مسرحية المحاكمة

 المحاكمة

يفتح الستار على منظر المحكمه والحاجب يمسك اوراق القضايا فى يده

الحاجب	كل يوم قضايا وورق ومتهمين والقاضى بقى (يقلد القاضى) انت يا ابنى انده على القضيه ايه الكسل اللى انت فيه ده .... يا رب ريحنى بقى من الشغلانه دى صوت القاضى من الخارج
الحاجب	يا نهار اسود ده القاضى جه بس بس اسكتوا محدش يتكلم (ثم يدخل القاضى)
القاضى	صباح الخير
الحاجب	تمام يا فندم صباح النور
القاضى	انا كنت سامع صوتك من بره كنت بتكلم نفسك ولا ايه اكيد القضايا و المتهمين خلوك اتجننت هاهاهاهاهاهاهاههاا ( ينظر الحاجب الى القاضى باستغراب ) ايه ده انت مش بتضحك ليه
الحاجب	هاهاههاهاها ده دم حضرتك خفيف اوى يا فندم ( باشمئزاز )
القاضى	احم احم احنا هنفضل طول اليوم نضحك ولا ايه .... ايه الكسل اللى انت فيه ده .... اخبار الشغل ايه
الحاجب	تمام يا فندم ..... الشغل انهارده كتير اوى يا فندم عندنا قضايا كتيير و فيها قضايا قديمه كمان
القاضى	قضايا قديمه ؟؟؟ لما نشوف ... ورينى الورق اللى معاك ده
الحاجب	اتفضل حضرتك يا فندم
القاضى	ايه الورق ده كله .... ده احنا باين علينا هنبات فى المحكمه انهارده ... وايه الورق الاصفر ده ... دى بقالها كام سنه القضيه دى .... يلا هنسبها للاخر ... انده بقى على اول قضيه خلينا نشوف شغلنا
الحاجب	تمام يا فندم .... المتهم الأول .... لوزه (تدخل لوزه)
القاضى	اسمك لوزه
لوزه	ايوه يا فندم اسمى لوزه
القاضى	انتى متهمه بالنميمه على صاحبتك فى الفصل
لوزه	يا فندم انا كنت بقول الحقيقه .... ما هى فعلا رخمه وكمان هدومها على طول مش نضيفه ومش شاطره فى المدرسه كمان
القاضى	يعنى انتى مثلا مفكيش عيوب ... وحتى لو كلامك صح انتى ليه تتكلمى عليها
لوزه	يا فندم اصل يعنى دى حاجه صغيره يعنى وبعدين....
القاضى	(مقاطعاً) مافيش حاجه اسمها صغيره انتى عملتى جريمه ولازم تتعاقبى عليها ...ها عندك محامى يدافع عنك
لوزه	لا معنديش
القاضى	معندكيش !!! طيب حطها فى القفص يا ابنى لغاية ما نشوفلها محامى
لوزه	قفص ... ليه يا فندم دنا مظلومه ... مظلومه صدقنى
القاضى	خلااص امشى وانتى ساكته ها يا ابنى القضيه اللى بعدها ايه
الحاجب	(ينظر للورق باستغراب) نعم ؟؟ ده ازاى ده
القاضى	مالك يا ابنى هترجع تانى تكلم نفسك
الحاجب	اصل يا فندم القضيه التانيه بأسم اااااا ؟
القاضى	ما تقول يا ابنى مين المتهم ( صوت دوشه من الخارج ويدخل بطرس والجاريه من المنتصف) ايه الدوشه دى روح شوف فى ايه بره
الجاريه	ايوه انت كنت مع يسوع انا شوفتك ...
بطرس	ايه ده يسوع مين معرفش حد بالاسم ده
الجاريه	لا انا متأكده انى شوفتك معاه بالأماره كمان ساعة معجزة اشباع الجموع
بطرس	يا ستى قولتلك معرفوش انتى بتتكلمى على ايه اصلا
الجاريه	ايوه انت كنت معاه حتى كمان طريقة كلامك زيه
بطرس	يوووووووووه يا ستى قولتلك معرفوش سبينى بقى ( صوت صياح الديك وصوت خارجى للرب يسوع : قبل أن يصيح الديك تنكرنى ثلاث مرات )
القاضى	ايه الدوشه دى ..اخرج يا ابنى شوف ايه اللى بيحصل
الحاجب	تمام يا فندم ... ايه الدوشه دى فى ايه
الجاريه	الراجل ده كان مع يسوع وكمان كان بينكره... انا شوفته بعينى
الحاجب	ايه ده انت اسمك ايه
بطرس	انا اسمى بطرس (بتردد)
الحاجب	( ينظر فى ورق القضايا) بطرس ؟؟ ده الموضوع بجد بقى ... طيب يلا امشى قدامى لما نشوف اخرتها
القاضى	ايه يا ابنى اللى بيحصل عندك
الحاجب	تمام يا فندم .... الراجل ده معاد جلسته انهارده
القاضى	انهارده ايه بالجلابيه اللى هو لابسها دى ... دى من سنة كام ... اسمك ايه يا ابنى
بطرس	سمعان ابن يونا سابقا بطرس حاليا
القاضى	اه انت جاى تهزر بقى
الحاجب	لا يا فندم فعلا ورق القضيه موجود عندنا و معاده انهارده
القاضى	حاجه غريبه دى ... طيب هات ورق
الحاجب	تمام يا فندم ( ويضع الورق امامه)
القاضى	ايه ده ... انت متهم بإنكار الرب يسوع
بطرس	(بندم ) ايوه ... انا انكرته
القاضى	انت ازاى تعمل كده ... هو انت مكونتش بتحبه ولا ايه
بطرس	لا طبعا انا بحبه جدا .... بس
القاضى	استى استنى ... ده كمان ورق القضيه بيقول انك كنت قايله انه حتى لو مات انت هتموت معاه ... اومال ايه اللى حصل
بطرس	يا فندم اصل الموضوع كان صعب الصليب ده صعب اوى مش حاجه بسيطه عشان الواحد يروحها برجليه ده فيه غذابات كتير مش بس دقة المسمار اللى صعبه ده كل حاجه فيه صعبه ... انا بصراحه خفت اموت بالصليب
القاضى	انا مش عارف اقولك ايه ... انت اللى زيك كان لازم يموت من ساعة ما اتولد اصلا ....
بطرس	انا عارف انى غلطان ومستعد لاى عقاب
القاضى	عندك محامى يدافع عنك
بطرس	لا يا فندم ... معنديش
القاضى	حطه يا ابنى فى القفص لغاية ما نلاقيله هو كمان محامى ( يدخل بطرس القفص ويبدأ فى الصلاه)
بطرس	يا رب انا عارف انى غلطان مكانش المفروض اعمل كده بس انا بطلب منك انك تسامحنى وساعدنى يا رب معملش كده تانى امين
لوزه	انت بتعمل ايه ... اكيد هيتحكم علينا بالاعدام
بطرس	لا انا متأكد ان لو طلبنا ان ربنا يغفرلنا هو مش هيسبنا واكيد هيغفرلنا صلى انتى كمان عشان ربنا يغفرلك... هو اكيد هيغفرلك
لوزه	يا رب انا كمان عارفه انى غلطت ومكانش ينفع اتكلم على صاحبتى ده غير حاجات تانى كتير بعملها غلط انا اسفه يا رب وساعدنى معملش الحاجات الغلط دى تانى
القاضى	ها يا ابنى فى قضايا تانى ولا ايه ....
الحاجب	فاضل قضيه واحده بس( يدخل يهوذا من المنتصف ومعه النقود وصوت الرب يسوع من الخارج: ياويل الشخص اللى هيخونى )
يهوذا	ايه ده ... ايه الصوت ده ... مين بيتكلم
رجل من العامه	انت اللى خنت الرب يسوع .... ايوه انا شوفتك وانت طالع من عند الكهنه
يهوذا	ابعد عى يا راجل انت .. انت تعرفنى منين (يتبادلا المشاجره)
القاضى	ماهو مش معقول كل شويه تحصل دوشه احنا فى محكمه مش فى سوق هنا ... روح يا ابنى شوف فى ايه بره
الحاجب	تمام يا فندم .. روح .. تعالى ..  هات .. حط .. مش هنخلص بقى انهارده ... فى ايه مالكم انتوا مش عارفين ان دى محكمه ولا ايه احنا مش فى سوق هنا فى ايه
الرجل	الراجل ده انا شوفته وهو خارج من عند الكهنه هو اللى سلم يسوع ليهم
الحاجب	وانت اسمك ايه بقى
يهوذا	انا يهوذا الأسخريوطى
الحاجب	اه ماهى كملت بقى تعالى قدامى
القاضى	ها جايبلنا ايه المره دى
الحاجب	تمام يا فندم .. ده يهوذا الأسخريوطى
القاضى	يا رب صبرنى... وده برضه معاد جلسته انهارده؟؟
الحاجب	( ينظر فى الورقه ) ايوه يا فندم معاده انهارده
القاضى	طيب هات ورق القضيه ( يضع ورق القضيه امامه ) يا نهار مش فايت انت ايه اللى عملته ده؟
يهوذا	اصل يعنى يا فندم
القاضى	(مقاطعاً) اصل ايه بس انت سلمت الرب يسوع للصلب يعنى انت شاركت فى قتله انت عارف المصيبه اللى عملتها
يهوذا	ايوه انا غلطان اقتلنى انا مستاهلش اعيش
القاضى	تتقتل ... ده اقل واجب ... عندك محامى يدافع عنك
يهوذا	لا معنديش
القاضى	حطه يا ابنى جنب اخواته هنا خلينا نشوف اخرتها
يهوذا	(يدخل القفص) انا ايه اللى عملته ده .. انا مستاهلش اعيش ... مستاهلش حتى انى اصلى انا غلطان ... مش ممكن ربنا يسامحنى
بطرس	انت بتقول ايه مهما كنت غلطان ربنا بيسامحنا هو عظيم اوى و بيحبنا اوى اكيد هيسمحك لو طلبت منه ده
يهوذا	لا ... انا غلطتى كبيره اوى مش ممكن يسامحنى مش ممكن ( يذهب ويشنق نفسه)
القاضى	طيب وبعدين ... عندنا 3 متهمين مش لاقيين ليهم محامى ... ف اى محامى موجود هنا فى القاعه يدافع عنهم ... انا كده لازم احكم عليهم .. خلاص انا عملت اللى عليا وبعد اعترافات المتهمين وعدم وجود دفاع لهم لقد حكمت المحكمه حضوريا على المتهمين الثلاثه بالاعدام وفقا للقانون رقم واحد واللذى ينص على أن اجرة الخطيه هى موت ... رفعت الجلسه ( يسوع يدخل من المنتصف )
يسوع	لا يا سيادة القاضى
القاضى	ايه ده مين اللى اتكلم
يسوع	انا المحامى بتاع المتهمين
الحاجب	ده .... ده .... لا مش ممكن ده يسوع
بطرس	ايوه هو ده يسوع ... (للوزه) مش قولتلك انه مش هيسبنا
القاضى	انت جيت متأخر اوى انا خلاص حكمت عليهم
يسوع	انت حكمت حكم ظالم انا دفعت تمن اللى هما عملوه ده من زمان اوى حتى شوف مكان المسامير ... انا خلاص مت بدالهم هما مش هيموتوا
لوزه	ايه ده بجد ... يعنى انا مش هموت ... اشكرك بجد يا يسوع انا بحبك اوى
يسوع	وانا كمان بحبكم كلكم اوى اوى اوى
بطرس	شوفتوا يا ولاد ... شوفتوا الرب يسوع حنين ازاى وبيحبنا ازاى ... مهما كنا عاملين خطايا هو مستعد يغفرها ... بس احنا لازم نقرر نبقى عايشيين ليه بجد ... ولو غلطنا على طول نروحله وهو هيسامحنا ... اوعوا تعملوا زى يهوذا

 ( ستار النهاية)

لتنزيل المسرحية للطباعة بصيغة ال word

اضغط هنا