مسرحية الطوفان

تفتح الستار على استعراض بناء الفلك يشارك فية نوح وعائلتة مع العمال , بعد انتهاء الاستعراض يستكمل العمال عملهم , بينما نوح وأسرتة يدخلون الفلك , يبقى حام خارجا وهو شاب تخطى المئة عام بقليل وهو متين البنيان وحسن الملامح يعمل فى قطعة خشب , ثم تلحق بة صلفة زوجتة وهى أمرأة جميلة فى حوالى الثمانين من عمرها ...

صلفة : أساعدك ؟ ؟

حام : لا شكرا , بس هاتى أكل للعمال

صلفة : حاضر

حام : متشكر

صلفة : تفتكر الطوفان هاييجى أمتى ؟؟

حام ( وهو يعمل ) : مش عارف !!

صلفة : اصل بقالنا كتير اوى شغالين

حام ( يتوقف وينظر لها ) : انتى قابلتى ابوكى انهردة ؟؟

صلفة : أشمعنى ؟

حام : أصل دة كلامة

صلفة : هو انا كل لما اكلمك تقولى ابوكى ؟

حام : وانتى كل لما تكلمية يقولك نوح والفلك والطوفان ؟

صلفة : الحق علية اللى عامل عليك ؟

حام : يا ستى ما انا عارف ... بس أعمل اية ؟ .... نوح دة ابويا .. وانا مقدرش اخالفة

صلفة ( تبتعد ) : طيب

حام ( اليها ) : متزعليش

صلفة : مش زعلانة ... واحدة زى يادوب مكملة 80 سنة تضيع شبابها فى بنى فلك عمر ماحد هيركبة ... اية اللى يزعل فى كدة ؟

حام : مش نقصة نكد

( يأخذ الخشب ويتجة الى داخل الفلك )

صلفة : طب أرضى مين وازعل مين بس ؟

( يأتى اليها ابيها شديئور , وهو رجل حوالى 400 من عمرة )

شديئور : زعلى ابوكى يا صلفة ؟

صلفة : طب لية بتقول كدة يا والدى ؟

شديئور : طالما خايفة على زعل جوزك ... طالما عاجبك عمايل ابوة المجنون

صلفة ( بحيرة ) : طب انا اعمل اية دلوقت ؟

شديئور : يا بنتى .. دا انا جوزتك حام علشان أبوة نوح اغنى راجل فى المنطقة , وحسيت انى اطمنت عليكى ... لكن اديكى شايفة أبوة هيضيع ميراثك فى بنى فلك .. ( تقاطعة )

صلفة : عمر ماحد هيركبة ... عارفة , عارفة كل كلامك .. وبقولة زى ما قلتلى ,, بس مفيش نتيجة

شديئور : علشان نوح كبر وخرف ... وحتى لو عيالة قصادة برضو هايكمل .. علشان كدة الكلام مش هيعمل حاجة

صلفة : امال هنعمل اية ؟

شديئور : سيبى دة عليا انا ... المهم دلوقتى تكسبى رضى جوزك

صلفة : انا مبقتش فهماك خالص ؟

شديئور : معلش , بكرة لما تلاقينى حميتلك ثروتك .. هتعرفى أنى كنت استاهل كل مرة طاوعتينى فيها

صلفة : لما نشوف !!

شديئور : روحى دلوقت انتى ساعدى جوزك وسيبينى هنا دلوقت .

( تذهب صلفة خلف زوجها , بينما شديئور ينتظر حتى يخرج نوح .. نوح رجل كبير حوالى 600 من عمرة يبدو علية النشاط والحماسة )

شديئور : أهلا بحمى بنتى .

نوح : اهلا بحمى أبنى .

شديئور : أخبار الفلك اية يا نوح ؟

نوح : أديك شايف ... البنى قرب يخلص

شديئور : هو الطوفان دة مقربش ييجى ؟

نوح : هاييجى لما ربنا يشوف

شديئور : طب وهو ربنا هايستفيد اية لما يمحى البشر ؟

نوح : ربنا متضايق من خطيئة البشر .. وهايمحى الحياة كلها . ماعدا اللى هايحفظهم فى الفلك

شديئور : ايوة كدة خلينا نخلص من تجار السوق

نوح : ربنا مش هينزل الطوفان علشان مصلحتك

شديئور : بس انا اقدر استغل الطوفان لمصلحتى .. ولمصلحتك برضو

نوح : المصلحة الوحيدة هيا ان الناس يسمعوا كلام ربنا

شديئور : ماختلفناش ... مش انت شايف ان الناس اللى برة الفلك هيغرقوا ؟

نوح : ربنا هو اللى قال

شديئور : ومالة ... سعتها هايكون الفلك أهم سلعة فى العالم

نوح : الفلك مش تجارة

شديئور : انت صرفت علية كتير ... ومن حقك ترجع فلوسك , وربنا مش هيزعل لانك مكسرتش كلامة

نوح : عاوزنا نكسب من عقاب ربنا ؟

شديئور : مش أحسن ما تخسر من رضاة .. بص ,, انا هشاركك على الفلك ,, ولما الطوفان يجى هنأجرة ؟

نوح : تجارتك فاشلة يا شديئور

شديئور : نوح .... انا باديك فرصة تعوض خسارتك

نوح : لما تغرق فى الطوفان الفلوس مش هتنفعك

شديئور : انا مش بخاف من الطوفان ... الطوفان دة كدبة انت اخترعتها .. وبعدين ومالوا لما يجى الطوفان !! .... هايخلصنا من الضعفا والفقرا والعيانين .. ونقعد احنا يا نوح ونبقى أسياد الارض

نوح : الطوفان لما يجى انت اول واحد هيغرق

شديئور : الايام بينا يا نوح ... وهاتشوف ان انا الطوفان اللى هيغرقك انت واولادك

نوح ( يقوم ) : مافيش كلام بينى وبينك .

شديئور : ماشى .. بس افتكر ان الفلك دة ماحدش هيركبة

( يخرج غاضبا )

نوح ( للسماء ) : ماتخدش بنتة بأفعالة ... ولا تمشى ابنى فى طريقة

( تأتى حنة زوجة نوح وهى سيدة تجاوزت 500 عام )

حنة : نوح

نوح : ايوة يا حنة

حنة : انا جة فى بالى حاجة وعايزة اسألك .. هو مش ممكن الحيوانات المفترسة تاكل الحيوانات الاليفة فى الفلك ؟؟

نوح : مستحيل يا حنة ... ربنا هيحافظ اجناس الحيوانات دى كلها فى الفلك علشان تعمر الارض بعد الطوفان

حنة : وهى الارض هاترجع بعد الطوفان زى ما كانت

نوح : اكيد هترجع

حنة : انا بصراحة تعبت يا نوح ... احنا بقالنا كتير قوى بنبنى الفلك , الناس كلها بتسخر مننا ... وربنا مش بيرد عليهم

نوح : ربنا هيرد بالطوفان

حنة : أمتى ؟؟

نوح : مش عارف

( فترة صمت قصيرة )

نوح : وصلتوا لغاية فين ؟

حنة : انا حطيت كل الوحوش والمفترسات ... وسام ومراتة بيدخلوا الحيوانات الاليفة .. ويافث ومراتة بيوكلوا الطيور .. بس الفلك اتزحم قوى .

نوح : سام دا ابنى البار فعلا .

حنة : يحمية لشبابة .

نوح : طب يلا روحى ساعديهم , وانا هاجيب بقية الحيوانات

( يخرج , بينما هيا تدخل . فترة قصيرة ويتحرك عامل 1 من البناين ويجمع حولة الباقيين )

عامل 1 : اجمعوا هنا

عامل 2 : فية اية ؟

عامل 3 : خليتنا نسيب شغلنا

عامل 1 : مادة شغل برضو

عامل 4 : خير

عامل 1 : فية واحد هايدفعلنا فلوس كتير قوى علشان شغل جديد

عامل 3 : بس لما نخلص شغلنا دة

عامل 4 : استنى بس ,,, فلوس اكتر من فلوس نوح ؟؟

عامل 1 : بكتير

عامل 2 : طب اية الشغل ؟؟

عامل 1 : اننا نكسر الفلك دة كلة

عامل 4 : أزاى دة ؟

عامل 1 : أهو كدة ... واحد عارض فلوس كتير قوى علشان نهد الفلك دة ,, اية رأيكم ؟؟

( بالتمثيل الصامت يتناقشون على خلفية موسيقى ثم يتجهون سويا لتكسير الفلك .. على صوت التكسير يخرج نوح وابناءة الثلاثة حاملين بلطات ,, سام أكبر قليلا من حام ,, بينما يافث أصغرهم وهو يحمل بلطة فى تراخة ويبدو اللامبالاه )

نوح : استنوا عندكم

سام : بتعملوا اية ؟

عامل 1 : هانكسر الفلك اللى شقينا فية ع الفاضى

نوح : يعنى اية ع الفاضى ؟؟

عامل 4 : يعنى طول عمرنا شغالين عندك وانت بتدينا اقل أجر بياخدة العمال

نوح : طب قولوا كدة ... مش تكسروا الفلك اللى تعبنا فية سنين ياما !!

عامل 2 : أدينا قلنا

نوح : خلاص انا هارفع اجركم الضعف بس على شرط ,, تشتغلوا بذمة وتصلحوا اللى بوظتوة

عامل 1 : موافقين

( العمال يهللون بينما حام ويافث ينظران لبعضهما غاضبين ,, نوح وسام يرقبونهم لفترة ثم يدخلون ... يعود العمال للعمل ,, ويدخل شديئور وصلفة )

شديئور : اية اللى بتعملوا دة .... انا هاديكم فلوس علشان تبنوا الفلك ؟

عامل 1 : نوح رفع اجرنا للضعف

عامل 4 : يعنى أكتر من اللى انت هتدفعة

عامل 2 : غير انهم طلعوا علينا شايلين بالطات , واحنا مش هانضيع حياتنا علشان فلوسك

عامل 3 : احنا هنكمل مع نوح علشان شغلنا معاه

شديئور : بقى كدة ... حتى فى دى بيتحدانى ؟

صلفة : يا والدى ما انت اللى بدأت

شديئور : ماهو علشانك .. لو كانوا الكلاب دول كسروا الفلك ماكانش نوح افتكر يبنية تانى ... هو لو فية طوفان هيستنى نوح ؟؟

صلفة : أديك عاديتة ع الفاضى

شديئور : لا ماهو مش هايعرف ان انا اللى كلمتهم , المهم دلوقت ننقذ ثروتك

صلفة : طب أزى ؟

شديئور : مش عارف ... نوح اقوى مننا بكتير .. عندة الفلوس اللى بتلم الناس .. عندة 3 اولاد شداد جنبة .. وانا كل اللى حيلتى بنت

صلفة: طب وانا ذنبى اية ؟

شديئور : بس البنت هتغلب ال 3 اولاد

صلفة : أزاى ؟

شديئور : لو سمعتى كلامى

صلفة : لما نشوف

شديئور : دلوقتى هوة معاه 3 اولاد واقفين مع بعض , انما لو فرقناهم هايبقوا فى صفنا

صلفة : يا والدى هاتدمر حياتهم علشان الفلوس ؟

شديئور : وهوة لو ضيع ميراثهم هيسامحوة .. بالعكس يمكن فكرتى دى هى اللى تنقذهم

صلفة : طب قول

( يتناقشان وتغطيهم الموسيقى حتى ينتهيان , تخرج صلفة جارية الى الفلك , بينما يخرج شيدئور الى الخارج . بعد قليل تنزل هى وخلفها سام من الفلك )

صلفة : روحوا استريحوا دلوقت ( يخرجون )

سام : مش تقولى عايزانى فى اية ؟

صلفة ( تقترب منة فجأة ) : يارتنى كنت مراتك انت بدل حام ؟

سام ( يبتعد تلقائيا ) : اية اللى بتقولية دة ؟

صلفة : باقولك انى مش بحب حام

سام : ابعدى عنى .. ازاى تتكلمى كدة ؟

صلفة : غصب عنى ... انا بحسد مراتك , متجوزة اجمل واحسن راجل فى المنطقة

سام : لو ماسكتيش انا هقول لحام

صلفة : قولة .. قولة انى مش بحبة .. قولة انى بحب سام .. يقتلى لو كان بأيدى

( يبتعد عنها سام بينما هى تقترب منة بأستمرار )

سام : ربنا هينزل الطوفان من غضبة على خطايا البشر

صلفة : بس دى مش خطية ... انا حاسة انى محتجالك

سام : ابعدى عنى ,, انتى مجنونة

صلفة : ايوة مجنونة ... علشان بحب واحد وهو بيحتقرنى

سام : انا فعلا بحتقرك ... انتى شريرة ولازم تغرقى مع الاشرار اللى زيك

صلفة : بس انا مش هغرق لوحدى

سام : كل اللى زيك هيغرقوا معاكى

صلفة : طيب يا سام

( يتحرك سام داخلا الفلك )

صلفة : الحقونى ... الحقونى .. ابعدوة عنى ,, الحقونى .

( يأتى العمال على أثر صراخها , يخرج حام مسرعا حاملا بلطة , ثم يشير للعمال بأن يبتعدوا )

حام : فية اية ؟

صلفة ( تتجة لحام باكية ) : احمينى ياحام

حام : اية اللى حصل ؟

( سام صامتا )

صلفة : اسأل اخوك الكبير

حام : فية اية يا سام ؟

سام : ( صمت )

حام : رد عليا بقولك فية اية ؟

صلفة : وهو يقدر يقول اللى عملة

حام : يعنى اللى فى بالى ..... ( تقاطعة )

صلفة : ايوة .. اخوك الكبير معلمش حساب انى مراة اخوة

حام ( مصدوما ) : سام ؟

صلفة : ايوة .. العاقل , اللى ابوك بيحبة وبيثق فية عنكم

حام : انا مش مصدق

صلفة : ولا انا ... حتى العمال هيمسكوا سيرتنا

حام : طب ادخلى الفلك دلوقت ؟

صلفة : انا مش هاقعد معاك غير لما تجيبلى حقى

حام : بقول ادخلى دلوقت

صلفة : يعنى فالح تزعق فيا انا ( تبكى ) وسايب الجانى وبتحاسب المجنى علية

حام : لو سمحتى ... لو سمحتى ادخلى علشان العمال بيتفرجوا علينا

صلفة : لما نشوف اخرتها

حام : اتفضلى

( تدخل الفلك )

حام : قال انت عملت كدة يا سام ؟

سام : ( صامتا )

حام : متجننيش ورد عليا

سام : ( صامتا )

حام : يعنى جبتلنا كلنا الفضيحة ولسة بتعمل نفسك غلبان ؟

سام : ربنا شايف

حام : بعد اللى عملتة دة ولسة بتقول ربنا ؟

سام : ( صامتا )

حام : طب بص , انا علشان خايف ربنا مش هقتلك رغم انك تستاهل ... بس انهاردة أخر يوم ليك معانا

سام : يعنى اية ؟

حام : يعنى تسيبنا وتمشى .. لانى لو شوفتك قدامى تانى مش عارف هاعمل اية ؟

سام : طب امشى اروح فين بس ؟

حام : ماعرفش

( يدخل شيدئور )

شديئور : حام

حام : حمايا

شديور : اقولك

شديئور : انا سمعت من صلفة .... ( يسكت )

حام : ( ينكس رأسة )

شديئور : وانت عملت اية ؟

حام : انا هخلية يمشة من هنا خالص

شديئور : دى كرامة بنتى وكرامتك فنظرك ؟

حام : احنا يا حمايا عايزين نلم الموضوع لغاية لما الطوفان يجى

شديئور ( يقاطعة ) : طوفان ... انت عايز تضحك عليا زى ما ابوك بيضحك عليكم

حام : دة مش موضوعنا

شديئور : اة .. موضوعنا هو حق بنتى ,, اللى انت لو متعرفش تجيبة انا هعرف !

حام : يا حمايا أسلم حل اننا نبعدوا عن هنا

شديئور : ماشى ... انا معاك , بس تضمنلى انة ميرجعش تانى

حام : قصدك اية ؟

شديئور : هافهمك قصدى بعدين ,, بس روح دلوقت علشان ماحدش يلاحظ حاجة ...

حام : مش تفهمنى هاتعمل اية ؟

شديئور : طب خليك .

( يتجة للعمال ويحضر عامل 1 )

عامل 1 : نعم ؟

شديئور : عندنا عبد وعايزين نبيعة ؟

عامل 1 : وانا مالى ؟

شديئور : ما انت كنت شغال فى سوق العبيد

عامل 1 : طب هو لية فى أية ؟

شديئور : لية فى كل حاجة .

عامل 1 : مين دة ؟

شديئور : سام ابن نوح ..

عامل 1 : اية ؟

حام : لا يا حمايا ,, ماوصلتش لكدة ... أبيع اخويا ؟

شديئور : ماهو اللى باعك الاول .. انت كدة كدة كنت عاوز تمشية .. فية اية لما نكسب من وراه فلوس . ونضمن انة مش هيرجع تانى ؟

حام : مش عارف

شديئور : خلاص انا عارف وسيبنى اتصرف ( للعامل ) قولت اية ؟

عامل 1 : بس انا اخاف من سيدى نوح ... ( يقاطعة )

شديئور : وهو نوح هيعرف منين ؟؟ انت وصى على عيالة ؟؟ انت هتروح تتصرف فية وترجع كأنك بتشتغل عادى

عامل 1 : بس انا هاخد من الفلوس دى

شديئور : ماشى بس مش كتير . ( لحام ) ولا كأننا عرفنا حاجة .

حام : ( صامتا )

( عامل 1 يأخذ سام ويخرج بة ,, بينما حام يدخل الفلك وشيدئور يخرج .... العمال يستأنفون العمل )

عامل 3 : تفتكر هيعمل فية اية ؟

عامل 4 : واحنا مالنا

عامل 3 : طيب

( يعودون للعمل حتى يعود عامل 1 وينضم اليهم )

عامل 2 : حصل اية ؟

عامل 1 : فية واحد اشتراة

عامل 2 : مين ؟

عامل 1 : اشعرفنى ... اهو نخاس وخلاص

عامل 4 : تفتكر الحكاية دى هتستخبى ؟

عامل 1 : احنا مالناش دعوة ... احنا ماشوفناش حاجة , وكل واحد مننا هياخد نصيبة

عامل 4 : اة ... وهما حرين مع بعض

عامل 1 : احنا هنا عمال .. بنعمل اية ؟ بنشتغل فى الفلك .

عامل 3 : انا مش مطمن .

عامل 2 : خليك انت فى حالك .

عامل 1 : يلا نرجع نشتغل احسن حد ياخد بالة .

( يعودون للعمل حتى يدخل شديئور , يتجهون الية )

شديئور : عملت اية ؟

عامل 1 ( يعطية كيس مال ) : بعتة .. وخدت نسبتى انا والرجالة

شديئور : ومالة ... كدة فاضل الصغير

عامل 1 : يافث ؟

شديئور : ايوة

عامل 1 : بس احنا ماتفقناش علية

شديئور ( يعيد الية الكيس ) : ومالوا ... نتفق ؟

عامل 1 ( ينظر فى الكيس ) : واية المطلوب ؟

شديئور : هابدأ انا ,, وبعدين هاتكملوا انتوا .

عامل 1: طب هانعمل اية ؟

شديئور : لما نشوف ... هو مش هايخرج ؟

عامل 1 : هو بيخرج كل شوية , لو استنيتة هيظهر

شديئور : طيب

( يجلس قليلا حتى يخرج يافث )

يافث : عم شديئور

شديئور : ايوة يا يافث ... كنت باطمن على العمال ,, دول مبسوطين قوى

يافث : لية ؟

شديئور : ابوك راجل طيب وزود اجرهم علشان ميزعلوش

يافث ( بغضب ) : عرفت !!

شديئور : ابوك راجل كريم

يافث : ابويا هايفضل كريم لغاية لما نشحت .

شديئور : ازاى دة

يافث : مش عمال يصرف ع العمال والخشب والادوات .. حد عارف بعد الطوفان هنلاقى ناكل ولا لاء ؟؟

شديئور : اكيد شايل فلوس كتير بيصرف منها .

يافث : ومها كانت كتير مصيرها تخلص

شديئور ( يقوم ) : سامحنى يا ابنى .. دى حاجة تخصكم وماقدرش اتدخل فيها

( وهو خارجا يشير للعمال )

يافث ( لنفسة ) : طبعا مايقدرش يتدخل فيها ... ألا لو كانت تخص نصيب بنتة !

عامل 1 : مالك يا سيدى يافث ؟

يافث : وانت مالك .. ؟ روح شوف شغلك .

عامل 1 : انا بس شايفك متضايق

يافث : لا مافيش ... روح انت .

عامل 4 ( لعامل 1 ) : يلا علشان فية خشب كتير جاى مش هانلحق نخذنة

عامل 1 : ادينى جاى

يافث ( يمسكة ) : استنى ... خشب اية اللى جاى ؟؟

عامل 1 : خشب علشان نبنى

يافث : تانى ؟ ؟

عامل 1 : يووووة .. دا لسة بدرى قوى . سيدى نوح عايز الفلك ضخم جدا جدا .. لدرجة اننا مش هانقدر وحدنا , واكيد هايشغل عمال تانى كتير . بس ارجوك توصية علينا ؟

يافث ( لنفسة ) : اذا كنت مش عارف اوصية على نفسى !!

عامل 1 : اية ؟

يافث : مافيش .. وهو دفع حساب كلوا دة ؟

عامل 1 : يوووة ... فلوس كتير قوى

يافث : طيب

عامل 1 : مش هاتتفضل تشوف

يافث : لا روح انت دلوقت .

( نوح عائدا من الخارج يقابل يافث )

نوح : يافث .. روح فضى مكان علشان فية حيوانات كتير جاية

يافث : تانى يا والدى ؟

نوح : طبعا يا يافث ... ربنا هايغرق الارض كلها .. واى نوح مش هيدخل الفلك ذكر وأنثى هاينقرض !!

يافث : بس دول بياخدوا مكان واكل كتير قوى

نوح : ومالة ؟؟ خير ربنا

يافث : ايوة ... بس الخير دة مصيرة يخلص

نوح : ومالة ؟؟ ربنا هايبعت غيرة

يافث : علشان تصرفة برضو ... اقولك , بصراحة انا حاسس انك بتظلمنا ؟

نوح : لية بتقول كدة ؟

يافث : علشان مش واخدين اى اهتمام منك .. دا انا حاسس انك مهتم بالحيوانات والعمال اكتر مننا

نوح : انا يا ابنى مهتم انى انفذ وصايا ربنا

يافث : خلاص نفذها وحدك .

نوح : يعنى اية يا ابنى ؟

يافث : يعنى انا هاسيبكم وامشى .

نوح : تمشى تروح فين ؟

يافث : اى حتة .. وادينى نصيبى من الميراث ؟

نوح : نصيبك !!!

يافث : ايوة .. علشان لو قعدت كدة مش هطول حاجة

نوح : تروح فين دة الطوفان هيغرق الارض كلها

يافث : هابنى انا سفينة صغيرة , بس أوفر الباقى

نوح : يا ابنى مش هاتقدر

يافث : خلاص .. هاموت فى الطوفان , احسن ما اموت من البهدلة

نوح : طب استنى معايا وانا هاديلك اللى انت عاوزة

يافث : انا عاوز نصيبى كلة

نوح : مش هتلاقى حتة تروحها

يافث : يعنى انت كنت مهتم , 120 سنة وانت بتبنى الفلك .. 120 سنة واحنا بالنسبالك العمال اللى مبيخدوش أجر .. 120 سنة واحنا بنشتغل علشان فكرة فى بالك انت ربيتنا عليها وحفظتهالنا لغاية ما خليتنا مابنخافش غير من الطوفان .. حتى ربنا بنخاف منة علشان مايغرقناش

نوح : يا ابنى دا ربنا اخترنا علشان نحافظ على الحياة

يافث : وانا من حقى احافظ على حياتى انا .. ودة اخر كلام يا والدى .. اما ماشى سواء اديتنى نصيبى او مدتنيش

نوح : طب تعال معايا الفلك ؟

( يدخلان وبعد قليل يخرج يافث وخلفة حام )

حام : يا فث ... هتمشى ؟؟

يافث : اة هامشى ... خليك انت وسام علشان تحافظوا ع الحياة

حام : سام ؟ ... انت ماتعرفش حاجة

يافث : ومش عايز اعرف ؟ ... اقابلك بعد الطوفان

( يخرج وحام يراقبة ... بينما يدخل شديئور من الناحية الاخرى )

شديئور : كدة انت بقيت لوحدك

حام : انت اللى عملت كدة

شديئور : علشانك

حام : علشان طمعك فى ثروة ابويا

شديئور : وانا ثروة ابوك هاخدها ليا .. ماهو ليك انت ومراتك

حام : وانا طاوعتك

شديئور : علشان انت عايز دة

حام : طب وبعدين ؟

شديئور : الطريق كلة مفتوح ليك .. انت وحدك دلوقت

حام : مش عايز اسمع كلامك

شديئور : انت بتقول كدة لانك عارف انك عاوز تسمعة

حام : يعنى انا هاعمل اية دلوقت ؟

شديئور : هتعلن انك صاحب الكلمة فى الفلك دة

حام : ازاى بقى ؟

شديئور : العمال معاك

حام : ودول هيعملوا اية ؟

شديئور : هاينفذوا كلمتك ولا خايف يكون ليك كلمة ؟

حام : مش خايف .. انا محتار !!

شديئور : اسمع كلامى وانا اريحك

حام : تانى

شديئور : لغاية لما امسكك كل حاجة .

حام : طب ووالدى ؟

شديئور : ف الحفظ والصون ... سيب كل حاجة عليا

( شديئور يجمع العمال )

عامل 1 : اية تانى ؟

شديئور : خلاص هانت .. كل تعبنا قرب يخلص

عامل 2 : يعنى عايزنا نعمل اية ؟

شديئور : تسمعوا كلام حام

حام : كلام اية ؟

شديئور : حام هايستلم الشغل من ابوة ولازم تساعدوة

حام : شغل اية ؟

شديئور : بناء الفلك

حام : تانى بناء الفلك ؟

شديئور : عيب لما تظهر قدام العمال مش عارف شغلك .

حام : بس دة كلامك انت

شديئور : اللى انت هتنفذة

عامل 4 : يعنى انتوا عاوزين مننا اية ؟

شديئور : اتكلم يا حام ... ودى فرصتك الاخيرة .. حافظ على ثروة ابوك من تهورة

عامل 2 : هاتتكلموا ولا نمشى ؟

حام : احنا هانوقف بنى الفلك

عامل 3 : اية ؟

حام : اللى سمعتوة ... انتوا من هنا ورايح هاتسمعوا كلامى انا

عامل 4 : ولما نوقف بنى الفلك هانجيب فلوس منين ؟

شديئور : الفلك فية خير كتير ولما حام هايبقى مسؤل عنة هايبسطكم كلكم

عامل 1 : احنا معاك

حام : المهم دلوقت ننظم نفسنا ... احنا دلوقت هنرجع للشغل وعنينا ع الفلك ... وعند ساعة الصفر هانحاصرة كلنا

عامل 2 : وساعة الصفر دى هنعرفها ازاى ؟

حام : انا هارفع بلطتى فكلكم ترفعوا بلطاتكم

عامل 1 : تمام

شديئور : انت كدة جوز بنتى

حام : جوز بنتك ... لكن مش ابن نوح !!

عامل 4 : وبعد مانحاصر الفلك ؟

حام : هاقولكم فى وقتها .. يلا ارجعوا لشغلكم دلوقت وخلى عنيكم عليا

عامل 1 : طب يلا بينا

( يعودون للعمل )

حام : انا لية سمعت كلامك ؟

شديئور : لانك عايز تسمعة .

( يتظاهرون بالعمل بينما نوح يطل من الباب )

نوح : حام

حام : نعم يا والدى

نوح : اخوك سام فين ؟

حام : سام ؟ .... مش عارف .. جايز طلع يجيب حاجات

نوح : طب مش هاتكمل شغلك جوة الفلك ؟

حام : لا هاشتغل مع العمال علشان قربنا نخلص

نوح : بس انا عايزك هنا

حام : لا مش داخل

نوح : فية حاجة ؟

حام ( بعد لحظة صمت ) : اة فية .

( يتقدم ببطئ نحو الفلك ثم يرفع بلطتة عاليا , يتبعة العمال حول الفلك رافعين بلطاتهم )

نوح : فية اية ياحام ؟

حام : خلاص ياوالدى موضوع الفلك خلص .

نوح : هاتقتلنى !!!

حام : لا طبعا ماقدرش .. احنا محاصرين الفلك لغاية لما نسيطر علية وتسيبلنا كل حاجة

نوح : زى ماخلصت من اخواتك كدة

حام : اخواتى ؟؟

نوح : اة اخواتك .. مش عارفهم .. سام ويافث

حام : انا معملتلهمش حاجة

نوح : طب يمكن حماك ... أسألة ؟

حام : انت مش عارف سام عمل اية ؟

نوح : مين يعرف ؟ حماك ؟ ولا مراتك ؟

حام : مراتى ؟

( تطل صلفة من الباب بجوار نوح )

صلفة : حام .. سام ماعملش حاجة

شديئور : صلفة .... انزلى

صلفة : مش هانزل ... انت استغليتنا كلنا

حام : انا مش فاهم حاجة

صلفة : انا كدبت عليك يا حام .. سام برئ

حام : سام اخويا ؟

نوح : اة ... اخوك

حام ( لشديئور ) : انت اللى عملت كل دة ؟؟؟ !!!

شديئور : علشانك

صلفة : لا مش علشانة ... ومش علشانى .. علشان اطماعك .. فرقتنى عن جوزى .. وفرقت الاخوات عن بعضهم وعن أبوهم

شديئور : علشان همة مش عارفين مصلحتهم .. علشان كلكم أغبياء .. مشيتوا ورا نوح وانتوا مغمضين ..

صلفة : علشان هو مطلبش حاجة لنفسة .. انما انت كنت بتشغلنا كلنا

شديئور : بنتى بتعمل فيا كدة ؟

نوح : مستغرب لية ؟؟ .... مش دة اسلوبك .. الرهان قرب يخلص يا شديئور .. والطوفان هيثبت فشلك وعصيانك

شديئور ( للعمال ) : اتحركوا ... كسروا الفلك

( العمال لا يتحركون )

صلفة : خسرت كل الناس

شديئور : طب انزلى ونتفاهم

صلفة : مش هانزل ... ومش هتفاهم معاك

حام : يلا نكمل بنى الفلك

شديئور : استنى يا حام .. ماتضيعش كل اللى عملتة علشانك

حام : قصدك علشان الفلوس

شديئور : دلوقتى انا غلطان وكلكوا عاقلين .. مش دة اللى كان جواكم .. مش دة اللى كنتوا عاوزينة .

حام : كنا عاوزينة وغيرنا رأينا

شديئور : مش انت اللى جمعت العمال ... وقولتلهم لما ارفع البلطة تهجموا ع الفلك

( يمسك يدة ويرفعها بالبلطة كأنة يمثل كلامة , ثم فجأة يخطفها من يدة ويهددة بها )

حام : اية هاتقتلنى ؟

صلفة : سيبة يا والدى

شديئور ( ضاحكا ) : اسيبة ... وياوالدى كمان .. انزلى من الفلك وانا اسيبة

صلفة : مش هانزل

شديئور : انزلى لاقتلة ؟

( يظهر شخص ملثم يتحرك من الكالوس ببطء حتى يصبح خلف شديئور تماما وفجأة يخطف منة البلطة )

شديئور : اية دة ؟

الملثم : كل حيلك خلصت .. ودلوقت اتفضل

شديئور : انت مين ؟؟

( يفك لثامة يظهر انة سام )

حام : سام ؟؟

سام : ايوة يا اخويا

حام : يعنى حتى العمال خدعونى

سام : لا العمال ياعونى للنخاس .. بس ابويا اشترانى منة

نوح : حمد الله على سلامتك يا ابنى

سام : دلوقت حضرتك هاتمشى علشان ماحدش عاوزك

شديئور ( لصلفة ) : امشى يا بنتى ؟

( صلفة تنزل من الباب وتمشى متجها نحو ابيها , بينما العيون كلها متعلقة بها )

صلفة ( ببطء ) : امشى ... ياما ضايقت جوزى علشانك .. وقعتة فأخوة بسببك

شديئور : ما كل دة كان علشانك

صلفة : انا اسفة يا سام

سام : انا فاهم

نوح : عايز تقول حاجة تانى يا شديئور

( شديئور يكسر رأسة ويخرج صامتا وفى بطء )

سام : دلوقت الوقت ضيق ... الطوفان ع الابواب , ولازم نخلص بنى الفلك بسرعة

نوح : ماحدش شاف يافث يا اولاد ؟

( ينكسرون روؤسهم , ويعملون فى صمت )

نوح : لية كدة يارب .. دا انا حتى ماخالفتكش فى حاجة

سام : انا هاروح ادور علية

حام : تدور علية فين ؟ دا زمانة بعد قوى ؟

نوح : يعنى هاتسيبوا اخوكم ؟

( يسكتون ... , تنزل عائلة نوح وتكون تشكيلا اسفل الفلك بينما تتركز الاضاءة علي وسطهم )

نوح : سام ... حام .. طب فين يافث ؟ هانسيبة !! هانمشى من غيرة .. طب ازاى ؟ دا ربنا وعدنى انة هاينجى ولادى من الطوفان .. طب هو كان يقصد سام وحام بس .. طب هانستناة لغاية امتى والطوفان هايستنانا ولا لاء ؟

( تعود الاضاءة كاملة ويقترب اية العمال )

عامل 1 : كدا احنا خلصنا بنى الفلك

عامل 4 : وعايزين بقية حقنا

نوح : طب انتوا مش هاتدخلوا معانا

عامل 2 : لا لا لامؤخذة .. عندنا شغل تانى

نوح : مش هاتلحقوا

عامل 4 : ياعم نوح انت مش استلمت شغلك .. ادينا بقية فلوسنا خلينا نمشى

نوح : اللى تشفوة

( يعطيهم النقود يخرجون , يسمع خرير ماء خفيف فينخض نوح )

نوح : اية دة ؟

حام : اية ؟

نوح : الطوفان جاى .. المية بدأت .. لموا حاجتكم بسرعة علشان ندخل الفلك

سام : وهانسيب يافث ؟

نوح : هو فين يافث ؟

حنة : لا

( تتقدم وتجلس فى منتصف المسرح )

حنة : انا مش هاركب من غير ولادى كلهم

نوح : قومى يا حنة

حنة : مش هاقوم

نوح : الطوفان خلاص جاى

حنة : يجى .. ياخدنى زى ماهياخد ابنى

نوح ( لاولادة ) : لموا كل حاجة وادخلوا

( ينفذون صامتين )

حنة : هاتسيب ابنك يا نوح ؟

نوح : ربنا هاينقذة بطريقتة

حنة : طب هاينقذة ازاى ؟ مش انت بتقول ان كل اللى برة الفلك هيغرقوا ؟

نوح : ايوة

حنة : ويافث منهم

نوح : ايوة

حنة : وجالك قلب تسيبة يغرق

سام : يافث اهو

حنة : يافث ... ابنى ؟

نوح : فين ؟

سام : اهو هناك ... جاى من بعيد

( يافث قادما من خلف الجمهور وحالما يراهم يسرع اليهم )

يافث : استنونى

حام : تعال

( يتجمعون فى مقدمة المسرح فى انتظارة وحالما يصل يتجمعون حولة ويحتضنونة )

نوح : يافث حبيبى

يافث : سامحنى يا والدى .. انت كنت صح .. كنا بنبص تحت رجلينا .. انت اللى كنت شايف الحقيقة فين

نوح : المهم انكم فى أمان

( صوت المياة يزداد )

نوح : يلا بسرعة .. الطوفان خلاص وصل

سام : احنا جمعنا كل حاجة

نوح : طب يلا ندخل

( يدخلون ويغلقون الباب , بينما يقوم شديئور والعمال بأستعراض الطوفان )

ستــــــــــــــــــــــــــــــــــــــــــــــــــار

مسرحية الطوفان