مسرحية افهمها صح

             مسرحية افهمها صح

 

(منظر لمكان به مهرجان رياضى للشباب)

المنظم : اهلا بكم يا شباب فى مهرجانا السنوى للشباب مهرجان "افهمها صح" ....5 دقائق بالظبط و تبدا اول فقرات المهرجان

مارسيلينو : اوبا اخيرا وصلنا ..نقفشلنا واحدة selfie  كدة بسرعة .. يلا 1 ..2..3 .. بلا واحدة تانية هبل فيس هوب ..

اندرو : ارفعها فى السخان كدة على (انستجرام)

كيرلس : داحنا هناخد ليكات بالهبل

مارسيلينو : instalove . instafriends

اندرو : instacarnaval . instahabal

مارسيلينو : هاا .. حاجة تانية ؟؟

كيرلس : مسرحية insta

مارسيلينو . اندرو : اه صح صح

كامل : اهو جبتك الكرنفال زى ما انت عايز

راجى : و انا هلعب هنا ؟؟

كامل : اه يا حبيبى هتلعب هنا

راجى : و يبقى عندى صحاب كتير ؟؟

كامل : اه .. انشالله هيبقى عندك ضحاب كتير

ثابت : صدقنى حرام يبنى تجيب دا هنا

كامل :حرام ليه ؟؟ هو عايز يجى  و دا هيبسطوا

ثابت : بس هنا مش مكانه.. انت كدة بتظلمه 

كامل : لا انا كدة بفرحه ..مش كدة ؟؟

راجى : اه ... راجى كدة مبسوط

باهر : الو ...أيوة

نادر : ايه يابنى انت فين ؟؟

باهر : انا فى كرنفال افهمها صح

نادر : اه يا ندل و مقولتليش !!

باهر : ما انت اللى كنت .. و انا لما جيت اقولك .. مالقتكش هناك

نادر : ايه !! فين الكلام ده ؟؟

باهر : ما انت اللى ماكنتش ..

نادر : ايوة توه توه ... و اعمل عبيط ماشى

باهر : طب ماتجلنا احنا لسا مابدأناش

نادر : هو انتو فين ؟؟

باهر : فى وادى النطرون

نادر : (لشخص 1 ) ايه رايك عندنا طلعة فى وادى النطرون

شخص 1 : وادى النطرون !! و دى هانروحها ازاى ؟؟ !!

نادر : هى مشكله ؟!! هننزل من على البرتكبل هنا نكون هناك

شخص 1 : لا يا عم دا مشوار طويل

باهر : ها يابنى جى ولا ايه ؟؟

نادر : حاضر مسافة الطريق و جاى

باهر : اوك مستنيك ..باى

نادر : باى

شخص 1 : طب امشى انا يا معلم و خد بالك من الطريق

نادر : هاطبطب عليه حاضر

شخص 1 : ايه !!

نادر :  العب باليه :D  :D ........  يلا باى باى يا كبير

باهر : (للمنظم) لو سمحت هو هنبدأ دلوقتى ؟؟ اصل انا مستنى حد صحبى فى السكة و جاى (يوصل نادر)

المنظم : بتقول حاجة ؟!!

باهر : لا ولا حاجة ... يا ريت نبدأ دلوقتى .. ايه يبنى جيت ازاى ؟؟!!

نادر : دا فرق خطوتين من اول المسرح

باهر : أيه ده بسهولة كده !

نادر : أه ما هو المخرج بتاعنا طيب بقى

المنظم : آسفين يا جماعة نظرا ً لعطل فنى خفيف هنأجل بدء يومنا بس 10 دقائق ، وفى الوقت ده تقدروا تتعرفوا على بعض ، تتصوروا مع بعض ، تتناقشوا أو حتى تختلفوا مع بعض .

كامل : وهى دى مشكلتنا ، دائما ً الأختلاف عندنا بيساوى خناق ولا انت أيه رأيك ؟ صباح الخير أنت أسمك أيه !! أنا كامل والمنظم قال نتعرف على بعض وكده ، أنت أيه ؟؟

مينا : أنا الصرخة المكبوتة الصبح بدرى ، أنا الصوت العالى الواطى ، أنا أخس يوماتى من غير ما أجرى ، وأنا المظلوم وأنا القاضى ، محسوبك مينا شاعر مبتدئ .

أندرو : مينا وشاعر ، يبقى أكيد مينا مجدى ، ههههههه .

مينا : لأ ، مينا مجاهد من سمالوط .

كامل : خلاص خلاص ده بيهزر معاك .

أندرو : يا معلم مراد يامعلم مراد .

مرسلينو : كام مرة أقولك ماتقولش مراد دى أسم قديم قوى ، أسمى مارسلينو ده أسم يشد البنات وده أسم جديد ، فهمت مرسلينو .

أندرو : يامعلم مرسلينو طب أيه النظام طيب ، مافيش بنات خالص .

مارسلينو : بس أخرس أخرس هاتفضحنا ، بس عندك حق ، شكلها ناشفة قوى ، ياخسارة النضارة ، ماهو أنا جاى أفرجك أنت  على التيشرت الجديد .

مساعد 1 : متأكد ياض أنك فصلت الكهرباء العمومية .

مساعد 2 : عيب عليك يا أسطى ، هو أنا تلميذ .

مساعد 1 : وأنت عرفت منين أن دى أسلاك الكهرباء .

مساعد 2 : عملت بنصيحتك يا كبير ، مش أنت قلت لى تمسك السلك وتوصل فيه لمبة ولو نورت يبقى ده سلك كهرباء .

مساعد 1 : طب عرفت أزاى إذا كنت ماأدتكش لمبة .

مساعد 2 : مش محتاجة يا كبير ، ما أنا أول ما مسكتها نورت أنا عرفت على طول أن دى كهرباء .

مساعد 1 : فالح يا أخويا ، قدامى نقول للمعلم .

صوت خارجى : نعتذر عن البدء لوجود قطع فى التيار الكهربى ، وجارى فحص المشكلة .

أندرو : طب أنت معلش أبن كاهن وأرثوذكسى صميم ، أيه اللى جابك هنا .

ثابت : أنا فعلا ً أرثوذكسى بحت وكمان أبن كاهن بس أنا جاى علشان أرصد ، أعرف بيخطفوا أولادنا مننا أزاى .

أندرو : حيلك حيلك ايه بيخطفوا دى !! هو أحنا متكلبشين ولا متسلسلين ماحنا جايين بأرادتنا أهو .

ثابت : أنت مثلا ً جاى هنا ليه .

أندرو : أنا أنا أندرو رونالدو أحسن لاعب كورة على مستوى المنطقة وجيت علشان قالولى ها ألاقى هنا ملاعب كورة كبيرة وكده .

ثابت : بس كده ؟

أندرو : الحقيقة لأ ، يمكن جيت علشان ده المجتمع الوحيد اللى قبلنى ، اللى قال أنت تستاهل تكون مميز ، أنا أول ما أروح ألاقى أبويا ........

الأب : أهلا ً بالفاشل العظيم ، كنت فين حضرتك .

أندرو : كنت بألعب كورة يابابا .

الاب : كورة تانى ! يا أبنى أنت مش هتلفت لدراستك يا أبنى وتذاكر .

أندرو : ما أنا بذاكر يابابا ، وبعدين أنا قلتلك أنى بحب الكورة جدا ً .

الأب : طب يللا خللى الكورة تنفعك يا فاشل .

أندرو : أسيب البيت وأروح الكنيسة ألاقى الخادم بيقولى . ....

الخادم : أحنا غير مستحقين بركة ربنا علشان أحنا خطاة ، أندم وأبكى على خطيتك لأنى لا أستحق أن أدعى لك أبنا ً .

أندرو : حتى لما أروح المدرسة لازم نكون الفصل الفاشل والفصل التانى أشطر مننا .

أندرو : الطبيعى أنى أول مألاقى حد يقبلنى ويقولى أنت مميز أروح له ، عارف العيب فى أيه ؟ العيب فى فرق الثقافة بين ثقافة مبنية على التركيز على دموع الخطية ، وثقافة مبنية على التركيز على فرح النعمة ، بين حد بيحسسك على طول أنك غلطان وخاطى وحد بيحسسك برحمة ربنا .

ثابت : يعنى هما مش بيغروك بالرحلات وبالهدايا .

أندرو : عمر ما الحاجات دية بيكون لها تأثير دايم ، بيروح تأثيرها بمجرد ما تخلص ، العيب هنا مش هنا ( بيشاور على العقل والجيب ) .

ثابت : بس برضه مكتوب كل الأشياء تحل لى ّ ، لكن ليست كل الأشياء توافق .

أندرو : ودى مشكلة ثانية ، مين بأيديه يحدد الأشياء اللى توافق واللى ماتوافقش غير ربنا ؟ ربنا أدانى الأرادة الكاملة أنى أعمل اللى أنا عايزه ، ماتحاولش بقى معايا (fede out)   .

راجى : كامل كامل أنا عطشان .

كامل : طيب هى راحت فين القزازة ، آه أستنى أهى أشرب .

نادر : بس ياه ، أنت قد كده بتحب أخوك .

راجى : اه ، كامل بيحب راجى ، وراجى بيحب كامل .

كامل : بس تعالى قولى هنا ، أنت أيه اللى جابك بالسرعة دى ؟

نادر : أنت عارف أنى على طول هربان ، على طول بره البيت ، أنا مش فارقة معايا ها أروح فين ولا أعمل أيه ، فأى مكان بيكون واحد بالنسبة لى ، المهم مايكونش فى البيت .

كامل : ياه للدرجة دى ما بتحبش البيت .

نادر : بيتنا يا كامل عامل زى المولد ، كله بيعلى صوته علشان يفرض شخصيته أكتر ، كأنه مزاد ، أبويا بيزعق لأمى وأمى بتزعق لأخويا الكبير و ............... و ...........

كامل : وأخوك الكبير يزعقلك .

نادر : بالظبط ، فأنا أجرى أهرب على فين مش مهم يمكن فى مرة ألاقى حضن مفتوح ، عقلى يستوعب ولسان يتفاهم ، علشان كده على طول تلاقينى سريع ، تعرف أنا بأحسدكم على الحب اللى أنتوا فيه ده .

مينا : فالحب وأن كان المراد .

مراد : نعم .

باهر : مش أنت يا سيدى .

مراد : أنا مارسلينو مش مراد ، مارسلينو مش مراد .

مينا : فالحب وإن كان المراد ..... يشفى ويعطى بالعبيط وبسخاء .

           والحب إن كان أحتياج ...... مايكونش أصعب منه داء . وعجبى .

باهر: مفكرتش يا مينا تدخل الكرازة بالشعر اللى بتكتبه دا .

مينا : علمك يا أستاذ ، أنا كنت باكتب شعر أحسن من كده بمليون مرة .

باهر : كنت !! طب وأيه اللى حصل ؟

مينا : ماحصلش حاجةى ما تفكرنيش بقى .

باهر : يا سيدى قول وأحكى .. أدى الدنيا واقفة ومش عارفين هيحيبوا الكهرباء أمتى .

مينا : من أكتر من سنة تقريبا ً ، حبيت الشعر وطرقه ، والقوة اللى فيه .. والصرخة اللى دايما ً بتطلع من بين سطوره تدور على الحق . وأول ما أبتديت أقول وأصرخ .. أصحابى قالوا لى يا أبنى أنت هتضيع نفسك وتحكم على شعرك بالدفن .

مينا : ليه !! مش دى الحقيقة !!

صاحب 1 : حقيقة آه ، بس مش كل ينفع تكتشف بالقوة دى ؟

مينا : لأ أول طريق للعلاج أنك تعرف وتقتنع أنك عيان .

صاحب 2 : معلش ، بس فيه أمراض بنتكسف نواجهها .

مينا : ماهمنيش ، وحاولت أكتب تانى ، وكل شوية الببان تتقفل فى وشى ، باب ورا باب ، يا أبنى أنت أتجننت ، أنت عايز تعرض الكلام ده للناس ، كلامك حلو قوى وصح مش هنقول لأ ، بس ما ينفعش يطلع ، أخاف لا تكون سبب عثرة للناس ، وكل شوية بأضعف أكتر وأكتر ، ما أستسلمتش وقلت ها أكتب حاجات تعجب الناس ، أنا مالى ومال الحل والمشاكل .

باهر : غلط ، كان لازم تكمل ، دى رسالتك أنك تكون صوت لناس أتعودت وتقول حاضر .

مينا : وهما ما يعملوش كده ليه !!

باهر : يمكن مش عارفين ، يمكن مش قادرين وخايفين .

مينا : أيوه ، هو الخوف .

باهر : أنت ما تعرفش ظروف حد .. ما تحكمش ... أعذرهم .

مينا : دا هروب .

باهر : ما أنت كمان هربت .

مينا : علشان تعبت .. تعبت .

مساعد 1 : يا أبنى أنا تعبت .. تعبت .. أقولك تجبلى رصاص علشان المسدس ، تروح تجيبلى علبة سنون 5 مللى .

مساعد 2 : ما هو الراجل هو اللى غبى .

مساعد 1 : شوف أزاى !!

مساعد 2 : ماهو أنا ها أفهمك .. أنا روحت قولتله عايز رصاص .. راج جايبلى أقلام من أم أستيكة فوق دى ..

مساعد 1 : أقلام .. ها أرفع الناس بــأقلام .. ليه هقتل الجهل الجهل اللى فيهم .

مساعد 2 ما أنا طبعا ً قولتله لأ .

مساعد 1 : جدع .

مساعد 2 : رحت جايب علبة سنون كاملة ... أحنا لسه هنقعد نبرى .

مساعد 1 : يا أبنى هتقتلنى يا أبنى .. هترجعنى أدرس فى الزنزانة تانى بسببك . لأ .. لأ أنا هندهلك المعلم .. يا معلم .. يا معلم .

المعلم : بس ياض وطى صوتك لا تكشفنا معاك .

مساعد 1 : ماهو هيجننى يا معلم .

المعلم : أنا عارفه الواد دا وعارف غبائه .. بس عارف اللى مصبرنى عليه .. أبوه كان أنتيمى .. وبرده مات بسبب غبائه .. وشكلك هتحصله قريب .

مساعد 2 : آمين يارب .

المعلم : تعالوا بقى نراجع على خطة الأقتحام علشان ساعة الصفر قربت .

مساعد 2 : يا معلم .. يا معلم .. عندى سؤال يا معلم .

المعلم : عارف .. أظن عارف تعرف ساعة الصفر دى فين فى الساعة .. صح !!

مساعد 2 : صح .

المعلم : أقتله يا أبنى .

مساعد 1 : حاضر يا معلم .

مارسلينو : أقد أنت حاضر يامعلم .. حاضر يا معلم .. ولا أنت فاهم حاجة .

كيرلس : طب أعمل أيه يا معلم .

مارسلينو : ياض دخلة البنات دى معلمة .. أمال أنا معلم من شوية .. تخوش كدا على البنت .. فى الأول تتنهد .. تمهد .. (يبدأ يكح ) .

ألفت : أيه اللى جى مستشفى الصدر دا .

مارسلينو : ياأبنى أعملى بنت كدا .. علشان أعرف أعاكس .

البنت : أهو .

مارسلينو : مساء الخير . ممكن نتمشى مع بعض شوية .

البنت : نعم !!

مارسلينو : طب ممكن نجرى شوية .

البنت : آه أنت جى تهرج بقى .

مارسلينو : أصل بحب أشوف العينين الحلوين بتضحك .. لو أبتسمت أمسك أيديها على طول .. وأرقص معاها .

كيرلس : فجأة كدا !

مارسلينو : أه فجأة . وماخرجنيش من الموود .

مارسلينو : عارفة أنك أكتر واحدة أرتحتلها .

البنت : أيه ده بالسرعة دى ؟

مارسلينو : طبعا ً .. أصل القلوب ما بتعترفش بالوقت .. مافيهاش ساعات .

البنت : وقولت الكلام دا لكام واحدة غيرى .

مارسلينو : لأ قولت لبنات كتير الحقيقة . بس أول مرة أقوله لأميرة .. ملكة ومن تواضعها ماشية معانا على الأرض .

البنت : يااه تعرف أن كلامك حلو قوى . . حد قالك كدا قبل كدا .

مارسلينو : فى ناس قالتلى كدا كتير .. بس أقولك على حاجة .. عارفة أن أنا رغم أنى بقول الكلام الحلو لكل الناس . بس عمرى ما سمعته من حد . دائما ً بأقوله ما يرجعليش .. أبيع وما أشتريش .. أداوى وماداويش . وأموت أنا كل يوم .. وأساعد غيرى يعيش .

مارسلينو : صحيح بيقوله أن فاقد الشئ لا يعطيه .. بس نسيوا يقولوا أن مفتقد الشئ هو أحسن واحد يعطيه علشان حاسس بقيمته ، عارفة أنا نفسى فى أيه !! نفسى فى حد يسمع .. وما ينصحش .. فى قلب يفهم .. وما ينقدش .. نفسى فى حضن يضم .. ومايرفضش .

كيرلس : أيه دا هو أنا قلت أيه .

باهر : قولت اللى أنت سمعته . أنه مش هينفع كدا ، وأنا شاكك فيكوا بقى .

المنظم : شاكك فينا يعنى أيه ؟ !

باهر : يعنى تفهمنا بقى أيه اللى بيحصل ز

ثابت : أيوه هو أيه اللى بيحصل الظبط ، مابدأناش ليه ؟ !

مينا : أحنا بقالنا أكتر من ساعتين ومافيش حاجة بدأت .

المنظم : أصل ...

نادر : أصل ياه بقى ؟ أحنا هنبدأ أمتى بالظبط .

راجى : أنا عايز ألعب .

باهر : رد علينا ساكت ليه ؟

المنظم : أصل يا جماعة لما لقينا سلك الكهربا العمومى .. لقيناه مقطوع بآلة حادة .. يعنى مقطوع عن عمد .

ثابت : قصدك أيه ؟

المنظم : قصدى أنه فى خطر علينا .. علشان شوفنا برا ناس شكلهم غريب وملثمين وأحنا خايفين على حياة كل واحد فيكوا .

نادر : ودول عايزين أيه مننا ؟

المنظم : أكيد عايزين يسرقونا .

المعلم : دعنى أصححلك المعلومة يا سيدى .. أحنا ضيوف عندكم .

مينا : يعنى أيه ؟ !

المعلم : يعنى أحنا هنفضل معاكم هنا حبة .. وأنتوا هتبقوا رهاين .

المعلم : وهنستأذن أهاليكم كدا فى مبلغ صغير .. مصروف للغلابة دول .

مساعد 2 : أنا عايز شكولاته .

مساعد 1 : وأنا عايز أشترى تكيتات وجلاد شفاف .

كامل : أنت فاكر أننا هنسكتلك (يحاول يضربه .. فيخبط المعلم بالمسدس على رأسه فيغمى عليه ) .

راجى : (يعيط) كامل . كامل أخويا .

المعلم : يس ياض أنت .. شيلوه على جنب ، وأى حد هيحاول يعمل راجل تانى هيموت على طول ، أنا أيدى وجعتنى ومش ها أعرف أخبط حد تانى ، خد ياض أنت .

مارسلينو : أنا !!

المعلم : أيوه أنت ، خد كلم أهلك وقولهم أننا عايزين فدية مليون جنيه ..

مساعد 2 : طب ما ممكن يبلغوا البوليس يا معلم .

المعلم : ياض أنت مابتفهمش ياض ، دى أتعملت مليون مرة فى الأفلام ودايما ً بيقولوا لو بلغت البوليس هموتهم كلهم ، مستنى أيه ماتطلب ياض النمرة .

مارسلينو : ألو ، أيوه يا مامى ، أحنا أتخطفنا ، وعايزين منكوا مليون جنيه فدية ، لأ ما تخافيش ، دا الناس هنا لطاف قوى ، بس هاتوا الفلوس على وادى النطرون هنا ، أيوه ، وماتطلبيش البوليس علشان هيموتونا كلنا ، يلا Take care بقى باى .

راجى : أنا جعان .

مساعد 1 : طب ما تأكل هو أحنا منعناك .

راجى : مش بعرف أكل لوحدى ، كامل كان بيأكلنى .

المعلم : بس ياض أخرس ، كام ساعة وهنسيبكوا خالص .

ثابت : ما تعمل حاجة أنت هتفضل ساكت كدا .

المنظم : أعمل أيه ما أنت شايف .

ثابت : مش أنت اللى المفروض مسئول عننا .

المنظم : أعمل أيه يعنى أضحى بنفسى علشانكوا .

ثابت : مش أنت المفروض خادم بره وبتقول كدا لأولادك .

المنظم : هو أنا علشان خادم لازم أكون مثالى ، بار ، معصوم عن الخطايا ، قوى ، لأ لأ لأ أنت فاهم غلط ، الخادم مهما كان إنسان وبيغلط ، ممكن حتى ما يكونش قادر ينقذ نفسه .

ثابت : أمال أنت خادم أيه بقى !

المنظم : أهى مسئولية بحاول أخدم بيها ، تعرف أنا أول مرة قريت الكتاب المقدس كان علشان أطلع الأخطاء العلمية اللى فيه .

ثابت : أيه !!

المنظم : أيوه ، أيوه ما تستغربش أنا كنت تايه ، شارد ، كنت قربت أوصل للألحاد ، بس قولت أقرأ الكتاب بقى بفهم ، مش علشان أستفيد لأ ، علشان أغلطه وأكون أنا الصح ، ولما حاولت أقرا بفهم بجد ، الكلام شدنى ، كان فيه حاجة بين السطور بتقول أنا أله محبة ، ساعتها رجعت وقولت لازم أخدم وأتوب وأعمل ، بس برضه ليه ضعيف ، مابين نعمة ربنا وحب الخطية ، بأتعب ، بأتوه ، بأتألم ولا أتكلم ، ومايفضلش فيا غير ندم ، مايفضلش فيا غير زعل ( تراك حب زعل ) .

المعلم : أحنا هنفضل مقضينها دعاء الكروان كدا ، خد ياض أنت ، كان بيقولك أيه ؟

مساعد 2 : كان بيسألنى جايب الـ T-shirt  منين ، وعايز يدخل معانا فى العصابة .

كيرلس : أيوه يا معلم بجد وعايز أعرف أشترك العضوية بكام .

المعلم : طب أقعد يلا بعيد يلا ، ما بناخدش عيال .

راجى : هو صحيح هتموتونا لو ما خدتوش فلوس .

مساعد 1 : آه ، المعلم بيقول لو مفيش فلوس هيقتلهم واحد واحد .

راجى : طب كويس .

مساعد 1 : ياه ، كويس أزاى !!

راجى : مش أنت لما تموتنا هنروح على بابا يسوع ، وهنشوفه هو حلو وجميل أد أيه .

المنظم : لأ ، لأ ، أنا مش قادر ، بصل يا معلم .

المعلم : عايز أيه يا ض .

المنظم : بص أنت يهمك الفلوس بس صح .

المعلم : صح .

المنظم : طيب سيبهم هما ، وخدنى أنا بس رهينة وأنا أضمنلك أن فلوسك هتجيلك ، ولو ماجتش موتنى .

المعلم : طب سيبنى أفكر .

كامل : هو أيه اللى حصل .

نادر : أنت كويس بس أهم حاجة .

كامل : أيوه يا سيدى أيه اللى حصل .

نادر : الأستاذ اللى منظم الكرنفال عرض عليه أنه هياخده هو بس رهينة ويسيبنا أحنا ولو ما جتش الفلوس هيقتله .

كامل : أيه !!

المعلم : طيب بص يا أمور ، أنا موافق ، بس لو ماجتش الفلوس أنا ها أقتلك ، هههه .

المنظم : ماشى .

المعلم : طب يلا ، يلا ، كله يروح ، حتى نبقى خفاف فى الصحرا هنا .

راجى : لأ ، أنا ها أقعد معاك .

كامل : وأنا ها أقعد معاك .

ثابت : وأنا معاك .

نادر : وأنا مواريش حاجة .

مينا : وأنا قاعد .

مارسلينو : وأنا مامى جايا لى ّ على هنا .

كيرلس : وأنا قاعد مش متحرك .

أندرو : أكيد مش همشى لوحدى .

المعلم : أيه دا ، أنتوا بتتحدونى ، طيب أنا هخفف على الصحرا بطريقتى ( أستعراض خناقة أو صراع بينتهى بالمعلم رافع المسدس على المنظم ) .

المعلم : ودعهم .

المنظم : أى ، لأ الخرزة جت جامدة أوى المرة آدى ، دى كانت هتشيلى عينى .

المعلم : معلش ، أندمجت شوية .

الجميع : أيه .

المنظم : وديه كانت الفقرة الرئيسية فى الكرنفال النهارده ، ونسيت أعرفكم ، فادى صاحبى ومنظم الكرنفال معايا هنا .. ودول أعضاء من فرقة التمثيل .

مساعد 1 : والفكرة عرضها علينا أستاذ فادى .. أن الدرس يبقى عملى .. يعنى بدل ما نقعد نرغى فى كلام فى كلام وقصص وتتنسى .. حبينا يكون الموضوع بجد .

مساعد 2 : وبكدا عمركم ما تنسوا .. أنكوا ممكن فى أى وقت تواجهوا الموت .. ياترى أنت مستعد لربنا .

المنظم : وأنا شخصيا ً أتعلمت من واحد هنا .. حسيت قد ايه قلبه كبير ، ولما حس بالموت ماخافش بالعكس حسبها فرصة أنه يقابل ربنا اللى بيحبه .

المعلم : التعلم شيخ له آلاف الأعوام .. عمر ما حد هيبقى أكبر منه .. هنعيش ونموت بنتعلم . . وأنا من متابعتى ومراقبتى ليكم من بره .. عرفت أن مشاكلكوا كلها مش محتاجة نصايح مش محتاجة حلول .. مش محتاجة صح وغلط .. محتاجة بس حد يفهم ويسمع . .

وأنتوا من نفسكوا هتفرقوا بين الغلط والسح .. بس حقكوا أنتوا عيشتوا طول حياتكوا ما بتتكلموش .. فى المدرسة بتسمع .. ولادكوا محتاجين يتسمعوا بس .. هما لوحدهم هيختاروا الصح .. ويفهموها صح .

(النــــــــــــــــهايـــــــــــــــــــــة)

 لتنزيل المسرحية للطباعة بصيغة ال word

 أضغط هنا