزاي ... لأنهم لو حاولوا يطيروا بعد ما قصقصت ريشهم هيلاقوا رجليهم مربوطة .
الرجل العابر:	(بنبرة فيها حزن ) ياه وبعدين
الطفل:	بعد كده هأوريهم معنى الذل بجد ........... هأمسك كل واحد فيهم وأغطسه في الميه لغاية لما أفطسه خالص.
الرجل العابر:	طب ماهو كده هما هيموتوا .....!!
الطفل:	طب ماأنا عارف ... يعني بعد ده كله عايزهم يعيشوا ؟! طب يعيشوا ليه ؟!
الرجل العابر:	طب ليه عايز تعمل كده فيهم مع أنهم عصافيير صغيرين خالص وماعملوش أي حاجة ولا حتى ضيقوك بأي حاجة ؟!
الطفل:	أنا مزاجي كده حد شريكي ... دول بتوعي وأنا حر فيهم .... وبعدين ماهو في منهم كتير فوق الشجر .... يعني هما دول هيفرقوا مع حد ؟!!!!
الرجل العابر:	طب بأقولك إيه ...... إيه رأيك تبيعهم ؟!!!!
الطفل:	(في دهشة من السؤال..) ومين ده اللي مجنون اللي هيفكر يشتريهم ؟!!! دول عصافيير عادين مالهومش أي قيمة !!!!!
الرجل العابر:	مالكش دعوة ...... تبيعهم؟
الطفل:	(يحلى الكلام في عينيه يبدأ يفكر  ......) أبيعهم ....!!! فرصة (ويكلم الأطفال ....) دا شكله راجل واقع قوي أنا هأستغله ..... أنا هأبيعهم بـ 50 جنية .........
الرجل العابر:	وأنا موافق أشتريهم.
الطفل:	إيه الراجل ده ؟!!! وافق على طول حتى مافاصلش معايا في السعر
الرجل العابر:	أتفضل الـ 50 جنية
الطفل:	طب يا سيدي شكراً (ويعطيه القفص ويجري ولكن ينتظر ليراقب ماذا سيفعل الرجل بالعصافيير)
الرجل العابر:	يأخذ القفص ويفتح بابه ويأخذ العصافيير ويدعهم يطيروا ثم يمسك القفص ويكسره
	يظهر الطفل مرة واخرى ويسأل الرجل العابر.......
الطفل:	(في دهشة مما حدث ....) أنت مين أنت مين....؟!!!!!!!
	يتجمد المشهد على هذا الوضع ثم يظهر رامي ونانسي من أخر القاعة ويبدأوا في الحديث حتى يصلوا إلى المسرح ......
رامي:	أنا مش فاهم حاجة ........ إيه اللي حصل ده ؟! الراجل رضي يدفع الثمن دا كله في شوية عصافيير مالهومش قيمة ؟! طب ليه.......؟!!!
نانسي:	ماتستعجلش يا رامي .... الحكاية لسه ليها بقية علشان تفهم اللي حصل لازم نرجع بالزمن لورا قوي لغاية آدم وحواء .... عارفهم يا رامي؟
رامي:	طبعاً .... آدم دنا أول إنسان على الأرض خلقه الله وكان عايش في جنة عدن وحواء دي تبقى مراته كانت عايشه معاه في الجنة
	(هذا الجزء إختياري .... بمعنى يمكن الإستغناء عنه بالحوار الذي يليه
نانسي:	عارف إيه اللي حصل بعد كده ؟! ............... خلينا نشوف (ويعرض جزء من فيلم يسوع للأطفال كما روته مريم المجدلية)
نانسي:	لكن الخطية اللي عملها الإنسان زمان كانت سبب في طرده من الجنة وكان العقاب أن آدم اللي كان بيشوف الله كل يوم ويتكلم معاه يتحرم من دا كله وينفصل عن الله ....
رامي:	بس ربنا أكيد كان بيحب آدم !!!!
نانسي:	علشان كده على مر العصور والأجيال من آدم لغاية ميلاد المسيح كان الله بيعلن خطته للبشرية
رامي:	خطة ....؟! خطة إيه يا نانسي؟
نانسي:	لأن كل إنسان جه بعد كده من نسل آدم كان مولود بالخطية اللي ورثها من آدم فكان الحكم على كل البشر أنهم لازم يموتوا لأن أجرة الخطية هي موت
رامي:	(في دهشة وخوف) وإحنا كمان ......؟!!!
نانسي:	إحنا كمان كان ممكن مصيرنا يبقى كده لولا محبة ربنا لكل البشر. كان لازم المسيح يجي من السما ويتولد في أرضنا ويعلن محبة الله لينا ويرجّع العلاقة اللي أنقطعت من زمان بينا وبين الله المحب . عارف إزاي ......؟!
رامي:	إزاي..............؟!
نانسي:	تعالى مع صحابي نشوف إزاي ...............
	تسمع موسيقى تصويرية كأنه دخول شخص عظيم ويسمع من أخر القاعة صوت ضحكة بصوت عالي هاهاها
إبليس:	( يدخل ومعه طفلين مربوطين بسلاسل ) يالا يالا بسرعة .............. وقعتوا ومحدش سمى عليكم .... دلوقتي بقيتوا ملكي ...... يالا بسرعة (ويجرهم إلى المسرح ويوجهه كلامه للأطفال) وأنتوا كمان الدور عليكم ......... أوعى تفكروا أنكم أنصح مني ....... هتقعوا يعني هتقعوا دا أنا أجدع واحد يعمل أجدع فخ وأبقوا وروني بقى مين فينا أنصح (يوجهه كلامه للطفلين) أما أنتوا يا حبايبي يا حلوين فيا ويلكم مني دا اللي هتشوفوه مني هيشيب ...... هأنسيكم أساميكم ..... لأ لأ لأ دي حاجة بسيطة أنا هأفكرلكم في عذاب محترم. هتعمل إيه يا بيسو ....... ها يا أبو الأباليس ناوي تعمل إيه؟!!
	في هذة الأثناء يظهر شخص المسيح من أخر القاعة مع موسيقى هادئة
المسيح:	بأقولك إيه .......... أسمعني الأول وبعد كده أبقى فكر في اللي أنت ناوي عليه (ويتجه نحو المسرح وأبليس في رعب شديد وخوف)
إبليس:	أيوه أيوه أنا عارفك أنت يسوع الناصري .... أنت عاوز إيه مني؟!!
المسيح:	دول مين اللي أنت رابطهم؟!
إبليس:	دول.... دول كل واحد عرفت أخدعه بالخطية .......... دول بتوعي ملكي
المسيح:	وناوي تعمل فيهم إيه؟!
إبليس:	أعمل إيه؟ هو دا سؤال !!!!! أنا هأوريهم الويل ألوان
المسيح:	إيه رأيك ........... تبيعهم بكام؟!
إبليس:	أبيعهم !! أوعى تقول أنك عايز تشتريهم !!!!!! دول مايساووش حاجة ...... دول عملوا كل حاجة غلط ........ دول لازم يموتوا يموتوا هاهاها
المسيح:	أنا بأقولك تبيعهم بكام؟
أبليس:	أبيعهم بكل نقطة دم من دمك
المسيح:	وأنا موافق أنا هأدفع ثمن حريتهم
أبليس:	(يكلم الطفلين....) ثمنكم مايساويش لكنه موافق يدفع فيكم أغلى ثمن ........... دمه
	يخرج المسيح من المسرح ويسمع صوت موسيقى عالية وأصوات صراخ وبكاء وناس بتقول.......... أصلبه أصلبه دا لازم يموت
	من أخر القاعة يدخل المسيح وهو يحمل الصليب وأبليس والطفلين على المسرح يراقبوا ماذا سيحدث
الحراس:	يلا بسرعة وسع الطريق يلا (ويجلدوا المسيح حتى يصلوا إلى المسرح)
	تغلق الستار ويطفأ النور ويسمع صوتمن خلف الستار ............. وبعد ساعات الظلمة الرهيبة مات المسيح ودفن في القبر لكن ................ بعد 3 أيام  .............. يضاء النور وتفتح الستار
إبليس:	مات المسيح وأنتم برضو بتوعي وملكي. أديني خلصت من المسيح والدور الجاي عليكم
	في هذة اللحظة تسمع صوت ضجة من جانب المسرح ويظهر المسيح في لباس أبيض وآثار المسامير في أيديه ورجليه
إبليس:	(في خوف شديد) لأه لأه دا دا أنت مت في الصليب
المسيح:	لكني قمت من الموت علشان أخلص كل واحد ربطته بسلسلة وضحكت عليه ووقعته في الخطية. قمت من الموت بعد مادفعت ثمن حرية كل واحد من البشر
إبليس:	لأه (ويهرب إلى داخل المسرح)
المسيح:	يذهب إلى الطفلين ويفك قيودهم ويقطّع السلاسل يسجد الطفلين للمسيح ويقف المسيح في الوسط ويفتح ذراعيه لكل الناس ويتجمد المشهد لحظة ثم تغلق الستار وتفتح على مشهد رامي ونانسي
رامي:	ياه كل ده عمله المسيح عشاني وعلشان كل الناس
نانسي:	علشان يبين محبة الله لينا ......... رغم ان أحنا بنغلط بنغلط فيه وبنعمل كل خطية وحاجة وحشة بتزعل ربنا مننا لكنه لسه بيحبنا وبيدور على كل واحد فينا وفاتح أحضانه لكل واحد عايز يتوب ويقبل الرب يسوع في قلبه. كل واحد فينا عامل زي العصفور المحبوس اللي مصيره كان الموت لكن الرب يسوع علشان حبه لكل واحد فينا رضي إنه يدفع الثمن رغم أنه كان غالي قوي لكنه دفعه علشان نعيش أحرار
	ترنيمة: ليه يا يسوع تختار تتصلب علشاني
	تمت

 

 لتنزيل المسرحية للطباعة بصيغة ال word

 أضغط هنا