مسرحية ام للبيع

الفصل الاول

يفتح الستار على ابونا يقف امام الهيكل ويصلى

يدخل عادل مع نفين ويقبلو ايد ابونا

ابونا : سلام ونعمه ياابنى

عادل : كنت عارف انى هلاقي قدسك هنا يا ابونا وخصوصا ان قداس العيد النهارده

ابونا : شوف ياابنى احلى حاجه تخلى الله يحافظ على الانسان انه اول ما يفتح عينه يسلم على ربنا بالصلاه وقبل ما يروح شغله لازم يفوت ع الكنيسه ويزوره فيها تعر ف ليه يا عادل ياابنى ؟

عادل : ليه ياابونا

ابونا : عشان يفضل محافظ علينا فاكرنا طول ما احنا فاكرينه (ينظر للساعه التى فى يده ويقول) بس انتو جايين الكنيسه بدرى قوى كده ليه النهارده ؟!

عادل : مفيش . نفين اختى مصممه ان قدسك تصليلنا قبل مانروح الامتحان زى كل سنه

ابونا : حاضر يا سيدى ( يضع الصليب فوق رئسهما ويصلى سرا ثم يقول ) بركة ربنا معاكم وتفتح ذهنكم وتقويكم وتنجحكم وتبارك حياتكم

نفين: على فكره ياابونا حاجات اخوة الرب كلها ودناها لغاية البيت زى ماقدسك قلتلنا بالظبط فى اجتماع الخدام

ابونا : ربنا يعوض تعب محبتك للكنيسه والخدمه .

عادل : احنا بنتعلم منك ياابونا علشان انت بتحب الكنيسه قوى

ابونا : (يذهب ويقبل ستر الهيكل متأثرا بالكلام ويقول ) لازم كلنا نحب الكنيسه علشان هى دى باب السما و الى يجى فيها بالروح مش بالجسد وبس

نفين : (تنظر للساعه)يا خبر ده الوقت سرقنا . يالا ياعادل لحسن هنتاخر ع الامتحان بعد اذنك ياابونا ..

عادل : اه عندك حق .سلام ياابونا (يخرج هو ونفين بعد ان يسلمو على ابونا)

ابونا : ربنا معاكم يااولاد ويباركم .... ياعم بسطا . يا عم بسطا.. اكيد لسه نايم .... يعنى مفيش قربان النهارده ولا اية لما اروح اصحيه علشان يخبز القربان . النهارده قداس العيد والشعب هايبقى كتير .(يخرج وهو ينادى ياعم بسطا)

(2)

(يدخل مشهور وسامى . سامى يرمز للشيطان و مشهور يرمز للفكره . وهما يريدان شراء الكنيسه من اولادها بالمال . رمز بان الشيطان يشتريها مننا بالخطايا . حتى لا ندخلها بالمقابل اننا نذهب لاماكن الخطيه بدلا منها )

مشهور : ايه رائيك فى موقع الكنيسه ومساحتها ياباشا

سامى : مساحتها كبيره قوى وكمان موقعها ممتاز لو قدرنا نشتريها ونهدها ونعمل بدلها سنتر كبير فى مكان زى ده شوف المحل الواحد هانبيعه بكام . ده غير المشاريع الى ممكن تتعمل فيها ...... بس هنشتريها ازاى ؟؟؟؟؟؟

مشهور : اعتبر الارض بقت بتاعتك والسنتر اتعمل خلاص .

سامى : لما نشوف .... بس بقولك ايه انا عايزها فى اسرع وقت .. انا مبحبش اعطل شغلى واكره الى يعطله

مشهور: ياباشا ماتقلقلش مشهور رهن اشاره من صباعك وعشان اثبتلك شغلى اول واحد هبدء بيه ابونا نفسه

سامى : لا استنى انت لسه صغير على ابونا . ده سيبهولى انا ،، ده مش سهل ابدا وانا عارفه ودماغه انشف من الحجر .. وبيحب الكنيسه اكتر من نفسه ، مش عارف بيحبها على ايه ومحدش هايقدر يتصرف معاه غيرى ..

مشهور : ايوه ياباشا الكبير ليه الكبير الى زيه .

سامى : المهم انا هامشى بقا عشان اشوف ابونا ده هاتصرف معاه ازاى وانت تشوف سكتك مع الباقين . سلام . (يخرج سامى ويظل مشهور عالمسرح وهو يفكر فى الموضوع ثم يدخل عم بسطا قرابنى الكنيسه وهو يقول )

بسطا : حاضر ياابونا ..ابعت للشمامسه يا بسطا حاضر ياابونا نظف الكنيسه يا بسطا حاضر ياابونا اعمل القربان يا بسطا حاضر ياابونا مفيش مره يقولى نام يابسطا . متعملش حاجه يابسطا اقوم اقوله حاضرين ياابونا (ثم ينام على الارض ثم ياتى مشهور يوقظه ويقوله )

مشهور : عم بسطا ........ عم بسطا: انا مشهور يا عم بسطا

بسطا : مشهور ، الا جاى بدرى ليه يا واد .. تكونش جاى تساعدنى فى خبز القربان ولا حاجه

مشهور : لا ياعم بسطا انا عايز ابونا فى حاجه مهمه .. ومهمه جدا

بسطا : اوعى تقول انك جاى تاخد حل عشان تتناول . ها عايز ايه ياولا ها . قول ؟؟؟؟؟

(3)

مشهور : يا عم بسطا بالراحه مش عارف اتكلم .

بسطا : خلاص انا سكت اهو ، قول عايز ايه

مشهور : فيه موضوع كده لو اقنعت بيه ابونا .. وانت تساعدنى ... ممكن تكسب 5000 جنيه ، قول 10000 جنيه ،، قول 20000 جنيه زى ماانت عايز

بسطا : انت بتتكلم بجد يااستاذ مشهور

مشهور : وجد الجد كمان

بسطا : طب اقعد يابركه الكنيسه كلها ، بقا ازاى الموضوع ده

مشهور : تساعدنى . تساعدنى انى احنا نقنع ابونا انه يبيع الكنيسه ... ايه رائيك ؟؟

بسطا : لا بسيطه ده احنا مش نقنعه وبس ، احنا نقنع ... ايه نبيع ايه يااخويا

مشهور : الكنيسه دى ياعم بسطا

بسطا : ازاى ياواد يا قليل الايمان قدرت تقولها

مشهور : يا عم بسطا انت غاوى فقر، فيه مستثمر كبير عاجبته موقعها ومساحتها وهايشتريها بالتمن الى انتو عايزينه ، واللى هيساعد هيعتبره سمسار ... وها يبسطه بمبلغ كبير . عايزين ايه تانى . وانت هيكون معاك مبلغ حلو ... لو فضلت تشتغل 100 سنه مش هتقدر تحوش ربعه حتى

بسطا : طب ولما يهدوها هانصلى فين

مشهور : ياعم انت لما تاخد الفلوس وترجع بلدك تشترى ارض وتعيش ملك فى وسط عيالك ولا عجباك العيشه الى انت عايشها دى بعيد عن عيالك

بسطا : طب انا هارجع البلد وهاصلى فى الكنيسه الى فى البلد لكن شعبها ده كله هيروح فين

مشهور : ما المنطقه مليانه كنايس ... ولا خلاص هى دى الكنيسه الوحيده اللى هتدخل بيها الملكوت

بسطا : امشى ياولا انجر واوعى اسمعك تقول الكلام ده تانى . ولو سمعتك بتقوله . هاقطع رجلك من الكنيسه كلها ،، انت فاهم

مشهور : فكر بردو يا عم بسطا

بسطا : روح وانت ابليس ...(ينظر للكنيسه )...نبيعك يا غاليه .... نبيع باب السما ...ربنا يحميكى ياغاليه ........احميها يارب من عندك

(4)

جرجس : (يدخل اثناء كلام عم بسطا) عم بسطا . عم بسطا .فيه حد معاك ياعم بسطا

بسطا : لا ياجرجس مفيش

جرجس : (يبدء مداعبته) اصل مش شامم غير ريحتك ياعم بسطا (يضحك ضحكه هزليه )

بسطا : تعرف الى بيعجبنى فيك ايه يا جرجس.....؟

جرجس : عارف (يكمل باللغه العربيه الفصحى وبطريقه مضحكه) لون عيونى مثل موج البحر

بسطا : (يبتسم ولكنه مازل حزين ) لا يا جرجس انا اللى بيعجبنى فيك انك اول واحد بتيجى الكنيسه سواء باليل او بالنهار

جرجس : الواحد لازم يجى الكنيسه بدرى ..... المهم عملت القربان ولا لسه ياعم بسطا؟

بسطا : لا لسه هاروح اعمله دلوقتى حالا

جرجس : طب وحياتك ياعم بسطا . الحقنى بقربانه سخنه كده من ايدك الحلوه .

بسطا : (وهو حزين )حاضر يا جرجس

جرجس : ايه ياعم بسطا انا من ساعة مادخلت وانا بتكلم معاك وانت صوتك زعلان .فى ايه فى حد زعلك

بسطا :لا مش زعلان بس انا بقول ياريت كلنا نصلى للكنيسه عشان تفضل مفتوحه وعدو الخير ميقدرش عليها

جرجس : ايه انت نسيت ان (ابواب الجحيم لن تقوى عليها) ولا ايه وكلامك حزين ليه يا عم بسطا؟؟؟

بسطا : تعرف الواد مشهور الى ساكن جنب الكنيسه ده ؟؟؟؟؟

جرجس : ايوه ايوه مشهور الواد المريب ده ؟؟؟؟

بسطا : ايوه هو ده

جرجس : وماله ده زعلك فى ايه ؟؟؟؟

بسطا : ال جايب مستثمر وال ايه عايز يشترى الكنيسه ..ويهدها ويبنى بدلها سنتر كبير وبيقول الى هيساعده هايديله مبلغ كبير قوى قوى

جرجس : وعملت معاه ايه يا عم بسطا .

بسطا : طردته طبعا

(5)

جرجس : برافو عليك ياعم بسطا . سيبك بقا من الكلام الفاضى ده وروح اخبز القربان . يالا ياعم بسطا .

بسطا : على رائيك . انى رايح احمى الفرن .

جرجس : وانا اشوف ابونا بقى . اكيد قاعد فى المكتبه فوق . هيا ياجرجس . يالا ياعصايتى المبصره الجميله ورينى السكه.....(يخرج)

افكار : مش عارفه كل ماروح اسلم على حد بيتكلم فى حاجه يسكت ليه !! مع انها ليلة عيد والناس كلها بتكلم بعضها . اشمعنى انا لوحدى يعنى .!!!!

مشهور : (يدخل وهو يفكر وفجاه يرى افكار بالداخل فيحاول ان يعرفها الموضوع بطريقه غير مباشره قائلا*)يعنى عايزين يضيعو الفرصه من ايدى ولا ايه ؟ بس انا مش هسكت ...لازم الناس كلها توافق على البيع لازم

افكار: بيع !!! بيع اية يااخويا . انت عندك حاجة وعايز تبيعها ولا ايه

مشهور : بيع فى حد جاب سيرة بيع . سامحنى يارب ان فيه حد غيرى عرف السر

افكار : سر . طب احكى يااخويا كده وقول . فضفض وطلع الى فى قلبك .وانا هساعدك بافكارى فى حل اى مشكله تقابلك دانا مافيش حد خد رائى فى اى حاجه الا وصابت

مشهور: (ينظر يمينا ويسارا ويقول ) اسمعى الكلام الى هقولهولك ده . اوعى حد يعرف بيه لحسن فيها مشكله عشان الكنيسه

افكار : الكنيسه ..انا افديها بروحى وبقلبى بس انت احكيلى عشان نحميها سوى.

مشهور : بصى ياستى فيه مستثمر كبير عايز يشترى الكنيسه ويهدها ويبنى مكانها سنتر.

افكار : يالهوى دانا كنت اكسر له ايده ها وبعدين يااخويا

مشهور : وبيقول ان الى هيساعده فى عملية البيع والشراء هايديله مبلغ كبير قوى

افكار : ها (تصمت )

مشهور: ست افكار مالك فى حاجه ولا ايه . احنا لازم ندافع عن الكنيسه انا وانتى لازم ندافع عن الكنيسه (يسرح)

افكار : يشترى الكنيسه واللى هيساعده هايديله فلوس .طب وليه منساعدهوش وكمان ايه المشكله لو هدها ما المنطقه مليانه كنايس .

(تدخل منى ومعها جورج )

(6)

منى : اسمع يا جورج بصراحة كدة مبقتش قادرة استحمل العيشة دية ، احنا بقالنا كتير ع الحال دة ومش قادرين نتجوز

جورج : اعمل اية يعنى يا منى عايزانى اسرق ماانتى اللى طلباتك كتير عايزة وعايزة اجيب منين يعنى

منى : انا غلطانه انى وافت على فقرك دة

جورج : انتى بتذلينى يا منى من دلوقت ، امال بعد الجواز هتعملى اية

منى : مش لو اتجوزنا .عايزنى افضل مستحملى فقرك دة لغاية امتى

جورج : خلاص ياسيتى .طالما انا مش عاجبك يبقى نفضها سيره ونفصخ الخطوبه.

افكار: (تدخل فى الحوار) ياخرابى استنى اوعى تقولها

جورج : لا لازم افسخ الخطوبه.

افكار : بس اهدى كدة واصبر .

منى : انتى ياست انتى هو الموضوع الى بنتكلم فيه يخصك فى حاجه

افكار : لا بس انا عايزة اساعدكم اصل ياحبيبتى الحل معايا

جورج : حل ايه الى معاكى

افكار : مش انتو هتفكو الخطوبة بسبب الفلوس ؟؟؟

جورج : ايوه ...عشان الانسه مش عجباها شقه اوضتين وعايزه شقه اربع اوض اجبلها انا منين شقه اربع اوض

افكار : انتو عارفين لو سمعتو كلامى هاتجيبو بدل االشقه 3 واربع شقق

منى : ايه ده بجد ... ازاى الكلام دة

ـــــــــــــــــــــــــــــــــــــــــ

افكار : انتو عارفين الكنيسه دى كلها

جورج : ايوه مالها

افكار : فيه مستثمر كبير . عايز يشتري الكنيسه وبيقول الى هيساعده فى شراءها .هيديله مبلغ كبير قوى

منى : ايه رائيك ياجورج

(7)

جورج : هى دى عايزه رائى ...فلوس كتير جايه من غير تعب وهانحقق بيها احلامنا . لازم نوافق طبعا واهى الكنايس كتير . ماجتش من دى يعنى ... وبعدين انا ابيع الدنيا كلها عشانك يا منى

منى : طيب تعالى بقى بسرعه نكلم ابونا عشان ينوبنا من البيع جانب

افكار ) ادينى يارب على قد نيتى .انا هاروح اقول لمشهور ...انى واقفه جنبه بكل اخلاص(تخرج)

بسطا : (يدخل ) ايه الى بيحصل ده ..لا يابسطا فوق ..اوعى تتاثر بى كلام الواد مشهور ده لاازم اطرده ..لا مش هابيعك...لا ماقدرش افرط فى شبر من ارضك ياغاليه ماقدرش

جرجس : انت لسه برضو متردد يا عم بسطا ...ومتردد ليه؟؟؟

بسطا : الكنيسة دية جدودنا شالو حجارة حيطانها على كتافهم يا جرجس

جرجس : ومافكرتش فى حالك ماانت لو خدت الفلوس وسافرت هاتقعد وتستقر فى البلد وتصلى فى اى كنيسه من الى فى البلد ...هاتصلى وبرضو كسبان فلوس... الكنايس قريبه مننا ...لكن الفلوس هى الى بعيده

بسطا : يعنى ايه يا جرجس يعنى رئيك نوافق

جرجس : نبقى مجانين لو موافقناش

مارى : (تدخل تنادى على ابونا فتجد عم بسطاوجرجس)ابونا ... ابونا ...عم بسطا .متعرفش فين ابونا

جرجس : ده صوت مارى . انتى عايزه ابونا فى حاجه يا مارى.

بسطا : لو عايزه تعترفى ابونا مش فاضى دلوقتى

مارى: والمفروض انت كمان متبقاش فاضى يا عم بسطا

جرجس: ايه وعم بسطا وراه ايه يعنى

مارى: وراه القربان . انت نسيت ان النهارده قداس العيد ولازم يخبز قربان كتير . عشان الشعب هايبقى كتير

بسطا : ماانى ...ماهو اصل انى ...........

مارى : ماانت ايه مشغول بالى بيتقال

جرجس : بصراحه دى حاجه تشغل العقول .وفجأه كده الواحد يلاقى ثروه نازله عليه من السما .

(8)

مارى : عمرها ماكانت نازله من السما .دى جايه من شياطين ..عايزين يشترو مننا باب خلاصنا بشوية فلوس ...تبيع الملكوت بشوية فلوس

بسطا : انت بتتكلمى زى مانكون مش مسيحين .واتربينا فى الكنيسه دى .ده اناا عشعت عمرى كلة فيها

مارى : وفى النهايه ايه بتوافق على بيعها هاتقول للمسيح ايه .انا بعت بيتك وقبضت التمن . ياترى تلاتين من الفضه ولا اكتر شويه المره دى؟؟؟

بسطا : انى فكرت كويس احنا غلابه ومحتاجين فلوس نعيش بيها . مش كفايه بعيد عن اولادى واهلى . ايوه انا موافق على البيع .وهاقنع ابونا كمان فاهمه هاقنع ابونا (يخرج)

مارى : ياخساره ياعم بسطا...ياخساره ياعم بسطا وانت ياعم جرجس...رائيك ايه؟؟؟

جرجس : انا رائى من رائى عم بسطا....هو ده الصح

مارى : هو ده الصح...ايه الى بيحصل ده انا بحلم ولا دى ناس غير الناس الى انا اعرفهم؟؟؟!!

جرجس : لا هى الناس ....بس الفلوس وجت لحد عندى ارفضها ...وارفض ليه ؟؟

مارى :عشان على حساب كنيستك ...تبيع كنيستك يا جرجس عمر الفلوس ما كانت مهمه

جرجس : الى مش طايلها هو بس الى بيقول كده .....عايز يبقى معايا فلوس كتير

مارى : وتهون عليك كنيستك وترضى ليها بكده

جرجس : وهى ليه رضيت انى اكون اعمى .....ايوه بالتمن الى هاخده منها اسافر بره واعمل العمليه وافتح واشوف هافتح واشوف بقى

مارى : يااااه كلهم هانت عليهم كده ...طب لما اروح افتقد مدارس الاحد هاخدهم فين لما تتباع.......؟؟؟؟هايصلو فين ...؟؟؟هايرنمو فين ؟؟؟هايعترفو فين هايتناولو فين

ابونا : (يدخل اثناء كلام مارى ) فى قلب كنيستهم يامارى ياابنتى

مارى : ابونا

ابونا :فى حضن كنيستهم

مارى : طب والى بيتقال ده ياابونا

ابونا : من زمان والحروب على الكنيسه .ياما حرقوها ياما هدموها.لكن فى كل مره بتقوم بقوة فادينا..ووقت الشده المسيحى الى فعلا مسيحى بيبان..وفى النهايه ثقى تماما ان وعود ربنا صادقه ابواب الجحيم لن تقوى عليها وولادها كده كده هيرجعو لحضنها تانى.

(9)

مارى : يعنى اطمن ياابونا ؟؟؟

ابونا : اطمنى وروحى وارتاحى علشان تحضرى قداس العيد ياابنتى

مارى : طمنتنى ياابونا

ابونا : يمين الرب القويه الى ماسكه الكنيسه هى الى مطمنانا.

مارى : سلام ياابونا (تخرج)

ابونا : (يصلى امام الهيكل) اقف مع عبدك الضعيف يارب.وقوينى وحافظ على كنيستك (يخرج)

0يدخل عادل محدثا نفسه ثم يدخل مشههور بالخبث)

عادل : ايه الكلام الغريب الى عمال اسمعه من ساعة ماخرجت من الامتحان لغاية ماجيت الكنيسه ال ايه الكنيسه فى واحد عايز يشتريها . ويهدها ...ده اكيد راجل مجنون ومين ده الى هيوافق على كده

مشهور : انت لازم توافق وكلنا كمان لازم نوافق وبدون انفعال وبالورقه والقلم انت هتتخرج السنه دى ..وكل واحد بيتخرج محتاج شغل ... والشغل بقا نادر اليومين دول صح؟؟

عادل : صح وبعدين

مشهور : طب لما تتفق مع سامى باشا...ويديك شقه تعملها عياده فى السنتر الى هايعمله مكان الكنيسه فى موقع زى ده يبقى العقل بيقول الكنيسه تتباع

عادل : لكن ربنا بيقول لا . ده بيته ...ازاى اساعد فى هدم بيته ؟؟؟؟!!!

مشهور : ياعم دى كنيسه واحده . ماانت ممكن تصلى فى اى كنيسه تانىه ..سلام ياعادل وفكر كويس ها .. فكر كويس (يخرج)

عادل : لا انا مش فاهم حاجه . انا مش مركز وباين عليا باحلم او مجرد هزار . ايوه . هو هزار انا رايح ارتاح عشان احضر قداس العيد (يخرج )

ابونا : (يدخل وورائه عم بسطا )خلاص ياعم بسطا . بعد قداس العيد هانبقى نتكلم فى الموضوع ده

بسطا : يعنى انت موافق على البيع ياابونا . انت موافق صح ؟؟؟

ابونا : طب مش لما نشوف رائى باقى الشعب موافق على االبيع ولالا

(10)

بسطا : ماانت الخير والبركه بردك ياابونا . هو فيه حد يقدر يقول كلمه بعد كلمتك ؟

ابونا : طب روح اعمل القربان دلوقتى يا عم بسطا

بسطا : يعنى افهم من كده انك موافق صح (ابونا يصمت) تبقى موافق السكوت علامة الرضا . انى هاروح اعمل االقربان بعد اذنك ياابونا (يخرج)

منى : (تدخل وتسلم على ابونا ) سلام ياابونا احنا هانيجى برده نحضر قداس العيد مع اننا زعلانين عشان انت طردتنا من مكتبك

ابونا : وياريت تكونو فوقتو من الكلام الى انتم قولتوه فى المكتب

جورج : فوقنا ياابونا بس بما انك اب اعترافنا وراعى كنيستنا فااحنا فيه مشكله كده عايزينك تحلهالنا

ابونا : مشكلة ايه ربنا مايجيب مشاكل

منى : اصل الخطوبه الى بينى وبين جورج شكلها كده مش هتستمر

ابونا : ليه كده يابنتى اايه الى حصل قوليلى

جورج : بقا ياابونا انت عارف ان الجهاز محتاج مصاريف ده غير العفش حتى الشقه مش عارفين نحجزها

منى : تفتكر ياابونا نجيب منين

ابونا : ربنا يبعت يابنتى ربنا ان شاء الله هيبعت

جورج : هو احنا هنفضل مخطوبين ونقول ربنا يبعت افرض ربنا مبعتش يرضيك نفضل كده يعنى ياابونا

ابونا : لا طبعا ميرضنيش...لكن ربنا هايبعت عن طريق كنيسته ان شاء الله والى مش قادرين عليه احنا هنجيبه

منى : الكنيسه هاتساعدنا بايه ياابونا ...هاتقدر تجبلنا شقه كبيره فى عماره حلوه وعفش فخم كامل ... انت عارف ده كله بكام ؟؟؟؟؟

ابونا : فعلا النفس الشبعانه تدوس العسل والنفس الجائعه كل مر حلو . وانتو نفسكو جعانه بشهوات العالم .وكل ماهاتاخدو مش هيكفيكو .وكل يوم هاتقولو عايزين تانى وعمركو ماهتشبعو . فيها ايه لما تبدئو بشقه صغيره وعفش معقول وكويس .وبعد كده تكبرو مع بعض .وساعتها هاتحسو ببركة ربنا معاكو.

(11)

جورج : اه هنفضل نكبر لحد ما نموت وبرده مش هنكبر .امال نعيش امتى ان مكناش نعيش واحنا شباب

ابونا : عيش ياابنى .بس بالى ربنا يسمحلك بيه ..ومتطمعوش باكتر من الى ربنا يسمح بيه . عشان الشيطان ميضحكش عليكو.

منى : ياابونا طب ما ربنا سمح وانت الى مش راضى

ابونا : سمح بايه اننا نبيع بيته .....وفى الدينونه العظيمه هاقوله ايه ... انا بعت بيتك يارب

جورج : مااحنا هنحضر فى اى كنيسه تانيه

ابونا : تهدم وتبيع فى كنيستك .....والبيع كل يوم بيتكرر .......ولما تسيب كنيستك وتروح اى كنيسه تانى . وننسى كلام ربنا فى رؤيا يوحنا الاهوتى الاصحاح التالت

(صوت خارجى ) انا عارف اعمالك ان لك اسما انك حي و انت ميت

كن ساهرا و شدد ما بقي الذي هو عتيد ان يموت لاني لم اجد اعمالك كاملة امام الله

فاذكر كيف اخذت و سمعت و احفظ و تب فاني ان لم تسهر اقدم عليك كلص و لا تعلم اية ساعة اقدم عليك

جورج::: يوه ياابونا لو الخطوبه اتفكت زنبنا هيكون فى رقبتك..وهاتكون انت السبب فاهم

ابونا : طمعكم هو السبب بدل ماتكونو كنيسه صغيره تخرج من الكنيسه الام لا عايزين تهدوها عشان تبنوا فى هدمها معبد جديد للشيطان

منى : طيب كنيسه مش هندخل .وقداس مش هنحضر وبيع هتتباع علشان كلنا عايزين نبيعها

جورج : مع السلام ياابونا

ابونا : (يقف امام الهيكل يصلى)ايه يارب فيه ايه ؟انت ساكت ليه ؟؟؟؟ التجربه جامده عليا قوى ومش قادر استحملها ...ولادك يارب سيبتهم ليه يبقو ضدى ؟؟؟؟ انا زعلتك فى حاجه ؟؟؟ خلى التجربه فى اى حاجه تانى فىا انا فى نفسى لكن الا بيتك .. الا الام الا امى الا امنا كلنا .. سيبتنى ليه يارب ؟؟؟ سيبتنى ليه يارب وانتى يا كنيسة الام يا سفينة العالم ساكتة لية ارجوكى اتكلمى .

سامى Lيدخل) انت فهمتو غلط . هو بالعكس ده واقف جنبك قوى...والخير الى انا جيبهولك ده من عند ربنا . وانت الى بترفضه. والى بيرفض النعمه ربنا بيسيبه

ابونا Lيلتفت عند قول سامى الى بيرفض النعمه ربنا بيسيبه ويقول ) انت؟؟؟

(12)

سامى : ايوه انا انا الى بحبك وكل مره ابعتلك خير وانت الى بترفضه ...فاكر ؟؟

ابونا : فاكر ايه

سامى : كذا شغلانه حلوه كانت هترفعك للسما بعد شهر واحد . وانت ترفض . وفى النهايه تبقى كاهن وتسيب الحياه الحلوه دى كلها . وتعيش فى الزهد .ومع ذلك جتلك تانى ومعايا خير كتير قوى . عشان انت اول واحد تستفاد بيه . وبرضه بترفض ...انا مستغرب من القوه الى انت فيها دى يااخى ...انت ايه مبتتعبش؟؟؟

ابونا : لو اعتمدت على نفسى مع اول اغراء كنت هاجرى وراك لكن الى شبعان بربنا عمره مايمد ايده وياكل من الخطيه ...وحتى لو اثرت على حد من شعب الكنيسه اهى غمامه وهاتعدى وولادها الحقيقين مش ممكن هايسلموك بيتهم تهده

سامى : ليه بس كده ياابونا داانا مستعد اديك فلوس لحد ماتقول كفايه ..واول ماتمضى على عقد البيع تعرف مكافئتى هتكون ليك ايه

ابونا : الجحيم هى دى مكافئتك عشان محافظتش على بيت ربنا زمان ادم وحوا باعو الجنه بسبب شهوة الاكل من شجرة معرفة الخير والشر واحنا دلوقتى بنبيع الملكوت للشيطان بالمال والشهوه والخطيه انت جاى عايز تهد الباب عايز تهد طريق السما ...الكنيسه الى انت عايز تهدها دى هتحرقك بقوة فاديها وهاتدوسك برجليها انت فاهم

سامى : بص بقى انا مش هاتكلم كتير . وافق على البيع وهاديك قرشين احسن ماتطلع من البيعه كلها من غير حاجه تطلع ابيض

ابونا : ماانا كده كده خارج منها ابيض ...عريانا دخلت الى العالم وعريانا اعود الى هناك

سامى :الكنيسه هاشتريها هاشتريها ..وهاهدها ..فاهم .......ومنى 10000تلاف جنيه فى الشهر لكل واحد مايرضاش يخشها وشوف مين الى هيعمل القربان ومين الى هيرد عليك فى القداس ومين الى هيقف معاك ..هاخلى الناس كلها ضددك ...

ابونا : وانا ضدد الى ضدد الكنيسه وهو ده كان رد القديس اثناسيوس الرسول حامى الايمان لما قالوله العالم كله ضددك يااثناسيوس .قال بقوة وثبات وثقه الى فداها ..وانا ضدد العالم فاهم ضدد العالم

سامى : طب لما نشوف ياابونا شهوات الدنيا ولا الكنيسه (يخرج)

ابونا : حتى لوكنت انا لوحدى فى الكنيسه هاعمل القداس لوحدى

نفين : بس مش لوحدك ياابونا انا جايه احضر معاك قداس العيد

مارى : وانا جايه اتناول ياابونا

(13)

ابونا : صلى يابنتى عشان الناس يرجعو لبيتهم من تانى .صلى .لان فعلا مهما قسيت التجارب علينا زراع الرب القويه هاتفضل ماسكه الكنيسه ومحافظه عليها .. . صلوا كلكم (يلف ويصلى ومعه مارى ونفين ثم صوت خارجى :: تطفأ الانوار شيأ فشيأ وتقال اوشية السلام

ستــــــــــــــــــــــــــــــــــــــــــــــــــــــــــــــــــــــــار

الفصل الثانى

يفتح الستار ثم يدخل ابونا ويقبل الهيكل ثم يتامل خورس الشمامسه ثم يذهب الى المنجليه فيجد عليها القطمارس عليه تراب فيبدا ينظفه بكم الفراجيه

ابونا : فات شهر كامل والكنيسه محدش دخلها (ينزل وسط الشعب ويقول)طب ليه دانتى كل حاجه فيكى حلوه صلاتك الحانك قصصك وحكاياتك . اد كده حبك قل فى قلوبهم وصورتك مبقتش حلوه فى عيونهم

مشهور: (يدخل ) مين الى قال كده انت فاهم العكس دى الكنيسه جميله وموقعها جميل ومساحتها اجمل واجمل واكتر واحد بيحبها هو سامى الباشا بتاعنا وعشان كده هو الوحيد الى بيزورها باستمرار

ابونا : علشان يهدها صح.مش بيجى غيرعلشان كده

سامى : بص ياابونا انت شوفت ان انا اقوى منك والمال اقوى من اى حاجه انا جايب الخير للناس تمنعه انت ليه .ماتعيش والناس كلها تعيش

مشهور : الشنطه معايا اهى وفيها الفلوس ااالى تستهال مكانتك ياريت متكسفش الباشا

ابونا : بردو مش هابييع

سامى : استنى يا مشهور المكان ميبقاش مكان غير بالناس والناس مش هاتخش الكنيسه تانى ....خد الفلوس بدل ماتخسر كل حاجه .. وبلاش تعاند عالفاضى (ابونا يمسك الفلوس)

مشهور : الف مبروك ع البيعه ياابونا . مبروك ياباشا

سامى : ممكن بقى ناخد بركة امضتك على المبايعه

ابونا : طب مش لازم لما تشترى حاجه تشتريها من صحابها

مشهور : مانت الخير والبركه ياابونا . ابقى خد انت الفلوس كلها . وابقى وزعها على الى انت عايز توزعها عليه

سامى : استنى يا مشهور ....طلباتك ياابونا

(14)

ابونا : لازم الناس كلها ترجع الكنيسه تانى ؟ وكلهم يمضو ع البيع قبل ماانا امضى علشان سعاتها يبقى شعبها باع طريق الملكوت بتمن رخيص

مشهور : ماتخلص بقى ياابونا

سامى : استنى يا مشهور .. انا فاهم ابونا يقصد ايه .. وانا موافق ياابونا

ابونا : طب ممكن تاخد فلوسك على مانمضى عالبيع

سامى : لا خلى الفلوس معاك لو تم البيع اعتبرها هديه منى ليك .. وانت يا مشهور .بلغ الناس كلها انها ترجع الكنيسه لان ابونا وافق عالبيع خلاص

مشهور: تحت امرك ياباشا

سامى : نتفابل الاسبوع الى جاى فى الاجتماع العام عشان تبيع ياابونا ...يالا يا مشهور (واثناء خروجه ينادى عليه ابونا)

ابونا: يا سامى بيه خد فلوسك معاك وابقى وزعها انت بنفسك على اللى هيبيع

سامى : يصمت ثم ينظر وياخذ الشنط وينظر لابونا ثم وهو خارج يقابل مار تدخل ونظر لها بنظرة احتقار ويخرج)

مارى : ممكن تفسرلى ياابونا ايه الكلام الى سمعته ده

ابونا : (حزين) وسمعتى ايه ...انى هابيع الكنيسه صح؟؟

مارى : امال فيه عندك رد تانى

ابونا : لا معنديش رد تانى

مارى: معندكش رد تانى يعنى ايه ؟؟؟هاتتباع ؟؟؟وكلامك راح فين ؟؟؟اصرارك راح فين كان كلام كلام وبس

ابونا : (يحاول الهرب) جسد من غير اعضاء ميقدرش يعمل حاجه فين شعبها ؟؟؟؟؟فين قوتها؟؟؟؟كله هدها يبقى انا لوحدى ااعمل ايه ؟؟؟

مارى : تعمل ايه ؟؟؟؟ تقول لا زى ماكنت بتقولها على طول

ابونا : (يهرب) صوتى وجعنى ...معدتش قادر عالكلام ولا حد عاد سامع صوتى ....القلوب بقت حجر

مارى : حتى الحجر كان بينزل منه الميه ..عشان يروى شعب الله فى البريه ..لكن ده مش حجر دى قلوب ماتت

(15)

ابونا : والى بيموت مابيصحاش تانى

مارى : لا بيصحى بس بمعجزه ياابونا

ابونا Lيلتفت) بس انا لوحدى ماقدرش اعمل معجزه

مارى : مانت فعلا متقدرش تعمل معجزه عارف ليه ... عشان انت بعت

ابونا Lينظر لها بتعجب وحزن ثم ينظر للشعب ويطاطى راسه للارض ويخرج)

مارى : رايح فين ياابونا كلمنى ...(تبكى)

جرجس : ياسلام لو صحيح الى الواد مشهور بيقوله ده . ايه صوت العياط ده ...هو فيه حد فى الكنيسه ولا ايه ؟؟؟

مارى : حمد الله عالسلامه يا جرجس

جرجس : مين ؟ مارى بتعيطى ليه يا مارى ايه النتيجه ظهرت وسقتى ولا ايه

مارى : فعلا النتيجه ظهرت بس كلنا سقتنا مع اول تجربه قابلتنا

جرجس : تجربه انت بتتكلمى عن ايه يامارى

مارى : عن بيتنا بيتنا الى هانبيعه كلنا

جرجس : احنا بقى لينا بيت وهانبيعه كمان احنا لسه اتخطبنا حتى؟؟

مارى : كنيستنا كنيستنا ياجرجس ...الى اول ماسمعت ان ابونا وافق عالبيع اول واحد دخلتها عشان تقبض تمنها

جرجس : تمنها ...فاكره اليوم الى جيت اكلمك فيه عشان اخطبك فلما قولتيلى انك موافقه دخلت الكنيسه اصلى واشكر ربنا ..ماعرفش شكلك ايه ..حلوه ولا وحشه ولما رحت الكليه معاكى جيتى تعرفينى على زمايلك واحده منهم قالتلك

صوت خارجى بنت: بقى انتى الى مليون واحد يتمناكى تاخدى واحد اعمى انتى جرى فى عقلك حاجه يامارى

جرجس : طبعا مش معقول واحده زيك تاخد واحد اعمى. ولما اتقدمتلك رفضونى عشان اعمى ..مش كده ..ومن ساعتها انا نفسى افتح فاهمه .نفسى افتح عشان ابقى انسان كامل فى نظر الناس. ومحدش يقولى كلمه زى الى سمعتها تانى.

مارى : كنت فى عينى نظرك اقوى من كل الناس. كنت فى عينى كامل . لان قلبك شايف ربنا دايما

(16)

جرجس: وبعد ما هفتح هاشوفه اكتر

مارى : بعد ما تفتح مش هتشوف اهم حاجه ......... كنيستك الى اتربيت فيها

جرجس : ماشوفش الكنيسه بس احسن من انى ماشوفش كل حاجه

مارى : تبيع بيتك؟؟؟؟؟؟؟؟؟؟؟؟؟؟؟!!!!!!!!!!!!!!!!!!

جرجس : ايوه ...عشان اشوف

. اشمعنى كله بيشوف .نعمة البصر حلوه ليكو . لكن وحشه لى .. انتم انانيين فاهمه .انانيين.. انا موافق ع البيع ..هاخد الفلوس واعمل العمليه .. ومش عايز اشوفكو تانى (يسقط ع الارض (ترنيمه ) ثم تحاول مارى ان تسنده وهى تقول قوم ياجرجس فيفلت منها ويقول) مش عايز اشوفكم تانى .... (يخرج)

مارى : جرجس : جرجس ... استنى ياجرجس .... (تخرج وراه )

نفين : انا مش مصدقه انك جاى معايا الكنيسه بالفرح ده !!عرفت ان تفكيرك ده كان غلط

عادل : غلط !!غلط ايه يابينتى .......ابونا وافق عالبيع خلاص

نفين : وافق ع البيع !!! يعنى ايه وافق عالبيع ..انت بتهزر ياعادل....!!!

عادل : يابينتى وافق عالبيع وقبض العربون..وابونا من محبته لينا ...مرضيش يبيع غير لما كلنا نبقى موجودين علشان يدينا نصيبنا

نفين : يعنى ايه يوافق عالبيع ...هو لو وافق احنا مش هنوافق

عادل : احنا ؟؟؟ فيه ايه يانفين؟؟؟فوقى ياماما ...خلينا نعيش بقى زى الناس ما عايشا

نفين : نعيش .....وتبقى العيشه ليها لازمه من غير الكنيسه ازاى؟

عادل : يا نفين...ماتعقديهاش بقى

نفين : ماعقدهاش ... مااحنا عايشين والحمد لله ناقصنا ايه

عادل ناقصنا كتير بقا وخلى الواحد ساكت

نفين : ناقصنا كتير

عادل : ايوه كتير . انتى ناسيه انى هاتخرج السنه دى ...ومحتاج شغل والاهم اجيب شقه .وابدأ اكون مستقبلى ...هو ده كله ببلاش

نفين : والبيع هو الحل...صح...؟

(17)

عادل : ايوه هو الحل .عياده وافتحها فى احسن حته ..شغلى وضمنته ..ومستقبلى وضمنته....ايه بقى ماتسبينا نعيش

نفين : سيبينا نعيش ..هو كل واحد يغلط يقول سيبونا نعيش ...ياخساره وابونا وافق عالبيع مش كده ؟

عادل : ايوه وافق عشان بيحب شعبه . عشان عايز مصلحة شعبه

نفين : مصلحه شعبه . هى مصلحتنا اننا نبعد عن كنيستنا ؟؟؟ طب ازاى؟؟!!

عادل : انا غلطان انى قولتلك .بدل ماتفرحى معايا تغمينى حرام عليكى بقا انا موافق عالبيع موافق ع البيع(يخرج)

نفين : (تبكى ) عادل عادل

افكار: (تدخل) الله .هى البينيه زعلانه كده ليه ؟؟لحسن يكون حصلها الى حصلى ..لا ده بردو الناس لبعضها اوعى تزعلى يا اختى . اوعى تشيلى للدنيا هم.

نفين : لازم اشيل للدنيا هم .. ولازم كل الناس تاخد بالها من الى بيحصل ممكن اسالك سؤال انتى موافقه على بيع الكنيسه

افكار: الا موافقه ...ده انا عملت حسابى على كده خلاص

نفين : عملتى حسابك على كدة ومفكرتيش هاتصلى فين هاتقبلى ربنا فين

افكار : ماهو ربنا فى قلبى وانا بحبه بردو

نفين : طب هاتعترفى فين

افكار: ماهو................

نفين : هاتتناولى فين؟

افكار: ماهو.....

نفين : ولما طفل صغير نيجى نعمده هانعمده فين

افكار: ماهو

نفين : ماهو كل ده فى الكنيسه الى هانبيعها ...فى الكنيسه الى بيعناها .. فى الكنيسه الى بيعناها

افكار : (اثناء كلام نفين ) حرام عليكى كفايه . كفايه بقى . كفايه .. (يخرج)

نفين : انا الى حرام عليا !!وانتو مش حرام عليكو . يا خسارة يا شعب الكنيسة ؟(تخرج)

(18)

منى : على فكره يا جورج بما اننا خلاص كلها ساعات والاجتماع هايبدأ وناخد الفلوس .انا فيه حاجه مهمه عايزه افاتحك فيها

جورج: اى حاجه تطلبيها انا تحت امرك .. انا واحد الفلوس متهمنيش ..تشاورى على اى شقه ... ...هاشتريهالك على طول ..بس بعد ماناخد حقنا فى البيع احنا عمالين نتكلم ونسينا اهم حاجه : الشنط الى هيطحط فيها الفلوس

منى : اه صحيح .طب تعالى نجيب شنط قبل الاجتماع مايبدء (يخرجو)

ماجده : (تدخل وتقبل ستر الهيكل وهى تقول)غريبه هى دى الكنيسه الى كانت على طول مليانه ...الى اول كنيسه اخشها فى حياتى .... ايه الى جرالها ...يبقى كلام نفين صح (وهى تقبل ستر الهيكل تلمح صورة الصلبوت فتذهب وتقبلها واثناء ذلك يدخل بسطا)

بسطا : ايوه انا بقى اشوف حالى ...والم القرشينات وارجع عالبلد ...ونفضها سيره بقى

ماجده : عم بسطا ازيك ياعم بسطا

بسطا : ماجده ...ازيك يابينتى ...ايه الى جابك ؟؟؟ مشيتـــ ....قصدى ....مش عارف.

ماجده : ايه ياعم بسطا ...انت متلخبط ليه

بسطا :اصلى فرحان علشان شوفتك يابينتى

ماجده : والى فرحان يقول انتى جيتى ليه ...انت مش عايزنى اجى ولا ايه ياعم بسطا ؟؟

بسطا : لا يابينتى ...الكنيسه بيتك ...تيجيها فى اى وقت انتى عايزاه

ماجده : اجى فى اى وقت ازاى ياعم بسطا ؟ ودى اخر مره كلنا هانيجى فيها الكنيسه ...انتو مش هاتبيعوها؟؟؟

بسطا : ماهى الكنايس غيرها كتير ...روحى اى كنيسه تانيه

ماجده : وانت ياعم بسطا ...هاتروح فين؟؟؟

بسطا : هاروح مطرح ماروح بقا ..مش عارف؟

ماجده : اتغيرت ليه ياعم بسطا ؟؟؟

بسطا : ماتغيرتش ولا حاجه ..نفس الشكل ..ونفس العمه ..ونفس الجلبيه كمان.

ماجده : قلبك اتغير ليه ياعم بسطا حبك لربنا قل ليه ياعم بسطا

بسطا : مين ده الى ضحك عليكى وقال ان حبى لربنا قل؟؟؟

ماجده : مش ناسى حاجه ياعم بسطا .

(19)

بسطا : اه نسيت الشاى ع النار ...انا رايح اطفى البوتجاز...

ماجده : استنى يا عم بسطا انت نسيت حاجه مهمه

بسطا : انا مش فاكر حاجه

ماجده : فين القربانه الحلوه الى كننت بتشيلهالى لمااكون جايه

بسطا : مانى ماخبزتش قربان

ماجده : ماخبزتش قربان ؟؟؟ ليه ياعم بسطا داانا نفسى اكل قربانه من ايدك

بسطا : ماهو انى

ماجده : ماهوانت نسيت الى كنت بتعمله ..شهوة المال نسيتك ربنا

بسطا: انا عمرى مانسيت ربنا

ماجده : لا نسيته..فاكر اول مر جيت فيها الكنيسه هنا وعادل عرفنى عليك فاكر قلتلى ايه ؟؟

بسطا : انى معدتش فاكر حاجه

ماجده : افكرك قلتلى ان كل قديس من قديسين الكنيسه عمود من اعمدة الكنيسه القويه . وكل قديس كان له عمل قوى وهم اساس الكنيسه .. وبفضلهم فضلت الكنيسه عايشه لينا لحد دلوقتى ... وفاكر حكتلى حكاية مين من القديسين ؟؟؟

بسطا : ايوه قصة حبيبى مارجرجس

ماجده : لما مسك منشور الوالى وقطعه من ع الكنيسه الى كان بيامر بقفلها ..ولما دخلو معاه البنت الخاطيه جوه زنزانته . بدل ماهى الى تاخده معاها لخطيتها خدها هو لعفته وطهارته.وفاكر قولتلى ايه كمان؟؟؟

بسطا : ايوه كلمه قالها سيدنا البابا شنوده ..احفظ المزامير تحفظك

ماجده : وحفظتنى مزمور صغير وجميل

بسطا: سبحو الرب ياجميع الامم ولتباركه كافة الشعوب . لان رحمته قويت علينا وحق الرب يدوم الى الابد

ماجده : ياخساره ياعم بسطا اللسان الى قال المزامير وصلى ..هو الى قال نبيع ونهد بيته والايد الى عملت القربان هى نفس الايد بتبيع وتهد عشان مايتعملش القداس ليه ياعم بسطا؟؟ ليه ياعم بسطا؟؟؟

(20)

بسطا : انا رايح ادبر حالى قبل الاجتماع ....انا هاخد القرشينات وامشى... فاهمه انا ماشى(يخرج)

ماجده : ده الخبر الوحيد يانفين الى كنت اتمنى انك تكونى بتكدبى فيه ...خلاص هايبيعوكى ياباب خلاصنا ؟؟؟...

عادل : (يدخل فيفاجئ بوجود ماجده ) ماشى يانفين انا هاخد الفلوس ومش هاوريكى وشى تانى .... مممممامجده انتى جيتى

ماجده : ايه مكنتش عايزنى اجى ولا ايه ياعادل انت نسيت ان النهارده اجتماع ابونا عبد المسيح الاسبوعى الى انا بحب احضره

عادل : اه طبعا . طبعا انا فرحان قوى انك جيتى . تصدقى هازعل منك قوى لو مكنتيش جيتى النهارده

ماجده : لاماانا عارفه وخصوصا انى الاجتماع النهارده اجتماع مميز غير اى اجتماع حضرناه

عادل : طبعا ابونا محضر وعظه جميله النهارده .

ماجده : وعظة البيع مش كده ..

عادل : بيع ... بيع ايه ؟

ماجده : البيع الى كلكم موافقين عليه والى جاى عامل حسابك وجايب معاك شنطه فاضيه عشان تملاها

عادل : ايوه ياماجده بس ده كله عشان خاطرك عشان اكون جدير بيكى...

ماجده : على حساب مين...انت كنت كبير فى نظرى زمان ...رغم انك على اد حالك لكن انت دلوقتى بقيت ولا حاجه

عادل : ولا حاجه ؟ انا ولا حاجه ياماجده ..

ماجده : ايوه ولا حاجه .. عشان انت كنت غنى بربنا ... كنت غنى بالمسيح ... بالميسح الى كنت راسم صليبه على ايدك من غير مادوق حلاوته .......عادل

عادل : نعم

ماجده : كان فيه سؤال عايزه اساله ليك ....ممكن

عادل : اتفضلى يا ماجده

ماجده : معرفتى بيك كانت صدفه ...ولا انت كنت تقصد تتعرف عليا فى الكليه ..؟؟

(21)

عادل : طول مااحنا فى سنه اولى وانا شايف فى ايدك الصليب وانتى بعيده عنه ،، اتعمدت انى اوقع صورة المسيح قدامك عشان تديهالى واعرفك.

ماجده : وكنت عايز تعرفنى ليه.

عادل : كنتى خروف ضال وكنت عايز ارجعك للحظيره تانى

ماجده : ونجحت فى كده ياعادل ...بنت وحيدة ابوها وامها .....الى بتعوزه بتاخده ......الكنيسه عمرها مادخلتها ماكنتش فاضيه غير للاغانى والسكر الى ملهاش قيمه ....فاكر اول مره جيت فيها الكنيسه ؟؟؟

عادل : كان زى النهارده يوم ماقعدتى واتكلمتى مع ابونا فى الاجتماع

ماجده : انسانه عمرها مااعترفت ولا داقت حلاوة الاعتراف كنت كل خطيه باعترف بيها بشيل صخور من على قلبى وساعت مااتناولت اول مره حسيت فيها بسلام محستوش فى حياتى قبل كده وفى مره دخلت الكنيسه نسيت وغنيت وابونا قالى تفتكرى الفم الى بيسبح يقبح ... ومن ساعتها الترانيم هى الى على لسانى(تمسك صورة الصلبوت وتقول بانفعال) فاكر الصوره ولا مش فاكرها

عادل : مش فاكر ومعدتش فاكر حاجه

ماجده : افكرك ...جبتلى اجبيه وقولتلى فيها السبع صلوات الى لازم نصليها حتى لو فى سرنا وبعدها جبتلى نفس الصورة دى وقولتلى شوفى اد ايه اتالم على شانا مجروح لاجل معاصينا مسحوق لاجل اثامنا تفتكرى بعد الى عمله ده كله تيجى انتى النهارده وتزعلى ابوكى السماوى وتصلبيه بتصرفك ؟؟؟

عادل : فجئه لاقيتك بتبكى قدام الصوره وبتحطى ايدك على الصوره عشان تمسحى الدم الى نازل منه

ماجده : انا زعلته منى بس عشان مدقتش حلاوته لكن انت النهارده بتبيعه بص لصوره وقوله انا ببيعك

عادل :لا

ماجده : انا مش عايزك

عادل : لالا انا بحبه انا مقدرش ابيعه مقدرش (يبكى ويركع على ركبته وهو واضع يده على الصوره)

نفين : (تدخل وتمسك الطرف الاخر من الصوره وتقول) ماهو الى مبيحافظ على بيته يبقى بيبيعه

(22)

مارى: (تدخل") والى بيسيب الكنيسه ماهو بيزود الجراح من تانى

افكار : ( تدخل) ايه ....فيه ايه .......ابونا جه ومعاه الفلوس؟؟؟

جورج : (يدخل ) ايه ..ابونا فرق الفلوس ؟؟؟

منى : (تدخل ) ايه ده حد يرد علينا .......انتو فيه ايه؟؟؟؟

جرجس : (يدخل ووراه بسطا ) تعالى ياعم بسطا قولى فيه ايه.....افتح الشنطه ولا لسه ؟؟؟؟

بسطا : لا.. لسه ياجرجس متفتحاش ابونا لسه مجاش

مشهور : (يدخل يوسع الطريق) كله يوسع للباشا الباشا جه...اتفضل ياباشا

سامى : (يدخل و فجا ينظر للصوره )ياسلام الواحد اسعد انسان فى الدنيا علشان هايسعد الناس دى كلها ايه ده خليهم يشلوا الصوره دى من قدامى يا مشهور خليهم يشيلوها بسرعه

مشهور : (من بعيد) نزلوا الصوره دى لحسن الباشا ياخد الفلوس ويمشى

مارى: مش هانشيلها...عشان كل الى هايخد قرش يقف قدام الصوره ...ويدق فيها مسمار جديد ويقوله بعتك بعد الفين سنه من موتك وقيامتك علشانى ... انا جاى النهارده اصلبك من تانى

ماجده : اصلبوه ...اصلبوه من تانى لو يهون عليكو

جرجس : شيلى الصور اهدى يامارى...ابقى اتنازلى عن نصيبك لاى حد لو مش عايزه لكن احنا عايزين

مارى : مش هاشيلها

جرجس : لا هتشيليها

ابونا : (يدخل ) اد كده الفلوس بتغير النفوس ياجرجس .... يالا ماانتم كل يوم بتبيعوها ...الى مايحترمش قدسية المكان يبقى بيبعها ...والى بيعدى من قدامها من غير مايحضر القداس يبقى بيبعها ..... والى بيغيب عنها بالسنين يبقى بيبعها....والى مبيخدمش فيها يبقى بيبعها......ولما تتعمل الخطايا فيها ..يبقى بنبيعها .....يالا بقى كملو بيعها

سامى : انا جيت حسب الاتفاق عشان تعرف ان مواعيدى مظبوطه....ومعايا كل طلباتكم وبزياده كمان ....المبايعه يامشهور...

مشهور: اتفضل ياباشا

(23)

سامى : اتفضل ياابونا ...امضة شعبك وبعدها ناخد بركة امضتك .... وتاخدو صوركم وحاجتكم وتمشو من هنا

ابونا : هامضى بس بشرط قبل ماكل واحد يمضى يقول هو بيبعها ليه

سامى : فيه ايه ياابونا ...احنا لسه هانقعد ونسمع فى حكايات عايزين نخلص بقى

ابونا : لو كلامى ماتنفذ مش هابيع

مشهور : يعنى ايه ياابونا.....هو مكانش اتفاق ولا ايه ..؟؟؟

سامى : خلاص يا مشهور نستحمل لما نشوف اخرتها ....اتفضل ياابونا وياريت نخلص

ابونا : ها ياست افكار عايزه تبعيها ليه:......

افكار : ابيعها عشان كنت محتاجه وجيت هنا وقيدت نفسى فى اخوة الرب وبقيت كل عيد ابونا يبعتلى خدامه ومش كده وبس ابونا شغلنى فى مصنع ملابس وبقالى معاش من الكنيسه كل شهر كنت باجى اخده وشافولى شقه كويسه سكنت فيها ...بعد ماكنت ساكنه فى اوضه صغيرة عشان كده كنت هابيعها ...كنت هابيعها (تلف بظهرها)

ابونا : وانت يا عم بسطا

بسطا : وانى ضاق بيا الحال فى البلد وظروفى ان تعليمى على قدى جيت هنا وانا صغير ومكنتش لاقى شغل وابونا كان لسه خادم فى الكنيسه اتوسطلى وشغلنى فراش ولما اترسم علمنى ازاى اعمل قربان ...وبقيت اخد مهية الفراش والقرابنى مع بعد ...طول ماانا بعمل قربان اقول مزامير ....طول ماانا بعمل القربان اقول مزامير والناس كل ماتشوفنى تقولى فين قربانك الحلو يا عم بسطا ...عايزين قربانه سخنه من ايدك الحلوه عشان كده كنت هابيعها ... عشان كده كنت هابيعها ( يلف بظهره)

ابونا : وانتى يامنى

منى : هنا كنت باجى الكنيسه وانا لسه صغيره وكنت كل ماقول ترنيمه صح ابونا يدينى هديه ويقولى شاطره يامنى كل ماتحفظى اكتر هاتاخدى هدايا اكتر ... واول مابدات اكبر واوصل لسن المراهقه الكنيسه ضمتنى فى الخدمه عشان افجر طاقتى كلها فى الخدمه ياااه علمتنى كل حاجه حلوه وعشان كده كنت هابيعها كنت هابيعها ( تلف )

ابونا : وانت ياجورج

جورج : جوة جرن المعمودية اللى فى الكنيسة اتعمدنا .ولى صور جميلة وانا بالتونية لما ابونا عمدنى وهنا اتعرفت على منى ...ولما كانت مش موافقة بسبب ظروفى ابونا اقنعها لما

(24)

شافنى بحبها ...وقدام الهيكل ده كانت صلاة الجبنيوت على منى .....كل الزكريات فيها اهم من بعض ..وعلشان كده كنت هابيعها .كنت هابيعها (يلف بظهره)

ابونا : وانت ياعادل

عادل : وانا كنت كل اسبوع بقعد انا ونفين ومارى وماجده وجرجس . علشان نحضر دروس فى مدارس الاحد ..ونروح الصبح بدرى نجمع الاطفال الملايكه ...من البيوت علشان يحضرو القداس ...وكانو بيقولولى ...احكلنا تاريخ الكنيسه يااستاذ عادل ..احنا بنحبك يااستاذ عادل ...وكان لما يجو اوليء امور الاطفال يقولولى ...احنا بنطمن على ولادنا معاك يااستاذ عادل .....وبسبب الكنيسه اتعرفت على ماجده وجبتها للمسيح وعلشان كده كنت هابيعها ..كنت هابيعها (يلف ظهره)

ابونا : وانت ياجرجس

جرجس : اماانا كل الاجتماعات كانو يقولولى

الكل :جرجس صوتك حلو فى الالحان ياجرجس قولنا لحن امانة الص

جرجس )Lيقول لحن امانة الص)

ابونا : الله ياجرجس صوتك حلو قوى فى الالحان

جرجس : وعشان كده كنت هابيعها...كنت هابيعها (يلف)

سامى : (ينظر لماجده ونفين ومارى )وانتو كمان هاتحكو تاريخكم فى الكنيسه ولا الفلم خلص على كده

ماجده ونفين ومارى: مش هانبيعها

سامى : نعم

الكلL(يلتفون امامه وفى نفس واحد ) مش هانبيعها

سامى : بعد مااستحملت قصصكم السخيف دية ....جايين تقولو مش هانبيع ماتتكلم ياابونا

ابونا : المسيحى الحقيقى ...عمره مايبيع باب خلاصه ...عمرنا ماهنسمح للشيطان يشترى مننا باب خلاصنا مش هانبيع

سامى : انا استحملت كتير بقلك ايه بالذوق هاتبيع بالعافيه هاتبيع

ابونا : انت ملكش سلطان تجبرنى انى اسمع كلامك .... الشيطان بيشترى مننا الملكوت بخطيه بشهوة عين وباغراءات زايله بس مش بيشتريه عشان يسكن فيه لا بيشتريه علشان

(25)

يحرمنا منه ويخدنا معاه للجحيم الى اوعد له هو وملايكته والرساله وصلت خلاص عايز تشترى الكنيسه مش علشان تصلى فيها ...لكن علشان تحرمنا منها وعلشان كده مش هانبيع

سامى : انت متعرفش سلطتى اد ايه بيع احسنلك ياابونا

مشهور : انت مش قد الباشا ولا شعبك قده ....انتو دخلت وفى مشكله منتوش ادها

سامى : بص ياابونا فى ايه فى الانجيل بتقول ...ان ضرب الراعى تتبدد الرعيه..وعشان كده ياابونا لازم الراعى يموت

مشهور:(يخرج مسدس ويصوبه لابونا فيراه عم بسطا فيسحب ابونا ويقول)

عم بسطا : حاسب ياابونا

الكل :ابونا(فتضرب الطلقه فى سامى بدلا من ابونا فيسقط على الارض)

سامى : كده برضو يا مشهور

مشهور : سامى بيه سامى بيه لا اوعى تموت وتسيبنى انا السبب

(تدخل فتاه تمثل الكنيسه مرتديه فستان ابيض وتاج على رئسها وتصعد على المسرح وتضع رجلها فوق سامى)

ابونا : الشيطان تقدر تدوسه برجليك ... لو صرخت للمسيح وقلتله انا لوحدى ضعيف انصرنى عليه .ماتخلهوش يضحك عليك ويشترى منك طريق الملكوت بتمن رخيص وهو حب العالم وشهواته وخطاياه ...عشان يحرمك من دخوله ...حب كنيستك وافديها بروحك زى مااجدادنا عملو زمان ...وكن واثق ان المسيح قال من يمسكم يمس حدقة عينى وكن واثق ان مهما زادت التجارب المسيح حافظها وان ابواب الجحيم لن تقوى عليها

الكل : لان ابواب الجحيم لن تقوى عليها (تكرار مرتين)

ستــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــار

انتهت المسرحية

الشخصيات :_ ابونا عبد المسيح (راعى الكنيسة ) _ سامى(الشيطان)-

مشهور ( تلميذ الشيطان ) _افكار_ جورج _عم بسطا _ جرجس _ منى _عادل _ماجدة _نفين _مارى _دور سفينة الام _ دور القديس مارجرجس والقديس مارمينا يرمزان الى قبطانين سفينة الام ( الكنيسة )

مسرحية ام للبيع