اسكتش فين الدواء

 

اسكتش  فين الدواء 

( منظر عيادة دكتور نفساني فيها كرسي ويافتة معلق عليها الإعلان :

الدكتور أبو فـتلة الحدق حلال العقد الصعبة مفيش مشكلة تقف قدامي ولو وقفت هجبلها كرسي أقعدها مواعيد الزيارة من 12 صباحا إلي 12 صباحا اليوم التاني والعكس رسوم الكشف

نظرة باهتمام 50 جنيه             نظرة عادية 30 جنيه

نظرة بقرف 10 جنيه

ملحوظة : اكشف باهتمام أحسن وما تدفعش للواد بزقة المخلوف التمرجي )

بزقة ( يدخل ينضف ) : اصطبحنا واصطبح الملك لله يوم تاني في خدمة الدكتور أبو فتلة الحدق انتم

 

باين عليكم ما تعرفوش من هو الدكتور أبو فتلة الحدق ده دكتور مشهور قوي واخد الدكتوراه بتاعته من جامعة إيه ........ هي اسمها صعب ومش فاكرها بس هي مشهورة قوي وبعدين نروح بعيد ليه أنتم أكيد بتعرفوا تقروا أقروا الاعلان ولا أقراه أنا  الدكتور أبو فـتلة الحدق حلال العقد الصعبة مفيش مشكلة تقف قدامي ولو وقفت هجبلها كرسي أقعدها مواعيد الزيارة من 12 صباحا إلي 12 صباحا اليوم التاني والعكس رسوم الكشف نظرة باهتمام 50 جنيه نظرة عادية 30 جنيه نظرة بقرف 10 جنيه  ملحوظة : اكشف باهتمام أحسن وما تدفعش للواد بزقة المخلوف التمرجي  أنا أصلي أنا حرامي  هه هه هه

( يدخل عايه الدكتور وهو مربوك)

الدكتور       إيه يا بزقة إيه أخبار الشغل النهاردة زي إمبارح ولا إيه

بزقة           لا يا دكتور للأسف مش زي إمبارح ده زي أول إمبارح

الدكتور       آه طمنتني    خد يا بزقة أنت بتهزر معايا ما إمبارح زي أول إمبارح يا مخلوف

بزقة           أيوة صح أنت معاك حق يا دكتور بس أنت هتقارن عقلك بعقلي ده أنت دكتور عظيم مشرفنا ومعلي راسنا في كل حتة ده أنت حلال العقد

الدكتور       خلاص بقي يا واد يا بزقة ما انت عارف أنا مش بحب الظهور قدام الناس

بزقة           هو اللي يقول الحق يبقي غلطان بقولك إيه يا دكتور مفيش أي حاجة من تحت الحساب كده علشان أنا بقالي يجي 10 شهور ما قبضش

الدكتور       ليه يا بزقة كده يا حبيبي ليه هتزعلني منك أنت بقالك كام شهر شغال معايا ؟

بزقة           بقالي يجي 11 شهر شغال معاك

الدكتور       طيب يعني قبضت شهر تقدر تقولي فين هو القبض ده ؟

بزقة           صرفته

الدكتور       يعني ضيعت فلوسك عرقك وشقاك

بزقة           بس الكلام ده كان من 10 شهور وكان ربع جنيه

الدكتور       أنت مستقلل الربع جنيه ده طريق الألف ميل يبدأ بخطوة فاهم ؟

                ( يشير بزقة برأسه بالرفض )

الدكتور       طيب بص يعني ربع جنيه علي ربع جنيه يكمل المليون صح ؟

بزقة           صح يا دكتور

الدكتور       تعجبني يا واد يا بزقة يا واد يا مخلوف أنت علشان كده أنا بحوشهملك

بزقة           آه قولتلي تصدق أفتكرك حرامي وواكل حقي

الدكتور       عيب يا واد يا بزقة الكلام اللي بتقوله ده ده أنا دكتور يا ولا مش أي كلام

بزقة           سامع يا دكتور اللي انا سامعه

الدكتور       سامع إيه يا ولا

بزقة           عيان يا دكتور أنا شايفه يا دكتور جاي من بعيد لا دول أتنين أشكرك يا رب حققت لي أمنية كان نفسي فيها من زمان أشكرك يا رب أشكرك يا رب

الدكتور       أيه يا واد يا بزقة أنت هتمثل قوم شوف شغلك نضف اليافتة دي بسرعة ولا أقولك روح أستقبلهم من بره حسسهم انهم مهمين عندنا يلا بسرعة

بزقة           حاضر يا دكتور ( يخرج بزقة )

الدكتور       أخيرا  جتلي الفرصة لحد عندي علشان أثبت نفسي وأوري العالم كله من هو الدكتور أبو فتلة الحدق حلال العقد اللي مفيش مشكلة تقف قدامي يعني كل مشكلة وليها حل وحلها عندي انا بفضل ذكائي وموهبتي وحاجات تانية كتير عندي يمنعني تواضعي اني اقولها

                                        ( يدخل بزقة ومعه اتنين مرضي )

بزقة           أتفضلوا اتفضلوا ما تتكسفوش زي بيتكم بالظبط ده أنتم محظوظين علشان جاتلكم الفرصة انك تتعالجوا عند الدكتور أبو فتلة الحدق

الدكتور       كفاية بقي يا واد يا بزقة انت عارف شعاري أتكلم قليل واعمل كتير

مريض1      ماهو باين ده أحنا من ساعة ما قبلنا التمرجي بتاعك وما بطلش رغي

الدكتور       معلش أصله بيحب الكلام بس في وقت الشغل ماتسمعوش صوته خالص

مريض2      ياريت علشان بصراحة انا قربت أنسي أنا ايه اللي جابني هنا

الدكتور       ما تخفوش خالص طول ما انتم عند الدكتور أبو فتلة الحدق

مريض1      بصراحة يا دكتور انا خايفة أحسن تكون أي كلام

بزقة           أيه اللي بتقوليه ده حد يقول كده علي الدكتور أبو فتلة الحدق حلال العقد من فضلك أسحبي كلامك وبسرعة

مريض2      ليه يا عم ده كله هي غلطت فيه ولا قالت حاجة تزعل دي كل قصدها اني احنا ما سمعناش علي الاسم ده قبل كده  وبعدين خلاص مش مشكلة إحنا ممكن نمشي

بزقة           مع السلامة الباب اللي يودي

الدكتور       إيه اللي بتقوله ده يا واد يا بزقة معلش يا جماعة أصل الواد بزقة ده بيحبني قوي وبيغير علي من الهوا الطاير وبعدين احنا يهمنا مصلحتكم وحل مشاكلكم

مريض1 ، 2        مشاكلنا

الدكتور       أيوة مشاكلكم

مريض1      وانت عرفت ازاي أن احنا عندنا مشاكل

بزقة           بالعقل كده انتم جايين عند الدكتور أبو فتلة الحدق حلال العقد ليه ؟ أكيد عندكم مشكلة

الدكتور       ده الواد بزقة فهم مش عايزيني انا الدكتور أبو فتلة الحدق ما فهمش

مريض2      بص يا دكتور إحنا من الأخر كده عندنا مشاكل كتيرة ومش لقينلها حل في أي مكان

الدكتور       يبقي جيتوا في المكان المناسب أحيكم علي الأختيار ده

مريض1      بس أهم حاجة عندنا السرية يعني مش عايزين حد يعرف إن احنا جينا هنا

بزقة           السرية دي اهم حاجة أنتم ان شاء الله هتسمعوا مشاكلكم في نشرة تسعة النهاردة

 مريض1،2         إيه

الدكتور       إيه يا واد يا بزقة اللي بتقوله ده ، ماتخفوش اصل الواد بزقة بيحب يهزر

مريض 2     بص قولنا إيه المطلوب منا دلوقت علشان مش عايزين نتأخر

الدكتور       مش عايز منكم أي حاجة غير انكم تفتحوا لي قلبكم وتحكولي علي كل حاجة من غير لف ودوران ومن غير ما تخبوا حاجة عني أعنبروني صديقكم مش دكتور بتتعالجوا عندي بس واحدة واحدة بالدور وبالهداوة

مريض1      حاضر يا دكتور نبدأ دلوقت

الدكتور       يا سلام أحب أنا السرعة ابدأي يا صاحبتي بس الأول تعالي هنا علي كرسي العلاج

مريض1      أنا حكايتي من الأول خالص أني اتربيت في عيلة متوسة الحال زي أي عيلة بتحافظ علي القيم والعادات عيلتي راضية بالعيشة دي أنهم في حالهم ولكن انا بقي بتطلع لفوق عايزة بقي أبقي مشهورة عايزة أمشي في الشارع الناس تشاور علي ويبقوا مستنين مني نظرة رضا مني يعني عايزة أبقي صاحبة نفوذ ومش أي نفوز نفوز واسع يعني من الأخر كده عايزة ابقي الكل في الكل في أي حاجة أعملها  فاهمني يا دكتور

الدكتور       طبعا فاهمك يعني مشكلتك تتلخص في كلمة واحدة النفوذ والنفوذ ما يجيش من غير الفلوس صح ؟

مريض1      صح يا دكتور

الدكتور       وطبعا أنت ما تقدريش تاخدي الفلوس دي من أهلك علشان باختصار ومن غير لف ودوران مايقدروش علي فلوس النفوذ صح ؟

مريض1      صح يا دكتور

الدكتور       يبقي بقي نعمل إيه ؟

مريض1      إيه يا دكتور ؟ ما أنا جيالك علشان تشوفلي حل في المشكلة ديه

الدكتور       مالك خوفت كده ليه ؟ كل مشكلة وليها حل وحلها عندي

مريض1      قوللي يا دكتور بسرعة الله يخليك

الدكتور       الحل بسيط وسهل جدا بس محتاج بس أنك تسمعي الكلام من غير مناقشة ولا اسئلة

مريض1      وانا اوعدك أني مش هناقشك ولا أسئلك أي سؤال

الدكتور       عال احنا قولنا أن انت ماتقدريش تعتمدي علي أهلك في حكاية الفلوس ديه يبقي تعتمدي علي نفسك شوفت الحل بسيط إزاي .؟

مريض1      وده حل أنا أجيب الفلوس ديه إزاي ؟

الدكتور       ماتبقيش عصبية كده أنا لسه خلصت كلامي أنت تروحي دلوقت وتروحي لواحدة حبيبتنا بتحب تخدم البنات اللي محتاجة مساعدة زيك وما بالك بقي لما تعرف أنك من طرف الدكتور أبو فتلة الحدق

مريض1      ودي بتشتغل إيه ؟

الدكتور       دي بتشتغل في كل حاجة ؟

مريض1      كل حاجة ؟

الدكتور       لا مش كل حاجة كل حاجة يعني في الحاجات الممنوعة بس

مريض1      حاجات ممنوعة ؟ لا يا عم يفتح الله ؟

الدكتور       خلاص براحتك بس بقي ما تسأليش عن الشهرة والنفوذ

مريض1      إيه ؟ خلاص بس ممكن تقولي حاجات ممنوعة زي إيه ؟

الدكتور       حاجات ممنوعة مخدرات حشيش حاجات زي كده

مريض1      وانت عايزني أشرب الحاجات اللي بتقول عليها ديه ؟

الدكتور       لا أنت مش تشربي أنت هتوزعي علي الشباب أصحابك واللي في سنك ومفيش مانع يعني لما تجربي والحكاية ديه هتدير عليك عجلة فلوس مش تعرفي تسديها وبكده تبقي مشهورة وصاحبة نفوذ من غير ما تعتمدي علي حد لكنك اعتمدي علي نفسك

مريض1      ( بعد تفكير ) معاك حق أنا موافقة دلني علي الست ديه بسرعة

الدكتور       حاضر حاضر بالهداوة علي يا واد يا بزقة اديها العنوان واكتبلها توصية كمان

بزقة           أنت تأمرني يا دكتور

مريض1      والحساب يا دكتور ؟

الدكتور       حسابك وصل من ساعة ما سمعتي الكلام  سلام وابقي افتكريني

                أحسن حاجة في الزمن ده أنك تقدم الخدمة وخصوصا للشباب اللي زي الورد

مريض2      وأنا يا دكتور انت مش هتشوفلي حل لمشكلتي ؟

الدكتور       طبعا يا سلام انت تأمري واحنا علينا ننفذ أيه بقي مشكلتك ؟ وبصراحة

مريض2      أنا يا دكتور زي أي بنت في جيلي بحب الحرية واحب أعيش حياتي كلها وانا حرة مش بحب أي حد مهما كان يتسلط علي حتي لو كان أبويا أو امي أحب أعيش حياتي أنا شايفة أني صغيرة أني أعيش في الجو الكبير ده يعني أمي تحكم علي لبسي وهي موضة قديمة مش عارفة التطورات اللي حصلت في الموضة ولا عندها خلفية بإللي بيعمله الشباب النهاردة وانا مش بطلب كتير أنا طالبة بس أعيش حياتي الخاصة بحريتي مش من حق أي شخص أنه يتدخل فيها مهما كانت صفته ما اخبيش عليك أنا عرضت الأمر ده علي ناس كبيرة أتفلسفوا علي وقالوا أكرم أباك وامك وكلام من ده

الدكتور       آه انت صعبت علي قوي تصدقي فعلا أن مشكلتك صعبة وعايزة حل عملي وانت هنا في المكان المناسب مكان حل المشاكل والعقد اللي من غير حل

مريض2      يعني يا دكتور تقدر تلاقي حل لمشكلتي ديه ؟

الدكتور       طبعا بس بشرط

مريض2      أشرط زي ما انت عارف وانا هبقي من ايدك ديه لإيدك ديه

الدكتور       عال عال الشرط هو أنك تسمعي الكلام من غير اسئلة ولا مناقشة فاهمة ؟

مريض2      مفهوم بس قوللي علي الحل الله يخليك

الدكتور       الحل سهل وبسيط أنك تستقلي بذاتك يعني تعيشي حياتك زي ما انت عايزة من غير لا رابط ولا ظابط

مريض2      طب واهلي يا دكتور

الدكتور       لا أهلي ولا زمالك أنت تعيشي حياتك الخاصة بالحرية اللي انت عايزاها واللي يكلمك كانه ماتكلمش من أصله أنا معاك أن الحل ده صعب وانك هتعاني في الأول بس ماتنسيش أن مشكلتك مكنش لها حل خالص وما تنسيش كمان الحرية اللي مستنياك

مريض2      بس أنا كده هقطع صلتي بالبيت تقريبا

الدكتور       وديه ضريبة حريتك وبعيد أنت عايلة هم البيت ليه مش هما اللي مش فاهمينك واللي مقيدينك ورفضين يدوك حريتك

مريض2      أيوة بس ...........

الدكتور       إحنا قولنا إيه ؟

مريض2      أسمع الكلام من غير مناقشة ولا إسئلة

الدكتور       يا سلام علي الطاعة وعلي الدماغ اللي يوزن بلد واللي لو اتساب بحريته هيوصل صاحبه لأعلي المراتب

مريض2      طيب يا دكتور أنا بشكرك من كل قلبي واطلب اللي أنت عاوزه مني

الدكتور       أنا مش عايز أي حاجة غير ان يكون الجيل ده مرتاح هنا علي الأرض ومع السلامة أنت بقي وابدأي حياة الحرية وانطلقي

مريض2      سلام يا دكتور

الدكتور       هه يا بزقة أنت إيه رأيك في الحلول الجهنمية ديه ؟

بزقة           بصراحة كده يا دكتور ديه حلول تودي في مصيبة

الدكتور       وإحنا عايزين إيه أكتر من كده؟

بزقة           بس دول صغيرين علي البهدلة

الدكتور       بالعكس ده الجيل ده هو المطلوب دلوقت دول مستقبل الكنيسة فلما يدمروا من صغرهم كده يبقي مستقبل الكنيسة ضعيف ويبقي من السهل القضاء عليها . فهمت ؟

بزقة           فهمت

الدكتور       يلا بقي علشان تعبنا قوي النهاردة والمجهود اللي عملناه النهاردة يستاهل راحة و مكافأة

( يخرج الدكتور وبزقة )

( فاصل زمني)
( يدخل مريض1وهو حزين وبعده مباشرة مريض2 )

مريض1      مش عارفة أنا إيه إللي خلاني اسمع لكلام الدكتور ده كان فين عقلي ساعتها

مريض2      معاك حق إحنا استسلمنا له بدون أي تفكير ده خلاني أعمل عمايل تخالف الدين والعرف

مريض1      عمايل إيه إللي خلاك تعمليها ؟

مريض2      أنا بعد ما نصحني اني أكبر دماغي علي كل إللي في البيت روحت ونفذت كل اللي قاله بالحرف الواحد حاجة جوايا جبراني أني أطيع اوامره بدون مناقشة ولا تفكير المهم في أول الأمر أهلي بدأوا يحاولوا معايا علشان يرجعوني من الطريق إللي كنت ماشية فيه لكن أنا زي ما قالي أعتبرتهم مش موجودين لحد ما سبوني حرة مستقلة بنفسي أجيب إللي أنا عايزاه وألبس اللي أنا بحبه من غير ظابط ولا رابط وافتكرت خلاص السعادة مش تفرقني تاني ولكن حصل العكس أهلي بدأوا يبعدوا عني أصحابي بدأوا يتجنبوني تدريجيا لحد ما بقي ماليش أي أصحاب خالص ما بقتليش غير الكنيسة اللي عمرها ما سبتني وعمرها ما زهنقت من نصحي وارشادي عن طريق أبونا لحد ما رجعت وقبلتني بكل الحب والشوق

مريض1      إللي حصل معالك حصل معايا بالظبط فبعد مارحت للست اللي دلني عليها بدأت تعلمني الشغل الممنوع لحد ما بقت تعتمد علي في حاجات كتيرة كنت مبسوطة أني بقيت بشتغل وبصرف علي نفسي وخلاص بقيت مشهورة لكن للأسف بقيت مشهورة بالشر اينعم حقق لي جزء من احلامي أن الناس بقت تشاور علي لكن بيشاوروا علي بتريقة ومعايرة وبرضه أصحابي بعدوا عني وطبعا أصحاب المزاج قربوا مني أكتر لدرجة أن أهلي خلاص كانوا قربوا يتبروا مني وبرضه ما لقيتش غير حضن الكنيسة اللي ضمني وتوبني ورجعني لصوابي وبين لي إزاي أنا كنت غبية لما بعدت عن حضنها وسبت طريق ربنا وسمعت صوت الشيطان وانا جاية النهاردة علشان أقابل الدكتور وواجهه

بزقة           انتم إيه اللي جابكم

مريض1      فين الدكتور حلال العقد

بزقة           وانتم عايزينه ليه ؟

مريض2      أصل فيه مشكلة عايزينه يحلهالنا

بزقة           ما تتعبوش نفسكم الدكتور مشي راح مكان تاني علشان يدور علي ناس تانية يوقعهم زي ما وقعكم

مريض1      أيوة إحنا وقعنا لكن إحنا رجعنا لصوابنا بسرعة

مريض2      إحنا واثقين في وعود الكلام اللي قال وإن سقطت أقوم وإحنا استسلمنا ووقعنا لكن بمعونة ربنا قمنا وواثقين إن ربنا هيسامحنا ويقبل توبتنا

مريض1      وأنتم كمان ممكن الشيطان يضحك عليكم لأن الشيطان حيله وصوره كتيرة لكن لازم ترجعوا بسرعة لأن إحنا أولاد ربنا مالناش عيش في الخطية بعيد عن حضن الكنيسة

 لتنزيل الاسكتش للطباعة بصيغة ال word

 أضغط هنا