مسرحية اسقاط النظام

مسرحية اسقاط النظام  

الفصــــــل الأول

المنظر الأول - القرية

القائد	17                              "يجلد  غفيرمربوط فى شجرة"
الغفير	أى
القائد	أخرس...18
الغفير	حرام .. ظهرى أتقطع
القائد	دا أنتا حقتك الشنق ..19
الغفير	أنا مظلوم
القائد	20 انكتم والا اكملهم 40
الغفير	هانكتم ..هانكتم
القائد	(يفكه) البس هدومك ..واقف فى خدمتك والمرة الجاية محدش هيرحمك من ايديا مفهوم ..انطق مفهوم
الغفير	تمام يا افندم
القائد	يالا أنجر على خدمتك ..عاوزه بيبرق
الغفير	هيبرق ازاى يا سعاده الباشا .. يا عالم هو العنب بيبرق
القائد	هيبرق .. غصب عنك هيبرق.. والا بموتك المرة الجاية .. تمام يا عسكرى
الغفير	تمام يا افندم
القائد	وأنتوا ملموميين كده ليه هو حاوى .. يالا كل واحد على شغله واياك اسمع نفس حد فيكوا ..بلد تخاف ماتختشيش (يخرج)
	"امرأه تقترب من الغفير وتعطى له قله ميه ينظر الغفير يمين وشمال ثم يشرب أهالى البلد يعملون فى صمت فمنهم من يزرع بجوار الشجرة والنساء تخبز فى ماجور ومنهم من يجدل الخوص اما الغفير فأمسك بقماشه لينظف تمثال العنب"
الغفير	هيبرق ازاى
الشعب	هش
الغفير	يا عالم هو العنب بيبرق .. ولا اكمنه حضرة العمدة
الشعب	هش
الغفير	عنب من 120 سنه هيرق ازاى؟ ده اكيد طعمه مر .. و الدليل على انه مر انه لعمده مخلى عيشتنا مر فى مر
الشعب	هش .. اسكت
الغفير	ما أنا ساكت ..اقول ايه تمام يا افندم ..ما هو الدنيا لو فيها عدل مكانش الجدع ده (يشاور على تمثال العمدة) بقى مبرطع فوق دماغنا يأمر وينهى .. فين عدلك يااللى مسير الامور (ينظف تمثال العنب)                            "يدخل موسى ملابسه تدل انه غريب عن البلد "
موسى	سلام "الجميع ينظر اليه دون ان يجيب احد" سلام
الغفير	ماتتعبش نفسك محدش هيرد
موسى	ده أنا بقول سلام
الغفير	مايعرفوهاش ..بيسمعوش هنا غير سلام سلاح
موسى	وساكتين
الغفير	آه ساكتين دول قربوا ينسوا الكلام
موسى	مأنتوا لازم تردوا عليا  دأنا جاى من بعيد علشانها وأنتوا لازم تدلونى على مكانها.. ردوا
الغفير	ماتتعبش نفسك ده شعب ملعون
الشعب	هش
موسى	اتكلموا ..ده السكوت داء
الشعب	هش
موسى	ملعون فى كل كتاب ياداء السكوت  ملعون فى كل كتاب ياداء الخرس الصمت قضبان مسجونين عنكبوت  يتشندلوا الخياله فيه بالفرس  يتشندلوا الخياله واشحال بقى عصافير غناوى ملونه رقيقه حياتها فى الزقزه وقلبكم طير خير ان ماغناش يموت
رجل1	ده باينه بيلبخ بالكلام
امرأه1	ليكون شيطان
رجل2	اقطع دراعى لو مكانش جاسوس بعته لينا البعدا علشان ينقلهم آخبارنا أنا عارف ربنا ساكت عنهم وعن بلاويهم ليه ده أنا لومكانه كنت بدتهم بكلمه ..بينا نخلص منه يارجاله قبل ما يودينا كلنا فى مصيبة          "يجرى 3 رجال نحو الغفير ويسحبون منه البندقيه"
موسى	مصيبه علشان عاوزكم تتكلموا
رجل2	هات  يا صابر        (يشد البندقية من صابر الغفير)
الغفير	وأنتوا لما تفوقوا ..تفوقوا عليا
امرأه3	طخه وخلصنا
الغفير	لا الميرى لا..الميرى لا
رجل1	أنت مين وايه اللى جابك حدأنا
رجل2	انطق والا هضرب فى المليان
الغفير	الا الميرى ..الميرى لا
موسى	موسى
رجل3	النبى
موسى	أنا موسى
رجل1	مش باين
موسى	ابن فلاح
رجل2	مش باين
موسى	امى جالها الطلق جانب الترعه واتولدت فى الميه فسمونى موسى " امرأه  تمثل مشهد الولاده وتقمط طرحتها كانها ابنها ويجلس بجوارها الأب ويجلس بجوارهما كاهن حول طبليه
الام	اشن ايه
الكاهن	اشبين يا ست ام موسى
الاب	ويطلع مين ده يا قدس ابونا
الكاهن	الوصى
الام	وصى ايه يا ابونا بنقول لقدسك عاوزين نعمد الواد
الكاهن	ما هو علشان يتعمد عاوزه له اشبين
الاب	يا ابونا قدسك جديد على البلد ومش عارف سلوها احنا ملناش فى الشابيل
الكاهن	اشبين
الاب	ايوه عارفاها هو احنا بنسمع غيرها فى القداس
الكاهن	هى دى المشكله
الام	مشكله ايه..يا ابونا دا احنا عاوزين نعمد الواد
الكاهن	المشكله انكوا مش عارفين الفرق بين اشبين واشليل
الاب	مافيش مشكله ولا حاجه يا ابونا دى هى هى
الكاهن	ازاى بقى يا ابو موسى
الاب	اشبين دى كأنت قبل 25 يناير اما اشليل دى بعد 25 يناير مصر بتتغير يا ابونا
الكاهن	يا سلام ..ايه النصاحة دى يا ابو موسى
الاب	امال اصلى أنا تحريرى قديم
الكاهن	اشليل دى فعل قبطى
الاب	مرفوع بالضمة
الكاهن	ما أنتا شاطر اهه يا ابو موسى ..لأ من غير ضمة..اشليل معناه صلى او صلوا ..والكاهن بيقولها علشان ينبه اذهان الحاضرين للاستعداد وللصلاه بتقوى ووقار وهدوء
الام	ايوه والشماس بيرد عليه ويقوله حاجه كده فيها طاسة ستى
الكاهن	اسمها ايه بس ابروس افشى اسطاثى تيه يا ست ام موسى ومعناها قوموا علشان نصلى
الاب	وده ماله و مال عماد المحروس ابنى
الكاهن	دور على الحارس الامين
الاب	حارس
الكاهن	كلمه سريانية معناها الحارس او الكفيل
أمرأه	كفاله الشر
الكاهن	الوظيفه دى اتعرفت من ايام الاستشهاد .. لما كان الاب و الام بيستشهدوا كان الاشبين ياخد الطفل ويهتم بتربيته التربيه الروحيه السليمه .. زى ماجدة وام القديس تيموثاوس تلميذ بولس الرسول سلموه الايمان وعلموه الكتاب المقدس من صغره ..  لدرجه ان بولس الرسول فى رسالته التانية ليه قال وانك منذ الطفولية تعرف الكتب المقدسة القادره ان تحكمك للخلاص بالايمان الذى فى المسيح يسوع
الاب	طب ده كان فى زمن الاستشهاد .. لكن احنا موجودين اهه
موسى	ايوه يا ابا موجودين بس ماتنفعوش اشابين  ماهم كلهم قدامك قعدين .. اسألهم كام واحد كان امين فى مسئوليه الاشبين  كام واحد يا مسيحيين ولا هى اللقمه والهدمه والمدرسه والجامعه والحياه الدنيا انما علام الاخره وسلاح السما كان ورا ورا ظهركم اترمى ولا أنتوا مطنشين ولا ناسيين ولا ايه يا اشابين
	"موسى وحيداً على المسرح ويظهر له الغريب برداء ابيض"
موسى	أنت مين
الغريب	أنا قبل ابوك موجود
موسى	تعرف ابويا
الغريب	تعالى معايا(يخرجان)
الاب	ابونا عنده حق احنا ماننفعش
الام	رايح فين
الاب	ادور على الضامن اللى هينور لابننا طريق السما
الغريب	وابوك لف كتير ملقاش فى البلد واحد قعد جنب الشجره تعبان (الأب جالس بجوار شجرة يفكر)
الاب	يعنى كان لازم تنورنا يا ابونا .. ما احنا كنا قاعدين فى الظلمه سنين مش فاهمين .. دلوقتى الحيرة بتاكلنا .. اصلك مش بتتكلم عن غريب دول ولادنا .. الامانه اللى حانيه رقابنا
الغريب	مالك يا راجل يا طيب
الاب	تعبان
الغريب	عارف
الاب	منين أنا اول مره اشوفك
الغريب	أنا غريب
الاب	يبقى ازاى عارف.. دول قالوا فى الامثال الغريب اعمى ولو كان بصير
الغريب	اللى بتدور عليه مش هنا
الاب	أنت عارف أنا بدور على ايه
الغريب	اخرج بره البلد وامشى يومين بليله فى اتجاه بحرى هتلاقيها هناك عايشه فى قصر كبير .. استأذن ابوها مش هيرفض .. عمره مارفض الخدمة وبنته جميلة ومتعلمة وفوق ده كله فى حضن المذبح متربية
الاب	وهعرفها منين
الغريب	هتلاقيها شايله جرة ميه "تدخل رفقة حامله جره ماء- يذهب اليها الأب"
الاب	ممكن تدينى أشرب يا بنتى
رفقة	طبعاً يا سيدى اتفضل .. ولو تسمح تيجى معايا البيت تأكل كسرة خبز وتستريح
الأب	أنا طالب منك خدمه اكبر من كده يا بنتى وارجوك ماتكسفنيش
رفقة	نتكلم فى البيت وكمان اعرفك على والدى اتفضل (تظهر صديقتها ليئه قبيحة المنظر)
ليئه	رفقة ..رفقة ..رايحه فين
رفقة	روحى أنت ..اتفضل
ليئه	اروح أنا ..هى ايه العباره
قايين	عبارة ايه يا بت يا ليئه
ليئه	يخيبك بتعمل ايه هنا الساعه دى
قايين	انطردت من الشغل عبقال املتك
ليئه	ومالك مبسوط كده دى مصيبه
قايين	ولا مصيبه ولا حاجه حظى ولا هشتريه
ليئه	حظ ايه يا ابو حظ ..أنت اتجننت يا قايين
قايين	اديكى قولتيها قايين
ليئه	مش فاهمه
قايين	عارفه يا بت يا ليئه امى سامتنى قايين ليه
ليئه	احنا فيه ايه ولا ايه
قايين	علشان رفست اخويا فى دماغه وأنا فى اللفه جبت له ارتجاج فى المخ ومات
ليئه	الله يرحمه..قولى أنت هتيجى تقابل ابويا ازاى وأنت عواطلى
قايين	مابدهاش بقى
ليئه	نعم يا عنيا
قايين	نعميين يا حبه عنيا
ليئه	ده أنا كنت سيحت دمك
قايين	ياريت ..ترحمنى من بلاوى الدنيا
ليئه	ولا..فوق
قايين	فوقى أنت احنا مانفعش بعض
ليئه	جاى انهارده تقول كده ده أنا اروح فيك فى ستين داهيه
قايين	يا بت أنت فقيره وأنا افقر لو اتجوزنا الفقر هيبقى قراض بياكل لحمنا وعمره ماهيفارق جدتنا
ليئه	ولما أنت عارف كده..شبطتنى فى جلبيتك المقيحه ليه السنين دى
قايين	سنين ايه يا بت دول سنتين عمى
ليئه	طبعاً ما أنت مش غرمان حاجه أنا اللى استاهل انى أمنت لواحد زيك
قايين	اسمعى بس
ليئه	من انهارده مالكش كلام معايا
قايين	يا بت أنا عاوز مصلحتك
ليئه	مصلحتى..دى البلد كلها عارفه حكايتنا ولولا ان ابويا صاحب مرض كان زمان دمى سايح فوق مية الترعة منك لله منك لله "تخرج"
قايين	غورى بفقرك ما هو اللى يسيب القمر ويبص للمبة جاز يبقى غبى بقى يا عالم حد يحط بوزه فى ليئه ويدى ظهره لرفقة..الاصحيح هو مين الراجل اللى كان ماشى معاها
موسى	ابويا خدها على دارنا
الغريب	كنت أنت ساعتها فى اللفة ابن 40 يوم
موسى	وبقت اشبينتى
الغريب	الحارس الامين
موسى	وشاليتنى على دراعها وقت عمادى وجحدت عنى الشيطان وعلمتنى
الغريب	10 سنين
موسى	فاكرها وفاكر حكايتها ولا صوت ترانيمها ولا خشوعها فى صلاوتها والسنين ماكأنت بتغير ملامحها
الغريب	الزمن بسنينه يعجزوا على حفر الشيب فى قلب أخضر نابت فى الارض الجيدة
موسى	ولما كبرت وشبيت سألت عنها .. قالوا اختفت فجأه .. لفيت البلاد وقعدت ادور سنين من غير جواب.. محدش عارف اراضيها ..أبوس رجلك قولى فين طريقها ساكت ليه .. أتكلم
الغريب	تعالى معايا وهتعرف كل شئ فى أوانه .. تعالى الطريق لسه طويل     black

 

 

 

 

 

 

 

 

	المنظر الثانى قصر الغريب قصر به العديد من الابواب المتشابهه عدا باب واحد مميز - موسى وحيداً فى منتصف المسرح
موسى	5 سنين وأنا فى قصر الغريب كنت فاكر هلاقيها هنا .. لكن القصر طلع زى كل البلاد اللى دورت فيها من غير فايده .. وأنا هنا وحيد .. ماانكرش ال5 سنين عدت هوا وأنا باستكشف الابواب باب باب ماعدا الباب ده .. والعجيب ان الباب ده هو الوحيد اللى مختوم .. وفى أول يوم ليا هنا فى القصر قالى الغريب
الغريب	شايف الباب ده
موسى	المختوم
الغريب	اياك والباب ده ..القصر كله قدامك ..اتنعم بيه زى ما أنت عاوز لكن امرى الوحيد ليك ..اياك تفتح الباب ده ابداً
موسى	اشمعنى
الغريب	متسألش ..ده امرى الوحيد ورا الباب ده سرى .. والبيوت أسرار ومش كل الأسرار ينفع تنكشف قدام الزوار  "يختفى الغريب ويبقى موسى"
موسى	البيوت أسرار..(يدق جرس باب القصر) ايه الصوت ده معقول ..جرس .. 5 سنين هنا ماسمعتش الصوت ده قبل كده 5..  سنين لوحدى محدش زارنى .. حتى الغريب فين وفين لما كان بيبان "صوت الجرس - يخرج موسى"
عابرسبيل	سلام يا ابنى
موسى	سلام
عابرسبيل	تسمح لى "يدخل وهو متمسكا بعصاه"
موسى	أتفضل
عابرسبيل	خد بيدى ..يحافظللك على بصرك ممكن بق ميه
موسى	من عنيا "يحضر له كأس ذهبى"
عابرسبيل	(يشرب) كتر خيرك
موسى	دى حاجة بسيطة
عابرسبيل	قصرك ده يا ابنى
موسى	لا
عابرسبيل	امال قصر مين؟
موسى	قصر الغريب
عابرسبيل	ماغريب الا الشيطان يا ابنى امال أنت مين؟
موسى	ضيف..
عابرسبيل	بس شكلك بقالك كتير
موسى	5 سنين
عابرسبيل	5سنين ..وتقولى ضيف امال فين أصحاب الدار؟
موسى	معرفش
عابرسبيل	طيب .. معطلكش
موسى	ماتستنى شويه ناكل لقمه
عابرسبيل	ضيف بيعزم ضيف على دار مش داره وعلى غدا مش من ماله
موسى	عندك حق ..بس اصل أنا بقالى كتير لوحدى وماصدقت الاقى حد يكلمنى
عابرسبيل	وايه اللى جابرك ماتمشى
موسى	أمشى..وأسيب القصر
عابرسبيل	واضح انك مستمتع
موسى	كنت
عابرسبيل	ودلوقتى
موسى	مليت
عابرسبيل	مليت من عيشه القصور
موسى	مليت من الوحده
عابرسبيل	عجيبه..أنا لوعايش فى قصر زى ده ..حياتى هتبقى مليانه بهجة
موسى	ماانكرش ..بس ده فى الاول
عابرسبيل	وايه الابواب دى كلها ..ياترى دخلتها
موسى	ايوه
عابرسبيل	كلها
موسى	كل باب وراه قصة كبيرة
عابرسبيل	على كده اتعلمت كتير
موسى	اكتر ما تتصور ..ما هو اللى يعيش ياما يشوف..
عابرسبيل	يا ابنى أنا عشت سنين وعمرى ماشفت
موسى	أنا أسف مااقصدش
عابرسبيل	ماتتأسفش على شئ ماكنلكش فيه ذنب .. كل واحد بياخد حظه وأنا حظى قليل عايش فى عش متر فى متر وأشحت اللقمة علشان مامتش من الجوع وادور وسط الزبالة على خيش أدفى بيه فى ليالى البرد ايه ..هأرفك ليه بقصتى أنت حظك فى الدنيا كبير "يقترب من الباب المختوم"
موسى	حاسب يا عم
عابرسبيل	ايه فيه بير
موسى	لا ..تعالى من هنا
عابرسبيل	ماتفهمنى يا ابنى العباره
موسى	أصلك قريب من الباب المختوم
عابرسبيل	العتب على النظر يا ابنى
موسى	معلش ..
عابرسبيل	أنت مش قولتلى انك دخلت الأبواب دى كلها
موسى	ماعدا الباب ده
عابرسبيل	اشمعنى
موسى	سر
عابرسبيل	سرك فى بير
موسى	مش سرى ده سر صاحب الدار
عابرسبيل	أه ما هو البيوت أسرار
موسى	عندك حق
عابرسبيل	على كده قافل الباب بالضبه والمفتاح
موسى	ابداً ده مواربه بس خاتمه
عابرسبيل	يعنى فتحه اسهل من الأبواب التانيه
موسى	ايوه
عابرسبيل	يا ترى ايه اللى ورا الباب ده
موسى	وأنا مالى
عابرسبيل	يكنش ماله
موسى	معرفش دى أسراره
عابرسبيل	يابرود اعصابك بقالك 5 سنين ولا على بالك
موسى	قصدك ايه
عابرسبيل	قصدى انى بقالى 5 دقايق والحيرةأكلت دماغى
موسى	حيرة ايه
عابرسبيل	ايه اللى ورا الباب
موسى	قلتلك معرفش
عابرسبيل	علشان تبقى المعرفة ليه
موسى	بتتكلم عن ايه
عابرسبيل	عن الغريب الأنانى
موسى	أنانى .. ده فى قصره أوانى
عابرسبيل	أواك بس لغى عقلك
موسى	لا
عابرسبيل	بخيل .. اداك طعام الجسد ونهاك عن غذاء الروح
موسى	بتقول ايه
عابرسبيل	المعرفة يا صاحبى..المعرفة.. تعرف ايه عنه؟
موسى	ما اعرفش
عابرسبيل	طب عن قصره
موسى	أعرف
عابرسبيل	لا متعرفش..عايش ومش عارف لأن قلب المعرفة ورا الباب اللى منعك عنه
موسى	هو حر
عابرسبيل	وأنت عبد
موسى	لا
عابرسبيل	عبد ..آمرك وأنت طعت طاعة عميا
موسى	أنا مش أعمى
عابرسبيل	ماحصلتش الأعمى ..الأعمىدور على المعرفة ومااستسلمش للجهل .. فقير آه بس حر..  حزنى عليك أنت عبد جاهل عاش فى قصر وسنين عمره بتتسرسب من ايديه وقاعد حاططت ايده على خده والملل بيقتله وباب المعرفة موارب قدامه وهو ولا همه ..اقولك ايه يا مسكين
موسى	مسكين
عابرسبيل	اسمع يا ابن كلام نحتته السنين ..  قالوا زمان فى الأمثال أقتنى الحكمة ..أقتنى الفهم .. الحكمة هى الرأس .. فاقتنى الحكمة .. وبكل مقتناك أقتنى الفهم .. أرفعها فتعليك..وتعطى رأسك اكليل نعمة.. وعلشان تقتنى الحكمة والفهم لازم تعرف..  وقلب المعرفة ورا الباب المختوم .. ومن حقك تعرف وماتقوليش أسرار.. ده كلام الكفار أيوه الكفار اللى يقولك الغى عمل ده وأوعى تفهم الكون "يشير الى عقله" اذا كان مش عاوز يعرفك ماكانش جابك لكن بدام رضى ودخلك بيته يبقى من حقك تعرف .. من حقك تنور ظلام الجهل وتفتح باب المعرفة.. ولا هو ظلم وخلاص.. أنا لو مكانه مكنتش عملت فيك كدة وسيبتك فى الحيرة دى .. وعلشان تصدقنى هات ايدك
موسى	ليه؟
عابرسبيل	ادخلك
موسى	لا
عابرسبيل	جبان
موسى	لا
عابرسبيل	جاهل
موسى	لا
عابرسبيل	تعالى ماتخافش
موسى	أنت مين؟
عابرسبيل	عابر سبيل
موسى	وايه اللى جابك؟
عابرسبيل	علشان أحررك
موسى	من ايه؟
عابرسبيل	من خيوط العنكبوت
موسى	عنكبوت ايه؟
عابرسبيل	عنكبوت الجهل اللى صايدك وماصص دمك من سنين وأنت مستسلم.. أحررك من الظلم والهوان .. وأخليك تثور على الطغيان أعلم لسانك الصراخ..  وأفك عقده الصمت .. هأحررك وأحييك
موسى	ومين قالك ان الموت مش فارد جناحه ورا الباب المختوم
عابرسبيل	عمر ما الموت يستخبى ورا الببان  الموت بيظهر فى كل اوان ماتعقهوش قصور وماتوقفهوش مياه الطوفان  ماتخافش مش هتموت تعالى..تعالى ..هات ايدك .. ايوه كده يا ابنى من الظلم انك تعيش مش عارف يالا فوق وأفضح الظلم ومش بالكلام ولا اللسان انما بالعمل ونزع الختم من الببان .. يالا أنت واقف قدام الباب وارادتك فى ايدك .. خطوة واحدة وتنال المعرفة وتنهل من الحكمة .. خطوة واحدة.. والباب ينفتح والنور ينور.. المكان خطوة واحدة وترتفع بعملك فوق حدود الأنسان .. ومين عارف يمكن تدخل مخلوق وتخرج منها خالق .. أتفضل يا صاحب العظمة والجلالة     "يسجد له"   (يتقدم موسى ويفتح الباب المختوم ثم يلتفت نحو عابر السبيل الساجد له)
موسى	مش هتدخل معايا
عابرسبيل	ياريت كان ينفع وبعدين لما تدخل أنت كأنى دخلت تمام وأبقى افتكرنى ..سلام    (ويتحسس طريقه للخارج وهو يبتسم)   Black

 

 

 

 

 

 

 

 

 

 

 

 

المنظر الثالث  - قاعة العرش

	(قاعة بها عرش فوق درجات سلالم وحول القاعة شاشات عرض سينمائى - يصعد موسى درجات السلم ويلبس تاج الملك على رأسه ووشاح الملك على كتفه ويمسك بصولجان الحكم وما ان يجلس حتى يعرض على شاشات العرض أحداث تاريخيه متلاحقه من كل أماكن العالم ومن عصور مختلفة)
موسى	الفرصة جات لحد عندى علشان أعرف فين اشبينتى "ثم يقول بصوت جهورى"أنا عاوز أعرف مكان اشبينى حالاً يرى الاشبينه يوم عماده وهى ممسكه به فى المعمودية يراها فى بيته على سريره ممسكه بالكتاب المقدس وتقرأ له يراها ممسكه بيده وتدخل به الكنيسه كل ده انما عارفه..انما هى فين دلوقتى
	(تظهر رفقة نائمه على فراش بجوار زوجها وابنها الرضيع ويتقلب الزوج على الفراش فنجده قايين ينظر نحو رفقة النائمه ثم يتسحب ويخرج من الغرفة) ويقترب قايين من غرفةأخرى ويدق على الباب بخفوت فتفتح له ليئه صديقةرفقة وتبتسم له ويدخل قايين  الغرفة ويغلق الباب ونسمع صوت ضحكات ليئه
موسى	ليه..وعشانيه..ومع مين.. ازاى نظرت فى الملكوت  كتير وانشغلت وبكلمة ليه وعشانيه سألت أسأل سؤال الرد يرجع سؤال واخرج وحيرتى أشد مما دخلت فوق يا موسى..فوق..أنت لازم تنبه رفقة باللى بيحصل من وراها لازم تعرف خيانة زوجها ليها طب أصحيها ازاى..ازاى مافيش غير ابنها (يبكى الطفل بجوار رفقة فتستيقظ)
رفقة	بس يا حبيبى هوه ..هوه..نام (ثم تنظر حولها فلا تجد قايين فتأخذ لمبه جاز وتبحث عنه حتى تسمع صوت ضحكات ليئه فتفتح الباب وتقع منها اللمبه الجاز على الارض وتشعل الارضية ) آه يا خاين ومع مين مع صاحبتى اللى فتحت لها باب بيتى بعد ما انسدت كل الابواب فى وشها
قايين	اسمعى يا رفقةأنا هفهمك
ليئه	مالك عامله زى البابور القايد ماتسبيه يفهمك
رفقة	تفهمينى ايه بعد اللى شفته بعينى
قايين	أنت فاهمه غلط .. أصلها
رفقة	أخرس.. بره ..اطلعوا بره بيتى بره  (تضربهم بحذائها وتطردهما خارج الدار رفقة تقع على الارض وتلطم على وجهها) حبيت لكن حب خسيس من غير حنان  وصاحبت لكنصحبه غدر مالهاش آمان  اروح لمين يسمعنى واشكى له تقل بلوتى مصيبتى محفوره فى القلب مش ع اللسان "تبكى منهاره"
موسى	ياريتنى مادورت عليها .. ياريتنى ماعرفت طريقها .. بس كنت لازم انبها علشان الخاين يأخد جزاؤه .. اخص عليك يا زمن فين العدل يا صاحب العرش .. ازاى يسمح بآلام واحدة كرستله حياتها ازاى توقعها بين زوج خاين وصديقة غدارة ازاى يسمح بكده .. وياترى أبويا فين دلوقتى عايش ولا ميت سعيد ولا تعيس أنت فين يا ابا ( نرى ابوه نائما على السرير) الحمد لله اهو نايم فى أمان "نرى لص يحمل اكياس قمح على ظهره ثم يضعها على حمار ويذهب ليحمل كيساً أخر" الحق يا ابا قمحك بيتسرق .. أصحى يا ابا أصحى
الاب	"يشهق أبوه" باسم الصليب "ويمد يده ويشرب من قله بجواره ويسمع صوت جلبه خارج الدار فيفتح الشباك ويشاهد اللص يسرق قمحه يصرخ" حرامى..حرامى "اللص محاط بمجموعة من العسكر والأب ينظر اليه بتشفى ويحمل اكياس قمحه"
موسى	اهه كده..هو ده العدل الحرامى لازم ينحبس علشان يبقى عبره لكل اللى زيه.. عجبى عليك يا صاحب يوم الدين  خلقت كل الخلق من اصل طين وخليتهم بينزلوا كلهم مغمضين لكن بعد الدقايق والشهور والسنين تلاقى ناس أشرار وناس طيببين  وأنت يا امه نايمة برضة هادية ولا الخطر حواليك وأنت مش ودارية ( الأم نايمة على سريرها ولص يفتح دولابها ويخرج شاكمجية ويسرق دهبها) أنا خايف اصحيها .. يحس بيها اللص ويقتلها .. بس مش معقول أشوف دهب أمى بينسرق قدامى وأسكت.. أتصرف أزاى .. أيوه..الفاس المتعلق فوق راس الحرامى "نرى فوق رأس الحرامى فأس متعلق" لو قدرت اوقعه على راسه .. بس هوقعه ازاى..ده مربوط بحبل تخين فى الحيطة يبقى لازم أوقع الحيطه..أنت فاكر نفسك شمشون..أتصرف ..بسرعة..قبل مايسرق ويهرب..ايه اللى يوقع الحيطه..مافيش غيره "يصرخ موسى" زلزال "نرى زلزال عنيف وجزء من الحائط ينهار فيقع الفأس فوق رأس اللص الذى يقع على الأرض وتستيقظ الأم وتشاهد اللص مضرجاً فى دمائه فتصرخ" معليش يا أمى أنا عارف ان المنظر صعب عليك بس هو ده الحل الوحيد.. وأنت يالص عملت ايه بعملتك .. الكفن يا صاحبى من غير جيوب ..  آه لو كنت عارف سكتك .. آه يا ابن آدم حيرنى للكون نظرتك خرج ابن آدم مع العدم قلت ياه  رجع ابن آدم للعدم قلت ياه تراب بيحيا وحى بيصير تراب  الأصل هو الموت ولا الحياة "يدخل الغريب"
الغريب	كفاية.."تضاء الانوار"
موسى	أنت جيت "يقوم مفزوع ويختبئ خلف كرسى العرش"
الغريب	تعالى ماتخافش
موسى	مش قادر أوريلك وشى
الغريب	ايه اللى عملته ده
موسى	مش أنا مش أنا
الغريب	أمال مين؟
موسى	ده عابر السبيل اللى أنت سمحت انه يوصل لباب قصرك هو اللى شجعنى على فتح الباب
الغريب	تصدق لو قلتلك ..انه مكانش فيه عابر سبيل
موسى	لا فيه ..وأسأل كل الموجودين دول مش كلكوا شفتوه..انطقوا .. دافعوا عنى
الغريب	"يشير بيده فتنطفئ الانوار" بص بنفسك "نرى على شاشه العرض موسى جالس وحيداً لا نسمع صوت جرس" ايه الصوت ده..معقول جرس ..5 سنين هنا ماسمعتش الصوت ده قبل كده
موسى	لا كان فيه صوت جرس .. أنا سمعت صوت جرس
الغريب	أستنى وأنت تشوف "يقوم موسى ويفتح الباب ولا نجد احداً امام الباب"
موسى	هيظهر دلوقتى وهتصدق انه كان فيه عابر سبيل "موسى على الشاشة يبتسم دون ان يكون أمامه احداً" سلام .. أتفضل .. من عنيا .. يعنى ايه كان بيتهيألى ايه اتجننت وأنا مش دارى
الغريب	ده وهم أنت رسمته فى خيالك علشان لما أسألك تلاقى حد ترمى عليه حجتك .. أقولك ايه ده مش جديد عليك .. ما أنت ابن آدم
موسى	يعنى ايه
الغريب	عصيت أمرى وفتحت الباب المحظور و دى أول خطية... قعدت على العرش ومسكت صولجانى وده الخطاء التانى.. حكمت العالم لثوانى فزاد شر العالم على شره شر أعظم ولو سيبتك تقعد هنا ساعة تانية كنت أبدت نصف البشرية
موسى	أنا..أنا كنت بدافع عن اللى بحبهم .. أنا كنت بأجازى الأشرار وبأنصف الأبرار .. أنا لو كنت قعدت ساعة كنت طهرت العالم من كل أخطار البلطجية اللى أنت سامح بوجودهم حوالينا..  كنت هرجع جنه عدن اللى اطرد منها أبويا .. كنت هخلى الخير مطر يغرق ايدينا
الغريب	خير ايهاللى على حساب حياة الناس
موسى	دول أشرار..ميستهلوش الحياة.. أنا كنت ماسك بايديا الرفش وبنقى البيدر وباحرق التبن
الغريب	ومين أدالك الحق تحرق قبل الأوان .. فين رحمتك؟!
موسى	وفين عدلك؟!!
الغريب	لو كنت حكمت بالعدل بس ..كأنت زمانها رجعت خربة ومافيهاش نسمة واحدة عايشة
موسى	ترجع خربة لما تبيد منها أخطار الأشرار !!!!
الغريب	الأيام بكرةهتوريك كمية الشر اللى جلبته... بعملتكخلقت ظالم وأتوحش بسبب حكمك و ودمر حياة كتير حواليه ودلوقى ملكش مكان هنا ارجع ماترح ما جيت و شوف بعنيك قعدتك مكانى و حكمك بصولجانى عملت ايه فى العالم..علشان تعرف الفرق بين  عدلك المجرد من الرحمة .. وعدلى الرحيم .. ارجع يا موسى ملكش مكان هنا

 

نهايــــــــة الفصــــــــــل الأول

 

 

 

 

 

 

 

 

	الفصل الثــــانى المنظر الأول - الميدان
الغفير	100 ,200 ,300 و خمسين 350 جنيه.. بقالهم سنين 350 ..كله بيغلى وأنتم قاعدين فى قرابيزى.. 350.. اكل ولا كسوه ولا علام عيال.. بلاها علام .. يالا ادى بند وانزاح .. وبلاها كسوه يالا يرقعوا اللى عندهم .. طب ايه ال 350 مش مكفيين اللقمه والغموس .. طب بلاها غموس وخلينا فى اللقمه حاف "يستدير نحو تمثال العنب" بتبص على ايه .. حتى ال 350 باصصلى فيهم ما هو كلوا منك ..كلوا فى كرشك ماتبصش كده بدل مااديك على بوزك "يصعد للمنصه ويقف مجابها للتمثال" ما تمد عينك وبص لتحت ولا افتح كرشك وادينا من اللى لينا عندك .. ابوس حبات عنب رباط جزمتك فكها علينا بقى .. الله ايه ريحة العنب الحلوه دى .. بتحت اسانس ايه.. استنى لما اشم تانى كده الله .. عمدة بصحيح وياترى طعم رباط جزمتك زى ريحته ولا ايه "يأكل العنب" ده طعمه جميل .. جميل قوى تسمح لى ادوق من حته تانيه اكلك منين يا عمدة .. اكلك منين دوقنى عينك ..ايوه "يأخذ حبات العنب من عينه" افعصهوملك الأول .. دول متفعصين جاهزين بدام مابتشوفناش بينهم "يأكل" أول مره أحس أن ليك فايدة .. يا سلام على العمدة وحلاوته ياجدعان..حبك سكرنى يا اسمك ..ايه اللى حر ده "يبدأ فى خلع ملابسه" ايه "يضحك" هو انهارده ايه .. ايوه انهارده الخميس "يأكل التمثال" والعنب والأحلام فى كيس "يستمر فى الاكل" طرزان بيغطس فى الهاويس "يضحك" طرزان جدع .. طرزان شديد دراعه اقوى من الحديد .. طرزان بيصرخ عاهاه ..عاهاه ..ماحدش هيرحمك من ايدى  "يدخل اهل القريه ويشاهدوا الغفير فى هذه الحاله"
رجل1	ماعدناش نطيق الظلم يا خلق
امراه1	ولأمتى هنطيق نشوف هوان
الغفير	طرزان جدع
رجل2	فين موطن الأحرار
الغفير	أحرار..أهرام..جمهورية "يضحك"
رجل2	فين  قلعة الغضب
امراه2	خلاص هننفجر زى بركان
الغفير	طرزان طحن الدماغ وعجن الأسد
رجل3	اة  يا ظالم الشعب بجبروتك
امراه3	منين هزيمتك يا ظلم الأنسان
رجل1	لابترجع عن الظلم ولا شايفين نهايتك
الغفير	"يهز راس التمثال ويخلعها" بتهز راسك يا عمدة ليه وتبتسم يا غراب فى ضل جنينتك التراب من ضحكتك وسطك هينقسم
امراه	انتى ترجع عن الظلم ونكتب نهايتك
الغفير	نهايتك يا غراب نهايتك خراب خراب"يضحك" black

 

	المنظر الثانى "دوار العمدة"
شيخ الغفر	يا حضره العمدة..يا حضره العمدة
العمدة	فيه ايه يا شيخ الغفر
شيخ الغفر	مصيبة يا عمدة
العمدة	ياساتر يارب ماتنطق ياوله كركبت مصارينى
شيخ الغفر	كالوك يا عمدة كالوك
العمدة	ماله كالوك ده
شيخ الغفر	ماله ايه كالوك يعنى اتاكلت يا عمده
العمدة	أنت لابسك عفريت افـرنجى ياوله ايه الكلام الغـريب اللى بتقوله انهارده ..انطق مين اللى كالنى
شيخ الغفر	صابر
العمدة	هو فاكرنى رز بلبن
شيخ الغفر	لبن ايه
العمدة	بتاع الرز
شيخ الغفر	رز ايه  مش صابر بتاع الرز قصدى .. صابر الغفير
العمدة	اشمعنى
شيخ الغفر	مش قافية ياعمدة
العمدة	"يضربه على قفاه" ماتفهمنى عدل يا جاهل
شيخ الغفر	تمثالك اتاكل ياعمدة
العمدة	"يخرج مسدسه ويشهره فى وجه شيخ البلد" انت بتقول ايه
شيخ الغفر	اخيرا فهمت
العمدة	ده انا اقلب عاليها واطيها تمثالى انا يتاكل وانت كنت فين كنت نايم على ودانك  ده انا هشقنك فى ميدان عام
شيخ الغفر	انا يا عمده
العمدة	ايوه انت امال خيالك انت المسؤل قدامى
شيخ الغفر	الرحمة يا عمدة
العمدة	مااعرفهاش
شيخ الغفر	طب ادينى فرصة
العمدة	بعد ايه.. بعد ماحته غفير مقيح اكلنى
شيخ الغفر	هخلى الخلق تتفرج عليه
العمدة	ده طارى انا وانا ماسبش طارى حد ياخدهولى
شيخ الغفر	وانا
العمدة	"يضرب شيخ الغفر برصاص مسدسه" ملكش مكان فيها
شيخ الغفر	اى .... دى اخرة خدمتك ....
العمدة	وانا نحيتك من الخدمة دى اما انت يا صابر فياوليك منى ... "يخرج التلفون المحمول" الو .. ايوه يا شيخ البلد ايه اللى بيحصل فى البلد يا شيخ البلد.. اسمعالى ياكل تمثال العمدة الأثرى اللى كنت بتفتخر بيه فى البر كله يبقى جزاته ايه... ماتلتش كتير فى الكلام وأنطق.. اللى ياكلنى جزاته ايهبراوه عليك  .. خيانة عظمى.. والخاين بيتشنق..لا... محاكمة أيه ... انا حاكمت و اصدرت الحكم... علق المشنقة فى الميدان... فوق مكان التمثال وقبل الليل يتنفذ  الحكم ويتعدم ولان اكرام الميت دفنه فاللى ياكل العمدة محروم من التكريم يعنى جتته تفضل متعلقه لحد ما الغربان تخلص عليها مفهوم يا شيخ البلد  و اى خشم يتفتح بكلمة اعتراض ينسد برصاصة... لما العمدة يتكلم مايجرؤش كلب  واحد ينبح فى البلد Black

 

 

 

 

 

 

 

 

 

 

 

 

 

 

 

 

	المنظرالثالث الميـــــدان
	صابر مشنوق فى وسط الميدان فوق مكان التمثال و أهل القــرية حوله ويدخل موسى و يشاهد هذا المنظر
موسى	مين
رجل1	صابر
موسى	الغفير
رجل2	المسكين
موسى	ذنبوا ايه
رجل3	داق العنب
رجل1	المر
موسى	اتعدم بسبب عنب .. مين اللى حاكمه
رجل2	حكم الظالم ملهوش محكمة ولا دفاع
رجل3	اسكت لتحصله
موسى	ومستنين ايه
رجل1	الغربان
موسى	ليه
رجل2	تدفنه
رجل1	اقصده تاكله
موسى	وانتوا
رجل3	اللى هيدفه يتدفن جنبه
موسى	ايه الظلم ده
رجل1	هو كده اصلك ما تعرفش العمدة .. انت غريب
موسى	عمده ولا ملك
رجل3	اله
موسى	نزلوه
رجل 1	لا .. اصلك ماتعرفهوش ... ماشوفتهوش
موسى	ادفنوه
رجل 2	ماينفعش .. ده العمدة.. الوحش
موسى	وحش .. غول.. الغفير ده لازم يندفن.. كفايه انه مات ظلم هتفضلوا لحد امتى مخروسين عن الحق و معميين عن الظلم لحد ماتاخدوا مكنكوا جنبوا ... لحد ما ارواحكوا تشوف ابدانكوا مدلدله و رقابكوا ملفوفه على المشنقة زيه .. هيجلكوا يوم لو فضيلتوا خرسانين وعياكوا هيقفوا نفس الوقفه يستنوا الغربان وهى بتنهش فى جثاثكوا .. اصرخوا.. اتحركوا .. ساعدونى ندفنة.. ولو الموت أجبارى ملهوش اختيار اختاروا تموتوا زى النخل رافعيين راسكوا... مين هيساعدنى ندفنه
موسى
	الكل يعطى له ظهره فيتقدم موسى ويحل الحبل من على رقبه الغفير فيبدأالجميع فى التحرك بتردد ويساعدوه على حمل الغفير ويخرجوا به من باب المسرح الرئيسى Black                                                               المنظر الرابع المقــــابر يدخل موسى ورجال القرية حاملين تابوت الغفير فى اتجاه المقابر ليدفنوه فيظهر العمدة مع شيخ البلد وبعض الغفر ويعترضوا طريق الموكب

 

العمدة	(بسخرية)والله عال يا بلد .. لا تطلعتوا رجاله بصح وصحيح .. وكسرتوا كلمتى.. يا سلام عفارم عليكوا.. قولولى بقى يارجالة.. مين اللى وزكوا تكسروا كلمتى .. علشان اكافئه على مرجوليته واعينه شيخ غفر بدل اللى طخيته.. لا شيخ غفر ايه ده انا هاعمله عمدة  بدالى وانا اركع تحت رجليه اكشطله الجلخ منها..(بغصب) انطقوا مين اللى وزكوا
موسى	من فضلك وسع السكة ندفن الميت وبعدين نعقد نتكلم براحتنا
العمدة	وحياتك تقولى مين اللى بيتكلم ده يا شيخ البلد اظاهر ان اللينسس بتاعتى مفشوله فمش شايف كويس.. انت مين
موسى	غريب
العمدة	ايوة كده انا قولت العمله السود هدى ماتجيش من أهل البلد اللى عافين مين هو العمدة
موسى	الظالم..... الوحش
العمدة	ايوة الظالم والوحش.. مش كلكوا بتقولوا كده ماتنطقوا
موسى	ينطقوا ازاى وانت قاطع لسانهم
العمدة	خايفين من ايه ماتصرخوا و قولوا للعالم كله عمدتنا ظالم على الأقل هسمع ضراخكم .... مش هاعمل زيه لما انا صرخت له زمان وقلتله انت ظالم وهو ماسمعنيش
موسى	مين ... صابر
العمدة	لا.... اللى خلقه
	همهمه بين رجال القرية
العمدة	ايوه فلو قلتوا على ظالم فظلمى ليكوا مايجيش نقطة فى بحر ظلمه ليا.. قبل ما تحكموا على احكموا عليه
رجل 1	نحكم على مين يا عمده
العمدة	تحكموا على اللى خلقكوا على الله
رجل2	ده طلع كافر
العمدة	أخرس.. لو كنت شفت اللى شفته كنت هتقول أكتر من كده
موسى	وانت شفت ايه يا عمدة
العمدة	شفت الله فى سماه ساب الخلق كلاتها ومسك فيا قلتله مش قدك .. مش فى قوتك.. خف د هانت الخالق وانا الطين .. انت العالى.. وانا المسكين... مسمعش صرختى .. حول عينه عن بلوتى .. سد ودانه عن صرختى.. كربج ضهرى بالظلم .. من خيره انا بفيض عليكوا يا بلد اذا كان هو الظالم الأكبر فانا حته شبل صغير بتعلم منه واحكم عليكوا بحكمه
	الجميع ينظر حوله بذهول من كلام العمده
العمدة	مش مصدقين .. فكرينى بفترى فى الكلام و بكفر بيه .. خلاص يا بلد اسمعوا قصتى و احكموا .. وانتو تعرفوا ان صابر مااتظلمش واللى عملتوه فيه أهون بكتير من اللى هو عمله فىَ
موسى	أحكى

 

العمدة	مش أنا اللى هحكى
موسى	امال مين
العمدة	الميتين
موسى	مين
العمدة	الشهود .. الشهود بالظلم
موسى	ومنين نجيب الميتين
العمدة	هاصحييهم من قبورهم كلهم هنا شاهدين على ظلمه .. اصحوا .. اتكلموا..
	"يستيقظ الشيخ الاول قايين و يخرج من قبره"
العمدة	ما تخافوش ..احكيلهم يا با أكشفلهم السر وقولهم
موسى	أسمك
ش قايين	قايين
موسى	أنت
ش قايين	ايوه أنا قايين اللى رفست أخويا فى لفته جبتله ارتجاج ..قايين اللى انطرد من شغله واتحرم من لقمه العيش الحلال ..قايين اللى خلى بليئه وجرى ورا بنت العمدةرفقة الجميلة "نرى قايين الشاب جالس مع رفقة
قايين	بحبك يا رفقة
رفقة	وأنا كمان بس ايه اخرة الحب ده
قايين	الحب الطاهر معروف اخرته
رفقة	بجد يا قايين هتيجى تطلبنى من ابويا
قايين	نفسى
رفقة	وايه اللى مانعـك
قايين	الايد قصيره
رفقة	الفقر مش عيب
قايين	عيب قدام بنت العمدة
رفقة	"تخلع غوايشها" خد دول
قايين	ايه دول
رفقة	بعهم واشترى بتمنهم الشبكة
قايين	بس
رفقة	مابسش
قايين	وابوك
رفقة	سيبه عليا أنا هاعرف اقنعه
قايين	طب لو سألنى عن شغلى
رفقة	هتشتغل
قايين	امتى وعند مين؟
رفقة	بكره باذن ربنا وعند شيخ الغفر
قايين	شيخ الغفر
رفقة	بنته صاحبتى وأنا لى كلمه عنده
قايين	غفيـر
رفقة	ويمكن دراعه اليمين
قايين	بجد يا رفقة
رفقة	بجد يا قايين
قايين	مش عارف اقولك ايه
رفقة	قول انك بتحبنى
قايين	بحبك .. بحبك يا اطهر قلب عرفته الارض
رفقة	لازم اروح .. فوتك بعافيه "تخرج"
قايين	اسمها فوتك بصغيتى "تظهر ليئه من خلفه وتضربه بحذائها على دماغه"
ليئه	آه يا خاين ..أنا هاروح فيك فى داهيه
قايين	اى .. أنت ايه اللى جابك هنا يا بت
ليئه	علشان اكشفك يا خايين
قايين	أحنا مش فضينا السيرة دى
ليئه	السيرة دى هتنفض على قبرك
قايين	أنت ايه طين الارض كلها مالى دماغك
ليئه	دماغ ايه يا ابو دماغ
قايين	يا بت احنا مش قولنا مانفعش لبعض
ليئه	قولنا
قايين	يا بت أنا عاوز مصلحتك
ليئه	أنت مابتشوفش غير مصلحتك بس
قايين	وماله مش عيب ان الواحد يدور على مصلحته
ليئه	طب وأنا
قايين	جوازتك عندى
ليئه	حكم ..سيبت الفلاحة واشتغلت خطبة ومين بقى العريس يا خالتى
قايين	خالتك
ليئه	ما أنا اول مرةأشوف خاطبة بشنب
قايين	حقك على أنا استاهل ضرب البلغ انى بتكلم معاك "يهم بالخروج"
ليئه	مين
قايين	مين مين
ليئه	العريس "يخرج الشيخ الثانى من قبره"
ش أسد	أسد ..ايوه أسد ماتبوصوليش دلوقتى بعد أنيابى ما اتخلعت وزائيرى انكتم .. كان أسمى يملى القـلوب بالرعب وصوتى يزلزل المكان بالرعد واللى يدخل جيب الأسد يبقى على الله العوض "يدخل أسد وقايين الشابان"
أسد	ليئه ..ليئه على راى المثل صام أسد وفطر على ليئه.. لا يا عم أنا كده كويس
قايين	اسمعنى
أسد	ماسمعش أنت نسيت نفسك ولا ايه..أنا اللى اتكلم والكفر كله يسمعنى
قايين	ماقولناش حاجه يا سيد المعلمين بس احسبها
أسد	احسب ايه
قايين	ليئه صاحبة مين
أسد	وأنا مالى
قايين	رفقة
أسد	طب ماتشوفى رفقة
قايين	لا يا معلم رفقة دى تلزمنى
أسد	بقى عاوز تاخد نصيب الأسد وترمى لى الفتافيت
قايين	معاش ولا كان أنا بقول ان ليئه تفتحلك سكة لدار العمدة وتعرفك المداخل والمخارج انما بنته لا يمكن تدلك على أسرار أبوها
أسد	آه
قايين	فهمت يا سيد المعلمين
أسد	ولو ان الشغل فى بلدنا بقى مش جايب همه
قايين	أنت ناويت تنقل النشاط ولا ايه
أسد	ايه ..ما أنت عارف الحكومة مفنجله عنيها اليومين دول و الواحد مابقاش آمن على عملياته
قايين	فقولت تتوسع
أسد	لا هفتح شركه استيراد بس من غير تصدير
قايين	استيراد ايه يا معلم هو أنت ليك فى السكه دى
أسد	ياوله استيراد يعنى نقل النشاط للخارج على القرى اللى جانبينا اللى محدش يعرف عنك فيها حاجه
قايين	يا معلم ده أنتصيتك مالى الكفر كله
أسد	وعلشان كده بافكر فى خارج الكفر اليمه التانيه من البحـر
قايين	يا دماغك
أسد	دماغ أسد ياوله
ش أسد	وأسد اتجوز ليئه ونقل نشاطه ووسع عملياته خارج الكفر كلاته
ليئه	رايح فين يا أسد الساعة دى
أسد	امصمص سنانى
ليئه	مش فاهمه
أسد	مرماية صغيرة
ليئه	مرمة ايه
أسد	شويةقمح هاعرف منهم
ليئه	تانى .. احنا مش اتفقنا
أسد	مااتفقناش
ليئه	قولنا كفاية ونعيش فى الحلال
أسد	حلال .. مش سكتى يا مراتى .. منه لله اللى راماك فى سكتى
ليئه	بتقول حاجة
أسد	هاقول ايه منه لله
ليئه	مين
أسد	بس لما اشوفه ..هاقطعه ..أنا يضحك عليا ويلبسنى السلطانية ماشى ..ماشى.. هاتروح منى فين
ليئه	ماقولتليش
أسد	نامى أنت ..الصباح رباح
ليئه	يعنى مصمم
أسد	يكش تكونى فاكره نفسك متصيغه بالحلال ..فوقى ..احنا فى زمن عمر ماالحلال يغطيكى ولا حتى بالهوا .. واللقمه الحلال بقت عملةملغيه زى اللى مرسوم عليها ابوطربوش..  فأشكرى ربنا على الحرام اللى مطفحك ومصيغك من راسك لكعب رجليك المقشف ..اتخمدى وسبينى أشوف لقمة عيش.
ش أسد	وخرجت وأنا باللعن اليوم والساعة وسافرت بعيد  ودرست المكان والناس نيام وقربت من جرن الحنطة وكبشت وكنت قربت الا لقيته صحى وصحى القـريه كلها وحاوطونى زى حرامى الموالد وحاكمونى.. واتـفتحت القواضى القديمة واتسجنت سنين طويلةشوفتوا كانت وشها حلو ازاى ..مين.. طبعاً ليئه
موسى	فاكر اسم الراجل اللى سرقت منه الحنطة
ش أسد	امال ده سبب بلوتى
موسى	أسمه ايهظ
ش أسد	ابو موسى "رفقة جالسه بجوار زوجها قايين وفى حجرها ابنها الرضيع تقرأ له فى الكتاب المقدس
رفقة	والمجد لله دائماً "صوت طرق على الباب" باسم الصليب مين اللى جاى الساعة دى
قايين	خليكى أنتى أنا اللى هافتح "تدخل ليئه" أنت
رفقة	اهلاً ليئه اتفضلى
قايين	أنت جايه لوحدك ولا أسد وراك
ليئه	"تبكى بحرقه" تخرج المرآه العجوز(رفقة) من قبرها
ش رفقة	أنا سوداء كبئر المشنقه ..أنا سوداء كأفعى هائله ..كرماد النوم ينشر فى العيون .. كالحافى فى الطرق الموحله..جاتلى ..بتبكى واترمت صاحبتى فى حضنى وخدتها ..فى بيتى اويتها واستأمنتها ..كلت من صحنى ولقمتى قسمتها ..لكن داست خبزى وشرفى بكعبها .. كنت نايمه ..معرفش مين صحانى وليه ..ياريتها كانت نومة الأبدية ..صحيت على بكاء ابنى ..عمره مابكى بالليل مع انه طفل والطفل دايماً يحلاله شد كحل النوم من عيون امه ..انما ابنى عمره ماعملها ..ينام قبلى ويصحى بعدى .. اشمعنى الليله دى اشمعنى ..صحيت ..مالقتهوش جنبى ..جوزى ..ابو ابنى ..قمت دورت ..لحد ماسمعت بودانى "صوت ضحكات ليئه"
ليئه	سمعنى تانى
قايين	بتضحكى
ليئه	أصل مش قايين اللى يقول كده
قايين	قايين اتغير من ساعةما اتجوزها
ليئه	يا عنيا
قايين	غسلتنى من قذارتى القديمة
ليئه	قذارتك اللى أنا عارفاها كويس ماتمحهاش ميه النار
قايين	و مين قالك انها مش ميه نار ..رفقة عمدتنى بالميه والنار.. عمدتنى بطهرها ونقاوتها ..عمدتنى بحبها لربنا ..عمدتنى بصلواتها وانجيلها
ليئه	"تضحك" الله حوش الزيت اللى بيخر من ودانك.. وله فوق دا احنا دافنينه سوا تعالى اعدل راسك بكاسيين وأنت تنسى الدروشة.. فاكر يا وله .. فاكر ليئه والقنايه وعيدان الدره
قايين	أنت ايه شيطان
ليئه	"تضحك" ما شيطان الا قايين ..اشرب اشرب
قايين	لا
ليئه	علمتك العفة يا ابن بدرية اشرب والا بشرفى لاصحيها واحكيلها على كل حاجة وخلى الشرف ينفعـك
قايين	أنت ايه حربايه واتحدفت علينا
ليئه	أنا حربايه .. اخص عليك "تقترب منه وتشربه - تضحك - تدخل رفقة"
رفقة	اه يا خاين ومع مين مع صاحبتى اللى فتحت لها بيتى بعدما انسدت كل الابواب فى وشها
قايين	اسمعى يا رفقةأنا هفهمك
رفقة	تفهمنى ايه بعد اللى شفته بعينى
ليئه	مالك عامله زى البابور القايد ماتسبيه يفهمك
قايين	أنت فاهمه غلط
رفقة	اخرسى ..بره اطلعوا بره بيتى بره " تضربهما بحذائها وتطردهما خارج الدار ياميله بختك يا رفقة "
ش قايين	كنت هاتوب بس ماادانيش الفرصة..كنت خلاص ناوى أمشى فى طريق النور.. بس ما ادانيش الفرصة.. رفعت عينى وصرخت ..وقلت ليه أنت ظالم ..ولا أنت مش عاوزنى ..يعنى كدب انك بتدور على الضال ..يعنى خدعة ان السما بتفرح بواحد وتنسى ال 99 ..أكيد كدب فى كدب ..والدليل اهه.. لما كنت فى الظلمة كنت مغطينى بخطايايا ..وأول ماولعت شموع التوبة فضحتنى وعريتنى وكشفت بلاويا اتجننت .. كفرت .. ورجعت اسوأ من الأول والكيل بالاثنين والعين باثنين والسن باثنين والجدع اللى يقول أن فيه عادل متغطى بسحب السما .. كذب كذب
ش رفقة             رفقة	اما أنا فمش اقل منك.. اللى ما كأنت تعرف غير كلام المديح والترتيل وطعم الجسد والدم ..عرفت كلام الشر.. وطعم الخمر ..وكبر ابنى .. شمس ..من غير أب يوجهه .. ولا اشبينه تعرفه..أضحك يا زمن و أسخر يا قدر ..الاشبينه اللى شالت عيال الكفر كله ..الاشبينه اللى أأتمنها ربنا على عيال الناس.. جت عند ابنها ضناها اللى من لحمها وكأنت خلاص خلص زيتها وانطفى قنديلها..   " رفقة جالسة تجرع زجاجة خمر"  قلبى عليل يا ناس  وفى الكاس دواه مديت له ايدى شربت م اللى حواه  جنب الشمال خف اليمين اتوجع  وايه يداوى الكبد م الل كواه "يدخل شمس صبى ويجد أمه رفقة تتجرع كأس الخمر"
شمس	يا امه بكفايا
رفقة	لسه ياوله كأسين فى الازازه
شمس	يا امه أنت فين
رفقة	ما أنا قدامك .. أنتأتعميت ولا ايه
شمس	مش أنا اللى أتعميت أنت اللى مابقتيش شايفه قدامك غير الازازه .. ليه تيتمينى وأنت قدامى .. حرام ده ولا حلال
رفقة	حلال .. اياك اسمعك تجيب الكلمة دى على لسانك.. خد حقك بدراعك يا شمس .. قلبك تدوس عليه بجزمتك..  وبقوتك تحقق كل اللى تتمناه
شمس	يا امه
رفقة	اخرس .. وسيبنى يالا
شمس	مليتينى هموم بدرى .. شيبتى شعرى وطفولتى سرقتى أنا شاب لكن عمرى الف عام وحيد ولكن بين ضلوعى زحام خايف لكن خوفى منى أنا  أخرس ولكن قلبى مليان كلام
ش أسد	اما أنا فكنت بعد الايام .. أسد محبوس زئير كلامه انخرس "أسد فى السجن"
أسد	وحياة الحبسة السودة لأملاك خراب يا بلد .. واللى فات اترحمى عليه ..لا امن ولا امان ..شمسك مكسوفه وراء جبل بركان اسمه أنتقام ..بينك وبين الرحمه هبنى وأعلى الحيطان..  اصلك ماتعرفيش يعنى ايه أنتقام أسد
ش قايين	وأنا تايه فى الحياه من غير هدف لا .. هدفى ان اشوف فيكى يوم اسود يا لئيمه يا خرابه البيوت
ش أسد	مش أنت اللى حدفتنى بيها اشرب "قايين بزور أسد فى سجنه"
قايين	شربت من كيعانى شربت والشرب عمانى وخرب بيتى واحلامى
ش أسد	وأنت جاى سجنى تشكيلى
قايين	شكوه ايه أنا جاى اعزيك
أسد	تعزينى فى مين
ش قايين	فى شرفك
ش أسد	بتقول ايه
قايين	مراتك
ش أسد	مجايبك
أسد	كان يوم اسود ..يوم ماطوعتك
ش أسد	خبطات بعدد شعر راسى وكنت بطلع منها من غير دليل
أسد	و أول عميلها بعد الجواز أتمسكت زى الحرامى الغشيم
ش أسد	كأنت وشها فقـر
ش قايين	يا ريتها رسيت على فقـرها
أسد	قصدك ايه ..انطق
قايين	مراتك ماشيه على حل شعرها
ش أسد	شعر ايه القرعة دى
ش قايين	و أنا مالى ..أنا بلغت
أسد	بموتك لو كنت كداب
قايين	بتهددنى علشان جاى ابلغـك
ش قايين	حقه .. ماينوب المخلص اللى تـقطيع هدمته
ش أسد	امش من وشى الساعه دى
ش قايين	الحق عليا
أسد	ولوجيت هنا تانى هاقطع رجلك  .. ليك يوم
قايين	أنا
أسد	أنت وهى
ش أسد	وكنت بأعد الأيام اللى فاضله .. ساعة ساعة بتمر بتزيد قلبى قسوه وبتشعلل النار.. لحد يوم الافراج ..عتبت رجلى باب السجن وكنت عارف انى رجعله ..قالولى كفاره آخر مره قلتلهم
أسد	هأو اكولى لى البدلة الحمرا " تجرى ليئه ترتمى على قدميه"
ليئه	أرحمنى
أسد	عمرك شفت أسد جعان عفى عن بقره
ليئه	اشتمنى .. اضربنى ..بس سيبنى اعيش
أسد	اللى يخون أسد فى شدته ياويله من انيابه
ليئه	أنا مظلومه
أسد	كدابه .. قايين قالى على كل حاجه
ليئه	ده كداب كداب كان عاوز ينتقم منى
أسد	عجايب.. بينتقم منك أنت.. ده هو اللى قرطستنى علشان اتجوزك
ليئه	أنا هاحكيلك على كل حاجه بس ابوس بلغتك ارحمنى
ش أسد	وقعدت تحكى الماضى زى الفار المبلول اللى وقع فى حاره قطط
أسد	أنت فاكره ان اللى قولتيه هيشفعلك
ش أسد	دا أنت كده زودتى الطينه بله
أسد	استغفلتونى .. أنتوا فاكرينى ايه.. لأ فوقوا معاش ولا كان اللى يضرب أسد على قفاه
ليئه	هاعيش تحت رجليك خدامه بس سيبنى أعيش
أسد	"يشهر خنجره" حكم الاعدام صدر ومن غير استئناف "يطعنها ليئه تقع تحت رجله"
ش أسد	والدور عليك يا قايين
ش قايين	عيب
قايين	"يدخل قايين وحوله عدد من العسكر ويشهر بدله الاعدام فى وجهه" معقوله اعدى الفرصة الغالية على الفاضى
أسد	عملتها
قايين	عملتها فى اخويا من زمان ودمه صرخ من عملتى والدور عليك يا أسد دلوقتى خلاص الساحه فضيت لى
أسد	قولى يا قايين
قايين	عيونى
أسد	هو الأسد من فصيلة ايه
قايين	القطط
أسد	"يطعنه" بس عمرى ما سمعت حد قال ان الأسد بسبع أرواح .. واحد ولا اثنين "يشير على الجثتين" هى ديتها شده حبل مرة واحدة Black Spot  على جثتين ليئه وقايين تدخل رفقة وابنها شمس
رفقة	على رجلى دم .. نظرت له ما احتملت على ايدى دم سألت ليه ؟ على كتفى دم وحتى على راسى دم أنا كلى دم قتلت ولا اتـقتـلت
شمس الصبى	أنت السبب يا امه أنت اللى قتلتى ابويا قفلت قلبك من غير رحمة كان يجرى ايه لو سامحتيه كان يجرى ايه لو قبلتيه
رفقة	كان غرقان فى طوفان الخطية
شمس الصبى	ومكنتيش الفلك اللى تنتشليه وتغسليه وتحميه .. سديتى فى وشه الببان وحبستى حمامة السلام .. فازاى هترجع فى بقها الاغصان ..خلاص كله راح Black
موسى	ايوه راح نوح راح لحاله والطوفان استمر  مركبنا تايهه لسه مش لاقيه بـر  آه م الطوفان وآهين  يا بر الامان ازاى تبان والدنيا غرقانه شر
العمدة	والشر ده مين اللى جابه مش ظلمه ..مش حكمه .. أنا شمس يا حضرة القاضى يا عادل يا حكيم
العمدة	أنا شمس بن قايين ..أنا شمس بن رفقة الاشبينه.. أنا شمس فى سما مغيمه حبست نور حياتى فى بدرى أنا شمس اللى ورثت جدى العمدة واول ما اتربعت وحكمت خرج السم اللى عصره قلب ماعرفش غير الظلم ما هو العدل ظلم والظلم عدل مش هو ده العدل  بتحكمونى على غفير يبقى تحكوه الأول ده أنا حته عمدة غلبان بحكم قرية امال اللى بيحكم الدنيا وكان حكمه ظلم هتعمله فيه ايه ولو مكفاش اللى فات اسمع دى كمان  "شمس جالس مع صديقه صلاح "
شمس	كل مشكله وليها حل يا صلاح
صلاح	امى بتموت يا شمس
شمس	ما أنا امى ميته وهى عايشه
صلاح	العملية محتاجه 100 الف جنيه
شمس	100 الف
صلاح	بعت الارض ورهنت البيت وفاضل 50 الف .. ابوس رجلك اتصرف يا اخى دا أنا دللت على كليتى ولسه مالقتـلهاش شارى والعملية لازم تتعمل بعد يومين والا امى هتموت
شمس	ياريت كان معايا .. منها لله بعزقت كل الفلوس على الخمره
صلاح	لازم تتصرف
شمس	ليها صرفه بس مش حلال
صلاح	ومين جاب سيره الحلال دى امى
شمس	هتعلجها بالحرام
صلاح	يعنى موتها هو اللى حلال
شمس	روح لأسد
صلاح	مين
شمس	أسد اللى قتل ابويا
صلاح	ده محكوم عليه بالاعدام
شمس	أنا هاقدر أخليك تقابله
صلاح	وبعدين
شمس	هو اللى هيقولك بعدين "صلاح مع أسد " "أسد مرتدى بدله الاعدام"
أسد	صعبت عليا يا كتكوت
صلاح	يعنى ليك صرفه
أسد	جيت متأخر أنا بطلتها الشغلانة دى أصل أنا عقبال أمالتك فضيلى يومين فى المخروبه دى وعاوز اقابل ربنا وأنا نضيف
صلاح	أنت جاى توب دلوقتى بقولك ايه دلنى على طريق أجيب منه حق العمليه وابقى توب براحتك
أسد	لأ
صلاح	هو ايه لأ ..دا أنا اروح فيك فى داهيه
أسد	وتروح فى داهيه فى ميت ليه .. يا ابنى ابعد عن طريق السكة دى ..ما اديك شايف اخرتها
صلاح	امى بتموت
أسد	تموت وابنها شريف أحسن ما تخف بمال حرام
صلاح	ماتوعـظنيش
أسد	واضح انك مصر
صلاح	أيوه
أسد	تبقى توعدنى
صلاح	بايه
أسد	تبقى أول وآخر عمليه
صلاح	اوعدك
أسد	هتوب
صلاح	هتوب
أسد	كلام شرف
صلاح	كلام شرف
أسد	وحياة امك
صلاح	بتقول ايه
أسد	أقصد تعاهدنى بحياة امك انك تتوب بعدها
صلاح	خلاص قولتلك هتوب
أسد	اذا كان كده يبقى تأخدلى حقى
صلاح	من مين
أسد	من السبب فى بلوتى
صلاح	مش فاهم
أسد	أنا اتمسكت وأنا باسرق قمح راجل اسمه ابو موسى
صلاح	وأنا مالى
أسد	مراته شايله دهب فى شكماجيه فى دولاب اوضتها
صلاح	ها
أسد	ها ايه باقولك دهب
صلاح	كتير
أسد	شقى العمر
صلاح	حلال  دلنى على وطريقها .. فين أم موسى دى
العمدة	واداله الخريطه وراح صلاح ..كانت خبطه وهيتوب ..كان راح يجيب حق العملية .. حرام اة حرام .. انما هو مادالهوش الفرصه يتوب.. صحاهه شافته ..الصرخه انكتمت فى حلقها.. يقوم يسلط زلزال يوقع فاس مربوطه فى الحيطه تقسم دماغه اتنين .. مات صلاح وماتت أمه شفتم ظلم اكتر من كده
موسى	كفايه ..كفايه آه يارب آه..هو ده الوحش اللى قولت بعملتك خلقته وبحكمتكاتوحش
العمدة	بتصرخ ليه ياغريب
موسى	باصرخ من الظلم
العمدة	صدقت انه ظالم
موسى	حاشا
العمدة	بعد كل اللى حكيته
موسى	أنا اللى ظالم
اهل البلد	أنت
موسى	ايوه أنا
رجل1	وأنت مالك
موسى	أنا السبب
رجل2	فى ايه
موسى	فى بلوتكم .. أنا اللى ضيعت اشبنتى  بجهلى .. أنا اللى قتلت قايين و ليئه .. أنا اللى قفات باب التوبه فى و ش صلاح .. انا اللى حولت شمس لوحش انا سبب بلوتكم .. انا المجرم الحقيقى
رجل3	أنت غريب
موسى	أنا اللى ظلمته وظلمتكم
رجل1	مش فاهمين
موسى	كل اللى حكاه
العمدة	ظلم الخالق
موسى	لأ ده ظلمنى أنا
رجل1	أنت مالك
موسى	سمح انى اقعد مكانه ..كنت فاكر انى أقدر أحكم زيه.. لأ احسن منه كنت شايف الشر قدامى محاوط اقرب الناس ليا ..ثورت زيكم كنت عاوز اسقط النظام ..نظامه .. نظام الخالق وصرخت أنت ليه سايب الشر وأنت الملك ..فين عدلك ..وقررت وأنا قاعد على عرشه وصولجانه فى ايدى انى أعزله وأحط نفسى مكانه.. زى الشيطان زمان.. كنت عاوز أرفع كرسى حكمى فوق كواكبه .. كنت عاوز أجلس على الجبل فوق سحابه ..وهو من رحمته سمح ..كنت فاكره مش شايف ..كنت فاكره غافل.. وحكمت ..وأتارى حكمى ظلم فى ظلم ضيعت أهلى وناسى وضيعت معاهم كتير واولهم العمدة اللى عاوزين تحاكموه ..أنا السبب فى اللى حصلك يا عمدة مش ربنا ..أنا الظالم مش هو لو عاوز تنتقم أنا قدامك وراضى بحكمك
العمدة	أنتأنت الظالم استغفر الله .. يامين ينولنى رقبتك
موسى	حقك ..أنا المجرم الحقيقى .. أنا المغفل اللى فكر انه أحكم منه ويقدر يضبط أحكام الضابط ..ضابط الكل ..كنت فى كل صلاة بقوله ايها السيد ضابط الكل وأنا مش فاهم معناها ..كنت باردد الكلام بالباطل انما دلوقتى وقدمكم باعلنها بعلو صوتى.. ثورا زى ما أنتم عاوزين واقلبوا كل الأنظمة الأرضية وحققوا كل احلامكم بحرية بس الأول حاكموا ذواتكم لتكونوا أنتوا السبب ولما تتطهروا هتقدروا تطالبوا وأنتوا انقيه.. اوعوا تخدوها شعارات بطالهوتقولوا عوزين نسقط النظام ..النظام فاسد النظام ظالم .. يا خوفى لتكونوا أنتم سبب الفساد وأنتم اللى ظلمت نفسكم مش النظام واذا قدرتم فى يوم تسقطوا النظام الأرضى فاوعوا تفكروا انكم ممكن تقدروا تسقطوا نظامه .. لان نظامه عادل ورحيم نظامه اكثر نظاما من كل النظو لانه هو الرب صانع الخيرات ضابط الكل Final  لتنزيل المسرحية للطباعة بصيغة ال word  أضغط هنا