مسرحية الطابور
(تفتح الستار على طابور طويل يملاء المسرح. يتوسطهم عادل
الذي يبدو غير متاقلما على الطابور).
عادل: لو سمحت ، هو الطابور مش بيتحرك لية ؟
ع 2 : معلش هو بطيء شوية .
عادل: طب هو اخرة فين يعنى .
ع2 : اخرة الشباك طبعا .
عادل: طب هو لما اوصل الشباك هاعمل اية؟
ع2: لما توصل هاتعرف .
عادل: هو حضرتك ماعندكش اجابات مفيدة لاى اسئلة خالص؟
ع2: اعملك اية ، انت اللي مش واقف في طابور مش عارف واقف
لية ؟
عادل: معلش اصلي جديد هنا .
ع2: لا انت مش جديد ، انت معايا من زمان .
عادل: يا عم انت هتعرف اكتر منى ع العموم انا متعرفتش
بحضرتك، واضح اننا مطولين مع بعض .
ع2: انا عادل.
عادل: ياة، صدفة جميلة انا كمان اسمى عادل.
ع2: عارف .
عادل: عارف !! طيب .
(يتلفت حولة ويحادث شخص اخر)
عادل: هو الاستاذ اللي واقف اول الطابور مش بيخلص لية؟
ع3: انت مستعجل لية؟
عادل: اصلة راجل عجوز كد ومعطلنا كلنا .
ع3: طب انت عاوز توصل بدري لية؟
عادل: عاوز اطلع من الطابور دة علشان ارجع اكمل اللي
ورايا.
ع3: طب سبت الطابور لية لما انت مش عارف انت عاوز ايه م
الطابور دة ؟
عادل: ده اللي هيجنني .. انا مش فاكر جيت هنا امتي ولا
جيت ليه .
ع3: طيب بص يا ...
عادل (يقاطعه) اسمي عادل .
ع3: مانا عارف.
عادل: عارف برضة ، هي كل الناس هنا عارفاني ازاي ؟
ع4(يتدخل في الحديث): بص يا عادل كل اللي واقفين في
الطابور هنا اسمهم عادل .
عادل :ههههههه .. اول مرة اعرف انهم بيلموا اللي اسمهم
عادل .طب انا جيت معاكم لية؟
ع5: احنا اللي جايين معاك .
عادل: وانتو تعرفوني منين علشان تيجوا معايا ؟
ع6: انت حتي مش عارف اشكالنا ؟
عادل: انا ملاحظ انكم تشبهولي شويه
ع7: احنا مانشبهلكش .. احنا كلنا حضرتك .
عادل : نعم ، حضرتي ازاي يعني؟
ع4: شايف الست اللي اول الطابور دي ، الست الحامل الي
هناك ..
عادل : ايوه اديك قلت .. الست الحامل ، يعني صعب جدا
تكون انا
ع5: دي ولدتك وهي حامل فيك.
ع6: والطفل دا انت ، وانت صغير .
ع2: والعجوز اللي علي الشباك انت ، وانت في اخر حياتك
( يبدا
يلاحظ بالفعل انهم يشبهونه ويمثلون مراحا عمريه مختلفه )
عادل : طب انتم جيتولي ليه دلوقتي ؟
ع7: لاني ببساطه تصرفاتك واختياراتك هي اللي وقفتنا في
الطابور اللي مش عارفين نطلع منه دا .
عادل : مش فاهم برضوا ، بالراحه عليا شويه
ع5: انا هافهمك ... كل حاجه اتمنيتها وحبيت توصلها في
حياتك كلنا وقفنا في الطابور دا عشان
نجيبهالك
سواء كانت صح او غلط
عادل : بس مش انا لوحدي اللي عملتها ... مش كلكم نفس
الشخص ولا ايه ؟
ع7 : تمت بالظبط .. بس انت الحاضر دلوقتي يعني تصليح كل
حاجه في ايدك انت دلوقتي .
ع6 : واحنا جايين نحكيلك احنا شوفنا الاختيارات دي ازاي
في باقي مراحل حياتك وبتوصلنا ليه ؟
ع4 : عشان تعما حسابك ومتغلطش تاني وانت بتختار
عادل : تمام انا كدا فهمت اتفضلوا احكولي
ع3 : ايوه كدا نبدأ بقي
( فاصل مناسب )
ع2 : هنبدا بالصداقه ياعادل .
عادل : مالها الصداقه ياعادل ياصغير .
ع2 : فاكر كانت علاقتك باصحابك شكلها ايه في طفولتك ؟
عادل : تسمح تفكرني .
ع2 : حاضر
(
يتحولون الي اتوبيس رحله مدرسيه علي انغام اغنيه اطفال )
ع2 ( كزميله الطفل ) : تاخد سندوتش حلاوه وتجيب سندوتش
جبنه
الولد : لا يعم انا مش بحب الحلاوه .
ع2 : هديك مياه من الزمزميه بتاعتي .. الميه بتاعتي
ساقعه .
الولد : ماشي بس اشرب براحتي .
ع2 : ايوه طبعا
(
يبدلان السندوتشات .. عادل ياكل سندوتشه مسرعا )
الولد : هات الزمزميه بقي .
ع2 : خد اهه .
الولد : بس دي فاضه .!
ع2 : اوبا .. معلش يبقي انا نسيت املاها اديك بقي لما
ننزل
الولد : بتضحك عليا طب انا هاوريك
(
يتشاجران بينما يبتعد عادل عنهم )
عادل : كانت جميله الايام دي كل علاقاتي باصحابي كانت
مقالب
ع3 : بس علاقتك باصحابك اتطورت شويه في اعداي
( ياتي
اليه مجموعه من زملاء اعداي )
ز1 : هاتيجي معايه الخناقه ولا هاتخلع .
ع3 : عيب عليك انا بخلع برضوا .
ز2 : عارف دول كتار ولو استفردوا بيك لوحدك هايموتوك
ع3 : معاكم طبعا .
ز3 : اشطه .. يبقي بعد المدرسه نوريهم
ع3 : اكيد
( يتركهم
ويذهب الي المجموعه الاخري )
ع3 : العيال عاوزين يتخانقوا معاكم وانا قولتلهم لا مليش
دعوه انا بقي
عادل : هو انا قعدت طول عمري كدا اعمل مصايب لاصحابي ؟
ع3 : انت بتسالني انا
عادل : بس انا لما بقيت في ثانوي كنت اعقل من كدا .
ع4 : اه اعقل ... اعقل جدا .. ياخرابي علي العقل .
صديق 1 : مش هاتتصور ياعادل
ع4 : طبعا هاتصور .
صديق 2 : طب ياله ياجماعه ، انستاهبل
( كادر يعبر عن الموقف )
الاصدقاء: كليك
صديق2: انستا امتحانات
الاصدقاء: كليك
صديق3: انستاباربيكو (يهجمون ع الاكل )
ع4: محدش قال كليك
صديق3: يا عم احنا ف لية ولا اية. الاكل هيخلص.
صديق5: انستا نوم.
الاصدقاء : ك... ل.... ي....ك .
عادل: كنا بنموت ف الصور ، كل علاقتى باصدقائي كان ممكن
تحكيها كارت مميوري كبير.
ع7: اهو دي الحاجة الوحيدة اللي قعتدلى من صحابك ،صورهم!
عادل: بس انا علاقتى باصحابي اتطورت خالص بعد التخرج ،
بتدينا نبص للحياة بشكل مختلف .. الحياة الجميلة اللي اتعملت علشان نلعب ونفرح
فيها ، الحياة اللي كل تفاصيلها اتعملت علشان احنا نضحك ..طلعت بتخبي مننا وش تاني
، عمالة تاجل مقابلتنا بية سنة ورا سنة من عمرنا ، وهى مش قلقانة علشان عارفة ان
اليوم دة لازم يجي ..ساعتها هتضحك برضة ن بس هنضحك على ضحكنا معاها زمان واحنا مش
عارفين اية اللي كانت مخبياهولنا .
ع2: ايوة يعني طلعت اية؟
عادل: الحياة طلعت ماتش ياعادل يا صغير ، ماتش ماينفعش
ينتهى بالتعادل ..او طلعت معركة لتنتصر فيها لتموت.
(يدخل اصدقاءه في ملابس الحرب )
صديق1: ونحن
جاهزون تماما للقتال.
صديق2: فهل نبدا الان
عادل: لقد بدا يا اصدقائى بالفعل.
( صوت
خيول ، دبابات ، رصاص ، أي شئ يوحى بالمعركة)
(يتحامون في بعض وكل منهم يخشى التقدم)
عادل: اثبتوا امال مش كدة !
صديق1: الدنيا اتغيرت قوي يا عادل
عادل: عندي ليكم خبر هيشجعكم قوي.
صديق2: خير؟
عادل: المصاصة لا تزال في جيبي.
(يخرجون جميعهم المصاصات ويتصرفون كالاطفال)
عادل: مهما كانت الدنيا صعبة هيهونوها عليك.
ع6: اول ما تتجوز بقي هتكتشف فايدة لاصحابك مكنتش تفكر
فيها قبل كدة
عادل: اية؟
ع6: اقولك
(زفة فرح، يدخل ع6 مع العروسة ، وياتى اصدقائهم للتهنئة)
1:ا لف مبروك يا عادل
(يعطية
ظرف ويخرج )
2: الف مبروك يا عريس
(يعطية ظرف اخر )
3: الف مبروك يا حبيبتي
(بتبوسها)
ع6: معتطكيش حاجة
العروسة: لا
(يستمر
الاصدقاء حتى يخرجون جميعا .يبدا عادل في عد الفلوس)
ع6: 50 ، 60 ، 70 ، 80.
العروسة: كام ياعادل ؟
ع6: شششششش ، 90 ،100.
العروسة: طب يكفوا يجيبوا غسالة اطباق؟
ع6: ساعتها قعتدها 3 ايام من غير عشا علشان متضرش تغسل
اطباق
عادل: دماغ الستات عمرها ما هتتغير ، الا قولي يا جدو
عادل ..هما الصحاب لما بتعجز بيبقوا عاملين ازاى؟
ع7: اقولك يا سيدي .
(يدخل علية صديق عجوز حاملا طاولة )
الصديق: انا قلت اكيد وحدك وجيت اسليك
ع7: فيك الخير ، العيال بيجوا يسالوا عليا كل فين وفين .
(يبدان
اللعب)
الصديق: معلش مشاغل .. مانت كنت زيهم وعارف
ع7: عارف عارف.. وهما كمامن مصيرهم يعرفوا ..اوبا ، شيش
بيش.
الصديق: دانت اللي شيش بيش ، دي ياك الجوهار يا ضلالى
ع7: امال انا لية شايفها من هنا شيش بيش
الصديق( يقفل الطاولة) : قوم يا عادل نتمشى شوية.
ع7: ياللا نتمشى صحيح ، قبل ما منعرفش نقوم
عادل: دانا كنت فاكر الصحوبية مقالب ومصالح وبس.
ع5: زى ما حجات كتير مش عارف تقدرها
عادل : زي اية؟
ع7: موهبتك يا عادل
عادل: موهبتى؟ وهو مين اللي قدر موهبتى؟
(ع2 مع
والدية)
الاب: قلتلك100 مرة ماتبيش قدامة ورق و اقلام
الام: مش انت اللي مديهملة ؟
ع2: عاوز ارسم يا بابا
الاب: ومالة ارسم يا روح بابا .
الام: اعمل اية انا بقى؟
الاب: الواد اتعود يشخبط حتى في ورقى.
ع2: حلوه الرسمه د يابابا ؟
الاب : هايله ياحبيبي ، واياكي اشوفك بتديله ورق وقلم
تاني ؟
ع2: ايه رايك في رسم ياماما ؟
الام : اوعي اشوفك بترسم تاني ؟
الاب : ازاي تكسري بنفس الولد كدا
الام: لومكفكش الورق دا ياحبيبي عندك ورق بابا علي
المكتب ارسم فيه برحتك
الاب : ايك اشوفك بترسم تاني يابن
......................
الام : تييييييييييييييييييييييييييت
ع2 : عاوز ارسم !
ع3 : وترسم ليه والبنات بتحب تتفرج علي حاجات غير الرسم
(
مجموعه بنات اعداي جالسات ، وع2 ومجموعه
اولاد اعدادي يستعرضون )
و1 : انا بلعب بوكس تحبي اضربلك الولد دا ؟
ب1 : لا حرام دا شكله كيوت (cute )
و2 : دا احسن حد بيغني في الفصل
ب2 : تعرف تغني شعبي ؟
ب3 ( ل و3 ) عزفك علي الجيتار يجنن تعرف تعزف عليه تركي
ع3 : انا بعرف ارسم .
ب4 : طب ممكن ترسمني
ع3: طبعا ماتتحركيش
( ياتي و1
ليضربه بالبوكس )
ب1 : قولتلك ماتضربهوش ايه دا
ب4 : معلش حصلك حاجه
ع3 : لا انا كويس
( يمنع
نفسه من البكاء ويقطع الرسمه في صمت )
ب4 : قطعتها ليه كدا ؟
ع3 : الرسم مش هايجبلي حقي لازم اتعلم مصارعه
( ع3 يغوض
تدريبات المصارعه بينما عادل يتحدث )
عادل : وطبعا بابا مرضيش بالمصارعه مش لاته فضل حاجه
تاني .... بابا كان شايف الموهبه مضيعه للوقت ... الواحد المفروض يذاكر او يشتغل
وبس ... الموهبه دي بتاعه الفشله وابنه المفروض ميكونش فاشل يعني المفروض مايبقاش
عنده موهبه ........لكن انا مقدرتش مابقاش فاشل
( تتدخل
طفله صغيره تمثل موهبته يحدثها ويلعب معاها )
عادل ( مع الطفله ): ماقدرتش ابعد عنها وجودها كان
بيخليني حاسس بموتعه حياتي ... لكن للاسف كان
من وراء ولدي .
الطفله : مابقتش تقضي معايا وقت كتير ذي زمان ؟
ع4 : معلش انا بقيت في ثانويه عامه ولازم اركز
الطفله : شد حيلك
( طرق علي باب
حجرته )
ع4 : طب استخبي انتي دلوقتي
( تختبئ بينما تتدخل اخته بروزم عاليه تضعها علي الارض )
الاخت : جبتلك مذكرات الاحياء
ع4 : طيب
( تخرج اخته بينما هو يحاول يتسلق الورق
)
ع4 : هاخلص ازاي دا ؟
الطفله ( تظهر ) : ياه دا كتير قوي انا كدا مش هاعرف
اوصلك
( يدخل اخو بروزمه اكبر
يضعها بجوار الاولي )
الاخ : مذكرات الفيزياء .
ع4 : طيب
( يضعهم ويخرج ويحاول التسلق فيصبح ابعد عن الطفله )
ع4 : معلش بعد ثانويه عامه هفضي خالص
الاب : جبتلك كتب الانجلش
الام : جبتلك كتب العربي
( كل
كومه اعلي من سابقتها ويشكلون سلم يبعده عن الطفله )
الطفله : اشوفك بعد ثانويه عامه
ع6 : لو فاكر اني مشكلتك دي هاتنتهي لما تكبر يبقي
متهيالك
الطفله : اديك حققت كل حاجه نفسك فيها .. خلصت دراسه ،
واشتغلت ، واتجوزت ... ركز مع موهبتك بقي
ع6 : طبعا هو انا عندي غيرك
( دق علي الباب )
الطفله : ايه دا ؟
ع6 : دا اكيد مراتي معلش استخبي عشان دي عصبيه ومخها علي
قدها
الطفله : تاني .
ع6 : معلش لغايه لما اشرحلها
الطفله : حاضر .
(
تختبئ .. ويفتح لزوجته التي تدخل غاضبه )
الزوجه : مش راضي تفتح ليه ؟
ع6 : معلش كنت ...
الزوجه : في وحده ست معاك هنا !
ع6 : ست ؟ انتي مجنونه
الزوجه : انا متاكده
( تبحث في كل مكان
ع6 : تعالي بس
الزوجه : لازم الاقيها
(
تذهب حيث اختبات الطفله )
ع6 : تعالي بقولك
الزوجه : مش هاسيبها
ع6 : هافهمك
الزوجه : اه لقيتها
( تمد ايديها وتخرج كمنجه )
ع6 : استريحتي
الزوجه : ايه دي ؟
(
ياتي ع7 وياخذها منها )
ع7 : دي الي ضيعت عمرك عليها ... دي الي قعدت تتحداهم
كلهم عشانها ... دي احلي حاجه في حياتك معرفتش تديها حقها .
(
يحاول العزف فايخرج سيئ )
الحفيد : عزفك وحش ياجدو .. تعال نلعب كوتشينه
ع :7 يابني انا كنت هاعزف حلو قوي لولا ال ............
، هي في الكوتشينه ؟
عادل : كل حاجه ف البلد كانت بتحبطني ، وزيي زي أي شاب
مصري ... كان نفسي اسافر
( ع2 مع طفل اخر
)
ط2 : السفر دا حاجه وحشه جدا
ع2 : ليه : دا حاجه حلوه قوي انك تلف ف كل حته ...
وتتفسح في حتت كتيره
ط2 : لامش حلوه ... السفر بيخليني مش باشوف بابا
........... زمان قيل ما انام بابا كان بيسالني غسلت اسنانك ... ولما اقوله اه كان
بيبوسني وبينيمني في السرير ... ودلوقتي بابا بطل يبوسني : عشان كده بطلت اغسل
سناني
ع2 : ماانت ممكن تروحله ؟
ط2: لا ياعم ، هناك مافيش حد بيلعب كوره في الشارع ومافيش
الميس اللي بتديني شيكولاته لما اجاوب صح ، ومافيش ا/ سامر بتاع مدارس الاحد
عادل : كان دايما عليك تختار تضحي بحاجه ... كانه كتير
علينا نعمل الحاجات اللي بنحبها ... ماينفعش تحصل اكتر من حاجه تفرحك في نفس الوقت
، لكن سهل جدا تلاقي 100 حاجه تنكد عليك ... لكن لسه في ايدك انك تحلم
الام : انزل هات عيش
ع3 : عيش ايه ياماما ... مش شايفاني بحاول اتسلق
الهمالايا ؟
الام : ياشيخ اتنيل
.
ع3 : ( لاخته ) . تعالي اوريكي فرنسا من فوق برج ايفل ؟
الاخت : ياشيخ اتليهي !
المدرس : عاوز تشتغل ايه ياعادل ؟
ع3 : عاوز ابقي مدير B M D
المدرس انت بتخرف
(
عجوز بيعدي الشارع )
العجوز : تسمح تعديني الشارع
ع3 : طبعا ياجدي
العجوز : هو انت كنت رايح فين ؟
ع3 : انا كنت نازل اشوف المذرعه بتاعتي في كندا
العجوز : انت اتجننت ؟
عادل : واتنيلت ، واتلهيت ، وخرفت ، واتجننت ، وفوق كده
كمان قرفت .. قرفت م اللي محطوطين فيه ومش عارفين نخرج منه ... ومش عارفين نشوف أي
حاجه غيره
( جرس البا ب ، الوالده تفتح للمدرس )
المدرس : مساء الخير يامدام ، عادل موجود ؟
الام : اه موجود يامستر اتفضل .
المدرس : متشكر ، ياريت الشاي بمعلقتين سكر بس علشان
هابدا اعمل دايت
الام : حاضر يامستر ، ياعادل .. ياعادل المستر بتاعك جه
ع4 : حاضر
( يجلس ويبدان الحصه )
المدرس : ركز معايا ياعادل ... فين الاستعاره المكنيه
هنا ؟
ع4 : همه يامستر بياخدوا تاشيره ايطاليا ازاي ؟
المدرس : يابني ركز .. ده مستقبلك ياحبيبي
ع4: هي ميلانو احسن في الشغل ولا روما ؟
المدرس : وبعدين بقي ، ركز بدل ما اقول لولدتك .
ع4 : خلاص يامستر .. الاستعاره اهه .
المدرس : برافوا يابني ... ايوه كدا ، مش تقولي ميلانو
ولا روما .
ع4 : سيبك من ميلانو وروما .
المدرس : ايوه كدا برافوا
ع4 : فنيسيا براقبتهم ، كفايه المراكب اللي في الميه .
المدرس : ياام عادل .
ع4 :ولا البيتزا اللي بيعملوها .
المدرس : ياام عادل ألحقيني
ع4 : تيجي معايا يامستر ؟
المدرس : ياام عاااااااااااااااااادل .
الام : ايوه يامستر ، حطيتلك معلقتين زي ما طلبت .
المدرس : غيريها وهاتيها ساده ، انا خلاص جالي السكر .
ع4 : انت مش هاتنفع معاك غير نابولي ... هاتيله الدكتور
ياماما
ع5 : وفضلت ماسك في الحلم ده عصب عنهم كلهم ، ومحدش كان
مصدق .
( يمسك كتاب لاتعلم اللغه الايطاليه )
ع5 : Grazie
الزوجه : ايه ياحبيبي ، انت هاتقدم النشره ولا ايه ؟
ع5 : buongorno
الزوجه : ياسلام ع الكوفي ميكس بتاعتهم ، هايله
ع5: buonasera
الزوجه : اه دي اعرفها بوناسيرا سينيوريتا
ع5 : per fauore
الزوجه : لا دي ماعرفهاش
ع5 : دي معناها من فطلك .. ومن فضلك حلي عني بقي .
الزوجه : برضه كدا ياعادل ، طب انا ماشيه .. ويانا يا
الايطالي ف البيت ده هانشوف
ع5 : Grazie
ع6: وطبعا ماقدرتش اسافر ، بس برضهماقدرتش انسي الحلم
... اللي ماخلوش قدامنا غيره
الابن : بابا .... انا عاوز اسافر لما اكبر
ع6 : وماله ياحبيبي سافر ، تحب تسافر فين ؟
الابن : مش عارف ... اسافر فين يابابا
ع6:استنى كده .. تحب تروح الصين ونزرع رز ونشتغل فى لعب الأطفال اللى بيشتروها
اصحابك
الابن: طيب وهايعرفوا ان انا الى عاملها
ع6 :ماحنا هانقولهم .. ولا تحب تروح روسيا وتطلع عالم
كبير
الابن : والمس تقول اسمي ف الفصل ؟
ع6 : ايوه ياحبيبي ... ولا اقولك ، نروح جنوب افريقيا .
ويبقي عندك اكبر منجم ماس ف العالم
اللابن : ويبقي عندي فلوس كتير واعزم اصحابي علي بيتزا
ع6 البيتزا
برافوا عليك ... يبقي نروح ايطاليا .. بس قرر بسرعه عاوز تروح ميلانو ولا روما ،
عشان الموضوع ده صعب
الابن : انا عاوز اروح البلد اللي كلها مراكب ؟
ع6 : انا قلت زيك كده تمام ، .. ولا ايه رايك .. نقعد ف
مصر ونخليها أحسن من البلاد دي كلها ؟
ع2 : طبعا مصر احسن م البلاد دي كلها ، كفايه اني
فيها مي
عادل : فيها مين ياخويا ؟
ع2 : مي .. مش فاكر مي
ياعادل .. اخص عليك
( ع2 و مي في حوش المدرسة أثناء الفسحة )
مي : انا باوثل البيت بالعافيه
ع2 : وبعدين يامي .. انا قلتلك ع الموضوع ده 100 مره
مي : موضوع ايه ؟
ع2 : قلتلك لو اتكرر ثاني هازعل منك خالص
مي : موضوع ايه طيب .
ع2 : مش قلتيلك كتير اسمها باوصل مش باوثل
مي : اثلها ثعبه عليا خالص
ع2 : مافيش حاجه اسمها ثعبه
مي : خلاص خلاص
.. هحاول ثاني
ع2 : طب حاولي .
مي : لامش دلوقت ، مره تاني
ع2 : انت الوحيده في الفصل مش عارفه تنطقيها لغايه
دلوقتي
مي : علشان انا اثغر واحده فيهم
ع2 : طب لو قلتيها صح هاجيبلك مصاصه .
مي : انا اصلا مابحبش المصاصه !
ع2 : امال كانت ثعبه اذاي بث ؟
عادل : دي كانت كل فكرتي وقتها عن البنات ، وماكنش عندنا
أي فكره عن العلاقه المعقده اللي هاتربطنا بالكائن دا قدام
ع4 : يابني اسالني انا عن البنات
عادل : احنا مابنتكلمش عن البنات يامراهق .. احنا بنتكلم
عن الارتباط .. عن تطور فكرتنا عن الارتباط
ع4 : ده هايقولي ارتباط ... ارتباط ده للي في سنك ... حد
يرتبط بواحده م المجانين دول .. فاكر تاجر البندقيه بتاعه صاحبك شكسبير
عادل : اه مش لما خطيبته قفشت عليه لما ادي الخاتم اللي
مدياهوله للقاضي
ع4: تعال بقي اوريك النسخه المصريه منها
البنت : ازيك ياعادل
ع4 : ( ف سره ) . مصيبه لو افتكرت ان بطاريه موبايلها
معايا
صاحبه : ميرسي يابرنس ع البطاريه امبارح ... تتردلك ف
حاجه تانيه ياكبير
البنت : بطاريه ايه ياعادل .. اوعي تكون بطاريتي
ع4 : انتي عايزه الحق ولا ابن عمه ... هي بعينها
البنت : يانهارك اسود ، بتفرط في البطاريه بتاعتي ...
اطلب ديليفري ازاي انا دلوقت ؟
ع4 : بس باسم دا صاحبي ... وكان مزنوق ، حطي نفسك مكاني
البنت : ماليش فيه يااخويا ... انا عاوزه البطاريه ،لما
تجيبها ابقي اتصل بيا
ع4 : واكتشفت انها كانت بتخدعني ... اتصل بيها ازاي
والبطاريه مع باسم ... اكيد في بطاريه تاني في حياتها
عادل : معلش ، كلنا خدنا الصدمه دي ف سنك .. عشان كده
قررت اني لازم ادقق قوي وانا باختار شريكه حياتي
(
جالسا اما كمبيوتر )
عادل : عاوز عروسه من 18 ــــ 24 سنه
( تظهر
مجموعه من البنات امامه )
عادل : الطول فوق
( تتراجع بعض القصيره )
عادل : حاصله علي مؤهل عالي
(
تتراجع بعض البنات )
عادل : تجيد اعمال المنزل
(
تتراجع بعض البنات )
عادل : لاتجيد الرغي
(
تبقي واحده فقط )
عادل : ممكن اعرف حضرتك مين ؟
اماني : انا مدام اماني
عادل : مدام اماني ، يالهوي
ع6 : عشان بتقعد تدور علي شكليات ونسيت الجوهر اصلا
عادل : يعني انا كنت باختار غلط
ع6 : وحتي لما اتجوزت ، .. وهاعمل كل اللي نفس فيه
(
ع5 ممسكا بمصباح سحري )
ع5 : ياااه ، انا اتجوزت ... وهاعمل اللي نفسي فيه
(
يدعك الفنوس )
ع5 : عاوز العشاء
( تحضر
العشاء )
ع5 : ياسلام .. جميل قوي الجواز ده
(
يدعك المصباح )
الزوجه : شبيك لبيك
عادل : اكوي القميص اللي عندك
الزوجه : حاضر
( بالمايم تقوم بمجموعه اخري من الطلبات )
عادل : ( يدعك المصباح )
الزوجه : ال 7 طلبات بتوعك خلصوا
عادل : ( ناظرا للمصباح ) . خلصوا !
ع6 : وف الاخر انا اللي دفعت تمن ال 7 طلبات بتوعك
(
ع6 مع ابنه )
ع6 : 5× 6 بكام ياحبيبي ؟
الابن : 24
ع6 : غلط .. 5× 6 = ............
الزوجه : عاااادل
ع6 : نعم ؟
الزوجه : نسيت تدفع ايجار الشقه
( وهم ياكلون )
الزوجه : عجبك الاكل ؟
ع6 : يجنن ، تسلم ايديكي
الزوجه : حساب الجزار 300 جنيه
( عادل نائما )
الزوجه : عادل ، عادل ... عادل ، عادل ، عادل
ع6 : ( يقوم مفزوعا ) . فيه ايه ؟
الزوجه : الغساله عطلت ، اكمل ازاي انا بس ياربي ...
اكمل ازاي واعمل ايه ؟
ع6: حاااضر
الزوجه : عاااااادل
ع6 : نعم في ايه ؟
الزوجه : نسيت هديه عيد ميلادي
ع6 : زي يوسف بالظبط .. عشت 7 سنين شبع وبعدها حوالي 287
سنه هباب وقرف
عادل : انا متهيقلي كل حاجه في الدنيا بتتظبط لما الواحد
بيستريح في الشغل
ع7 : تعال نوريك انت اتعملت ازاي مع الشغل طوال حياتك
ع2 : نبداء بالطفوله
(
مجموعه اطفال يلعبون )
ع2 : ياللا نلعب عسكر وحرميه
و1 : انا حرامي
و2 : وانا كمان حرامي
و3 : وانا ظابط
ع2 : وانا كمان ظابط
(
يبداؤن باللعب والمطارده حتي يقبض عادل عليهم )
و1 : انت هاتطلع ظابط شاطر ياعادل
عادل : في الطفوله كل الشغل كان سهل
( ع2
مع قريبه عند الدكتور )
الدكتور : بتشتكي من ايه بقي ؟
القريب : مش عارف اخد نفسي يادكتور
ع2 : افتح بقك وقول اااااااه
الدكتور : ( يضحك ) . انت اسمك ايه
ع2 : اسمي عادل
الكتور : دا انت دكتور بقي ياعادل
عادل : وابتديت اقتنع اني دكتور واقلد الدكاتره وابتدي
الموضوع دا يكبر معايا لكن بعد فتره عرفت اني في مهن كتير غير ان الواحد يبقي
دكتور او ظابط ... المهم يكون بيحبها ... علشان كدا حلمت في اعدادي اني اطلع
كوافير
( كلهم في الكوافير
)
ع3 : شعرك لو اتقص هايبقي احلي بكتير
الزبونه : مااقدرش جوزي يموتني
زبونة2: ممكن اصبغ شعري احمر
ع3: ممكن طبعا، ولو ان الاخضر هيبقي هايل عليكي
زبونة2: اخضر؟!
فتاة : عاوزة اعمل شعري curly
ع3: دا اللي هو ازاي
زبونة 3: ( تصرخ) . شعري
ع3: يا نهار اسود.. المكوة
عادل: واكتشفت اني ماليش في الشغل.. انا بس كنت عاوز
اقلد واحد قريبي.. مكنتش عاوز اتعب في الشغل ، كنت عاوز فلوس من السما .. فلوس
كتير زي ........
(
موسيقي من سيربح المليون )
جورج : يرحب ب ا / عادل.. بتعرف نظام المسابقة؟
ع4: اة
جورج: يبقى هلا نبدا بالسؤال الاول: من هو مقدم برنامج
المسابقات الشهير من سيربح المليون؟
ع4: اتصل بصديق
جورج: اتفضل
(
موسيقي من سيربح المليون )
ع4 : ازيك يا باسم ؟
باسم : ازيك يا دوله ... وصلت من سيربح المليون .. اللة
يرحم ايام ما كنت بتتسلف مني الشربات ياد
ع4: اخلص يا عم دا وقتة
باسم: قول اللي عاوزة اساحبي
ع4: جورج فقد الذاكرة وبيسالني عن اسمة في البرنامج..انا
خايف علي ما اخلص ينسى الجايزة بتاعتي
باسم: هو دة اللي عايزني فية ادولة؟
ع4: ياعم خلص
جورج: انتهي الوقت
عادل: كنا عايزين الفلوس السهلة ..مكانش عندنا أي فكرة
عن معاناة الحياة بعد التخرج وازاي فرصة العمل تشبهة لعبة الكراسى الموسيقية
موظف : وظيفة خالية بشركة معروفة لتصدير البترول
(يبداوا بالدوران حول الكراسى على ايقاع موسيقي حتي تتوقف فيبقي عادل
ومتقدم اخر)
المتقدم: الوظيفة دى بتاعتي انا جيت هنا الاول
عادل: معلش انا محتاجلها ضروري
المتقدم: ماليش دعوة
(الموسيقي مرة اخري يدورون مرة اخري)
ع5: حتى لو اشتغلت وجبت فلوس انت فاكر ان كدة مشاكلك
اتحلت؟
(يجلس
امام احدي كفتى ميزان)
ع5: وادي مرتب الشهر
(يضعها في كفة الميزان فتطب)
الزوجة: طب ادي ايجار الشقة ، وفاتورة الكهربا ، والغاز
والتليفون والمية
(يبدان بالتسابق علي كفتى الميزان )
ع5: وادى مرتب شغلانة بعد الظهر
الزوجة: طب ومصاريف المدرسة بتاعة الواد ، وطلبات العيد
(تضعهم في الميزان فتطب الكفة ايضا )
ع5: طب ادي معاش بابا
الزوجة: فلوس الجمعية ، قسط التلاجة ، حساب السباك ،
تصليح الاسانسير ، لبس الواد
ع5: حرام عليكي الكفة دي عمرها ما بتنزل
الزوجة: وانا مالي ، انا بجيب حاجة من عندي
(يلقي
نفسة علي كفة الايراد ومع ذلك لا تتحرك)
الزوجة: مش كفاية يا حبيبي
ع6: التزامات البيت بقيت كابوس مش بينتهي .. كابوس مش
بيكفيه طوال اليوم فبيكمل عليك باليل وانت نايم.
(ع6 نائما )
المدير: انت ما بقتش مركز في الشغل اليومين دول
الابن: بابا ..مصاريف المدرسة
المدير: انا هنقلك اسوان
الابن: هاترفد يا بابا
ع6: (يقوم مفزوعا) بلاش اسوان ....اسوان حر.
الزوجة: انت حران؟ تحب اعليلك التكيف ؟
ع7: صدقني مش بيقعد حاجة من دا كلة.. لما بتطلع علي
المعاش كل الحاجات دي بتتساوي
عادل: ازاي؟
ع7 : بص ، المدير اللي كنت خايف يوديك اسوان ادالك شهادة
التقدير دي.. اللي طبعا لا دفعت ايجار الشقة ولا فتورة الكهربا بتاعة التكيف.
والواد اللي كنت خايف علية اتخرج وقعد جمبك ، شايف الشهادة جميلة ازاي؟ ع العموم
هتعلقها في الصالون لحد ما تشبع منها
عادل: يعني كل الحاجاتاللي جريت وراها ماوصلتنيش لحتجه ؟
ع7 : وكل الحاجات اللي خفت منها برضوا ماذيتكش في حاجه ،
واللي انت مفهمتوش وانت صغر .. اني الحياه كدا كدا بتستمر ، بس المهم بتستمر ازاي
عادل : ولاني الحياه خدتتني بعيد قوي عن عادل بتاع زمان
... خدتني كمان بعيد عن صحبي بتاع زمان
( ع2 يصلي )
ع2 : شكرا يارب علي الدرجه الحلوه بتاعه الترم الاول
.... بس انا متفق معاك علي درجه حلوه السنادي ، يعني اوع تنسي الترم التاني ...
اوع تنسي يارب ..... علي فكره انت صحبي قوي ، وانا مبسوط اني بكلمك كل يوم ، تصدق
اني بكلمك اكتر ما بكلم اصحابي .... انا مش عارف ليه الكبار بيخافوا يبعدوا عنك ،
حد يسيبك برضوا ، دا انت حلو قوي ... بس برضوا انت متسبنيش ، يعني لازم تطلع
المصيف معايا ، امال اكلم مين هناك .... يلا بقي ، تصبح علي خير ... لو الدنيا برد
عندك ابقي اقفل الشبابيك ... باي
عادل : وبعدين بداءنا نعرف حاجات تاني عن ربنا في مدارس
الاحد
(
فصل مدارس الاحد )
الخادم: وربنا يا اولاد خلي داود الصغير النونو يهزم
جليات الكبير
( ع3 يجهز النبلو والزلط )
ع3: انت تاتي الي بسيف ورمح وترس اما .....
جليات: مين هنا اللي بيتكلم ؟
ع3: يا خبر ! انا مكنتش اعرف انة ضخم كدة
الخادم: لكن داود مخافش منة
ع3: يا ماما دة ممكن ياكلني
الخادم: علشان عارف ان ربنا معاة
ع3: لية يارب تحطنى قدامة ؟ هو انا عملتلك حاجة ؟
(يرجع للفصل)
ع3: لا يا عم انا مش لاعب
الخادم: راح الملك رامى دانيال في جب الاسود
(صوت
الاسود)
ع3: يا ماما ... انا خايف دول هايكلوني ... حد يطلعني من
هنا
الخادم: لكن اللة ارسل ملاكة
ع3: انا مش دانيال يا عم
الخادم: امال انت اية ؟
ع3: انا...انا يونان
عادل : وعشت يونان .. وعشت بهرب من ربنا ... وابتديت
اعرف يعني ايه الواحد يبعد عنه .. وابتدت ناس كتير تتدخل بيني وبينه ، ودول اللي
كانوا السبب
( ع4 وسط مجموعه اخرين امام الاسانسير )
ش1 : اه الاسانسير نازل
ش2 : انا معنديش وقت
ش3 : اه خلاص وصل
(
يفتح باب الاسانسير يدخله جميعا وكل منهم يضغط علي زرار )
ش1 : انت طالع الدور الكام ؟
ع4 : انا عاوز اطلع الي ربنا
ش1 : ربنا ياه .. دا بعيد قوي .. طب انت مستعد ؟
ع4 : مستعد ازاي ؟
ش1 : لازم علي
الاقل تكون قاري في اليوم 10 اصحاحات
ع4 : 10 اصحاحات ، ياه .. دا كتير قوي
ش1 : امال انت فاكر انك هاتوصل لربنا بالسهل ؟
(صوت توقف الاسانسير )
ش1 : انا نازل هنا تعوز حاجه ؟
ع4 : متشكر
(
يتوقف الاسانسير وينزل ش1 ثم يستكمل )
ش2 : انت بتقول طالع لربنا ؟
ع4 : ايوه
ش2 : طب ماتنساش الصيام .. بقي يابطل ، الصوم الكبير
والصغير ، والرسل والعدرا ، ويونان ،
والاربع والجمعه بقيه السنه
ع4 : ماعدا الخماسين علي فكره
ش2 : برافوا عليك ، مااديك حافظ ... انزل انا بقي هنا
( ينزل
بينما يستكمل هو ، و ش3 )
ش3 : علشان توصل لربنا لازم تتناول كل يوم
ع4 : بس دا اب اعترافي قالي كل اسبوع
ش3 : اه يبقي اسمع كلامه طبعا ، ياله بقي سلام
( ينزل
ش3 )
ع4 : ولما كلاهم عارفين طريق ربنا ماكملوش ليه ... ليه
في الاخر سابوني اطلع لوحدي !
ع6 : وبعدين تكبر وتتجوز وتخلف وتبقي علاقتك بربنا بخصوص
ولادك ، وكن انت خلاصت اللي يربطك بيه !
(
ع6 ، وزوجته وابنه اثناء القداس )
الابن : بابا .. هو القداس هايخلص امتي ؟
ع6 : بس ياحبيبي .. اسكت القداس شغال
الزوجه : صح هاروح عند ماما النهارده
ع6 : خلصي شغل البيت وروحي براحتك
الابن : بابا ، بابا .. حسام صاحبي اه
ع6 : ياحبيبي قولنا بس ، القداس شغال
( تليفون
بيرن )
ع6 : حاضر ياامجد هاجيلك بالليل
الابن : بابا .. عاوز اروح معاك لعمو امجد
ع6 : ماقولنا بس بقي
الزوجه : بس تبقي توصلني
ع6 : حاضر
الابن : بابا ، هو ليه ربنا بيزعل من الصغيرين لما
بيتكلموا لكن الكبار لا ؟
ع6 : نعم ؟!
عادل : بتحطوا نفسكم في مواقف بايخااااه
ع7 : عارف ، عمركم ما هاتعرفوا قصه علاقتكم بربنا غير في
اخر الرحله
عادل : ازاي ؟
ع7 : اقولك
(
صوت صفاره قطار ثم يبدا بالتحرك جميعهم جالسون فيه )
ع7 : كل محطه في حياتك ربنا بيتعامل معاك بشكل معين حسب
فهمك ليه في الوقت دا
ع2 : ( من الشباك ) . انا اه وانا بصلي .
ع7 : ربنا كان مبسوط قوي بالبراءه بتاعتك اكتر من كلام
الكبار المتزوق
ع3 : وانا اهو وانا بقلد صموئيل
ع7 : ربنا كان عاوزك عادل مش صموئيل
ع4 : بس انا في الاسانسير لوحدي
ع7 : عشان دا طريقك انت مش هما
ع6 : ابني في القداس سكت وانا اللي كملت كلام .. الا
قولي صح ، انت في المحطه بتاعتك شايف ايه
ع7 : شايف اني ربنا هو الواحيد اللي قعد معايا لغايه اخر
محطه
عادل : بس انت خلاص عجزت ياجدو عادل
ع7 : كل واحد فيكم خد من صحتي شويه ؟ فاكرين والا افكركم
( في السوبر ماركت )
ع2 : ماما عاوز الشيكولاته دي
الام : حاضر
ع2 : ودي كمان ياماما
الام : حاضر .. كفايه بقي
ع2 : طب خلاص دي اخر واحده
الام : ماشي .. .. بس يالاه عشان نلحق ميعاد دكتور
السنان بتاعك
ع2 : طب طالما رايحين عند دكتور السنان يبقي اخد دي كمان
ع3 : انت السبب .. .. اه انا قعدت في رعب من كل حاجه
شويه
ع2 : وانا مالي ياخويا ؟
ع3 : هاقولك
الام : خاليك انت كدا تفضل تاكل في حلويات لغايه لما
سنانك تقع
ع3 : لا سناني لا
الاب : كفايه اكل من بره ، هايجبلك تسمم
ع3 : اه يابطني
الاخ : خف من علي الكمبيوتر نظرك ها يضعف
ع3 : مش شايف حاجه
الخادم : لو شربت سجاير هاتموت بالسل
ع3 : مش بشرب سجاير .، كح كح ، كح كح
الصديق : خس شويه بدل لما يجيلك القلب
ع3 : طب ياله علي الدكتور
المدرس : مش هتبطل لعب كوره غير لما رجلك تتكسر
ع3 : انا خلاص موت
( يسقط )
عادل : عشت خايف من اعي حاجه ومن كل حاجه .... كان صحتي
دي حاجه باحوشها للمستقبل ، وكنت باحسبها بالوحده
(
ع4 ، يمسك موبايل ويطلب رقما )
الصوت : لقد تم شحن رصيد صحتكم بمبلغ 100 ساعه من الطاقه
ع4 : كويس ، يكفوني اذاكر شويه .
(
يذاكر )
الصوت : لقد انخفض رصيدكم الي 40 .
ع4 : لما انام شويه .
( ينام ويقوم )
الصوت : رصيدكم الان 60 .
ع4 : انزل اجيب مذكرات .
(
يلف علي المذكرات )
الصوت : رصيدكم الان 30
ع4 : ربنا يستر
من الامتحانات
(
وهو في اللجنه )
الصوت : عفوا لقد نفذ رصيدكم .
ع4 : ( يتنح في ورقه الاسئله ) . قلبي !
(
يسقط علي الورقه )
ع5 : وكل لما تكبر بتيجي علي صحتك اكتر
( مع زوجته يدقان جرس الباب )
الحماه : ايوه ، ايوه ... جايه اه
( تفتح الباب )
ع5 :حماااااااااتي
الزوجه : ازيك ياماما
الحماه : اهلا بعريس بنتي ... ازيك ياعروسه ، اتفضلوا
ع5 : انا طبعا ماقدرتش افوت العزومه .
(
علي المائده )
الحماه : طبيخي مش عاجبك ولا ايه !
ع5 : لا ياطنط دا سكر .
الحمي : طب خد حمام تاني
ع5 : مش قادر شبعت
الزوجه : انت هاتكسف بابا ولا ايه ؟
ع5 : لا الا بابا .... هوانا اقدر
الحماه : الرز بتاعي دا بقي حاجه تانيه خالص
ع5 : ماانا عارف ياحماتي دا انا واكل طبقين لغايه دلوقتي
الحماه : طبقين تاني وهاتدعيلي
ع5 : معلقه تاني ومش هاتلقوني خالص
الحماه : شكلك شبعت .... اروح اجيب الحلو بقي
ع5 : قومي بينا نمشي
عادل : امتي تيجي الايام دي
ع6 : انت فاكرها حاجه حلوه ، لا طب تعال اوريك
(
ع6 نائما )
الابن : بابا تعال وصلني للمدرسه .
ع6 : حاضر
( بالمايم يصحب الوالد الي المدرسه )
المدير : ( في الموبايل ) . انت متاخر علي الشغل ليه ؟
ع6 : حاضر يافندم .. اديني جاي
( يكمل الطريق الي العمل )
الزوجه : ماتنساش تجيب الطلبات وانت جاي
ع6 : حاضر مش ناسي
( يعود من الشغل الي البيت )
ع6 : اه صح نسيت ازور اختي في المستشفي .
( يذهب من البيت الي المستشفي )
الاخت : انا عارفه انك مشغول
ع6 : ولا يهمك اخبار صحتك ايه
( يعود الي المنزل )
الابن : بابا تعال وصلني
المدير : يابيه حضرتك متاخر
الزوجه : الطلبات وانت جاي
ع6 : اتاخرت علي اختي
( يظل يدور بين هذه الاماكن حتي يتحول المشهد تدريجينا الي كونه يدور في
ساقيه )
ع6 : ( وهو يدور ) . مااهو الواد مش ذنبه انه يتاخر علي
المدرسه والمدير مش ذنبه اني بوصل الواد ومراتي مش ذنبها ان المدير اخرني في الشغل
.... واختي العيانه مش ذنبها ان البيت خلاني مسالش عليها .... بس كمان جسمي مش
ذنبه اجي عليه كل دا
ع7 : علشان لما يبطل جسمك يشيلك علي الاقل تلاقي الناس
دي جنبك
( ع7 راقدا علي سرير في مستشفي . وهم
جميعا اكبر )
المجموعه : سنه حلوه ياجميل ، سنه حلوه ياجميل .... سنه
حلوه ياجدو ، سنه حلوه ياجدو
الحفيد : هو انت عندك كام سنه ياجدو
ع7 : كتير ياحبيبي مش فاكر
الابن : لا متكبرش نفسك يابابا ..... دا انت يادوب 75
سنه ربنا يعطيك طول العمر
الحفيد : ياه دا انت اكبر من مستر بتاعي ياجدو
ع7 : ياه دا انا كدا عجوز قوي
ع7 : لكن في النهايه قاعدتهم حوليك بتحسسك اني حياتك
وصلت لحاجه
عادل : ياه دي حياتي طلعت مليانه حاجات انا معرفش عنها
حاجه
ع2 : فالح بس تعمل عليا انا كبير وفاهم
عادل : طلعت مش فاهم حاجه .... كل اللي بفكر فيه دلوقتي
هاغيره قدام
ع3 : زي ما اللي فكرت فيه زمان غيرته دلوقتي
عادل : بقي الاصدقاء والسفر والشغل ماطلعوش زي ماانا كنت
فاكر ؟
ع4 : ولا ربنا والارتباط والصحه والموهبه زي ما انا كنت
فاكر
عادل : دا الواحد بقي يقعد يحسب الحاجات دي من جديد
ع6 : ابوس ايدك .... اختارصح المره دي .... علشان توصل
صح بقي كفايه
ع7 : ايوه ياعادل .... انا ما بقتش حمل وقفه الطابور دي
تاني حرام عليك
عادل : حاضر ، حاضر .... انا خلاص فهمت .... بس دا مش
معناه اني مش هغلط تاني
ع2 : المهم تختار صحابك اللي هيكملوا معاك
ع3 : وتاخد بالك من موهبتك
ع4 : واذا كنت قد السفر سافر
ع5 : وبطل بقي افكار المراهقين عن الارتباط
ع6 : واشتغل شغلانه تعيشك
ع7 : اوع تسيب ربنا لما تكبر
عادل : وهاخد بالي من صحتي ، ما بقولكم خلاص فاهم
المجموعه : لما نشوف
( يدخل
ع8 ويقف معهم في الطابور )
ع8 : لو سمحت هوالطابور دا مش بتحرك ؟
عادل : لا بيتحرك طبعا
ع8 : طب هو اخره فين ؟
عادل : استني
شويه وانت تعرف
ع8 : هو حضرتك ماعندكش اجابات مفيده لاي اجابات خالص ولا
ايه ؟
عادل : بس ياعادل استني شويه وانت هاتفهم كل حاجه
ع8 : انت عرفت اسمي منين ؟
عادل : كل اللي
في الطابور هنا اسمهم عادل ... هاتروح انت تقولي هما بيمسكوا اللي اسمهم عادل ....
هاقولك لا ، كل الي في الطابور هنا هما حضرتك .... تروح انت مش مصدق طبعا ولا كلمه
ع8 : طبعا مش مصدق
عادل : ماانا عارف كل حاجه ... تعالوا بقي فهموه علشان
انتم خبره اكتر مني في الموضوع ده .
ع2 : انا بقي حضرتك وانت في ابتدئي
ع3 : وانا سياتك وانت في اعدادي
ع4 : وانا معاليك وانت في ثانوي ... يامراهق
عادل : وانا فخامتك لما اتخرجت وبقيت عاطل
ع5 : وانا جلالتك لما اتنيلت اتجوزت
ع6 : وانا ابقي حضرتك وانت اب ... ياسي زفت
ع7 : انا بقي من غير القاب لما تبقي جدو وناوي تموت
ع8 : طب انا ايه اللي جابني وسطكم ؟
المجموعه : تعالي بقي نحكيلك
( ســــــــــــــــتار )
0 Comments