مسرحية اتصال عالمي

المنظر بيت بسيط

البدايه الأب يجلس علي الكرسي يقرأ الجريده وهو يرنم (ربنا ربنا حه علشانا ربنا) ثم يدخل عليه إبنه

النص

الأب ألاه ألاه .. هوه إنت هنا من إمتي.

رامي أنا ماخرجتش أصلاً النهارده.

الأب أه يبقي أكيد كنت اعد علي الكمبيوتر .. ودلوئتي نازل تتقابل مع أصحابك.

رامي ياسلام عليم يابابا ياحفظني..(ينظر في التليفون)..يووه ليه كده.

الأب إيه فيه إيه.

رامي ثانية واحده .. أيوه ياعطوفة..إنت مش قلت جاهز..عاوزين نروح النادي بدري.. باي .. إبعتلي علي الماسينجر.. بابا حبيبي .. ياجميل .

الأب عاوز كام.. بص هما 3 جنيه إنت هتضحك عليا .. إحنا في أخر الشهر ومش معايا غير دول.

رامي ياسلام عليك ياحافظني .. ماشي يابابا.. أنا عايز أسألك سؤال.

الأب سؤال .. بقالك كتير مسألتنيش .. إسأل ياحبيبي.

رامي هو إنت وماما الله يرحمها ويقدس روحها كنتوا .. يعني كنتوا بتحبوا في علاقة حب كده.

الأب ياااه ..ياه يارامي .. أنا والمرحومه إمك كانت بنا قصة حب رهيبه يتحكي ويكتب فيها كتب وموسوعات.

رامي يااه للدرجادي .. ده علي كده إنت كنت واد مخلص بقي وجامد أخر حاجه.

الأب رغم إني مفهمتش معني الكلام ده .. إلي إني إستوعبت إنك بتمدحني.

رامي أه بالظبط .. إحكيلي بقي إتعرفت علي ماما إزاي.

الأب أول مره عبرت فيها لمريم عن حبي كنا علي مشارف استقبال عيد الميلاد، كنا في اجتماع للكنيسة.

رامي ماشي وبعدين.

الأب شدني ليها حبها الواضح لربنا .. طريقة عرضها للمواضيع كانت مقنعة ومجذمة ومبنيه علي إسس وإصول.

رامي ماشي وبعدين.

الأب مريم الله يرحمها ويقدس روحها .. كانت جميله جداً في

رامي (بصوت عالي) أيوه .. جميله .. جميله جداً .. في إيه بقي يابابا.

الأب في طريقة تفكيرها .. كانت طريقه مليانه بالوداعه مليانه بالصدق .. كانت دايماً تحب تخدم في الخفاء .

رامي ياسلام .. إد إيه ماما دي كانت عظيمة .. ياريتها كانت لسه عايشة.

الأب مهما فرق بنا الزمن فهتفضل روحها جوه قلبي.

رامي ياه حتي بعد 17 سنه لسه ذكراها في قلبك .. جميل أول الإحساس ده .. وبعدين

الأب بس. رامي لأ إحكي يعني وقول.

الأب ماهو خلاص.

رامي لأه أقصد قصة الحب الرهيبه الي يتحكي ويكتب فيها كتب وموسوعات.

الأب أه .. أول مره شوفت فبها الست ولدتك كان عندي 27 سنة.

رامي (بصوت عالي) 27 سنة .. ليه .. إنت كنت نايم ونسيوا يصحوك ولا إيه.

الأب يابني ماتفهمنيش غلط .. صحيح انا فكرت في الجواز بدري .. بس

رامي (بصوت عالي) بدري إيه .. ده متأخر جداً.. هوه إنت كنت بتدور في صحرا.

الأب لأه الموضوع مش كده .. ولكن أنا أخدت فتره كبيره .. عشان أجهز فيها نفسي .. يعني التجهيز النف

رامي عارفه .. التجهيز المادي والمعنوي والحسي والروحي والنفسي و العقلي والحاجات الكتير إلي الخدام بيقولوها .. أنا رأيي مادام أنا وهي متفقين .. نستني وإيه يعني .. أنا عندي 17 سنه .. يعني بحسبه بسيطه .. 3 - 4 - 5 - 6 قول 6 لأه 7 .. 7 سنين ونتجوز .

الأب إيه السرعه دي .. الغريب يا أخي إن كل علاقتكم يا شباب اليومين دول سريعه .. تتصاحبوا .. تتخانئوا .. تذاكروا .. تنفصلوا .. كله سريع فيما عدا .. العلاقه إلي بينكم وبين المسيح .. دايماً بطيئه ومليانه تأجيل.

رامي بقولك إيه .. نرجع لموضوعنا .. قلتها إيه

الأب بعد الاجتماع .. طلبت إني أقعد معاها شويه .. وقلتها إني معجب بيها وبأخلائها .. وحابب إني أكمل مشوار حياتي معاها..و بعد كده صلينا أنا وهي .. وربنا كمل علي خير وإتجوزنا .. وجبناك .. وهي سابتني أكمل مشواري معاك.

رامي عاوز تجوزني .. إطلبني من عمي الأب يا واد بطل هزار

رامي هزار مين هي دي القصه إلي يكتب عنها موسوعات .. ده هي نص صفحه.

الأب يمكن تكون صغيره ومفهاش تفاصيل لكن دي بالنسبه ليِّ هي كل حاجه.

رامي كل حاجه .. القصه الصغيره دي .. فين الحب فين الكلام بتاع الأفلام.

الأب الموضوع مش مجرد حب بتاع أفلام .. ده عشره بيني وبينها في المسيح يسوع .. سعادة وعمق لا الكلام أو الأفلام هتعرف توصفه.

رامي مش فاهم

الأب حطها في دماغك معادله .. السيد المسيح مش موجود = مافيش سعادة حقيقه .. أنا مريم كان وجود ربنا وحده وسطينا بيحسسنا بالسعاده بالشبع بالعمق..حتي لو كانت قصة حبنا صغيره.

رامي عمق إيه

الأب أقولك مثل .. عيد الميلاد .. هل فكرت في قصة الميلاد نفسها ولا الموضوع مجرد لبس وفلوس وخروجه.

رامي أفكر إزاي ما كلنا عارفين القصه من وإحنا في صغرنا.

الأب لو تعمقت في قصة الميلاد ممكن تطلع منها بإنك تطلب من ربنا إنه يحول قلبك لمزود يتولد فيه .

رامي أه . إتصل بقي ياعاطف .

الأب أنا عايزك تحب ربنا بعمق .. يبني إحنا هياكل الله وروح الله ساكن فينا ... شكلك زهقت مني وعاوز تمشي

رامي أبداً .. أنا نازل بقي .. عشان عاطف بعتلي رساله باي.

الأب ربنا معاك ياحبيبي .. تعالي هات بوسه.

رامي لما تطلبني من عمي باي.

الأب باي .. شباب ..

المنظر خلفيه عاديه

البدايه يتكلم رامي وعاطف ثم تدخل شخص في زي فتاه - مكياج وحش جداً - معطياً ظهره للجمهور

النص

عاطف لزمته إيه بقي الزعيق في التليفون ، أدينا جينا قبل ميعادنا أهوه.

رامي يابني أنا عايز أجي بدري عن كده .. عشان أشوفها.

عاطف هي إسمها إيه . رامي لسه معرفش ..بقولها ياسوسو.

عاطف يارب إسترها. رامي مالك .. ياعاطف بترتعش ليه.

عاطف نفسي عقدتي تتفك بقي يارامي. رامي بس إنت عقدتك دي غريبه أوي ياد ياعاطف.

عاطف ماتعرفش أبقي مع كل الناس برابنت لبلب في الكلام ، وقدام البنات تمسكني كحه معرفش أقول منها نص كلمه..لحاد مايسبوني ويمشوا.

رامي عامةً ماتقلقش أنا وصيتها تجيب معاها صاحبتها..أنشاء الله عقدتك هتتفك علي إيدي.

عاطف يسمع من بقك ربنا.. إيه ده .. إيه ده (تدخل البنت) ..شوف كده بص .. هي دي .. هي دي ..قول

رامي مش عارف أصلها مدياني ضهرها. عاطف طب فين صحبتها .. فين صحبتها.

رامي يأخي إصبر .. يمكن تكون جوه بتجيب حاجه. عاطف إنت متأكد إن ده المكان.

رامي أيوه هي قالتلي هستناك في النادي قدام بيت النادي القديم

عاطف مش البيت ده إلي تاه فيه 7 قبل كده .

رامي أه .. بص أنا هروح أعمل test هقولها كلمة السر طلعت هي .. هكلمها .. أندهلك تيجي .

عاطف طب لو ماندهتش. رامي إيه.

عاطف لو ماندهتش.

رامي تروح بقي ياخي .. ومتناديش علي زي المره إلي فاتت .. كسفتني.

عاطف يعني إنت بتبعني ياصاحبي.

رامي معلش إنت عارف وقفة الراجل بميت ست .. بس تيجي الست .. قول.

عاطف يغور الراجل.

رامي ياله إركن هناك.. هناك كده عند الطوبه أندهلك تيجي .. ماندهتش تمشي.

عاطف أمرك (يذهب رامي للبنت) أه ..يامحظوظ .. دايماً حظك كده ..في العالي .. مبتقعش غير واقف ياريس.

رامي إسكت .. إحم .. إحم .. الطشت قلي الطشت قلي ياحلوه يالي قومي إتقابلي.

البنت (بصوت أخنف : رامي) - (رامي مزهول) - (عاطف بيصلي).

رامي لأه .. رامي الشاب الحليوه إلي هناك ده.. يارامي .. يارامي.

عاطف أنا .. أنا .. (يرجع رامي إلي عاطف) .. ها طمني. رامي صاروخ.

عاطف باين باين من وشك .. وصاحبتها. رامي صاحبتها مين .. روح قلها كلمة السر.

عاطف أروح رامي روح

عاطف (أداء شكر وتقدير) لن أنسي لك هذا المعروف .. يارب عقدتي تتفك.. ربنا يخليك .. مش هنسالك الجميل ده (يذهب إليها) الطشت قلي الطشت قلي ياحلوه يالي (ثم تلف - مكياج ليس له علاقه بالجمال).. رامي العقده راحت.

رامي الحمد لله. عاطف بس أنا إتشليت.

البنت (بصوت أخنف : رامي) عاطف إيه ده ..

البنت (بصوت أخنف : رامي)

عاطف مش أنا .. مش أنا .. إهرب يارامي (موسيقي للمطارده)

رامي بس الحمد لله .. توهناها .. ياااه ..كابوس.

عاطف أنا بعد إلي شفته ده .. مش عاوز أعمل أي علاقه علي الإنترنت.

رامي بس ياعاطف ..إهدي.

عاطف أهدي إيه ..بتخدعني .. بتقولي صاروخ .. ده صاروخ كيماوي .. صاروخ بيولجي.

رامي يانهار أبيض(موسيقي رعب). عاطف إيه لسه جايه ورانا.

رامي ياريت .. إخنا دخلنا بيت النادي القديم.

عاطف يانهار أبيض .. ياخسارة شبابي.. بقولك وأنا داخل شميت ريحه غريبة.. ليكونش ده غاز الأوهام إلي بيقولوا عليه.

رامي شمتها مأنا قلتلك متشمهاش.

عاطف يعني إلي في دماغي مظبوط .. بقولك إيه إنت المسئول طلعنا من المكان ده زي مادخلتنا فيه.

رامي أهدا إنت بس .. وانا هتصرف.

عاطف دماغي .. دماغي .. هتفرقع .. إظهار إن مفعول الغاز إبتدا .. هات سيجارة.

رامي علبة السجاير وقعت مني. عاطف طب قعدني .. قعدني

رامي أنا هشوف سكة الخروج من هنا .. يارب إسترها مش هعمل كده تاني.

عاطف لأه متسيبنيش لوحدي .. متسيبنيش .. (ويخرج) ..لازم أعيش..طب هات سيجاره طيب.. مشي .. مشي وسبني.. الدنيا ضلمه كحل .. أغمض عيني .. عشان ماشوفش أوهام.

صوت (أكثر من صوت .. ولكن غير عالي) Global connectivity

عاطف يامه .. يامه .. هوه الأوهام ليها صوت .. يمكن صدا صوت .. لما اجرب كده .. (يعمل صوت قطه) ثم صدا صوت ، (يعمل صوت معزه) ثم صدا صوت (ينادي علي رامي) ثم صدا صوت ، جميل ومسلي (يعمل صوت كلب) ثم صدا صوت يزود في الكلاب .. إيه ده صدي صوت ومعاه كلب .. ( يمثل إعداد خطة ذكيه ثم يعمل حركه للكلب ويسمع الصدا من غير ما يتكلم - يخاف جداً) لأ البيت ده مش طبيعي

صوت (أكثر من صوت .. ولكن غير عالي) Global connectivity

عاطف ماذا .. من الهاتف الداعي .. من الذي يتكلم .. من معي ..من هنا (يدخل رامي)

رامي وله عاطف (يتخض جداً) يامه ..يامه

رامي مش لاقي مخرج ياله عاطف رامي أنا.. أنا مش قادر .. إنت فين ..

رامي أنا قدامك . عاطف هوه انا شايف قدامي من ورايا.. الدنيا ضلمه كحل.

رامي عايز إيه. عاطف تعبان ..هات سجاره دماغي غاز الأوهام عطلها

رامي بقولك إحنا عايزين ربنا يساعدنا .. تعالي ندور علي مخرج من النحيه دي .

عاطف شكلنا هنتوه إحنا كمان

رامي متقلقش وغلاوة المرحومة إمي عندي زي ماورطك هطلعك .. تعالي معايا (يخرجان).

صليب الوقت قرب .. و الانتخابات قربت.. يارب ببركة عيد الميلاد .. خليني أقدر أوضح الحق إلي قدسك عينته لينا بميلادك المتواضح .. (يدخل شخص روِش يدعي إن)

إن hi man... How are you صليب إزيك.

إن I’m fine, are you ready for the election?

صليب بإذن الله .. أنا جاهز للإنتخابات .. أنا هسيبك تتعرف عليهم الأول يا إن.

إن all right صليب ماشي .. أنا ماشي .. (يخرج و يدخل عاطف ورامي )

رامي عاطف .. عاطف .. في واحد هناك اهو .. ده إنسان .. ممكن ينقذنا .. لو سمحت

إن hi boys..My name is EN… I’m the coordinator of the great matrix (عاطف ورامي مبلمين)

عاطف إنت دوست علي إيه. رامي مش عارف .. أنا قلت لو سمحت.

عاطف طب وسع كده .. صباح الخير. إن hi how are you today .. Welcome in my lab

عاطف هوه ده إلي هينقذنا .. ده بيتكلم إنجليزي..هنفهمه إزاي .. ده عاوز كاتالوج عشان نفهمه.. والمشكله الأصعب إحنا هنفهمه إزاي إلي إحنا عايزين نقوله.

رامي بس .. أنا هاتكم معاه .. أنا هتصرف. عاطف إتفضل .

رامي هاي

إن hi man .. How are you? I’m very glad to see you, what is your name?

عاطف (ينتظر فتره) قول رامي أقول إيه

عاطف إلي هوه قاله رامي مين

عاطف الراجل رامي راجل مين

عاطف ده. رامي لا .. ده طلع تايه زينا.. مش حاجه تانية.

عاطف يا نهار أبيض .. أنا كنت عارف .. كنت عارف إن كل معرفتك بالإنجليزي هوه حروفها بس عشان تكتب فرانكوا أرابيك علي الشات في النت .. طب أتصرف إزاي.. هوه إحنا مش في ثانوية عامه

رامي أه عاطف الإنجليزي بتاعنا فين .. إتمسح

رامي الخوف .. علي العموم أنا هتعامل معاه باللغه إلي كل الناس تعرفها.

عاطف إيه هتشاورلوا.

رامي لأه هكلموا إتفرج عليَّ .. You... you... what? You what? you what? (يكررها)

عاطف ياعم إنت هتغنيها .. إيه .. إنقل. إن My name is EN… I’m the coordinator

عاطف الحمد لله .. رامي إيه.

عاطف معايا موبايل فيه مترجم فوري .. حطه جمب فمه .. يسمع ويترجم لينا عربي كلمات.

رامي أاااه .. you عاطف what?.. you what?.. أخر مره إنشاء الله

إن My name is EN… I’m the coordinator for this matrix.. And I’m very glad to see you... You are the chosen ones from your own generation.

عاطف بس خلص .. دوس ترجم رامي أنا أدعي إن

عاطف أدعي .. أنا أٌدعي إن .. لا إنجليزي ولا عربي كمان.

رامي أنا أدعي إن .. أنا المنسق لهذه الكيان .. و .. أنا سعيد لرؤيتكم .. أنتم .. هم المختارون من جيلكم.. محدثكم من النادي .. مفيد فوزي.

عاطف برنامج حديث المدينة .. ده وقت تهريج .. إسمه إن .. Me 3atef.. She Ramy .. Me 3atef.. She ramy

رامي plz.. we .. why .. now .. Hena عاطف هنا .. إنجليزي ده يارامي

إن هل تتحدثون العربيه

عاطف تحيا مصر ياعم بقي .. أيوه كده .. نعم نتحدث العربيه بطلاقه .. وأنت

إن جامد جداً رامي إحنا عايزين نمشي.

إن أنا مسؤل كل اجرائات إتصال في كل عالم .. أنا أستطيع أن أقلل من المسافات وأجعل كل شيء متاح ومسموح .. انا المسؤل عن الشبكه .. أنا الرابط.. أنا المربوط أنا الموصول .. أنا كل دول .. أنا الوسيله إلي ممكن تخرجوا منها من هنا. رامي وكيف هذا كيف سوف نخرج ؟

إن one second .. سالي (تدخل سالي) .. سالي السكيرتيره بتعتي..

سالي هاي يا شاب . عاطف أيه ده .. مين دي

رامي إيه أطرش .. سكرتيرته. عاطف شكلها حلو.

رامي ياعم ده وقته.

إن أرجوكم مافيش وقت الانتخابات هتبتدي ولازم تختاروا بسرعه بيني وبين صليب .. إيه الأخيار سالي

سالي منسوب تدفق المعلومات في إزديات مستمر .. الشبكه كل يوم بتكبر .. إحنا معانا دلوئتي بلايين من المشتركين

رامي ربنا يزيد ويبارك. سالي ميرسي.. إنت إسمك إيه.

رامي رامي .. رامي ريمون داود. سالي والباشا

عاطف نعم (كحه) سالي الإسم

عاطف كحه سالي كحه .. إسمك كحه

عاطف لأه .. عاطف إبراهيم حليم (كحه). سالي وده من إيه. عاطف (كحه) أفندم

سالي مالك فيه إيه .. فرفش كده إنتوا هتقعدوا معانا فتره الانتخابات كلها.

إن أنا عارف مشكلتك ياعاطف .. خليك واثق من نفسك .. إستخدم كل شيء حواليك مهما كان صغير .. عشان يذيدك قوه.

عاطف إيه الموضوع .. حضرتك عايزانا نقعد ليه. سالي الموضوع بإختصار ياعطوفه

عاطف قوليلي ياعطعط (يدخل صليب)

سالي عطعط .. الموضوع بإختصار .. كل سنه بيحصل انتخابات بين إن .. وصليب .. والمطلوب منكم إنكم تختاروا مابينهم. عاطف إنتي رأيك إيه.

إن فيه تقدم واضح ياعاطف. عاطف ربنا يخليك .. كله من توجيهاتك يادكتور.

سالي أنا مجرد وسيله مليش الحق اني أقول مين الأفضل .. إنتوا إلي هتختاروا .. كل إلي هقدر أقولوا إنكم هتقدروا توصلوا لكل حاجه إنتوا بتحلموا بيها أسرع مع إن .. ومن غير تعقيدات.

صليب ( بإستنكار) تعقيدات تعقيدات .. تعقيدات .. خلاص خلتوني معقد.

سالي زي ماقلت قبل كده .. أنا مجرد وسيلة .. ومليش حق الإختيار ... مستر إن لو إحتجتني في الأمثال ناديني.. باي رامي .. باي عطعط. عاطف باي .. معجبه بي جداً.

إن فعلاً ..شئ واضح عاطف انا معاك يا زعيم إن .. وهختارك إنشاء الله

صليب قبل ماتحكم ياعاطف .. عايزك تقدر صعوبة الموقف .. لأنك بتحكم علي نفسك وجيلك كله.

رامي ممكن تعرفنا بنفسك

صليب صليب .. إسمي صليب .. أن برده مرشح نفسي لوظيفة المنسق .. الرابط و المربوط الواصل و الموصول .. برده لو إخترتوني هكون وسيلتكم للخروج من هنا.

رامي وإيه الفرق مابنك وبينه.

صليب أنا براعي في توصيلاتي .. القيم والأخلاق والمبادئ

إن أنا مش بهتم بكل ده .. لأنه بيحكم من وجهة نظر دينيه مسيحيه .. رأيي دي مش شغلتي أنا بس بوصل .. من هنا لهناك .. ومن هناك لهنا.

صليب أنا برده بوصل .. لكني قبل ما وصل بحب أفلتر وأحكم هل ده صح ولا غلط.

إن زي ما قلتكلم وجهة نظر دينيه .. تحمل الصواب وقد تحمل الخطأ.

عاطف من الأخر إحنا زهقنا من الوعظ .. ومش فارق معانا الحاجت دي .. لأن تأثيرها مش بيدوم.

صليب لأنك عامل زي الأرض الصخريه إلي وقع عليها الزرع ونبت بس لأنه بلا عمق الشمس لما طلعت حرقته.. أنا أقدر أحول ده لأرض جيده لو إديتني الفرصه وإنتخبتني.

رامي يعني هتخليني إنسان مثالي.

صليب هساعدك بكل قدرتي لكن .. مش هاخد القرار بالنيابه عنك.

إن أنا بقي سايبك براحتك .. منتهي الحريه بلا قيود ولا تأنيب من الضمير .. عندي القدره علي تأجيل صوت الضمير وتجاهله عشان ميعزبكش .. وبالتالي يبقي عندك القدره علي فعل أي شيء وتخطي كل الخطوط الحمراء والخضرا والصفرا.

رامي كلام واقعي لزيز

صليب بس ده مش الواقع .. ده حلم خيال .. بيعمله إن عشان يتوهكم.

إن بالعكس .. أنا مش بعمل حاجه انا بس مجرد منسق.

عاطف بالظبط .. إحنا إلي طلبنا نتصل .. وإحنا إلي بنتعرف .. وإحنا إلي بنتكلم .. هوه بس بيوفر الوسيله.

رامي وهي دي الحريه إن الواحد يعمل إلي هوه عايزه في الوقت إلي هوه عايزه .. وبالطريقه إلي هوه عايزها.

إن تخسر برده ياصليب .. إنت متعبتش من كتر الخساره ولا إيه.

صليب لأه مش هتعب أبداً .. وهفضل مكمل .. أنا عندي رجاء .. وبعدين انا بدافع عن الحق.

إن متقولش عليه حق .. إنت مين أصلاً عشان تقرر إيه الحق .. مش ممكن الحق بتاعك ميكونش صالح ليَّ.

صليب يا جماعه لازم يكون فيه مبدأ .. لازم يكون فيه قيمه .. خط احمر مينفعش أعديه.

رامي بس ده يعتبر قيد .. والقيد بيضيق الأمر ..وبيحولك من شخص متحرر زينا .. لشخص معقد زيك .. سوري يعني

صليب ياسلام .. يعني معني كلامك .. أنك تعيش من غير مبدأ عشان تكون متحرر .. تعيش بلا قيمه ..

عاطف بالظبط .. الناس إلي عنها مبادئ وقيم .. مش بتعيش .. دي بتخنق نفسها بإيديها.

صليب عمر القيم مابتخنق بالعكس دي بتبني .. بس بتبني إنسان للملكوت .. مش إنسان عايش وهوه مش إنسان.

عاطف ياعم عيشني مش إنسان .. بس إديني فلوس .. إديني أصحاب حلوين ..إديني قدره علي الكلام والعلاقات.

صليب ياخونَّه الكلام ده مخالف لأقوال الكتاب .. مش ربنا بيقول علي لسان بولس الرسول

كل الاشياء تحل لي لكن ليس كل الاشياء توافق كل الاشياء تحل لي لكن لا يتسلط علي شيء (1كو 6 : 12)

كل الاشياء تحل لي لكن ليس كل الاشياء توافق كل الاشياء تحل لي و لكن ليس كل الاشياء تبني (1كو 10 : 23)

رامي ما هوه ده علي حسب الأشياء

صليب بالظبط .. يعني لما أحلف وأشتم وأشرب سجاير وأخش في علاقات غريبه .. يبقي دي أشياء تليق ولا لا تليق.

إن إسمحولي انا أجاوب .. إلي يحدد هنا هوه جوهر الموقف وتداعياته .. لازم تستخدم الحاجات إلي مش تليق في الوقت إلي يليق فيه إستخدام الي لا يليق.

عاطف شوفت سهله أهي. صليب إنت فهمت حاجه

إن قصدك إنه مابيفهمش.

صليب لأه طبعاً ..بس أنا عاوز أعرف فهم إيه من جملة .." لازم تستخدم الحاجات إلي مش تليق في الوقت إلي يليق فيه إستخدام الي لا يليق"

عاطف أقولك .. صليب إتفضل

عاطف ربنا يخليك .. يعيني مثلاً ..إنت في خناقه .. والواد عمال بياكلك علي قفاك لموأغزه يعني بقوه .. هل .. إسمع السؤال ده يارامي .. هل يليق .. إن وهوه بيضرب وبيفتري .. أقوله الله يسامحك .. ده يليق ؟

رامي طبعا لا يليق .. لازم أضربه انا كمان .. وأهزئه .. العين بالعين والسن بالسن والبادي أظلم .

عاطف أهو جابلك من الأخر صليب أنا حزين

عاطف ليه هوه إنت كنت في الموقف ده قبل كده.

صليب لأن الموضوع زي مإنت شرحته وجملة العين بالعين والسن بالسن والبادي أظلم .. فيها تشبه بالعالم .. مين قلك إن القيم والمبادئ المسيحيه بتقول خليك جبان .. ده لو إعتبرنا إن التشبه بالسيد المسيح علي الصليب وإنا بنقول ربنا يسامحك ده جبن وضعف .. ده لو إعتبرنا .. المسيحيه فيها شده وحزم وثقه في الكلام .. بس قبل ده في تسامح فيه محبه .. بدليل إن السيد المسيح نفسه إتولد في مزود للبقر.

إن إحنا مش فاهمين منك حاجه .. تعالوا ناخد مثل (يدخل شخصان للتمثيل) خشوا .. Action

ش1 إنت بتضربني .. طب خد ( مشهد ضرب مضحك : حرحات ماتركس + حركات كرتون )

ش2 إنت مش قدي.. الزئبق المخترق. ش1 لأه أنا قدك ونص .. الزراع اللولبي.

ش2 طب خد .. خد .. الأفعي المتحوله

ش1 ياسلام دي إختي الصغيره بتضرب أحسن منك.. العنكبوت النطاط.

رامي هي دي الواقعيه .. شايف صليب واقعية مين .. ده مسلسل كرتون مازينجر .

عاطف بس فيه جدية في القتال. صليب قتال إيه.

عاطف قتال الننجا. إن قلي إنت بتضربه ليه

ش1 عشان لازم يعرف مقامه .. وإني أقوي منه. إن طب وإنت.

ش2 يعني هوه أحسن مني .. البقاء للأفضل والأقوي.

إن شوفت ..إيه رأيك لازم أستخدم إلي لا يليق .. مش تقولي حزم وشده.

صليب أنا عايز أسألهم .. إنتوا بتتخانئوا ليه

ش12 عاوزين نعرف مين الأقوي. صليب ليه.

ش12 عشان نحدد مين الكسبان. صليب كسبان في إيه

ش12 كسبان في المعركه. صليب (بحزم) سبب الخنائه إيه

ش1 أنا أقولك .. الباشا مدايق إني بكلم سالي صاحبته.

صليب طيب وفيها إيه لما يكلم سالي يعني.

ش2 فيها إيه إزاي يعني إيه .. هوه انا مش راجل ولا إيه.. يكلمها من غير إذني ليه.

صليب لأه عندك حق .. تكلمها إزاي من غير إذنه.

ش1 وأخد إذنه ليه. صليب أله هي مش إخته.

ش12 لأه صليب قربيته

ش12 لأه صليب خطيبته

ش12 لأه صليب جارته

ش12 لأه صليب امال واحده معديه في الشارع

ش2 أصلها ال girl friend بتاعتي صليب صاحبتك يعني

ش2 أه أنا وهي بينا وبين بعض علاقه .. الإستاذ بدل ميشجعني .. بينافسني .

ش1 أله هوه الحب بالعافيه. صليب حب ..

ش1 أه .. أنا بقابلها في الكنيسه وبتعملي باي باي

ش2 شوف برده بينرفزني إزاي. صليب هوه مين إلي بيحبها

رامي خليني أشرحلك .. الواد ده ماشي مع سالي .. قوم الواد ده عاوز يخطف سالي .. قوم الواد ده إتنرفز عشان خاطر سالي .. والواد التاني ده .. عامل فيها .

صليب سالي عاطف سالي جت .. أهه سالي.. هاي

صليب هوه الواد ده إنتي بتحبيه. سالي لأ طبعاً.

صليب طب الواد ده إنت بتحبيه. سالي لأ برده.

صليب إمال بتضربوا بعض ليه.

ش2 هوه إحنا مش أعدنا مع بعض علي الشات و قعدنا نتكلم قد ساعه ونص.

سالي ده كان في الشات. ش1 هاهاهاهااااي

صليب معلش عزراً بدون قطع كلامكوا .. إنتوا بتتخانقوا علي حاجه هي أصلاً مش موجوده.

ش1 هي بتحبني أنا صليب ماهي قالت لأ.

سالي أنا بحب واحد تاني. صليب نعم؟

سالي أنا بحب إن.

عاطف وكانت هذه أخر كلماتها .. ولقد تأثرت بها .. ياليتها تعلم .. مقدار حبي لها.

ش12 وإحنا كمان بنحب إن. (يخرجوا هم وسالي) عاطف وانا بحب إن.

صليب (إستغراب) إنتوا واخدين كل شيء بضحك وتهريج .. أنا بدور علي الواقع وبحاول أثبته وإنتوا مش عايزين .

إن عايزين .. لأه .. دول معلمين .. بيتسلوا وفاهمين .. وواعيين .. كمان عنيهم مفتحين.

صليب إزاي .. إزاي تكونوا مفتحين .. ومش شايفن إنكم بتلفوا ورا بعض .. في حلقه ملهالش نهايه.. الحب طلع في الأخر مش حب .. والضرب والكره والشتيمه .. طلعت ونزلت علي مافيش .. بس إرتكبتوا خطيه .. يبقي ليه من الأول.. إنتوا فاهمين ولا مش فاهمين.

إن إنت صعبان عليا قوي.. بتكلم لغه عمرهم ماهيفهوما.

صليب أنا بتكلم عن السعاده الحقيقيه .. مش المزيفه..بتكلم عن الهدف عن القيمه .. هل المعاني دي مش مفهومة.

إن القيمه إختلفت .. ومبقاش لها قيمة .. المهم الوسيله إلي هتوصل بيها للقيمه.

رامي مادام الهدف كبير وجميل .. خلاص مش مهم الوسيله.

صليب ياسلام .. يعني أنا عشان أنجح ماعنديش مانع إني أغش. عاطف ياباشا زاكر تنجح غش تجيب مجموع.

صليب بس أنا كده بوظت معني النجاح. رامي بس نجحت.

صليب غلط .. غلط .. غلط .. ده الكتاب بيقول اما ثروة الانسان الكريمة فهي الاجتهاد (ام 12 : 27) .. تفتكر الإجتهاد في الغش .. بقي جهاد.

عاطف هوه إنت مبتذهقش .. وعظ .. وعظ .. وعظ .. فين العملية.

رامي يعني راعي إنك مستحيل تتضحك علينا بكلمتين قدام .. محدش هيصدقك .. الكلام ده إنتهي وعصره ولي.

صليب ولي .. ولي ازاي .. مين إلي فهمك كده .

عاطف وجعتك قوي ولي .. بلاش ولي .. الكلام ده كلام زينه محطوط جوه البترينه .. بس من كتر ما الناس مش بتستخدمة ترب .. والتراب ذاد .. فإدفن تحتيه .. أي كلمه بتقولها .. هتبقي مش مفهومه.. هتخش من هنا

رامي وتطلع من هنا ... إحنا في زمن .. إنجز .. أخلص .. مافيش وقت .. أبص .. وأدور علي القيم .. لأني لو وقفت هقع ومش هعرف أقوم.

صليب العيب في مين بس ياربي .. إزاي تاهت القيمه والهدف وسط الوسيله .

إن معلش .. معلش .. كلامك ده .. مش بياكل معاهم .. ولا عمرهم هيحسوا بيه.. بقي قديم أوي.. وملوش مكان جوه القلب.. وعشان كده انا أكسب .. أنا بتكلم بلسان العصر الحالي .. النت .. العلاقات .. الحب .. الجمال .. المتعه .. الاتصالات .. Global connectivity

رامي وعاطف (تصفيق) .. برافوا .. برافوا

رامي هي دي الحريه إلي أنا بتكلم بيها. عاطف أنا مش هتهته تاني في الكلام .

رامي إحنا عاوزين نعيش .. سيبونا بقي ... سيبونا .. نبني خبرتنا من تجاربنا الشخصيه .. مش من خبراتكم ..

عاطف والوسيله هتكون مع إن .. إلي بيدخلنا في كل مكان .. وبيسهل كل علاقه .. وكل لزازه.

صليب أنا عايز أقدم مثلي .. زي ماقدمت مثلك.

إن النتيجه واضحه .. انا الكسبان .. إنسحب أحسن .. الجميع إستسلم أحسن.

صليب لا .. أنا عندي رجاء .. إمال السيد المسيح إتولد ليه .. وهفضل لأخر عمرك وعمره أحاول .

إن طب إتفضل قدم مثلك .. وياريت ميكونش مثل ديني مثالي لأحد القديسين .. مش عيب فيهم طبعاً لأ .. بس لأننا مش ممكن هنقدر نكون زيهم .. دول ناس عظام .. وإحنا مش قدهم .. هاتلنا مثل بلدي تقنعنا بيه .. عاوزين نضحك .. هاهاهاها

صليب كمان .. كمان خليتهم يحسوا باليأس والعجز رامي هاهاهاها .. ياسيدي قلك وسيله

صليب أنا هوريكم إلي إنتم عايزينه .. خشوا

( يدخل شخص بلبس بدلة قديمه جداً .. وبنت في لبس قديم جداً فيبدا إن ورامي وعاطف بالضحك)

عاطف إيه ده .. فين الطربوش يا إنكل .. هاههاهاها. رامي إنتي جايبلنا ناس من سنة ستين. هاهاهاها.

صليب إبدأوا. ريمون مريم .. إزيك عاملة إيه .. وإيه أخبارك.

مريم أنا الحمد لله كويسه .. عاجبك الاجتماع. ريمون الصراحه .. النهارده الاجتماع كان مثمر جداً .

عاطف ليه كانوا بيوزعوا منجو.

مريم فعلاً .. الخدمة محتاجه الفكر الإيجابي ده .. التكنولوجيا لازم تخش جوه الخدمه.

ريمون بالظبط .. بس أنا خايف من الإستخدام الخاطئ ليها .. يعني لو وقعت في إيد غريبه ممكن توظفها غلط .. خصوصاً إنها مفتوحه .. وصعب التحكم فيها.

مريم عندك حق .. لكن متنساش برده إن المسيحي هوه إلي هيختار بين الإتنين .. بإرادتة وإختياره.

ريمون مش عاوزين نفتح عنيهم علي الحاجات دي .. دول لسه أولاد صغيرين .. لسه في ثانوي.

عاطف انا حسيت إنك بتكلم عن عيال في إبتدائي بالجمله دي.

مريم لما يعرفوها مننا ويتعلموا طريقة إستخدامها .. أحسن ما يعرفوها من بره .. ويتعلموا أوحش طريقة إستخدام.

ريمون عشان كده إنتي إقترحتي فكرة .. التركيز علي القيم والمبادئ المسيحيه .. عشان تكون منهج وهدف تعليمي في السنه الجديده.

مريم مش قوي كده .. إنتم برده ساعتوني.. وأنا كل إلي قلتوا إن الولاد محتاجين يدخلوا للعمق.

عاطف شوفت ياد الكسوف بتاع زمان.

رامي أه .. حلوه اوي العمق دي .. بتفكرني بحاجه مش فاكرها .. هاهاهاها

مريم محتاجين يدوقوا حلاوة المسيح .. نعومته وهو بيمسح كل دمعه من جوه العين .. حنانه في الغفران .. وجبروته في الدفاع عن كنيسته وعن الحق .. وبساطه في طلبه للحب إلي يستحقه.. إتولد في مزود .. فقير مع إنه اغني الكل .. بسيط .. مع إنه خالق السماء والأرض .. لازم يحسوا بالمسيح .. بالسعاده الحقيقيه.

ريمون السعاده الحقيقيه ..مريم أنا عايز .. أقولك علي حاجه

رامي قديم قوي الشغل ده .. ومش موجود حتي في الأفلام.

عاطف مش ناقص غير ورده .. وصون كمانجا .. تي را را را را .. هاهاهاها

ريمون أنا حابب إني أكمل حياتي وإنتي معايا .. رامي أكمل حياتي مكسوف تقول بحبك .. هاهاها

مريم ريمون انا.. إنت .. أنا مش عارفه أقول إيه.

عاطف متقوليش حاجه .. قولي الشبكه علينا والعفش عليكم ..هاهاهاها

رامي لأه ..سيني شويه أفكر إن اهاهاها .. So funny ... Hilarious

مريم إنت إنسان كويس .. ومع ربنا .. وشخصيتك كمان ممتازه

عاطف ممتازه جداً .. وده واضح من هدومه

رامي يعني هي هدومها إلي واو يعني .. فين المكياج .. أنا مش عارف عاجبه فيها إيه ده .

إن مافيش حاجه صح. رامي إطلاقاً .. بس نقول إيه حب زمان بقي .. هاهاهاها

إن اهاهاهاها عاطف هاهاهاها (ضحك وإستخفاف من الثلاثه)

ريمون شايفه النجم ده رامي ها .. هيكون فيه رومانسيه.

مريم أه عاطف كبير وبيلمع .. بيفكرني بإلي موجود في قصة الميلاد .. إيه رأيك لو رنمنا ترنيمه

عاطف مستحيل .. إيه ده.. فيه كده .. انا عمري ماشفت كده قبل كده.

مريم ياريت رامي بتقولك ياريت ..

ريمون ترنيمه عن الميلاد ( يقولا الترنيمه) رامي صوتهم وحش

عاطف طب شغلها علي الموبايل رامي موبايل إيه .. ده كويس لو كان فيه وكمان

إن by the way she is your mother رامي هاهااها بتقول إيه

إن she is your mother

رامي إمي .. إمي .. إمي .. إمي إزاي .. مريم .. أمي إسمها مريم ..دي إمي .. إمي .. إمي ياعاطف ..إمي ياعاطف ..بتريق عليها وعلي لبسها وعلي طريقة كلامها .. بتريق .. بتريق عليها.. رتريق عليها ..ليه .. ليه ياعاطف .. لا ..لا ..لا ..لا مش ممكن .. مش ممكن.

إن what just happened? عاطف أصلك ماتعرفش إمه غاليه عنده أد إيه.

إن إنتوا عندكم شيء إسموا غالي. مريم أد إيه التأمل في ربنا جميل

ريمون فعلاً .. هي دي السعاده الحقيقيه .. الشعور إلي البني قادم بيتمناه ..

مريم نفسي كل الأولاد في الخدمه .. وإبني طبعاً لما اخلفه .. يكون عنده مزود داخلي .. مذود المسيح يتولد فيه .. يتعلم منه الإتضاع .. ويروح بروحه معاه في التسابيح والألحان .. ويكون ليه سلاح يتحامي بيه وسط العالم .

ريمون يارب .. كمل مسيرتنا ببركتك .. وحافظ علينا من توهة العالم ..

إن علي فكره ده خط أحمر .. إحساس لازم تبعدوا عنه.

صليب إحساس الإمومه أقوي إحسان في الوجود .. لأنها أول شيء إنت بتفتح عنيك عليه.. العمق إلي بتكلم عنه مريم أقوه بكتير من الإحساس ده .. سدئوني .. إذا حد فيكم بجد حابب الإحساس ده فالعمق في المسيح أقوي وأقوي وأقوي .. ده ربنا بيقول ها ملكوت الله داخلكم (لو 17 : 21)

رامي السعاده .. السعاده الحقيقيه .. فين ألاقي العمق ده ياصليب .

صليب في أي شيء وكمان كل شيء .. المهم إنت تدور عليه.

مريم ماتعيطش يارامي أنا مسامحاك.

رامي إيه ده.. إنتي شايفاني .. أنا أسف .. انتي بجد مسامحاني.

مريم إسمع كلام ربنا .. وإدخل للعمق .

ريمون إبني رامي .. دي مش النهايه .. دي البدايه يبني .. كل سنه بنبدأ مع رب المجد بدايه وميلاد جديد ندفن بيه الإنسان العتيق .. إنسان الشهوه والحريه الغير مسئوله ونحي الإنسان الجديد .. الإنسان الذي يليق.

رامي عندك حق ..بس أنا محتاجك جمبي يا إمي.

مريم ومين قلك إني مش جمبك .. إعتبرني جمبك ... أعتبرني الكنيسه .. الكنيسه إمك الحقيقيه .. حافظ علي نفسك وعلي الخدمة وعلي الكنيسه .. خلي ربنا يبني هوه الهدف والوسيله .. الهدف والوسيله وكل شيء .

إن أنا مش فاهم ليه ده حصل.

صليب feeling إحساس .. هوه ده إلي بيميز المسيحي .. إحساسه .. روحه .. وإيمانه .. ورجائه الثابت المبني علي أساس التوبه .. والرجوع إلي حضن الأب.

إن what ever? مش مهم .. إنت ساعات مش بتفهمني .. وانا كمان دلوئتي مش فاهم .. ليه مايه نزلت من عنيه.

صليب دي دموع .. دموع التوبه .. الدموع إلي بتغسل وبتشفي .. ودي حاجه عمرك ما هتفهمها لأنك أله..Machine

إن ok .. نعلن الفايز بقي.. عاوز مين يكون المنسق العام للإتصالات لــ 2013.. قول يارامي.

رامي مش إنت .. أنا إخترت صليب .. عارف أنا بكون سعيد جداً وأنا في وسط زمايلي وإحنا عاملين نضحك .. ونتريق .. لكن بروح البيت بكون حزين .. وزي مايكون فيه حاجة ناقصاني .. مش عارف إيه هيَّ .. ودلوئتي أنا كنت بعيط وحزين .. بس الغريب إني دلوئتي حاسس بفرحه .. فرحه مش قادر أوصفها.. خلاص حاس إني ليَّ قيمه وهدف عايش عشانه.

إن طب وإنت يا عاطف

عاطف رامي أنا .. أنا. رامي أنا مش زعلان ..ده في الأخر قرارك ( يخرج إن وصليب )

عاطف أنا عقدة لسان إتفكت .. خلاص مش هتهته تاني.. أنا مسدأت يارامي .. تعالي معايا .. الحريه .. عالم بلا قيود.

رامي المسيح بيقول من وجد حياته يضيعها و من اضاع حياته من اجلي يجدها (مت 10 : 39) . . جه الوقت إلي أرجع لأبي وأقول يَا أَبِي أَخْطَأْتُ إِلَى السَّمَاءِ وَقُدَّامَكَ، لو15: 19 وَلَسْتُ مُسْتَحِقًّا بَعْدُ أَنْ أُدْعَى لَكَ ابْناً. اِجْعَلْنِي كَأَحَدِ أَجْرَاكَ عاطف إنت بقيت بتكلم زيهم .

رامي عايز أجرب .. يمكن يكونوا عندهم حق.. سلام .. انا رايح لأبونا في كلام كتير ناوي أقوله وانفذه

عاطف سلام يا صاحبي .. أنا إخترت إن

(يذهبان ليسلموا علي بعض فيدخل ش 12 وسالي ويدورا حول عاطف .. ويخرج رامي مع والديه)

(ترتفع صوت المسيقي في حين عاطف يلف حوله الشخصيات ويضحكوا - دليل علي وسائل الشر المعطاه لعاطف + رامي يتعلم الصلاه بدموع ووالديه حوله ثم ينتهي المشهد علي صراخ.)

الشر مبروك عليك احنا/خد البنبوني ده/خد الكاس ده بلع بيه/مش مهم تذاكر خد أعمل براشيم/بص خش علي الموقع ده هتدعيلي/ (خنائه علي عاطف) مش مهم أي حاجه المهم الحب بتاعي/ لا الحب بتاعي/ لا بتاعي انا هات بوسه.

عاطف ألاه .. ألاه ..كفايه .. كفايه .. كفايه غلط .. كده ممكن أموت .. روحي مش قادر أستحمل الوسائل دي كلها .. دي ضد مسيحيتي لأه لأه .. لأاااااااااااااه .. رامي .. رامي .. إنقذني .. اوعي ياله .. أنا بلعب كنج فو.

رامي سيبوه

سالي هوه إلي إختار .. وإرادته هي إلي أستسلمت .. لازم يبقي معانا .. خلاص هوه إتعود علينا وإحنا كمان إتعودنا عليه.

عاطف مش عايزها .. مش عايزها العاده دي .. أنا ههرب .. لازم اعيش .. إوعي إنت ماسك جامد ليه.

رامي لازم الأول تعلن توبتك .. وبعدين تروح لأبونا الكاهن .. عشان تعترف بخطيتك .. وبعديها تتناول وربنا يرمي خطاياك في بحر النسيان.

عاطف أنا هتوب .. عاوز اتوب .. ياه بالسهوله دي سيبتوني .. هي دي كلمة السر .. التوبه.

رامي البابا شنوده قال .. مفيش غير طريق واحد للخلاص .. التوبه.

عاطف طب ياله نروح لأبونا ونعترف .. ونخلص من إن واعوانه

رامي ياله بينا (يخرج الجميع)

رامي ياه عدا دلوئتي شهرين ونص .. عاوزين نستعد للصوم الكبير .

عاطف بإذن الله .. الحمد لله ..إن احنا عرفنا الطريق الصح

(تدخل عليهم البنت التي في بداية النص ولكنهما لا يراها : رامي)

عاطف إنت سمعت إلي أنا سمعته .. ولا دي أوهام

رامي يارب ما أكون سمعته.. هوه فيه أوهام بتسمع

البنت رامي

عاطف مش ممكن يكون تهيئات .. الصوت واضح وصريح وخرم ودني .. لف بشويش بشويش

الإثنان الصاروخ البنت مين فيكم رامي

رامي يا أنسه .. احنا بطلنا علاقات.. وتوبنا ورجعنا لربنا .. وربنا قبل توبتنا.

عاطف حضرتك بنت حلوه .. وظريفه .. وجميله .. و .. سامحني يارب بكدب .. سامحني ..سامحني .. و وو .. و .. و

البنت و إيه

عاطف بدور علي حاجة واحد حلوه مش لاقيها .. أه شعرك .. شعرك

البنت (تخلع شعرها وتعطيه لعاطف ، ويتضح انها إن) خد أهوه

عاطف يا نهار أبيض .. وكمان قرعه .. إجري يامعلم

إن القصه لسه مانتهتش .. كل ثانيه من حياتكم هتختاوا فيها بيني وبينه .. ببساطه أنا وهوه بنعبر عن إرادتكم .. بس هوه الإراده القويه وانا الإراده الضعيفه .. القصه بتبتدي من هنا من النهارده 2013 من هيختار الضعف ومين عايز القوه .. إختار وإضحك وعيش في التهييس ... في إتصالاتك وعلاقاتك .. Global connectivity... It’s your turn .. هاهاهاهاهاهاهاهاهاهاهاهاهاهاهاهاها..

صليب بس .. إيه .. مبسوط قوي .. فاكر نفسك فزت .. أنا إلي فزت.. العيال إختاروني .. مش إنتوا برده إخترتوني .. ماتنسوش ياجماعه إن ربنا معانا .. وبميلاده بيعلمنا حاجات كتيره قوي .. من ضمنها إنه قادر يخلصنا بس إحنا نديله قلبونا وزي ماقال ربنا علي لسان بولس الرسول في رسالته لأهل فيلبي إصحاح 4 أيه 13 استطيع كل شيء في المسيح الذي يقويني (في 4 : 13) .. ياله عيد سعيد عليكم وبدايه جديده مع ربنا .. سلام .

ولربنا المجد الدائم من الأن وإلي الأبد أمين

مسرحية اتصال عالمي