اسكتش الملك يوشيا

 

اسكتش الملك يوشيا

التمهيد:ناس بيجروا وطوب بيقع من كل حته وتدخل المذيعه ف النص وراها المصور

-المذيعه:اهلا بيكم مباشرة من مدينه.........لألألأ استنى كده وقف التصوير ده انا شعرى مش مظبوط...انا مش هكمل

-المصور:شعرك ايه دلوقتى احنا ع الهوا

-المذيعه:ايه ده هوا؟يعنى انا طايرة؟ بس انا حاسه انى ع الارض عادى وبعدين حتى الجو حر اوى مفيش نسمه هوا خالص

-المصور:هو ااه الجو حر بس لوسمحتى ممكن تخلصى

-المذيعه: طب انا ظبطت شعرى اهو يلا ابدأ

المصور:يلا اكشن

-المذيعه:اهلا بيكم معانا انهارده مباشرة من مدينه اورشليم..طبعا زى مانتم شايفين البلد كلها ملخبطه وكلها تكسير وطوب كتير...والان مع احد العمال عشان يقولنا ايه اصل الحكايه

______________________

-المذيعه:لوسمحت كما عايزين نعرف ايه ال بيحصل عندكوا ف البلد بالظبط

-العامل: ايه ده انتى مين؟

-المذيعه:ايه ده انت مش عارفنى؟ انا مذيعه مشهورة م التلفزيون هو مش باين عليا ولا ايه؟

-العامل: ايه ده يعنى انا دلوقتى طالع ف التلفزيون؟ اعزاااااااااااااااااات

-المذيعه:يوووووووه هو مفيش حد هنا نروحله؟ اولالا انا كده هتبهدل مش معقول الحر ده والطوب بالمنظر ده

-المصور:طب خلاص يلا بينا تعالى نروح للملك بتاع اورشليم الملك يوشيا ونفهم منه ال بيحصل (ويروحوا)

_______________________

-المذيعه:مولاى الملك يوشيا

-يوشيا:ايوة حضرتك مين؟

-المذيعه: ايه ده انت يوشيا؟ روح ياحبيبى اندهلى الملك ورانا شغل

-يوشيا:ههههههه انا يوشيا الملك معلش انا صغير شويه انا عندى 12 سنه

-المذيعه:12سنه؟ اما انت دلوقتى 12 سنه امال مسكت الحكم وانت كام سنه؟

-يوشيا:انا مسكت الحكم وانا 8 سنين وكنت بعيط ومش عارف اعمل ايه وكان كل البلد تماثيل والناس بتعبد الاصنام والحجارة وسايبين ربنا وانا بحب ربنا اوى

-المذيعه:طب وعملت ايه بعد كده؟

-يوشيا:كنت بساعد الناس لغايه ماكبرت شويه واصدرت قرار انى اهد كل التماثيل الموجوده وكل معابد الاصنام ف كل اورشليم ونبنى هيكل كبير نعهبد فيه ربنا بس

-المذيعه:شكرا ياملك يوشيا

-يوشيا:احنا دلوقتى هنبدا نبنى الهيكل ممكن تيجى تشوفى العمال وهم بيبنوا

_____________________________

(يوشيا يقوم الولاد يبنوا ويلعبوا شويه)

-المذيعه:ودلوقتى احنا شايفين العمال وهم بعد ماهدوا التماثيل وبيبنوا الهيكل

(يجى حلقيا بسرعه ف النص ف ايده الكتاب يقعد الولاد ويوقف البنا)

-المذيعه: حلقيا حلقيا انت وقفت البنا ليه فى ايه وليه بتجرى كده ممكن تعرفنا؟

-حلقيا:لالا مش ممكن دلوقتى خالص انا لازم اروح للملك بسرعه حالا دلوقتى

-المذيعه:يلا بينا بسرعه ع الملك

__________________

-حلقيا:مولاى الملك يوشيا

-يوشيا:ايه ياحلقيا فى ايه

-حلقيا: العمال وهم بيبنوا لقوا الكتاب ده ولما فتحناه لقناه سفر الشريعه يعنى كلام ربنا

-يوشيا:كلام ربنا؟لازم نعرف جواه ايه عشان نعرف كلام ربنا وننفذه

-حلقيا:خلده النبيه هى احسن واحده تقدر تفسرلنا ال مكتوب فيه

-المذيعه:وزى ماشفنا اد ايه يوشيا بيحب ربنا وبيسمع كلامه غشان كده اول مالقى سفر الشريعه اهتم بيه علطول ودور على حد عشان يفسرهوله وينفذ كلام ربنا ...اد ايه يوشيا ده حلو اوى

__________________

-المصور:هو احنا هنروح فين دلوقتى؟

-المذيعه: صحيح نسيت اقول للناس احنا هنغمل ايه

-المصور:يعنى اعمل ايه انا دلوقتى ...اجى اشتغل مكانك يعنى

-المذيعه:طب شعرى كويس طيب انا حاسه انه اتبهدل وبقى كله تراب

-المصور:لالالا انتى حلوة كده ....ممكن يلا بقى ابوس اديكى انا تعبت

-المذيعه:والان هنكون عند خلده النبيه عشان نعرف مع بعض ربنا كاتب ايه ف سفر الشريعه

_____________________

-حلقيا: ياخلده ياخلده

-خلده:مين بينده عليا؟

-حلقيا:انا حلقيا يا خلده وكنت عاوزك تفسريلنا كلام ربنا ال مكتوب هنا ف سفر الشريعه

-خلده:حاضر بس ممكن تدهولى اقراه؟(تاخده تبص فيه شويه)

-خلده:ممممممم ربنا زعلان اوى من شعب اورشليم لانهم سابوه وبقوا يعبدوا الاصنام والتماثيل وهيصنع شر ف اورشليم لان الشعب ده وحش ومش هيتغير ابدا بعد كده

-المذيعه: ايه ده مش معقول؟ احنا لازم نمشى من هنا بسرعه

-خلده:لالالا استنى هو مش هيصنع الشر ده دلوقتى هو هيعمله لما يوشيا يموت لان يوشيا ده ملك حلو اوى بيحب ربنا وبيسمع كلامه

-المذيعه:طب كويس انا كنت خايفه جمالى وشعرى ولبسى الحلو ده يبوظ ولا حاجه كنت هعيط خالص

-المصور:شعر ايه بس ولبس ايه دلوقتى..ممكن تخلصى البرنامج ده بقى

-المذيعه: ودلوقتى شفنا وعرفنا اد ايه ربنا زعلان من شعب اورشليم لكن عشان يوشيا حلو بيسمع كلالم ربنا وربنا بيحبه اوى مش هيعمل الشر ده غير لما يوشيا يموت لكن الشعب ده وحش ولا عمره هيكون حلو....واستنونا ف حلقه تانيه ف مكان جديد..بااااااى

_____________________

-المصور:اخيرا ياشيخه خلصتى انتى زهقتينى ..كل شويه شعرى شعرى ولبسى لبسى...وكمان مش عارفه يعنى ايه هوا انا هسيب الشغلانه دى خالص (ويطلع يجرى على بره)

-المذيعه:ليه بس استنى ...انت رايح فين (وتجرى وراه)

_________________________

ملاحظات صغنونه: المذيعه هتكون لبسها واسع عليها خالص ومش مرتب مع بعضه وشعرها اصلا منكوش مش حلو

العامل هيكون اهبل شويه وفرحان انه ف التلفزيون

المصور زهقان ومش طايق المذيعه

اول مشهد هيكون الطوب بيقع وبيتحدف والمذيعه ف النص

 لتنزيل الاسكتش للطباعة بصيغة ال word

 أضغط هنا