اسكتش تحطمت القيود

 

اسكتش تحطمت القيود

(الشيطان من الكواليس)

ايه البلد الفاضيه دي هس هس كده مفيش زباين ولا ايه ( ثم يدخل الي المسرح ويقول للجمهور)

حبايبي بجد وحشيني موت انا جيبلكم معايا المره دي هدايا ومفاجأت في شنطة الملذات.اه ما هو بابا نويل مش احسن مني اذا كان هو بيجيلكم مره في اول السنه انا بقي معاكم طول السنة . بس انتم تأمروني .ايه ساكتين ليه شكلكم لسه مش عارفيني .انا شوشو شوشو حبيبكم اللي هيخرب بيتكم.... قصدي اللي بيحبكم.

(يدخل الملاك)

الملاك: ايه ده انت بتعمل ايه هنا ؟  (( للشيطان ))

شوشو : يا قاعدين يكفيكم شر الجايين  .

الملاك : لم حاجاتك وامشي من هنا ياللا  .

شوشو : امشي اروح فين بس روق يا عم الملاك وخلينا نشوف شغلنا دي الايد البطاله نجسه (ثم للجمهور) ولا ايه يا اخوانا .

الملاك : ملكش دعوه بيهم دول مش بتوعك . انت مالكش اي سلطان عليهم لأن المسيح اشتراهم بدمه علي الصليب .

شوشو : (يرتبك ويرجع للخلف) ليه بس السيره دي .انا عارف اني ماليش سلطان عليهم . انا كل اللي بعمله بعرض عليهم افكاري وهما اللي بيجولي برجليهم .

الملاك : انا واثق ان مفيش حد هنا هيسمع كلامك لانهم عارفين مكرك .

شوشو : متهيألك دول كلهم ضعفة ومش هياخدوا في أيدي غلوة تتحداني ؟

الملاك : اتحداك  .

 

                                             2

شوشو : بص في واحد جاي هناك أهو شوف انا هوقعوا بسهولة ازاي . نبدأ التحدي ؟

الملاك : نبدأ التحدي .

متردد : (يدخل الي المسرح وهو حزين وكئيب ) .

شوشو : ( لمتردد ) أيه . مالك شايل هموم الدنيا فوق دماغك وشكلك كده زي اللي عامل عمله ؟

متردد : انا فعلا عملت عمله سوده . لكن انت مين ؟            

شوشو : انا واحد عايز يخفف عنك . احكي احكي .

متردد : انت باين عليك راجل طيب قوي .

شوشو : قوي قوي وحياتك . عملت ايه بقي ؟

متردد : انا انا امبارح بالليل أأأأأأ  لأ لأ  انا مكسوف من نفسي .

شوشو : مكسوف ليه بس ؟ أحكي وفضفض عشان ترتاح .

متردد : أنا امبارح اتفرجت علي أفلام وحشة في الدش (ثم يضع يده علي وجهه ويبكي قائلا ) الشيطان ضحك عليا الشيطان ضحك عليا .

شوشو : (للملاك) ده كداب انا اول مره اشوفه ومعرفش انهم ركبوا دش .

الملاك : (لمتردد) كويس انك بتبكي . الدموع اول طريق التوبة . روح الكنيسه واعترف وربنا هيقبل توبتك .

شوشو : (للملاك)  ايه يا عمنا انت داخل سخن كده ليه ( ثم لمتردد) وانت بتعيط ليه أنت ما عملتش حاجه غلط .

متردد : صحيح  ؟

شوشو : طبعا . يا ابني انت لازم تعرف كل حاجه . انت مش صغير والافلام دي مش وحشه بالعكس دي ثقافة ومعرفه . والكتاب بيقول :هلك شعبي لعدم المعرفة .

 

                                        3

متردد : فعلا انا كنت بقول لنفسي كده قبل ما اتفرج. يعني انا كده ما عملتش خطية ؟

الملاك : طبعا خطية ما تسمعش كلامه . الكتاب بيقول :سراج الجسد هو العين فأن كانت عينك بسيطة فجسدك كله يكون نيرا وان كانت شريره فجسدك كله يكون مظلما .

متردد : فعلا انا خاطي خاطي ( ببكاء ) .

شوشو : يا ابني انت معاهم معاهم عليهم عليهم . خاطي ايه بس سيبك منه ده بيعمل من الحبة قبه. انت لازم تعيش وتتمتع والمثل بيقول ساعه لقلبك وساعه لربك .

الملاك : اكبر غلط . اي شركة للنور مع الظلمه الكتاب بيقول :يا ابني اعطني قلبك ولتلاحظ عيناك طرقي .

شوشو : والكتاب بيقول كمان : جئت لتكون لكم حياة وليكون لكم افضل .ازاي حياتنا هتكون افضل من غير المتع والملذات . يا ابني احنا بشر ودي غريزة جوانا

متردد : صحيح انا ما بقدرش اقاوم . كل مره بقول مش هتفرج تاني وارجع اتفرج .

شوشو : شفت بقي ان كلامي صح . دي حاجه جواك مش هتقدر تقاومها. يبقي ليه تعذب نفسك .

متردد : فعلا انا بقيت عايش في عذاب . ما بقتش عارف الصح من الغلط .

الملاك : الغلط انك تتفرج توب وارجع وربنا هيديك قوه تقاوم بيها الشر . لازم تسمو عن الجسد ما تخليهوش يتحكم فيك .

متردد : انت كلامك حلو لكن صعب التنفيذ .

شوشو : حبيب قلبي يا مفتح ( لمتردد ) .

الملاك : انت حر في اختيار طريقك ( ثم يذهب خارجا من المسرح ) .

 

                                            4

شوشو : ( للملاك ) ايه ماشي علي طول كده . طب نجيبلك شاي او حاجه ساقعة .( ثم لمتردد ) بص بقي يا صديقي قدامك شنطة الملذات اختار منها اللي يريحك .

متردد : ( يمد يده في الشنطة ويخرج زجاجة خمر ويقول ) : ايه دي ؟

شوشو : لا لا لأ دي لسه شويه دي الخطوة التانيه احنا لسه في أول خطوة (ثم) أمسك يا سيدي .

متردد : ايه دي ؟

شوشو : دي في دي مليانه افلام من اللي قلبك يحبها .

متردد : بس انا ما عنديش كمبيوتر .

شوشو : انا عندي تعالي معايا .

متردد : علي فين ؟؟

شوشو : بيت الراحة بيت شوشو حبيبك . بس في الاول تلبس دي في ايدك (ويضع رباط حول معصميه رمز القيود) .

متردد : ايه ده بقي انشاء الله ؟؟

شوشو : ده عربون الصداقة . ياللا بينا (يدخله القفص وراء القطبان ثم تدخل ترنيمة ازاي اسيب ايدك وامسك في ايد ابليس مع خفض الاضائة وبعد انتهاء الترنيمة يضاء المسرح ) .

شوشو : (يمسح عرقه ويقول) ماحدش بياكلها بالساهل . ده مين اللي جاي هناك ده ؟؟؟

ناصح : (يدخل ناصح وهو يتحدث في المحمول ويقول ) ما ينفعش يا شريف ازاي ارطبت بأنسانه مختلفة عني في كل شئ مستحيل . اذا كان هو ده الحل الوحيد عشان افضل في البلد دي انا برفضه طبعا . طيب طيب لما أجيلك هفهمك وجهة نظري . يارب حلها من عندك .

شوشو : أمين. مالك يا ابني حزين كده ليه ؟ كل مشكله وليها حلال .

5

ناصح : بس انا مشكلتي معقده خالص .     

شوشو : ياه للدرجة دي طب احكيلي يا ابني يمكن أقدر احللك مشكلتك . يوضع سره في أضعف خلقه.

ناصح : انا جيت البلد دي بفيزه سياحة ودفعت فيها كل اللي حيلتي ومش عارف أعمل اوراق عشان أفضل في البلد دي بصفة رسمية .

شوشو : بسيطة خالص حاول تهرب لبلد تانيه

ناصح : عملت كل حاجه بس مافيش فايده لازم اترحل لمصر .

شوشو : أيه ده أنت مصري ؟ البقية في حياتك .

ناصح : في مين ؟؟

شوشو : في شهدا اسكندرية .

ناصح : اسكندرية بس ونجع حمادي والعمرانية والكشح هتعذيني في مين ولا مين .

شوشو : فعلا الحالة في مصر بقت صعبة خالص .

ناصح : عشان كده انا جيت هنا. قلت اعمل قرشين ابني نفسي  واتقدم للانسانه اللي بحبها .

شوشو : طب انت كده يا حلو قدامك حل واحد أتجوز أوربية وهي تعملك الورق .

ناصح : ما هو ده رأي شريف صديقي .

شوشو : ده عين العقل .

ناصح : بس ده ما يرضيش ربنا ازاي أرتبط  بأنسانة لمجرد انها هتعملي الورق وانا عارف اني مش هكمل حياتي معاها . ده جواز مصلحة . او بمعني اصح زني . (يدخل الملاك).

الملاك : برافو عليك أنت كده ناصح .

ناصح : أيه ده عرفت اسمي ازاي ؟؟

6

 

الملاك : انا قصدي ناصح في اللي قلته أوعي تغضب ربنا الغاية لا تبرر الوسيلة .

شوشو : أيه يا عمنا انت بتيجي في أوقات غريبه جدا ده كان قرب يقتنع .

ناصح : انا لا يمكن أقتنع بأي حاجة تغضب ربنا .

الملاك : ربنا يباركك يا أبني .

شوشو : خلاص أرجع بقي مصر وابقي تعالي قابلني لو لقيت تاكل مش تتجوز .

الملاك : ليس بالخبز وحده يحيا الانسان بل بكل كلمة تخرج من فم الله .

شوشو : سيبك منه ده بتاع شعارات فاضية. انت لو رجعت مصر هتروح للموت برجليك وأديك شايف عمالين يفجروا في الكنايس .

ناصح : ليِ الحياة هي المسيح والموت هو ربح .

الملاك : أنت فعلا ناصح أسم علي مسمي .

شوشو : يعني ده قرارك الاخير .

ناصح : طبعا أنا لا يمكن أبيع المسيح ابداً .

الملاك : من سيفصلنا عن محبة المسيح أشدة ام ضيق أم إضطهاد أم جوع أم عري أم خطر أم سيف .

شوشو : ياعم أهدا بقي شوية هتضيع الصيدة مني . ( وفي الاثناء يرن موبايل ناصح ).

ناصح : ألو أيوه يا شريف . بتقول أيه؟ (بفرح) المعلم بتاعك وافق انه يعمللي عقد عمل. يا ما انت كريم يا رب شكرا يا يسوع شكرا يا يسوع. بعد أذنكم يا جماعة أنا رايح لشريف .

شوشو : يخرب بيتك يا شريف أنا ناقصك انت كمان مش كفاية عمنا(يقصد الملاك) .

 

7

 

الملاك : كده أحنا متعادلين                                                          شوشو : يا عم فارقنا بقي عايزين نشوف شغلنا

الملاك  : انا ماشي بس هجيلك تاني .

شوشو : مع السلامه يا أخويا والقلب داعيلك . (يخرج الملاك ) . ماشي ياشريف إن ما وقعتك .

مغرورة : (تدخل مغرورة الي المسرح وتقول ) ما فيش تاكسي في الحته الأرف دي ولا أيه ؟؟

شوشو : مالك يا مدام مش طايقه نفسك ليه ؟؟؟

مغرورة : انت مالك أنت . ثم أنا أنسة مش مدام . انت بقي تطلع مين .

شوشو : أنا شوشو .

مغرورة يعني أيه ؟؟؟

شوشو : يعني إبليس . أنتي ما بتقراءيش شعر ولا ايه ؟؟؟

مغرورة : وأيه علاقة الشعر بحضرتك إنشاء الله ؟؟؟

شوشو : ما سمعتيش عن الشعر اللي بيقول :

 مع إبليس تفرح وتهيص ... لا تقوللي تناول ولا قداديس                                                            ولا صلي ولا صوم بلا كتر هموم.... هتروح السما راكب اوتوبيس .

مغروره : ها ها ها أنت أكيد بتهزر صح؟؟ قال أبليس قال .

شوشو : (للجمهور) هما كده البني أدمين اللي يقول لهم الصدق يبقي بيهزر .واللي يكذب عليهم يصدقوه .عجبت لك يا زمن .

مغرورة : بس تصدق انت دمك خفيف .

شوشو : وانت شربات باين عليكي بنت موأدبة وأخلاقك عاليا . واضح من لبسك

.

8

 

مغرورة : مرسي . مع أن ماما رأيها غير كده خالص .

شوشو : أزاي يعني ؟

مغرورة : كل مره أجي رايحة فيها الكنيسة تتخانق معايا وتقول لي : لبسك قصير ومش محتشم . أنتي كده هتكوني عثرة للشباب في الكنيسة .

شوشو : لا عثره ولا عثرين ولا تلاتين .سيبك منها ماما دي باين عليها دقه قديمة .

مغرورة : انا بقول كده برضو .بس في كمان خادمة في الكنيسة لفتت نظري لنفس الموضوع .

شوشو : بتغير منك عشان شيفاكي بنت مدرن وجميلة .

مغرورة : أكيد طبعا (بغرور شديد ) .

شوشو : هي ماما والخادمة ما طلعوش علي البحر قبل كده  ولا أيه !!!!

مغرورة : ليه يعني ؟؟؟

شوشو : يا بنتي أحنا في أوربا . الناس مش طايقه الهدوم علي جسمها لا صيف ولا شتا .

مغرورة : فعلا انا كتير بقول لماما أحنا هنا في دولة أوربية . صديقاتي في المدرسة بيلبسوا شورت وميني جيب .

شوشو : ونعمة الصديقات . سيبك أنتي من ماما وأمسكي .

مغرورة : أيه دي ؟؟؟

شوشو : دي مجلة أزياء 2011 أخر موضة .شوفي كده . محدش بيلبس اليومين دول العالم دالوقتي بيتجه الي التحرر . (في الاثناء يدخل الملاك )

الملاك : أوعي تسمعي كلامه . وأرمي المجلة دي من أيدك. أولاد المسيح لازم يبقوا مميزين سواء راحوا أوربا أو غيره. الوصية ما بتتغيرش بتغيير المكان .

9

 

شوشو : انا مش عارف أنت بتطلعلي منين بس ؟؟؟

مغرورة : وحضرتك تطلع مين بقي إنشاء الله ؟؟؟؟

 

الملاك : مش مهم أنا مين. اللي أنا عايز اقولهولك أنك لازم تتمثلي بالست العدرا في كل شيء: إتضاعها، وطهارتها، ولبسها البسيط المحتشم .

شوشو : سيبك منه ده عايز يرجعنا لأزياء ما قبل الميلاد .

الملاك : يا بنتي الكتاب بيقول في رسالة بطرس الاولي : ولا تكن زينتكم الزينة الخارجية من ضفر الشعر والتحلي بالذهب ولبس الثياب . بل انسان القلب الخفي في العديمة الفساد .زينة الروح الوديع الهادي الذي هو قدام الله كثير الثمن .

مغرورة : أنا مش عارفه مين فيكم الصح ومين الغلط. انت كلامك زي ماما . وشوشو رأيه مختلف .أنتم حيرتوني . بس انا بقي عجبني شكلي كده . لازم أبقي علي الموضة .أنا مش أقل من صديقاتي .

شوشو : ونعم الصديقات . حيث كده بقي انتي ليكي عندي شوية أكسسوارات روعة .

مغرورة : بجد . فين ؟؟؟

شوشو : تعالي معايا . ( يخفت ضوء المسرح مع دخول ترنيمة مناسبة أثناء دخول مغرورة قفص الشيطان . والملاك يهز رأسة وزراعيه مستنكرا لما حدث ويخرج ) .

شوشو : كده النتيجة اتنين واحد.الله هو راح فين؟ طبعا مكسوف يوريني وشه. قال يتحداني قال . دا انا شوشو الجبار . والبشر دول ضعفه مساكين بسهولة اضحك عليهم . بعرف نقطة ضعف كل واحد وأدخل منها وأسلسله بقيودي الفولازية. هاهاها سياسة شيطانية عليا .( يدخل مخدوع وينادي شوشو ) .

مخدوع : أنت يا عم .

 شوشو : نعم أوامرك عايز أيه؟؟؟

10

 

مخدوع : أنا كنت عايز أعرف طريق الكنيسة منين . أنا معايا العنوان .

 شوشو : أنت أكيد لسه جديد في البلد .

مخدوع : انا هنا من حوالي شهر .

شوشو : طيب انت رايح الكنيسة ليه ؟ انهارده لا فيه قداديس ولا أجتماعات.

مخدوع : اصل أنا رايح أعترف عند أبونا .

شوشو : بس المشوار بعيد وممكن تتوه .طب بقولك ايه أجلها ليوم تاني وخلي حد من أصحابك يوصلك بعربيته .

مخدوع : لأ انا ما أقدرش أستنا . انا ضميري بيأنبني علي الخطية اللي عملتها .

شوشو : خطية ايه دي اللي تعباك. ما كلنا بنخطي داحنا بشر يا ابني .انت يعني سرقت ولا قتلت .

مخدوع : لا ما وصلتش لحد كده .

شوشو : امال تاعب نفسك ليه بس .روح راوح يا راجل .

مخدوع : لا ما اقدرش انا لازم أروح اعترف عشان ارتاح .

شوشو : انت عملت ايه بس . احكيلي وانا هريحك .

مخدوع : أصحابي ضحكوا عليا إمبارح وشربوني خمره. قالولي لو مشريبتش معانا هتبقي عييل مش راجل. وانا مش عارف طاوعتهم ازاي .

شوشو : بقي هو ده اللي تعبك قوي. دأنت مسكين خالص. يا أبني الخمرة مش حرام .

مخدوع : أزاي بقي حرام طبعا .

شوشو : صدقني مش حرام .وأثبتلك ده من الانجيل كمان .

مخدوع : يا سلام !!! انت بتتكلم جد ولا بتهزر .

شوشو : بتكلم جد طبعا. المسيح مش حول الميه لخمره في عرس قانا الجليل .

11

مخدوع : بس دي كانت خمره غير مسكرة .

شوشو : مين اللي قالك الكلام ده . الخمرة هي الخمرة. لو كانت حرام كان يسوع حول الميه لمشروب تاني .

مخدوع : مشروب تاني أزاي يعني؟؟؟

شوشو : كان حول المية لعصير برتقال،  فراوله، بيبسي كولا مثلا .

مخدوع : هاهاهاها أنت ظريف قوي. بس بجد ريحتني . قال وأنا اللي كنت فاكر إني عملت عمله . وهي طلعت حلال. بس أوعي تكون بتهزر .

شوشو : عيب صدق كلامي . دأنا حتي معايا أزازة أمسك أمسك يا راجل. (يدخل الملاك ويقول ).

الملاك : أوعي تصدقه ده كداب .

شوشو : ليه الغلط ده بقي.  ماشي يا عم أنا هطلع أحسن منك وهسامحك . الانجيل بيقول لا تقاوموا الشر بالشر .

مخدوع : ياه دأنت طيب قوي ومتعمق في الانجيل .(للشيطان )

شوشو : دانا حافظه من الجلدة للجلدة .

الملاك : ده بيلف ويدور عليك وبيحاول يقنعك بالغلط. شرب الخمر طبعا خطية . الانجيل بيقول : لا تسكروا بالخمر الذي فيه الخلاعة .

مخدوع : ( لشوشو ) الاية دي موجوده ؟.

شوشو : أنا ما بنكرش انها موجودة . بس دي بتتكلم عن الخمر اللي فيه الخلاعة. بقي بذمتك الازازه دي فيها خلاعة ولا مَياعة. ماهي أزازه محترمة أهي.

الملاك : ما تحاولش تلف وتدور وتفسر الاية بأسلوبك الشرير .

شوشو : معلش بقي الانجيل ما بيحرمش الاكل والشرب : الانجيل بيقول كل الاشياء تحل لي .

الملاك : كمل الاية : ولكن ليست كل الاشياء توافق .

 

12

 

شوشو : طيب هو حد قالك انها مش موافقة. لحظة واحده بقي عشان نسألها . يا أزازة الخمره أنتي موافقه نشرب منك ولا مش موافقه ؟ أهي ما ردتش وسكتت والسكوت علامة الرضا. امسك امسك يا راجل (ويصب لمخدوع كأس فيشربه ) أيه رأيك بقي ؟؟؟ .

مخدوع : تمام .

شوشو : أشرب ده كمان .

مخدوع : أنا جدع .

الملاك : أنت مخدوع .

مخدوع : الله عرفت اسمي ازاي انا فعلا أسمي مخدوع .

الملاك : اسم علي مسمي . ابليس قدر يخدعك . علي العموم أنت حر وأتحمل بقي مسؤلية أختيارك.(يخرج الملاك وهو أسف علي ما حدث ) .

مخدوع : أستني يا ...... أه صحيح هو مين ده ؟؟ (وهو في حالة من السكر ) .

شوشو : ما تخدش في بالك أشرب أشرب .

مخدوع : بس ده بيقول عليك إبليس!!!!

شوشو : ما أنا فعلا إبليس .

مخدوع : يا راجل ؟ بس جدع. صب واحد كمان .

شوشو : الازازه كلها حلال عليك يا عم . أدخل بقي مع أخواتك الكتاكيت في القفص (يدخله القفص ثم يرن محمول شوشو ويقول ): ايوه يا بوص انا وقعت تلاته وواحد فلت مني . شريف هو السبب يا بوص . بس ما تقلقش انا رايح لشريف حالا. مع السلامه جوتو هيل.(ثم للمقيدين في القفص ) مع السلامة يا حبايبي .أقامة سعيدة . جوتو هيل كلكم .(ثم يخرج وتدخل ترنيمة مناسبة ).

(يدخل الملاك وينظر بحسرة الي المقيدين داخل القفص ويقول ).

 

13

 

الملاك : أد أيه انا حزين عليكم. إبليس قدر يخدعكم ويسلسلكم بقيوده. بعد يسوع ما حرركم بدمه. بعتوا المسيح بتمن رخيص. شهوات وملذات فانية. يا تري حاسين بسعادة دالوقت !!!!!!!!

متردد : أبداً انا حاسس بعذاب الضمير . بس حقيقي مش قادر امنع نفسي الافلام الوحشة بقت قيد حوالين رقبتي. انا ضعيف ضعيف ضعيف (ببكاء شديد ).

الملاك : لو طلبت يسوع بكل قلبك. هيديك قوة وهتقاوم شهواتك وتنتصر عليها .

 

مغرورة : وأنا رغم جمالي وشياكتي لكن حاسه اني انسانه تافهة .فاضية من جوه. بحاول أعوض نقصي باللبس والموضة عشان أحس بقيمه ليا .

الملاك : قيمتنا ما بيحددهاش مظهرنا ولا فلوسنا أحنا قيمتنا الحقيقية في يسوع اللي اشترانا بثمن غالي جدا . دمه الثمين .

مخدوع : أنا حاسس أني قشة في مهب الريح. بصدق أي حاجه تتقال لي بسهولة . بمعني أصح بيتضحك عليا .

الملاك : لازم تتعمق في كلمة ربنا. عشان تبقي واقف علي ارض صلبه . وماتتهزش بأي عواصف.

متردد : انا عايز اتحرر من قيودي .

مغرورة : وانا كمان عايزه اتحرر .

مخدوع : كلنا عايزين نتحرر من قيود إبليس اللي ربطنا بيها .

الملاك : أصرخوا ليسوع من قلوبكم وهو قادر يحرركم .

الجميع : حررنا يا يسوع حررنا يا يسوع (يظهر يسوع ويقول ) .

يسوع : من زمان وأنا مستني اليوم ده اللي تطلبوني فيه من قلوبكم . أنتم ولادي وغاليين عليا.

( يفك يسوع قيودهم الواحد تلو الاخر واثناء ذلك تدخل ترنيمة حررني يسوع ).

 لتنزيل الاسكتش للطباعة بصيغة ال word

 أضغط هنا