اسكتش زغلول في ليماسول

 

اسكتش زغلول في ليماسول

صوت من الخارج

زغلول :: بقولك هنعاود يعني هنعاود

فوزية :: في حد يسيب البلد الحلوه دي ويرجع مصر ( ثم يدخلوا المسرح )

زغلول :: احنا لو فضلنا هنا هنخسر ابديتنا يا فوزية

فوزية :: يا زغلول اعقل يا زغلول ده احنا مكملناش شهرين والبلد زي الفل مالها بس؟؟

زغلول :: دي مش بلد عادية دي سدوم وعموره يافوزيه . عارفه يعني ايه سدوم وعموره؟؟

فوزيه :: سدوم وعموره ايه بس انت اللي مكبر الموضوع يا زغلول.

زغلول :: اني اللي مكبر الموضوع يا فوزية ليه مافيكيش عنين ولا ايه ؟ ولا يمكن نظرك ضعف..

فوزيه :: ماتقولش كده ياراجل دانا نظري 6 علي 6 .

زغلول :: امال ايه ماشوفتيش الستات لابسين ايه علي البحر؟

فوزيه :: لابسين ايه يعني؟

زغلول :: لابسين ايه؟ المشكله انهم مش لابسين ده اندر وير يافوزيه.

فوزيه :: هي دي الموضه يا زغلول .دي مايوهات بكيني …

زغلول :: بكيني ولا تبكيني احنا ملناش قعاد في البلد المسخره دي…

فوزيه :: بقي ده اسمه كلام نسيب البلد عشان الستات لبسين بكيني علي البحر..

زغلول :: ياريت علي البحر بس كنا قاطعناه ده في كل حته يافوزيه في المحلات والشوارع اللي لابسه محزء واللي لابسه ملزء  واللي مش لابسه خالص دول مش هيعرضو علي جنه ابدا…

فوزية :: بسيطه يا زغلول ماتبصيش عليهم .

زغلول :: يعني ايه اغمي عنيه ولا اقلعهم ؟ الحل الوحيد ان احنا نرجع مصر.

فوزيه :: يازغلول اعقل يازغلول بعد ما بيعنا كل حاجه في مصر عايزنا نرجع تاني

زغلول :: مش احسن مانروح جهنم.؟

فوزيه :: ماهي مصر جهنم برضو يازغلول انت مش شايف اللي حاصل كل يوم يحرقوا كنيسه ويقتلوا الشباب ويخطفوا البنات . هو احنا سيبناها من قليل ؟

زغلول :: اني قولت هنرجع يعني هنرجع اني كلمتي ما تنزلش الارض ابدا

فوزيه :: واني قلت مش هنرجع يعني مش هنرجع.

زغلول :: فوزيه ( بتحدي ) .

فوزيه :: زغلول ( في تحدي ايضا) .

محروس :: بابا بابا ( يدخل مسرعا في حالة فزع) الحق يا بابا.

زغلول :: في ايه يا محروس ؟

محروس :: السلفيين حرقوا كنيسه في امبابه..

فوزيه :: افتح التلفزيون بسرعة يا زغلول( يفتح وهو يقول)

زغلول :: استرها يارب ( يظهر علي شاشة البروجيكتور الفيديو الخاص بالحدث ثم)

فوزيه :: شوفت يازغلول اللي بيحصل وماحدش عارف بكره هيعملوا ايه تاني.

محروس :: ده حرام احنا عملنالهم ايه بس؟؟

زغلول :: منهم لله ربنا يتصرف فيهم الظلمه ..

فوزية :: احمي ولادك يارب  داحنا ملناش غيرك.

زغلول :: بقول ايه يا فوزيه احنا نأجل موضوع رجوعنا مصر شويه..

محروس :: ايه ده يا ماما احنا هنسيب قبرص ؟؟؟

فوزيه :: لا يا حبيبي ماتخفش هنسيبها ونروح فين بس ..( يدق الباب).

زغلول :: شوف مين يا محروس ( يفتح محروس الباب فيدخل فادي)

فادي :: هاي محروس اذيك .

محروس :: اهلا يا فادي اتفضل (يدخل فادي ثم يقول ) .

فادي :: هاي يا جماعة .اذيك يا طانت اذيك يا انكل .

زغلول :: اهلا وسهلا اهلا.

فادي :: امال فين زكية غابت النهارده  من المدرسه وقافله الموبيل انا جاي اطمن عليه.

فوزيه :: اهلا وسهلا انتي صحبتها في المدرسة ؟؟

محروس :: صحبتها ايه يا ماما فادي ولد مش بنت .

زغلول :: ولد!!!

فادي :: هي اكيد جوه انا هدخلها(يسحبه زغلول من يده ويقول)

زغلول :: تدخل لمين ياد انت ياد؟ انت عبيط ولا بتستعبط..

فادي :: حاسب يا انكل ايدي .. يا زكيه الحقيني ( تدخل زكيه )

زكيه :: هاي فادي اذيك..

زغلول :: اذيك!!! يطلع مين سي فادي ده يابت انطقي..

زكية :: ده البوي فريند بتاعي يا بابا ..

فوزيه :: بوبي ده مش محصل عرسة ..

زغلول :: بوبي ايه يا بت ما تفهميني .؟؟؟

زكية :: ده صحبي الأنتيم .

فوزيه :: يتيم يا عيني يا ابني ..

محروس :: يتيم ايه يا ماما فادي باباه ومامته عايشين .

زغلول :: عايشين ولا ميتين احنا عندنا بنات بتصاحب صبيان ياسي محروس.

فادي :: وفيها ايه يا انكل ماهو محروس مصاحب جاسيكا اختي..وبيخرجوا مع بعض..

زغلول :: يا فرحت امك بيك ومش مكسوف وانت بتقولها ..؟؟؟

فوزيه :: الكلام ده صحيح يا محروس  ؟؟؟

زكية :: وفيها ايه يا ماما ماهو كله هنا كده لازم محروس يبقي ليه جيرل فريند…

(تذهب زكية وتمسك ايد فادي وتقول له)

هاي فوفا وحشتني قوي.

فادي :: انتي اكتر يا زوزا  .

زغلول :: زوزا و فوفا يسلام علي الخفة .الواد ده لو ممشيش دالوقت انا هرتكب جناية ( ويمسك فادي من رقبته ليخنقه ) .

فادي :: الحقيني يا زكية .

زكيه :: سيبه يا بابا حرام عليك.

فوزيه :: الواد هيموت في ايدك يا زغلول حوش يا محروس.

محروس :: ( يجذب فادي بعيد ويقول) امشي يا فادي دالوقت ارجوك.

فادي :: انا سيبته عشان خاطرك انتي يا زوزا.

زغلول :: اجري يا ابن ال....(يجري فادي مسرعا للخارج )  .

زكية :: يوه بقي دي مش عيشه دي ( وتدخل الي حجرتها ) .

زغلول :: عاجبك اللي بيحصل يا ست هانم . احنا ملناش عيشه في البلد دي هنعاود يعني هنعاود . انا كلمتي ما تنزلش الأرض ابدا .

فوزية :: واني قلت مش هنرجع مصر يعني مش هنرجع .

زغلول :: فوزيه (بتحدي) .

فوزيه :: زغلول ( بتحدي ايضا ) .

محروس :: يا بابا هنا غير مصر خالص لازم الولد يبقي ليه جيرل فريند والبنت بوي فريند اصحاب يعني .

زغلول :: غلط البلد هنا غلط. ده مايرضيش ربنا ابدا . ناس ماشيا من غير هدوم وبنات بتصاحب صبيان ناقص ايه تاني الرحمه من عندك يارب الرحمه من عندك يارب.

فوزيه :: هدي نفسك يا خويا لا يجرالك حاجه . اجري يا محروس اعمل كوباية لمون لأبوك بسرعة.( يسرع محروس للداخل ) .

زغلول :: عاجبك كده يا فوزيه العيال هيروحوا من ايدينا احنا نلم حالنا وننزل علي مصر طوالي.

فوزية :: طيب بلاش كلام في الموضوع ده دالوقتي يا خويا( يرن جرس الباب)ايوه مين ؟؟ حاضر جايه اهو(.وتذهب لتفتح الباب فتدخل جارتهم اللبنانية وهي امرأة جميله جدا)

هيفاء :: صباح الخير انا هيفا.

فوزيه :: ( بتعجب ) باين ياختي باين ده مافيش هيافه اكتر من كده.

هيفاء :: ميرسي يا روحي.

زغلول :: ( يبحلق في هيفاء مأخوذا من جمالها) ياسلام روحي طالعه من بوقها زي العسل .

فوزيه :: مالك يا راجل فوقت كده يعني اول ما دخلت ده انت كنت هتموت من شويه.

زغلول :: ما اعرفش يا فوزيه زي مايكون روحي ردت فيا..

فوزيه :: يا شيخ طلعت روحك سك علي اللمون يا واد يا محروس .

هيفاء :: سوري يا جماعة البلوزه بتعتي وقعت في البلكونه عندكم ممكن اخدها؟؟

زغلول :: ياسلام... طبعا ممكن داحنا نطلعهالك لحد فوق كمان.

فوزيه :: ( بغيظ شديد) وايه ياختي اللي وقع البلوزه عندنا؟؟

هيفاء :: الهوا الهوا يا حبيبتي..

زغلول :: ياسلام عليك يا هوا ومالو خليه يوقع اللي هو عايزه.

فوزيه :: ما تتلم يازغلول وخلي يومك يعدي علي خير. وانتي يا شابه اطلعي شقتك وانا هبعتهالك مع زكيه.

زغلول :: وليه نتعب زكيه انا هطلعها بنفسي.

هيفاء :: ميرسي كتير انت زوق خالص.

فوزيه :: وانتي ياختي اخر هيافه.. ياللي بقي كده من غير مطرود والبلوز هنبعتهالك ( وتدفعها للخارج) .

هيفاء :: باي مستر زغلول .( وتخرج) .

زغلول :: باي باي يا قشطه.

فوزيه :: جري ايه يا راجل يعني من ساعت ما دخلت بسلامتها وانت مش منزل عينك من عليها.

زغلول :: انتي بتغيري يا فوزيه.

فوزيه :: بغير ايه بلا نيله . احنا ما لناش قعاد في البلد دي هنعاود يعني هنعاود.

زغلول :: اني بقي غيرت رأيي ومش هسيب البلد دي خالص. ونشوف بقي كلمت مين اللي هتمشي .

فوزيه ::  زغلول  ( بتحدي).

زغلول :: فوزيه ( بتحدي ايضا).

فوزية :: يقطع فوزية وسنين فوزية ( وتخرج خارج المسرح ) .

زغلول :: ألف مره . أستني يابت رايحه فين انا بكلمك ؟ ( ويخرج وراءها ).

 لتنزيل الاسكتش للطباعة بصيغة ال word

 أضغط هنا