اسكتش المعلم عِكوة الجزار

 اسكتش المعلم عِكوة الجزار                                            

- يدخل الخادم وهو يصرخ : الحقوني .. الحقوني .. حد يخبيني .. في راجل غريب بيجري ورايا وماسك سكاكين في إيديه !!

(يختبئ وسط الأولاد)

- يدخل المعلم عكوة بضخامته وشاربه الثقيل مرتدياً جلباب واسع ممسكاً ببعض السكاكين البلاستيك أو الخشب ، ويصاحبه ابنه عطوه الذي يشبهه في جلبابه وضخامته أيضاً ويلف حول وسطه حزام فيه بعض السكاكين الخشبية أيضاً ..

عكوة : هو فين ؟ فين الباشخادم ده ياواد ياعطوة ؟ هو فين علشان يبقى كفته النهاردة ؟

عطوة : هو اللي واقف هناك ده يابا .

الخادم : في إيه بس يامعلم عكوه .. جرى إيه ؟ مالك ياعطوه ياحبيبي مش أنا لسه عازمك على رغيف عيش باللحمة الجمعة اللي فاتت ..

عكوة : بقى حضرتك بتحرض عيال الكنيسة إنهم ماياكلوش لحمة ويصوموا ؟ ليه يعني ؟ أمّال اللحمة اللي في المحل عندي دي أعمل فيها إيه .. أعلقها في النجفة عندي في البيت ؟ قب بالسكاكين ياواد ياعطوة .

عطوة : حاضر يابا .

الخادم : الحقوا ياولاد .. دول بيطلعوا سكاكين من كل حتة ، أصبر بس يامعلم عكوة وإهدى كده وأنا أفهمك .. هو إيه الغلط بس في اللي أنا قلته .. ماشي ياعطوة يا فتّان .. تروح تقول لأبوك على اللي أنا قلته الجمعة اللي فاتت .

عكوة : بقالي اسبوع ياراجل كل ما أنادي على حد من زبايني واقوله يجي يشترى اللحمة الكندوز اللي زي الورد .. يقول لي معلش أصل أنا صايم والولاد كلهم في البيت صايمين .. ولما سألت عرفت إن سيادتك اللي مسلطهم .. خسرتني نص الزباين وخربت بيتي منك لله .

الخادم : يا معلم وأنا ذنبي إيه .. هو أنا اللي بقول .. دي الكنيسة كلها صايمة .

عكوة : بقى الكنيسة كلها صايمة ياراجل يامفتري .. هو إحنا مش لسه مخلصين صوم الميلاد 43 يوم .. وقولنا ماشي الصوم حلو مافيش كلام .. وبعد شوية قالوا صوم النبي ده اللي قعد في بطن الحوت . اسمه إيه ياواد ياعطوة فكرني .

عطوة : يونان يابا .

عكوة : آه .. هو يونان ده ، وقلنا ماشي مايضرش دول 3 أيام ، لكن أسمع إن لسه في صيام تاني 55 يوم .. لا ده كتير أوي ، بقولك إيه ودع أهلك بالتليفون دلوقتي قبل ما أخلي كل حته فيك قد صباع المحشي ..

الخادم : طيب نتفاهم يامعلم

عكوة : مافيش تفاهم .. تحب توصي مين ياخد الكبدة ، ومين ياخد الكوارع .

الخادم : إيه ده إنت هتاخد الكوارع .. لا حرام عليك يامعلم عكوة .. وآجي الكنيسة من غير كوارع .. اتكلم يا عطوة ده أنا أستاذك .

عكوة : هو إنت هاتفضل فيك حاجة تيجي بيها الكنيسة .. خد هنا هاتروح مني فين .. نفسك في إيه قبل ماتموت ؟

الخادم : نفسي يامعلم إنك تديني فرصة أشرحلك ..

عكوة : هاتقول إيه بس بعد اللي قولته .. اسبوع ياراجل مافيش زبون يهوّب ناحية الدكان !! كل واحد يعدي يشوف اللحمة يروح مداري وشه الناحية التانية .. أنا قلت يمكن علشان اللحمة من غير هدوم والناس مكسوفة منها .. جبت شاش وغطيت اللحمة كلها لكن مافيش فايدة برضه .. تطلع إنت اللي مسلط الناس عليَّ وبتكلمهم عن الصوم .

الخادم : هو أنا بس اللي بتكلم يامعلم عكوة ؟؟ ما أبونا النهاردة اتكلم في القداس ، والكتاب المقدس مليان كلام عن الصوم .. هو أنا جايب حاجة من عندي ؟؟

عكوة : أبونا ؟! والكتاب المقدس ؟! وليه الإحراج ده بقى ؟ أنا مش مصدق أيُتها كلام من اللي بتقوله .. فين الكلام ده في الكتاب المقدس ؟

الخادم : الكتاب بيقول : "اعلموا أن الرب يستجيب لصلواتكم إن واظبتم على الصوم والصلوات أمام الرب" ودي في سفر يهوديت 4 : 12

عكوة : صحيح الكلام ده ياواد ياعطوه .. لا مؤاخذة ياحضرة الباشخادم .. أصل انا مش بعرف أستقرا كويس .. أصلي عقبال عندك ساقط رابعة ابتدائي .

عطوة : أيوه صح يابا .

عكوة : كده تحرجنا مع الناس يامهفو .. مهفوف يعني .. أصل أنا بحب أقص الكلام لا مؤاخذه .

الخادم : ماهو إنت لو تسمعني هاتفهم كل حاجة يامعلم .. الصوم ده حاجة ضرورية لكل واحد فينا .

عكوة : ضرورية ؟؟ أما أنا طلعت نايم على وداني ياجدعان .. طيب فهمني ينوبك فيَّ صوا .. صواب يعني ..

الخادم : أهو كده الكلا .. الكلام يعني .. أقعد وأنا أفهمك .. إحنا في الصوم بنعمل 4 حاجات يامعلم .. Search, control, delete, insert

عكوة : جينا بقى للكلام اللي يخربط النفوخ .. شكلك هاتتقطع شرايح مدورة زي الهمبرجر ..

الخادم : إيه ده إنت مش فاهم الكلام ده يا معلم ؟؟ ماعندكش كمبيوتر في البيت ؟ ده كلام سهل جداً ..

عكوة : يا جدع إنت كامبايوتر إيه ؟؟ بقولك ساقط رابعة ابتدائي .. واحدة واحدة عليَّ .

عطوة : أهو كل يوم جمعة يقولنا الكلام ده يابا اللي ماحدش فاهم منه حاجة .

الخادم : أنا كلامي مش بيتفهم ياعطوة .. ده أنا حتى كنت جايبلك معايا عسلية النهاردة ..

عطوة : ماتفهم بقى يابا ، كلام الأستاذ واضح وصريح .

الخادم : شوف يا معلم في الكمبيوتر بنلاقي زرار اسمه Search وده معناه "بحث" ، وباستخدمه لما أكون عايز أدور على أي حاجة في الكمبيوتر ، يعني لو عايز أسمع ترنيمة "رحلة جميلة" اكتب اسمها وأدوس عليه يروح مطلعهالي على طول ، واحنا في الصوم بنعمل Search في الكتاب المقدس ، يعني بندور على أوامر ربنا لينا بالصوم ، وبنبحث عن شخصيات صامت في الكتاب المقدس ، ولما عملنا Search لقينا آيات كتير بتكلمنا عن أهمية الصوم زي الآية اللي قولتهالك من شوية "اعلموا أن الرب يستجيب لصلواتكم إن واظبتم على الصوم والصلوات أمام الرب" ، وكمان لقينا شخصيات كتير صامت في الكتاب المقدس ، وكل صوم كان ليه سبب .. ممكن يكون في وقت تجربة أو ضيقة أو للحصول على بركة أو مغفرة ..

توبة ---- أهل نينوى (يون 3) – الشعب أيام نحميا (نح 9 : 1)

استلام الشريعة ---- موسى النبي (خر 34 : 28)

بدء الخدمة ---- السيد المسيح (مت 4: 2) ، الرسل (أع 13 : 2و3)

ضيقة ---- أستير (أس 4 : 3)

يعني الكنيسة أو أنا ما اخترعناش الصوم ده يا معلم .. لكن دي وصية ربنا لينا .

عكوة : بس ماتآخذنيش في الكلمة يعني .. الأصوام دي كتير أوي .. ايه أهميتها علشان تكون كتير كده ؟

الخادم : ما هي دي وظيفة الزرار التاني يامعلم .. زرار control ومعناه "التحكم" وده شبه فرامل العربية أو لجام الحصان ، وبتحكم بيه في باقي زراير الكمبيوتر علشان تنفذ أوامري .. يعني لو سبنا العربية من غير فرامل إيه اللي هايحصل ؟

عكوة : مؤكد حادثة أعوذ بالله .

الخادم : والحصان لو كان من غير لجام ؟

عكوة : أبوس ايدك ماتفكرنيش .. مرة عملتها وأنا صبي جزار زمان وركبت الحصان من غير لجام وطلع يجري بيَّ جوه السوق ، ومادرتش بنفسي غير وأنا بيشدوا الكرنبه من راسي .

الخادم : عظيم جداً .. هو الصوم كده بيخلينا نتحكم في نفسنا .. ربنا مش قصده إنه يحرمنا من أكل معين لأن اللحمة والفراخ واللبن .. كلها حاجات هو اللي خالقها ومفيدة .

عكوة : يكرم أصلك ياحضرة الباشخادم .

الخادم : لكن ربنا عايز يعلمني إني أقول لنفسي "لأ" على الحاجات اللي هي بتشتهيها ، وأعودها إنها تسمع كلامي وتنفذ أوامر صوت الروح القدس اللي جوايا .. علشان كده الصوم مش بيكون عن الأكل بس وللأسف ناس كتير فاهمين كده ، لكنه بيكون تحكم في كل خطية وتصرف غلط وفي كل لفظ مش مؤدب وكل فكر أو مشاعر مش كويسة .

عكوة : طيب الزرار التالت اللي هو .. تيييييت دوة بتاع إيه ؟

الخادم : مش تيت يا معلم .. اسمه delete ومعناه "حذف" ، وباستخدمه لما أكون عايز أمسح أي حاجة مش عايزها من الكمبيوتر ، وفي الصوم أنا باحذف كل العادات اللي مش مظبوطة زي اللي المظهرية يعني اللي بيحب يظهر قدام الناس صايم ويكشر ويقول سيبوني أنا تعبان ده أنا صايم ، أو حذف صفات مش كويسة موجودة فيَّ زي الكذب أو العنف أو الكراهية ، وأبدأ على طول في استخدام الزرار الرابع insert ومعناه "ادخال" يعني لازم لما أحذف حاجة أدخل مكانها حاجة تاني ..

* أحذف المظهرية ---- أدخل مكانها عدم التكبر والخفاء في الحياة مع الله .

* أحذف التكشير والزعل ---- وأدخل مكانه الفرح بيسوع .

* أحذف الكذب ----- أعمل insert على طول للصدق .

* أحذف العنف ----- أعمل insert للهدوء والسلام .

* أحذف الكراهية ---- تدخل مكانها المحبة ...

عكوة : يا سلام يا أستاذ .. ده حاجة عظمة خالص .. ده الصوم ده ميه ميه .. من بكره البيت كله يصوم يا واد ياعطوة ، أهه على الأقل تتعلم تبطل الكلام اللي بسمعه منك ده .. ومش لازم نبيع لحمة خلاص .

الخادم : لا يامعلم مش للدرجة دي .. أكيد في زباين تانيين مش مسيحيين هايشتروا لحمة ، ده إنت أجدع جزار يبيع لحمة كاوتش في السوق .. قصدي اللحمة الطرية اللي شبه الكاوتش .. وبعدين خلاص الفطار قرب وأنا حاجز ربع كليو لحمة من الفخدة ليَّ أنا والأولاد .. بس عايزك تنقيهولي بإيدك الحلوة دي ..

عكوة : ربع كيلو !! سن السكينة يا عطوة !! (يجري الخادم خارج الفصل ووراءه المعلم عكوة وابنه عطوة

 لتنزيل الاسكتش للطباعة بصيغة ال word

 أضغط هنا