اسكتش الأنانية

 

اسكتش الأنانية

 

*يقول صوت جهوري من الخارج : تعلن الهيئة القومية للحياة الأسرية... عن مسابقة استكشافية بين الأسر اللي هية ........................ عايزين أسرة مثالية ............... و مناعتها قوية ................ من النكد محميّة .................. و بلاويها مستخبية ....................... و حياتها ميه ميه ....

المسابقة دي مراحل وخطوات

مسابقة للأسرة كلها مش لأفراد

الأب والأم ومعاهم الأولاد

واحنا هنسألكم عن شوية حاجات

هنسأل عن أفكاركم وعن السلوكيات

حضّروا نفسكوا وجهّزوا الإجابات

 

* صوت تليفون يرن و تدخل سيدة ترفع السماعة و تقول : أيوة يا كريمة يا ختي .. ازيك عاملة ايه ؟ (تسمع لحظات ) حلوين الحمدلله .......... جوزي كويس زي الفل ونانسي و هاني كمان كويسين (تستمع لحظات) ........... ايه ؟ (وهي مرتبكة ) ها اطبخ ايه النهاردة ؟ .. لحمة طبعا ... و معاها بامية و رز ... و انتي عاملة ايه النهاردة؟؟ (تستمع) حمام و بفتيك و كباب حلة ..... (تتنهد ) ..... طيب (تستمع) مسابقة ؟ مسابقة ايه دي ؟ الأسرة المثالية .؟.... يا شيخة هو انتي بتصدقي الكلام ده ؟ ده لعب عيال (تستمع) ايه ده ؟ يعني الحكاية جد ؟ و انتوا هتشتركوا في المسابقة دي ؟ طبعا طبعا ياختي ............ أكيد هنشترك قولي لي اشترك فيها ازاي ؟ (تستمع و هي بتقول ) ماشي ... ماشي .. طيب .....مع السلامة ...مع ألف سلامة

* تضع السماعة وتكلم نفسها بصوت عالي: واشمعني انا يعني ماشتركش في المسابقة دي؟ دا أنا بيتي أحسن بيت وعيالي أحسن عيال.

 

* يدخل الأب ويقول فوراً: حطي لي الغدا عقبال ما أغير هدومي.

الأم:  استني أقولك حاجة مهمة الأول.

الأب : قولي بسرعة عاوز ألحق الماتش.

الأم : هو كل يوم ماتشات ........ماتشات.

الأب: أنا نفسي مرة أدخل البيت أرتاح فيه وأنام وأعمل اللي أنا عايزه من غير دوشة ولا عكننة ......هتقولي عاوزة ايه ولا أمشي من هنا أحسن.

الأم: أختي كريمة كلمتني من شوية وقالت انهم هيشتركوا في مسابقة الأسرة المثالية.....وأنا عاوزة اننا نشترك فيها احنا كمان.

الأب: اشتركي في اللي انتي عايزة تشتركي فيه بس حِلّي عن دماغي دلوقتي....... وبعدين استني هنا ......ما أنتي عشان تشتركي في مسابقة الأسرة المثالية يبقي لازم تريحيني عالآخر ..أُمال ايه ....مش انا الراجل في البيت....والبيت المثالي هو البيت اللي الراجل يبقي مستريح ومبسوط فيه ...روحي بقي حضري لي الغدا وسيبيني أتفرج عالماتش بروقان عشان نفوز بالمركز الأول ان شاء الله.(يخرج)

* يدخل الأبن هاني: ازيك يا أم هاني يا عسل؟؟

الأم: يرضيك كده يا هاني ماما يبقي شكلها وحش قدام الناس؟

هاني :  لأ طبعا ..ايه اللي حصل؟؟

الأم: عاوزين نشترك في مسابقة الأسرة المثالية زي تانت كريمة.

هاني (بصوت عالي): الأسرة الإيه؟؟ أقولك احنا ممكن نشترك في مسابقة الأسر الفاشلة ونأخد فيها المركز الأول بجدارة...انما المثالية ...أشك.

الأم : كده يا هاني ؟؟ ليه بتقول كده يا بني.......هو احنا وحشين لا سمح الله؟

هاني : لأ لا سمح الله...بس اللي هيشتركوا في المسابقة دي أكيد هيكونوا ناس هاي زي تانت كريمة.

الأم: واحنا مش أقل منهم...

هاني (مقاطعاً): مش أقل منهم ازاي بس يا ماما؟؟ فيه حد من الناس الهاي برضه هيبقي ماسك فردة شبشب زي اللي أنا ماسكها دي؟؟ (يخرج من جيبه موبيل ضخم وماركة قديمة ) وكمان شركة مع أخته.

الأم: يوووووه..........تاني الموبيل ......هو انا كل ماهآجي أكلمك في أي موضوع تقلب الكلام عالحكاية دي علي طول.

هاني: ما هو يا ماما الأسرة المثالية لازم توفر لأولادها حياة هنية .......وأول شروط الحياة الهنية في الأيام ديّة.....

الأم ( تقاطعه): مش عاوزة وجع دماغ.......كلم أبوك في الموضوع ده........متكلمنيش انا (تقوم لتخرج) أنا الحق عليّ اللي عاوزة مصلحتكم وعاوزاكم تفوزوا في المسابقة....أنا هأروح أجهز الغدا أحسن.

* تدخل نانسي في أثناء الجملة الأخيرة للأم وهي خارجة فتقول: هو فيه ايه؟؟ ايه اللي بيحصل في البيت ده؟؟

هاني: البيت ده يا ماما هيدخل مسابقة الأسرة المثالية

نانسي : طبعاً عشان تبقي فضيحتنا بجلاجل ...وناخد المركز الأخير

هاني: أنا قلت كده برضه

نانسي: الأسرة المثالية دي أسرة ليها مواصفات خاصة...الأب والأم فيها بيسمعوا كلام عيالهم.

هاني(وهو يكتم ضحكته): طبعاً ......طبعاً ....وخصوصا كلامك أنتي.

نا: وماله كلامي انا يا سي هاني؟؟ ......دا أنا المظلومة في البيت ده؟؟ ومفيش حاجة بأطلبها وبتتعمل أبداً.

ها: يا حرااااااام ...صعبتي عليّ بصراحة....كل ده عشان مروحتيش الرحلة مع أصحابك .

نانسي : وهي دي حاجة سهلة...كل أصحابي يروحوا وأنا بس اللي ماأروحش وكل ده ليه؟؟ عشان مجبتش مجموع حلو الترم الأولاني...يقوموا يقعدوني عشان أذاكر.....طب ما صاحباتي جايبين مجاميع أوحش مني وراحوا ....اشمعني انا.؟؟؟  ( يدخل الأب والأم في نفس اللحظة)

هاني: واشمعني أنا معنديش موبيل روش ومحترم؟؟

الأب: واشمعني انا معرفش أستريح وأقعد رايق في بيتي؟؟

الأم : واشمعني أنا أختي تشترك في المسابقة  وأنا لأ؟؟

الكل معاً: البيت ده فيه حاجة غلط....حد يقول لنا لو سمحتم فين الغلط؟؟

 لتنزيل الاسكتش للطباعة بصيغة ال word

 أضغط هنا