مسرحية أرض الظــــــــــــــــلام

 

مسرحية أرض الظــــــــــــــــلام
الفصل الاول
		(يجلس الكاهن علي كرسي مرتفع عن الشعب .... واعظا)
الكاهن	:	اعبدوا الظلام يا أهل الظلام .... فهو الحقيقة الوحيدة في دنيا الأوهام .... الظلام يا أهل الظلام ... رمز الحياة وطول العمر والسلام ... انحنوا إكراما للظلام اسجدوا إكراما للظلام .. ارفعوا رؤوسكم نحو الغمام ... مدوا أيديكم للأمام ... وغنوا بتسابيح الحمد والشكر للظلام.
		في الظلمة عشنا ونفشنا ريشنا علي صدرنا في الضلمة عشنا فرشنا خيشنا علي أرضنا ولا يوم نسينا حبك يا ضلمة في قلبنا.
		وأن يوم نسينا نخسر نفسنا. نقتل بعضنا. يقصف عمرنا. يحرق قلبنا. سود يا سواد اليوم علينا في أرضنا. سود يا سواد لحد آخر يوم من عمرنا.
الكاهن	:	وعظه اليوم يا أخوان يا دوب سطرين ... (بإنفعال) القتل حرام ... السرقة حرام ... الفسق حرام. وفيما عدا ذلك ليس بحرام ... حلال في حلال.
		(يذهب الى الناحيه الاخرى ومعه ست الكل )
أم العيال	:	يا سلام الكاهن ده ... رأجل بركه ... بصحيح.
أبو العيال	:	3 حاجات الأسبوع ده بس حرام ... والباقي حلال ... دا الواحد هايعيش يبرطع في المكان.
أم العيال	:	مش بقولك راجل بركة ... بركة من زمان ... مكشوف عنه الحجاب ... وبيعرف في الغيب والغياب.
جمال	:	دا لو طلب كل أموالي ... مش كتير عليه.
أبو العيال	:	دا لو طلب عيل من عيالي ما يغلاش عليه.
جهاد	:	دا لو قالي اقتل ... ها اعملها.
جمال	:	دا لو قالي اسرق ... ها اعملها.
أبو العيال	:	عايز الحق لو طلب حتي مراتي ياخدها.
جهاد	:	أنا نفسي يطلب حماتي بصراحة.
أم العيال	:	يا سلام راجل ولا كل الرجال.
		(يدخل الكاهن وزوجته)
ست الكل	:	يلا كل من عليه شئ للكهنة والكهان فليسرع بالسداد يا أهل الظلام. يلا واحد ورا التاني ويقدم فروض الولاء والطاعة للكاهن الأعظم وزوجته الجميلة ست الكل.
أبو العيال	:	خشي قدامي ... امشي ... شهلي آمال.
أم العيال	:	بالراحة عليه يا أبو العيال.
أبو العيال	:	أنا يا أبو الكهان ها أقدملك أغلي قربان ... أكبر قربان ... مراتي أم العيال.
الكاهن	:	يا راجل بقي ده برده كلام؟
ست الكل	:	في برضه احد يستغني عن مراته ... أم عياله...؟
أم العيال	:	قوليله يا ست الكل راجل مش جنتل مان.
أبو العيال	:	ما هو علي يدك.. أنا واقع في عرضك .. مبقلناش سنتين متجوزين ... ومعايا 3 عيال ... ولا عارف أكل ... ولا أشرب ... ولا أنام.
الكاهن	:	يعني عايز تقول أيه؟
أبو العيال	:	ضارب تفليسه يا أبو الكاهن.
الكاهن	:	يا سلام؟ يعني أيه ... هاتحمرق في القربان ... طب وحق رب الظلام لتكون ملعون.
أبو العيال	:	ارجوك العفو والسماح.
ست الكل	:	حلمك بس يا أبو الكهان ... عليه شئ وشويات ... من امتي احنا بندقق في الأوقات ... كل تأخيره وفيها خيره ... خيره عليه وخيره علينا
الكاهن	:	خيره عليه وخيره علينا ... أيوة صحيح هو في ما بين أهل الظلام حسابات.
ست الكل	:	وإلي عليه عمله النهارده
الكاهن	:	بكره تبقي عملات
ست الكل	:	وإلي عليه 100
الكاهن	:	بكره تبقي ميات
أبو العيال	:	يعني أيه؟
ست الكل	:	يبقي علي راحتك يا أبو الولاد ... علي أقل من مهلك في السداد.
أبو العيال	:	ابوس أيدك يا أبو الكهان ... بوسي يا وليه بوسي
الكاهن	:	لأحب علي أيد مولاتك ... دي هي السبب في نجاتك ... الي بعده من الرجال.
		(تعود أم العيال)
الكاهن	:	راجعه ليه تاني أم العيال؟
أم العيال	:	أنا طالبه رأيك ومشورتك يا أبو الكهان
الكاهن	:	خير يا أم العيال
ام العيال	:	بيقولوا في الأمثال يا مآمنه للرجال .. .يا مآمنة للميه في الغربال ... وأنا جوزي بقي غاوي زوغان ... لا طايقني ولا طايق البيت والعيال .. بيقول قال أيه علي البيت مورستان وعليا ام ..ام اردان ... بقي بالزمه دا اسمه كلام ... الحل أيه يا أبو الكهان؟
الكاهن	:	تكونيش بتنكدي عليه كتير.
ام العيال	:	ابدا
الكاهن	:	ولا قليل
ام العيال	:	ابدا ورب الظلام
الكاهن	:	طالب قوليلي الحالة دي بتجيله من زمان؟
أم العيال	:	بعد أول عيل من العيال
الكاهن	:	لا لا لا لا ... دا يبقي شغل جن وحركات جان
أم العيال	:	استرها يا رب الظلام
الكاهن	:	أنا لازم اعملك حجاب
أم العيال	:	حجاب
الكاهن	:	(بدروشه) ما تقاطعيش في الكلام ... استني ثواني الوحي لما بينزل ما بيجيش تاني ... تجيلي ضافر من صابع رجله الشمال.
أم العيال	:	رجله الشمال
الكاهن	:	و 3 شعرات من رأسه طوال
أم العيال	:	طوال
الكاهن	:	وتعجنيهم بميه البير وتيجي بكره اعملك حجاب ... جوزك بعديها ها يبقي عال العال ويرجع يحبك ذي زمان.
أم العيال	:	يا سلام ... يا سلام يا أبو الكهان ... ده لو حصل ... أنا نادراها. ها أدبح 3 خرفان و 4 بقرات سمان.
الكاهن	:	إلي بعده ... واحد ... واحد يا جدعان مين الأخ بلال بالأحضان ... فينك يا راجل من زمان.
جمال	:	أنا مش بلال يا أبو الكهان... أنا جمال.
الكاهن	:	جمال .. غريبة ريحتك ذي ريحة بلال
جمال	:	أيوة ... ما أحنا بنستعمل نفس البرفان.
الكاهن	:	عي العموم بلال ... ولا جمال كله واحد .. مفيش فرق في الضلمة حتي الحريم والرجال .. المهم معاك كام من الأموال .. تقدمها قربان لرب الظلام.
جمال	:	( بصوت منخفض ) معايا كردان وجوز حلقان... (بصوت منخفض) بس خليهم فى سرك دول بتوع المدام  ودي لو عرفت ...... ( بخوف اكبر ) .
الكاهن	:	فى حد بردو يخاف من الحريم يا جبان
جمال	:	الجين سيد الاخلاق يابو الكهان ( باعلان )
الكاهن	:	على العموم متخفش .. سرك فى بير
جمال	:	اما انت صحيح راجل وامير .. بس دى مش تبقى سرقه يابو الكهان ؟ مش حرام ( بصوت منخفض )
الكاهن	:	السرقة في سبيل رب الظلام ... مش حرام يا جمال ... حلال في حلال.
جمال	:	(بإقتناع) يا سلام ... يا سلام
الكاهن	:	لسه فاضل حد من الرجال؟
جهاد	:	السلام والأمان عليك يا أبو الكهان.
الكاهن	:	أهلا ... أهلا .. بالأخ جهاد ... أخبار جهادك أيه في سبيل رب الظلام ... قصدي معاك أيه تقدمه قربان.
جهاد	:	حياتي كلها ... من زمان قدمتها .. فداء للظلام
الكاهن	:	حياتك .. وتعمل أيه حياتك لشعب الظلام ... هانقطعها حتت ونقسمها علي الغلابة والأيتام ... ولا هانبعها في قزايز ونوزعها علي العساكر والفرسان اللي بيحموا أرض الظلام ..يا أخ جهاده الجهاد الحقيقي هو العطاء .. العطاء بلا حدود للبلاد.
جهاد	:	أنا رقبتي طبعا يا أبو الكهان ... بس أنا كنت عايزك في كلمتين
الكاهن	:	أيوة ... أيوة ... ايه تاني يا جهاد .. لا صحيح أيه أخبار أخوخ جاد.
جهاد	:	بخير .. بخير يا أبو الكهان بس ...
الكاهن	:	وأخوك التاني رياض
جاد	:	بيبوس أيدك لكن ...
الكاهن	:	وفؤاد .. ازي فؤاد.
جهاد	:	أنا بس عايز أقول
الكاهن	:	واختك سعاد ... زمانها كبرت؟
جهاد	:	أيوة .. أيوة
الكاهن	:	ووداد .. لأ وداد .. دي الكبيرة طبعا .. أزي وداد .
جهاد	:	كلهم بخير يا أبو الكهان.. أنا بس كنت عايزك في كلمتين.
الكاهن	:	إذا كنت مزنوق في قرشين ... فوت علي بعد يومين؟
جهاد	:	بالعكس يا أبو الكهان ... دا الجيب الأول مليان ... والتاني عمران.
الكاهن	:	مش تقول كده من زمان. ريحت قلبي ورضي عليك رب الظلام.
جهاد	:	أنا عايزك تسيبك بس شوية من أخواتي .. أنا جاي اكلمك عن مراتي
الكاهن	:	مالها مراتك يا جهاد ... هي كمان مليالك البيت ولاد
جهاد	:	بالعكس يا أبو الكهان ... دي كل خلفتها بنات في بنات ... في البيت بنات وفي الغيط بنات .. اتلفت يميني الأقي بنات ... اتلفت شمالي ... ورايا وقدامي ... ما فيش غير بنات.
الكاهن	:	ومالهم بقي البنات ... في حد برضه يكره البنات دول حتي الطف الكائنات طافا طي في طا طا طا.
جهاد	:	لمؤاخذة يا أبو الكهان ... أنا البنات اللي عندي عاهات ، واحدة آيمه والتانية نايمة ، واحدة كرته والتانية هاتمه وأنا بس نفسي في حته واد .. يبقي معين لي في الحياة ... ووريثي بعد الممات ويكمل مشوار الجهاد في سبيل الظلام .. حته واد يا ناس ... من نفسي مش حرام ... رأيك أيه في حكايتي يا أبو الكهان.
الكاهن	:	الحقيقة حكايتك حكاية يا أخ جهاد ... بقالك كام سنة متجوز.
جهاد	:	حوالي 10 سنوات
الكاهن	:	ياه ... ومستحمل أزاي كده يا راجل .. طب ما كفاية كده هي خدت حقها وزيادة.
جهاد	:	يعني أيه
الكاهن	:	يعني تسيبها وتتجوز غيرها
جهاد	:	اسيبها واتجوز غيرها
الكاهن	:	أيوة يا أخي ... الجزيرة مليانه بنات وستات واحدة منهم لازم تجيبلك الواد.
جهاد	:	وإذا مجابتش
الكاهن	:	سيبها واتجوز غيرها
جهاد	:	تاني
الكاهن	:	وتالت ورابع وخامس .. يا عم دول علي القلب اكتر من الهم
جهاد	:	طب ومراتي ... والبنات مين يصرف علي البنات.
الكاهن	:	سيبلهم 3 أو 4 عملات وكده يبقي عداني العيب وعداك ... مبروك مقدما الواد سيب الموضوع ده عليه .. أجمل عروسة في البلاد هاتكون من نصيبك يا جهاد ... بس ده طبعا محتاج مصاريف .. ومستلزمات.
جهاد	:	تحت أمرك يا أبو الكهان
		(يجلس الكاهن هو و ست الكل يتقاسموا القربان )
أبو العيال	:	هو صحيح الكلام اللى بيتقال أن في غريب في الجزيرة
أم العيال	:	غريب ..
أبو العيال	:	بيقول حاجات أغرب منه.
جمال	:	يا ساتر استر يا رب الظلام
عم سحاب	:	الشر بره وجوه
		(يدخل نور)
جهاد	:	استنوا .. استنوا أيد ده هه .. أوعي .. اوعي تقرب مني
ابو العيال	:	اهو هو دا
جهاد	:	أنت مين؟
نور	:	أنا نور ... اسمي نور
جمال	:	جاي منين؟
نور	:	من بلاد بعيددة من أرض النور
أبو العيال	:	جاي ليه؟
نور	:	دي رسالتي ودي مهنتي
أم العيال	:	مش فاهمين؟
نور	:	معايا رسالة
عم سحاب	:	من مين؟
نور	:	من أرض النور
غالبة	:	ورسالتك دي بتقول أيه؟
نور	:	بتقول الحق الحق اللي غاب عن عينيكو
مجموعة	:	الحق
نور	:	أيوة الحق .. الحقيقه اللي عنيكم مغمضها عنه أن الآوان تفتحوا عنيكوا من حقكوا تشوفا الحياة من حواليكوا ... النور يا ناس في كل مكان .. الدنيا بره بالألوان.
مجموعة	:	بالألوان ..
نور	:	الدنيا فيها من الألوان أشكال كتير .. الأحمر أحمر ... والأخضر أخضر والأصفر أصفر
غالية	:	وأيه كمان؟
نور	:	وفيه الرمادي وفيه الليموني البرتقالي وفيه.
أبو العيال	:	حيلك .. حيلك كل دي اللون
نور	:	كل دي الوان .. صدقوني وكل لون وجود في الكون وكل يوم بتشوفه عيني
ست الكل	:	سمعت يا ابو الكهان ... ناس كتيره ملمومة حواليه.. مقتنعه بيه .. بيحبوه
الكاهن	:	ولا بيحبوه ولا حاجة هو علشان غناء غنوتين يبقي خلاص بيحبوه
أم العيال	:	أما صحيح حكاية غريبة
أبو العيال	:	دا كلام ميصدقهوش العاقلين
جمال	:	انا حاسس ان كل الكلام دا خيال في خيال
أبو العيال	:	يا عم دي قصته قديمة بقالها زمان ... كانوا بينيموا بيها العيال
جمال	:	ويمكن قصه جديده .. هتعيشنا في عالم اغرب من الخيال
الكاهن	:	يا ستي .. الناس بتتفرج.. بتهرج ولما بيدخل الكلام في ودانهم بيخرج تاني
ست الكل	:	يعني قصدك أيه نسيبوه
الكاهن	:	نسيبوه وهما شوية ويملوه .. ومن نفسهم هايسيبوه
جهاد	:	أيوة ... مش بقولكم الموضوع أكبر من كده دي بداية احتلال ... تمرد كبير من أعداء الظلام.
أبو العيال	:	استرها يا رب الظلام
جمال	:	أبدا ولا احتلال ولا دياولوا .. دا شكله فنان .. مشخصاتي ... ولا مغنواتي بيقول موال.
نور	:	مساكين.. الحياة بين أيديكوا ومش طايلين ..الطريق قدام عنيكوا ومش فاهمين صحيح عميان ومش شايفين ...
جهاد	:	ايه انت يا اخينا .. فاكرنا أيه مرضي ... عيانين .. ما أحنا أهو بناكل وبنشرب.
أبو العيال	:	بننام ونقوم زي الفل والياسمين بنتعلم وبنكبر وأدينا عايشين والأشياء معدن وكمان مش محتاجين.
نور	:	عشان مجربتوش تعيشوا في النور
جهاد	:	انا مش مرتاح لكلام الرجل دا
ست الكل	:	أنا خايفة ليصدقوا موضوع الفيضان ويصدقوه
الكاهن	:	فيضان أيه؟
ست الكل	:	فيضان زاحف علي البلاد .. هايخلي الناس تخاف و ... ويثوروا علينا
نور	:	يا ناس فوقوا بقي مش فاضل في الوقت كتير ... البحر زاحف عليكوا وانتوا مش دار يانين ... فيضان هايقضي عليكوا مش هايفضل صريح ابن يومين.
غالبة	:	أيوة يا جماعة أحنا فعلا شامين ... حاسين ... ريحة البحر جوانا بتكبر ويوم بعد يوم بتزيد.
نور	:	شفتوا بقي صدقتوا... البحر زاحف عليكوا من سنين خلاص مش فاضل في الوقت كتير.
أم العيال	:	متكبروش الموضوع وخلونا نروح ننام
أبو العيال	:	وبكره نشوف ونسمع الدنيا التانيه وعن الفيضان
الكاهن	:	(بعصبيه) ولا فيضان ولا حاجة دي هرطقه وسفسطه وكلام فارغ استغفر السواد العظيم ياله كل واحد على بيته مش عايزين قلق في الجزيره.
		( يخرج الشعب وتبقي غالية وعم سحاب ونور)
غالية	:	سمعت يا جدي
عم سحاب	:	يلا يا بنتي من هنا
غالية	:	استني بس .. استني بس يا جدي سمعت الراجل ده بيقول أيه
عم سحاب	:	سمعت يا بنتي سمعت ... دي تخاريف .. ألوان أيه وبتاع أيه. يللي نمشي من هنا
غالية	:	مش تخاريف يا جدي مش تخاريف
عم سحاب	:	بس يللي بينا يللي
		(يخرج عم سحاب)
غالية	:	أنت مين ... لو قربت مني ... ها أضربك لو قربت مني هقتلك
نور	:	انتي خايفة مني؟
غالية	:	كل الجزيرة خايفة منك
نور	:	لكن أنا بسألك انتي
غالية	:	أنا اشمعني أنا ...
نور	:	عشان انتي ... غالية
غالية	:	وعرفت اسمي منين
نور	:	العصفورة قالتلي
غالية	:	العصفورة ... وقالتاك أيه كمان ...
نور	:	قالتللى كلام كتير.
غالية	:	عني .. قالتلك أزاي.
نور	:	قالتلي اسمك .. وقالتلي أنك .. من صغر سنك ... بتفهمي بتسألي ونستفسري
غالية	:	أنا فعلا عايزة أسأل .. عايزة أفهم صحيح الدنيا بالألوان .. صحيح في أحمر وأصفر.
نور	:	صحيح يا غالية ... 5 حواس .. ملك وعنده 5 حواس .. يذوق ويلمس ويشم ويسمع وكمان يشوف
غالية	:	يشوف ... أزاي يشوف
نور	:	يشوف بعنيه .. ما هو ليه عنين ... أجمل عنين ... أكبر عنين .. يقدر يشوف بيها ... كل الكون .. وكل أولاده البني آدمين.
غالية	:	وأنت بقي تطلع مين...
نور	:	أنا ابنه وانتي بنته
غالية	:	بنته ... بنت مين؟
نور	:	بنت ملك.
غالية	:	كلامك غريب ... كلك غريب ... بس في حاجة أغرب .. بتخليني عايزة اسمعك نفسي أفهمك .. حتي اسمك ... شئ غريب ، نور .. كلمة نور كلمة غريبة بيتهيالي سمعت أبويا .. قالها زمان ... أصل أبويا يا ما قال .. قال كلام أحلي كلام .. قال أشعار ... وقال أمثال .. وقال حكم كتير كمان.. لكن أنت أيه اللي جابك عندنا ... واشمعنا يا نور اخترت هنا.
نور	:	انتي اسبب
غالية	:	أنا ... اشمعني أنا ... وليه تختارني بالذات أنا
نور	:	لأنك غالية طول عمرك وانتي غالية .. انتي عندي بكل الدنيا سبت العالم كله في ثانية ... انتي رسالتي قصتي وحكايتكي.
غالية	:	حكايتك .. انت أيه حكايتك
نور	:	حكايتي معاكي بقالها سنين حكاية حب حكاية حق وحكاية عمر وعليا انى أحكي القصة في كل مكان خلي كلامي يا غالية في قلبك ... بكره الحق هيبان .. بكره عنيكي تشوف النور.
غالية	:	أنت نور.
نور	:	وانتي غالية ... هو بعتني ليكي
غالية	:	هو مين؟
نور	:	ملك .. أبوكي
غالية	:	أبويه .. أنت تعرفه
نور	:	طبعا أعرفه .. هو في حد ما يعرفهوش .. في حد ميعرفش الملك
غالية	:	ملك... لكن أنا أبويا كان صياد
نور	:	ما هو كمان صياد
غالية	:	أنت هاتلخبطني ليه .. انت بتقول أيه .. أنت عايز تخرجنى من جلدي
نور	:	واخلعك من دمك  ولحمك وعضمك لو كان لازم ... المهم روحك يا غاليه ..  خمس حواس يا غاليه اداهم لولاده عشان يبقوا على شكله وصفاته واهم حاسه فيهم البصر
غالية	:	البصر
نور	:	النور يا غالية .. النظر .. دا حقك الضايع يا غالية .. عرفتي بقي أيه هي حكايتي .. حقك يا غالية مش ممكن أفرط فيه.
		(الجمله الاخيره لنور يقولها وهو يخرج هو وغاليه من المسرح)
		(يدخل الكاهن وست الكل ويمر من امام نور وغاليه وهما ينظران لهما )
لقطه		زوجي
ابو العيال	:	سمعتي نور قال ايه ..
ام العيال	:	انا بسمع كل كلامه
لقطه		فردي
جمال	:	نور قال ان فيه فيضان .. هيقضي على الجزيره كلها
لقطه		زوجي
جهاد	:	كنت فين امبارح يا عم سحاب
عم سحاب	:	كنت بسمع وعظه نور
لقطه		فردي
ام العيال	:	قال ان الدنيا فيها الوان كتيره
لقطه		زوجي
جمال	:	هتروح النهارده تحضر وعظه نور
ابو العيال	:	ايوه هيجب العيال معايا يحضروا
لقطه		فردي
عم سحاب	:	قال ان الحق مسيره هيبان
لقطه		زوجي
جمال	:	كل كلامه غريب .. بس فيه حاجه بتشد الواحد
جهاد	:	ادينا بنسمع ونشوف
لقطه		فردي
غاليه	:	قال انه النور في كل مكان .. الدنيا بره بالالوان
لقطه		زوجي
ام العيال	:	بتدور على نور ليه
جمال	:	عندى مشكله وعايز رائيه فيها
الكاهن	:	نـــــــور
ست الكل	:	هتعمل أيه ... ؟
الكاهن	:	هاعمل أيه؟ (بغضب وتحفز) .. قولي هاعمل أيه ولا أيه .. دا أنا أهد الدنيا .. اقلب عاليها وأطيها ... انسفه من علي وش الأرض .. هو مش عارف أنا مين .. ومكانتي أيه في الجزيرة .. وأقدر أعمل أيه ... دا أنا أولعها نار ... بكلمه مني .. فتيلة صغيرة وينسفوه نسف.
ست الكل	:	فتنة ... فتنة بين الناس
الكاهن	:	هقولهم دا كافر .. عايز يبعدكم عن اله الظلام .. بيكفر بظلامكم
ست الكل	:	وفي الحالة دي البلد ها تنقلب عليه
الكاهن	:	البلد نفسها هاتنقلب نصفين استغفروا السواد الأعظم .. غريب في الجزيرة و بيكفر باله الظلام .. ولا حل له الا القتل .. الجهاد في سبيل الظلام .. الحرب على الغريب.. الاستقلال التام أو الموت الزوام  .. المخرب لازم يموت ... لازم ... لازم يموت اللي اسمه نور.
ست الكل	:	مضبوط عندك حق .. وفي الحالتين أحنا الكسبانين .. في الحالتين .. كلامه مش مسموع .. و رسالته مش مفهومه .. أنا وأنت أكتر صوتين مسموعين في الجزيرة .. ومفيش صوت يعلا علي صوتنا.
الكاهن	:	ومفيش صوت يعلا علينا
ست الكل	:	وبكده كنوز الجزيرة ... وناسها ... مش ممكن تروح لحد تاني
الكاهن	:	حتي لو كان الثمن حياته
ست الكل	:	أصل الناس مش ناقصين دول غلابة يا عيني ومساكين
الكاهن	:	كل واحد بيقول يا حيطه داريني
ست الكل	:	عاوز نومه وهدمه تكفيني
الكاهن	:	وأهو كده نقسم شمل الناس نصفين
ست الكل	:	نص بيقتل
الكاهن	:	ونص بيهرب وبيخون
ست الكل	:	لا له في الطور
الكاهن	:	ولا في الطحين
		(Black)
الفصل الثاني
نور	:	غالية
غالية	:	نور
نور	:	أنتي كنتي فين
غالية	:	كنت معاك .. صدقني كنت معاك.
نور	:	معايا
غالية	:	شفتك يا نور ... شفتك .. كل كلمة قلتهالي شفتها .. كل حاجة وصفتهالي عرفتها حلمت بيها في منامي ... لأ مش عارفة أن كنت نايمة ولا صاحية .. متسألنيس يا نور.
		أمتي وأزاي وفين ... حلم ولا علم يا نور .. مش مهم . أنا فرحانة يا نور فرحانة.
نور	:	صحيح يا غالبة.
غالبة	:	صحيح يا نور .. شفت البحر والسما .. شفت الليل شفت الشمس والقمر.... شفت كل وشوش البشر .. آة يا نور ... آة شفت الأحمر والأخضر والأصفر .. تمام زي ما قلت .. كنت عارفة أنك حقيقة .. أول مرة في حياتي أحلم .. طول عمري وأنا نفسي أحلم ... كنت عارفة أنك حقيقة .. قولي يا نور حلم ولا علم.
نور		غمضي عنيكي يا غاليه ... تعالى ... اتحركي معايا ... فتحي عنيكي
		الحلـــــــــــــــــــــــم
نور	:	علم يا غالية ... علم. كل اللى شوفتيه حقيقه وهيفضل حقيقه .. طول مانتى معايا
		(يدخل الكاهن)
الكاهن	:	غالية.
غالية	:	ابو الكهان.
الكاهن	:	مين ده.
نور	:	أنا نور
الكاهن	:	ما أنا عارف انك نور
نور	:	امال بتسأل ليه.
الكاهن	:	أنا بسأل غالية بنتنا مين ده يا غالية .. أيه صدقتي كلامه.
غالية	:	ده بيقول أنه...
الكاهن	:	كداب .. كل كلامه كدب .. عايز يضحك عليكي .. وأنت مسكينة صدقيني ده محتال.
غالية	:	لا يا بو الكهان.
الكاهن	:	يبقي كافر.
غالية	:	لأ
الكاهن	:	مجنون.
غالية	:	لأ
الكاهن	:	خلاص كفرتي ببلدك .. بدينك .. بأصلك .. بالناس اللي بيحبوكي ...
ست الكل	:	غالية ... تعالي هنا قربي .. أنا سمعت عنك كلام كتير وجاني عنك أخبار أكتر ... لكن ماكنتش فاكرة إنها توصل للدرجة دي .. طول عمرك يا غالية وانتي مطيورة ... مخبولة .. لكن توصل لحد لخيانة تبقي ملعونة وستين ملعونة خرجتي عن القانون .. وده شئ لا يمكن أتهاون فيه للأسف طالعة للمرحوم أبوكى.
		(Black)
نور	:	قوليلي يا غالية الناس فى الجزيره بيقولوا ايه عنى .
غالية	:	في ناس بتقول أنك مجنون وكل كلامك خيال في خيال وناس فاكرينك محتال وناس شايفينك كافر وقالوا كما دجال.
نور	:	وانتي يا غالية ايه رأيك ؟
غالية	:	رايى  .. رايى فى ايه ؟
نور	:	رايك فى الى بيتقال
غالية	:	أنت شايف أيه ... أنت مش بتقول أنك بتشوف
نور	:	فهماني يا غاليه؟
غالبة	:	أكيد فاهماك
نور	:	ومصدقاني
غالية	:	آة .. مصدقاك
نور	:	و....
غالية	:	آة ..... أيوة يا نور
نور	:	غاليه عايز اوريكي حاجه ... ركزى في عنيا يا غاليه
		( الرؤيــــــــــــــــــــــــــا)
الكاهن	:	جهاد بتحب أله الظلام
جهاد	:	طبعاً .. أنا كلي ولاء وطاعه لأله الظلام العظيم
الكاهن	:	جهاد .. فيه حد بيكفر بألهتنا .. بيكفر بظلامكم ... عايزكم منورين عارف يعني أيه منورين
جهاد	:	( لا يجيب )
الكاهن	:	منورين يا أهل الظلام .. يعني كافرين .. جزيرتنا بضيع من أيدينا ..حتى بنتنا بنات جزيرتنا ... الغريب جي وبيفرد قلوعه .. عايز ياخد زهرة الجزيره .. أجمل بنات الجزيره
جهاد	:	مين يأ أبو الكهان
الكاهن	:	غاليه .. الغريب ضحكان عليها .. وأنا اللي كنت حجزهالك
جهاد	:	حجزهالي ...
الكاهن	:	غاليه هي اللي هتنولك مرادك .. غاليه هي اللي هتجبلك الولد اللي هيشيل أسمك من بعدك ويعوضك عن اللي فات .
جهاد	:	غاليه
الكاهن	:	أجمل عروسه في البلاد كانت هتكون من نصيبك يا جهاد ..لحد ماجه نور ولف عليها وهياخدها منك ..ويغضب أله الظلام العظيم ، مستعد تقدم أيه لأله الظلام؟؟
جهاد	:	أقدم روحي وحياتي .. أيه المطلوب مني يا أبو الكهان.
الكاهن	:	الجهاد يا جهاد.. الجهاد في سبيل أله الظلام ..الجهاد على كل من يسمع كلام الغريب اللي هياخد منك أجمل عروسه ويكفر بأله الظلام العظيم .. محتاجين نقابل الحرب اللي على جزيرتنا بأداه أقوي وليها تأثير كبير... ( يعطيه السلاح ) أمسك دا.. دا سلاحك يا رجل الظلام ... دا اللي هيرجعلك غاليه ... دا اللي هيساعدك في حربنا على نور وكل من يسمع أو يفكر في كلامه .
جهاد	:	أيوه بس الناس في الجزيره عارفيني أنا جهاد .. جارهم .. يعني مش هيكون ليا كلمه عليهم
الكاهن	:	جهاد دلوقتي غير جهاد زمان ... لبسك هيتغير ... معالم وشك هتتغير ... كلامك ... أسلوب حياتك كله هيتغير ... كل حاجه فيك ... هتبدأ من جديد ... عايزك متبقاش لوحدك أقنع أصحابك ..جيرانك..أهلك وناسك ... أنتشروا وسط الناس ...كونو منهم وعليهم ...خوفوهم ...عيشوهم في خوف أعلنو الحرب على نور ...
		(تغلق الاضاءه على الكاهن وجهاد وتستعيد غاليه وعيها )
		(يدخل عم سحاب)
عم سحاب	:	اطلعي يا غاليه سيبينا لوحدنا
غاليه	:	ايوه يا جدي بس ....
عم سحاب	:	(يقاطعها) اطلعي يا غاليه
غاليه	:	حاضر
		(تخرج غاليه)
عم سحاب	:	اسمع يا ابني أنا راجل كبير ... اسمع نصيحتي ... امشي من هنا.
نور	:	ليه يا عم سحاب.
عم سحاب	:	مكانك يا ابني مش هنا .. احمي نفسك ... انفد بجلدك .. مش هيسبوك علي أرضنا.
نور	:	ليه بس
عم سحاب	:	يا بنتي أحنا ناس عايشين في حالنا كافيين خيرنا شرنا. أفكارك كبيرة علينا .. أحلامك مش للي زينا.
نور	:	ده أنا جاي مخصوص لأرضكم.
عم سحاب	:	ارجع يا بني ... مطرح ما كنت ... إنسانا .. كأنك ما جيت
نور	:	انا مش همشي يا عم سحاب
عم سحاب	:	انت يا ابني فاكرنا أيه ... ما عندناش إحساس .. ماعندناش قلب .. ولا عقل نفكر بيه ، أنت فاكرنا جهلة مش فاهمين. ولا فاكر إنك أنت لوحدك بتشوف . أحنا كما نبقدر نشوف . يمكن معندناش بصر لكن عندنا بصيرة. ما عندناش نظر لكن عندنا بعد نظر.
نور	:	كلامك له معاني كثيرة ...
عم سحاب	:	أعمل معروف .. ابعد عني وعن بنتي .. الكلام ده ياما قاله أبوها .. وكان السبب في أنه مات ... قتلوه يا ابني .. والكلام ده نسيوه .. حرقوه .. منعوه . بقت قصة قديمة ... مالهاش في حايتنا مكان أنت عايزها ... تموت زي ما قتلوا أبوها زمان حرام عليك ... دانا بخاف من الوحدة  ... بيقتلني صوت السكوت ... يا ابني مش هايسيبوك ولا هيسيبونا أنسي يا بنى زي ما أحنا نسينا.
نور	:	مقدرش انسي .. مقدرش اسبكوا عميان . من حقكوا تثوروا . تثوروا علي الوضع اللي انتوا فيه .. وفوقوا بقي .. فوقوا قبل فوات الآوان. مش فاضل كتير علي الطوفان .. هيهد الجزيرة . ويغرق الناس معاه
عم سحاب	:	ارجوك ابعد عن غالية.
نور	:	مستحيل يا عم سحاب
عم سحاب	:	ارجوك ابعد عن غالية.
		(Black)
		(يبدا المشهد بوجود الكاهن وهو يتكلم مع جهاد واتنين معه ويتكلم معهم على ما سوف يفعلوه مع اهل الجزيره .... ثم يبدأوا بالهجوم على اهل الجزيره واخراجهم من بيوتهم وربطهم وتهديدهم بالسلاح )
أم العيال	:	( حرام عليكم )2 ... أنتم عايزين مننا أيه
جهاد	:	من النهارده أيامك كلها هتبقي كده . لو مبعدتوش عنه .محدش يسمع كلامه ولا ليكم علاقه بالكافر ده
عم سحاب	:	بتكلم عن مين يابني
جهاد	:	اللي أسمه نور
جمال	:	واحنا ذنبنا ايه ... عشان تعملوا فينا كدا
جهاد	:	ذنبكم أنكم بتسمعوله ...
ابو العيال	:	أحنا أصلا مش بنطيقوه
أم العيال	:	ايوه أحنا مش بنحبه .. فكونا بقى
جهاد	:	الجزيره بقي ليها نظام وكل من يخالف نظام الجزيره هيتعاقب.. أبعدوا عن اللي أسمه نور .
جمال	:	أنت مين .. انت صوتك مش غريب عليا .. حاسس أني أعرفك قبل كده ( يقوم يتجه نحوه )
جهاد	:	أقعد مكانك ... بقولك متقربش ...أقعد مكانك هضربك بالنار...( يطلق عليه الرصاص في كتفه )
		(يطفي النور ) ( يضاء على جمال يقع على الأرض )
جهاد		( يرمي السلاح ويجثو على ركبتيه من هول الموقف أنه قتل صديقه )
الاثنين اللي معاه		يحاولون الهرب وأيفاق جهاد وأخذ السلاح من على الأرض وشد جهاد
أبو العيال		يجري على جمال ويصرخ عليه ويحاول أيقاف النزيف ولكن يده مربوطه ويحاول فكها ...
عم سحاب		خائف جداً ويرتعش ويخبئ وجهه من هول المنظر
ام العيال		تصرخ وتبكي بهستيريا
		( يخرج جهاد )
		(Black)
الفصل الثالث
		(الكل على المسرح بما فيهم جهاد وغاليه ويظر عليهم علامات الحزن
		يخرج ابو العيال من عند جمال المصاب بالداخل)
عم سحاب	:	ها يا ابو العيال ... طمني على جمال
ابو العيال	:	حالته صعبه اوي يا عم سحاب ... الجرح غويط في كتفه ,, ومحدش عارف يخرج الرصاصه
عم سحاب	:	الجرح في كتفه بقاله يومين .. وكل يوم بينزف
جهاد	:	وهو الكاهن قال ايه ..؟
ام العيال	:	قال اقطعولوا دراعه كله وريحوه منه .. هو كدا كدا يستاهل القطع .. طالما ايده طويله
عم سحاب	:	يقصد ايه !!!
جهاد	:	يقصد انه حرامي ويستاهل قطع ايده
ابو العيال	:	انا مش عارف ايه اللى احنا فيه دا .. احنا تعبنا .. كل يوم خطف وسرقه وكل يوم واحد مننا يموت
ام العيال	:	انا حاسه اني بحلم
		(يدخل نور )
نور	:	ها طمنوني جمال عامل ايه
		(لا احد يجيب)
غاليه	:	نور كنت فين .. جمال تعبان اوي ومحدش عارف يعمله حاجه
جهاد	:	وهو يعني نور هيعمله ايه اكتر مننا
ابو العيال	:	ياعم استني يمكن يقدر يعمله حاجه
ام العيال	:	خش عليه شوفوا يمكن تقدر تعمله حاجه
		(يدخل نور على جمال)
جهاد	:	برضو مستمعتوش كلام كاهن الكهان .. ازاى بتكلموا واحد كافر ومجنون .. دا ممكن يموت جمال .. انا هدخل اشوفه بيعمل ايه
ابو العيال	:	تعالي بس يا جهاد يعني هيعمله ايه اكتر من اللى هو فيه
عم سحاب	:	وبعدين احنا لا كلمناه ولا دعناه انه يجي ويزورنا
ام العيال	:	بس انتي كويس انك مكنتيش موجوده يا غاليه يوم ما الناس الغريبه دول هجموا علينا
غاليه	:	محدش عرف مين هما الناس دول
عم سحاب	:	وهنعرف منين وازاى يا بنتي ... دول كانوا مخبين وشوشهم دا غير خوفنا منهم خالانا مش قادرين نرفع وشوشنا في وشوشهم
ابو العيال	:	بس لا يا عم سحاب .. جمال شكله عرف واحد فيهم .. لانه قبل ما ينضرب بالرصاصه قال لواحد فيهم انه زى مايكون صوته مش غريب عليه
جهاد	:	بخوف ) هو جمال قالكم هو مين)
ابو العيال	:	للاسف ملحقش .. بس هنعرف
عم سحاب	:	يعني تفتكروا مين !! حد من اهل جزيرتنا
ام العيال	:	مش معقول ياعم سحاب
جهاد	:	خلاص بقي فضوها سيره خالونا الاول في جمال ...(يخرج نور ) اهو الحكيم طالع من عنده
غاليه	:	ها يا نور طمنا
نور	:	خلاص اطمنوا النزيف وقف .. ويومين تلاته وهيبقي زى الفل
ام العيال	:	تسلم ايدك يا راجل يا امير
ابو العيال	:	الراجل دا مش ممكن يكون انسان .. ده ملاك نازل من عند رب الظلام
عم سحاب	:	او يمكن يكون نبي من انبياء الظلام
جهاد	:	و يمكن يكون شيطان
ابو العيال	:	لا لا دى معجزه من معجرات الزمان
نور	:	ولا معجزه ولا حاجه يا جماعه ..
		(يدخل الكاهن)
الكاهن	:	ايه اللمه دى يا اهل الظلام ؟
الجميع	:	ابو الكهان ...
جهاد	:	ابدا يا ابو الكهان دا جمال كان لسه تعبان بينزف وخلاص
الكاهن	:	خلاص ايه .. مات
ابو العيال	:	مات ايه يا ابو الكهان .. الشر بره وجوه .. دا نور "اله الظلام يباركله" شفي جمال ونجاه من الموت
ام العيال	:	ده طلع راجل امير وشهم وعنده ضمير
الكاهن	:	بس اسكتوا ولا كلمه ... شهم ايه وامير ايه يا مجانين ازاى تصدقوا الغريب .. وهو مشكوك فيه
الجميع	:	مشكوك فيه
الكاهن	:	ايوه يا اهل الظلام .. هو الغريب كان فين لما الاغراب هجموا عليكم و كانوا عايزين يموتوا جمال .. ها رودوا يا عاقلين ليه ميكونش الغريب جاب اهل جزيرته وهجموا عليكم في انصاص اليالى عشان يسرقوكم ويخاوفوكم ... وهو احنا من امتى وجزيرتنا فيها الكلام دا ..
الجميع	:	ايوه صحيح كلامك معقول .. عندك حق يا ابو الكهان
الكاهن	:	يا اهل الظلام دا شيطان .. شيطان ومتخفي في شكل انسان .. ابعدووووا عن الشيطان
		(الكل يهرب من المسرح وعم سحاب ياخد غاليه معه ويهرب)
الكاهن	:	أيه رأيك ..
نور	:	لا يجيب . (انت عايز أيه؟ )
الكاهن	:	كل كنوز الجزيرة ملكي أطلب اللي أنت عايزه بس تخضعلي
نور	:	للأسف مش دي رسالتي ... مش هو دا اللى خلاني ابعد عن بلدى
الكاهن	:	علي رأيك .. عايز ترجع بلدك ... هسيبك نرجع بلدك ... بس تتفق انك تقف عند حدك...وتبعد عن غاليه.
نور	:	أهو كله ألا غاليه .. غالية بالذات أنت ملكش دعوة بيها ... وأنت أصلا مالكش حاجه فيها.
الكاهن	:	الناس ... كل الناس ممكن أخليها تخضعلك وتبقي تحت أمرك .. بس أنت اسكت .. تقفل بقك ومتقومش الدنيا علينا .. وأديك يا سيدي قاعد مستور وسطينا وتخلي ولاءك لينا.
نور	:	خلاص خلصت كلامك .. قلت كل اللي عندك... انا مش هسيب الجزيره ولا هبعد عن غاليه
الكاهن	:	يعني برضه بتتحداني ... الصراع حيفصل بينك وبيني وأوعدك ... هانتقابل تاني ...
		(يخرج نور والكاهن )
		(يدخل جهاد وهو يفكر ثم يجلس ويدخل عليه ابو العيال)
ابو العيال	:	مالك يا جهاد ... قاعد لوحدك ليه ؟
جهاد	:	لا عادي .. عايز اقعد لوحدي شويه
ابو العيال	:	مش طبعك يا جهاد .. على فكره انا حاسك متغير من ساعه الحدثه بتاعت جمال
جهاد	:	ما احنا كلنا واحنا خايفين ومتغيرين بسبب اللى بيحصل في الجزيره
ابو العيال	:	بس لا ... انت خوفك .. خوف من نوع تانى .. اهل الجزيره خايفين من اللى بيقتل .. اللى بيموت .. اللى بيرهب الناس .. انما انت خايف من حاجه تانيه .. زى ما تكون مخبئ حاجه علينا ومش عايز تقول عليها .. خايف الناس تعرفها وتكشفها
جهاد	:	تقصد ايه ..؟
ابو العيال	:	اقصد ان مش جمال بس اللى عرف الغرب اللى هجموا على الجزيره ..انا عارف .. انت اللى ضربت جمال بالنار وهجمت على الجزيره .. جهاد .. انا مقولتش لحد .. عرفت وسكت .. بس
جهاد	:	بس ايه ..
ابو العيال	:	بس سكوتي دا مش هيدوم كتير من حق اهل الجزيره يعرفوا من اللى بيقتل ولادهم وبيرهبهم .. مين اللى بيسرق فرحتهم .. الا اذا
جهاد	:	الا اذا ايه ..؟
ابو العيال	:	الا اذا ....
جهاد	:	عايز ايه يا ابو العيال
ابو العيال	:	العيال محتاجين مصاريف كتيره .. والعيشه صعبه .. وانت عارف اخوك .. ضارب تفليسه
جهاد	:	عايز فلوس
ابو العيال	:	ثمن سكوتي ... مش شفقه ولا عطف .. انا ميهمنيش انت بتعمل كدا ليه ولا حتي لحساب مين .. انا اللى يهمني اني اكسب من ورا اللى بيحصل .. يا اما عليا وعلى اعدائي .. من بكره هتلاقي اهل الجزيره كلهم عارفين من اللى خان ومين اللى قتل
جهاد	:	هتاخد اللى انت عايزه يا ابو العيال
ابو العيال	:	من النهارده ايدي في ايدك .. قولى اللى انت عايزه وانا انفذه... من النهارده انا عنيك في الجزيره .. دراعك الشمال ..كل الاخبار اللى عايزها هتلاقيها .. لو عايز تكبر فكره في عقول الناس ، هتلاقيني انا اللسان اللى هيزن على ودانهم .. طول مانت بتراعيني في حقي .. فلوسي
		(مشهد حركي)
نور	:	ياناس فوقوا مش فاضل في الوقت كتير .. البحر زاحف عليكم وانتوا مش داريانين .. فيضان هايقضي عليكم مش هيفضل صريخ ابن يومين
لقطه اولي	:	عم سحاب - جمال
		يتحدثان وياتي اليهم ابو العيال يسمع حوارهم باصغاء
		يتركهم ابو العيال ويذهب الى زوجته ام العيال ويسمع لها حوار صغير في حركه سريعه وهم ذاهبون الى وعظه نور
لقطه ثانيه	:	وعظه نور
		يأتي اليه اولا عم سحاب - جمال
		ثم ام العيال وابو العيال يستمع الى الحوار وسريعا يقوم ويترك الوعظه والباقي جالسون في اماكنهم ولكن تتحرك نظرات نور معه
لقطه ثالثه	:	يقف جهاد منتظر قدوم ابو العيال له بالاخبار
		ياتي اليه ابو العيال يخبره بالاخبار
		يتركه جهاد ويذهب الي الكاهن وينقل له الاخبار
		الكاهن يعطي لجهاد نقود
		يتحرك جهاد الى ابو العيال ويخبره بالفكره الجديده التي سوف يزرعها في عقول اهل الجزيره ويعطيه النقود
لقطه رابعه	:	ام العيال - غاليه
ام العيال	:	هو كان بيقول ايه؟
غاليه	:	فيضان هيقضي علينا كلنا .. مش هيفضل صريخ ابن يومين
		يصل اليهم ابو العيال
ابو العيال	:	ولا فيضان ولا حاجه .. دى هرطقه وكلام فارغ .. استغفر السواد العظيم
لقطه خامسه	:	جهاد - عم سحاب
جهاد	:	شوفت اللى حصل .. الغرب هجموا ليله امبارح على بيت سليمان
عم سحاب	:	نفسي اعرف هما مين دول
لقطه سادسه	:	جمال -ام العيال - ابو العيال
ابو العيال	:	هو نور مفيش غيره .. كلنا شاكين فيه
ام العيال	:	دا اكيد مجنون ومعتوه
لقطه سابعه	:	مجمعه يتحدث اولا نور ثم الباقي في مره واحده
نور	:	مساكين .. الحياه بين ايديكم ومش طايلين الطريق .. قدام عنيكم ومش فاهمين صحيح عميان ( تكرار لنهايه المشهد )
جمال	:	عايز انتقم من اللى ضربني بالنار .. ساعدني ياله الظلام ... ( تكرار لنهايه المشهد )
ام العيال	:	دا مجنون ومعتوه .. ولا بنحبه ولا حاجه هو عشان عني غنوتين يبقي خلاص ( تكرار لنهايه المشهد )
جهاد	:	استغفر الظلام العظيم .. نور دا كافر كفر باله الظلام العظيم ( تكرار لنهايه المشهد )
غاليه	:	كل دي الوان صدقوني .. ولكل لون وجود .. انا شوفته شوفت النور والحق .. نفسي تشوفوه زى بالظبط ( تكرار لنهايه المشهد )
عم سحاب	:	ماحنا طول عمرنا عايشين بنام ونقوم زى الفل والياسمين .. بنتعلم وبنكبر وادينا عايشين والاشيه معدن ( تكرار لنهايه المشهد )
		(Black)
		(تفتح الستاره على وجود نور وغاليه وابو العيال وام العيال وعم سحاب وجمال)
ابو العيال	:	يعني انت دلوقتي عايز ايه مننا
نور	:	عايزكم تفوقوا تفتحوا عنيكم .. تعرفوا فين الحق .. عايزكم تشوفوا النور
جمال	:	تاني النور... ياعم ارحل عن جزيرتنا وسيبنا هنا .. انت عايز تورينا حاجه احنا اصلا عمرنا ما فكرنا فيها ولا شوفناها
غاليه	:	انا شوفت وعشت في النور .. احساس حلو انك تبقي عايش طول عمرك في الظلمه ويجيلك حد يكونلك زى طوق النجاه ويفتحلك عنيك وتشوف النور
نور	:	طول عمركم عايشين في الظلمه .. جربوا مره تشوفوا النور
ام العيال	:	واحنا ايه يضمن لينا ان النور احسن من الظلمه اللى احنا عايشين فيها طول عمرنا
نور	:	وانتي هتعرفي منين حلاوه الحاجه غير بعد ما تجربيها
غاليه	:	نفسي تشوفوا الدنيا اللى بره بالالوان
نور	:	الدنيا فيها من الالوان اشكان كتيره الاحمر احمر والاخضر احضر
غاليه	:	وفيه الرمادي والبرتقالي كمان
نور	:	كل دى الوان انتوا حارمين نفسكم منها ومش شايفنها
ابو العيال	:	احنا مش محرومين من حاجه .. ما احنا اهو بناكل وبنشرب
جمال	:	بنام ونقوم ... زى الفل والياسمين .. بنتعلم وبنكبر وادينا عايشين
نور	:	يا ناس فوقوا بقي مش فاضل في الوقت كتير .. البحر زاحف عليكم وانتوا مش داريانين .. فيضان هايقضي عليكم ومش هيفضل صريخ ابن يومين
غاليه	:	من زمان واحنا شامين .. حاسين .. ريحه البحر جوانا بتكبر ويوم بعد يوم بتزيد ... وفيضان وشايل معاه تمرد وتغير
الجميع	:	ولا فيضان ولا تغير ... دى هرطقه وكلام فارغ .. استغفر اله الظلام العظيم
نور	:	الحق .. عايزكم تشوفوا الحق ... طول عمركم عايشين في الظلمه وعايشين في الجوع .. ليه مش عايزين التغير
عم سحاب	:	الخوف ... الخوف مقابر بنندفن فيها
نور	:	ليه ..؟؟ فكوا قيود الخوف
عم سحاب	:	كلامك ملهوش فايده معانا يا نور ... امشي من هنا وسيبنا احنا كدا عاجبنا حالنا ومرتحين
غاليه	:	لو نور مشي من هنا انا همشي معاه
نور	:	مستحيل اسيبكم وانا جي عشانكم
		(يدخل جهاد ووراءه الكاهن)
الكاهن(جهاد)	:	محدش هيمشي من الجزيره
الجميع	:	جهاد!!!!
الكاهن(جهاد)	:	ايوه جهاد ..
ام العيال	:	مش مصدقه عنيا
الكاهن(جهاد)	:	مش مصدقه ليه ... ايه الغريب .. انا جهاد .. رجل الظلام .. انا هنا اللي بحافظ على نظام الجزيره
جمال	:	يعني انت اللى كنت عايز تموتني (يهجم عليه)
الكاهن(جهاد)	:	ارجع مكانك .. انا مستعد اموت اي حد يهدد نظام الجزيره ويكفر باله الظلام العظيم .. اي حد يخالف تعليمات كاهن الكهان
عم سحاب	:	وانت مين عشان تتحكم فينا وتموتنا .. مين اللى وصاك علينا
الكاهن(جهاد)	:	وصيتي عليكم جايه من اللى اعلى مني ومنكم .. انا ليا سلطان عليكم كلكم
ام العيال	:	انت ملكش سلطان علينا ولا تقدر تعملنا حاجه
الكاهن(جهاد)	:	لا اقدر
عم سحاب	:	ودا من امتى وانت تقدر
الكاهن(جهاد)	:	من زمان ... من زمان اوى ... انا الخوف اللى جوه كل واحد فيكم .. انا الحيره .. انا الطمع .. انا الشهوه... انا روح اللامباله وعدم التغير
جمال	:	انت متقدرش تعملنا حاجه
الكاهن(جهاد)	:	انا هوريكم ... يا اله الظلام العظيم
		(مشهد حركي يظهر قوه الكاهن(جهاد) ويكون له تاثير على كل الموجودين فيما عد نور وغاليه)
الجميع	:	ارحمنا يا اله الظلام العظيم
غاليه	:	ازاى بتستنجدوا بيه .. وهو اللى بياذيكم
الجميع	:	احنا خايفين .. ارحمونااا
نور	:	اوعوا تخافوا ... طول عمركم خايفين .. دا الوقت اللى تكونوا فيه شجعان
الجميع	:	مش قادرين
نور	:	انتوا مجربتوش .. روح الياس والخوف اللى جواكم هي اللى مخلياه متملك منكم
الكاهن(جهاد)	:	نـــــــــــــور .... عايز مني ايه
نور	:	جي انقذهم من كذبك ... من ظلمك ... عمر الظلمه في يوم هتدوم .. لازم يجي في كل يوم فجر جديد
الكاهن(جهاد)	:	دا بيتهيالك ... القصه انتهت
نور	:	القصه لسه منتهتش ... والحكايه يا دوب ابتدت ... مخلصتش
الكاهن(جهاد)	:	الارض ارضي ... والناس بتوعي ... الدنيا كلها ملكي .. ملكي انا اله الظلام العظيم
غاليه	:	يا اله النور والحق ...انر عيونا وقلوبنا
الكاهن(جهاد)	:	أأه .. الموت نهايتك يا غاليه
نور	:	كله الا غاليه .. حياتي فداكي
		(يموت نور بدلا عن غاليه)
نور	:	القصه لسه منتهتش ... والحكايه يا دوب ابتدت ... مخلصتش طول ما فيه غاليه .. هيفضل نور ... طول ما كلامه في قلبها محفور .. هتفضل غاليه غاليه في عنين نور ..صحيح مات وضحي بحياته علشانها بس دا مش معناه انه هيسبها لوحدها في دنيا الظلام .. دا هو اسمه نور .. واللى يشوف النور وعينه تتملى منه مستحيل يرجع يغمض تاني
		بتكلم عن اللى مات علشانا .. مات عشان نعيش في النور
غاليه	:	انت مين
نور	:	انا نور يا غاليه
غاليه	:	نور !! نور مات خلاص وسابني
نور	:	نور مستحيل يسيبك يا غاليه .. انتى محفوظه جوه قلبي
غاليه	:	انت صحيح نور .. مش مصدقاك
نور	:	غمضي عنيكي يا غاليه ... تعالى ... اتحركي معايا ... فتحي عنيكي

النهاية 

 لتنزيل المسرحية للطباعة بصيغة ال word

 أضغط هنا