مسرحية ضيف العمارة

مسرحية ضيف العمارة 

 

المنظر : مدخل عمارة ، حيث يظهر الباب الخارجى و المدخل وتابلوة العدادات ودراجة مركونة تحت تابلوة  ثم السلم الصاعد لاعلى ، اغلب منطقة التمثيل بين المدخل والسلم امام التابلوة ، والسلم يتم التمثيل علية ايضا ويقع اسفلة بير السلم حيث يقيم بواب العمارة . الوقت صباحاً حيث تسمع خلفية بائع الجرائد والسيارات ولكنها قليلة لان الشارع خلفى وليس اساسى ) . ( ينزل ديفيد السلم مسرعاً ويراقب المدخل والسلم حيث ينزل .ديفيد طالب بالجامعة ومغترب ويسكن بالعمارة ، وهو شاب مستهتر . يقف الان ويكلم نفسه ) .
ديفيد   :	( ينظر الى ساعتة ) وبعدين اما شريف دة جبان بشكل قال وايه يقعد يأكد على .. استنانى ياديفيد .. اوعى تمشى من غيرى ياديفيد هاخلص من بابا واجيلك على طول اهو شكله ، كالعادة ، معرفش يخلص من ابوه انا لسه هاقعد اربى بيبيهات انا لو مجاش هامشى ( ينظر الى باب العماره ) ايه ده ابوه جاى اهوه يبقى ابوه كان واخده فى مشوار ( يدقق) لا .. دا ابوه وحده امال راح فين ده .. اروح اسال ابوه .. اساله هو هياكلنى ولا ايه ( يدخل والد شريف ، أ /أنور هو راجل يحب الالتزام ويبدو من ملابسه انه موضه قديمه ورسمى للغايه كما ان طريقته فى الكلام توحى بالحزم و الالتزام ) .
ديفيد   :	( بود ) ازيك ياعمو .
أ /أنور   :	( بفتور ) اهلاً .
ديفيد     :	ازى شريف ؟
أ /أنور   :	( ينظر لة باستغراب ثم شريف بحزم ) بيذاكر
ديفيد     :	( مستدركا ) اه .. اه ماانا عارف انه بيذاكر دا حتى كان متفق معايا ننزل نشترى شوية ملخصات .. لوازم المذاكرة .
أ/ أنور   :	( بجدية ) بس دة شريف لسه فى ثانوية عامة ، وانت فى الجامعة
ديفيد     :	( يفكر ) ايوه ايوه  ماانا ايوه .. كنت هادله على الكتب اللى بيذاكر منها وكنت كمان .. هاديله من خبرتى .
أ / أنور :	بس انت فى خدمة اجتماعية وانا عايزه يدخل كلية صيدلة .
ديفيد    :	يووه( بغيظ ) وليه السيرة دى ..صدقنى ياعمو ..انا عايزمصلحته .
أ / أنور :	( بصبر نافذ ) شكراً .. من فضلك ابعد عن الواد .
ديفيد    :	ياعمو .. دانا كنت هاروقه .
أ / أنور :	( لا يفهم ) تروقه ؟! .
ديفيد    :	يعنى افرفشة .
أ /أنور  :	( بدهشة اكبر ) تفرفشه ؟
ديفيد    :	يووه .. من الاخر اظبطه .
أ /أنور  :	وبعدين يابنى ؟!
ديفيد    :	ياعمو .. انا قلت لك انا قصدى مصلحته .
أ /أنور  :	ويعنى انت بقى عارف مصلحته اكتر منى ؟
ديفيد    :	طبعاً ، مصلحته انه ينفضلك .
أ /أنور :	يعنى اية بقى؟
ديفيد   :	وهى دى كمان غلط ؟! .. ينفضلك يعنى يسمع كلامك .
أ /انور :	إطمن .. انا اعرف اخليه ينفضلى على الاخر .. ( يضحك ديفيد ) بتضحك على ايه  ( لنفسه ) قلة ادب .. عيال اخر زمن .
( يصعد السلم ويختفى تاركاً ديفيد ) .
ديفيد    :	( يضرب كفاً بكف ) إيه  الراجل ده ! .. ده معندوش لغة خالص .. جاهل جداً .. امى تماما ، .. ده لو قدم فى شركة ، من جهلة ، كتيره هايشغلوه ساعى .. ده لو سبلى نفسه شهرين( يضحك  ) اظبطة ..
( يدخل مخلص . وهو شاب كلاسيك فى العشرينات ، وسيم ودمث )
مخلص  :	( لديفيد ) لو سمحت  .
ديفيد    :	( مازال يضحك على الاستاذ انور ) اما حتة راجل ..
مخلص  :	من فضلك .
ديفيد    :	( لنفسه ، ثم يلتفت لمخلص ) نكتة .
مخلص  :	( باستغراب ) إفندم ؟!
ديفيد    :	لا لا ياعم ماتزعلش .. انا مش عليك ياعم  ( يشير للسلم  ) انا عليه هوه .
مخلص  :	طب من فضلك .
ديفيد    :	لأ لا .. من فضلى مشغول دلوقت ، علشان عند حضرتى مشاوير .
مخلص  :	( برجاء ) دقيقة واحدة بس .
ديفيد   :	ايوه ما هو أنا عارف .. الدقيقة دى تجر التانية تبقى نص ساعة هب بقيت ساعة فاتنين فتلاتة.
مخلص :	صدقنى مش هأخرك ..
ديفيد   :	لأ ياسيدى اديك اخرتنى ...
مخلص :	بعد إذنك ..
ديفيد   :	ما هو بص ( ينظر له مخلص باهتمام ) .. لا يمكن .
مخلص :	لو سمحت .
ديفيد   :	كلمت السكرتيرة الاول .. ما أقدرش أكلمك من غير ما يكون فى ميعاد .
مخلص :	بعد اذنك .
ديفيد   :	( ينظر لساعتة ) بعد إذنك أنا ..انا اسف ، إتاخرت ( يفتح الدراجة ويخرج بها ) .
( يجلس مخلص على الكنبة ، تدخل الأم وبنتاها . الأم سيدة منزل وبسيطة  لوسى الكبرى ، حوالى خمسه وعشرون سنة وتبالغ فى إظهار جمالها . نجاح الصغرى فى العشرين بالضبط ، جاده وملتزمه وملابسها رياضيه ، وجميعهم اكياس كثيرة )
لوسى  :	( تضع الأكياس بعنف ) اف بقى مش هاقدر ياماما اطلع بيهم السلم .
الأم    :	يعنى إيه ؟ واحنا بنعمل علشان مين ، مش علشانك ؟؟
لوسى  :	( بتذمر ) ياماما انت اللى مستعجلة .. أنا مش مستعجلة خالص.
الأم    :	يابنتى دا أنت وصلتى خمسه وعشرين سنة .
نجاح   :	( بملل ) احنا هنتخانق على السلم ، نطلع وبعدين نتكلم .
لوسى  :	( بتصميم ) أنا مش هاشيل الأكياس دى .
( يقوم مخلص ويتجه إليهم )
الأم     :	ممكن يانى تشيل معانا .
نجاح   :	( لأمها بهدوء ) ياماما يمكن هو .
الأم    :	( مستدركة )ولا استنى يابنى .. عنك إنت .
مخلص :	لوسمحتى ..
الأم     :	أيوه أيوه يابنى .
مخلص :	كنت عايزحضرتك بخصوص ..
الأم     :	ايوه يابنى عارفة .
مخلص :	( بدهشة ) عارفة ؟
الأم     :	أيوه ، اختى كلمتنى .
مخلص :	اخت حضرتك .
الأم     :	أنا طبعاً عارفة إنك شفتها بالصدفة وعجبتك .
مخلص :	أفندم .
الأم     :	هى الحكاية مش انت اللى جاى تخطب بنتى انهاردة .
مخلص :	لا يا فندم .. انا كنت جاى بخصوص ..
الأم     :	بعد اذنك يابنى .. انامستنية عريس بنتى جاى انهاردة ومشغولة قوى .
مخلص :	مش هاعطل حضرتك ..
الأم     :	( بغضب ) بعدين بقى يابنى انا اتاخرت ( تاخذ الاكياس وتهم بالطلوع ) يللا يابنات ، يللا نطلع ( يصعدون السلم ) .
( يدخل ديفيد ويركن الدراجة ، ويبدو عليه الاستعجال )
مخلص :	ممكن لوسمحت .
ديفيد   :	( بغضب ) انت بالذات ابعد عنى .. قعدت تدوشنى خلتنى نسيت الشريط ، امال كنت رايح اعمل ايه انا ؟ ( ينظر للسلم ) بص بص الراجل الدقة القديمة ، كلمة هو بيحب حضرتك وبعد اذنك ولو سمحت والتاحابيش دي ( يهبط استاذ انور من السلم ).
ا/ أنور  :	يابنى قلنا شريف بيذاكر ، متروح تذاكر انت كمان .
ديفيد    :	ادينى رايح ياعمو ( يصعد السلم مسرعا ) .
أ / أنور :	انا عارف ايه العيال دى اية العيال دى .. حاجة تطهق .
مخلص :	لوسمحت ياستاذ .
ا/انور  :	ايوه ..( باتهام ) و انت كمان كنت معاه ، انت من نفس الشلة الفسدانة اللى عايزة تبوظ ابنى .
مخلص :	لا ..لو سمحت .
ا/انور  :	ايوه اضحك على .. لا لو سمحت انا مش منهم ..من فضلك انا اخلاقى ماتسمحليش و بقية الشويتين دول ..انا لا يمكن اسمح ، و مش ها تخدع فيكم .
مخلص  :	من فضلك .
أ/ أنور  :	عارف هاتقلى من فضلك جربنى ، لا يمكن .
مخلص  :	بعد اذنك ...
أ/ أنور  :	استحالة .. انا  عايز الواد ينفع ويدخلى كلية صيدلة .. تقوللى جربنى، مستحيل .. وبعدين انا عارف اهاليكم فين ؟ كلمة تانى هاخلى البواب يطردك .
مخلص   :	انا كنت عايز اقول .. ( ينزل ديفيد حاملا شريط فيديو ، ينظرلهم ثم يخرج ) .
أ/ أنور   :	لأ ، انت الذوق ما ما ينفعش معاك .. ياعطية ... عطية .
( ياتى البواب مسرعا من بير السلم وهو صعيدى قروى تماما فى الكلام والملابس ) .
عطية     :	إإه إيوه يابية .. ادينى اهه .
أ/ أنور    :	انت يابنى آدم مش بواب العماره دى .
عطية     :	اف إيوه يابيه .
أ/ أنور   :	ولما انت شغلتك تحرس العماره .. سايب ليه كل من هب ودب يخش كده ..شايف البنى آدم ده ( يشير لمخلص ) جاى يدور على عيالنا ويضيعهم .. فاهم .
عطية    :	اه إه إيوه فاهم يابيه ( لمخلص بعصبية ) انت ازاى تعمل اللى حضرته ( يشير لأنور ثم يلتفت له ) اه حضرته يابيه وانامالى هو انا امنع الناس من دخول العمارة ولا اشم على ضهر ايدى علشان اعرف انه جاى يفسد ابن حضرتك ؟
أ/ أنور   :	( بعصبية ) يابنى آدم .. مش انا ابو شريف ، وانا اللى اعرف مصلحته .. وبقولك ده مش مش صاحبه وانا مش عايزه .
عطية     :	( بعصبية لمخلص ) انت دلوقتى حلاً تروح ..  يروح ، يروح فين ( لأنور ) .. يابيه .. وانا مالى ماقدرش اطرده ، دى مسغلانتيش .
( يجلس مخلص على الكنبه مره اخرى بينما ينشغل الاخران)
أ/ أنور    :	وهو انت عارف تعمل حاجة ابداً .. تفتكر ايه قولناهولك وعملته.. مش قلتلك تبلغ صاحب العمارة ان الماسورة مكسوره .
عطية      :	قلت حاضر .
أ/ أنور    :	وتبعت تقوله يغير ماتور الميه .
عطية      :	قلت حاضر .
أ/ أنور    :	وقلتلك تقوله على المجارى ، وبياض العماره اللى عمال يتقشر كل شوية .. السلالم المكسورة .. وتوضيب السطح ، وغيره وغيره وغيره .
عطية     :	( ينفجر اخيرا ) يابيه وانا مالى ايه .. وهو انا صاحب العمارة .. انا حيا الله حتة بواب .. كل ما عتقولولى الكلمتين اروح اخدهم واوديهمله بتقولولى بابعت اقله ، يقول هاتصرف....... ( بعصبية ) اعمل اية بقى ؟ ابعتله البوليس، ولا اشتغل  بداله ( ببلاهه ) .
أ/ أنور    :	لاء أبقى تروحله بالمره وتقوله انه يغيرك بالمره ( يخرج ) .
عطية     :	( لنفسه ) بسيطة .. هاقوله يغيرنى .. ( يستدير فيجد مخلص امامة ) به هوانت لسه قاعد  .. اهوكل ده من تحت راسك انت .
مخلص   :	( بصبر ) لو سمحت ..
عطيه    :	ايه ؟ على انى( يضحك )
مخلص  :	ايوه من فضلك ..
عطيه    :	( يضحك ولا يرد ) يا بيه .
مخلص   :	بعد اذنك ممكن .
عطية    :	( مستمرا فى الضحك )  يا بيه انت ماخدتش بالك .
مخلص  :	انا كنت عايز ..
عطية    :	بص من فضلك و بعد اذنك و لو سمحت كل ده .. امال البيه اللى هناك كنت هاتقله ايه ؟ يابيه انا بواب وها يغيرونى  . ( يستدير ويتجه لبير السلم ) .
مخلص   :	لو سمحت .. ( يختفى البواب وهو مازال يضحك ولا يرد ) .
( يقف مخلص ناظرا بحسرة مابين المدخل والبير ، ينزل  شريف إبن أ/ أنور من السلم . وهو طالب ثانوية عامه )
شريف    :	ادى بابا مشى .. ادور انا بقى على ديفيد .
مخلص   :	لو سمحت .
شريف    :	انت واقف هنا من بدرى .
مخلص    :	من فضلك .
شريف    :	( يتجاهل كلامة ) طب ما شفتش ديفيد  ديفيد كان واقف هنا ؟
مخلص    :	لو سمحت ..
شريف    :	لا بعد اذنك بقى علشان اشوف ديفيد .. يا ديفيد
مخلص    :	بعد اذنك .. بعد اذنك
شريف    :	قلتلك متعطلنيش وبعدين ؟ !
مخلص   :	من فضلك ..
شريف    :	( يتكلم بسرعة ولا يعطى له فرصة للرد ) ايوه ، اتفضل ، قول ، اتكلم ، يعنى مش بتتكلم ، امال كنت عايز تتكلم ليه ، من  فضلك بسرعه ، انا معنديش وقت ، شوف انا سبتك ومع ذلك متكلمتش .. يبقى بعد اذنك بقى . ( يهم بالخروج ) .
مخلص   :	( يمسك يدة )  ممكن طيب ..
شريف   :	لا مش ممكن .. مش ممكن ابدا ، مستحيل . Impossible .. على فكره انا جايب 50 فى ال   Englishالشهر اللى فات .. وبعدين ممكن تسيب ايدى ( يتركه ) ايوه كده .. شوف .. متشكرين جدا .. اهو ديفيد وصل ..يللا بقى انت مع السلامة .
( يدخل ديفيد ويترك الدراجة تحت التابلوه ويحمل الشريط ويجلس على الكنبة )
مخلص  :	( مازال يكلم شريف ) مش هعطلك ..
ديفيد    :	( لمخلص بضيق ) ياعم وانت لسه بتدور على حد تكلمه .. ياعم اتكل على الله ، محدش فاضيلك .. طريقك اخضر .
( ينظر مخلص نظرة اخيرة بيأس ثم يخرج  )
ديفيد     :	إف .
شريف   :	( معطياً ظهره للمدخل ووجهه لديفيد الذى مازاعلى الكنبة ، باستعطاف ) معلش اتأخرت عليك .
ديفيد    :	( بتكبر ) وهو انا لسه هاستناك ( يشير له بالشريط ) انا رحت المشوار وحدى .
شريف   :	( بضيق ) ليه كده ؟
ديفيد     :	( بسخريه ) امال  هستنى لما تاخد اذن بابا.. ( بتفاخر) انا  يا حبيبى كل اصحابى رجاله .
شريف   :	انت بس ظروفك علشان مغترب .. انما انا لسة فى ثانويه عامة ، وبابا  بيخاف عليا قوى.
ديفيد     :	( يتصنع التعاطف ) ايوه انا مقدر ياشريف بس.. انت زوتها .
شريف   :	اوعدك انى هالتزم بمواعيدى بعد كده .
ديفيد     :	طول ماانت بتخاف من ابوك مش هاتلتزم بمواعيدك.. مش هاتنفع ماعايا .
(  يدخل الوالد من الباب ويقف خلف شريف يراقبة، يراة ديفيد بينما لا يراه شريف ) .
شريف   :	سيبك بس من بابا .. ( ينظر الوالد بغضب )
ديفيد     :	( يتصنع الطيبة ) لا ياعم ، اسمع انت كلام ابوك .
شريف   :	وانت مالك ومال ابويا .. انا حر .
ديفيد     :	( يكتم الضحكة ) ابوك عايز مصلحتك .
شريف   :	ابويا دة دقة قديمه .. عاوزنى اطلع معقد .
ديفيد    :	لا لا يا شريف مالكش حق تقول على ابوك كده.
شريف   :	يعنى هو بقى اللى حق يتحكم فى كده .
ديفيد     :	بس هو أبوك و لازم تطاوعه..يا اخى طاوعه .
شريف   :	لا بقى أنا استحملت كتير،كفاية انى ساكتله ده كله يا اخى .
ديفيد     :	( للوالد ) شاهد ياعمو ، انا ما لييش دعوه .( يضع الشريط بين ملابسه ثم يصعد ) .
شريف    :	( مازال ينظر للسلم ) هو بيكلم مين ده انا مش فاهم ( ينظر خلفه ) بابا؟
أ / أنور  :	اطلع فوق من غير ولا كلمه
شريف   :	استنى افهمك..اصله كان بيقولى ( يقاطعه )
أ / أنور  :	انا سمعت كل حاجه..اطلع فوق ( بحزم )
شريف   :	لا مسمعتش بس استنى .
أ / أنور  :	( يامر بعصبية ) فوق .
( يصعد السلم وخلفة ابوه، يدخل السكرتير وهو انسان عملى ، يظل يرفع المقاسات ويعاين المدخل والعدادات والسلم ويدون كل شئ فى الاوراق معة ) .
ايمن       :	(يقيس المدخل ثم يدون ) ثلاثة متر فى خمسة ونص بلاط عشرين فى عشرين ( ينظر للتابلوه ) ست عدادات ، ثلاثة منهم اصحابهم مش موجودين ( يدون وينظر للسلم ) . ارتفاع الدرابزين ثامنين سم .. اثنا عشر سلمة كل لفه ، ( يدون ثم يعود للتابلوه ) عدد واحد دراجة مركونة تحت التابلوه .. ( يدون ، ثم ينظر للباب الخارجى ويحاول ان يقيسه . يدخل البواب ويقف خلفه مراقبا ) وبعدين .. يتقاس ازاى ده ( ينط ليركب  شريط المقياس فيفشل لان الباب عاليا ، مازال معطيا ظهره للبواب ثم يعتدل فيراه ، يتجه نحوه فى الية مخاطباً نفسه ) ايه ده عدد واحد بنى آدم واقف فى المدخل( يدون )
عطية     :	به انت بتعمل إيه ؟
ايمن      :	( لنفسه ) كتبت الجمله الاخيره غلط ( يكتب مصححا وهو ينطق على مهله ) عدد واحد بنى آدم .. بيتكلم .. واقف فى المدخل .
عطية      :	( بعصبيه ) اه اللهم طولك يا روح انى قلت انت بتعمل ايه اهنه  .
ايمن       :	( يشطب ويصحح ) عدد واحد بنى آدم مشاغب واقف فى المدخل ( لعطيه ) ثانية بعد اذنك ( يخرج المقياس ويقيس البواب ويدون ) 160 فى 40 سم اللون اسمر ، فرزه عاشرة ،  الموديل بواب .
عطيه     :	( يجرب طريقة اخرى ) اه كنت عايز اسألك سؤال ؟
ايمن      :	س:  انت بتعمل ايه ؟ ج:  انا باخد بيانات ... س: وانت مين علشان تاخد بيانات ؟ ج: انا سكرتير صاحب العماره .. س:و انتوا هاتعملوا ايه بعد كده ؟ ج : انا جاى احذركم علشان العماره دي ايله للسقوط وهاتقع فى خلال كام يوم لو مترممتش
عطية      :	( لا يفهم حرف ) به به ياسنه كوبيا .. كل ده .. انا مقدرش اسكت على الكلام ده .. انت هتخرب العماره .. يا  استاذ انور ، يا استاذ انور ( يصعد السلم مندفعا ) ( يستمر ايمن فى اخذ البيانات ويدون ، ينزل ا/ انور وعطيه ويراقباه ) .
ايمن       :	( يشطب ويصحح ) عدد 2 بنى آدم واقفين فى المدخل .. ماتثبوا بقى .
أ / أنور    :	س:
ايمن       :	يووه .. س : ج ، س : ج ، س :ج  مش هانخلص . لكن انا خلصت ومستعجل وعاوز امشى .. بعد ازنكم ( يخرج من الباب )
عطيه      :	( بغباء ) يعنى ايه يابيه ؟
أ / أنور   :	انت هاتقف تحكى معايا .. يللا اجتماع مجلس سكان العمارة بسرعة .
عطية     :	( مازال واقفا ) سكان عمارة مفيش غير حضرتك وابنك ، والمدام وبناتها .. وديفيد اللى ساكن فقيكم بتاع الجامعة .. والباقيين مسافري.
أ / أنور   : عطية      : أ / أنور   :       عطية    :	هاتهملى حالا .. إجرى . فين هنا يا بيه و لا فى شقة حضرتك .  لا شقة ايه مفيش وقت . روح كده استسمحهم هه ..مش خبط لزك كده و اندهم ( من عند السلم ) يا عطية يا عطية انت يا عطية ( من الداخل ) ايوه يابيه اه نازل اعمل ايه بقىياه ه ه.......
( يقف غاضبا بينما يصعد عطية مسرعا ويحضرهم ، ويجلسون جميعا على الكنبة  ويقف امامهم أ / أنور كانه محاضر ) .
ديفيد     :	افندم ؟!
أ / أنور  :	معلش يا جماعة انا جمعتكم هنا مش فى الشقة زى كل مرة لكن الموضوع ضيق و مش محتاج اى شكليات ، أحنا مستعجلين ندخل فى الموضوع على طول ....طبعا مفيش احساس بالمسؤلية عند حاضراتكم .. لكن لازم نناقش وناخد ارائكم بصفتكم مجلس سكان العمارة .. صاحب العماره مش سائل فينا .. ولما عبرنا ، بعت يهد العماره  ( يدخل مخلص بهدوء ويجلس وسطهم ) .
مخلص   :	بعد اذنكم . ( يجلس ) .
أ / أنور :	الله .. انت ايه اللى جابك تانى ؟
مخلص   :	متخافش مش هتسمعوا صوتى .
أ / أنور  :	( محذرا ) لو عملت شغب هاخلى البواب يطردك ، نرجع لللى كنا بنقولة ، صاحب العمارة بعت يهدها.
مخلص  :	( يرفع يديه ) ممكن اتكلم .
شريف  :	( لمخلص ) انت كدة على طول عايز تتكلم ، عايز تتكلم ، انت مابتزهقش من الكلام  .
أ / أنور  :	شريف ، اسكت .
شريف   :	الله ، مش حضرتك قلت نتناقش .
أ / أنور  :	نتناقش يعنى تسمعونى ، اخد رايكم يعنى توافقوا على بالكلام اللى انا باقوله ،  دلوقتى كل واحد فيكم هياخد ورقه ، ( يخرج ورق ويوزعه ) وتصوتوا كلكم بالموافقه
ديفيد     :	هو ياعمو .. ( يقاطعه ) .
أ / أنور  :	صوت بسرعة من غير كلام .. وصوتوا كلكم بالموافقه .
الأم        :	( فجأه ) يالهوى .. يابنى خلصنى انا مش فاضية عريس بنتى زمانه جاى ، هاستناه على السلم يعنى .
أ / أنور   :	يامدام لما العمارة تتهد مش هاتعرفى تجوزى بنتك ، صوتى يللا .
الام       :	يالهوى يالهوى .
أ / أنور  :	يامدام صوتى على الورق ( للاخرين ) وعلشان خاطر مشاكلكم اللى قلتوهالى قررت ابعت باسمكم وبمطالبكم شكوى لصاحب العمارة .
( يدخل السكرتير وينصت بهدوء )
عطية      :	( كانه يشير لمتهم  ) اه هو ده يا بيه .. هو ده  اس المشاكل كلها .
أ / أنور   :	مين ( ينظر فيجد السكرتير ) اتفضل بقى ، اشرح موقفك للسكان .
ايمن      :	( مازال يكلمه ولا ينظر للسكان ) موقف ايه ؟ انا معنديش كلام اقوله .
عطيه     :	يه .. امال ايه  اللى كنت عتكتبة فى الورق ده
ايمن      :	( يلتفت اليه ) انا كنت بكتب حسب .. ( ثم فجاة ) ..ايه ده ؟.. هو حضرتك هنا .
مخلص   :	( يشير لايمن ) ممكن حضرتك تكمل كلامك .
ايمن      :	( مازال مشتتا ) آه عايزنى اكمل .. حاضر .
أ / أنور   :	( لمخلص ) وبعدين ، مش قلنا تسكت خالص. ( لايمن ) كمل .
ايمن        :	( بدهشه ) وبعدين .. أ .. آه وبعدين .. صاحب العمارة كان عارف كل اللى انتوا عايزينه .
الام        :	وايه الفايده يابنى وهو هايهد العمارة .
ايمن       :	ياستى مش هايهدها ، بالعكس .. ده حتى بعت لكم ابنه علشان يشوف طلباتكم ويصلح كل اللى باظ .
شريف    :	ابنه ؟!
لوسى     :	ابن مين ؟ انا مش فاهمة حاجة .
ديفيد      :	بيقول قال ابن صاحب العماره ، ( لايمن ) ازاى ؟
عطيه      :	بص الكلام ده محصلش .
أ /أنور    :	حد ياجماعه شاف ابن صاحب العماره هنا ؟
ديفيد      :	انا مشفتوش ، انا شفت الشريط بس .
شريف     :	و انا كنت بذاكر .
الأم        :	اشوفه ازاى وانا مستنية عريس بنتى النهارده .
عطية      :	ده محصلش .
أ /أنور     :	شفت ، اهوه كلهم شهدوا عليك .
ايمن       :	بالعكس هو اللى هيشد عليكم كلكم .. كلكم شفتوه .. كلكم كلمتوه .. انما ولا واحد اهتم بيه .. ولا واحد عطاه فرصة ، ايه رايكم ؟
ديفيد      :	ياعم قلنا محصلش .
أ/ أنور    :	استنوا .. استنوا .. ( يفكر ) اوعى يكون هو اللى .. ( ينظر لمخلص ) .. مش ممكن تكون انت ؟!
ايمن        :	للاسف ، هو فعلا ( لمخلص ) .. ، اتفضل ياستاذ مخلص.
( يقوم مخلص بتوسط المسرح ويلتفون كلهم حوله )
شريف     :	بقى هو انت ..
أ /أنور     :	اللى محدش فينا عبره .
ديفيد       :	اللى محدش فينا وقف يسمعله .
شريف     :	كلنا سبناه ومشينا .
الام        :	ايوه ايوه وانا شفته .
عطية      :	اتاريه كان مستني حد نكلمه .
مخلص     :	انتوا كنتوا عايزنى ، و انا جيت لكم ..هاه وبعدين ايه اللى حصل ؟
لوسى      :	( بتفكير ) اللى حصل ..
مخلص    :	اللى حصل ( يتحرك ليقف خلف كل واحد يذكره ) ان  انت  كنت مشغول بمذاكرتك .. وديفيد كان وراه مشاويره ..  و ابوك ماكانش فاضى .. وحضرتك وبناتك مستنين العريس .. حتى عطيه ماكانش عارف دوره ايه .. والنتيجه اننا بنلوم صاحب العمارة على السكوت .. وبنلوم ابنه على الكلام .
عطية     :	وى  وى وى.
أ /أنور    :	احنا مسمعناش .. وبعدين كنا مشغولين .
الام        :	يعنى يابنى يرضيك .. البنت عندها 25 سنة ، فضلت استنى عريس ليها .. وبرضه مجاش .
مخلص    :	دى المشكلة ..دايماً مشغولين .. دايما بندور على حاجة او على حد .. تفتكروا لو العمارة وقعت عليكم وانتوا مشغولين .. كنتوا هتكسبوا ايه لما تخسروا حياتكم ؟!انتوا مش اقدرين ليه تفهموا انا كنت هتكلم ، لكن محدش كان عايز يسمع .
ديفيد      :	صحيح ، محدش فينا سمعه .
نجاح      :	اكيد دى كانت غلطتنا .
مخلص    :	لو كنتوا عرفتوا ايه اهم حاجه بالنسبالكم ، كنتوا عرفتوا ايه اللى كان لازم تعملوه ، وفى وقت ما كنتوا مشغولين كانت بالظبط الحاجة اللى انتوا عايزنها مستنياكم تفضوا .
نجاح      :	احنا آسفين .. آسفين على الجهل .
أ /أنور    :	آسفين على الانشغال ، على الاستهتار .
شريف    :	احنا فعلاً كنا غلطانين اننا مستقبلناكش ، مسبنالكش  فرصة تتصرف .
مخلص    :	كفاية انكم عرفتوا الغلط ..تعالوا نبدا بالتصليح ، وخلوا بالكم انا مش جاى اهد ، انا جاى ارمم
أ /أنور    :	كده كويس ، انا كده فهمت .
مخلص    :	كان لازم تفهم من الاول .. انى انا جاى اكمل
لوسى     :	وهاتصلح كل حاجة ، هاتقدر ؟
مخلص    :	هانقدر وهانصلح كل حاجه ( يشير اشاره جماعيه ) هانصلح مع بعض كلنا .
الام        :	دا انت بالك طويل .
مخلص    :	وايه المانع ، وواحدة واحدة هنصلح كل حاجه ، حتى اوضه عطية هانصلحها .
عطية     :	الله يخليك يامير .
مخلص    :	ده حقك .. لكن لازم تعرفوا ان انا عليا دور ، وانتوا كمان برضه هاتشتغلوا ، و خدوا بالكم لازم ما نرجعش لورا نطلع لقدام ، يعنى نصلح منبوظش .
نجاح     :	( بجدية ) ازاى ؟
مخلص   :	يعنى نخلى بالنا من الماسورة الجديده اللى هنركبها ، اللى بيدبدب على السلالم بيكسرها .. اللى بيشغل الموتور طول اليوم من غير لازمة بيعطله ، لازم نحافظ على المستوى اللى هانوصله .
أ /أنور    :	ادينا معاك .. تحت امرك .
نجاح      :	بس متسبناش .
مخلص    :	ولا لحظه .
عطية     :	( باستفهام ) يعنى هنعمل ايه دلوقت ؟
شريف   :	ييه .
ديفيد     :	ياعم افهم علشان نخلص .
مخلص   :	استنوا .. من حقه  يفهم على مهله ، لان كل واحد ليه دور  معانا  وليه شغله .. احنا ياعطية هانرمم العمارة من جديد كلها .
عطية     :	اه ايوه اكده فهمت.
مخلص   :	وهانبدأ بفوق ، هانطلع نشوف محتاجين نعمل ايه .
نجاح     :	احنا كلنا معاك .
مخلص   :	يلا بينا .( يصعد على السلم البواب و استاذ انور و شريف)
ديفيد    :	طب وانا مالى .. هى مش عمارتهم .. انا مغترب .. انا مالى .. لما اروح اشوف مشاويرى . ( يفتح العجلة ) .

مخلص  :	ديفيد ( ينظر اليه ديفيد ثم يخرج )
الام      :	يللا احنا يا بنتى نروح نسال عن العريس عند خالتك
لوسي   :	احنا اللى هنسأل ياماما.
مخلص  :	طب و الشغل اللى مستنينا فوق
الام      :	اعمل ايه انا ؟مش شايف انى مشغولة ( يرجع مخلص حزين ) .
نجاح    :	يعنى نقوله الناس اللى انت جاى علشانهم مش عايزينك
الام      :	احنا كده اتأخرنا يللايا بنتى .
لوسى   :	برضه يا ماما  .
الام      :	اسمعى كلامى انا عايزه مصلحتك.
لوسى   :	لما نشوف . ( تخرج الام ولوسى ..تنظر نجاح الى امها فى حسره..يسود المسرح الظلام و تسطع البؤرة )
نجاح    :	ماما مشيت ..سابتنى ومشيت..لأسابته ومشيت علشان ايه ؟ مشغولة .. هو حذرنا اننا نكون مشغولين ماعندناش تميز..مش عارفين ايه المهم و ايه اللى مالهوش لازمة طب و بعدين.
( يقف مخلص على السلو فى الظلام ويأيتها صوته )
مخلص  :	نجاح..
نجاح    :	( ترتبك ثم تنظر له ) أيوه
( اثناء تبادل الحوار تنتقل البؤرة فيما بينهما كل فى جملته)
مخلص  :	يعنى مطلعتيش  .
نجاح    :	انا طالعة بس همه .. همه مشيوا.
مخلص  :	( بالم ) عارف  .
نجاح    :	يعنى.. يعنى كده خلاص.
مخلص  :	( مستدركاً ) لأ.
نجاح    :	ازاى ؟.
مخلص  :	الحكاية ما بتخلصش لما الواحد بيتوه ..لسه ممكن يرجع ..لسه الميت ممكن يعيش ..لسه التايه ممكن يتلاقى .
نجاح    :	و بعد ايه ؟ ما خلاص .. سابوا مكانهم  .
مخلص  :	مكانهم لسه موجود ، أمال انا باعمل ايه ؟
نجاح    :	يعنى انت مش هاتمنعهم لو راجعوا ؟
مخلص  :	بالعكس ، مكانهم جاهز و مستنيهم ، كلنا مستنينهم
نجاح   :	( غير متاكدة ) ومش هاتبقى زعلان .
مخلص  :	مستحيل .. انا مستنيهم علشان تكتمل فرحتى.
نجاح    :	يبقى لازم نجهز مكانهم معانا ، ( تفكر) طيب ممكن ارجع ابص عليهم .
مخلص  :	لأ اللى يحط ايده على المحرات ، ما يببصش وراه لكن تعالى نجهز مكانهم ، وبعد مانجهزه نستناهم ..كلنا ها نستناهم يانجاح  ( يمد لها يده )
نجاح    :	حاضلر هاطلع ..بس انا متكلة على الوعد ( تمد يدها له )
يهز لها رأسه بالموافقة بهدوء ، تصعد ببطء ،يغلق الستار عندما تجمعهما البؤرة معاً

 

                                        (  ستار )

 لتنزيل الاسكتش للطباعة بصيغة ال word

 أضغط هنا