مسرحية اللعب عالمكشوف

 


أمراه : اة يا غالى
أمراة : يالهوتى (مع بعض العبارات الاخرى)
ثابت : كفاية ياما متعمليش فى نفسك كدة
سخية : أة يا ثابت يابنى.......أأة
ثابت : ياما حرام اللى بتعملية دة
سخية : أة يانى .....فرحان مات يا ثابت......فرحان مات
ثابت : ياما خلاص بقى أرحمى نفسك شوية
سخية : أرحم نفسى أذاى فرحان مات يا ثابت فرحان مات
ثابت : ياما حرام عليكى أرحمينا و ارحمى نفسك ......فرحان مامتش ياما
سخية : مامتش أذاى.....مامتش أذاى وانا شيفاه جوا الصندوق اللى عملهوله سيد الحنوتى بنفسة
ثابت : يا ما صندوق ايه بس
سخية : البيت اللي قاعد فيه اخوك عرفت ايه هو الصندوق
ثابت : ياما فرحان هيتجوز بكرة مش هيموت
سخية : جواز الشوم والندامة......دموتة عندى ارحم
ثابت : ياما لية بتفولى علية بس
سخية : ماهو كدة كدة هيموت يابنى
ثابت : ياما اللى حصل حصل خلاص
سخية : قوللى يا ثابت يابنى مشفتهوش النهردة
ثابت : شوفتة ياما
سخية : كلمتة
ثابت : لا ياما شافنى من بعيد و مشى
سخية : شوفت يأبنى أتغير أذاى ولسة بكرة......بكرة هيموت يا ثابت.......بكرة هيموت فرحان
ثابت : ياما معلش كان مشغول فى أمور الفرح
سخية : فرح ! فرح اية .....ما أحنا طول عمرنا عايشين فى فرح هو انا كنت بنكدعليكم
ثابت : ياما
سخية : أية مش لاقى حجة تدافع بيها عنة
ثابت : ياما أنا مش بدافع0 بس...
سخية : بس أية يابنى .... عاوزنى اسكت متكلمش ......ماشى يابنى هسكت مش هفتح بقى اهوة
ثابت : ياما أفهمى هو مسيرة يعرف ان الجوازة دى مش لية من الاول وبعدين هيرجع مش هايرجع
عارف أنه مش هيرجع بس بادينا ايه نعمله….طب قوليلى أعمل أيه…..ياما حرام عليكى
متعزبينيش بسكاتك ده ….طب ردى اوة ياما
مطاوع : أيه يابنى صوتك جايب اخر البلد...... اخ يابنى فاتك نص عمرك ......فرحان ده وقع واقف
بصحيح ....ولا الدبايح اللى اندبحت ولا العوالم اللى جت تحيى الفرح ......أيه مالك.....اما..
مالك ياما...مالها امك يا ثابت
ثابت : مش عارف ياسى مطاوع
مطاوع : عارف ايه
ثابت : مش عارف امك زعلانه ليه
مطاوع : ليه ياعنى علشان الفرح......ياما انتى بدل متفرحى دا إحنا هناسب اكبر راس فى البلد
سخيه : سيد الحنوتى يا مطاوع
مطاوع : ماله سيد الحنوتى ياما ....ماهو سيد البلد كلها وكل البلد بتعمله الف حساب الكبير قبل الصغير ...دا
كفايه انه صاحب معظم اراضى البلد دا ان مكنش كلها يبقى نزعل ليه
سخيه : ونسيت اللى عمله مع ابوك واخوك الكبير
مطاوع : ياما عفا الله عما سلف.....والراجل قال نفتح صفحه جديده....... واهو مد ايدة وسبق بالخير
سخيه : خير خير ايه هو دة بيجى من وراه خير بالايد اللى بيمد بيها الخير ......الايد التانيه بيطعنك فى
ضهرك
مطاوع : ياما حرام عليكى كفايا اشعات بقى
سخيه : اشاعات ايه ......اصلك متعرفش اللى عمله مع ابوك واخوك
مطاوع : عارف وقولتيلى ميت مره
سخيه : اصلك مشفتش.....ولا كنت توعى للى حصل
ثابت : انا فاكر اللى حصل كانه امبارح بالضبط.....كنت لسه صغير بالعب مع العيال فى الحاره واخويا
الكبير كان بيتمشى مع خطيبته فى الحديقه بتاع البيت
سخيه : لكن سيد اللى طول عمره نفسه يحط ايده على البيت من زمان دبر خطه لئيمه
ثابت : بعت هديه لايفا خطيبه اخويا واخدتها وهى مش عارفه فى الهديه ايه.....فتحتها
سخيه : كانت علبة شيكولاته .....فتحتها واكلتها وأدت وحيد علشان ياكل ....أكل
ثابت : وتو ماأكل العرق ملى جسمه......ومغص شديد فى بطنه
سخيه : و وشه ابتدا يزرق وبدأ يصرخ
ثابت : جريت عليه ....ميلت عليه وبكيت
سخيه : طلعت من جوه أبص عليه لقيته مرمى ....أترمى بين أحضانى بيصرخ ويتلوى من الالم.....
جريت وقلت الحقنى يا صادق جانى صادق وفى غمضه عين طلع بيه على المستوصف ...
حاولوا يسعفوة حاولو ينقذوة
ثابت : لكن مفيش فايدة ...... مفيش فى ايد الاطبا والحكما فايدة ....كل المحاولات فشلت.....دمه خلاص
اتسمم لازمله دم جديد
سخيه : جريت ادور بين البيوت حد يقدر يتبرع بدمه مفيش
ثابت : لكن كان فى واحد بس يقدر يتبرعله وينقذة.......صادق .....شمر دراعه وبسرعه حط الابرة فى
دراعه وفى الناحيه الثانيه حط الابره فى دراع اخويا
سخيه : الدم كان نازل من صادق نهربيجرى....زى النزيف.....وهو بيتالم
ثابت : واخويا سواد وشه بيروح
سخيه : الدم بينزل منه اكتر
ثابت : واخويا بدا يتنفس
سخيه : صادق بيعانى....... بيصارع..... الدم كتير
ثابت : وحيد فتح عينه
سخيه : صادق خلاص هيموت
ثابت : وحيد بدا يتكلم
سخيه : صادق خلاص مات مات
ثابت : اخويا خلاص نطق واتكلم
سخيه : (صمت)..... تلات ساعات....تلات ساعات قدام سرير ابوك وانا بابكى تلات ساعات وانا فاكرة
انه خلاص مات
ثابت : لكن صادق الصادق اللى عمرة ماخلف وعدة قام تانى
سخيه : قام وشد حيله واخد وحيد وايفا بين احضانة
ثابت : وبعد ساعات اخدهم وسافر
مطاوع : سافر ومش راجع تانى
سخيه : مين اللى قال مش راجع
مطاوع : ماهى باينه اهى ياما اخدهم ومش سال فينا
سخيه : مين اللى قال كده....امال انا هنا على السكه ليه....ابوكم قال جاى وهاخدكم معايا بسرعه فى اى
وقت تبقو جاهزين
مطاوع : طب مش كنا نستنا فى بيتنا بدل مانعيش عمرنا كله على السكه
ثابت : مينفعش هوا قفله بايدة ....لازم نبقى مستنيين.....ممكن يجى فى اى وقت
مطاوع : انت برضه مصدق انتا كمان
ثابت : ابويا عمرة مايكدب
مطاوع : طب اخر ليه دا كله
سخيه : ابوكم بعتلى فى جوابه الاخير وقال.....انا خلاص قربت اخلص بيتنا الجديد ....وهجى علشان
اخدكم
مطاوع : دا كله بيجهز المكان ......المكان دا باين عليه اوهام
سخيه : باين عليك عجباك سكة اخوك يا مطاوع
مطاوع : صدقينى ياما مانا عارف حاسس انى تايه .....جوايا شىء بيقولى ان كلامك صح وان ابويا
جاى لكن فرح فرحان بيأثر فيا...... والحياه اللى عايشها سيد مع بناته حاجه تغرى اى شاب زيى
سخيه : يابنى السعاده اللى انتا شايفها مع سيد سعاده وقتيه مسيرها تروح
مطاوع : ياما حرام عليكى ....عاوزه تحرمينا من العز ليه....شوفى سيد متمتع اذاى شوفى عندهم خدم
وحشم وفلوس كتير تشترى البلد بما فيها
سخيه : تشترى البلد ايوة لكن عمرها متقدر تشترى الناس
مطاوع : ياما كل الناس باعو نفسهم لسيد وبقوا ملكه ورهن اشارته
سخيه : لكن انتو لأ ولاد سخيه بنت شديد لأ ....انا ابويا شديد وانا كمان هفضل شديده ذى الصخر
مطاوع : ياما مسير الصخرة تدوب.....وانا برضه انسان وممكن اضعف فى اى لحظه
سخيه : كل ماتضعف افتكر ابوك اللى جاى .....افتكر قد ايه انا تعبت علشان اكبركم واراعيكم....افتكر
قد ايه لما كان حد منكم بيعوز حاجة كنت بنحت فى الصخر علشان اجيبهالكم.........
مطاوع : عارف ياما.....عارف قد ايه انتى تعبتى لكن فلوس سيد وحياته وبناته واخ من بناته
سخيه : نفسك كمان تتجوز واحدة من بناته انتا كمان
مطاوع : وليه لأ ياما الجواز مش غلط ......امال إحنا اتخلقنا ليه
سخيه : يابنى مش دول .....مش هما دول اللى لينا.......الظلمه عمرها متتجمع مع النور
مطاوع : ياما بس مانى مش ظلمة
سخيه : مانى......... مين مانى دى
ثابت : قصده منال ياما
سخيه : اه....منال بنت سيد هى لفت حواليك أنت كمان
مطاوع : ياما دى منال بتحبك قوى......طب دى عرضت علينا أنها تساعدنا وتبنى لينا بيت بدل ما أحنا
قاعدين هنا على السكه الحر والبرد يلطشوا فينا
سخيه : من يوم ابوكم مسافر وأحنا مالناش بيت ......بيتنا مش هنا بيتنا هناك عند أبوكم
مطاوع : ولما هو كده ليه قاعده فى الخوص
ثابت : مكان نتاوى فيه مش نسكن فيه
مطاوع : يا ثابت خليك محضر خير .......قول كلمه تبنى والاتسكت يا أخى......ياما انت عارفه
(تدخل مانى وتشير له)
ثابت : طب روح ياخويا كلم حبيبت القلب
مطاوع : الله مانى....خير أيه اللى جابك
مانى : ماهنش عليا تقعدوا وحديكم هنا والفرح هناك شغال جبتلكوا حاجه من دبايح الفرح
مطاوع : شايفه ياما علشان اقولك أنك دايما ظلماها...شايفه مانى مهنش عليها اذاى تشوفنا قاعدين
جعانين جابتلنا لحمه وهبر وأكل من بتاع الفرح
سخيه : كتر خيرها ..... فيها الخير
مطاوع : شوفتى يا مانى مش بقولك أمى مش بتكرهكم ذى ما أنتوا فاكرين
ثابت : اللى يتربا فى حضن سخيه عمره ما يعرف يكره يا سى مطاوع
مطاوع : الله يخليك اسكت شويه يا ثابت......بقولك ايه يا ثابت .....ثابت
ثابت : ايه عاوز ايه
مطاوع : كنت عاوزك فى كلمتين .......انا هفضيلك الجو .....واتعشم انك تقنعيها
مانى : سيبها عليا يا مطاوع متخفش دى فى مقام والدتى
سخيه : خير يا بنت سيد ايه اللى جابك
مانى : هو مطاوع مقليكيش ولا
سخيه : قاللى...... بس عاوزه اسمع منك
مانى : ياما سخيه
سخيه : أما
مانى : قصدى ياخالتى سخيه ......ثم بعدين انت بكره ولا بعده هتبقى فى مقام أمى
سخيه : لما يبقى يحصل
مانى : على العموم انتى عارفه قد أيه انا بحب مطاوع وهو كمان بيحبنى
سخيه : هه
مانى : وعارفه قد ايه انا ممكن اعمل كل حاجه فى الدنىا علشان خاطره ......انا ممكن ابنيلك العشه دى
بالطوب بالحجر بالدهب لو حبيتى بس انتى تامرى ....صدقينى يا خاله سخيه انا حبى لمطاوع
حب طاهر ملهوش غرض او مصلحه ...بس كل منايا انك ترضى....... بفلوسى دى ممكن تعملى
اى شي لأولادك تحميهم من البرد اللى بياكل فى جتتهم فى الليل ومن الحر اللى بيدق على
روسهم فى النهار صدقينى انا ممكن اعملك كل حاجه اى حاجه
سخيه : خلاص ....... خلصتى كلامك قولتى اللى انت جايه علشان تقوليه
مانى : انت ليه بتعاملينى كده ....انت ليه كارهانى وكارهه اللى عندى
سخيه : انا معرفش اكره يا بنت سيد ..... لكنى عارفه اسلوبك واسلوب ابوكى كويس ومتفتكريش انك
تقدرى تضحكى عليا ذى ماضحكتى على مطاوع
مانى : عال قوى كده يا سخيه يا بنت شديد .... كده بقى نلعب على المكشوف بص بقى ابنك مطاوع
خلاص بقى ذى الخاتم فى صباعى مبقاش يقدر يستغنى عنى .....فاحسن لك تنسيه ذى منسيتى
اللى قبله
سخيه : عمرى مانسيت حد من ولادى واوعى تفتكرى انت ولا ابوكى انك كده هتنتصروا عليا ....
لا ابدا عمر ده ما ها يحصل
مانى : هنشوف يا سخيه .....واظنك عارفه كويس ان شبكتنا شبكه صياده عمرها ماتطلع فاضيه ابدا
سخيه : وانتو ماتفتكروش انى ها قف ساكته اتفرج عليكم بتجروا اولادى واحد ورا واحد ..... دا انا
اكلكم باسنانى واقطع شبكتكم دى واظنك عارفه كويس انى اقدر اعمل كده هو ابوكى محكا
لكوش قبل كده

اللعب عالمكشوف 2

مانى : بص بقى يا سخيه انا يمكن اكون اكتر واحده متفاهمه فى اخواتى فاحسن لنا نوصل لحل يرضينا
احنا الاتنين
سخيه : مش فاهمه
مانى : افهمك...... ايه رايك لو اجوز مطاوع ويبقى يوم عندى ويوم عندك او ساعه ليا وساعه ليكى
أظن دا حل ميزعلش حد
سخيه : مينفعش يا حبيبتي ميقدرش يحب أتنين يا أما أنا يا أما أنت
مانى : بس فكي كويس بدل ما نخسرة أحنا الأتنين
سخيه : روحي يا بنت سيد دوريلك على حد تاني تضحكي على عقله
مانى : ماهو أنا مش هاقعد أتحنن عليكي ... سواء رضيتي أو لأ مطاوع دا ليا ... وأبويا مش هايسكت
وأنا مش هاسكت
سخيه : مهما عملت أنت وأبوكي مطاوع مسيره يرجعلي يرجع لأمه
مانى : مطاوع راح الفرح خلاص يا سخية .... أنت مش سامعة صوت الفرح أسمعي ..... أهو صوت
الفرح بيعلى .... أسمعي
ــــــــــــــــــــــــــــــــــــــــــــــــــ ــــــــــــــــــــــــــــــــــــــــ
عوض : وسلام كبير قوي لجدعان بلدنا اللي جم يحيونا النهاردة ..... وكمان أحلى سلام للست دنيا بنت
سيد بيه ..سيد بيه يعني الحياه الحلوه الحياه الوحشة لأ الحياة الكتمة لأ حياة الأرصفة لأ
وسمعني أحلى سلام لأحلى كلام هيقوله الريس سلام
سلام : ياللي هويت الدنيا بلاش تغرك الدنيا دي الدنيا زايلة والجمال خداع
عوض : جرا أيه يا عم حسن ملافظك أنت فاكر نفسك فين
سلام : آه صحيح طيب طيب
ياللي أنت قعدت تعد السنين تحتار وتختار من الحلوين
هنيالك بعروستك الليلة وعقبال متجبلنا بنات وبنين هيه
عوض : الله وأحلى سلام للعريس فرحان قمر الزمان سيد العرسان نسيب سيد بيه ... سيد بيه يعني
الفلوس يعني السلطة يعني الحياة الحلوه الحياه الوحشة لأ الحياة الكتمة لأ حياة الأرصفة لأ
عقبال عندكم يا رجالة
عوض : الله يخليك يا سي فرحان وعقبال ما نشوف عيالك أنشاء الله
فرحان : في حياتكم أنشاء الله
سلام : إلا بالحق امال فين سيد بيه
فرحان : هنا جاي حالاً بيخلص مصلحة كدة وجاي ... عن أذنكم لحظة واحدة
سلام : صحيح يا ولاد أمه داعيالة
عوض : داعياله ولا داعيا عليه
سلام : قصدك أيه يا عوض
عوض : قصدي أنه هيحصل اللي قبلة أنت نسيت ولا أيه
سلام : يا أخي المرة دي حاجة تانية المرة دي البنت بتحبه
عوض : بتحبه أمال اللي قبل كدة كان أيه
سلام : يا أخي أنت جاي تنكد علينا قوم كده سمعنا حاجة كدة تروقنا
عوض : وده بتسموه غنا دا غنا النسوان حاجة تانية
سلام : عل رأيك أسمع يا واد
يا حلاوة يا بنت .....يا حلاوة يا بنت
يا فرحه امك يسلم فمك على الشطارة اللى فى دمك........... يا حلاوة يا بنت
فرحة ابوكى واللى بيحبوكى والناس اللى هيناسبوكى .............. يا حلاوة يا بنت


فرحة خالتك ومرات عمك عا العريس اللى بيحبك................ يا حلاوة يا بنت
جمالات : الف مبروك يا حبيبتى وعقبال ماشيل عيالك انشاء الله
بهيجه : الله يخليكى يا خالتى جمالات
انصاف : يارب يعدلهالك انت كمان يا ست دنيا ونشرب شربات فرحك
دنيا : قريب يا ست انصاف
جمالات : باذن الله العريس ده هيطلع غير اللى قبله .......قادر يا كريم
بهيجه : مبلاش السيره دى يا ست جمالات .......انت جايه تباركيلنا ولا تفكرينا
جمالات : يوة هو انا قلت حاجه
دنيا : خلاص يا بهيجه هدى نفسك الست مش قصدها
بهيجه : مش قصدها ايه ......دا قصدها ونص انا عارفه ترميه الكلام ده بتاع النسوان
دنيا : ياست طنشى.......تعالى بقى اقعدى .......دى الليله دى ليلتك يا عروسه .........منورة يا خالتى
جمالات
بهيجه : الا قوليلى .....ايه اخبارك مع اللى مايتسمى
دنيا : زفت ولا عارفه اعمل حاجه
بهيجه : ليه يا بنت
دنيا مش عارفه كل ماجى اقربله يبعد ويطلع يجرى .........بس لو اطوله مره
بهيجه : طب واللى يجبهولك لحد عندك
دنيا : يا ريت بس اذاى
بهيجه : طب بصى هناك كده
مطاوع : ياعم تعالى قرب هما هيعضوك
ثابت : يا مطاوع يا لا نمشي من هنا أنا دمي بيغلي
مطاوع : تعال بس نتفرج أحنا هنخسر حاجة
ثابت : يا سيدي مش عاوز أتفرج
مطاوع : طب خد فكرة عن عدوك
ثابت : مش عاوز اخد فكرة
مطاوع : طب تعال بص على أخوك ... حاول معاه يمكن يرجع
ثابت : أخويا
مطاوع : آه فرحان ..ز مش دا أخوك برضه ... تعال قرب سلم عليه
ثابت : أزيك يا فرحان
فرحان : أهلاً أزيك يا ثابت يا خويا خطوة عزيزة ..... كنت عارف أنكم مش هتسبوني في يوم زي ده
ثابت : أنا جاي هنا أنا ومطاوع وماشيين بسرعة
فرحان : ليه يا ثابت هو أنا مش أخوك مش تفرح لي برضه
بهيجه : بس بس
مطاوع : طب ثواني يا جماعة .... أيه في أيه
دنيا : أمال فين ماني
مطاوع : سبتها مع أمي تلين دماغها شوية
دنيا : وثابت جه معاك على طول
مطاوع : لا .... دا أنا غلبت عقبال ما رضي يجي
بهيجه : طب تقدر تجيبه هنا ويبقالك الحلاوة
مطاوع : بس كدة أنت تأمري
فرحان : ها قولت أيه يا ثابت


ثابت : قولت أيه في أيه ... أنت كمان عاوزني أسيب أمك وأقعد جنبك يا أخي دا حتى يبقى حرام
فرحان : يا ثابت صدقنى امك كبرت والقعدة جنبها ملهاش فايده .......احنا لسا شباب ولو متمتعناش
بشبابنا هنتمتع بيه امتا
ثابت : يا خساره يا فرحان خساره ....بقيت بتتكلم باسلوبهم انت المفروض ميبقاش اسمك على اسم ابوك
انت المفروض تبقى فرحان الحنوتى
سيد : وماله اسم الحنوتى يا ابن ساخيه مش عاجبك ليه
ثابت : اهلا اهلا سيد بيه
فرحان : ثابت ميقصدش يا عمى
سيد : ثابت .......ثابت دا ابننا برضه
ثابت : اخرس اياك تقول كده تانى.....انا ابقى ابنك ليه
فرحان : جرا ايه يا ثابت ايه اللى بتقوله ده
ثابت : ايه انتا بتدافع عنه .......ليك حق مانتا بقيت منهم
فرحان : لا دانتا زوتها قوى"يهم بضربه"
سيد : هدى نفسك يا فرحان .....اخوك ثابت برضه ميقصدش ......وانا فى مقام ابوة
ثابت : اللهم ما طولك يا روح هو فينه مطاوع خلينا نمش من هنا
فرحان : هاروح اجيبهولك خليك تمشى وتريحنى
ثابت : فيك الخير برضه ياسى فرحان
سيد : خليك انت يا فرحان يا ابنى ......اقعد انت مع اخوك ....اروح انا انادمه
ثابت : كده يا فرحان مكنش العشم هى دى الاخوه كنت ها تضربنى علشان اللى ما يتسمى
فرحان : ماهو أنت برضه زوتها يا سي ثابت
ثابت : يا خسارة يا فرحان وانا اللي كنت جاي علشان ترجع معايا
فرحان : أرجع معاك ... أرجع معاك فين للعشة اللي عا الطريق ولا للفقر والغلب
ثابت : ترجع معايا لأمك .. أيه نسيتها
فرحان : لأ طبعاً يا ثابت حد يقدر ينسى امه بس
ثابت : بس أيه
فرحان : بس الحياه الحلوة والعيشة الهنية والفلوس وفوق كل ده انا بحب بهيجة .... قولي أنت شوفتها ولا لأ
سيد : خلاص عرفت هاتعمل أيه يا مطاوع
مطاوع : طبعا يا سيد بيه أحنا نطول نخدمك ...دا أحنا نخدمك بعنينا
سيد : بس خلي بالك أوعى يأثر عليك ويقولك نروح
مطاوع : عيب يا سيد بيه هو أنا أي كلمة توديني ولا تجيبني
سيد : يالا بقى وريني شطارتك في الموضوع ده خلينا نفرح بيك أنت وماني
مطاوع : قريب أنشاء الله
سيد : ها يا ست هانم فاهمة هتعملي أيه المرة دي ولا زي أي مرة
دنيا : يا با
سيد : مش عاوز أعذار المرة دي
بهيجه : يا با دنيا مقصرتش وأهي بتعمل اللي تقدر عليه
سيد : أنت تخرسي أنت كمان أنت بكره عليكي شغل كبير وعاوزك تبقي تمام التمام
بهيجه : يعني أيه يا با
سيد : يعني سبينا دلوقتي لوحدينا .. ولا روحي لعريسك الهيمان
دنيا : أيوه يا با كنت عاوز تقول أيه
سيد : كنت عاوز أقول أن المرة دي غير أي مرة المرة دي هو اللي جالنا لحد عندنا برجليه ومش لازم


نضيع الفرصة دي مننا
دنيا : طب وأنا بأيدي أيه أعمله يا با ومعملتوش
سيد : شيدي حيلك شوية يا ختي ما أهم أخواتك أهم شايفين شغلهم وزيادة حبتين
دنيا : يا با ثابت مش زي مطاوع وفرحان
سيد : عارف وعلشان كده رميتك انت بالذات عليه .......... أنت ..دا أنت خليفتي ... أنت اللي معتمد
عليها علشان نهد بيت سخية
دنيا : طب تفتكر يا با أيه السلاح اللي ميقدرش يقف قدامة
سيد : الpower يا بت السلطة .... السلطة هي اللي تقدر تفسد أعظمها أنسان خوشيلة من ناحية
السلطة و أهو أنتوا أعملوا اللي عليكوا والباقي
دنيا : الباقي عليك طبعاً هاها
سيد : طب يا لا بسرعة علشان دا باينه ماشي
ثابت : قولتلك لأ مش هستنى يا مطاوع
مطاوع : يا راجل طب حتى أستنى لما نشرب الشربات
ثابت : أشربه أنت لو عايز لكن أنا لأ .... أنا ماشي .... جاي معايا ولا هتقعد
مطاوع : هاجي ... هاجي طبعاً أنا أقدر أقول لأ
دنيا : بالسرعة دي يا سي ثابت
ثابت : أهلا دنيا هانم
دنيا : أيه ده دي طريقة تقابلني بيها يا راجل عيب عليك دا أحنا بكرة هنبقى نسايب
مطاوع : لا يا دنيا ثابت ميقصدش ..... دا ثابت أبو المفهومية ... جرا أيه يا عم مش كده عيب عليك
علشان خاطر أخوكفرحان حتى يقولو علينا ايه.....امنا معلمتناش الادب
ثابت : والمطلوب
مطاوع : تقعد تشوف هيا عايزه ايه
ثابت : ماشى بس خليك معايا
مطاوع : انا هو جنبك هو انا هروح فى حته
ثابت : ايوه يا ست دنيا عوزة ايه
دنيا : ايه ست دى
ثابت : امال اقولك ايه
دنيا : قولى دنيا
ثابت : وعاوزة ايه يا دنيا
دنيا : عاوزاك انت
ثابت : مينفعش
دنيا : ليه
ثابت : انت عارفه ليه كويس....ابن سخيه مينفعش يتجوز بنت سيد أنت نسيت اللي عمله أبوكي في
أخويا وفينا
أ دنيا : نسى وتعال نبدأ صفحة جديدة
ثابت : مش لما نقطع القديمة
دنيا : أعتبرنا قطعناها
ثابت : وفرحان
دنيا : ماله ........ ماهو متمتع وأخر تمام
ثابت : سعادة وقتية ومسيرها هتروح ويفتكر أنه كان معانا عايش في سعادة حقيقية
دنيا : ساعتها يبقى يرجع
ثابت : و أنتوا هتسيبوه دا أنتوا هتكلوه أكل
دنيا : طب أيه رأيك في اللي يديلك الحل
ثابت : ودا مين
دنيا : أنا
ثابت : أنت
دنيا : آه .... متستهونش بيا دا أنا دنيا أنا معايا كل السلطة في البلد دي من أصغر واحد لأكبر واحد من
أقل غفير لحد الظابط ذات نفسة
ثابت : وأنا أيه داخلي
دنيا : دخلك كبير .... بالسلطة تقدر تعطل جوازة فرحان من بهيجة تمنعها تمنع الجواز كله لو حبيت ....
تقدر تبعد مطاوع عن ماني
ثابت : مطاوع هو اللي يبعد عن ماني
دنيا : أو تبعد ماني عن مطاوع المهم أن عيلتكم تعيش في أمان
ثابت : ودا كله لوجه الله ... كل ده من غير مقابل
دنيا : ما أنت عارف كويس مفيش حاجة وملهاش تمن
ثابت : وأنا التمن ده ميناسبنيش
دنيا : فكر كويس يا ابن الناس

اللعب عالمكشوف 3

ثابت : أفكر مش محتاجة تفكير يا بنت ال... بنت الحنوتي
دنيا : أوعى تفتكر أني هسيبك لأ يا ثابت بالذوق هتيجي وتركع تحت رجلي .... الفرصة مبتجيش غير
مرة واحدة بس ... وأنت بترفض الفرصة والسلطة اللي أنت رفضتها هي اللي هتجيبك لحد عندي
ثابت : أوعي تفكري أنت كمان أن تهديدك ده هيخوفني لأ ... دا أحنا يا ما أبوكي هددنا لكنه أبداً ما أثر
فينا وكل مرة كنا بنقوم أقوى وأجمد من الأول
دنيا : هنشوف ...أنا وأنت والزمن طويل يا .... يا ثابت
ثابت : الزمن ده هيقضي عليكي أنت و أبوكي لكن ولاد سخية هيفضلوا
مطاوع : أيه يا جماعة صوتكوا عالي كده ليه .... هو في حبيبة يعلوا صوتهم
ثابت : حبيبة ... يالا قدامي على أمك يا أستاذ أنت كمان
مطاوع : في أيه .... أيه اللي حصل .... طب خد فهمني
مانى : أيه اللي حصل
دنيا : أنتي جيتي أمتى
مانى : من شوية
دنيا : وعملتي أيه مع أمه
مانى : ما أنت عارفة سخية.... وأنت
دنيا : ولا حاجة دماغة أنشف من الصخر دا زي ما يكون متحجب
سيد : أصلك هبلة أنت وهي
دنيا : أبا سيد
سيد : بس بلا أبا بلا زفت ....أنتوا عيالي أنتوا .... يا فرحتك يا سخية في ولاد سيد ... يا فرحتك وأبنك
ثابت راجعلك منتصر على سيد وبناته
دنيا : يا با كفاية ومتبوظش علينا الفرح
مانى : آه وكفاية فرحان ومطاوع
سيد : مش كفاية ... دول هبل وعبط سهل يتجروا لكن أنا عاوز ثابت عاوز كبيرهم
دنيا : يا با دا دماغة أنشف من الصخر
سيد : لينينها بأي طريقة
دنيا : مبتلينش
سيد : يبقى أكسريها ... المهم يجي بأي طريقة وينفذ المراد
دنيا : يابا حلمك علينا شوية أنت قاعد تبستف فينا من الصبح أكن أحنا أتغلبنا وأنت ما أتغلبتش قبل كده
مانى : يا دنيا
سيد : أيوه عمري ما حد غلبني
دنيا : تحب أفكرك بالعلقة اللي عطهالك صادق يوم ماضربك بالخشبة
مانى : بالخشبتين
دنيا : آه خشبة واقفة والتانية نايمة عليها
سيد : كان أسوأيوم في حياتي بعد ما حسيت أني أنتصرت عليه هو و أبنه ...مكان الضربة لسه مأثر
في لحد دلوقت لدرجة أني كل ما أشوف خشبة أطلع أجري و أفتكر اللي حصل
دنيا : خلاص يا با اللي حصل حصل خلاص .... المهم دلوقت نشوف هنعمل أيه
سيد : ودلوقتي أسلوبي هيختلف معاكي يا سخية ... المهم دلوقت أندهوللي أختكم بهيجة في مهمة لازم
تنفذها الليلة

مطاوع : بقولك أيه يا ثابت أوعى تقول لأمك على اللي حصل النهاردة في الفرح
مطاوع : بس بس أمك جاية
سخيه : كنتوا فين لحد الوقت
ثابت : كنا
مطاوع : كنا بنتمشى في البلد يا أما
سخيه : وعجبك الفرح يا ثابت
ثابت : لأ يا أما
سخيه : طب روحوا يا أولاد ناموا محناش عارفين بكره مخبيلنا أيه
ثابت : طب وأنتي هتقدعي لوحدك
سخيه : هفضل سهرانة يمكن أبوكوا يجي
مطاوع : طب ما تتصلي بيه يا أما
سخيه : ها تصل .. ها كلمة ... ها أقوله أنت أتأخرت ليه يا صادق تعالى شوف ولادك تعالى دا الحمل
تقل على كتافي تعالى يا صادق ومتتأخرش أنا مش عارفة هاستحمل لحد أمتى
بهيجه : ويا ترى هيرد عليكي
سخيه : أنت مين
بهيجه : أيه مش عارفة مرات أبنك يا سخية
سخيه : أنت أيه اللي جابك هنا
بهيجه : جايه أطمن على حماتي مش برضه واجب
سخيه : خلصي يا بنت سيد وقولي عايزة أيه من غير لف ولا دوران
بهيجه : للدرجة دي مش طايقاني أنا بالذات
سخيه : أنا مش طايقة حد منكم أصلاً
بهيجه : لأ لأ ملكيش حق يا سخية يا ماما سخية دا فرحان جوزي بيقول عنكم كلام غير كده خالص
سخيه : خلصي يا بنت سيد قولي كلمتينك وأمشي
بهيجه : ياه دا أنا يظهر أن كلامي جه على الوجع تمام
سخيه : أنتي أنا عارفاك هو ده أسلوبك تظهري الطيبة قدام فريستك وبعد كدا تدوري على الوش التاني
بهيجه : هه ..حكم .. حكم ... كل كلامك حكم يا سخية لكن يا خسارة ولادك مبقوش يسمعوا كلامك اللي
ماللي كل البلد
سخيه : برضه مقولتيش أنت جاية ليه
بهيجه : مستعجلة قوي يا سخية خلي عندك روح رياضية
سخيه : يظهر أن أنا هسيبك وأمشي
بهيجه : لأ لأ وعلى أيه بصي بقى أنا أبويا بعتني ليكي برسالة
سخيه : خير
بهيجه : خير طبعاً ما أنت عارفة أبويا مش بيجي من وراه غير كل خير
سخيه : أنت هتقوليلي
بهيجه : بصي بقى يا سخية أنت لازم تعرفي مقامك كويس وكفاية بقى لحد كدة ولازم تعرفي كمان أن
أحنا لحد ساكتين
سخيه : ساكتين كل ده وساكتين
بهيجه : كل ده يعتبر لعب عيال بالنسبه للى جاىلكن يوم ما هنينوى هنهد الدنيا عليكى وعلى ولادك
سخيه : صادق مش هيسيبكم تعملوا فينا اى حاجا تاذينا
بهيجه : صادق....... صادق باع لينا البلد بكل ما فيها
سخية : صادق سافر ايوة لكنه صاحبها الاساسى
بهيجه : يبقى يجى ياخذها ساعتها هيلاقيها خرابه وهيلاقى جثث ولادها مرميه فى شوارعها ودمهم
سايل على حيطان البيوت
سخيه : صادق هيجى ياخدنا اما انتو......
بهيجه : احنا احنا عارفين مصيرنا وعلشان كده لازم تحسر قلبك على عيالك
سخية : مهما عملتوا اولاد سخيه لازم يرجعوا
بهيجه : يرجعوا ايه يا سخيه ماخلاص ولادك بقوا فى ايدينا مسجونين مقيدين
سخية : برضوا هيرجعوا
بهيجه : يرجعوا ايه يا سخيه طب بصى هناك اهه جاى مش شايف غير حاجه واحده بس انا وبس
سخيه : انا انا لازم اتصرف مش هاقف ساكته اتفرج عليكوا وانتوا بتاخذوه منى
بهيجه : هه هنشوف يا سخيه ودلوقتى بعد اذنك علشان الذفه متكملش غير بالعروسة والعريس فرحان
ابنك هيطير مش قادر على بعادى روحى يا سخيه روحى يا سخيه روحى استخبى فى عشتك
زى كل مره
سخيه : وبعدين أعمل أيه هسيبة كده خلاص مفيش وقت الزفة داخلة هتعدي من هنا .... أعمل أيه يا
صادق .... كلمني فهمني أعمل أيه ..... مش قادرة أبص في وشة ومش هاين علي أسيبه ....
يا ترى أدخل جوه وأسيبه ولا أستنى هنا .... كلمني يا صادق فهمني أعمل أيه .....ها ... ها ...
أستنى ... خلاص ... خلاص هستناه على السكة...هاكلمة ...هاخطفة من وسطيهم ... ها حاول
وأنا بقى واللي أقدر عليه
عوض : سمع هس العريس فرحان قمر الزمان سيد العرسان ... العروسة بهيجة بنت سيد بيه سيد البلد
عم المنطقة عين أعيان الناحية .. وسلام كبير قوي لسيد بيه
سيد : الله يخليكوا يا رجالة .. نواجبكم في الأفراح
عوض : وقول كمان يا سلام قول كمان وسمعنا أحلى كلام
سلام : مخلاص يا بني طريقك فيه خطوتين فوق يالا وأرجع وأعرف طريقك منين دا العمر لحظة
والزمن غدار ولا ينفع ندم بعد ما عدا النهار
عوض : الله
سيد : بقولك أيه يا عروسة أنا مش هوصيكي بدري بدري خلصوا الزفة دي وأنا مستنيكوا في البيت
بهيجه : دلوقت يا با
بهيجه : طبعاً مش لازم نجهز العدة ..... علشان عريس الليلة .... هه سلام يا فرحان
فرحان : سلام يا سيد بيه
عوض : وكمان أحلى سلام
سخيه : فرحان
فرحان : أما .... أزيك يا أما
سخيه : لسه فاكر أمك يا فرحان
فرحان : معقولة أنساك يا ما .... أنا كنت مشغول بس
سخيه : مع بهيجة
بهيجه : مالها بهيجة يا ست سخية جرا أيه أحنا هنعيده تاني
عوض : آه يظهر أن ده موضوع عائلي .... طب نستأذن أحنا بقى وتبقوا تحصلونا على البيت
بهيجه : مفيش داعي أنا وفرحان هنروح دلوقت بالزفة
سخيه : لأ ... فرحان هيقعد ويسمعني ... أتفضلوا يالا روحوا على البيت اللي لاممكم
بهيجه : جرا أيه يا سخية أحنا مش كنا قفلنا الموضوع ده من شويه ....... أيه هتعيديه تاني ليه
سخيه : أنا عمري ما نسيتك يا فرحان ... فاكر فاكر يا فرحان لما كنت بتتعب كنت بتيجي وتترمي في
حضني ... فاكر وأنت صغير أتربيت في حضن مين مع مين .... أفتكر يا فرحان
بهيجه : كفاية بقى يا سخية قرفتينا بالسيرة دي ... أيه معندكيش غيرها
سخيه : سامع يا فرحان ...أتكلم سامع بتقول على أمك أيه
فرحان : سامع يا ما ومش هاين علي أسمع الكلام ده بس
سخيه : بس أيه يا بني بقت خلاص مقيداك بسلاسلها ... خلاص مبقتش سامع غير صوتها
مطاوع : أيه يا ما في أيه
سخيه : تعال يا مطاوع أنت وثابت أصحوا شوفوا أخوكم فرحان ... شوفوه ..أسألوه حبيبة القلب كانت
بتقول أيه
مطاوع : في أيه يا فرحان
ثابت : وكمان يا أخي ليك عين تعدي من قدام البيت أنت والبومة دي
بهيجه : ما تحترم نفسك يا ثابت أنا برضه عاملة حساب لدنيا
ثابت : هه... طب روحي أنت وأختك
مطاوع : في أيه يا فرحان أنطق
فرحان : مش عارف أقول أيه يا مطاوع ...عاوز أبكي أبكي في يوم فرحي ... لكن لأ ... مش هبكي ..
أنا أنا كده مبسوط ... النهارده فرحي ..أنا فرحان ..أنا فرحان
سخيه : يا عيني عليك يا بني فرحك مغسول بالدموع
فرحان : كفاية بقى يا أما كفاية دموع كفاية تعب .. هوه ده اللي خلاني أمشي من هنا هو ده اللي خلاني
أكره العيشة هنا
بهيجه : سمعتي بنفسك يا سخية
ثابت : أنت ..أنت ولا تستاهل نقطة واحدة من حبها ليك
سخيه : سيبه يا ثابت يا بني ..سيبه يكمل ... يا خسارة يا فرحان خسارة
فرحان : خسارة خسارة ليه دا الليلة الليلة هتمتع هبقى سيد البلد ... هتمتع ويا بهيجة هلف الدنيا أنا وهي
.. هنسى همومي في ثانية .. هطير طيران فوق السحاب .. مش عاوز أنزل تاني على الأرض
مطاوع : فوق يا فرحان وأرجع
فرحان : لأمش عاوز أرجع .. ليه بتحاولوا تتشدوني للأرض .. ليه عايزين تقيدوني

اللعب عالمكشوف 4

ثابت : يعني نسيت أمك
فرحان : منسيتش لكن مش عاوز أنسى اللي أنا فيه عاوز أتمتع ...أتمتع أطير
بهيجه : طير يا حبيبي و أتمتع أنا والدنيا وكل شيئ ملكك
فرحان : سامعة يا ما سامع يا مطاوع سامع يا ثابت في أيه تاني بعد كده ..الليلة همسك النجوم بأيديا
سخيه : كأنك ماسك النار بأيديك يا أبني
فرحان : ميهمنيش نار نار المهم أمسكها ولو لليلة واحدة
ثابت : الجزار مش هيسبك هيدبحك في يوم عيدك
فرحان : أنتوا بدل ما تفرحوا لي .... أنتوا ليه مش عاوزين تفرحوا لي .. أنا عارفكم الحقد مالي قلوبكم
مطاوع : للدرجة دي مبقتش عارف اللي بيحبك من اللي بيكرهك مين اللي خايف عليك من اللي
ميهموش مصلحتك
فرحان : حتى أنت يا مطاوع يا راجل دا أحنا في الهوا سوا
ثابت : أنت لايمكن تكون فرحان أخويا أنت واحد تاني متخدر .... واحد سايقاه بهيجة بيلعبك سيد بخيوط
من فوق
فرحان : مبلاش الكلام الكبير ده يا ثابت
سخيه : خلاص يا ولاد كفاية كلام
بهيجه : مش كده أحسن ما قولنا من الأول
سخيه : أسكتي أنت .. بص يا فرحان دلوقت عليك تختار يا أما أمك وتفضل معانا هنا في العشة يا أما
بهيجه : يا أما معايا في العز في النغنغة في البهجة في متع الدنيا
فرحان : العز .. البهجة ... هي دي محتاجة تفكير
ثابت : يعني خلاص أخترت
فرحان : كان نفسي تختاروا معايا
ثابت : مالكش دعوة بينا .. يا لا أمشي من هنا
سخيه : خسارة يا ابن بطني .. يارتك مت ولا كنت شوفت اليوم ده
سيد : جرا أيه يا ست سخية مالك ... بالراحة على العيال شوية
مطاوع : أهلا أهلا بسيد بيه
سيد : أيوه سيد بيه اللي مش عاجب أمك
سخيه : أخرس أوعى تجيب سيرة ولادي على لسانك
سيد : ولادك ولادك دول بقوا ولادي يا سخية
سخيه : عمرهم ما هيبقوا ولادك
سيد : بلاش ولادي أيه رأيك لو قلت عبيدي
سخيه : أيوه كده أتكشف على حقيقتك يا سيد
بهيجه : أبا ....... مبلاش الكلام ده يا با
سيد : روحي روحي أنت يا بهيجة و أنا ..هاجي .. أكيد هاجي
ثابت : أخيرا لعبتك أنكشفت يا سيد بيه
سيد : مين ثابت ابن امه
ثابت : أخرس متجيبش سيرة أمي على لسانك
سيد : شايف يا مطاوع بيقولوا أيه على عمك سيد .. شايف وساكت .. خلاص نسيت اللي بينا ....
نسيت ماني
مطاوع : ماني
سيد : آه ماني اللي مستنياك على نار
سخيه : لا يا مطاوع متروحش معاه فوق متخليهوش يخدرك زي ما خدر أخوك
سيد : ما تستني علينا يا ست أنتي .. أنت أيه كل حاجة تجي وتلخبطيها ..أيه كفاية بقى صابر عليكي
أنت وعيالك سنين طويلة بقول يمكن يجوا باللين بالهداوة ... ماتتهدي بقى
سخيه : أنا مش هسيبك تاخد مني مطاوع زي ما أخدت فرحان
سخيه : فوق يا مطاوع و أفتكر أبوك
سيد : ابوك ..أبوك مخلاص مشي خلاص و أخد وحيد ... وكفاية عليه دول ... ثم أن أبوك كان ماضي
وأنتهى
ثابت : لأ أبويا مش ماضي و لا تحب أجيب الخشبة وأفكرك
سيد : بصوا بقى بالذوق بالعافية هتبقوا لى زي ما أخدت فرحان هاخدك معايا أنت كمان يا مطاوع
سخيه : لأ على جثتي
سيد : يبقى أنت اللي أخترتي يا سخية
مطاوع : نزل أيدك ...أياك تمد أيدك على أمي مرة تانية
سيد : أيه ده يا مطاوع ... أنت نسيت أنا مين
مطاوع : منسيتش يا ... يا سيد بيه .. ولا نسيت أمي كمان
سيد : نسيت أن أمك عاوزه تحرمكم من العز والفلوس اللي هاغرقكم فيها
مطاوع : روح غرق حد تاني لكن ولاد سخية لأ يا سيد
سيد : أعقل يا مطاوع وتعال معايا وبدل مايبقى فرح واحد يبقى فرحين
مطاوع : كفاية خداع بقى .. كفاية قعدت تخدع في الفترة اللي فاتت .. لكن خلاص لعبتك أنكشفت .. قناع
الطيبة وقع خلاص يا سيد
سخيه : زمن اللين والمكر أنتهى ومبقيناش ناكل منه
مطاوع : أنا دلوقت فوقت وعرفت أمي كويس وعرفت مين أنت
ثابت : أنا طول عمري عارف وساكت لكن النهارده جه اليوم علشان أتكلم
سيد : بس بس كفاية لتكونوا صدقتوا أنت وهو وهي ... لا فوقوا دا أنا سيد .. أنا صاحب البلد ... أنا
اللي بمشي الناس على هوايا ... أنا اللي با خدهم بين أيديا لحد ما أعصرهم في أحضاني
سخيه : زي فرحان
سيد : فرحان .. لا فرحان دا حاجة تانية كان لازمله سكة تانية ... فرحان دا خروف العيد ... الناس
حواليه بتهيصله فرحانة بيه وهو مش عارف اللي هيحصله
ثابت : وأنت
سيد : أنا بقى الجزار ... أنا اللي بحطلة البرسيم علشان يكبر ويسمن .. أنا اللي بحطلة الطوق الدهب
في رقبته ... بيفرح بالأجراس اللي في الطوق لكني حاططها علشان لوحب مرة يمشي هي اللي
تجيبه تاني
مطاوع : وفي لحظة معينة
سيد : وفي لحظة معينة أتم خطتي وتنتهي لعبتي وأدخل على لعبة جديدة .. عريس جديد لبنت من بناتي
...خروف جديد ..... مسيركم في يوم تختاروا حد من بناتي وتعدوا الأيام والثواني علشان الفرح
... لكن ساعتها أنا هكون موجود .... ماهو لازم حد يسلمك العروسة بأيدة
سخيه : غشاش
ثابت : خداع
مطاوع : كداب
ثابت : وبعدين يا أما فرحان هيموت
مطاوع : أيه الصوت اللي جاي من بعيد
سخيه : أبني
ثابت / مطاوع : اخوووووووويااااااااااااااااااااااااااااااااااا.... 

 

 لتنزيل المسرحية للطباعة بصيغة ال word