اسكتش ماما فين ؟

* يُفتح الستار علي شابين نايمين علي سرير وبيشخروا ويأتي صوت الراوي من الخارج

الراوي: كان يا ما كان...كان فيه أسرة مصرية عادية جدا جدا ومكوّنة من أب وأم والولدين الحلوين اللي نايمين

قدامكوا زي الملايكة دول . يتعالي صوت شخيرهما ثم تدخل الأم وتبدأ تنادي.

الأم : سامح ...يا سامح.... قوم يا بابا ياللا عشان تلحق محاضرتك.....(يتقلب سامح في مكانه وميردش

فتتحرك الأم نحوه وتهزه )

الأم : الساعة 8 يا حبيبي ...ياللا قوم

سامح (بصوت نائم): طيب يا ماما طيب...صحيت.

الأم : أجهز لك الفطار؟؟

سامح : لأ ....اعملي لي شاي بس

يتحرك فادي في مكانه ويقول بصوت نايم ومتضايق

فادي : يا عالم حرام عليكوا ...عاوز أنام ... حبكت يعني تتكلموا فوق رأسي ؟؟

(تطنش الأم تعليقه وتكمل كلامها )

الأم : مينفعش يا سامح تشرب شاي بس ...لازم تفطر قبل ما تنزل

( تخرج الأم ويستأنف الاثنان النوم ويثبت المنظر)

الراوي: زي ما انتوا شايفين ...مناقشة عادية ..بتحصل في كل البيوت المصرية .... كل يوم في

الصبحية.

* تدخل الأم مرة تانية وتنادي

الأم : سامح ...سامح ..أنت لسه مقمتش؟؟

سامح (و هو بين النوم والصحيان) : هه ...انا هقوم أهه..

الأم : ياللا هتتأخر ....أنا جهزت لك الفطار

سامح : يا ستي هو انا مش قلت لك مش هأفطر

فادي (يزعق) : ما ترحمونا بقي .... اللي عاوز يتخانق يتخانق بره

الأم : وأنت نايم ليه دلوقتي ؟؟ قوم انت كمان عشان تذاكر... انت في ثانوية عامة.

فادي : يووووه .... أنا ملحقتش انام ساعتين علي بعض.. حرام عليكي

الأم (وهي خارجة) : خلاص ...أنت حر ....اللي بيأكل علي ضرسه بينفع نفسه

تثبت الصورة ويأتي صوت الراوي

الراوي : مش قلت لكم ده بيت عادي جدا ....ركزوا معايا بقي عشان تعرفوا ايه الحاجة اللي مش عادية

اللي هتحصل دلوقتي

* صوت جرس تليفون من الخارج وترد الأم بدون أن تظهر

الأم : أيوه يا أمينة ...ازيك؟؟ ( تسكت ثواني)

الأم (بصوت مخضوض) : ايه ؟؟ بتقولي ايه؟؟ طيب ...طيب يا حبيبتي ..أنا جايالك حالا...مسافة السكة

* تدخل الأم مسرعة وتهز في سامح وفادي

الأم : اصحوا يا ولاد ...اصحوا

سامح : فيه ايه يا ماما؟؟

الأم : خالتكوا أمينة كلمتني دلوقتي .....بنت خالتكو هتولد وأنا لازم أروح لها دلوقتي حالا

سامح : طيب ...تحبي آجي أوصلك؟؟

الأم : لأ يا حبيبي ...روح انت شوف كليتك .......بس خلوا بالكوا من البيت....سامعني يا فادي؟؟

ف : حاضر يا ماما

الأم : قبل ما تنزلوا اقفلوا الأنابيب .....وأنا كنت حاطة فول عالسخان ...شيلوا الفيشة ...اوعوا تنسوا

أحسن يتحرق.

سامح : ماشي يا ماما

الأم : وكلموا بابا خلوه يجيب حاجة تتغدوا بيها معاه.

فادى : متشيليش همنا يا ماما احنا هنتصرف

الأم : ولما اللبن يبرد ابقي حطه في التلاجة

سامح(يبدو عليه الزهق): ماشي يا ماما ..احنا عارفين.

الأم : واللي يأخد عيش من التلاجة يبقي يقفل الكيس عشان مينشفش...هه؟؟

فادى : خلاص بقي يا ماما .....روحي انتي عشان متتأخريش (تكاد الأم تخرج ثم تعود تاني من علي

الباب وتقول)

الأم : ابقي لم الغسيل و خد الحاجات اللي عايزة تتكوي معاك وأنت نازل.

الإثنين معا : حاضر يا ماما (تخرج الأم ويعود الاثنان للنوم)

الراوي : وتمر ساعة ...ساعتين ....3 ساعات ... ومرة واحدة....

* يقفز فادي من السرير ويبص في الموبيل

فادى : هي الساعة كام؟؟ يا نهار أسود ....الساعة 12 ..الدرس ...الدرس ...سامح..

يقفز سامح هو كمان

سامح : الساعة 12 .....الامتحان ..أنا عندي امتحان في السكشن الساعة اتناشر ونص.

يبدأ الاثنان في الحركة بسرعة طالعين داخلين وهما يبحثان عن ملابسهما ويخبطوا في بعض وهما غاضبين.

ف : أنت مصحتنيش ليه يا أخي ؟؟

س : وأنا يعني كان فيه حد صحاني؟؟

ف : مش أنت الكبير ؟؟؟ وأنت اللي عندك محاضرات بدري؟؟

س : يا سلام ... متبقي تظبط موبايلك... هو انا ناقصك؟؟.... هي الشرابات فين يا ماما ؟؟

ف : ماما مش موجودة يا فالح....والشرابات هتلاقيها عالحبل.

س (يرتدي الكوتشي من غير شراب) : بلاها شراب خالص ....اوعي من قدامي أنا ورايا امتحان

ف : أنا جاي معاك (يخرج الاثنان)

الراوي : هييييه.........دونيا...وكل واحد وليه يوم..

* يدخل سامح ويخلع الكوتشي ويقول

س: آآآآآآآه...ياني يا رجلي

يدخل فادي ويقعد جنبه ويسأل

ف: هو احنا هنتغدي ايه النهاردة؟؟

س: هنقضيها بيض وجبنة ...أبوك اتصل وقال انه هيتأخر النهاردة في الشغل

ف: طيب ....قوم اعمل لنا كده ساندويتشين علي مزاجك.

س : اشمعني أنا يعني اللي اعمل ....ماتهز طولك أنت وتعمل.

ف: أولا أنا مليش في الطبخ خالص...ثانيا أنا ثانوية عامة.

س : لا يا بابا انسي حكاية ثانوية عامة دي الأيام دي ...طول ما احنا لوحدنا الشغل هيتقسم علينا

ف : شغل ؟؟ شغل ايه؟؟ أنا مش هأعمل حاجة

س: لأ طبعا هتعمل ...أنا هأجهز السندويتشات وأنت هتلم الغسيل و تودي المكواة والا مش هتلاقي حاجة تلبسها بكرة.

فادي (يقوم): ماشي يا باشا .......ماشي.....حُكم القوي.

يخرج فادي ووراه سامح

الراوي: يا عيني عليكوا يا ولاد ...يا تري ايه اللي هيحصل لكوا بعد كده....تعالوا نشوف بعد يومين ايه اللي هيحصل

* يدخل فادي وهو يتكلم في الموبيل

ف: أيوه يا ماما ...احنا كويسين أنتي جاية امتي؟؟

الأم : ......................

ف: ايه ؟؟ جوز خالتي اتزحلق في الحمام..........(يتنهد)....طيب.......

الأم : ................

ف: لأ متقلقيش علينا...احنا قدها...ولا يهمك...مع السلامة

يدخل سامح ويقول

س: لأ ...لأ ...أنا خايف أسأل....

يهز فادي رأسه بمعني نعم

س: يعني هي فعلا مش جاية النهاردة؟؟

يهز فادي رأسه بمعني لا

ف وس : واااااااااااء

* تدخل فتاة مبتسمة وتقول

سالي: مساء الخير يا شباب ازيكوا؟؟ وحشتوني

يقفز س وف من الفرح

سامح : سالي ..مش ممكن

تقف الصورة ويأتي صوت الراوي

الراوي: آآآه ..معلش أنا نسيت أعرفكم بشخصية مهمة جدا ...دي سالي أخت سامح وفادي لسه متجوزة

قريب.

فادى : أحمدك يا رب ...سالي جت.

سامح : فعلا الشخص المناسب في الوقت المناسب.

سالي : خير اللهم اجعله خير ..ايه المحبة دي كلها؟؟

فادى : احنا طول عمرنا بنحبك بس أنتي اللي مش واخدة بالك.

سالي : ماشي يا سي روميو...هي ماما لسه مرجعتش من عند خالتي؟؟

فادى : لأ ماما لسه قدامها يومين كمان.

سالي : ايه ؟؟ يومين كمان ؟؟ وأنا أعمل ايه دلوقتي؟؟

فادى : أنتي اللي هتعملي ايه ..ولا احنا اللي نعمل ايه

سالي : أنت مش فاهم يا ابني ..أنا عندي عزومة بكرة ....حماتي جاية وكنت معتمدة علي ماما تعمل لي

المحشي والمكرونة بالبشاميل والجُلاش والتورتة...أعمل ايه أنا دلوقتي؟؟

فادى (يضحك): ولايهمك يا ستي ..أنا بقيت استاذ في عمل البيض المسلوق وممكن أساعدك.

سالي : أنت بتتريق عليّ يا سي فادي وأنا محتاسة وواقعة في مشكلة.

فادى : يا بنتي أنا بهزر معاكي...متتقمصيش بسرعة كده

سامح : وبعدين ما احنا كلنا في الهوا سوا .. كلنا محتاسين من غير ماما.

فادى : آه ..تخيلي اني بقالي يومين بأكل من ايدين الأخ ده(يطبطب علي سامح) ...الفول محروق واللبن بايظ و....

سامح (يقاطعه): أنا الحق عليّ اني مستحملك وبأعمل كل حاجة لوحدي

فادى : لوحدك ؟؟ لوحدك ازاي ؟؟ ومين اللي كل شوية يعمل شاي و نس كافيه ومش عارف ايه؟؟

سالي (تزعق في الاتنين): بس أنت وهو (تطلع الموبايل ) ..أنا هأكلم ماما تشوف لنا حل

يخرج سامح وفادي

سالي : أيوه يا ماما...ازيك؟؟

الأم: .........................

سالي : لأ أنا مش كويسة خالص يا ماما.

الأم :.....................

سالي : حماتي معزومة عندي بكرة ..وكنت عاملة حسابي انك هتساعديني

الأم: ............................

سالي: هو مين أهم يعني ؟؟ خالتي وجوزها وبنتها ولا بنتك أنتي..

الأم : ...............................

سالي : ما أنا عارفة ان ظروفهم صعبة...وأنا ظروفي هتبقي أصعب لو العزومة دي مكنش فيها محشي ومكرونة بالبشاميل.

الأم: ...................

سالي: وأنا هأعمل ايه يا ماما ؟؟ ....حد قال لك تدلعيني كده؟؟

الأم: .............................

سالي : يا حبيبتي يا ماما ...ربنا يخليكي ليّ يا رب....أنا جايالك حالا (تقفل الموبيل)

يدخل فادي ويسأل

فادى : هيه ...هتيجي دلوقتي؟؟

سالي : لأ ...أنا هآخد لها العدة وأروح علي هناك.

يدخل سامح ويقول

سامح : كويس ...يعني أنتي مشكلتك اتحلت.....ساعدينا في مشكلتنا...الحوض فيه مواعين آآآآآآآآآآآآد كده (يشاور بايديه) وبتنادي عليكي تغسليها.

سالي : لا يا بابا ...المواعين بتنادي عليكوا أنتوا ...أنا ورايا بيت ومش فاضية لكوا...سلام.(تخرج)

سامح: ماما دايما بتقول في المواقف دي : جبتك يا عبد المعين تعينني.....

فادى (يكمل له الجملة) : لقيتك يا عبد المعين مش عارف تعمل محشي (يخرجان)

الراوي : وهكذا أعزائي المشاهدين ...تمضي الحياة بسامح وفادي ...حبة فوق ....حبة تحت...وهما

دلوقتي في الحبة اللي تحت ....حتي بصوا كده معايا.

* يدخل فادي شايل طبق بلاستيك كبير به ماء وآريال ويجلس أرضا ويبدأ يدعك في الهدوم ، ويدخل وراه سامح بطبق صغير فيه بطاطس ويبدأ يقشر ويتكلموا وهما شغالين

ف: فينك يا ماما؟؟ (يبدأ يغني) ماما فين؟؟ ....ماما هناك...عند مين ؟؟ ..عند خالتي......خالتي مين؟؟

س (يقاطعه): عارف يا فادي ..احنا كنا محتاجين البهدلة دي فعلا عشان نعرف قيمة ماما

ف: عندك حق..ما احنا كنا قاعدين في سلام ...وكل حاجة بتيجي لحد عندنا..

س(يقاطعه): يعني هي دي قيمة ماما الوحيدة عندك...انها بتجيب لحضرتك كل حاجة لغاية عندك؟؟

ف: أنت عاوز تحرجني يعني ولا ايه؟؟

س : ما أنا بأحرج نفسي معاك ... ما هو احنا الاتنين مش حاسين خالص بقيمتها الا في الحاجات دي

الأكل واللبس والغسيل ومش عارف ايه....يعني مالآخر كده كأنها شغالة.

ف: لأ يا سامح لأ .... دي كلمة شديدة قوي ..أنا مسمحلكش تقول كده علي ماما.

س: ما هو احنا مبنقولهاش بصوت عالي ...بس أحيانا كتيرة تصرفاتنا بتقولها.

ف: بقولك ايه متشتغليش...هي دي وظيفة الأم انها تتعب عشان ولادها ...وبعدين هي مبتبقاش

متضايقة وهي بتعمل كده بالعكس دي بتبقي مبسوطة جدا.

س: أيوه بس المفروض ولادها دول يخلوا عندهم دم ويقدروها ويحسوا بتعبها شوية.

ف: دي عندك حق فيها واحنا عشان كده بنجيب لها هدية في عيد الأم.

س: يا راجل ...أنت شايف يعني ان ده كفاية؟؟

ف: طب قول لي نعمل لها ايه تاني؟؟

س (بعد تفكير لمدة ثواني): ايه رأيك لو كل فترة كده نبقي نديها أجازة....قصدي يعني نخليها تستريح

يوم واحد واحنا نعمل شغل البيت بدالها في اليوم ده.

ف: آه ....طبعا دا بناءً علي اننا شاطرين قوي في شغل البيت.. بس أنا موافق ...حتي لو هنقضيها بيض

مسلوق وهنغسل الطباق.

س: طب ايه رأيك لو نبدأ علي طول أول ما ترجع من عند خالتي.؟؟

ف :علي طول كده من غير ما نشم نفسنا؟؟

س : أيوه ..أصلها أكيد هترجع مهدودة عالآخروأهي فرصة تحسسها بتقديرنا ليها.

ف: ماشي يا عم ...ماشي.

يستمران في عملهما ثواني ثم يسمعان خبط علي الباب فيخرج فادي ليفتح ويأتي صوته صارخا : ماما...ماما ...يا حبيبتي يا ماما

يقفز سامح من مكانه ويخرج وهو يقول: أخيرا يا ماما

يعود الثلاثة معا ويبدأ فادي وسامح في الكلام بسرعة جدا

ف: حمد الله عالسلامة يا ماما.

س: وحشتينا جدا جدا جدا .

ف: البيت كان مضلم من غيرك.

س: أنا جعان و نفسي آكل محشي يا ماما.

ف: آه يا ماما وأنا نفسي آكل أي حاجة فيها لحمة ... أنا من كتر ما أكلت بيض مسلوق بقيت بأكاكي زي

الفراخ.

الأم : علي مهلكوا عليّ شوية يا ولاد ..بالراحة

يحمل كل واحد منهما طبقه للخارج بينما تجلس الأم ثم يعودان ويقفزا علي السرير ويناموا

الأم : قولوا لي أخباركوا ايه؟؟ كنتوا بتذاكروا كويس؟؟ (محدش يرد)

الأم : الله ..أنتوا هتناموا كده علي طول؟؟ (محدش يرد)

الأم (تتنهد): ماشي ..اما أطلع أنا بقي أشوف اللي ورايا. (تخرج)

الصورة ثابتة ويأتي صوت الراوي

الراوي : ايه دا يا شباب ؟؟ يا سامح ...يا فادي....

(يردوا عليه بصوت شخيرهما)

الراوي: هو كلام عيال ..مش قلنا هنديها أجازة النهاردة ونخليها ترتاح؟؟ (شخير)

الراوي: راح فين الكلام عن تقدير الأم والاحساس بقيمتها؟؟ (شخير)

الراوي : أعزائي المشاهدين وخصوصا الأمهات .....كان نفسي الحكاية تنتهي بنهاية أسعد من كده ...بس معلش...هنعمل ايه بقي؟؟ العيال هيفضلوا عيال والأمهات هيفضلوا برضه أمهات...يعني أنتوا تفتكروا ان الأم دلوقتي هتبقي زعلانة من سامح وفادي ....أنا بيتهيألي ...أقصد أنا متأكد انها مش ممكن تزعل أبدا ....ولا أنتوا رأيكوا ايه؟؟؟

اسكتش ماما فين ؟