أسكتش بابا نويل ستايل

 

أسكتش بابا نويل ستايل

 

تفتح الستار علي فصل ف الكنيسه ويجلس ثلاثة مخدومين

 ماجد            ها يا جماعه بقالنا ساعتين مش عارفين نوصل لفكره جديده

رامي            الصراحه انا جعان ولما بجوع الدماغ بتقف

ماجد              ياعم ارحمني ده انت ف خلال الساعتين واكل 3 مرات ده نت ناقص نك تاكلنا

رامي           وهي يعني الافكار بتيجي كده من الهوا ؟

مينا             " يقوم ويمشي وينظر الي فوق ثم يقف وراء رامي " تخيلوا كده بابا نويل وهو

                السنه دي بيوزع حاجه جديده .. "يغير صوته" تتوالي المفاجأت ونلعب بالكلمات

ماجد          كلام جميل بس يعني ايه برضه

مينا            انتوا عارفين لو بابا نويل طلع بشكل جديد ... شكل مختلف ... شكل فيه تطور

                اللي احنا فيه

رامي           صدقني انت لو جبتيلي اكل هتلاقيني متجاوب معاك

مينا              ياعم رامي الاكل مش كل حاجه . ليس بالخبز وحده يحيا الانسان

رامي           ايوه بس برضه الفاعل مستحق اجرته

ماجد           بلاش فلسفه انت وهو . عايزين نخلص  .. قولولي ايه اهم حاجه ف العيد

رامي           طبعا الاكل واللحمه والفراخ وياسلام بقي لو في مكرونه بالبشاميل

ماجد            يا ابني ارحمني بقي

مينا           اهم ما ف عيد الميلاد بالذات

ماجد          "يكلم رامي" ايوه بقي اسمع اسمع واتعلم

مينا            اهم ما ف عيد الميلاد ان الواحد بيلبس لبس تقيل ويعرف يتشيك براحته

رامي           ولا ف الكريسماس بقي مليان حاجات مهمه ومفيده واهم حاجه هي شجرة

                 الكريسماس

ماجد            انتوا الاتنين هتفقعولي المراره "يرن جرس تليفونه " ألحقوا امين الخدمه بيتصل بيا

 

مينا             طمنه وقوله كله تحت السيطره

رامي         حبيب قلبي سلملي عليه

ماجد          اذيك ياريس .. احنا الحمد لله تمام... اه قاعدين بنحضر اهوه وفي كام فكره جت

                 ف دماغنا  ... لازم نركز العيد ده علي مريم المجدليه وزيارتها للقبر

رامي          يا ذكي مريم المجدليه ايه هتودينا ف داهيه

ماجد          اقصد مريم العذراء ... ماشي ياريس .. ماتقلقش .. يالا سلام

رامي          "يضحك" قال مريم المجدليه ف عيد الميلاد قال وهو اللي عمال يعيب علينا

                  وعاملنا فيها الكبير واللي فاهم .....

 

“يدخل راجل لابس لبس صعيدي"

الصعيدي        مساء الخيييير

مينا              وانت مين انت كمان

الصعيدي       ايه ده انتوا مش عارفيني ؟

ماجد             لا محصلناش الشرف قبل كده

رامي            ايوه انا عارفك

الصعيدي         ايوه بقي قول

رامي           انت فراش الكنيسه الجديد .. صح ؟

الصعيدي        فراش ايه يا عمنا

مينا             قول وخلصنا

الصعيدي         طيب اسهلهالكم ... انا اسمي مكون من 8 حروف  وكان ليا دقن وحلقتها

رامي             "يفكر" اسمك من 8 حروف تبقي اسمك  ....... سان سيمون

الصعيدي          لا سان سيمون دي مكتبه ف اول شبرا

مينا                قولنا انت وخلص .. عندنا اجتماع مهم

الصعيدي        حاضر ياعم ماتزوقش .... انا بابا نويل

ماجد            بابا مين يا خويا !!

الصعيدي         بابا نويل

ماجد             ده علي اساس ايه بقي ان شاء الله ؟

الصعيدي        اه انا عارف اني لما حلقت دقني بقيت مش معروف

مينا             يعني انت كده بابا نويل ؟

الصعيدي        أكيييد طبعاا

مينا             طيب فين بقي كيس الهدايا اللي بيكون معاك

الصعيدي         كيس الهدايا ده كان زمان ..... وباخده احيانا لما بروح لاطفال . لكن انتم

                  ماشاء الله كبار وذي القمر

رامي           امال بتوزع ايه

الصعيدي        "يخرج موبايله من جيبه" بوزع لايكات

ماجد           يا سلام

الصعيدي        اه ولو حد حبيته قوي بعمله لايك وكومنت .. لازم اتطور مع الجيل الجديد

                 ... طيب عارفين انا جاي اذاي ؟

مينا              ازاي

الصعيدي          جاي بالجاموسه ..ورابطها تحت قدام باب الكنيسه .

ماجد           انت شكلك فايق

الصعيدي        فايق ماشفش حاجه "يضحك"

رامى          لا بقي ده انت خفيف كمان

الصعيدى        ايوه مش انا بابا نويل .. يبقي لازم يكون دمي خفيف

ماجد             طيب وبعدين يعني

الصعيدي        ولا قابلين  ... يالا يا بتاع الموسيقي شغل ترنيمة بابا نويل ........

 

"تشتغل ترنيمة بابا نويل احنا فاكرينك  ... والصعيدي يعمل استعراض كوميدي ع الترنيمه"

 

مينا            انت رائع يا بابا نويل

رامي         عارف بقي لو معاك أكل تبقي رائع أكتر وهقتنع كمان انك بابا نويل ..

ماجد           عارفين رغم الهبل اللي بيهبله الراجل ده بس اداني فكره جديده

الصعيدي        بقي انا بهبل .... طيب .. انا ماشي  "يخرج ثم يدخل تاني " انا ماشي

مينا              ما احنا سمعنا

الصعيدى       امشي يعنى

رامي          ماهو قالك امشي ياعمنا

الصعيدي       طيب    " يحط طرف الجلبيه ف بوقه ويخرج"

مينا             يا ساتر ... ده راجل رخم .. قال بابا نويل قال  ... ده بابا جعيدي .

ماجد           عارفين بقي انا هقولكم حاجات كتير علي بابا نويل

رامي             شكلك محضر من ورانا يا عفريت

ماجد            عيب عليك انا بسكت بسكت بس لما بتكلم محدش بيتكلم بعدي

مينا               طيب قولنا بقي علشان زمان الاستاذ جاااي وهيجي يلاقينا لسه ماعملناش حاجه

                               " ماجد يحضر ترابيزه وكرسي ويجلس ويقلد المتكلمين"

ماجد          بسم الاب والابن والروح القدس الإله واحد امين .. انهارده يا اخواتي هنتكلم                          

               عن الكريسماس وطبعا اهم شخصيه ف الكريسماس هي بابا نويل

 

                              "يدخل الخادم ويقف وراء ماجد بدون ان يتكلم"

ماجد              بابا نويل اسمه الحقيقي بابا نويل ... وكان راجل عادي زينا .. كان قريب من كل

                    الناس ....

الخادم             يا ابني حرام عليك .. ده انت بتقول حاجات غلط

مينا                صدقني يا استاذ عمال اقوله كده وهو مش مقتنع ... بس انا عايز اسأل سؤال

                    مهم قووي  بقالي فتره مش لاقيله جواب

الخادم              وماله أسأل

مينا              هي مرات بابا نويل كان اسمها ايه الحقيقي ؟

رامي             ايه السؤال الذكي ده .. انت سقطت من نظري قوي يا مينا

الخادم           قوله يا رامي قولي .. ايه الاسأله دي يا مينا .. س انا هخلي رامي هو اللي يرد

                   عليك

رامي            ماشي يا استاذ .. مرات بابا نويل .. طبعا كان اسمها ماما نويل

الخادم            يا سلام ع العقل الكبير ... بقي بابا نويل كان متجوز

ماجد               طبعا يا استاذ امال جابوا نويل منين ..

الخادم           اولا بابا نويل ماكنش متجوز وكان أسقف وكان قديس عظيم

                 حد عارف بقي اسماء بابا نويل ايه ؟

رامي             طبعا طبعا مالوش اسماء تاني .

الخادم             لا اسمه سانتا كلوز ونيقولاوس وبابا نويل وبنحتفل بعيد نياحته في 10 كيهك

مينا               انا عارف المعلومه دي وكمان كان اسقف

الخادم            احمدك يارب ان في حد قال معلومه صح

مينا                عيب يا استاذ ده انا علامه

الخادم             شاطر يا علامه .. قولي بقي اسقف علي مدينة ايه

 

 

مينا             كان اسقف علي مدينة سونا

الخادم            مدينة ايه ؟

مينا            مدينة سونا

الخادم           سونا !! سونا ايه يا ابو سونا .... القديس نيقولاوس كان اسقف علي مدينة مورا

مينا           يا استاذ مش هتفرق سونا مش مورا اهم كلهم اسماء بنات

الخادم             لا تفرق طبعا    ..... واللي ناس كتير ماتعرفوش انه كان ايام دقلديانوس

                واتعذب كتييير جدااا بس ربنا كان بيشفيه وكان مهتم جدااا بأولاده

                

رامي            انا فعلا اتعلمت حاجات كتييره جديده

مينا              وانا اتعلمت اني ماقولش اي كلام من غير ما اكون متأكد منه

ماجد             وانا اتعلمت ان في حاجات كتيره اهم من الشجر والزينه والهيصه

الخادم          صح الفرحه الحقيقيه ف الكريسماس هي الاحتفال مع المسيح ف كنيسته

                ها عرفتوا هتقدموا فقره عن ايه ف الكريسماس ؟

كلهم              اه هنعمل مسرحيه اسمها بابا نويل ستايل

                                                  ستــــــــــــــــــــاره

 لتنزيل الاسكتش للطباعة بصيغة ال word

 أضغط هنا